4397/’13
ගරු බුද්ධික පතිරණ මහතා,— අධ්යාපන අමාත්යතුමාගෙන් ඇසීමට,—
(අ) (i) අධ්යාපන විද්යා පීඨවල පුහුණුව ලබන අභ්යාසලාභියෙකු සඳහා මාසිකව ගෙවනු ලබන මුදල කොපමණද;
(ii) එම මුදල ගෙවීම ආරම්භ කළ දිනය කවරේද;
(iii) එම මුදල ගෙවීම ආරම්භ කිරීමට පෙර ගෙවන ලද මුදල කොපමණද;
යන්න එතුමා සඳහන් කරන්නෙහිද?
(ආ) (i) සීමාවාසික කාලය තුළදී අධ්යාපන විද්යා පීඨ ගුරු අභ්යාසලාභියෙකුට වැටුප් හෝ දීමනා ලෙස ගෙවනු ලබන මුදල කොපමණද;
(ii) එම මුදල ගෙවීමට පෙර ගෙවන ලද මුදල කොපමණද;
(iii) වර්තමාන ජීවන වියදම හා සැසඳීමේදී දැනට ගෙවනු ලබන මුදල ප්රමාණවත් නොවන බව පිළිගන්නේද;
(iv) එසේ නම්, දැනට ඔවුන්ට ගෙවනු ලබන වැටුප හෝ දීමනා වැඩි කිරීමට කටයුතු කරන්නේද;
(v) එසේ නම්, එම දිනය කවරේද;
යන්න එතුමා මෙම සභාවට දන්වන්නෙහිද?
(ඇ) නොඑසේ නම්, ඒ මන්ද?
අසන ලද දිනය
2014-11-13
අසන ලද්දේ
ගරු බුද්ධික පතිරණ මහතා, පා.ම.
අමාත්යාංශය
අධ්යාපන
ව්යවස්ථාදායකය
ශ්රී ලංකා ප්රජාතාන්ත්රික සමාජවාදී ජනරජයේ හත්වැනි පාර්ලිමේන්තුව
සභාවාරය
1 වැනි සභාවාරය
(අ) (i) ජාතික අධ්යාපන විද්යාපීඨවල පූර්ව සේවා ගුරු අධ්යාපන පාඨමාලා නේවාසිකව හදාරනු ලබන ශික්ෂණලාභීන් සඳහා ආරම්භයේ සිටම දෑ අවුරුදු ආයතනික පුහුණු කාලසීමාවේදී හා එක් අවුරුදු සීමාවාසී ගුරු පුහුණු කාල සීමාවේ දී රජයෙන් මාසික දීමනාවක් සිදුන් වෙනුවෙන් විද්යාපීඨයට ලබා දේ. මෙම දීමනාව අදාළ ශික්ෂණලාභීන්ගේ සේවා පහසුකම් සඳහාත් ආහාර වියදම් සඳහාත් වැය කරනු ලැබේ. වසරින් වසර ආහාර ද්රව්යවල මිල ගණන් වැඩිවීමත් සමඟ එම මුදල වරින් වර සංශෝධනය වී ඇති අතර පහත සඳහන් පරිදි 2001 සිට ශික්ෂණලාභීන් සඳහා මාසිකව දීමනා ලබා දී ඇත.
|
වර්ෂය |
අභ්යාසලාභීන් නේවාසික/ ආයතනික පුහුණුව ලබන සිසුන්(1,2 වසර) |
සීමාවාසී ගුරු පුහුණුව ලබන සිසුන් (3 වන වසර ) |
|
2001 -2007 දක්වා |
රු.1500.00 |
රු. 2000.00 |
|
2007- 2011 දක්වා |
රු.2000.00 |
රු. 2500.00 |
|
2011 සිට මේ දක්වා |
රු.2500.00 |
රු. 3000.00 |
ඒ අනුව ජාතික අධ්යාපන විද්යාපීඨවල ආයතනික / නේවාසික පුහුණුව ලබන සිසුන්ට රු. 2500/-ක් හා සීමාවාසී සිසුන්ට රු.3000/-ක් ද දැනට ගෙවනු ලැබේ.
(ii) 2011.01.01 දින සිට එම මුදල ගෙවීම ආරම්භ කර ඇත.
(iii) එම මුදල ගෙවීමට පෙර අභ්යාසලාභී/නේවාසික ආයතනික පුහුණුව ලබන සිසුන් සඳහා රුපියල් 2,000ක් හා සීමාවාසී සිසුන්ට රුපියල් 2,500ක් බැගින් ගෙවා ඇත.
(ආ) (i) 2011.01.01 දින සිට මේ දක්වා සීමාවාසී කාලය තුළදී ගුරු අභ්යාසලාභියකු සඳහා රජය විසින් රුපියල් 3,000ක් ගෙවනු ලබයි. මෙම මුදල පෞද්ගලිකව අභ්යාසලාභියා අතට ගෙවනු ලැබේ.
(ii) එම මුදල ගෙවීමට පෙර සීමාවාසී සිසුන්ට රුපියල් 2,500ක් බැගින් ගෙවා ඇත.
(iii) වර්තමාන ජීවන වියදම හා සැසඳීමේදී දැනට ගෙවනු ලබන මුදල ප්රමාණවත් නොවන නිසා මාසික දීමනාව රුපියල් 1,000කින් වැඩි කිරීමට අමාත්ය මණ්ඩල සංදේශයක් ඉදිරිපත් කර ඇති අතර, එය අමාත්ය මණ්ඩලය විසින් අනුමත කර ඇත. එවිට අභ්යාසලාභීන් නේවාසික/ආයතනික පුහුණුව ලබන සිසුන්ට (1,2 වසර කාලය තුළ) ආහාර වියදම් සඳහා රුපියල් 3,500ක් විද්යාපීඨය වෙතද, සීමාවාසී සිසුන් සඳහා (3 වන වසර) රුපියල් 4,000ක මුදලක් හිමි වනු ඇත.
(iv) 2015.01.01 දින සිට අමාත්ය මණ්ඩල පත්රිකා 14/1766/530/037-01 හා 2014.12.03 දිනැති අමාත්ය මණ්ඩල සටහන අනුව 2015.01.01 දින සිට දීමනාව වැඩි කිරීම අනුමත කර ඇත. එහෙත් 2015 විසර්ජන ගිණුම මඟින් මේ සඳහා ප්රතිපාදන වෙන් කර නොමැති අතර, භාණ්ඩාගාරය සමඟ සාකච්ඡා කර ඉදිරියේදී එම දීමනාව ලබා දීමට අවශ්ය කටයුතු ක්රියාත්මක වෙමින් පවතී.
(v) භාණ්ඩාගාරයෙන් ප්රතිපාදන සලසා ගැනීමෙන් අනතුරුව 2015.01.01 දින සිට හිඟ දීමනාව සමඟ මෙම දීමනාව ගෙවීමට කටයුතු කරමි.
(ඇ) අදාළ නොවේ.
පිළිතුරු දුන් දිනය
2015-03-18
විසින් පිළිතුරු දෙන ලදී
ගරු අකිල විරාජ් කාරියවසම් මහතා, පා.ම.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
