ගරු දිනේෂ් හේමන්ත මහතා,— සෞඛ්‍ය සහ ජනමාධ්‍ය අමාත්‍යතුමාගෙන් ඇසීමට,— (1)
(අ) (i) 2025 වර්ෂයේදී සුනඛයන් සපා කෑම හේතුවෙන් ජලභීතිකා රෝගය වැළඳී මියගිය පුද්ගලයන් සංඛ්‍යාව කොපමණද;
(ii) එම වර්ෂයේදී ජලභීතිකා රෝගීන් සඳහා ප්‍රතිකාර සහ එන්නත්කරණ කටයුතු වෙනුවෙන් වැය කර ඇති මුදල කොපමණද;
(iii) සුනඛයින් වන්ධ්‍යාකරණය කිරීම සඳහා එම වර්ෂයේදී වෙන් කළ මුළු මුදල කොපමණද;
(iv) එම මුදල් භාවිතා කොට වන්ධ්‍යාකරණයට ලක්කළ වීදි සුනඛයින් සංඛ්‍යාව කොපමණද;
(v) සුනඛයින් වන්ධ්‍යාකරණ වැඩසටහන සඳහා 2026 වර්ෂය වෙනුවෙන් අමාත්‍යාංශයට වෙන් කර ඇති මුළු මුදල කොපමණද;
(vi) එම මුදල් භාවිතා කර 2026 වර්ෂයේ මේ වනවිට වන්ධ්‍යාකරණයට ලක් කළ වීදි සුනඛයින් සංඛ්‍යාව කොපමණද;
(vii) අමාත්‍යාංශය මඟින් ක්‍රියාත්මක කරන සුනඛයින් වන්ධ්‍යාකරණය කිරීමේ වැඩසටහනේ ස්වභාවය පිළිබඳව කෙටි විස්තරයක් කරන්නේද;
යන්න එතුමා මෙම සභාවට දන්වන්නෙහිද?
(ආ) නොඑසේ නම්, ඒ මන්ද?
අසන ලද දිනය
2026-08-19
අසන ලද්දේ
ගරු දිනේෂ් හේමන්ත මහතා, පා.ම.
අමාත්‍යාංශය
සෞඛ්‍ය සහ ජනමාධ්‍ය
ව්‍යවස්ථාදායකය
ශ්‍රී ලංකා ප්‍රජාතාන්ත්‍රික සමාජවාදී ජනරජයේ දසවැනි පාර්ලිමේන්තුව
සභාවාරය
1 වැනි සභාවාරය
(අ) (i) 14
(ii) රුපියල් 655,824,000.00කි.
(iii) 2025 වර්ෂයේ මහජන සෞඛ්‍ය පශු වෛද්‍ය සේවා සඳහා වෙන් වූ මුළු මුදල රුපියල් මිලියන 220ක් වන අතර, සුනඛ වන්ධ්‍යාකරණය ලෙස වි‍ශේෂිත වූ මුදලක් වෙන් කර නැත.
(iv) සුනඛ වන්ධ්‍යාකරණය සිදු කිරීමේදී වීදි සුනඛයින්, නිවාසවල ඇති කරන සුනඛයින් ලෙස වර්ගීකරණයක් සිදු නොකරන බැවින් වන්ධ්‍යාකරණය කළ වීදි සුනඛයින් සංඛ්‍යාව වාර්තා වී නොමැත.
(v) 2026 වර්ෂය සඳහා මහජන සෞඛ්‍ය පශු වෛද්‍ය සේවා අංශය මඟින් ක්‍රියාත්මක කරනු ලබන ජලභීතිකා මර්දන වැඩසටහන (සුනඛයන් එන්නත්කරණය, වන්ධ්‍යාකරණය, දැනුවත් කිරීමේ වැඩසටහන්ද ඇතුළුව සමස්ත වැඩසටහන) සඳහා වෙන් වූ මුදල රුපියල් මිලියන 51කි.
(vi) එක් එක් දිස්ත්‍රික්කයන්හි වන්ධ්‍යාකරණ කටයුතු අවසන් වූ පසු ලැබෙන වව්චර් සමඟ ඒ ඒ දිස්ත්‍රික්කයන්හි වන්ධ්‍යාකරණය කරනු ලබන සුනඛයන් සංඛ්‍යාව සඳහන් කර එවනු ලබන අතර, 2026.08.30 වන විට දිස්ත්‍රික්ක 4ක සුනඛයන් 5,951ක් වන්ධ්‍යාකරණයට ලක් කර ඇති අතර ඉතිරි දිස්ත්‍රික්කයන්හි වැඩසටහන ක්‍රියාත්මක වෙමින් පවතී.
(vii) මහජන සෞඛ්‍ය පශු වෛද්‍ය සේවා මඟින් අදාළ දිස්ත්‍රික්කයේ අවශ්‍යතාව පිළිබඳව විමසා බලමින් සංඛ්‍යාත්මක විස්තර ලබා ගන්නා අතර, අදාළ දිස්ත්‍රික් සෞඛ්‍ය වෛද්‍ය නිලධාරි කාර්යාලවලින් ලබා ගන්නා එම දත්ත මත පදනම්ව පළාත් සෞඛ්‍ය සේවා අධ්‍යක්ෂ කාර්යාලය මඟින් ප්‍රසම්පාදන කටයුතු සිදු කරනු ලබයි. පසුව ඉදිරිපත් වන ආයතන, පුද්ගලයින් හෝ ලංසු සලකා බලමින් රජයේ ප්‍රසම්පාදන ක්‍රියාවලියට අනුකූලව වන්ධ්‍යාකරණ සැත්කම් සඳහා සුදුසුම ආයතනය හෝ පුද්ගලයා තෝරා ගනු ලැබේ. එම ප්‍රසම්පාදන ක්‍රියාවලියට අනුව අනුමත ආයතන/පුද්ගලයන් වෙත කොන්ත්‍රාත් ප්‍රදානය සිදු කිරීමෙන් අනතුරුව, අදාළ සෞඛ්‍ය වෛද්‍ය නිලධාරින් සහ මහජන සෞඛ්‍ය පරීක්ෂකවරුන්ගේ පූර්ණ අධීක්ෂණය යටතේ වන්ධ්‍යාකරණ වැඩසටහන් ක්‍රියාත්මක කෙරේ. වැඩසටහන නිමා වූ පසු සිදු කරන ලද කාර්යයන් අදාළ ප්‍රමිතීන්ට අනුකූල බවට අධීක්ෂණ නිලධාරින් විසින් සහතික කරනු ලබන අතර, ඉන් පසුව අනුමත ක්‍රමවේදයන්ට යටත්ව අදාළ සේවාව වෙනුවෙන් ගෙවීම් සිදු කරනු ලබයි.
(ආ) පැන නොනගී.
පිළිතුරු දුන් දිනය
2026-10-20
විසින් පිළිතුරු දෙන ලදී
ගරු (වෛද්‍ය) නලින්ද ජයතිස්ස මහතා, පා.ම.
පාර්ලිමේන්තු අත්පොත
ශ්‍රී ලංකාවේ මැතිවරණ ක්‍රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්‍රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
