2026-06-17
පුවත් කාණ්ඩ : කාරක සභා පුවත්
2023 අංක 16 දරන ශ්රී ලංකා මහ බැංකු පනත යටතේ, 2026 මාර්තු 12 දිනැති අංක 2479/54 දරන අති විශේෂ ගැසට් පත්රයේ පළ කරන ලද රීති සහ 2023 අංක 16 දරන ශ්රී ලංකා මහ බැංකු පනත යටතේ 2026 ජුනි 09 දිනැති අංක 2492/10 දරන අති විශේෂ ගැසට් පත්රයේ පළ කරන ලද රීති, රජයේ මුදල් පිළිබඳ කාරක සභාවේදී සලකා බැලීමෙන් අනතුරුව අනුමැතිය ලබා දීම සිදු විය.
එම කාරක සභාව ගරු පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන් පසුගියදා (ජුනි 09) පාර්ලිමේන්තුවේදී රැස් වූ අවස්ථාවේදී මෙම අනුමැතිය හිමි විය.
2023 අංක 16 දරන ශ්රී ලංකා මහ බැංකු පනත යටතේ මුදල් ප්රතිපත්ති සම්පාදනය ඇතුළුව එහි කාර්යයන් ඉටු කිරීමේදී ශ්රී ලංකා මහ බැංකුවට බාහිර පාර්ශ්වවලින් සංඛ්යාලේඛන සහ තොරතුරු රැස් කර ගැනීමට අවශ්ය වේ. එම සංඛ්යාලේඛන, තොරතුරු වාර්තාකරණයට යටත් වන පුද්ගලයන් සහ අදාළ අවශ්යතා උල්ලංඝනය කිරීමේදී ගත හැකි පරිපාලන ක්රියාමාර්ග නියම කිරීම සඳහා ශ්රී ලංකා මහ බැංකු පනත යටතේ, 2026 මාර්තු 12 දිනැති අංක 2479/54 දරන අති විශේෂ ගැසට් පත්රයේ පළ කරන ලද රීති ඉදිරිපත් කොට තිබේ.
මෙම රීති මගින් සංඛ්යාලේඛන හා තොරතුරු ඉල්ලා සිටීම සඳහා නිවේදන නිකුත් කිරීමේ බලය ශ්රී ලංකා මහ බැංකුවේ බලයලත් නිලධාරීන් වන නියෝජ්ය අධිපතිවරුන්ට, ආර්ථික පර්යේෂණ දෙපාර්තමේන්තුවේ ප්රධානියාට සහ සංඛ්යාන දෙපාර්තමේන්තුවේ ප්රධානියාට පමණක් සීමා කෙරේ.
තවද, ලබා දෙන ලද තොරතුරු අදාළ අරමුණ සඳහා පමණක් භාවිතා කිරීම ඇතුළු ආරක්ෂාකාරී පියවරයන් මෙම රීති මගින් තහවුරු කිරීම සිදු වේ.
ශ්රී ලංකා මහ බැංකුව විසින් ඇතැම් රාජ්ය ණය දත්ත ප්රකාශයට පත් නොකිරීම පිළිබඳව කාරක සභාවේ අවධානයට ලක් වූ අතර එවැනි තොරතුරු දැනට රාජ්ය ණය කළමනාකරණ කාර්යාලය සතුව පවතින බවත්, එමඟින් මින් පෙර ශ්රී ලංකා මහ බැංකුව විසින් ප්රකාශයට පත් කරන ලද ආකෘතියට අනුව ණය සංඛ්යාලේඛන නැවත සැකසීමේ සීමාවන් පවතින බවත්, කාරක සභාවට මෙහිදී නිරීක්ෂණය විය. ශ්රී ලංකා මහ බැංකුවේ ප්රකාශන හරහා රාජ්ය ණය තොරතුරු වෙත ප්රවේශ වීමේ හැකියාව පවත්වා ගැනීමේ වැදගත්කම කාරක සභාව විසින් පෙන්වා දුන් අතර, රජයේ සුරැකුම්පත් සඳහා වන ද්විතීයීක වෙළඳපොළට අදාළ වාර්තා ප්රකාශයට පත් කිරීමේ ප්රමාදය පිළිබඳව ද අවධානය යොමු කෙරිණි.
තවද, සංචාරකයන් විසින් භාවිතා කරනු ලබන විවිධ ගෙවීම් ක්රම හේතුවෙන් සංචාරක ආදායම නිවැරදිව ගණනය කිරීම අභියෝගයක් වන බවත් එවැනි ඇස්තමේන්තුවල නිරවද්යතාව ඉහළ නැංවීම සඳහා දත්ත රැස් කිරීමේ සමීක්ෂණ වැඩිදියුණු කිරීම අවශ්ය බවත් කාරක සභාව විසින් පෙන්වා දෙන ලදී.
ශ්රී ලංකා මහ බැංකු පනත යටතේ 2026 ජුනි 09 දිනැති අංක 2492/10 දරන අති විශේෂ ගැසට් පත්රයේ පළ කරන ලද රීති පිළිබඳව ද කාරක සභාවේදී සලකා බැලීමෙන් අනතුරුව අනුමැතිය ලබා දීම සිදු විය. “2026 අංක 2 දරන අපනයන ඉපයීම් ශ්රී ලංකාවට ගෙන ඒමේ රීති” යනුවෙන් හඳුන්වනු ලබන මෙම රීති මගින් දැනට පවත්නා අපනයන ඉපයීම් ශ්රී ලංකාවට ගෙන ඒමේ රීතිය තවදුරටත් සංශෝධනය කරනු ලැබේ.
ඒ අනුව, ඕනෑම මාසයක් තුළ අපනයන ඉපයීම් ශ්රී ලංකාවට ගෙන්වා ගන්නා සෑම භාණ්ඩ අපනයනකරුවෙකුම එකී ආදායම, අවසර ලද ගෙවීම් සඳහා පමණක් භාවිතා කොට ශේෂය එළඹෙන මාසයේ 10වන දින හෝ ඊට ප්රථම හෝ ශ්රී ලංකා රුපියල් බවට අනිවාර්යයෙන්ම පරිවර්තනය කළ යුතු වේ. මීට පෙර 2024 වසරේ හඳුන්වාදුන් රෙගුලාසි මගින් ලබා දී තිබූ මාස 3ක කාල සීමාව මෙසේ එළඹෙන මාසයේ 10 වන දින දක්වා අඩු කර ඇත.
විනිමය අනුපාතිකයේ සහ විදේශ විනිමය වෙළඳපොලේ පවතින අස්ථාවරත්වය මෙන්ම විදේශ විනිමය ද්රවශීලතාවයේ හිඟකම සැලකිල්ලට ගෙන අපනයන ලැබීම්, ශ්රී ලංකා රුපියල් බවට පරිවර්තනය කිරීම සඳහා අපනයනකරුවන්ට ලබා දී ඇති කාලය අඩු කිරීම අවශ්ය බව ශ්රී ලංකා මහ බැංකුව විසින් මෙහිදී පෙන්වා දෙන ලදී.
මෙම පියවර මගින් වෙළඳපොළ විශ්වාසය අඩු වීම, විදේශ විනිමය වෙළඳපොළේ අස්ථාවරත්වය ඇති වීම ආදී තත්ත්වයන් ඇති විය හැකි බව කාරක සභාව විසින් පෙන්වා දෙන ලදී. මෙම පියවර, විනිමය අනුපාතිකයේ අස්ථාවරත්වය සහ වත්මන් විදේශ විනිමය සැපයුමේ හිඟය පියවා ගැනීම සඳහා කෙටිකාලීන ප්රතිපත්තිමය මෙවලමක් ලෙස හඳුන්වා දී ඇති බවත්, වෙළඳපොළ තත්ත්වයන් ස්ථාවර වූ පසු එය ලිහිල් කරන බවත් මහ බැංකු නිලධාරීහු මෙහිදී සඳහන් කළහ.
තවද, NDB බැංකුවේ සිදුව ඇතැයි කියන මූල්ය වංචාව සම්බන්ධයෙන් ද කාරක සභාවේදී සාකච්ඡා විය. මීට අදාළ ශ්රී ලංකා මහ බැංකුවේ කාර්යභාර්ය ඇතුළු අදාළ තාක්ෂණික කරුණු සම්බන්ධයෙන් දීර්ඝ ලෙස සාකච්ඡා වූ අතර මීට අදාළව සිදුවන වෝහාරික විගණනයකින් පසු එ් පිළිබඳව නැවත සළකා බැලීමටත් තීරණය විය.
කාරක සභා සාමාජික ගරු නියෝජ්ය අමාත්ය කෞෂල්යා ආරියරත්න, ගරු නියෝජ්ය අමාත්ය නිශාන්ත ජයවීර, ගරු පාර්ලිමේන්තු මන්ත්රීවරුන් වන නීතිඥ රවුෆ් හකීම්, රවි කරුණානායක, එම්.කේ.එම්. අස්ලම්, නිමල් පලිහේන, විජේසිරි බස්නායක, සුනිල් රාජපක්ෂ, තිළිණ සමරකෝන්, චම්පික හෙට්ටිආරච්චි සහ නීතිඥ ලක්මාලි හේමචන්ද්ර යන මහත්ම මහත්මීහු ද මහබැංකු අධිපති ආචාර්ය නන්දලාල් වීරසිංහ මහතා ඇතුළු නිලධාරීහු පිරිසක් මෙම කාරක සභා රැස්වීමට සහභාගී වූ අතර "පාර්ලිමේන්තුවේ අයවැය සහ ආර්ථික විශ්ලේෂණය ශක්තිමත් කිරීම" පිළිබඳ තාක්ෂණික සහාය ලබා දීමේ වැඩසටහනක් සඳහා මෙරටට පැමිණ සිටි ඇමරිකා එක්සත් ජනපද කොංග්රසයේ ප්රජාතන්ත්රවාදී එකමුතුවේ (House Democracy Partnership) සහ කොංග්රස් අයවැය කාර්යාලයේ (Congressional Budget Office) නියෝජිත පිරිසක් ද නිරීක්ෂකයින් ලෙස මෙම කාරක සභා රැස්වීමට එක්ව සිටියහ.
2026-08-07
විගණකාධිපති ධුරයේ වැටුප් හා දීමනා සම්බන්ධයෙන් දීර්ඝ වශයෙන් සාකච්ඡා කිරීමෙන් අනතුරුව, විගණකාධිපතිවරියගේ වැටුප අනුමත කිරීමට පාර්ලිමේන්තුවේ රජයේ මුදල් පිළිබඳ කාරක සභාව තීරණය කළේය.ඒ ගරු පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන්, ගරු නියෝජ්ය අමාත්යවරුන් වන චතුරංග අබේසිංහ, නිශාන්ත ජයවීර, ගරු පාර්ලිමේන්තු මන්ත්රීවරුන් වන රවී කරුණානායක, නිමල් පලිහේන, විජේසිරි බස්නායක, එම්.කේ.එම්. අස්ලම්, තිලිණ සමරකෝන් සහ චම්පික හෙට්ටිආරච්චි යන මහත්ම මහත්මීන්ගේ සහභාගීත්වයෙන් මෙම කාරක සභාව පාර්ලිමේන්තුවේදී පසුගියදා (04) රැස්වූ අවස්ථාවේදීය. ශ්රී ලංකා ප්රජාතාන්ත්රික සමාජවාදී ජනරජයේ ආණ්ඩුක්රම ව්යවස්ථාවේ 153(2) ව්යවස්ථාව ප්රකාරව විගණකාධිපති ධුරයේ වැටුප් සම්බන්ධයෙන් අදාළ යෝජනාව කාරක සභාවේ අවධානයට යොමු කර තිබිණි.එහිදී විගණකාධිපතිවරියගේ වගකීම්, රාජ්ය මූල්ය අධීක්ෂණය හා විගණන ක්ෂේත්රයේ ස්වාධීනත්වය ඇතුළු කරුණු සැලකිල්ලට ගනිමින් වැටුප් මට්ටම පිළිබඳව කාරක සභා සභාපතිවරයා ඇතුළු මන්ත්රීවරුන් විසින් අදහස් හා යෝජනා ඉදිරිපත් කරන ලදී. ආණ්ඩුක්රම ව්යස්ථාවේ 170 වෙනි ව්යවස්ථාව ප්රකාරව විගණකාධිපති රාජ්ය සේවකයකු නොවන බවත් පවත්නා රාජ්ය වැටුප් පරිමාණයෙන් බැහැරව විගණකාධිපතිවරයාගේ වැටුප සඳහා විශේෂ සැලකිල්ලක් යොමු කළ හැකි බවත් මෙහිදි වැඩිදුරටත් අදහස් දක්වමින් කාරක සභාව පවසා සිටියේය. යොජිත වැටුප, මීට පෙර සිටි විගණකාධිපතිවරුන්ගේ වැටුප් ද සලකා බලමින් මෙම තිරණයට එළඹුණ බව නිලධාරීන් විසින් පවසන ලදී. මිට පෙර, එය ජාතික වැටුප් හා සේවක සංඛ්යා කොමිෂන් සභාවෙන් තිරණය කළ ද වර්තමානයේ එවැනි කොමිසමක් නොමැති බවත් නිලධාරීහු සදහන් කළහ.විගණකාධිපතිවරිය සඳහා යෝජිත වැටුප් මට්ටම අනුමත කළ ද, එම තනතුරට පැවරී ඇති වගකීම් සහ කාර්යභාරය සැලකිල්ලට ගනිමින් වැටුප තවදුරටත් ඉහළ මට්ටමක පැවතිය යුතු බවට කාරක සභා සභාපතිවරයා ඇතුළු මන්ත්රීවරුන්ගේ අදහස විය. ඒ අනුව, අදාළ වැටුප් මට්ටම සම්බන්ධයෙන් ඉදිරියේදී තවදුරටත් අවධානය යොමු කර අවශ්ය තීරණ ගැනීමේ අවශ්යතාව ද කාරක සභාවේදී පෙන්වා දුන් අතර ස්ථිර සහ ස්වධින වැටුප් හා සේවක සංඛ්යා කොමිෂන් සභාවක් ස්ථාපිත කරන ලෙස කාරක සභාවේ සභාපති යෝජනා කළේය.
2026-08-07
මැතිවරණ ප්රතිසංස්කරණ සම්බන්ධයෙන් පුද්ගලයන් සහ සංවිධාන වෙතින් ලැබී ඇති යෝජනා 31ක් මෙන්ම මීට පෙර මැතිවරණ ප්රතිසංස්කරණවලට අදාළව ඉදිරිපත් කර ඇති පාර්ලිමේන්තු තේරීම් කාරක සභා වාර්තා සමාලෝචනය කර, වාර්තාවක් සකස් කිරීම සඳහා මැතිවරණ සම්බන්ධ නීති (පළාත් සභා ඡන්ද විමසීමට අදාළ නීති හැර) සමාලෝචනය කර පාර්ලිමේන්තුවට වාර්තා කිරීම සහ ඒ පිළිබඳ යෝජනා හා නිර්දේශ ඉදිරිපත් කිරීම සඳහා වන පාර්ලිමේන්තු විශේෂ කාරක සභාව විසින් විශේෂඥ මණ්ඩලයක් පත් කරන ලදී.ඒ මෙම විශේෂ කාරක සභාව රාජ්ය පරිපාලන, පළාත් සභා සහ පළාත් පාලන ගරු අමාත්ය මහාචාර්ය ඒ.එච්.එම්.එච්. අබයරත්න මහතාගේ සභාපතිත්වයෙන් පාර්ලිමේන්තුවේදී පසුගියදා රැස් වූ අවස්ථාවේදීය.එහිදී 2004, 2007 සහ 2022 වසරවල පාර්ලිමේන්තු තේරීම් කාරක සභා වාර්තා මෙන්ම පුද්ගලයන් හා සංවිධාන විසින් ඉදිරිපත් කර ඇති යෝජනා 31ක් පදනම් කර ගනිමින් මැතිවරණ ප්රතිසංස්කරණ සම්බන්ධයෙන් දීර්ඝ ලෙස සාකච්ඡා කෙරිණි.සාකච්ඡාවේදී පළාත් පාලන මැතිවරණ ක්රමය සඳහා මිශ්ර මැතිවරණ ක්රමයක් හඳුන්වා දීම, සුළු පක්ෂ හා සුළුතර කණ්ඩායම්වල නියෝජනය තහවුරු කිරීම, කාන්තා නියෝජනය වැඩිදියුණු කිරීම, විද්යුත් ඡන්ද ක්රමවේදයක් හඳුන්වා දීම සහ කල්තියා ඡන්දය ප්රකාශ කිරීමේ පහසුකම් සැලසීම ඇතුළු යෝජනා පිළිබඳව අවධානය යොමු විය. එමෙන්ම විදේශගත ශ්රී ලාංකිකයන්ට ඡන්ද අයිතිය ලබාදීම සම්බන්ධයෙන් වන යෝජනා පිළිබඳව ද සලකා බැලුණු අතර, ඒ සඳහා අවශ්ය නීතිමය හා පරිපාලනමය ප්රතිපාදන පිළිබඳ වැඩිදුර අධ්යයනය කිරීමේ අවශ්යතාව අවධාරණය කෙරිණි.කාරක සභාව විසින් පත් කළ විශේෂඥ මණ්ඩලය මඟින් ලැබී ඇති යෝජනා 31 සහ පූර්ව පාර්ලිමේන්තු තේරීම් කාරක සභා වාර්තා විශ්ලේෂණය කර ප්රායෝගික නිර්දේශ සහිත වාර්තාවක් සකස් කිරීමට නියමිත අතර, එම නිර්දේශ සමාලෝචනය කිරීම සඳහා ඉදිරි කටයුතු සිදු කිරීමට කාරක සභාව තීරණය කළේය.මෙම රැස්වීමට කාරක සභා සාමාජික ගරු අමාත්ය ආචාර්ය උපාලි පන්නිලගේ මහතා සහ ගරු පාර්ලිමේන්තු මන්ත්රීවරුන් වන රවී කරුණානායක, රුවන්තිලක ජයකොඩි සහ කදිරවේලු ෂන්මුගම් කුගදාසන් යන මහත්වරු සහභාගී වූහ.
2026-08-07
විවෘත පාර්ලිමේන්තු මුලාරම්භය සඳහා වන පාර්ලිමේන්තු සංසදය විසින් සංවිධානය කරනු ලබන ප්රාදේශීය වැඩමුළු මාලාවේ පළමුවැන්න ගම්පහ දිස්ත්රික් තරුණ ප්රජාව සඳහා අගෝස්තු 16 වැනිදා මීගමුව ජෙට්වින් බ්ලූ හෝටල් පරිශ්රයේදී පැවැත්වීමට නියමිත බව එම සංසදයේ සම සභාපති ගරු පාර්ලිමේන්තු මන්ත්රී ෂානක්කියන් රාජපුත්තිරන් රාසමාණික්කම් මහතා පැවසීය.ඒ මහතාගේ ප්රධානත්වයෙන් 2026.08.05 දින පැවති එම සංසදයේ රැස්වීමේදී මීට අදාළ සංවිධාන කටයුතු පිළිබඳව සාකච්ඡා කෙරිණි. තරුණ නියෝජිතයන්ගේ සහභාගීත්වයෙන් විවෘත පාර්ලිමේන්තු සංකල්පය තවදුරටත් ප්රවර්ධනය කිරීමේ අරමුණින් මෙම වැඩමුළු මාලාව සංවිධානය කෙරෙන අතර සංසදයේ සාමාජික මන්ත්රීවරු මෙන්ම ගම්පහ දිස්ත්රික් පාර්ලිමේන්තු මන්ත්රීවරුන් ද මෙම අවස්ථාවට සහභාගී වීමට නියමිතය.මෙම වැඩමුළු මගීන් විශේෂයෙන් තරුණ ප්රජාව පාර්ලිමේන්තු කටයුතු, ව්යවස්ථාදායක ක්රියාවලිය සහ විවෘත පාර්ලිමේන්තු මූලධර්ම පිළිබඳ දැනුවත් කිරීම මෙන්ම, පාර්ලිමේන්තුව සහ පුරවැසියන් අතර සම්බන්ධතාව තවදුරටත් ශක්තිමත් කිරීම ද අපේක්ෂා කෙරේ.මෙම රැස්වීමට සංසදයේ සාමාජික මන්ත්රීවරු සහ වැඩමුළු මාලාව සඳහා අනුග්රාහකත්වය සපයන සංවර්ධන සහකරු වන CII (Coalition for Inclusive Impact) ආයතනයේ නියෝජිතයෝ එක්ව සිටියහ.මෙම වැඩමුළුව සඳහා සහභාගීවීමට අපේක්ෂා කරන ගම්පහ දිස්ත්රික්කයේ වයස අවු 18 – 35 අතර තරුණ තරුණියන් https://forms.gle/aVp5UzhLbtPSmVap8 සබැඳිය ඔස්සේ අදාළ පෝරමය සම්පූර්ණ කොට ලියාපදිංචි විය විය යුතුය.
2026-08-05
2025 ඔක්තෝබර් මස 08 වන දින පැවති පොදු ව්යාපාර පිළිබඳ කාරක සභා රැස්වීමේදී ඉදිකිරීම් කර්මාන්ත සංවර්ධන අධිකාරියේ 2022 සහ 2023 වර්ෂවල විගණනය කරන ලද වාර්ෂික වාර්තා සහ එකී ආයතනයේ වත්මන් කාර්යසාධනය පිළිබඳ විමර්ශනය කිරීමේදී, එහි අධ්යක්ෂ මණ්ඩල සාමාජිකයින් දෙදෙනෙකුගේ හැසිරීම පිළිබඳව පොදු ව්යාපාර පිළිබඳ කාරක සභාවේ අවධානය යොමු ව තිබේ. මෙම රැස්වීම සඳහා සහභාගී වූ නිලධාරීන් අතරින් එක් අයෙකු, පාර්ලිමේන්තු කාරක සභා රැස්වීම් සඳහා සහභාගී වීමේ දී නිලධාරීන් විසින් තම ඇඳුම් පැළඳුම් සම්බන්ධයෙන් පිළිපැදිය යුතු වන නිර්නායකයන්ගෙන් බැහැරව, එකී අවස්ථාවට නුසුදුසු ආකාරයෙන් සැරසී රැස්වීමට සහභාගී වී සිටි බව කාරක සභාව විසින් නිරීක්ෂණය කරන ලදී. තවද, ඉහත කී නිලධාරීන් දෙදෙනාම පාර්ලිමේන්තු සම්ප්රදායට හා ක්රියාපටිපාටියට පටහැනි අයුරින් සභාපතිවරයාගේ පූර්ව අවසරයකින් තොරව කාරක සභා රැස්වීමෙන් බැහැර ගොස් ඇති බව ද කාරක සභාව විසින් සඳහන් කරන ලදී. මෙම සිද්ධීන් සම්බන්ධයෙන් පොදු ව්යාපාර පිළිබඳ කාරක සභාවේ සභාපතිවරයා විසින් මතු කරන ලද වරප්රසාද පිළිබඳ ගැටළුවට අනුව, පාර්ලිමේන්තුවට අපහාස කිරීමේ චෝදනාව යටතේ එම නිලධාරීන් දෙදෙනා 2026 පෙබරවාරි මස 17 වැනි දින ආචාරධර්ම හා වරප්රසාද පිළිබඳ කාරක සභාව හමුවේ පෙනී සිටිනු ලැබූ අතර, එහිදී, ඔවුන් විසින් සිය හැසිරීම සම්බන්ධයෙන් අවංකවම සමාව අයැද සිටින බව සඳහන් කෙරිණි. පාර්ලිමේන්තු කාරක සභාවල අධිකාරිය, ගෞරවය සහ ස්ථාපිත ක්රියාපටිපාටිවලට ගෞරව කිරීමේ වැදගත්කම පිළිබඳව නිසි අවබෝධයකින් යුතුව තම ක්රියාවන්හි බරපතලකම නිලධාරීන් විසින් අවබෝධ කරගෙන ඇති බව නිරීක්ෂණය කළ ආචාරධර්ම හා වරප්රසාද පිළිබඳ කාරක සභාව සහ පොදු ව්යාපාර පිළිබඳ කාරක සභාවේ සභාපතිවරයා විසින් ඒ පිළිබඳව නිසි පරිදි සලකා බැලීමෙන් අනතුරුව, ඉහත කී නිලධාරීන්ට සමාව ලබා දෙන ලෙස කරන ලද ඉල්ලීම පිළිගන්නා ලදී. පාර්ලිමේන්තු කාරක සභා රැස්වීම් සඳහා පෙනී සිටින සියලුම පුද්ගලයන් සෑම අවස්ථාවකදීම ඉහළම මට්ටමින් ආචාරධර්ම හා හැසිරීම් අනුගමනය කිරීමත්, පාර්ලිමේන්තු ක්රියාපටිපාටීන්ට අනුකූලව කටයුතු කිරීම සහ පාර්ලිමේන්තුවේ ගරුත්වය හා අධිකාරිය ආරක්ෂා කරමින් කටයුතු කිරීමත් අපේක්ෂා කරන බව පොදු ව්යාපාර පිළිබඳ කාරක සභාව තව දුරටත් අවධාරණය කරයි. පොදු ව්යාපාර පිළිබඳ කාරක සභාව ශ්රී ලංකා පාර්ලිමේන්තුව
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
