2026-06-12
පුවත් කාණ්ඩ : පුවත්
හෙට දවසේ නායකයින් වන ශිෂ්ය ප්රජාව, වැඩිහිටියන්ට ගරු කිරීම, සදාචාරාත්මක වටිනාකම් ආරක්ෂා කර ගැනීම සහ අවංක පුරවැසියන් ලෙස කටයුතු කිරීම අත්යවශ්ය බව ගරු නියෝජ්ය කථානායක වෛද්ය රිස්වි සාලි මහතා අවධාරණය කළේය.
මහනුවර විද්යාර්ථ විද්යාලයීය ශිෂ්ය පාර්ලිමේන්තුවේ මංගල සභාවාරය පසුගියදා ජනාධිපති ලේකම් කාර්යාලයේ පිහිටි ඓතිහාසික පැරණි පාර්ලිමේන්තු සභා ගර්භයේදී පැවැති අවස්ථාවට විශේෂ ආරාධිත අමුත්තා ලෙස එක්වෙමින් ගරු නියෝජ්ය කථානායකවරයා මෙම අදහස් පළ කළේය.
මහනුවර විද්යාර්ථ විද්යාලයේ සිසුන්ට පාර්ලිමේන්තු කටයුතු පිළිබඳ ප්රායෝගික අත්දැකීම් සහ ප්රජාතන්ත්රවාදී පාලන ක්රියාවලිය පිළිබඳව අවබෝධයක් ලබා දීමේ අරමුණින් මහනුවර විද්යාර්ථ විද්යාලය, ජනාධිපති ලේකම් කාර්යාලය සහ ශ්රී ලංකා පාර්ලිමේන්තුවේ සන්නිවේදන දෙපාර්තමේන්තුව එක්ව මෙම වැඩසටහන සංවිධානය කර තිබුණි.
ශිෂ්ය අවධියේ සිටම විනය, වගකීම සහ නායකත්ව ගුණාංග වර්ධනය කර ගැනීම අත්යවශ්ය බවත්, ජනතා නියෝජිතයන් ලෙස තේරී පත් වන පුද්ගලයන් සදාචාරාත්මක, වගකීම් සහගත හා නීතිගරුක පුද්ගලයන් බවට පත් කිරීම සඳහා ජනතාවට ද වැදගත් කාර්යභාරයක් ඇති බවත් සභාව අමතමින් ගරු නියෝජ්ය කථානායකතුමා සඳහන් කළේය.
මෙහිදී අදහස් දැක්වූ ජනාධිපති ජ්යෙෂ්ඨ අතිරේක ලේකම් රොෂාන් ගමගේ මහතා, ජනාධිපති අරමුදල මඟින් සිසුන් සහ මහජනතාව සඳහා සපයනු ලබන සේවාවන් පිළිබඳව පැහැදිලි කිරීමක් සිදු කළේය. අධ්යාපනික අවශ්යතා ඇතුළු විවිධ අවශ්යතාවන් සඳහා ජනාධිපති අරමුදල හරහා සහාය ලබා ගත හැකි බවත්, ප්රාදේශීය ලේකම් කාර්යාල මඟින් එම සේවාවන් ජනතාවට සමීප කර ඇති බවත් ඒ මහතා සඳහන් කළේය.
ශ්රී ලංකා පාර්ලිමේන්තුවේ ව්යුහය, කාර්යභාරය සහ පාර්ලිමේන්තු ක්රියා පටිපාටි පිළිබඳව ශ්රී ලංකා පාර්ලිමේන්තුවේ ව්යවස්ථාදායක සේවා අධ්යක්ෂ එම්. ජයලත් පෙරේරා මහතා විසින් සිසුන්ව දැනුවත් කළේය.
කෘත්රිම බුද්ධිය පවතින මේ යුගයේ තරගකාරී ලෝකයට සාර්ථකව මුහුණ දීම සඳහා අවශ්ය දැනුම හා කුසලතා වර්ධනය කර ගැනීමේ වැදගත්කම පිළිබඳව ජනාධිපති මාධ්ය උපදේශක චන්දන සූරියබණ්ඩාර මහතා අදහස් දැක්වීය.
අනතුරුව ශිෂ්ය පාර්ලිමේන්තුවේ මංගල සභාවාරය ආරම්භ වූ අතර, කථානායකවරයා තෝරා පත්කර ගැනීම සහ මන්ත්රීවරුන් දිවුරුම් දීම සිදු විය. අමාත්ය ධුර දරන සිසුහු තම අමාත්යාංශ හරහා පාසල තුළ ක්රියාත්මක කිරීමට අපේක්ෂිත වැඩසටහන් සහ සංවර්ධන යෝජනා සභාවට ඉදිරිපත් කළහ.
මෙම අවස්ථාවට සහභාගී වූ සිසුන් වෙත ගරු නියෝජ්ය කථානායකතුමා ඇතුළු සම්භාවනීය ආරාධිතයින්ගේ අතින් සහතිකපත් ප්රදානය කිරීම ද සිදු විය.වැඩසටහන අවසානයේ මහනුවර විද්යාර්ථ විද්යාලයේ විදුහල්පති එම්.ඒ.එස්. ශ්රීලාල් මහතා ස්තූති කතාව සිදු කළේය.
ජනාධිපති ලේකම් කාර්යාලය සහ ශ්රී ලංකා පාර්ලිමේන්තුවේ සන්නිවේදන දෙපාර්තමේන්තුව එක්ව ක්රියාත්මක කරන ශිෂ්ය පාර්ලිමේන්තු වැඩසටහන් මාලාවේ තවත් සාර්ථක පියවරක් ලෙස මෙම වැඩසටහන සංවිධානය කෙරුණු අතර, ජනාධිපති කාර්යාලයේ ත්රිවිධ හමුදා සම්බන්ධීකරණ ඒකකයේ අධ්යක්ෂ එයාර් කොමදෝරු ආසිරි ගාල්ලගේ, සහකාර අධ්යක්ෂ ලුතිනන් කර්නල් නදීක දංගොල්ල, පාර්ලිමේන්තුවේ අධ්යක්ෂ (සන්නිවේදන) සමන්ත මල්ලවආරච්චි යන මහත්වරුන් සහ විද්යාර්ථ විද්යාලයීය ගුරු මණ්ඩලය, දෙමාපියන් සහ සිසුන් ඇතුළු පිරිසක් මෙම අවස්ථාවට එක්ව සිටියහ.
2026-07-16
සාධාරණ පදනමකින් තොරව තමන්ට රිසි පරිදි මිල තීරණය කරන වෙළඳසැල්වල වෙළඳුන් වැටලීම සඳහා විමර්ශන නිලධාරීන් 272 දෙනෙකු පාරිභෝගික කටයුතු පිළිබඳ අධිකාරිය විසින් දිවයින පුරා යොදවා ඇති බව අනාවරණය වෙයි. දිස්ත්රික් ලේකම් කාර්යාලයට අනුයුක්තව දිස්ත්රික් ලේකම්වරයාගේ මගපෙන්වීම සහ අධීක්ෂණය යටතේ මෙම විමර්ශන නිලධාරීන් තම මෙහෙයුම් කටයුතු සිදු කරනු ඇත. පාරිභෝගික ජනතාව අසාධාරණයට ලක් කරන වෙළඳසැල්වල වෙළඳුන්ට එරෙහිව පාරිභෝගික කටයුතු පිළිබඳ අධිකාරිය විසින් නිරන්තරයෙන් නීතිමය පියවර ගනිමින් සිටී. ගරු පාර්ලිමේන්තු මන්ත්රී රුවන්තිලක ජයකොඩි මහතා විසින් ඉදිරිපත් කරන ලද ප්රශ්නවලට වෙළෙඳ, වාණිජ සහ ආහාර සුරක්ෂිතතා ගරු නියෝජ්ය අමාත්ය ආර්.එම්. ජයවර්ධන මහතා පාර්ලිමේන්තුවේදී ලබා දුන් පිළිතුරෙන් මේ බැව් කියැවිණි.නියෝජ්ය අමාත්යවරයාගේ පිළිතුරු කථාවට අනුව, අසාධාරණ මිල ගණන් යටතේ භාණ්ඩ අලෙවි කිරීම පාලනය කිරීමට අධිකාරිය සතුව වැඩපිළිවෙළක් පවතියි. පාලන මිලට භාණ්ඩ සුළු ප්රමාණයක් ඇත. පාලන මිල ඉක්මවා භාණ්ඩ අලෙවි කිරීම දඩයකට යටත් වන අතර මේ දක්වා විශාල දඩ මුදලක් අය කරගෙන තිබේ. පාරිභෝගික කටයුතු පිළිබඳ අධිකාරිය විසින් දෛනිකව සහ විශේෂ උත්සව සමයන්හිදී දිවයින පුරා වෙළඳපොළ වැටලීම් සහ පරීක්ෂාවන් සිදු කරනු ලබයි. මීට අමතරව, පාලන මිලක් නියම කර ඇති භාණ්ඩ සඳහා එම මිල ගණන් ක්රියාත්මක වීම අධීක්ෂණය කිරීමට ද විශේෂ වැඩපිළිවෙළක් ක්රියාත්මක වේ.
2026-07-16
පෙර පාසල් අධ්යාපනය පිළිබඳ ජාතික ප්රතිපත්තිය, ළමා ආරක්ෂාව, ශාරීරික දණ්ඩන හා නීතිමය පසුබිම සහ ධනාත්මක ශික්ෂණයේ වැදගත්කම පිළිබඳව ගරු පාර්ලිමේන්තු මන්ත්රීවරුන් දැනුවත් කිරීමේ වැඩසටහනක් පාර්ලිමේන්තුවේදී පසුගියදා (ජූලි 08) පැවැත්විණි.කාන්තා හා ළමා කටයුතු ගරු අමාත්ය සරෝජා සාවිත්රි පෝල්රාජ්, ගරු නියෝජ්ය අමාත්ය වෛද්ය නාමල් සුදර්ශන යන මහත්ම මහත්මීන්ගේ ප්රධානත්වයෙන් පැවති මෙම වැඩසටහනට මැති ඇමතිවරු රැසක් සහභාගී වූහ. මෙහිදී පෙර පාසල් අධ්යාපනය පිළිබඳ ජාතික ප්රතිපත්තිය පිළිබඳව අධ්යාපන අමාත්යාංශයේ අධ්යක්ෂ (පෙර පාසල් අධ්යාපන) කේ.ඩී.ටී විමලසිරි මහත්මිය අදහස් දැක්වූවාය. පෙර පාසල් අධ්යාපන ප්රතිසංස්කරණ 2027 වසරේ සිට ක්රියාත්මක කිරීමටත්, ඒ අනුව විෂයමාලා රාමුවට අදාළව පෙර පාසල් ගුරු අත්පොතක් සහ ආදර්ශ ක්රියාකාරකම් පොතක් අගෝස්තු මාසයේදී ගරු අග්රාමාත්යවරියගේ ප්රධානත්වයෙන් එලි දැක්වීමටත් නියමිත බව මෙහිදී අනාවරණය විය. එසේම, පෙර පාසල් ගුරු පුහුණුව සඳහා ජාතික අධ්යාපන ආයතනය මගින් ප්රධාන පුහුණුකරුවන් 108 දෙනෙකු පුහුණු කිරීමටත්, ඔවුන් මගින් පළාත් මට්ටමින් තවත් පුහුණුකරුවන් 556 දෙනෙකුට පුහුණුව ලබා දීමටත් අපේක්ෂා කරන බව ඇය පැවසුවාය. ඒ අනුව දැනට හඳුනාගෙන ඇති 35000 කට ආසන්න පෙර පාසල් ගුරුවරුන්ට දින 10 ක පුහුණුවක් ලබන නොවැම්බර් සහ දෙසැම්බර් මාසවලදී ලබා දීමට කටයුතු කරන බවටත් ඒ අනුව එකම විෂය රාමුවකට පෙර පාසල් ඉගැන්වීම් කටයුතු සිදු කිරීමට හැකි වනු ඇති බවත් ඇය සඳහන් කළාය. එසේම, පෙර පාසල් සඳහා ඇගයීම් හා නියාමන රාමුවක් සකස් කිරීමටත්, ලබන වසර වන විට පෙර පාසල් අධ්යාපනය පිළිබඳ ජාතික ප්රතිපත්තිය පනතක් බවට පත් කිරීමටත් අපේක්ෂා කරන බවද මෙහිදී අනාවරණය විය. අධ්යාපන, උසස් අධ්යාපන හා වෘත්තීය අධ්යාපන අමාත්යාංශය, කාන්තා සහ ළමා කටයුතු අමාත්යාංශය, සෞඛ්ය අමාත්යාංශය, ජාතික අධ්යාපන ආයතනය, ජාතික අධ්යාපන කොමිෂන් සභාව ඇතුළු පාර්ශ්ව ගණනාවකගේ දායකත්වයෙන් මෙම ප්රතිපත්තිය සකස් කළ බව ද ඇය සඳහන් කළාය. ජාතික ළමා ආරක්ෂක අධිකාරියේ සභාපතිනි ප්රීති ඉනෝකා රණසිංහ, ජාතික ළමා ආරක්ෂක අධිකාරියේ නීතිය බලගැන්වීම් අධ්යක්ෂිකා නීතීඥ සජීවනි අබේකෝන්, ජාතික ළමා ආරක්ෂක අධිකාරියේ නීති අධ්යක්ෂ නීතීඥ ප්රීතිකා සකලසූරිය සහ විශේෂඥ වෛද්ය දර්ශනී හෙට්ටිආරච්චි යන මහත්මීන් විසින් ළමා ආරක්ෂාව සහ ජාතික ළමා ආරක්ෂක අධිකාරියේ කාර්යභාරය, ශාරීරික දඬුවම් අහෝසි කිරීම සඳහා යෝජිත නීතිමය සංශෝධන, ළමා සංවර්ධනය කෙරෙහි දඬුවම්වල බලපෑම, දඬුවමට ඇති බිය නිසා විනය ආරක්ෂා කිරීමට වෙනුවට ‘ධනාත්මක විනය’ දරුවන්ට පුහුණු කිරීම ඇතුළු කරුණු ගණනාවක් පිළිබඳව මෙහිදී දැනුවත් කිරීම සිදු කරන ලදී. ශ්රී ලංකාව තුළ ළමයින්ට එරෙහි ප්රචණ්ඩත්වය සහ කායික දඬුවම් වැළැක්වීම සඳහා නීතිමය හා ප්රතිපත්තිමය වෙනසක් සිදු කරමින් පවතින බවත්, ජාතික ළමාරක්ෂක අධිකාරිය සිය නියාමන හා සම්බන්ධීකරණ භූමිකාව ශක්තිමත් කිරීමට කටයුතු කරන බවත් එම නිලධාරීහු පෙන්වා දුන්හ. දණ්ඩ නීති සංග්රහය සංශෝධනය කිරීම මගින් කායික දණ්ඩනය අහෝසි කිරීමට යෝජනා වී ඇති බවත් ශ්රී ලංකාව එක්සත් ජාතීන්ගේ ළමා අයිතිවාසිකම් ප්රඥප්තියට (UNCRC) අත්සන් තැබූ රටක් ලෙස, දරුවන්ට සිදුවන කායික හා මානසික හිංසනය වැළැක්වීමට ජාත්යන්තරව බැඳී සිටින බවත් මෙහිදී ඔවුහු පෙන්වා දුන්හ.පෙර පාසල් අධ්යාපනය පිළිබඳ ජාතික ප්රතිපත්තියක් සකස් කිරීමට දායකත්වය දැක්වූ සියලු පාර්ශ්වයන්ට කාන්තා හා ළමා කටයුතු ගරු අමාත්ය සරෝජා සාවිත්රි පෝල්රාජ් මහත්මිය සිය ස්තුතිය පළ කළ අතර නෛතික සංශෝධන කිසිදු පාර්ශ්වයක් ඉලක්ක කර ගනිමින් සිදු නොකළ යුතු බව ද පෙන්වා දුන්නාය. එසේම දරුවන්ගේ ආරක්ෂාව වෙනුවෙන් ගතහැකි උපරිම පියවර ගන්නා බව ද ඇය අවධාරණය කළාය.මෙම වැඩපිළිවෙල ගරු පාර්ලිමේන්තු මන්ත්රීවරුන්ගේ ඇගයීමට ලක්වූ අතර ඔවුන්ගේ අදහස් හා යෝජනා ඉදිරිපත් කිරීමට ද අවස්ථාව සැලසිණි.
2026-07-16
ශ්රී ලංකාවේ කොරියානු ජනරජයේ (දකුණු කොරියාව) ගරු තානාපතිනි මියන් ලී (Miyon Lee) මහත්මිය පාර්ලිමේන්තුවේදී පසුගියදා ගරු කථානායක වෛද්ය ජගත් වික්රමරත්න මහතා හමුවිය. මෙම අවස්ථාව සඳහා පාර්ලිමේන්තුවේ මහලේකම් කුෂානි රෝහණදීර මහත්මිය ද එක්ව සිටියාය.මෙම හමුවේදී ගරු කථානායකවරයා ශ්රී ලංකාව සහ කොරියානු ජනරජය අතර පවතින දිගුකාලීන මිත්රත්වය අගය කළ අතර, ශ්රී ලංකාව මුහුණ දුන් ආර්ථික අර්බුදය අවස්ථාවේදී මෙන්ම රටේ සංවර්ධන කටයුතු සඳහා කොරියාව අඛණ්ඩව ලබා දෙන සහයෝගය පිළිබඳ සිය කෘතඥතාව පළ කළේය. එමෙන්ම කොරියානු ජනරජය තුළ ශ්රී ලාංකික ශ්රමිකයින් සඳහා පවතින රැකියා අවස්ථා ශ්රී ලංකාවේ ආර්ථිකයට සැලකිය යුතු දායකත්වයක් සපයන බව ද කථානායකවරයා අවධාරණය කළේය.තවද, දූෂණය තුරන් කිරීම, විනිවිදභාවය හා යහපාලනය ශක්තිමත් කිරීම සඳහා රජය ගෙන යන වැඩපිළිවෙළ පිළිබඳව කථානායකවරයා තානාපතිනිය දැනුවත් කළේය. ජාතික සංහිඳියාව ඉදිරියට ගෙන යාම, සාමකාමී හා ආයෝජන හිතකාමී පරිසරයක් ගොඩනැගීම සහ විදේශ ආයෝජන ආකර්ෂණය කර ගැනීම සඳහා ගෙන ඇති පියවර ද කථානායකවරයා මෙහිදී පැහැදිලි කළ අතර, සංචාරක ක්ෂේත්රය ශක්තිමත් කිරීම සඳහා රජය ගෙන යන වැඩපිළිවෙළ පිළිබඳව ද සඳහන් කරමින් කොරියානු ආයෝජකයන්ට ශ්රී ලංකාවේ ආයෝජන අවස්ථා සොයා බලන ලෙස ආරාධනා කළේය.විවිධ ක්ෂේත්රයන්හි දැනුම හා අත්දැකීම් හුවමාරු කරගනිමින් ශ්රී ලංකාවට අඛණ්ඩ සහයෝගය ලබාදීමට කොරියානු ජනරජය සූදානමින් සිටින බව මෙහිදී අදහස් දක්වමින් තානාපතිවරිය පැවසුවාය. එමෙන්ම, ශ්රී ලංකාවේ දූෂණ විරෝධී වැඩසටහන් සඳහා ද සහයෝගය ලබාදීමට තම රට කැමැත්තෙන් පසුවන බව ද ඇය සඳහන් කළාය.ලබන වසරේදී ශ්රී ලංකාව සහ කොරියානු ජනරජය අතර රාජ්ය තාන්ත්රික සබඳතා ආරම්භ කර වසර 50ක් සපිරීම සම්බන්ධයෙන් ද මෙහිදී අවධානය යොමු වූ අතර, එම සුවිශේෂී සංවත්සරය දෙරට අතර සබඳතා තවදුරටත් ශක්තිමත් කිරීමට මහඟු අවස්ථාවක් වනු ඇතැයි තානාපතිනිය සඳහන් කළාය. එම සංවත්සරය නිමිත්තෙන් දෙරටේ පාර්ලිමේන්තු අතර හුවමාරු වැඩසටහන් තවදුරටත් පුළුල් කිරීම පිළිබඳව ද මෙහිදී සාකච්ඡා කෙරිණි.මෙම හමුව අවසානයේදී දෙරටේ දේශපාලනික හා සංස්කෘතික පසුබිම් සම්බන්ධයෙන් ද සුහද අදහස් හුවමාරුවක් සිදු වූ අතර, ශ්රී ලංකාව සහ කොරියානු ජනරජය අතර දිගුකාලීන මිත්රත්වය සහ සහයෝගීතාව තවදුරටත් වර්ධනය කර ගැනීම සඳහා දෙපාර්ශ්වයේම කැපවීම එහිදී යළි තහවුරු කෙරිණි.
2026-07-15
ශ්රී ලංකා–දකුණු අප්රිකා පාර්ලිමේන්තු මිත්රත්ව සංගමයේ ප්රථම විධායක කමිටු රැස්වීම පසුගියදා (ජූලි 09), සංගමයේ සභාපතිනි කාන්තා හා ළමා කටයුතු ගරු අමාත්ය සරෝජා සාවිත්රි පෝල්රාජ් මහත්මියගේ ප්රධානත්වයෙන් පාර්ලිමේන්තුවේදී පැවැත්විණි.මෙම රැස්වීමට ශ්රී ලංකාවේ දකුණු අප්රිකානු මහ කොමසාරිස් කාර්යාලයේ වැඩබලන ප්රධානී දේශපාලන උපදේශක න්තාබිසෙන්ග් රමට්ෂෙලා (Ms. Nthabiseng Ramatshela) මහත්මිය සහභාගී වූ අතර, ශ්රී ලංකාව හා දකුණු අප්රිකාව අතර ද්විපාර්ශ්වික සබඳතා තවදුරටත් ශක්තිමත් කිරීම සහ පාර්ලිමේන්තු සබඳතා ප්රවර්ධනය කිරීම සඳහා දකුණු අප්රිකාවේ අඛණ්ඩ කැපවීම ඇය යළිත් තහවුරු කළාය. පැමිණ සිටි පිරිස පිළිගනිමින් ගරු අමාත්ය සරෝජා සාවිත්රි පෝල්රාජ් මහත්මිය සඳහන් කළේ, පාර්ලිමේන්තු මිත්රත්ව සංගම් පාර්ලිමේන්තු රාජ්ය තාන්ත්රිකත්වය තුළින් ද්විපාර්ශ්වික සබඳතා ශක්තිමත් කිරීම සඳහා වැදගත් මෙහෙයක් ඉටු කරන බවයි. එමෙන්ම, එවැනි සංගම් මඟින් පාර්ලිමේන්තු මන්ත්රීවරුන්ට විදෙස් ව්යවස්ථාදායකයන් සමඟ සම්බන්ධ වී දැනුම හා අත්දැකීම් හුවමාරු කර ගැනීමටත්, දෙරටටම ප්රයෝජනවත් විවිධ ක්ෂේත්රවල සහයෝගීතාව ප්රවර්ධනය කිරීමටත් ඉඩ සැලසෙන බවද ඇය පෙන්වා දුන්නාය. තවද, මෙම ප්රථම විධායක කමිටු රැස්වීම දසවැනි පාර්ලිමේන්තුවේ ශ්රී ලංකා–දකුණු අප්රිකා පාර්ලිමේන්තු මිත්රත්ව සංගමයේ කටයුතු ආරම්භ කිරීම සනිටුහන් කරන අතර, දෙරට අතර දීර්ඝකාලීන මිත්රත්වය තවදුරටත් ශක්තිමත් කිරීමේ තවත් වැදගත් පියවරක් බවද සභාපතිනිය සඳහන් කළාය. 1994 වසරේ රාජ්යතාන්ත්රික සබඳතා පිහිටුවීමෙන් අනතුරුව, ප්රජාතන්ත්රවාදී වටිනාකම්, සාමය, අන්යෝන්ය ගෞරවය සහ තිරසාර සංවර්ධනය යන පොදු මූලධර්ම මත පදනම්ව ශ්රී ලංකාව සහ දකුණු අප්රිකාව අතර සුහද සබඳතා අඛණ්ඩව පවත්වාගෙන යන බවද ඇය සිහිපත් කළාය.සාකච්ඡාවලදී දෙපාර්ශ්වයම අවධාරණය කළේ, නීති සම්පාදකයන් අතර නිරන්තර සංවාදය තුළින් පාර්ලිමේන්තු හා රාජ්යතාන්ත්රික සබඳතා තවදුරටත් ශක්තිමත් කිරීමේ වැදගත්කම මෙන්ම ජනතාව අතර සබඳතා වඩාත් පුළුල් ලෙස ප්රවර්ධනය කිරීමේ අවශ්යතාවයයි. විශේෂයෙන්ම, දේශපාලන තීරණ ගැනීමේ ක්රියාවලියේ කාන්තාවන්ගේ සහභාගිත්වය සහ නායකත්වය වැඩිදියුණු කිරීමේ අරමුණින් දෙරටේ කාන්තා පාර්ලිමේන්තු මන්ත්රීවරියන් අතර සහයෝගීතාව වර්ධනය කිරීම පිළිබඳව විශේෂ අවධානය යොමු කෙරිණි.වෙළෙඳ හා ආයෝජන සහයෝගීතාව පිළිබඳව ද සාකච්ඡාවේදී විශේෂ අවධානය යොමු විය. කෘෂිකර්මාන්තය, පතල් කර්මාන්තය, සංචාරක කර්මාන්තය, පුනර්ජනනීය බලශක්තිය සහ අනෙකුත් නැගී එන කර්මාන්ත ඇතුළු ක්ෂේත්රවල ද්විපාර්ශ්වික වෙළෙඳාම තවදුරටත් පුළුල් කිරීම පවතින අවස්ථාවන් පිළිබඳව ද සාමාජිකයෝ කරුණු පෙන්වා දුන්හ. අප්රිකානු වෙළෙඳපොළ වෙත ප්රවේශ වීම සඳහා දකුණු අප්රිකාව උපායමාර්ගික පිවිසුම් දොරටුවක් ලෙසත්, දකුණු ආසියාව සහ ඉන්දීය සාගර කලාපය වෙත ප්රවේශ වීම සඳහා ශ්රී ලංකාව වැදගත් පිවිසුම් දොරටුවක් ලෙසත් මෙහිදී සඳහන් විය. එමෙන්ම, එක්ස්පෝ 2027 ප්රදර්ශනයට අදාළව කළ ආරාධනයට අනුව ලබන වසරේ ජනවාරි මාසයේදී ව්යාපාරික දූත පිරිසක් ශ්රී ලංකාවට රැගෙන ඒමට අපේක්ෂා කරන බව දකුණු අප්රිකානු පාර්ශ්වය ප්රකාශ කළේය.දෙරට අතර පවතින දීර්ඝකාලීන ක්රීඩා සබඳතා සැලකිල්ලට ගනිමින්, ක්රිකට් සහ රග්බි ක්රීඩාවන් මඟින් ක්රීඩා රාජ්ය තාන්ත්රිකත්වය ශක්තිමත් කිරීම පිළිබඳව ද සාමාජිකයෝ අදහස් හුවමාරු කර ගත්හ. එමෙන්ම, විශ්වවිද්යාල හවුල්කාරිත්වයන්, ශිෂ්යත්ව අවස්ථා සහ අධ්යයන හුවමාරු වැඩසටහන් ඇතුළුව අධ්යාපනය හා නිපුණතා සංවර්ධන ක්ෂේත්රවල සහයෝගීතාව වර්ධනය කිරීමේ අවස්ථා පිළිබඳව ද සාකච්ඡා කෙරිණි.ශ්රී ලංකාවේ ජාතික සමගිය තවදුරටත් ශක්තිමත් කිරීමේ අඛණ්ඩ ප්රයත්නයන්ට සහාය වීම සඳහා, සංහිඳියාව සහ ජාතික ගොඩනැගීම සම්බන්ධයෙන් දකුණු අප්රිකාව ලද අත්දැකීම් සහ පාඩම් හුවමාරු කර ගැනීමට සූදානම් බව දකුණු අප්රිකානු නියෝජිත පිරිස ප්රකාශ කළහ.විධායක කමිටු සාමාජිකයන් අතර පැවති සාකච්ඡාවෙන් අනතුරුව, සංගමයේ ලේකම් ගරු පාර්ලිමේන්තු මන්ත්රී සුනිල් රාජපක්ෂ මහතා විසින් මෙම කටයුතු හා සම්බන්ධ සියලු පාර්ශ්වයන්ට ස්තුතිය පළ කිරීමෙන් අනතුරුව රැස්වීම අවසන් විය.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
