2026-01-27
පුවත් කාණ්ඩ : පුවත්
2026 ජනවාරි 19 සිට 21 දක්වා බොට්ස්වානාවේ ගැබරෝන් නගරයේ පැවති මානව-වනජීවී සහජීවනය පිළිබඳ ජාත්යන්තර පාර්ලිමේන්තු සම්මන්ත්රණය සඳහා ශ්රී ලංකාවේ නියෝජිත පිරිසක් සහභාගී වූ අතර මේ සඳහා බොට්ස්වානාව, අනෙකුත් අප්රිකානු රටවල්, තෝරාගත් යුරෝපීය සංගම් සාමාජික රටවල් මෙන්ම ආසියානු රටවල් ඇතුළු රටවල් 12 ක පාර්ලිමේන්තු මන්ත්රීවරු සහභාගී වී සිටියහ.
මෙම තෙදින ජාත්යන්තර සම්මන්ත්රණයේදී දේශගුණික විපර්යාස, ඉඩම් පරිහරණයට අදාළ ගැටලු, වාසස්ථාන අහිමි වීම සහ ජනගහන වෙනස්වීම් හේතුවෙන් වර්ධනය වන සමාජ-පාරිසරික අභියෝගයක් වන මානව-වනජීවී ගැටුමට විසඳුම් සෙවීම කෙරෙහි අවධානය යොමු විය. මානව ජනගහනය සහ වනජීවීන් අතර තිරසාර සහජීවනය වර්ධනය කිරීම අරමුණු කරගත් ප්රතිපත්තිමය අත්දැකීම් සහ නිවැරදි භාවිතයන් හුවමාරු කර ගැනීම සඳහා පාර්ලිමේන්තු මන්ත්රීවරුන්, රජයේ ජ්යෙෂ්ඨ නිලධාරීන්, සිවිල් සමාජ නියෝජිතයින්, ප්රාදේශීය ප්රජා නායකයින් සහ වනජීවී සංරක්ෂණ විශේෂඥයින් මෙම අවස්ථාවට එක්ව සිටියහ.
ගරු පරිසර නියෝජ්ය අමාත්ය ඇන්ටන් සරත් ජයකොඩි සහ ගරු පාර්ලිමේන්තු මන්ත්රී කිංස් නෙල්සන් යන මහත්වරු මෙහිදී ශ්රී ලංකාව නියෝජනය කළ අතර දීර්ඝ කාලයක් පුරා පවතින අලි–මිනිස් ගැටුම කළමනාකරණය කිරීමට අදාළ ශ්රී ලංකාවේ ජාතික දැක්ම , ප්රතිපත්ති සහ අත්දැකීම් ඉදිරිපත් කළහ.
එහිදී 2026.01.19 වැනිදා ගරු නියෝජ්ය අමාත්යවරයා අලි- මිනිස් ගැටුම් කළමනාකරණය කිරීමේ ශ්රී ලංකාවේ පුළුල් අත්දැකීම් ඉදිරිපත් කළ අතර, කෙටිකාලීන ක්රියාමාර්ගවල සිට විස්තීර්ණ හා දූරදර්ශි ප්රතිපත්ති සහ ව්යවස්ථාදායක විසඳුම් වෙත යොමු වීමේ අවශ්යතාව අවධාරණය කළේය. විශේෂයෙන් අලින්ට ජීවත්වීමට උචිත කලාප ඇති කිරීම තුළින් අලි මිනිස් ගැටුම සඳහා දීර්ඝ කාලීන විසඳුම් සැපයීම පිළිබඳ මෙම සාකච්ඡාවේ දී ගරු පරිසර නියෝජ්ය අමාත්යතුමා විසින් කරුණු ඉදිරිපත් කරන ලදී. පර්යේෂණ පදනම් කරගත් ප්රතිපත්ති සංවර්ධනය, තාක්ෂණික නවෝත්පාදනය සහ විශේෂයෙන් සමාන අභියෝග වලට මුහුණ දෙන ආසියානු රටවල් අතර ශක්තිමත් ජාත්යන්තර සහයෝගීතාවයේ වැදගත්කම ද ඔහු තවදුරටත් අවධාරණය කළේය.
2026.01.20 වන දින, ගරු පාර්ලිමේන්තු මන්ත්රී කිංස් නෙල්සන් මහතා "මානව ක්රියාකාරකම් කෙරෙහි වන ජීවීන්ගේ බලපෑම කළමනාකරණය කිරීම: ප්රජා පාදක ස්වාභාවික සම්පත් කළමනාකරණය සහ ප්රතිලාභ බෙදාගැනීමේ ආකෘති" යන මැයෙන් සැසිය ආමන්ත්රණය කළේය. එහිදී මන්ත්රීවරයා ශ්රී ලංකාවේ ග්රාමීය ප්රජාවන්, විශේෂයෙන් අලි - මිනිස් ගැටුම්වලින් දැඩි ලෙස පීඩාවට පත් දිස්ත්රික්කවල ජනතාව මුහුණ දෙන යථාර්ථයන් කෙරෙහි අවධානය යොමු කළේය. මිනිසුන් සහ වන ජීවීන් අතර සාර්ථක සහජීවනයක් ලබා ගැනීම සඳහා අර්ථවත් ප්රජා සහභාගීත්වය, සාධාරණව ප්රතිලාභ බෙදාගැනීම සහ ජීවනෝපායන් ආරක්ෂා කිරීම අත්යවශ්ය බව ඔහු අවධාරණය කළේය. සංරක්ෂණ අරමුණු සමග බලපෑමට ලක්වූ ප්රජාවන්ගේ සමාජ-ආර්ථික අවශ්යතා සමතුලිත කරන ප්රජා කේන්ද්රීය ප්රතිපත්ති, ප්රාදේශීය පාලන යාන්ත්රණ සහ තිරසාර සංවර්ධන ප්රයත්න ශක්තිමත් කිරීමේදී පාර්ලිමේන්තු මන්ත්රීවරුන්ගේ වැදගත් කාර්යභාරය ඔහු තවදුරටත් අවධාරණය කළේය.
මෙහිදී පැවති සාකච්ඡාවලදී ක්රියාශීලී ප්රතිපත්ති හා නීති, ප්රජා සවිබල ගැන්වීම, වන්දි හා රක්ෂණ මගින් ආර්ථික ආරක්ෂාව සහ වනජීවී කළමනාකරණයේ දී නවීන තාක්ෂණය හා දත්ත මත පදනම් වූ විසඳුම් භාවිතය යන කරුණු අවධාරණය කෙරිණි . විශේෂයෙන් ශ්රී ලංකාවේ නව ප්රතිපත්ති සම්පාදනය සහ ප්රජා සහභාගීත්වය තුළින් අලි - මිනිස් ගැටුම විසඳීමේදී ලද අත්දැකීම්, මෙම ජාත්යන්තර පාර්ලිමේන්තු සංවාදයට වටිනා දායකත්වයක් එක් කරන ලදී.
මානව-වනජීවී සහජීවනය පිළිබඳ ජාත්යන්තර පාර්ලිමේන්තු සම්මන්ත්රණය 2026.01.21 දින අවසන් වූ අතර, තිරසාර හා සාමකාමී මානව-වනජීවී සහජීවනයක් සඳහා ව්යවස්ථාදායක සභාවල භූමිකාව ශක්තිමත් කිරීම අරමුණු කරගත් තීරණ සහ නිර්දේශ මෙහිදී සම්මත කර ගන්නා ලදී.
2026-08-28
ශ්රී ලංකා පාර්ලිමේන්තුවේ දෙපාර්තමේන්තු නවයම නියෝජනය කරමින් පාර්ලිමේන්තු නිලධාරීන් 25 දෙනෙකුගෙන් සමන්විත නියෝජිත පිරිසක් නවදිල්ලි නුවර ලෝක් සභා මහ ලේකම් කාර්යාලයේදී පැවැත්වෙන ධාරිතා වර්ධන වැඩසටහනකට සහභාගී වෙමින් සිටිති.ශ්රී ලංකා පාර්ලිමේන්තුවේ මහ ලේකම් කුෂානි අනූෂා රෝහණදීර මහත්මියගේ ඉල්ලීම මත ශ්රී ලංකාවේ ඉන්දීය මහ කොමසාරිස් කාර්යාලය හරහා මෙම ධාරිතා වර්ධන වැඩසටහන ආරම්භ කෙරිණි. අනතුරුව, ලෝක් සභාවේ කථානායක ශ්රී ඕම් බිර්ලා මහතාගේ මඟපෙන්වීම යටතේ, ලෝක් සභා මහ ලේකම් කාර්යාලයේ මහ ලේකම් ශ්රී උත්පල් කුමාර් සිං මහතා විසින් මෙම වැඩසටහන සංවිධානය කර පහසුකම් සලසා දෙන ලදී. මෙම සහයෝගීතාවේ ප්රතිඵලයක් ලෙස ශ්රී ලංකා පාර්ලිමේන්තුවේ නිලධාරීන් 50 දෙනෙකුට මෙම වැඩසටහන සඳහා සහභාගී වීමට අවස්ථාව හිමි වුණි.ශ්රී ලංකා පාර්ලිමේන්තු නිලධාරීන් 25 දෙනෙකුගෙන් සමන්විත පළමු කණ්ඩායම පසුගිය මාසයේදී ඉන්දියාවේදී මෙම වැඩසටහනට සහභාගී වූ අතර, එම නියෝජිත පිරිස සමඟ ශ්රී ලංකා පාර්ලිමේන්තුවේ සහකාර මහ ලේකම් හංස අබේරත්න මහතා ද සහභාගී විය. එහි දෙවන අදියර ලෙස, ශ්රී ලංකා පාර්ලිමේන්තුවේ මහ ලේකම් කුෂානි අනූෂා රෝහණදීර මහත්මියගේ නායකත්වයෙන් යුත් තවත් නිලධාරීන් 25 දෙනෙකුගෙන් සමන්විත කණ්ඩායමක් මේ වන විට නවදිල්ලි නුවරදී වැඩසටහනට සහභාගී වෙමින් සිටීයි.මෙම වැඩසටහන් ද්විත්වයම ලෝක් සභා මහ ලේකම් කාර්යාලයට අනුබද්ධ ප්රජාතන්ත්රවාදය සඳහා වන පාර්ලිමේන්තු පර්යේෂණ හා පුහුණු ආයතනය (PRIDE) විසින් පවත්වනු ලබන අතර, පාර්ලිමේන්තු නිලධාරීන්ගේ වෘත්තීය දැනුම, කුසලතා සහ ආයතනික ධාරිතාව ශක්තිමත් කිරීම මෙහි ප්රධාන අරමුණ වේ.ශ්රී ලංකා පාර්ලිමේන්තු නිලධාරීන් නවදිල්ලි නුවර ඉන්දිරා ගාන්ධි ජාත්යන්තර ගුවන්තොටුපොළේ ප්රභූ පර්යන්තයට පැමිණි අවස්ථාවේදී ලෝක් සභා මහ ලේකම් කාර්යාලයේ ජ්යෙෂ්ඨ නිලධාරීන් විසින් ඔවුන්ව උණුසුම් ලෙස පිළිගන්නා ලදී.සිය සංචාරයේ කොටසක් ලෙස, වැඩසටහන ආරම්භ කිරීමට පෙර ශ්රී ලංකා පාර්ලිමේන්තු නිලධාරීහු පාර්ලිමේන්තු සංකීර්ණයේ ප්රේරණා ස්ථල්හිදී මහත්මා ගාන්ධිතුමාගේ ප්රතිමාව වෙත පුෂ්පෝපහාර දැක්වුහ.මෙම ධාරිතා වර්ධන වැඩසටහනේදී පාර්ලිමේන්තු පරිපාලනය හා ක්රියාකාරිත්වයට අදාළ පුළුල් පරාසයක විෂයයන් පිළිබඳ දැනුම ලබාදීම සිදු කෙරේ. ජාත්යන්තර පාර්ලිමේන්තු සබඳතා සහ ප්රොටෝකෝලය, පාර්ලිමේන්තුව වෙත විධායකයේ වගවීම, පාර්ලිමේන්තු කාරක සභාවල කාර්යභාරය හා ක්රියාකාරිත්වය, ලෝක් සභා මහ ලේකම් කාර්යාලයේ සංවිධාන ව්යුහය සහ එහි පරිපාලන අංශයේ ක්රියාකාරිත්වය ඒ අතර වේ.එමෙන්ම, කාරක සභා ලේකම් කාර්යාල සහ විවිධ අංශවල ක්රියාකාරිත්වය හා කළමනාකරණය, පාර්ලිමේන්තු වරප්රසාද හා ආචාරධර්ම, පාර්ලිමේන්තු මන්ත්රීවරුන් සඳහා සපයනු ලබන සේවා, මන්ත්රීවරුන්ගේ සේවා, දීමනා සහ සුබසාධන පහසුකම් පිළිබඳව ද නිලධාරීන්ට අවබෝධයක් ලබා දීමට වැඩසටහන මඟින් අවස්ථාව සලසා ඇත.මීට අමතරව, මහ ලේකම් කාර්යාලයේ අයවැය සකස් කිරීම, ඒකාබද්ධ මූල්ය ඒකකයේ (IFU) කාර්යයන්, අයවැය හා අයවැය සම්බන්ධ අංශවල කාර්යභාරය මෙන්ම ව්යවස්ථාදායක ආයතනවල මුලසුන හොබවන නිලධාරීන්ගේ කාර්යභාරය හා බලතල පිළිබඳව ද මෙම වැඩසටහනේදී අවධානය යොමු කෙරේ.නියෝජිත පිරිස ඉන්දීය පාර්ලිමේන්තු සංකීර්ණය වෙත ගොස් ලෝක් සභා සහ රාජ්ය සභා මන්ත්රී මණ්ඩල ශාලා මෙන්ම සංවිධාන සභා ගොඩනැගිල්ලේ (Samvidhan Sadan) මධ්යම ශාලාව ද නිරීක්ෂණය කළහ. එමෙන්ම, පාර්ලිමේන්තු පුස්තකාල ගොඩනැගිල්ල වෙත ද සංචාරය කළ අතර, එමඟින් ඉන්දීය පාර්ලිමේන්තුවේ යටිතල පහසුකම් සහ පාර්ලිමේන්තු සහාය සේවා පිළිබඳව අවබෝධයක් ලබාගැනීමට නිලධාරීන්ට අවස්ථාව සැලසුණි.අධ්යයන හා ආයතනික සැසිවලට අමතරව, මෙම වැඩසටහනට ආග්රා නගරයේ සංස්කෘතික සංචාරයක් ද ඇතුළත් විය. මෙම වැඩසටහන, ඉන්දියාව සහ ශ්රී ලංකාව අතර අඛණ්ඩව සිදුවන පාර්ලිමේන්තු සහයෝගීතා හා ධාරිතා වර්ධන වැඩසටහන්වල කොටසක් වන අතර, දෙරටේ පාර්ලිමේන්තු ආයතන අතර අත්දැකීම් හුවමාරු කර ගැනීමටත්, පාර්ලිමේන්තු ක්රියා පටිපාටි, පරිපාලනය සහ ප්රජාතන්ත්රවාදී ආයතන පිළිබඳ ගැඹුරු අවබෝධයක් ලබා ගැනීමටත් මෙය වැදගත් අවස්ථාවක් සලසා දෙයි.මේ අතර, ශ්රී ලංකා පාර්ලිමේන්තුවේ මහ ලේකම් කුෂානි අනූෂා රෝහණදීර මහත්මියගේ නායකත්වයෙන් යුත් ශ්රී ලංකා පාර්ලිමේන්තුවේ ජ්යෙෂ්ඨ නිලධාරී පිරිසක් නවදිල්ලි නුවරදී ලෝක් සභා මහ ලේකම් කාර්යාලයේ මහ ලේකම් ශ්රී උත්පල් කුමාර් සිං මහතා හමුවී සුහද හා ඵලදායී සාකච්ඡාවක නිරත වූහ.මෙහිදී මෙම ධාරිතා වර්ධන වැඩසටහන සංවිධානය කර පහසුකම් සලසා දීම සම්බන්ධයෙන් ශ්රී උත්පල් කුමාර් සිං මහතා වෙත සිය අවංක ස්තූතිය පළ කළ ශ්රී ලංකා පාර්ලිමේන්තුවේ මහ ලේකම් කුෂානි අනූෂා රෝහණදීර මහත්මිය, වැඩසටහන සාර්ථකව ක්රියාත්මක කිරීම සඳහා ලබා දුන් සහයෝගය ද අගය කළාය.එසේම මහ ලේකම්තුමිය ප්රමුඛ ශ්රී ලංකා පාර්ලිමේන්තුවේ සන්නිවේදන දෙපාර්තමේන්තුව ඇතුළු අනෙකුත් අංශ නියෝජනය කරන නිලධාරීහු පිරිසක් ඉන්දීය ව්යවස්ථාදායකයේ නිල රූපවාහිනි නාලිකාව වන “Sansad TV” හි කටයුතු සිදුවන ආකාරය ද නිරීක්ෂණය කළහ. මෙම වැඩසටහන සාර්ථක කණ්ඩායම් හරහා අඛණ්ඩව පවත්වාගෙන යාම මඟින් ශ්රී ලංකා පාර්ලිමේන්තුව සහ ලෝක් සභා මහ ලේකම් කාර්යාලය අතර වර්ධනය වෙමින් පවතින ආයතනික සබඳතා තවදුරටත් ශක්තිමත් වන අතර, දෙරට අතර පාර්ලිමේන්තු විශේෂඥ දැනුම සහ යහපත් භාවිතයන් හුවමාරු කර ගැනීමට ද එය වැදගත් දායකත්වයක් සපයයි.
2026-08-21
රජය විසින් 2026 යල කන්නයේ වී මිලදී ගැනීම සඳහා අවශ්ය රුපියල් මිලියන 7500 ක ප්රතිපාදන සපයා ගැනීමට අදාළව පාර්ලිමේන්තුවට ඉදිරිපත් කරන ලද පරිපූරක ඇස්තමේන්තුව අද (අගෝ. 21) පාර්ලිමේන්තුවේදී අනුමත විය. එයට අදාළ විවාදය අද පෙරවරු 11.30 සිට ප.ව 12.30 දක්වා පැවැත්විණි.කෘෂිකර්ම, පශු සම්පත්, ඉඩම් හා වාරිමාර්ග අමාත්යාංශයේම ව්යාපෘති/වැඩසටහන් සඳහා 2026 වර්ෂයට වෙන් කරන ලද ප්රතිපාදනවලින් මෙම වර්ෂය තුළදී උපයෝජනය නොවන බවට අපේක්ෂිත ප්රතිපාදන රුපියල් මිලියන 7500 ක් ගෙවීම සඳහා මෙම පරිපූරක ඇස්තමේන්තුව ඉදිරිපත් කොට තිබිණි.
2026-08-21
• ශෝකය පළ කිරීම සඳහා සභා ගර්භයේ විනාඩියක නිශ්ශබ්දතාවක්දැයෙන් සමුගත් ආචාර්ය නන්දා මාලිනී මහත්මියගේ අභාවය වෙනුවෙන් පාර්ලිමේන්තුවේදී අද (අගෝ. 21) ශෝකය පළ කෙරිණි. ඒ අනුව ගරු අග්රාමාත්ය හරිනි අමරසූරියගේ යෝජනාවකට අනුව සභාගර්භය තුළ විනාඩියක නිශ්ශබ්දතාවක් පළ කෙරිණි. ඉන් අනතුරුව අදහස් දැක්වූ අග්රාමාත්යවරිය ප්රකාශ කළේ ශ්රී ලාංකීය සංගීත ක්ෂේත්රයේ ස්වර්ණමය හඬ ලෙස සම්භාවනාවට පාත්ර වූ දශක අටකට වැඩි කාලයක් සිය ගායන පෞරුෂයෙන් මෙරට සංගීතය හා සංස්කෘතිය පෝෂණය කළ අචාර්ය නන්දා මාලිනී මහත්මියගේ අභාවය පිළිබඳ පුවත ඇසීමේ තමා ඉමහත් සංවේගයට පත්වූ බවයි. නන්දා මාලිනී මහත්මියගේ විවිධ ගීත ඇසෙමින් ඒ ගීත සමග ජීවිතයේ විවිධ අවස්ථා ගෙවී ගිය රසිකාවියක ලෙස එතුමියගේ අභාවය හුදෙක් ලාංකීය සංගීතයට අසමසම කලා පෞරුෂයක් අහිමි වීමක් ලෙස පමණක් නොව අපේ ජීවිතවලට සමීපව අපේ මතකයන් සමග බැඳී සතුටේදීත් වේදනාවේදීත් අප සමග හිටි හුරු පුරුදු හඬක් අපෙන් වෙන් වීමක් බව අග්රාමාත්යවරිය වැඩිදුරටත් සඳහන් කළාය.එතුමියගේ ගීත සිය පරම්පරාවේ අත්දැකීම් සමග බැඳී තිබුණු අතර ඇගේ මනරම් හඬ සමග රැඳී තිබූ මතකයන් ඇගේ වියෝවත් සමග වඩාත් තදින් දැනෙන බව ද සඳහන් කළ අගමැතිවරිය නන්දා මාලිනියගේ ගායන දිවිය ශ්රී ලාංකේය ගීත කලාවේ එක් යුගයක් පමණක් නොව, මෙරට ජන ජීවිතයේත්, සමාජ චලනයන්ගේත්, මිනිස් හැඟීම්වලත් සජීවී ප්රකාශනයක් වූ බව ප්රකාශ කළාය. ප්රේමය හා විරහව වැනි මානව හැඟීම් ගැයීමෙන් ඔබ්බට ගිය නන්දා මාලිනිය, පොදු ජනතාවගේ දුක, බිය, බලාපොරොත්තු සහ අරගලය සිය ගීත තුළින් හඬක් බවට පත් කළ බවත් ඒ නිසාම ඇගේ ගීත ඇසෙන විට අපට දැනුණේ ගායිකාවකගේ හඬක් පමණක් නොව, අපේම සමාජයේ හඬ බවත් සිහිපත් කළාය. අද නන්දා මාලිනියගේ වියෝව පිළිබඳ ශෝක වන මොහොතේ, ශ්රී ලාංකේය සංගීතයට අහිමි වූ අසමසම කලාකාරිනිය ගැන පමණක් නොව, අපේ ජීවිතයේ බොහෝ මතකයන් සමඟ බැඳුණු ආදරණීය හඬක් ගැන ද තමා සිහිපත් කරන බව අගමැතිවරිය ප්රකාශ කළාය. එසේම දශක ගණනාවක් පුරා අප සමඟ ගමන් කළ ඒ හඬ අද නිහඬ වුව ද, එතුමිය ගැයූ ගීත අපේ මතකයන් තුළත්, අපේ හදවත් තුළත් දිගටම ජීවත් වනු ඇති බව ද සිහිපත් කළ අගමැතිවරිය නන්දා මාලිනියගේ දියණියන් දෙදෙනා ඇතුළු පවුලේ සියලු දෙනාටත්, එතුමියගේ ගී හඬට ආදරය කළ සමස්ත ශ්රී ලාංකේය ජනතාවටත් තම බලවත් සංවේගය පළ කරන බවද ප්රකාශ කළාය.මෙම අවස්ථාවේදී ගරු විපක්ෂ නායක සජිත් ප්රේමදාස මහතා තම අදහස් පළ කරමින් සඳහන් කළේ නන්දා මාලිනී මහත්මිය තමා පෞද්ගලිකවම හඳුනන බවත් ඇය කිසිවකට නොනැමුණු හැමවිටම ජනතාව වෙනුවෙන් හිටගත් කලාකාරිණියක් ලෙස මානව දයාව, කරුණාව, අනුකම්පාව ඉතාමත්ම ඉහළින්ම තිබුණු අපේ රටේ බිහිවුණු ශ්රේෂ්ඨතම ගායනවේදිනියක් බවයි. මෙහිදී අදහස් දැක්වූ ගරු කථානායක වෛද්ය ජගත් වික්රමරත්න මහතා, අභාවයට පත් ආචාර්ය නන්දා මාලිනී මහත්මියගේ අභාවය වෙනුවෙන් සභාගර්භය තුළ පළ කළ අදහස් සමග තමාද එක්වන බවත් එතුමියට නිවන්සුව අත්වේවායි ශ්රී ලංකා පාර්ලිමේන්තුව වෙනුවෙන් ප්රාර්ථනා කරන බවත් ප්රකාශ කළේය.
2026-08-20
රජය විසින් 2026 යල කන්නයේ වී මිලදී ගැනීම සඳහා අවශ්ය රුපියල් මිලියන 7500 ක ප්රතිපාදන සපයා ගැනීමට අදාළ පරිපූරක ඇස්තමේන්තුව හෙට පෙ.ව. 11.30 සිට ප.ව. 12.30 දක්වා අනුමතිය සඳහා විවාදයට ගැනීමට කථානායක වෛද්ය ජගත් වික්රමරත්න මහතාගේ සභාපතීත්වයෙන් අද (අගෝ. 20) රැස් වූ පාර්ලිමේන්තු කටයුතු පිළිබඳ කාරක සභාවේදී තීරණය විය. කෘෂිකර්ම, පශු සම්පත්, ඉඩම් හා වාරිමාර්ග අමාත්යාංශයේම ව්යාපෘති/වැඩසටහන් සඳහා 2026 වර්ෂයට වෙන් කරන ලද ප්රතිපාදනවලින් මෙම වර්ෂය තුළදී උපයෝජනය නොවන බවට අපේක්ෂිත ප්රතිපාදන රුපියල් මිලියන 7500 ක් ගෙවීම සඳහා මෙම පරිපූරක ඇස්තමේන්තුව ඉදිරිපත් කොට තිබේ. අනතුරුව රජය විසින් ගෙනෙනු ලබන සභාව කල් තැබීමේ යෝජනාව පෙ.ව. 1.00 සිට ප.ව. 5.30 දක්වා විවාදයට ගැනීමට නියමිතව තිබේ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
