2025-08-20
පුවත් කාණ්ඩ : කාරක සභා පුවත්
• සභා ගර්භයේදී ගරු කථානායකවරයාගෙන් විශේෂ පිළිගැනීමක්
අගෝස්තු 12 වැනි දිනට යෙදී තිබුණු ජාත්යන්තර තරුණ දිනයට සමගාමිව ජාතික තරුණසේවා සභාවේ ශ්රී ලංකා යෞවන සමාජ සම්මේලනයේ 2025 - 2027 ජාතික මණ්ඩලය සඳහා අභිනවයෙන් තේරී පත්වූ සාමාජිකයන් 52දෙනා වෙනුවෙන් විශේෂ ඇගයීම් වැඩසටහනක් ඊයේ (අගෝ. 19) පාර්ලිමේන්තුවේදී පැවැත්විණි. ඒ ගරු කථානායක වෛද්ය ජගත් වික්රමරත්න මහතා සහ ආචාර්ය හරිනි අමරසුරිය ගරු අග්රාමාත්යතුමියගේ සහභාගිත්වයෙනි.
තාරුණ්යය සඳහා වන පාර්ලිමේන්තු සංසදය මගින් සංවිධානය කළ මෙම වැඩසටහන සඳහා ගරු නියෝජ්ය කාරක සභා සභාපති හේමාලි විරසේකර මහත්මිය, තරුණ කටයුතු පිළිබඳ ගරු නියෝජ්ය අමාත්ය සහ තාරුණ්යය සඳහා වන පාර්ලිමේන්තු සංසදයේ සභාපති එරංග ගුණසේකර මහතා ද එක්වූහ.
පාර්ලිමේන්තුවට පැමිණි ශ්රී ලංකා යෞවන සමාජ සම්මේලනයේ 2025 - 2027 ජාතික මණ්ඩලය සඳහා අභිනවයෙන් තේරී පත්වූ සාමාජිකයන් ප්රථමයෙන් සභාගර්භයේදී ගරු කථානායකවරයා විසින් ප්රකාශයක් කරමින් පිළිගනු ලැබීය. ඉන් අනතුරුව පාර්ලිමේන්තුව නැරඹීමටද තාරුණ්ය සඳහා වන පාර්ලිමේන්තු සංසදය මගින් අවස්ථාව සලසා දෙනු ලැබීය.
අනතුරුව, ඔවුන් සඳහා පැවැත්වූ විශේෂ ඇගයීම් වැඩසටහන ආරම්භ වූ අතර එහිදී තාරුණ්යය සඳහා වන පාර්ලිමේන්තු සංසදයේ සාමාජික, ගරු පාර්ලිමේන්තු මන්ත්රීවරයන් විසින් ශ්රී ලංකා යෞවන සමාජ සම්මේලනයේ 2025 - 2027 ජාතික මණ්ඩලය සඳහා අභිනවයෙන් තේරී පත්වූ සාමාජිකයින් පිළිගනු ලැබීය.
මෙහිදී අදහස් දක්වමින් ආචාර්ය හරිනි අමරසූරිය ගරු අග්රාමාත්යතුමිය, ඉතිහාසයේ පළමු වරට ජාතික සම්මේලනය සඳහා කාන්තා සාමාජිකයින් පත්ව තිබීම විශාල ජයග්රහණයක් බව පැවසුවාය. එමෙන්ම තාරුණ්ය පිළිබඳව, ඉතිහාසයේ ගොඩ නැගී ඇති කථිකාව වෙනස්කොට නව ප්රවේශයකින් කථිකාවතක් නිර්මාණය කිරීමේ අවශ්යතාව අවධාරණය කල ගරු අග්රාමාත්යවරිය ඒ සඳහා මේ ලැබී තිබෙන අවස්ථාව උපයෝගී කරගන්න ලෙස වැඩි දුරටත් අදහස් දක්වමින් පැවසුවාය.
මෙහිදී අදහස් දැක්වූ ගරු කථානායක වෛද්ය ජගත් වික්රමරත්න මහතා 1993 වසරෙන් පසු ,එනම් වසර 32 කට පසු මේ වසරේදී ජාතික තරුණ සමුළුවක් මගින් ශ්රී ලංකා යෞවන සමාජ සම්මේලනයේ 2025 - 2027 ජාතික මණ්ඩලය සඳහා තේරී පත්වූ සාමාජිකයින් වෙත සිය සුභාශිංශන පිරිනමන බව පැවසුවේය. එමෙන්ම අනාගත පරම්පරාව වන මෙරට තරුණ ප්රජාව වෙනුවෙන් නායකත්වය ලබාදීම සහ එම තරුණ ප්රජාව නියෝජනය කිරීම ද මෙම නව සාමාජිකයින්ට පැවරී ඇති විශාල වගකීමක් බව ගරු කථානායකවරයා වැඩිදුරටත් අදහස් දක්වමින් පැවසුවේය.
තවද මෙම වැඩසටහනේදී ශ්රී ලංකා යෞවන සමාජ සම්මේලනයේ සාමාජිකයින්ට ඔවුන්ගේ අදහස්, යෝජනා හා ගැටලු ඉදිරිපත් කිරීම සඳහා විවෘත සකච්ඡාවක් පැවැත්විණි. අනතුරුව ඔවුන් වෙත ගරු කථානායකතුමා සහ ගරු අග්රාමාත්යතුමියගේ ප්රධානත්වයෙන් ඇගයීම් තිළිණ ප්රදානය කිරීමද සිදුවිය.
මේ අවස්ථාව සඳහා තාරුණ්යය සඳහා වන පාර්ලිමේන්තු සංසදයේ නියෝජ්ය සම සභාපතිවරුන් ඇතුළු සාමාජික ගරු පාර්ලිමේන්තු මන්ත්රීවරයන්, අධ්යක්ෂ (ව්යවස්ථාදායක සේවා) සහ වැඩබලන අධ්යක්ෂ (සන්නිවේදන) සහ තාරුණ්යය තාරුණ්යය සඳහා වන පාර්ලිමේන්තු සංසදයේ ලේකම් එම්. ජයලත් පෙරේරා, ජාතික තරුණ සේවා සභාවේ සභාපති/ අධ්යක්ෂ ජනරාල් නීතිඥ සුපුන් විජේරත්න යන මහත්වරුන් ඇතුළු පිරිසක් සහභාගී වූහ.
2026-04-10
2017 පෙබරවාරි 22 දින පැවති රජයේ ගිණුම් පිළිබඳ කාරක සභාව විසින් දී තිබූ නිර්දේශ ක්රියාත්මක කිරීමේ ප්රගතිය විමසා බැලේ 2021 - 2023 වර්ෂයේ විගණකාධිපති ත්රෛවාර්ෂික වාර්තාව, 2024 වර්ෂයට අදාළ විගණකාධිපති වාර්තාවේ ඇතුළත් කරුණු සහ වර්තමාන කාර්යසාධනයට අදාළ කරුණු පිළිබඳව සලකා බැලේශ්රී ලංකා තැපැල් දෙපාර්තමේන්තුව රජයේ ගිණුම් පිළිබඳ කාරක සභාව හමුවට කැඳවා තිබූ අතර මෙහිදී 2017 පෙබරවාරි 22 වැනි දින පැවති රජයේ ගිණුම් පිළිබඳ කාරක සභා රැස්වීමේදී ලබාදී තිබූ නිර්දේශ ක්රියාත්මක කිරීමේ ප්රගතිය සම්බන්ධයෙන් විමසා බැලීම සිදු කෙරිණි. එසේම 2021 - 2023 වර්ෂවල විගණකාධිපති ත්රෛවාර්ෂික වාර්තාව සහ 2024 වර්ෂයට අදාළ විගණකාධිපති වාර්තාවේ ඇතුළත් කරුණු සහ වර්තමාන කාර්ය සාධනය සලකා බැලීමද සිදු විය.මේ පිළිබඳ කරුණු සාකච්ඡා වුයේ ශ්රී ලංකා තැපැල් දෙපාර්තමේන්තුවේ 2021-2023 වර්ෂයන්ට අදාළ විගණකාධිපති ත්රෛවාර්ෂික වාර්තාව, 2024 විගණකාධිපති වාර්තාව හා වර්තමාන කාර්යසාධනය සම්බන්ධයෙන් සාකච්ඡා කිරීමට රජයේ ගිණුම් පිළිබඳ කාරක සභාව (COPA) ගරු පාර්ලිමේන්තු මන්ත්රී කබීර් හෂීම් මහතාගේ සභාපතිත්වයෙන් 2026.04.07 වැනි දින පාර්ලිමේන්තුවේදී රැස්වූ අවස්ථාවේදීය.මෙහිදී දූෂණ, වංචා හා අක්රමිකතා සම්බන්ධයෙන් සිදු කරන විමර්ශන පිළිබඳ අවධානය යොමු වූ අතර 2025 දෙසැම්බර් 31 දින වන විට අවසන් නොවූ මූලික විමර්ශන ප්රමාණය 1538 පමණ වන බව කාරක සභාව විසින් අවධාරණය කරන ලදි. මේවායෙන් මූල්ය වංචා 40 කට අදාළව රු. 69,999,317ක වටිනාකමැති විමර්ශන අවසන් කර නොතිබුණු බවත් මෙම විමර්ශන 2007 වර්ෂයේ සිට 2025 වර්ෂය දක්වා කාල පරාසයක් පැවති ඒවා බවත් මෙහිදී අනාවරණය විය. මේ අනුව පැමිණි නිලධාරීන් පෙන්වා දුන්නේ විමර්ශන නිලධාරීන්ගේ හිඟයක් පවතින බවත් මේ නිසා විමර්ශන ප්රමාදවී ඇති බවත්ය. එසේ ප්රමාද වුවද 2016 දෙසැම්බර් වන විට පැවති විමර්ශන සංඛ්යාව 2711 ක් බවත් මේ වන විට එය 1538 දක්වා අඩු වී ඇති බවත් නිලධාරීහු පෙන්වා දුන්හ. එසේම ඇතැම් විමර්ශන සම්බන්ධයෙන් අධිකරණ කටයුතු පවතින බවත් මෙහිදී නිලධාරීහු පැවසූහ. මේ අනුව මේ සම්බන්ධව වාර්තාවක් මාසයක් ඇතුළත ලබාදෙන ලෙස කාරක සභාව විසින් නිර්දේශ කරන ලදි.තවද තැපැල් මූලස්ථානයේ සහ දිසා ගිණුම් කාර්යාල 14ක සේවක පැමිණීම හා පිටවීම සටහන් කිරීම සඳහා සවිකරන ලද ඇඟිලි සළකුණු යන්ත්රවල, කාර්යාලයෙන් පිටවීම 16.15 ලෙස සටහන්වී තිබුණද අදාළ සේවකයන්ගේ පිටවීම රාත්රී 7,8,9,10 යනාදී ලෙස ලේඛනයක ඇතුළත් කර තැපැල් මූලස්ථානයේ සේවකයන් 2023 වර්ෂයේ රු. 57919684 ක්ද, 2024 ජනවාරි සිට මැයි දක්වා රු. 7024144ක්ද, දිසා ගිණුම් කාර්යාල 14ක සේවකයින්ට 2024 ජනවාරි සිට ජුනි දක්වා රු. 373874705ක්ද සාවද්ය ලෙස අතිකාල දීමනා ගෙවා ඇති බව කාරක සභාව විසින් පෙන්වා දෙන ලදි. මෙහිදි නිලධාරීන් පෙන්වා දුන්නේ සේවක පුරප්පාඩු සංඛ්යාව 4000/5000 ක් පවතින බවත් මේ නිසා නිලධාරීන් අතිකාල සේවයේ යෙදීමට සිදුව ඇති බවත්ය. ඒ නිසා මෙම ගෙවීම් සාවද්ය ගෙවීම් නොවන බවත් නිලධාරීහු පෙන්වා දුන්හ. මේ අනුව කාරක සභාව පෙන්වා දුන්නේ අතිකාල ගෙවීම සඳහා වෙන් කරන මුදල්වලින් යම් සේවකයින් ප්රමාණයක් බඳවාගෙන වැටුප් ගෙවීම සිදු කළ හැකි බවයි. මේ නිසා කළමනාකරණ සේවා දෙපාර්තමේන්තුව සමග සාකච්ඡා කර මේ සඳහා අවශ්ය පියවර ගන්නා ලෙස කාරක සභාව විසින් පෙන්වා දෙන ලදි. තවද මේ සම්බන්ධයෙන් වාර්තාවක් කාරක සභාවට ලබාදෙන ලෙසද කාරක සභාවේ සභාපතිවරයා නිර්දේශ කළේය.එසේම ශ්රී ලංකා තැපැල් දෙපාර්තමේන්තුවේ මුද්දර කාර්යාංශය විසින් පාරිභෝගිකයන්ට අළෙවි කිරීම සඳහා 2015 වර්ෂයේදී ප්රකාශන පිටපත් 500ක් මුද්රණය කිරීම සඳහා රු. 2697300ක්ද, සිහිවටන පත්රිකා රඳවන සඳහා රු. 1092656ක්ද වියදම් කර තිබුණද 2025 නොවැම්බර් කරන ලද විගණන පරීක්ෂාවේදී මෙම ප්රකාශන අපේක්ෂිත පරිදි නිර්මාණය වී නොතිබීම හේතුවෙන් අලෙවි නොකර මුද්දර කාර්යාංශයේ ගබඩා කර ඇති බව අනාවරණය විය. මේ අනුව මේ සම්බන්ධයෙන් ද වාර්තාවක් ලබාදෙන ලෙස කාරක සභාව විසින් නිර්දේශ කරන ලදි.මීට අමතරව 2024 වර්ෂය අවසාන වන විට මියගිය, විශ්රාම ගිය, වැඩ තහනම් කළ, සේවය හැරගිය හා වෙනත් නිලධාරීන්ගෙන් අයවිය යුතු ණය ශේෂය රු. 61225431 ක් වූ අතර එයින් වර්ෂ 5කට වැඩි කාලයක සිට පැවත එන ණය ශේෂය රු.20679788 ක් බව මෙහිදී අනාවරණය විය. මේ අනුව නිලධාරීන් පෙන්වා දුන්නේ මෙම මුදල් අයකරගැනීමට උපරිමයෙන් උත්සාහ කරමින් පවතින බවයි. එසේම එන්තරවාසි 17ක් යැවීමට කටයුතු කර ඇති බවද නිලධාරීහු පැවසූහ. මේ අනුව කාරක සභාවට ලබාදෙන වාර්තාවේ මීට අදාළ අයකරගැනීම් සිදු කරන ආකාරයද ඇතුළත් කරන ලෙස කාරක සභාව නිර්දේශ කළේය.මාස 3ක් ඇතුළත ශ්රී ලංකා තැපැල් දෙපාර්තමේන්තුව නැවත කාරක සභාව හමුවට කැඳවීම සිදු කරන බව කාරක සභාව අවසන් කරමින් කාරක සභාවේ සභාපතිවරයා පැවසීය.මෙම රැස්වීම සඳහා කාරක සභා සාමාජික ගරු නියෝජ්ය අමාත්යවරුන් වන නලීන් හේවගේ, දිනිඳු සමන් හෙන්නායක, කාරක සභා සාමාජික ගරු මන්ත්රීවරයන් වන (ආචාර්ය) එම්. එල්. එ්. එම්. හිස්බුල්ලා, චානක මාදුගොඩ, ජේ.සී. අලවතුවල, ඔෂානි උමංගා, මංජුල සුරවීර ආරච්චි, (නීතීඥ) තුෂාරි ජයසිංහ, (නීතීඥ) සාගරිකා අතාවුද, රුවන් තිලක ජයකොඩි, ටී. කේ. ජයසුන්දර, චන්දන සූරියආරච්චි, අජන්ත ගම්මැද්දගේ සහ සුසන්ත කුමාර නවරත්න යන මහත්ම මහත්මීහු සහභාගී වූහ.
2026-04-10
පළාත් සභා ඡන්ද විමසීම කුමන මැතිවරණ ක්රමය යටතේ පැවැත්විය යුතු ද යන්න සොයා බලා වාර්තා කිරීමටත්, ඒ පිළිබඳව සිය යෝජනා සහ නිර්දේශ ඉදිරිපත් කිරීමටත් වන පාර්ලිමේන්තු විශේෂ කාරක සභාව නීතිපති දෙපාර්තමේන්තුවෙන් සහ මැතිවරණ මහලේකම් කාර්යාලයෙන් කරුණු විමසන ලදී.ඒ එම විශේෂ කාරක සභාව එහි සභාපති ගරු අමාත්ය විජිත හේරත් මහතාගේ ප්රධානත්වයෙන් දෙවන වරට පසුගියදා (අප්රේල් 07) පාර්ලිමේන්තුවේදී රැස්වූ අවස්ථාවේදීය.මෙහිදී අදහස් දක්වමින් මැතිවරණ මහලේකම් කාර්යාලයේ නිලධාරීහු පළාත් සභා ඡන්ද විමසීම් පනත සංශෝධනය කරමින් දැනට සම්මත කොට ඇති 2017 අංක 17 දරන පනතේ විධිවිධාන ප්රකාරව හඳුන්වා දෙන ලද මිශ්ර සමානුපාතික නියෝජන ක්රමය ක්රියාත්මක කිරීම සඳහා අවශ්ය කොට්ඨාස සීමා නිර්ණය ක්රියාවලිය මෙතෙක් අවසන් කර නොතිබීම හේතුවෙන් පැන නැගී ඇති නීතිමය බාධාව නිසා පළාත් සභා මැතිවරණය පැවැත්වීමේ ගැටලුව මතුව ඇති බව පෙන්වා දුන්හ. කොට්ඨාස සීමා නිර්ණ වාර්තාව සඳහා පාර්ලිමේන්තුවේ අනුමතිය හිමි නොවීම හේතුවෙන් එකී පනතේ විධිවිධාන ප්රකාරව මීලග පියවර ලෙස ගරු කථානායකවරයා විසින් අග්රාමාත්යවරයා ප්රධානත්වයෙන් 5 දෙනෙකුගෙන් සමන්විත සමාලෝචන කමිටුවක් පත්කර ඇති අතර එම කමිටුවේ වාර්තාව මාස දෙකක් තුළ ගරු ජනාධිපතිවරයාට භාර දියයුතු වුවත් එම වාර්තාව භාරදී නොමැති බව මැතිවරණ මහලේකම් කාර්යාලයේ නිලධාරීහු විශේෂ කාරක සභාවට දැන්වූහ. ඒ අනුව පනත ප්රකාරව පළාත් සභා ඡන්ද විමසීමේ ක්රියාවලිය ඉදිරියට ගෙනයාමට අවශ්ය ප්රතිපාදන නොමැති බවද ඔවුහු වැඩි දුරටත් කරුණු දක්වමින් පැවසූහ.ඒ අනුව මෙහිදී අදහස් දක්වමින් කාරක සභා සාමාජික ගරු මන්ත්රීවරයන් පළාත් සභා ඡන්ද විමසීම පැවැත්වීම මූලික පනත නැවත බලගැන්වීම ඔස්සේ සිදුකිරීමේ හැකියාව පිළිබඳව නීතිපති දෙපාර්තමේන්තුවෙන් විමසූහ. ඒ අනුව 2017 අංක 17 දරන පළාත් සභා ඡන්ද විමසීම් (සංශෝධන) පනත අවලංගු කර නැවත මූලික පනත බලාත්මක කිරීමට හැකි බව නීතිපති දෙපාර්තමේන්තුව පැවසීය. එම පනත සඳහා කාන්තා සහ තරුණ නියෝජනය ලබාදීම සඳහා සංශෝධන එක්කිරීමේ අවශ්යතාවයද කාරක සභා සාමාජිකයින් පෙන්වා දුන්හ.ගරු පාර්ලිමේන්තු මන්ත්රී ෂානක්කියන් රාජපුත්තිරන් රාසමාණික්කම් මහතා විසින් ඉදිරිපත් කර ඇති පෞද්ගලික මන්ත්රී පනත් කෙටුම්පත මගින් ඉදිරිපත්කර ඇති පෙර පැවති සමානුපාතික ක්රමයට පළාත් සභා ඡන්ද විමසීම පිළිබඳව කාරක සභාවේදී සාකච්ඡා කරන ලදී.මෙහිදී අදහස් දක්වමින් කාරක සභා සභාපතිවරයා 2017 පළාත් සභා ඡන්ද විමසීම් ( සංශෝධන ) පනත පිළිබඳව ගරු ශ්රේෂ්ඨාධිකරණය විසින් ලබාදී ඇති නඩු තීන්දු දෙකක වාර්තා, පළාත් සභා ඡන්ද විමසීම පැවැත්වීමට පවතින බාධා සහ ඒවා නිරාකරණය කිරීමට පවතින නීතිමය ප්රතිපාදන මොනවාද යන්න වාර්තාවක් සකස් කර කාරක සභාවට ඉදිරිපත් කරන ලෙස නීතිපති දෙපාර්තමේන්තුවට උපදෙස් ලබාදුන්නේය.එමෙන්ම මීලග රැස්වීම සඳහා සීමා නිර්ණ කොමිසමේ නිලධාරීහු කාරක සභාවට කැඳවීමටද තීරණය කරන ලදී.මෙම රැස්වීම සඳහා ගරු නියෝජ්ය අමාත්යවරුන් වන අරුන් හේමචන්ද්ර, නීතිඥ සුනිල් වටගල, මුනීර් මුල්ලාෆර් යන මහත්වරුන් සහ සාමාජික ගරු මන්ත්රීවරයන් වන ආර්. එම්. රංජිත් මද්දුම බණ්ඩාර, මනෝ ගනේෂන්, ෂානක්කියන් රාජපුත්තිරන් රාසමාණික්කම්, චන්දන සූරියආරච්චි, ධර්මප්රිය විජේසිංහ, සමන්මලී ගුණසිංහ, ලක්ෂ්මන් නිපුණ ආරච්චි යන මහත්ම මහත්මීන් සහභාගී වූහ.
2026-04-09
රජයේ මුදල් පිළිබඳ කාරක සභාව 2026 අප්රේල් 07 වන දින ගරු පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතීත්වයෙන් රැස්විය. ශ්රී ලංකා මහ බැංකුව නෛතික අවශ්යතා අනුව මාස හතරකට වරක් පාර්ලිමේන්තුවේ පෙනි සිටිය යුතු අතර ඒ අනුව ශ්රී ලංකා මහබැංකුවේ අධිපති ආචාර්ය නන්දලාල් වීරසිංහ මහතා, පාලක මණ්ඩලයේ සහ මුදල් ප්රතිපත්ති මණ්ඩලයේ සාමාජිකයින් මෙන්ම ජ්යෙෂ්ඨ නිලධාරීන් පිරිසක් මෙම රැස්වීමට සහභාගී වූහ.ගරු නියෝජ්ය අමාත්යවරුන් වන චතුරංග අබේසිංහ, ආචාර්ය කෞෂල්යා ආරියරත්න සහ නිශාන්ත ජයවීර යන මහත්ම මහත්මීහු ද, ගරු පාර්ලිමේන්තු මන්ත්රීවරුන් වන නීතිඥ රවුෆ් හකීම්, රවී කරුණානායක, එම්.කේ.එම්. අස්ලම්, නිමල් පලිහේන, නීතිඥ චිත්රාල් ප්රනාන්දු, විජේසිරි බස්නායක, තිලිණ සමරකෝන්, චම්පික හෙට්ටිආරච්චි සහ නීතිඥ ලක්මාලි හේමචන්ද්ර යන මහත්ම මහත්මීහු ද මෙම රැස්වීමට සහභාගී වූහ. NDB බැංකුවේ සිදුවී ඇතැයි කියන මූල්ය වංචාව පිළිබඳ මෙහිදී කාරක සභාවේ අවධානය යොමුවිය. මෙම ගැටලුවේ බරපතලකම සහ මේ සඳහා කඩිනමින් කාරක සභාවේ අවධානය යොමු කිරීමේ අවශ්යතාවය මෙහිදී අවධාරණය කෙරිණි. මෙම සිදුවීම සම්බන්ධයෙන් මූලික පරීක්ෂණයක් දැනට සිදුවෙමින් පවතින බව ශ්රී ලංකා මහබැංකුවේ අධිපතිවරයා කාරක සභාවට දැනුම් දුන්නේය. අවශ්ය තොරතුරු රැස් කළ පසු හැකි ඉක්මනින් මහ බැංකුව, කාරක සභාවට මේ සම්බන්ධව වාර්තා කරන බව ද ඔහු තවදුරටත් පැවසීය.මෙම සිදුවීමට සම්බන්ධ බැංකුවේ ආයතනික පාලනයේ සැලකිය යුතු අඩුපාඩු, ශ්රී ලංකා මහ බැංකුවේ අදාළ දෙපාර්තමේන්තු මගින් සිදුකළ යුතු අධීක්ෂණයේ අඩුපාඩු සහ තොරතුරු වාර්තා කිරීමේ ප්රමාදයන් පිළිබඳව කාරක සභාවට නිරීක්ෂණය වූ අතර ඒ පිළිබඳව කාරක සභාවේ දැඩි අවධානය යොමු විය.එවැනි අඩුපාඩු පිළිගත නොහැකි බව කාරක සභාව අවධාරණය කළ අතර එම තත්ත්වයන් වහාම නිවැරදි කිරීමට පියවර ගත යුතු බවට උපදෙස් ලබාදීම සිදුවිය. මෙම කාරණය සමීපව නිරීක්ෂණය කිරීම අඛණ්ඩව සිදුකරන බවත්, පූර්ණ වගවීම, විනිවිදභාවය සහ මූල්ය පද්ධතිය කෙරෙහි මහජන විශ්වාසය ආරක්ෂා කිරීම සහ සහතික කිරීම සඳහා අධීක්ෂණ කටයුතු සිදුකරන බවත් කාරක සභාව විසින් අවධාරණය කරන ලදී.
2026-04-02
නීතිවිරෝධී ලෙස බීඩි කොළ රට තුළට ගෙන ඒම හේතුවෙන් රජයට අහිමි වන ආදායම වැළැක්වීමට පියවර ගත යුතු අතරම, බීඩි කර්මාන්තයේ නියැලී සිටින අය ආරක්ෂා කිරීමට ද පියවර ගත යුතු බව පාර්ලිමේන්තුවේ ක්රම සහ විධි පිළිබඳ කාරක සභාව අවධාරණය කරන ලදී.පාර්ලිමේන්තුවේ ක්රම සහ විධි පිළිබඳ කාරක සභාව එහි සභාපති ගරු පාර්ලිමේන්තු මන්ත්රී විජේසිරි බස්නායක මහතාගේ ප්රධානත්වයෙන් පසුගියදා පාර්ලිමේන්තුවේ රැස්වූ අවස්ථාවේදී මේ පිළිබඳව අවධානය යොමු කරන ලදී. බීඩි නිෂ්පාදනය සඳහා භාවිතා කරන කොළ ආනයනය කිරීමේදී බද්දක් අය කරන අතර, නීති විරෝධී ලෙස මුහුදු මාර්ගයෙන් විශාල කොළ ප්රමාණයක් රට තුළට ගෙන එන බව ද කාරක සභාවේදී අනාවරණය විය. මෙය වැළැක්වීම සඳහා විවිධ ක්රියාමාර්ග ගෙන ඇතත්, නීති විරෝධී බීඩි කොළ හේතුවෙන් රජයට ලැබිය යුතු බදු ආදායමට බලපෑම් එල්ල වී ඇති බව නිලධාරීහු පෙන්වා දුන්හ.නීති විරෝධී බීඩි කොළ ජාවාරම වැළැක්වීම සඳහා අනුගමය කළයුතු විවිධ ක්රම පිළිබඳව කාරක සභාවේදී දීර්ඝ ලෙස සාකච්ඡා කරන ලදී. කර්මාන්තයේ නියැලී සිටින අය නීති විරෝධී ලෙස බීඩි කොළ රට තුළට ගෙන ඒම වැළැක්වීමේ අවශ්යතාවය ද කාරක සභාව අවධාරණය කරන ලදී.ඊට අමතරව, නීති විරෝධී බීඩි කොළ භාවිතා කරමින් බීඩි කර්මාන්තයේ නියැලෙන අයගෙන් රජයට ලැබිය යුතු බදු අය කර ගැනීමට නොහැකි බැවින්, මෙය වැළැක්වීමට සහ රජයට සුදුසු බදු ආදායමක් උපයා ගැනීමට යාන්ත්රණයක් සකස් කරන ලෙස කාරක සභාව මුදල් අමාත්යාංශයේ නිලධාරීන්ට උපදෙස් ලබාදෙන ලදී.මෙම රැස්වීම සඳහා කාරක සභාවේ සාමාජිකයන් වන ගරු නියෝජ්ය අමාත්යවරුන් වන රුවන් රණසිංහ, එරංග වීරරත්න, නිශාන්ත ජයවීර, චතුරංග අබේසිංහ, ගරු පාර්ලිමේන්තු මන්ත්රීවරුන් වන සුජිත් සංජය පෙරේරා, (ආචාර්ය) නන්දන මිල්ලගල, තිළිණ සමරකෝන්, නීතිඥ නිලන්ති කොට්ටහච්චි යන මහත්ම මහත්මීන් සහභාගී වූහ. ඊට අමතරව, ශ්රී ලංකා රේගුව, සුරාබදු දෙපාර්තමේන්තුව, මුදල් අමාත්යාංශය, දේශීය අදායම් දෙපාර්තමේන්තුව,ශ්රී ලංකා පොලිසිය සහ නාවික හමුදාවේ නිලධාරීන් රැසක් ද සහභාගී වූහ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
