2024-05-09
පුවත් කාණ්ඩ : කාරක සභා පුවත්
රාජ්ය අමාත්ය ඩයනා ගමගේ මහත්මියගේ පාර්ලිමේන්තු මන්ත්රී ධූරය අහෝසි වීම හේතුවෙන් පුරප්පාඩු වි ඇති මන්ත්රී අසුන සඳහා සුදුසු කාන්තාවක් පත් කරන්නැයි ශ්රී ලංකා පාර්ලිමේන්තු මන්ත්රීවරියන්ගේ සංසදයේ සභාපති පාර්ලිමේන්තු මන්ත්රී (වෛද්ය) ගරු සුදර්ශිනී ප්රනාන්දුපුල්ලේ මහත්මිය සමගි ජන බලවේගයේ මහ ලේකම් පාර්ලිමේන්තු මන්ත්රී ගරු රංජිත් මද්දුමබණ්ඩාර මහතා වෙත ලිපියක් යොමු කරමින් ඉල්ලා සිටී.
රාජ්ය අමාත්ය ඩයනා ගමගේ මහත්මියගේ පාර්ලිමේන්තු මන්ත්රී ධූරය අහෝසි කරමින් ශ්රේෂ්ඨාධිකරණය විසින් නිකුත් කර ඇති රීට් ආඥාව සම්බන්ධව ශ්රේෂ්ඨාධිකරණයේ අධිකාරී බලයට ගරු කරමින් අදාළ තීන්දුව අභියෝග නොකරන බව සඳහන් කරන ශ්රී ලංකා පාර්ලිමේන්තු මන්ත්රීවරියන්ගේ සංසදය අවධාරණය කරනුයේ එම තීන්දුව හේතුකොට ගෙන පාර්ලිමේන්තු මන්ත්රීවරියන්ගේ සංසදයේ සාමාජිකයෙකු අහිමිවීමේ සහ පාර්ලිමේන්තුවේ කාන්තා නියෝජනය තවදුරටත් අඩුවීම පිළිබඳව දැඩි ලෙස කනස්සල්ලට පත් වන බවයි.
කාන්තාවගේ අත්දැකීම් දැනුම සහ ඉදිරි දර්ශනය සමාජයේ සියලූම සාමාජිකයින්ට ප්රයෝජනවත් වන ප්රතිපත්ති සැකසීම සඳහා දායක වන බැවින් පාර්ලිමේන්තුවේ කාන්තා නියෝජනය ඵලදායි ප්රජාතන්ත්රවාදයක් සඳහා වැදගත් වන බවත් එනිසා ඩයනා ගමගේ මහත්මියගෙන් හිස්වුණු ආසනය සඳහා වෙනත් සුදුසු කාන්තාවක් පත්කිරීම සම්බන්ධව සලකා බලන ලෙස මන්ත්රීවරියන්ගේ සංසදය ඉල්ලා සිටී.
එමඟින් ඩයනා ගමගේ මන්ත්රිවරිය ඉවත් කිරීමෙන් ඇතිවන අහිතකර බලපෑම අවම කර ගත හැකි වනු ඇති අතර පාර්ලිමේන්තුව තුළ ස්ත්රී පුරුෂ සමානාත්මතාවය සහ විවිධත්වය සඳහා පාර්ලිමේන්තුවේ කැපවීම තහවුරු කළ හැකි වනු ඇති බවද මන්ත්රිවරියන්ගේ සංසදය පෙන්වා දෙයි.
එමගින් පාර්ලිමේන්තුව තුළ කාන්තාවන්ගේ අවම නියෝජනය පිළිබඳ ඇති ගැටළුව විසඳීම පමණක් නොව ස්ත්රී පුරුෂ සමානාත්මතාවය ප්රවර්ධනය කිරීමට සහ නායකත්ව භූමිකාවන්හි කාන්තාවන් සවිබල ගැන්වීම සඳහා පාර්ලිමේන්තුවේ කැපවීම පිළිබඳ ප්රබල පණිවිඩයක් ලබා දෙනු ඇති බවද එම ලිපියේ සඳහන් වේ.
එනිසා උක්ත කරුණු පිළිබඳ සලකා බලා පාර්ලිමේන්තුව තුළ කාන්තාවන්ගේ හඬට කන්දීමටත් එය අගය කිරීමටත් සුදුසු පියවර ගනු ඇතැයි තම සංසදය විශ්වාස කරන බවද මන්ත්රීවරියන්ගේ සංසදය විසින් සමගි ජන බලවේගයේ මහ ලේකම් වෙත යවන ලද ලිපියේ සඳහන් වේ.
2026-07-01
ආබාධ සහිත තැනැත්තන් සඳහා වන විශේෂ පාසල් සහ උපකෘත පාසල් පද්ධතිය මුහුණ දෙන ගැටලු මෙන්ම එම ක්ෂේත්රය තුළ ක්රියාත්මක කිරීමට නියමිත අධ්යාපන ප්රතිසංස්කරණ සම්බන්ධයෙන් සාකච්ඡා කිරීම සඳහා ආබාධ සහිත තැනැත්තන් සඳහා වන පාර්ලිමේන්තු සංසදයේ රැස්වීමක් එම සංසදයේ සභාපති ගරු පාර්ලිමේන්තු මන්ත්රී සුගත් වසන්ත ද සිල්වා මහතාගේ සභාපතිත්වයෙන් සහ අධ්යාපන සහ උසස් අධ්යාපන ගරු නියෝජ්ය අමාත්ය වෛද්ය මධුර සෙනෙවිරත්න සහ ජාතික අධ්යාපන කොමිෂන් සභාවේ සභාපති මහාචාර්ය සරත් ආනන්ද යන මහත්වරුන්ගේ ප්රධානත්වයෙන් පාර්ලිමේන්තුවේදී පසුගියදා පැවැත්විණි. නව අධ්යාපන ප්රතිසංස්කරණ ක්රියාවලිය තුළ විශේෂ අධ්යාපන ක්ෂේත්රය ද ප්රමුඛ අංගයක් ලෙස සැලකිල්ලට ගත යුතු බව මෙහිදී අවධාරණය කෙරිණි. අබාධ සහිත දරුවන්ගේ ඉගෙනුම් හැකියාවන් (ග්රහණ ශක්තිය) සහ අධ්යාපනික අවශ්යතා පිළිබඳ සැලකිල්ලට ගනිමින් වඩාත් අන්තර්කරණය සහ සමානාත්මතාවය මත පදනම් වූ අධ්යාපන පද්ධතියක් ගොඩනැගීමේ වැදගත්කම පිළිබඳව ද එහිදී අදහස් පළ විය.එසේම විශේෂ පාසල්වල ගුරුවරුන් සහ විදුහල්පතිවරුන් මුහුණ දෙන පරිපාලනමය හා වෘත්තීය ගැටලු, පාසල් කළමනාකරණයට අදාළ අභියෝග, විෂයමාලා සංවර්ධනය සහ විශේෂ අවශ්යතා සහිත දරුවන් සඳහා සුදුසු ඇගයීම් ක්රමවේද හඳුන්වා දීමේ අවශ්යතාව පිළිබඳව ද මෙහිදී කරුණු ඉදිරිපත් කෙරිණි.විශේෂ අවශ්යතා ක්ෂේත්රයේ ප්රායෝගික අත්දැකීම් සහිත විදුහල්පතිවරුන්, ගුරුවරුන් සහ කළමනාකරුවන් විසින් ඉදිරිපත් කරන ලද අදහස් හා යෝජනා ඉදිරි ප්රතිපත්තිමය තීරණ ගැනීමේදී සැලකිල්ලට ගැනීමට ද ජාතික අධ්යාපන කොමිෂන් සභාව විසින් මෙහිදී එකඟතාව පළ කළ අතර, ඉදිරියේදී ඒ සඳහා පවත්වන සාකච්ඡාවක් සඳහා විශේෂ පාසල්වල නියෝජිතයින් සම්බන්ධ කර ගැනීමටත්, ආබාධ සහිත තැනැත්තන් සඳහා වන අධ්යාපන අවස්ථා තවදුරටත් පුළුල් කිරීම සඳහා අදාළ සියලු පාර්ශ්වයන්ගේ දායකත්වය ලබාගනිමින් ඉදිරි කටයුතු සිදුකිරීමට ත් තීරණය කෙරිණි.මෙම රැස්වීම සඳහා සංසදයේ සාමාජික ගරු මන්ත්රීවරුන්, ජාතික අධ්යාපන කොමිෂන් සභාවේ නියෝජ්ය සභාපති තිලක් ධර්මරත්න, අධ්යාපන අමාත්යාංශයේ නොවිධිමත් හා විශේෂ අධ්යාපන ඒකකයේ නිලධාරීන්, ආබාධ සහිත ළමුන් සඳහා වූ විශේෂ පාසල්වල විදුහල්පතිවරුන්, එම පාසල්වල කළමනාකරුවන් සහ ගුරුවරුන් ඇතුළු පිරිසක් සහභාගී වූහ.
2026-06-25
රාජ්ය ණය ගෙවීම සඳහා මහා භාණ්ඩාගාරය සතුව තිබූ ඇමෙරිකානු ඩොලර් මිලියන 2.5ක් අස්ථානගත වීම සම්බන්ධයෙන් ශ්රී ලංකා මහ බැංකුව විසින් රජයේ මුදල් පිළිබඳ කාරක සභාවට ලබා දුන් වාර්තාව පිළිබඳව සාකච්ඡා කෙරිණි.ඒ ගරු පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන්, ගරු නියෝජ්ය අමාත්යවරුන් වන චතුරංග අබේසිංහ, ආචාර්ය කෞෂල්යා ආරියරත්න, නිශාන්ත ජයවීර සහ ගරු පාර්ලිමේන්තු මන්ත්රීවරුන් වන නීතීඥ රවුෆ් හකීම්, රවී කරුණානායක, හර්ෂණ රාජකරුණා, අජිත් අගලකඩ, නිමල් පලිහේන, නීතීඥ චිත්රාල් ප්රනාන්දු, විජේසිරි බස්නායක, චම්පික හෙට්ටිආරච්චි, එම්.කේ.එම්. අස්ලම් සහ නීතීඥ ලක්මාලි හේමචන්ද්ර යන මහත්ම මහත්මීන්ගේ සහභාගීත්වයෙන් මෙම කාරක සභාව පාර්ලිමේන්තුවේදී පසුගිය 23 වැනිදා රැස්වූ අවස්ථාවේදීය. ඇමෙරිකානු ඩොලර් මිලියන 2.5ක් අස්ථානගත වීම සම්බන්ධයෙන් පසුගිය 08 වැනිදා මුදල්, ක්රම සම්පාදන සහ ආර්ථික සංවර්ධන අමාත්යංශය විසින් රජයේ මුදල් පිළිබඳ කාරක සභාව වෙත ලබා දුන් වාර්තාව ශ්රී ලංකා මහ බැංකුවේ නිලධාරීන් විසින් පරීක්ෂා කර බැලීමෙන් අනතුරුව ඒ සම්බන්ධයෙන් ඔවුන්ගේ මතය ඇතුළත් වාර්තාවක් මෙලෙස රජයේ මුදල් පිළිබඳ කාරක සභාවට ඉදිරිපත් කොට තිබිණි. මෙහිදී ශ්රී ලංකා මහ බැංකුව විසින් ඉදිරිපත් කර තිබූ වාර්තාව සම්බන්ධයෙන් දීර්ඝ වශයෙන් සාකච්ඡා සිදු කෙරිණි. මුදල්, ක්රම සම්පාදන සහ ආර්ථික සංවර්ධන අමාත්යංශය සහ ශ්රී ලංකා මහ බැංකුව විසින් ඉදිරිපත් කළ වාර්තා දෙකම සලකා බලා අවසන් වාර්තාවක් සකස් කර ඉදිරියේදී පාර්ලිමේන්තුවට ඉදිරිපත් කරන බව රජයේ මුදල් පිළිබඳ කාරක සභාවේ සභාපතිවරයා පැවසීය. මෙම සාකච්ඡාව සඳහා මුදල්, ක්රමසම්පාදන හා ආර්ථික සංවර්ධන අමාත්යාංශයේ ලේකම් ආචාර්ය හර්ෂණ සූරියප්පෙරුම, ඩිජිටල් ආර්ථික අමාත්යාංශයේ ලේකම් වරුණ ශ්රී ධනපාල, ශ්රී ලංකා මහ බැංකුවේ අධිපති ආචාර්ය නන්දලාල් වීරසිංහ සහ ශ්රී ලංකා පරිගණක හදිසි ප්රතිචාර සංසදයේ (CERT) නිලධාරීන් ඇතුළු පිරිසක් ද සහභාගී විය.
2026-06-23
මහා භාරකාර දෙපාර්තමේන්තුව රජයේ ගිණුම් පිළිබඳ කාරක සභාව හමුවට කැඳවා 2021 - 2023 වර්ෂවල විගණකාධිපති ත්රෛවාර්ෂික වාර්තාව, 2024 වර්ෂයට අදාළ විගණකාධිපති වාර්තාවේ ඇතුළත් කරුණු සහ වර්තමාන කාර්යසාධනය සලකා බැලීම සිදු විය. ඒ රජයේ ගිණුම් පිළිබඳ කාරක සභාව (COPA) ගරු පාර්ලිමේන්තු මන්ත්රී කබීර් හෂීම් මහතාගේ සභාපතිත්වයෙන් පාර්ලිමේන්තුවේදී පසුගියදා රැස්වූ අවස්ථාවේදීය.මහා භාරකාර දෙපාර්තමේන්තුවට වත්කම් ලැබෙන විවිධ මාර්ග, එම එක් එක් වත්කම් ලැබුණ දින වකවානු, එම වත්කම් පවරණු ලැබුවේ කවුරුන් විසින්ද යන්න, පැවරීමට අදාළ කොන්දේසි ආදී කරුණු ඇතුළත් වාර්තාවක් රජයේ ගිණුම් පිළිබඳ කාරක සභාවට ලබා දෙන ලෙස 2024 මැයි මස කාරක සභාව රැස් වු අවස්ථාවේ ලබා දී තිබූ නිර්දේශය සම්බන්ධයෙන් මෙහිදී කාරක සභාවේ සභාපතිවරයා විමසා සිටියේය. මේ අනුව, මේ සම්බන්ධ දත්ත ඇතුළත් වාර්තාව කාරක සභාව වෙත ලබා දුන් බව නිලධාරීහු කියා සිටියහ. එසේම මෙහිදී මහා භාරකාර දෙපාර්තමේන්තුව සතු භාර සහ බූදල් සංඛ්යාව සම්බන්ධයෙන්ද කාරක සභාවට වාර්තාවක් ලබා දෙන ලෙස කාරක සභාව විසින් නිර්දේශ කරන ලදි.ගාල්ල බද්දේගම, සුදුවැලිපොත පිහිටි හැරී හපුගොඩ බූදලයට අයත් අක්කර 113ක භූමි ප්රමාණය බදු දීම සඳහා ටෙන්ඩර් කැඳවීම සම්බන්ධයෙන් කාරක සභාව නිලධාරීන්ගෙන් විමසීය. එහිදී තක්සේරු වටිනාකමට වඩා වැඩි වටිනාකමකට මේ වන විට ටෙන්ඩරයක් ලැබී ඇති බව නිලධාරීහු පෙන්වා දුන්හ. මීට අමතරව මෙම ඉඩමේ කොටස් විවිධ පාර්ශ්ව විසින් අනවසරයෙන් භුක්ති විඳිමින් සිටින බව ද මෙහිදී අනාවරණය විය. රිච්මන්ඩ් කාසල් ගොඩනැගිල්ලේ නඩත්තු කටයුතු පිළිබඳව කාරක සභාවේ අවධානය යොමු වූ අතර ජූලි මාසය වන විට මෙම ගොඩනැගිල්ලේ නවීකරණ සහ ප්රතිසංස්කරණ කටයුතු ආරම්භ කිරීමට හැකි වනු ඇති බව නිලධාරීහු පෙන්වා දුන්හ. එසේම, මෙම ඉඩමේ පොල් අස්වැන්න හොඳින් පවතින බවත් එය නියමාකාරයෙන් නඩත්තු නොවන බවත් කාරක සභාවේ සමාජික මන්ත්රීවරු කියා සිටියහ. මෙම රැස්වීම සඳහා කාරක සභා සාමාජික ගරු වෘත්තීය අධ්යපන නියෝජ්ය අමාත්ය නලීන් හේවගේ, කාරක සභා සාමාජික ගරු මන්ත්රීවරයන් වන චානක මාදුගොඩ, ජේ.සී. අලවතුවල, ඔෂානි උමංගා, නීතීඥ සාගරිකා අතාවුද, ටී. කේ. ජයසුන්දර, චන්දන සූරියආරච්චි, අජන්ත ගම්මැද්දගේ, ලාල් ප්රේමනාත්, රුවන්තිලක ජයකොඩි සහ සුනිල් රත්නසිරි යන මහත්ම මහත්මීහු සහභාගී වූහ.
2026-06-23
අධ්යාපන, උසස් අධ්යාපන සහ වෘත්තීය අධ්යාපන කටයුතු පිළිබඳ අමාත්යාංශයීය උපදේශක කාරක සභාව, ගරු අග්රාමාත්ය සහ අධ්යාපන, උසස් අධ්යාපන සහ වෘත්තීය අධ්යාපන අමාත්ය ආචාර්ය හරිනි අමරසූරියගේ සභාපතිත්වයෙන් පසුගියදා පාර්ලිමේන්තුවේදී රැස් වූ අවස්ථාවේදී අධ්යාපන ක්ෂේත්රයට අදාළව දැනට පවතින ගැටලු රැසක් ගරු පාර්ලිමේන්තු මන්ත්රීවරු ඉදිරිපත් කළහ.ඒ අනුව ප්රාථමික පාසැල් ඉදිකිරීම්වලදී ප්රමිතියකට අනුව පොදු සැලැස්මක් හා ආකෘතියක් හඳුන්වා දීමේ අවශ්යතාව, උපකෘත පාසැල්වල පරිපාලනය සම්බන්ධ ගැටලු, ගුරු මාරු සම්බන්ධ ගැටලු, එක් එක් පළාත් මට්ටමින් පාසැල්වල සිදු වන ඉදිකිරීම්වල ප්රගතිය, වෘත්තීය අධ්යාපන ක්ෂේත්රයේ ගැටලු සහ ඉදිරි සැලසුම් ඇතුළු කරුණු රැසක් කාරක සභාවේදී සාකච්ඡා විය. එම කරුණු සම්බන්ධයෙන් ගරු අග්රාමාත්යවරිය විසින් නිලධාරීන්ගෙන් කරුණු විමසීමෙන් අනතුරුව අවශ්ය පියවර කඩිනමින් ගැනීම සඳහා අවශ්ය උපදෙස් ලබා දෙන ලදී. ඊට අමතරව, මෙම අමාත්යාංශයීය උපදේශක කාරක සභාව යටතේ ස්ථාපිත කර ඇති අනුකාරක සභාවල ප්රගතිය පිළිබඳව ද කාරක සභාව විසින් විමසන ලදී.අධ්යාපන හා උසස් අධ්යාපන ගරු නියෝජ්ය අමාත්ය වෛද්ය මධුර සෙනෙවිරත්න, වෘත්තීය අධ්යාපන ගරු නියෝජ්ය අමාත්ය නලින් හේවගේ යන මහත්වරු ද ගරු පාර්ලිමේන්තු මන්ත්රීවරු පිරිසක් ද අධ්යාපන, උසස් අධ්යාපන සහ වෘත්තීය අධ්යාපන අමාත්යාංශයේ ලේකම් නාලක කළුවැව මහතා ඇතුළු නිලධාරීහු පිරිසක්ද මෙම කාරක සභා රැස්වීමට සහභාගී වූහ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
