2024-03-25
පුවත් කාණ්ඩ : කාරක සභා පුවත්
ළමුන් සදහා වන පාර්ලිමේන්තු සංසදයේ මඟපෙන්වීම යටතේ ප්රජනක සෞඛ්ය සහ ලිංගිකත්ව අධ්යාපනය සම්බන්ධයෙන් පාසැල් දරුවන් දැනුවත් කිරීම සදහා සම්පාදිත පොත් පෙළ සහ ඩිජිටල් මාධ්ය වැඩසටහන් මාලාව පිළිබඳ මන්ත්රීවරුන්, මාධ්යවේදීන් ඇතුළු පාර්ශ්ව දැනුවත් කිරීමේ සහ ඒ සදහා දායකත්වය දැක්වූ පිරිසට ස්තූතිය පුද කිරීමේ වැඩසටහනක් පසුගියදා (මාර්තු 21) පාර්ලිමේන්තුවේදී පැවැත්විණි.
ළමුන් සදහා වන පාර්ලිමේන්තු සංසදයේ මූලිකත්වයෙන් පැවති මෙම අවස්ථාවට ඊට සම්බන්ධ වූ රාජ්ය නිලධාරීන් ඇතුළු පිරිසක් ද විපක්ෂ නායක ගරු සජිත් ප්රේමදාස, සභානායක සහ අධ්යාපන අමාත්ය ගරු සුසිල් ප්රේමජයන්ත, සෞඛ්ය රාජ්ය අමාත්ය ගරු වෛද්ය සීතා අරඹේපොළ යන මහත්ම මහත්මීන් ප්රමුඛ පාර්ලිමේන්තු මන්ත්රීවරුන් ද එක්ව සිටියහ.
ප්රජනක සෞඛ්ය සහ ලිංගිකත්ව අධ්යාපනය සම්බන්ධයෙන් පාසැල් දරුවන් මෙන්ම ප්රජාව දැනුවත් කිරීම සදහා ගරු රෝහිණි කුමාරි විජේරත්න මහත්මියගේ සභාපතීත්වයෙන් යුතු ළමුන් සදහා වන පාර්ලිමේන්තු සංසදයේ මඟ පෙන්වීම යටතේ සෞඛ්ය අමාත්යාංශය, අධ්යාපන අමාත්යාංශය, ළමා කටයුතු හා සමාජ සවිබල ගැන්වීමේ අමාත්යාංශයේ සාමාජිකත්වයෙන් විශේෂ කමිටුවක් පත් කරන ලදී. එම කමිටුව සමග තවත් රාජ්ය ආයතන, රාජ්ය නොවන සංවිධාන හා විද්වතුන් ඇතුළු පිරිසක් එක්ව මෙම පොත් පෙළ සහ ඩිජිටල් මාධ්ය වැඩසටහන් මාලාවක් සකස් කළ අතර පසුගිය මාර්තු 7 වැනිදා දොරට වැඩීම සිදුවිය.
මෙහිදී අදහස් දක්වමින් ළමුන් සදහා වන පාර්ලිමේන්තු සංසදයේ සභාපති ගරු රෝහිණි කුමාරි විජේරත්න මහත්මිය පැවසුවේ මෙරට දිනෙන් දින වැඩි වන ළමා අපයෝජන හමුවේ දරුවන් සහ ප්රජාව දැනුවත් කිරීම සදහා ප්රජනක සෞඛ්ය සහ ලිංගිකත්ව අධ්යාපනය පිළිබඳ පොත් පෙළක් සහ ඩිජිටල් මාධ්ය වැඩසටහන් මාලාවක් හදුන්වාදීමට හැකිවීම සමස්ත රටේම ජයග්රහණයක් බවයි.
මීට වසර ගණනාවකට පෙර ආංශික අධීක්ෂණ කාරක සභා ඔස්සේ ද මේ සදහා උත්සහ කළ ද විවිධ බාධක නිසා එය ඉටු කිරීමට නොහැකි වූ බව ද ඇය සිහිපත් කළාය. එසේම මෙය විශාල පිරිසකගේ ශ්රමයෙන් විශාල කාලයක් කැපකොට ඉටු කළ කර්තව්යයක් බැවින් ඔවුන් සියලු දෙනාටම ගෞරවනීය ස්තූතිය පුද කරන බව ඇය පැවසුවාය.
මෙහිදී අදහස් දැක්වූ විපක්ෂ නායක ගරු සජිත් ප්රේමදාස මහතා පෙන්වා දුන්නේ ළමුන් සහ කාන්තාවන්ගේ අයිතිවාසිකම් කෙරෙහි විශේෂ සැලකිල්ලක් දැක්විය යුතු බවත් ඒවා ආණ්ඩුක්රම ව්යවස්ථාවේ මූලික අයිතිවාසිකම් පරිච්ඡේදයට ඇතුළත් කළ යුතු බවත් ය. එසේම මෙම වැඩපිළිවෙල කාලීන අවශ්යතාවක් සහිත විශිෂ්ට වැඩපිළිවෙලක් බවත් ඒ සදහා රෝහිණි විජේරත්න මැතිණිය ප්රමුඛ සියලු පාර්ශ්වයන්ට ස්තූතිය පළ කරන බවත් විපක්ෂ නායකවරයා පෙන්වා දුන්නේය.
එසේම අධ්යාපන අමාත්ය ගරු සුසිල් ප්රේමජයන්ත මහතා මෙහිදී අදහස් දක්වමින් පැවසුවේ කාලීන වශයෙන් වැදගත් වන මෙම පොත් පෙළ නොමිලේ මුද්රණය කොට සිසු දරුවන්ට බෙදා හැරීමට කඩිනමින් පියවර ගන්නා බවයි. එසේම මෙම කාර්ය ඉටු කිරීමට මැදිහත්වූ ළමුන් සදහා වන පාර්ලිමේන්තු සංසදය ඇතුළු සියලු පාර්ශ්වයන්ට සිය ගෞරවය පිරිනමන බවද ඒ මහතා සදහන් කළේය.
මෙහිදී අධ්යාපන අමාත්යාංශය මගින් පළ කළ ග්රන්ථ පෙළ ගරු විපක්ෂනායකවරයාට සහ අධ්යාපන අමාත්යවරයාට පිළිගැන්වීම ද සිදුවිය. එසේම අධ්යාපන අමාත්යාංශය මගින් පළ කළ ග්රන්ථ පෙළ සම්බන්ධව හදුන්වාදීම ද සිදුවිය. ඒ අනුව වයස අවු. 11 සිට වයස් කාණ්ඩ හතරකට අදාළව මෙම පොත් පෙළ ඉදිරිපත් කර ඇත. එසේම සෞඛ්ය අමාත්යාංශය විසින් ඉදිරිපත් කර ඇති ඇති ඩිජිටල් මාධ්ය වැඩසටහන් මාලාව පිළිබඳව ද හදුන්වා දීම සිදු විය. ඒ අනුව QR කේතයක් මඟින් ෆේස්බුක්, යූටියුබ්, එක්ස්, ටික්ටොක් ඇතුළු සමාජ මාධ්ය ඔස්සේ කෙටි වීඩියෝ වැඩසටහන් දරුවන් සහ ප්රජාවගේ දැනවත් බව වැඩි කිරීම සදහා නිර්මාණය කර ඇත.
2026-05-29
වර්තමාන රජයේ ජාතික ප්රතිපත්තිය අනුව “නිර්බාධිත පරිසරයක් - අන්තර්කරණය වූ සමාජයක්” නිර්මාණය කිරීම උදෙසා, ආබාධ සහිත තැනැත්තන් අන්තර්කරණය, සේවා සහ පහසුකම් සැලසීම වෙනුවෙන් 2027 වර්ෂයේ දී ක්රියාත්මක කළ යුතු වැඩසටහන් සඳහා අයවැය යෝජනා ලබා ගැනීමේ වැඩසටහනක් ආබාධ සහිත තැනැත්තන් සඳහා වන පාර්ලිමේන්තු සංසදය විසින් පවත්වන ලදි. ඒ ගරු පාර්ලිමේන්තු මන්ත්රී සුගත් වසන්ත ද සිල්වා මහතාගේ සභාපතිත්වයෙන් එම සංසදය පාර්ලිමේන්තුවේදී මේ මස 25 සහ 27 දිනයන්වලදී රැස්වූ අවස්ථාවේදීය. ආබාධ සහිත තැනැත්තන් අන්තර්කරණය මෙන්ම ඔවුන්ට සේවා සහ පහසුකම් සැලසීම සඳහා පවතින බාධක හඳුනාගනිමින්, ඊට තිරසර විසඳුම් ලබාදීම උදෙසා ආබාධ සහිත තැනැත්තන් සඳහා වන පාර්ලිමේන්තු සංසදය බහුවිධ ප්රවේශයකින් ක්රියාත්මක වෙමින් පවතී. එහි දිගුවක් ලෙස 2027 වර්ෂයට අදාළ අයවැය යෝජනා ඉදිරිපත් කිරීම තුළින් ආබාධ සහිත ප්රජාවගේ අයිතිවාසිකම් සුරක්ෂිත කිරීමත්, ඔවුන්ගේ පූර්ණ හා ඵලදායි සමාජ සහභාගීත්වය වඩාත් සංවිධිත ආකාරයට තහවුරු කිරීමත්, අපේක්ෂා කෙරේ.ඒ අනුව, දැනට ක්රියාත්මක කරමින් පවතින වැඩසටහන් අඛණ්ඩව පවත්වාගෙන යාමටත්, නව යෝජනා ක්රියාත්මක කිරීම සඳහාත්, ආබාධ සහිත තැනැත්තන්ගේ සංවිධාන නියෝජිතයින්, ඔවුන් වෙනුවෙන් පෙනී සිටින සංවිධාන නියෝජිතයින් සහ ආබාධ සහිත ක්ෂේත්රයේ ක්රියාකාරී වෘත්තීයවේදීන්ගේ සහභාගීත්වයෙන් මෙම යෝජනා ලබාගැනීම සිදු විය. මෙම පාර්ලිමේන්තු සංසදයේ රැස්වීම සඳහා එහි සාමාජික මන්ත්රීවරු පිරිසක්ද සහභාගී වූහ.
2026-05-29
වැටුප් සහිතව වැඩ තහනමට ලක්ව සිටින රියදුරන් පිළිබඳ සාකච්ඡාවක් ප්රවාහන, මහාමාර්ග සහ නාගරික සංවර්ධන කටයුතු පිළිබඳ අමාත්යාංශයීය උපදේශක කාරක සභාවේදී පසුගියදා පාර්ලිමේන්තුයව්දී සිදු කෙරිණි. ඒ ප්රවාහන, මහාමාර්ග සහ නාගරික සංවර්ධන ගරු අමාත්ය බිමල් රත්නායක මහතාගේ සභාපතීත්වයෙන් එම කාරක සභාව රැස් වූ අවස්ථාවේදීය. විවිධ විනය ගැටලු හේතුවෙන් රියදුරන් 400ක් 500ක් පමණ වැඩ තහනමට ලක්ව සිටින බවත් ඔවුන්ගෙන් ඇතැම් රියදුරන් තවමත් වැටුප් ලබා ගනිමින් සිටින බවත් පැමිණි නිලධාරීහු පෙන්වා දුන්හ. විවිධ නීතිමය තත්ත්වයන් යටතේ අධිකරණ ක්රියාමාර්ග නිසා මෙලෙස වැටුප් ගෙවීම සිදු වන බවත් එසේ වැඩ තහනමට ලක්ව සිටින ඇතැම් රියදුරන් පෞද්ගලික බස්රථ වල රියදුරු වෘත්තියේ යෙදෙමින් ආදායම් උපයන බවත් නිලධාරීහු වැඩිදුරටත් ප්රකාශ කළහ.මේ පිළිබඳ දීර්ඝව සාකච්ඡා කිරීමෙන් අනතුරුව, අවශ්ය නීති උපදෙස් කඩිනමින් ලබාගෙන විනය ක්රියාමාර්ග ගැනීමේ ක්රමවේද සම්බන්ධයෙන් නැවත සලකා බලන ලෙස ගරු අමාත්යවරයා විසින් නිලධාරීන්ට උපදෙස් ලබා දෙන ලදි.එසේම ප්රවාහන ක්ෂේත්රය හා සම්බන්ධ නීතිමය රාමුව ශක්තිමත් කිරීම තුළින් සාධනීය දිශානතියක් කරා ප්රවාහන ක්ෂේත්රය යොමු කරවීම සඳහා වන අනු කාරක සභාවේ සහ දුම්රිය දෙපාර්තමේන්තුව, කාර්යක්ෂම සහ සතුටුදායක සේවා උත්පාදනය කරන ස්ථානයක් බවට පත් කිරීම සඳහා වන අනු කාරක සභාවේ අවසන් වාර්තාව සහ අතුරු වාර්තාව පිළිවෙළින් ඉදිරිපත් කිරීම සිදු විය.ප්රවාහන, මහාමාර්ග සහ නාගරික සංවර්ධන අංශවල දිවයිනේ විවිධ ප්රදේශවල පවතින ගැටලු මෙහිදී ගරු මන්ත්රීවරයන් විසින් කාරක සභා සභාපතිවරයාගේ අවධානයට යොමු කරන ලදී. මේ පිළිබඳ කරුණු විමසූ කාරක සභා සභාපතිවරයා අවශ්ය පියවර ගැනීම සදහා නිලධාරීන්ට උපදෙස් ලබා දුන්නේය.ගරු නියෝජ්ය කාරක සභා සභාපතිනි හේමාලි වීරසේකර, ගරු නියෝජ්ය අමාත්යවරුන් වන එරංග ගුණසේකර, (වෛද්ය) ප්රසන්න ගුණසේන යන මහත්වරුන්, කාරක සභා සාමාජික මන්ත්රීවරයන් ඇතුළු මැති ඇමතිවරු පිරිසක් ද, ප්රවාහන, මහාමාර්ග සහ නාගරික සංවර්ධන අමාත්යාංශයේ නිලධාරීහු පිරිසක් ද මෙම කාරක සභා රැස්වීමට සහභාගී වූහ.
2026-05-29
දේශගුණික විපර්යාස හේතුවෙන් ශ්රී ලංකාවේ අලි ඇතුන් සහ දිවියන්ට එල්ල වන අහිතකර බලපෑම් අවම කිරීම පිළිබඳව සාකච්ඡාවක් ශ්රී ලංකා දේශගුණය පිළිබඳ පාර්ලිමේන්තු සංසදය විසින් පසුගියදා පාර්ලිමේන්තුවේදී පවත්වන ලදී.එම සංසදයේ සම සභාපතිවරුන් වන ගරු විපක්ෂ නායක සජිත් ප්රේමදාස සහ පාර්ලිමේන්තු මන්ත්රී (මහාචාර්ය) එල්.එම්. අබේවික්රම යන මහත්වරුන්ගේ ප්රධානත්වයෙනි.මෙහිදී එල්-නිනො සහ ලා-නිනෝ දේශගුණික තත්ත්වයන්, අලි ඇතුන් සහ දිවියන්ගේ ජීවන රටාවට ඇති කරන බලපෑම් පිළිබඳව මෙම සාකච්ඡාවේදී විශේෂ අවධානය යොමු කෙරුණු අතර වනජීවී සංරක්ෂණ දෙපාර්තමේන්තුවේ නිලධාරීහු ඒ සම්බන්ධයෙන් කරුණු පැහැදිලි කළහ.දේශගුණික විපර්යාස නිසා වනජීවීන්ට සිදුවන බලපෑම් පිළිබඳව පුළුල් අවධානයක් යොමු කරන බවත්, එහි පළමු පියවර ලෙස අලි ඇතුන් සහ දිවියන් සම්බන්ධ ගැටලු පිළිබඳව විශේෂ අවධානයක් යොමු කරන බවත් ගරු විපක්ෂ නායක සජිත් ප්රේමදාස මහතා සඳහන් කළේය. තවද, මෙම ගැටලුව සම්බන්ධයෙන් ඉදිරියේදී පුළුල් අධ්යයනයක් සිදු කර අදාළ පාර්ශ්වයන් වෙත නිර්දේශ ඉදිරිපත් කිරීමට අපේක්ෂා කරන බව ද හෙතෙම වැඩිදුරටත් පැවසීය.මෙම සාකච්ඡාව සඳහා දේශගුණික විශේෂඥයින් සහ පරිසරවේදීන් ද සහභාගී වී සිය අදහස් සහ යෝජනා ඉදිරිපත් කළහ. මිනිස් – අලි ගැටුම් අවම කිරීම ඇතුළු වනජීවී ආරක්ෂාවට අදාළ කරුණු රැසක් ද මෙහිදී සාකච්ඡා කෙරිණි.ගරු පාර්ලිමේන්තු මන්ත්රීවරුන් වන අජිත් පී. පෙරේරා, චම්පික හෙට්ටිආරච්චි, රියාස් ෆාරුක් සහ චන්දිම හෙට්ටිආරච්චි යන මහත්වරුන් මෙම රැස්වීමට සහභාගී වූහ.
2026-05-29
2002 අංක 25 දරන සාපරාධී කාරණාවල දී අන්යෝන්ය සහයෝගිතාව දැක්වීමේ පනත යටතේ ශ්රී ලංකා ප්රජාතාන්ත්රික සමාජවාදී ජනරජයේ ආණ්ඩුව සහ මාලදිවයින් ජනරජයේ ආණ්ඩුව අතර 2025 ජූලි මස දී අත්සන් කරන ලද ගිවිසුම සම්බන්ධයෙන් අධිකරණ සහ ජාතික ඒකාබද්ධතා අමාත්යවරයා විසින් පනවන ලද නියමය අධිකරණ සහ ජාතික ඒකාබද්ධතා කටයුුතු පිළිබඳ අමාත්යාංශයීය උපදේශක කාරක සභාවේදී සලකා බැලීමෙන් අනතුරුව අනුමත කෙරිණි. අධිකරණ සහ ජාතික ඒකාබද්ධතා කටයුුතු ගරු අමාත්ය (නීතීඥ) හර්ෂණ නානායක්කාර මහතාගේ සභාපතිත්වයෙන් එම කාරක සභාව පාර්ලිමේන්තුවේදී පසුගියදා රැස්වූ අවස්ථාවේ මෙලෙස අනුමැතිය හිමිවිය. 2026 ජනවාරි 05 දිනැති අංක 2470/04 දරන අති විශේෂ ගැසට් පත්රයේ පළ කරන ලද මෙම නියමය 2026.05.19 වැනි දින පාර්ලිමේන්තුවට ඉදිරිපත් කර ඇත. ශ්රී ලංකාවේ ආණ්ඩුව සහ මාලදිවයින් ජනරජයේ ආණ්ඩුව අතර ඇති කරගත් මෙම ගිවිසුම මගින් සාපරාධී කාරණාවලදී දෙපාර්ශවයටම අන්යෝන්ය නෛතික සහයෝගීතාව දැක්වීමට මඟ පාදයි. ඒ අනුව අති විශේෂ ගැසට් පත්රයේ සඳහන් පරිදි මෙම නියමය මගින්, ත්රස්තවාදයට සම්බන්ධ අපරාධ සහ ත්රස්තවාදයට මුදල් සැපයීම සඳහා භාවිත කිරීමට අදහස් කරන ලද අරමුදල්, අපරාධයකින් උත්පාදිත දේ සහ අපරාධ මෙවලම් සොයා ගැනීම, තහනම් කිරීම, අහිමි කිරීම හෝ රාජසන්තක කිරීම ඇතුළු අපරාධ වැළැක්වීම, විමර්ශනය කිරීම, නඩු පැවරීම සහ මැඩ පැවැත්වීම සම්බන්ධ සාපරාධී කාරණාවල දී අන්යෝන්ය නෛතික සහයෝගීතාව දැක්වීම මගින් ගිවිසුමේ දෙපාර්ශවයේම භූමිකාව වඩාත් ඵලදායී ලෙස ඉටු කිරීම පිළිබඳව සලකා බලනු ලැබේ. අධිකරණ ක්ෂේත්රයේ පවතින පුරප්පාඩු සම්බන්ධයෙන්ද මෙහිදී අවධානය යොමු වූ අතර 2018 වසරෙන් පසු බඳවා ගැනීම් සිදු නොකිරීම නිසා මේ දක්වා පුරප්පාඩු 2647 ක් ඇති බව නිලධාරීහු පැවසූහ. ඒ අනුව බඳවා ගැනීම් කඩිනමින් සිදු කරන ලෙස අමාත්යවරයා අදාළ නිලධාරීන්ට උපදෙස් ලබා දුන්නේය. මීට අමතරව, ගරු මන්ත්රීවරු අධිකරණ, බන්ධනාගාර හා නීති ක්ෂේත්රයට අදාළව පවතින ගැටලු කාරක සභාවට ඉදිරිපත් කළ අතර ඒවාට විසඳුම් ලබා දීම සම්බන්ධයෙන් කාරක සභා සභාපතිවරයා විසින් අදාළ නිලධාරීන්ට උපදෙස් ලබා දෙන ලදී. ගරු නියෝජ්ය අමාත්ය (නීතීඥ) සුනිල් වටගල මහතා ඇතුළු ගරු මන්ත්රීවරු පිරිසක් ද අධිකරණ සහ ජාතික ඒකාබද්ධතා අමාත්යාංශය සහ ඒ යටතේ ඇති ආයතන නියෝජනය කරන නිලධාරීහු පිරිසක් ද මෙම කාරක සභා රැස්වීමට සහභාගී වූහ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
