2024-02-06
2024 අංක 9 දරන මාර්ගගත ක්‍රමවල සුරක්ෂිතභාවය පිළිබඳ පනත සම්මත වීම සහ ඉන්පසුව බලාත්මක කරනු ලැබීම පිළිබඳව පළවන වාර්තා පොදු යහපත පිණිස නිවැරදි කිරීම සඳහා මෙම ප්‍රකාශය නිකුත් කරනු ලැබේ. මහජනතාවගේ දැනගැනීම පිණිස සහ රැවටීමට ලක්වීම වැළැක්වීම සඳහා, නීතියක් සම්පාදනය කිරීමේ ක්‍රියාවලිය පිළිබඳව මෙසේ පැහැදිලි කරනු ලැබේ.
යම් පනත් කෙටුම්පතක් පාර්ලිමේන්තුවට ඉදිරිපත් කරනු ලැබූ විට ආණ්ඩුක්‍රම ව්‍යවස්ථාවේ 121 ව්‍යවස්ථාව ප්‍රකාරව ඕනෑම අයෙකුට එය ශ්‍රේෂ්ඨාධිකරණය ඉදිරියේ අභියෝගයට ලක් කිරීමේ අවස්ථාව තිබේ. ආණ්ඩුක්‍රම ව්‍යවස්ථාවේ විධිවිධාන ප්‍රකාරව, ශ්‍රේෂ්ඨාධිකරණය විසින් එම විරෝධතා සලකා බලනු ලැබීමෙන් අනතුරුව සති තුනක කාලයක් ඇතුළත ස්වකීය තීරණය කථානායකවරයා වෙත දැනුම් දෙනු ලැබේ. කථානායකවරයා ශ්‍රේෂ්ඨාධිකරණයේ තීරණය තමන් වෙත දැනුම් දෙනු ලැබීමෙන් අනතුරුව එළඹෙන පළමු වැනි පාර්ලිමේන්තු රැස්වීම් සතියේ පළමු වැනි දිනයේ දී ම එම තීරණය පාර්ලිමේන්තුවට නිවේදනය කර, එම සම්පූර්ණ තීරණය එදිනම පාර්ලිමේන්තුවේ හැන්සාඩ් වාර්තාවෙහි පළ කරන ලෙසට ද නියෝග කරයි.
ඉහත සඳහන් කළ ක්‍රියා පටිපාටිය අනුගමනය කරමින්, 2023 ඔක්තෝබර් 03 වැනි දින මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත පාර්ලිමේන්තුවට ඉදිරිපත් කිරීමෙන් පසුව කථානායකතුමා 2023 නොවැම්බර් මස 07 වැනි දින ශ්‍රේෂ්ඨාධිකරණයේ තීරණය පාර්ලිමේන්තුවට නිවේදනය කර එය එදින හැන්සාඩ් වාර්තාවේ පළ කරන ලෙසට ද නියෝග කළේය. ඉන්පසුව එය උනන්දුවක් දක්වන ඕනෑම පාර්ශ්වයකට ප්‍රවේශ විය හැකි ප්‍රසිද්ධ ලියවිල්ලක් බවට පත් විය.
ශ්‍රේෂ්ඨාධිකරණයේ තීරණය අනුව, අදාළ අමාත්‍යාංශය විසින් (මෙහිදී, මහජන ආරක්ෂක අමාත්‍යාංශය) නීති කෙටුම්පත් සම්පාදක දෙපාර්තමේන්තුවේ සහාය ඇතිව පනත් කෙටුම්පතට යෝජිත සංශෝධන ඉදිරිපත් කරනු ලැබේ. ශ්‍රේෂ්ඨාධිකරණයේ තීරණයට අනුව ආණ්ඩුක්‍රම ව්‍යවස්ථාවට අනුකූල වන පරිදි මෙම සංශෝධන ඉදිරිපත් කිරීම පනත් කෙටුම්පත ඉදිරිපත් කළ පාර්ශ්වය විසින් සිදුකරනු ලැබේ. එම සංශෝධන භාෂා ත්‍රිත්වයෙන් ම මුද්‍රණය කර සියලුම පාර්ලිමේන්තු මන්ත්‍රීවරුන්ට බෙදා දෙනු ලැබේ. මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත සම්බන්ධයෙන් ද මෙම ක්‍රියාවලිය ම අනුගමනය කරන ලද අතර, එම පනත් කෙටුම්පත දෙවැනි වර කියවීමේ විවාදයේ පළමුවැනි දිනය වූ 2024 ජනවාරි 23 වැනි දින පෙරවරුවේ අදාළ සංශෝධන සියලු ම පාර්ලිමේන්තු මන්ත්‍රීවරුන් වෙත භාෂා ත්‍රිත්වයෙන් ම මුද්‍රණය කර බෙදා දෙන ලදී.
මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත දින දෙකක් විවාදයට ගනු ලැබූ අතර, එහි කාරක සභා අවස්ථාව එම විවාදයේ දෙවැනි දිනය වූ 2024 ජනවාරි 24 වැනි දින පස්වරු 5.00 ට ආරම්භ විය. එම පනත් කෙටුම්පත වගන්තියෙන් වගන්තිය සම්මත කර ගන්නා අවස්ථාවේ කථානායකතුමා මහජන ආරක්‍ෂාව පිළිබඳ අමාත්‍යාංශය විසින් ලබා දෙන ලද සංශෝධන ලැයිස්තුව අනුව එක් එක් සංශෝධනය සම්මත කර ගැනීම සඳහා සභාවට ඉදිරිපත් කිරීමට සැලැස්වූයේය. එම අවස්ථාවේ දී පාර්ලිමේන්තුවේ රාජ්‍ය නිලධාරීන් සඳහා වෙන් කර ඇති නිල මැදිරියේ නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල්වරයා, ශ්‍රේෂ්ඨාධිකරණය ලබාදුන් තීරණයට අනුව අනිවාර්යයෙන් ඇතුළත් කළ යුතු සංශෝධන සියල්ල කාරක සභා අවස්ථාවේ ඉදිරිපත් කළ සංශෝධන මගින් ඇතුළත් කර ඇති බව කථානායකතුමාට දැනුම් දුන්නේය. මේ අවස්ථාවේ ගරු එම්.ඒ. සුමන්තිරන් මහතා යම් යම් ගැටලු ඉස්මතු කළ බැවින්, ඒ සම්බන්ධයෙන් ඒ මහතාට වැඩිදුරටත් කරුණු පැහැදිලි කර දෙන ලෙස කථානායකතුමා අතිරේක සොලිසිටර් ජනරාල්වරයාගෙන් ඉල්ලා සිටි අතර, අතිරේක සොලිසිටර් ජනරාල්වරයා ඒ අනුව කටයුතු කළේය.
එකී සංශෝධන ඉදිරිපත් කර කාරක සභා අවස්ථාවේදී සලකා බලනු ලැබීමෙන් අනතුරුව, සෑම පනත් කෙටුම්පතක් සම්බන්ධයෙන් ම අනුගමනය කරන ක්‍රියාවලිය අනුගමනය කරමින්, මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත ද තුන්වැනි වර කියවීමෙන් පසුව යථා පරිදි පාර්ලිමේන්තුවේ දී සම්මත විය. එම අවස්ථාවේදී නීතිපතිවරයා මෙම සංශෝධන ශ්‍රේෂ්ඨාධිකරණයේ තීරණය මගින් ලබා දී ඇති උපදෙස් අනුව ආණ්ඩුක්‍රම ව්‍යවස්ථාවට අනුකූල බව සහතික කරමින් ස්වකීය සහතිකය ද ලබා දුන්නේය.
මෙම සමස්ත ක්‍රියාවලියේදී ම, ශ්‍රේෂ්ඨාධිකරණය ඇතුළුව කවර හෝ පාර්ශ්වයක් විසින් යෝජනා කරනු ලබන සංශෝධනයක්/සංශෝධන සහ/හෝ නිර්දේශ/යෝජනා පිළිගැනීමට හෝ ප්‍රතික්ෂේප කිරීමට කථානායකවරයාට වගකීමක් හෝ බලයක් නැත. එම බලය සම්පූර්ණයෙන් ම පාර්ලිමේන්තුව සතු වේ; එනම් එහි මන්ත්‍රීවරුන්ට, බොහෝ විට බහුතර ඡන්දයෙන් එය සිදු කළ හැක.
යම් පනත් කෙටුම්පතක් පාර්ලිමේන්තුවේ දී සම්මත වූ විට, ආණ්ඩුකම ව්‍යවස්ථාවෙහි 79 සහ 80 ව්‍යවස්ථාවන් ප්‍රකාරව එම පනත් කෙටුම්පත පිළිබඳ සහතිකය අත්සන් කිරීමට කථානායකවරයා ආණ්ඩුක්‍රම ව්‍යවස්ථාව යටතේ බැඳී සිටියි. ඒ අනුව කථානායකතුමා අදාළ සංශෝධන ද අන්තර්ගත කරන ලද මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත 2024 අංක 9 දරන මාර්ගගත ක්‍රමවල සුරක්ෂිතභාවය පිළිබඳ පනත බවට පත්කරමින් එකී පනත් කෙටුම්පත පිළිබඳ සහතිකය 2024.02.01 වැනි දින අත්සන් කළේය.
මේ අනුව, නීතිපති දෙපාර්තමේන්තුව විසින් සහතික කරන ලද පරිදි, මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත ශ්‍රේෂ්ඨාධිකරණයේ තීරණයට අනුව පාර්ලිමේන්තුව විසින් සම්මත කරන ලද බව කථානායක කාර්යාලය නිවේදනය කරයි. පාර්ලිමේන්තුව විසින් නීති සම්පාදනය කිරීමේ ක්‍රියාවලිය නීතිපති දෙපාර්තමේන්තුව සහ නීති කෙටුම්පත් සම්පාදක දෙපාර්තමේන්තුව සමග එක්ව සිදුකරන ඒකාබද්ධ ක්‍රියාවලියක් බැවින්, පනත් කෙටුම්පතක් සම්බන්ධයෙන් ශ්‍රේෂ්ඨාධිකරණයේ තීරණයකට අනුකූල නොවන ආකාරයට හෝ ආණ්ඩුක්‍රම ව්‍යවස්ථාව උල්ලංඝණය වන ආකාරයකට කටයුතු කිරීමට පාර්ලිමේන්තුවට අවස්ථාවක් නැත.
මෙම ක්‍රියාවලිය පිළිබඳව වඩාත් හොඳින් දැනුවත්ව සිටිය යුතු අය මේ සම්බන්ධයෙන් වෙනත් ආකාරයකින් ප්‍රකාශ කිරීම කනගාටුවට කරුණක් වන අතර, කථානායකවරයාට ස්වකීය අභිමතය පරිදි නීති පැනවීමට හෝ පනත් කෙටුම්පත්වලට සංශෝධන ඉදිරිපත් කිරීමට හැකි බවට අවධාරණය කිරීම නීතිය සහ ආණ්ඩුක්‍රම ව්‍යවස්ථාව පිළිබඳ ඔවුන්ගේම දැනුමට කරන අපහාසයකි.
ඇතැම් මන්ත්රීවරුන්ගේ චර්යාව හේතුවෙන් මෙම පනත් කෙටුම්පත පිළිබඳ විවාදයේ කාරක සභා අවස්ථාවේ දී ශ්‍රේෂ්ඨාධිකරණයේ තීරණය හා අනුකූල වන බව සහතික කිරීම පිණිස නීතිපති දෙපාර්තමේන්තුවේ නියෝජිතයන් ද පැමිණ සිටීම අවශ්‍ය කරන තරමට (2017 පළාත් සභා මැතිවරණ සංශෝධන පනතෙන් පසුව) එම මන්ත්රීවරුන්ගේ සවිඥාණය වැඩිදියුණු වී ඇති බව පෙනෙන්නට තිබීම දිරිගන්වන සුළු කරුණක් වන නමුත්, ඉහත පැහැදිලි කළ පරිදි කථානායකවරයාට එවැනි ගැටලු සම්බන්ධයෙන් කිසිදු අභිමතයක් නොමැති බැවින්, නොසලකා හරිනු ලැබ ඇත්තේ ශ්‍රේෂ්ඨාධිකරණය විසින් ලබා දෙන ලද කවර නිර්දේශ දැයි එම මන්ත්‍රීවරුන් නිශ්චිතව සඳහන් කරන්නේ නම් අදාළ බලධාරීන්ට එවැනි චෝදනා වලට ප්‍රතිචාර දැක්වීමට හැකි වනු ඇත.
ඕනෑම පාර්ලිමේන්තු මන්ත්‍රීවරයකුට පැමිණ 2024 අංක 9 දරන මාර්ගගත ක්‍රමවල සුරක්ෂිතභාවය පිළිබඳ පනත සම්මත කර ගැනීම හා සම්බන්ධ සියලු ම ලියකියවිලි සහ ක්‍රියාපටිපාටි පරීක්‍ෂා කර කරුණු හොඳින් අවබෝධ කර ගැනීමට සහ විෂය පිළිබඳ දැනුමක් ඇති නිලධාරීන්ගෙන් උපදෙස් ලබා ගැනීමට හැකි බැවින් ඒ සඳහා සාදරයෙන් ආරාධනය කරන්නෙමු.
ප්‍රජාතන්ත්‍රවාදී ක්‍රමයක් තුළ එහි කොටස් පිළිබඳව විනිශ්චය කරනු ලබන්නේ සමස්තය සැලකිල්ලට ගෙන මිස එහි ප්‍රතිවිරුද්ධ පිළිවෙළට නොවන බැවින්, පාර්ලිමේන්තුව අපකීර්තියට පත් කිරීම හෝ එහි විශ්වාසනීයත්වය හෑල්ලුවට ලක් කිරීම යහපත් දෙයක් නොවන බව කථානායක කාර්යාලය සියලුම මන්ත්‍රීවරුන්ට මෙයින් නැවත සිහිපත් කර දෙයි.
2026-10-27
පාර්ලිමේන්තුව නොවැම්බර් 03 සිට 06 දක්වා රැස්වීමට නියමිත ය.ගරු කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙන් පසුගියදා (ඔක්. 23) පැවති පාර්ලිමේන්තු කටයුතු පිළිබඳ කාරක සභා රැස්වීමේ දී එම සතියට අදාළ පාර්ලිමේන්තු කටයුතු තීරණය වී තිබේ.පාර්ලිමේන්තුව රැස්වන මෙම සෑම දිනකම පෙ.ව. 9.30 සිට පෙ.ව. 10.00 දක්වා කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන් කර ඇත. පෙ.ව. 10.00 සිට 11.00 දක්වා කාලය වාචික පිළිතුරු අපේක්ෂා කරන ප්‍රශ්න සඳහා වෙන් කර ඇති අතර පෙ.ව. 11.00 සිට 11.30 දක්වා කාලය ස්ථාවර නියෝග 27(2) යටතේ වන ප්‍රශ්න සඳහා වෙන් කර තිබේ.නොවැම්බර් 03 අඟහරුවාදා, විපක්ෂය විසින් භාර දීමට නියමිත ප්‍රතිශෝධිත විශ්වාසභංග යෝජනාව, විවාදය සඳහා නියම කරන ලදී. නොවැම්බර් 04 බදාදා, පෙ.ව. 11.30 සිට ප.ව. 5.00 දක්වා ආනයන හා අපනයන පාලන පනත යටතේ අංක 2508/27 දරන අති විශේෂ ගැසට් පත්‍රයේ පළ කර ඇති රෙගුලාසි සහ පරිපූරක ඇස්තමේන්තුවක් අනුමතිය සඳහා විවාදයට ගැනීමට නියමිතව තිබේ.ඉන්පසු ප.ව. 5.00 සිට ප.ව. 5.30 දක්වා ආණ්ඩු පක්ෂය විසින් ගෙනෙනු ලබන සභාව කල් තබන අවස්ථාවේ යෝජනාව විවාදයට ගැනීමට නියමිතය. නොවැම්බර් 05 බ්‍රහස්පතින්දා, පෙ.ව. 11.30 සිට ප.ව. 5.30 දක්වා ආණ්ඩු පක්ෂය විසින් ගෙනෙනු ලබන සභාව කල් තැබීමේ යෝජනාවට අනුව විවාදයක් පැවැත්වීමට ද මෙහිදී තීරණය වී තිබේ.නොවැම්බර් 06 සිකුරාදා, පෙ.ව. 11.30 සිට ප.ව. 5.00 දක්වා පහත සඳහන් පෞද්ගලික මන්ත්‍රී යෝජනා විවාදයට ගැනීමට සඳහා කාලය වෙන් කර ඇත. පාර්ලිමේන්තු මන්ත්‍රීවරයාගේ නමපෞද්ගලික මන්ත්‍රී යෝජනාවේ නමගරු නීතිඥ චිත්‍රාල් ප්‍රනාන්දු මහතාපුත්තලම දුම්රිය මාර්ගයේ දුම්රිය ධාවනය ඉහළ නැංවීම සඳහා වැඩසටහනක් සකස් කිරීමගරු ලසිත් භාෂණ ගමගේ මහතාමාර්ග රක්ෂිතයන්හි ගස් සිටුවීම, විද්‍යාත්මකව කළමනාකරණය කිරීම සහ නඩත්තු කිරීම සඳහා විධිමත් ක්‍රමවේදයක් සකස් කිරීමගරු නීතිඥ හේෂා විතානගේ අංකුඹුර ආරච්චි මහතාලංකාවේ සියලුම අධ්‍යාපන විද්‍යා පීඨ විශ්වවිද්‍යාල පීඨ බවට පත් කිරීමගරු රවීන්ද්‍ර බණ්ඩාර මහතාසුහුරු විදුලිබල පද්ධතියක් සහ සුහුරු මීටර් හඳුන්වා දීමගරු රෝහණ බණ්ඩාර මහතාපිහිනුම් කුසලතාවය ඉහළ දැමීමේ වැඩසටහනක් සකස් කිරීමගරු උපුල් කිත්සිරි මහතාඋඩවලව ප්‍රදේශය සංචාරක කලාපයක් ලෙස නම් කිරීමගරු නීතිඥ හිරුණි විජේසිංහ මහත්මියජපන් ජබර ශාකයේ ව්‍යාප්තිය හිතකර ලෙස පාලනය හා මර්දනය කිරීමඅනතුරුව ප.ව. 5.00 සිට ප.ව. 5.30 දක්වා විපක්ෂය විසින් ගෙනෙනු ලබන සභාව කල් තබන අවස්ථාවේ යෝජනාව විවාදයට ගැනීමට නියමිතය.
2026-10-27
ශ්‍රී ලංකාවේ, කටාර් රාජ්‍ය තානාපති, ගරු හමාඩ් බින් මොහොමඩ් අල්-දෝසාරි (H.E Hamad bin Mohammed Al-Dosari) මහතා, ගරු කථානායක වෛද්‍ය ජගත් වික්‍රමරත්න මහතා පාර්ලිමේන්තුවේ දී පසුගියදා (ඔක්. 23) හමුවිය. එහිදී දෙරට අතර පවතින දිගුකාලීන මිත්‍රත්වය තවදුරටත් තහවුරු කරමින්, දෙරට අතර සහයෝගීතාව ඉදිරියටත් ශක්තිමත්ව පවත්වාගෙන යාමට ඇති කැපවීම අවධාරණය කෙරිණි.මෙම වසරේදී ශ්‍රී ලංකාව සහ කටාර් රාජ්‍යය අතර රාජ්‍යතාන්ත්‍රික සබඳතාවලට වසර 50ක් සපිරීම ද මෙහිදී සිහිපත් කෙරිණි. දෙරට අතර පවතින මිත්‍රත්වය තවදුරටත් ශක්තිමත් කරමින්, දෙරටේම ජනතාවගේ යහපත උදෙසා සහයෝගීතාව පුළුල් කර ගැනීමටත්, නව සහයෝගීතා අවස්ථා හඳුනා ගැනීමත් දෙපාර්ශ්වයම අවධාරණය කළහ.තානාපතිවරයා පිළිගත් ගරු කථානායකවරයා, ශ්‍රී ලංකාව සහ කටාර් රාජ්‍යය අතර පවතින ශක්තිමත් හා සුහද සබඳතා අවධාරණය කළ අතර, ද්විපාර්ශ්වික සබඳතා ශක්තිමත් වර්ධනය කිරීම සඳහා ඉහළ මට්ටමේ රාජ්‍ය තාන්ත්‍රික හමුවීම් පවත්වාගෙන යාමේ වැදගත්කම පෙන්වා දුන්නේය. දෙරට අතර මෑතකදී සිදු වූ ඉහළ පෙළේ සංචාර සිහිපත් කළ කථානායකවරයා, එමගින් අන්‍යෝන්‍ය අවබෝධය ශක්තිමත් කිරීමට සහ සහයෝගීතාව සඳහා පවතින අවස්ථා පුළුල් කිරීමට විශාල දායකත්වයක් ලැබුණු බව සඳහන් කළේය.කටාර් රාජ්‍යයේ සේවය කරන ශ්‍රී ලාංකික ශ්‍රමිකයන්ගේ වටිනා දායකත්වය ද කථානායකවරයා මෙහිදී අගය කළේය. විශේෂයෙන්ම කටාර් රාජ්‍යයේ සංවර්ධනයට ඔවුන් ලබා දෙන දායකත්වය මෙන්ම විදේශ ප්‍රේෂණ හරහා ශ්‍රී ලංකා ආර්ථිකයට ලබා දෙන දායකත්වය ද කථානායකවරයා පෙන්වා දුන්නේය. ශ්‍රී ලංකාව වෙත කටාර් රාජ්‍යය ලබා දෙන සහාය පිළිබඳව සිය කෘතඥතාව පළ කළ කථානායකවරයා, දෙරටේම අන්‍යෝන්‍ය යහපත උදෙසා සහයෝගීතාව තවදුරටත් ශක්තිමත් කිරීමේ වැදගත්කම ද අවධාරණය කළේය.ජාත්‍යන්තර හවුල්කාරිත්වයන් ශක්තිමත් කිරීමේදී පාර්ලිමේන්තු රාජ්‍යතාන්ත්‍රික සබඳතාවල වැදගත්කම පෙන්වා දුන් ගරු කථානායකවරයා, ශ්‍රී ලංකා - කටාර් පාර්ලිමේන්තු මිත්‍රත්ව සංගමයක් පිහිටුවීමට ශ්‍රී ලංකාවේ සූදානම ද ප්‍රකාශ කළේය. එමඟින් දෙරටේ පාර්ලිමේන්තු අතර සංවාදය, අත්දැකීම් හා යහපත් භාවිතයන් හුවමාරු කර ගැනීම මෙන්ම අන්‍යෝන්‍ය සහයෝගීතාව තවදුරටත් වර්ධනය කර ගැනීම සඳහා අවස්ථාව සැලසෙන බව ද ගරු කථානායකවරයා පැවසුවේය.විශ්වාසවන්ත මිතුරකු සහ හවුල්කරුවකු ලෙස ශ්‍රී ලංකාව සමඟ සමීපව කටයුතු කිරීමට කටාර් රාජ්‍යය කැපවී සිටින බව තානාපති අල්-දෝසාරි මහතා මෙහිදී යළි තහවුරු කළේය. දෙරට අතර ද්විපාර්ශ්වික සබඳතා තවදුරටත් ශක්තිමත් කිරීමේ සහ ජනතාව අතර පවතින සබඳතා වඩාත් සමීප කර ගැනීමේ වැදගත්කම ද ඒ මහතා අවධාරණය කළේය. එමෙන්ම, සංචාරක, වෙළෙඳ හා ආයෝජන ඇතුළු දෙරටටම වැදගත් වන ක්ෂේත්‍ර රැසක සහයෝගීතාව පුළුල් කර ගැනීමට ඇති අවස්ථා පිළිබඳව ද තානාපතිවරයා පෙන්වා දුන්නේය.දෙරට අතර පවතින දීර්ඝකාලීන මිත්‍රත්වය දෙරටේම ජනතාවට ප්‍රායෝගික ප්‍රතිලාභ අත්කර දෙන අයුරින් ඉදිරියට ගෙන යාම සඳහා නව සහයෝගීතා අවස්ථා ගවේෂණය කිරීමටත්, පවතින හවුල්කාරිත්වයන් තවදුරටත් ශක්තිමත් කිරීමටත් දෙපාර්ශ්වය සිය කැපවීම යළි තහවුරු කළහ.මෙම සංචාරය අතරතුරදී තානාපති අල්-දෝසාරි මහතා පාර්ලිමේන්තු ගොඩනැගිල්ලේ වාස්තු විද්‍යාත්මක වටිනාකම සහ ඒ අවට පරිසරයේ ස්වාභාවික සුන්දරත්වය පිළිබඳව සිය ප්‍රසාදය පළ කළේය. එසේම, ඒ මහතා පාර්ලිමේන්තු පරිශ්‍රයේ චාරිකාවකට ද එක්විය.
2026-10-27
දේශපාලන නායකයන් දූෂණයෙන් තොර, අවංක පුද්ගලයන් විය යුතු යැයි සමාජය අපේක්ෂා කරන්නේ නම්, එවැනි නායකත්වයක් බිහිවීම සඳහා සමස්ත සමාජය තුළ ද අවංකභාවය හා සදාචාරාත්මක වටිනාකම් තහවුරු විය යුතු බව ගරු නියෝජ්ය කථානායක වෛද්‍ය රිස්වි සාලි මහතා පැවසීය.ජනාධිපති ලේකම් කාර්යාලයේ පැරණි පාර්ලිමේන්තු සභා ශාලාවේදී පසුගියදා පැවති වැල්ලවත්ත සෛව මංගයර් විද්‍යාලයේ ශිෂ්‍ය පාර්ලිමේන්තුවේ මංගල සභාවාරයට විශේෂ ආරාධිත අමුත්තා ලෙස එක්වෙමින් නියෝජ්ය කථානායකවරයා මේ බව සඳහන් කළේය.රටේ දේශපාලනඥයන් තෝරා පත් කර ගනු ලබන්නේ සමාජයෙන්ම බව පෙන්වා දුන් ඒ මහතා, අනාගත නායකයන් වන ශිෂ්‍ය ප්‍රජාව පාසල් අවධියේ සිටම අවංකභාවය, සදාචාරාත්මක වටිනාකම් සහ වගකීම්සහගත හැසිරීම ප්‍රගුණ කිරීමේ වැදගත්කම ද අවධාරණය කළේය.වැල්ලවත්ත සෛව මංගයර් විද්‍යාලයේ ශිෂ්‍යාවන්ට පාර්ලිමේන්තු ක්‍රියාපටිපාටි පිළිබඳ ප්‍රායෝගික අත්දැකීම් ලබා දීමේ අරමුණින් එම විද්‍යාලය, ජනාධිපති ලේකම් කාර්යාලය සහ ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව එක්ව මෙම වැඩසටහන සංවිධානය කර තිබිණි.මෙහිදී ජනාධිපති ජ්‍යෙෂ්ඨ අතිරේක ලේකම් (ජනාධිපති අරමුදල) සුභාෂ් රෝෂන් මහතා විසින් ජනාධිපති අරමුදල හරහා සිසුන්ට සහ මහජනතාවට ලබා දෙන සේවාවන් පිළිබඳව පැහැදිලි කරන ලදී.කොළඹ විශ්වවිද්‍යාලයේ නීති පීඨයේ ජ්‍යෙෂ්ඨ කථිකාචාර්ය මහාචාර්ය ආ. සර්වේෂ්වරන් මහතා මෙම අවස්ථාවට එක්වෙමින් ශ්‍රී ලංකාවේ ආණ්ඩුක්‍රම ව්‍යවස්ථාව පිළිබඳව සිසුන් දැනුවත් කළේය. එමෙන්ම, පාර්ලිමේන්තුවේ ප්‍රධාන නිලධාරී ටී.එන්.එම්.පී. ෂහීඩ් මහතා විසින් පාර්ලිමේන්තුවේ කාර්යභාරය සහ එහි ක්‍රියාකාරීත්වය පිළිබඳව පැහැදිලි කිරීමක් සිදු කරන ලදී.ශිෂ්‍ය පාර්ලිමේන්තුවේ මංගල සභාවාරය කථානායකවරයා තෝරා පත් කර ගැනීම සහ මන්ත්‍රීවරුන් දිවුරුම් දීම සමඟ ආරම්භ විය. අනතුරුව, ශිෂ්‍ය පාර්ලිමේන්තුවේ අමාත්‍යවරුන් විසින් තම අමාත්‍යාංශ යටතේ පාසල තුළ ක්‍රියාත්මක කිරීමට අපේක්ෂිත වැඩසටහන් පිළිබඳ යෝජනා සභාවට ඉදිරිපත් කරමින් අදහස් දැක්වූහ.මෙම වැඩසටහනට සහභාගී වූ ශිෂ්‍ය පාර්ලිමේන්තු මන්ත්‍රීවරුන්ට විශේෂ ආරාධිත අමුත්තන් විසින් සහතිකපත් ප්‍රදානය කරන ලදී. වැල්ලවත්ත සෛව මංගයර් විද්‍යාලයේ ශිෂ්‍ය පාර්ලිමේන්තුව භාර ආචාර්ය සින්දූරි පද්මරාජ් මහත්මිය ස්තුති කථාව සිදු කළාය.ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව සහ ජනාධිපති ලේකම් කාර්යාලය එක්ව ක්‍රියාත්මක කරනු ලබන අඛණ්ඩ ශිෂ්‍ය පාර්ලිමේන්තු වැඩසටහන් මාලාවේ එක් අදියරක් ලෙස මෙම වැඩසටහන පැවැත්විණි.මෙම අවස්ථාවට ජනාධිපති මහජන සම්බන්ධතා අධ්‍යක්ෂ ජනරාල් ධර්මසිරි ගමගේ, ජනාධිපති ලේකම් කාර්යාලයේ සහකාර අධ්‍යක්ෂ ලුතිනන් කර්නල් නදීක දංගොල්ල යන මහත්වරුන් මෙන්ම, වැල්ලවත්ත සෛව මංගයර් විද්‍යාලයේ විදුහල්පති අරුණ්ධතී රාජවිජයන් මහත්මිය වෙනුවෙන් නියෝජ්ය විදුහල්පති මලර්විළි ශ්‍රීකුමාර් මහත්මිය, පාර්ලිමේන්තුවේ සන්නිවේදන දෙපාර්තමේන්තුවේ නිලධාරීන්, ගුරුවරුන්, දෙමාපියන් සහ සිසුන් ඇතුළු පිරිසක් සහභාගී වූහ.
2026-10-23
‘ප්‍රජා ශක්ති’ දිළිඳු බව තුරන් කිරීමේ ජාතික ව්‍යාපාරය සඳහා වෙන් කරන ලද රු.මිලියන 25,000 ක ප්‍රතිපාදන මගින් රු.මිලියන 23,000 ක් දිස්ත්‍රික් පදනමින් ප්‍රජා සංවර්ධන සභා මගින් හඳුනාගනු ලබන ව්‍යාපෘති සඳහා වෙන් කර ඇති බවත්, ඉතිරි රු.මිලියන 2,000 න් ජාතික මට්ටමින් හඳුනාගනු ලබන මධ්‍ය පරිමාණ ව්‍යාපෘති ක්‍රියාත්මක වන බවත් ග්‍රාමීය සංවර්ධන, සමාජ ආරක්ෂණ සහ ප්‍රජා සවිබලගැන්වීම් ගරු අමාත්‍ය ආචාර්ය උපාලි පන්නිලගේ මහතා පාර්ලිමේන්තුවේදී සභාගත කළ පිළිතුරෙහි සඳහන් වෙයි.ගරු පාර්ලිමේන්තු මන්ත්‍රී අජිත් ගිහාන් මහතා වාචික පිළිතුරු අපේක්ෂාවෙන් ඉදිරිපත් කළ ප්‍රශ්නවලට අමාත්‍යවරයා විසින් ලබා දුන් පිළිතුරේ ඉහත කරුණු සඳහන් විය. එම සභාගත කළ පිළිතුරට අනුව, ප්‍රජා ශක්ති ජාතික ව්‍යාපාරය යටතේ රු.මිලියන 24,221.38 ක ව්‍යාපෘති 15,725 ක් ආරම්භ කර ඇති අතර ඉන් ව්‍යාපෘති 15,316 ක් ජීවනෝපාය සංවර්ධනය යටතේ ද, 273 ක් අධ්‍යාපනය යටතේ ද සහ 136 ක් සෞඛ්‍ය යටතේ ද ක්‍රියාත්මක වෙයි. මෙම සියලුම ව්‍යාපෘති 2026.12.31 දින වන විට අවසන් කිරීමට නියමිතය.ග්‍රාම නිලධාරී වසම් මට්ටමින් පිහිටුවා ඇති ප්‍රජා සංවර්ධන සභා මගින් ඒ ඒ දිස්ත්‍රික්කවල සහ ප්‍රාදේශීය ලේකම් කොට්ඨාසවල හඳුනාගත් බහුමාන දරිද්‍රතාවය තුරන් කිරීම සඳහා ඍජුවම අදාළ වන ව්‍යාපෘති හඳුනා ගැනීමට කටයුතු කරනු ලබයි. නිෂ්පාදන ආර්ථිකය, ආහාර සුරක්‍ෂිතතාවය, සමාජ පරිසරය, මානව සම්පත් සංවර්ධනය, රැකවරණය මෙන්ම සැපයුම් ජාල සහ ප්‍රවේශය යටතේ මෙම ව්‍යාපෘති ක්‍රියාත්මක වෙයි.සමාජ සේවා දෙපාර්තමේන්තුව සහ ආබාධ සහිත තැනැත්තන් සඳහා වන ජාතික ලේකම් කාර්යාලය මගින් ආබාධ සහිත පාසල් දරුවන් විශේෂිත වූ ව්‍යාපෘති ක්‍රියාත්මක කෙරෙන අතර අධ්‍යාපන අමාත්‍යාංශය සහ වෙනත් රේඛිය අමාත්‍යාංශ, ආබාධ සහිත පාසල් දරුවන් සඳහා මූල්‍යාධාර හෝ වෙනත් සහනාධාර හෝ ලබා දීම සිදු කරයි. එසේම, ආබාධ සහිත පුද්ගලයින්ගේ සහ එම පවුල් ඒකක සවිබලගැන්වීමේ අරමුණින් ඔවුන් සඳහා විශේෂිත වූ ව්‍යාපෘති ක්‍රියාත්මක කිරීම, මූල්‍ය ආධාර ලබාදීම, සහනාධාර ලබාදීම, සහ සුබසාධන වැඩසටහන් ආදිය ක්‍රියාත්මක කෙරෙයි.
පාර්ලිමේන්තු අත්පොත
ශ්‍රී ලංකාවේ මැතිවරණ ක්‍රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්‍රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
