පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
ප්රවේශ වී ඔබේ පාර්ලිමේන්තුව සමඟ සම්බන්ධ වන්න
2023-10-24
ආහාර සුරක්ෂිතතාවය හා කෘෂිකර්මය පිළිබඳ ආංශික අධීක්ෂණ කාරක සභාව විසින් ඉදිරිපත් කරන ලද වාර්තාවේ සඳහන් නිර්දේශ ක්රියාවට නැංවීමට ඉදිරි වැඩපිළිවෙල සඳහා එකඟතාවයක් ඇති කර ගැනීමට කාරක සභාවේ සභාපති ගරු ඩී. වීරසිංහ මහතාගේ ප්රධානත්වයෙන් පසුගියදා පාර්ලිමේනතුවේදී පැවති රැස්වීමට කෘෂිකර්ම අමාත්ය ගරු මහින්ද අමරවීර මහතාද සභාපතිවරයාගේ ආරාධනය පරිදි සහභාගී විය.
කාරක සභාව විසින් ලබා දුන් නිර්දේශ ක්රියාවට නැංවීමට ගරු කෘෂිකර්ම අමාත්යවරයා ඇතුලු නිලධාරීන් ලබාදෙන සහයෝගය පිළිබඳ ස්තූතිය පල කළ සභාපතිවරයා, පසේ සාරවත් බව, සෞඛ්ය හා පරිසරය ද සුරක්ෂිත කරමින් ඉහළ බෝග අස්වැන්නක් ලබා ගැනීම සඳහා ක්රියාවට නැංවිය යුතු ඉදිරි පියවරයන්ද ඉදිරිපත් කළේය.
2020 වර්ෂයේදී කාබනික පොහොර ප්රතිපත්තිය ක්ෂණිකව ක්රියාවට නැංවීමමේදී අර්බුදය හඳුනාගෙන සිදුවූ වැරදි නිවැරදි කර කාබනික පොහොර වැඩසටහන ඉදිරියට ගෙන යාම සඳහා ක්රියාත්මක විය යුතු බව ගරු මහින්ද අමරවීර මහතා අවධාරණය කළේය. පවතින යුධමය වාතාවරණය සහ විවිධ අර්බුද නිසා මේ වන විට ලෝක වෙළඳපළෙහි පොහොර මිළ ගණන් ඉහළ යාම නිසා අද යූරියා කිලෝග්රෑමයක මිළ රුපියල් 480 ක් බවත් මෙම මිළ ඉදිරියේදී තව දුරටත් ඉහළ යා හැකි බැවින් කාබනික පොහොර භාවිතය තව දුරටත් ප්රචලිත කළ යුතු බවත් ගරු අමාත්යතුමාගේ අදහස විය.
යොදන රසායනික පොහොර ප්රමාණය 25% -50% දක්වා අඩුකර කාබනික හා ජෛව පොහොර යොදා අස්වැන්න 20%- 30% කින් වැඩි කළ හැකි බව හෙළිවූ පර්යේෂණ ප්රතිඵල ජාතික හා ජාත්යන්තර වශයෙන් ප්රකාශයට පත් කර ඇති බව සහභාගී වූ විද්යඥයින් විසින් පෙන්වා දෙන ලදී.
ශ්රී ලංකා කෘෂිකාර්මික පර්යේෂණ ප්රතිපත්ති සභාව සම්බන්ධීකරණයෙන් කෘෂිකර්ම දෙපාර්තමේන්තුව, පළාත් කෘෂිකර්ම දෙපාර්තමේන්තුව, ජාතික පොහොර ලේකම් කාර්යාලය, පොහොර නිෂ්පාදකයින්, නව පොහොර වර්ග හඳුන්වාදුන් විද්යාඥයින් හා ගොවීන්ගේ සහභාගීත්වයෙන් දේශීයව නිෂ්පාදනය කළ තාක්ෂණයෙන් දියුණු නව කාබනික හා ජෛව පොහොර පුළුල් ලෙස පරීක්ෂාවට ලක් කිරීමට නිර්දේශ කළ අතර ඒවායේ මිළ, පරිශීලක හිතකාමී බව, බෝග අස්වැන්නෙහි වැඩිවීම හා ලාභදායිතාවය මත එම පොහොර ගොවීන් අතර ප්රචලිත වන බව පෙන්වා දෙන ලදී.
කෘෂිකර්ම දෙපාර්තමේන්තුව විසින් නව පොහොර නිර්දේශ සකස් කිරීමටත්, පාංශු පර්යේෂණ වැඩසටහන අඛණ්ඩව සිදු කිරීමටත් ඒ සඳහා කෘෂිකර්ම දෙපාර්තමේන්තුවට අයත් පාංශු රසායනාගාර නූතන තාක්ෂණික පහසුකම් සහිතව සංවර්ධනය කිරීමටත් කෘෂි උපදේශක හා කෘෂි පර්යේෂණ නිලධාරී සහකාරවරුන්ගේ දායකත්වයෙන් පාංශු පර්යේෂණ වැඩසටහන් ගොවීන්ට පහසුවන ලෙස සක්රීයව සිදු කිරීමටත් තීරණය විය. කාබනික සහ ජෛව පොහොර පර්යේෂණ සහ පුහුණු කිරීම් සඳහා මාකඳුර තිරසර කෘෂිකර්ම පර්යේෂණ හා සංවර්ධන මධ්යස්ථානය ශක්තිමත් කිරීමටද යෝජනා විය.
කාබනික ගොවිතැන ප්රවර්ධනය කිරීමේදී සිදු වූ වැරදි, අභියෝග සහ බාධක අධ්යයනය කිරීම සඳහා සාමාජ විද්යාත්මක පර්යේෂණයක් පැවැත්වීමටත් කාබනික පොහොර වල ගුණාත්මකභාවය සුරක්ෂිත කිරීම සඳහා අඛණ්ඩ ඇගයීමකට ලක් කිරීමට සහාය දීමටත් හෙක්ටර් කොබ්බෑකඩුව කෘෂිකාර්මික පර්යේෂණ හා පුහුණු ආයතනයේ අධ්යක්ෂවරයා සිය කැමැත්ත පල කළේය.
දේශීය කාබනික හා ජෛව පොහොර නිෂ්පාදකයින්හට SLS 1752 දරණ GMP සහතිකය ලබා ගැනීම අනිවාර්ය කිරීම තුළින් පොහොර ප්රමිතිය දිගුකාලීනව පවත්වාගෙන යා හැකි බව ශ්රී ලංකා ප්රමිති ආයතනයේ අධ්යක්ෂවරයා පැවසීය.
බලපත්රලාභී සමාගම් 4ක් විසින් එප්පාවල රොක් පොස්පේට් භාවිතා කර SSP නිෂ්පාදනය මේ වන විටත් ආරම්භ කර ඇති බවත් ඒ හරහා මෙට්රික් ටොන් 4000ක් පමණ දැනට නිෂ්පාදනය වෙමින් පවතින බවත් ජාතික පොහොර ලේකම් කාර්යාලයේ අධ්යක්ෂවරයා විසින් පෙන්වා දෙන ලදී. වාර්ෂිකව TSP අවශ්යතාවය වන මෙට්රික් ටොන් 50,000 ක් ආනයනය කිරීම සඳහා වැය වන රුපියල් බිලියන 8 ක පමණ විදේශ විනිමය ඉතිරි කරගත හැකි බවත් මෙරට නිෂ්පාදනය වන ගුණාත්මයෙන් වැඩි SSP වල පවතින බැරලෝහ ප්රමාණය ආනයනික TSP වල පවතින බැර ලෝහ ප්රමාණයට වඩා සාපේක්ෂව අඩු ප්රමාණයක් පවතින බව ද කමිටුවේදී අනාවරණය විය. එමනිසා දැනට අපනයන සඳහා යොදා ගැනෙන එප්පාවල රොක් පොස්පේට් අප රටේ නිපදවිය හැකි SSP සඳහා අමුද්රව්යයක් වශයෙන් යොදා ගැනීමට ප්රමුඛත්වය ලබා දිය යුතු බවට යෝජනා කරන ලදී.
තාක්ෂණිකව දියුණු කරන ලද ජෛව පොහොර හා කාබනික පොහොර යොදා කෘෂිකර්ම දෙපාර්තමේන්තුව හා පළාත් කෘෂිකර්ම දෙපාර්තමේන්තුව සමඟ සම්බන්ධ වී සිදු කරන ලද පර්යේෂණ ප්රතිඵල වලින් සාර්ථක ඉහළ අස්වනු ලබාගෙන ඇති බවත් ඒ අනුව සාම්ප්රදායික ලෙස කාබනික පොහොර යෙදීමේදී මෙට්රික් ටොන් 10ක් වැනි විශාල ප්රමාණයක් යෙදීම වෙනුවට පහසුවෙන් භාවිතා කළහැකි තාක්ෂණය ගොවීන්ට හඳුන්වා දීමට පහසුකම් සලසන ලෙස විවිධ කාබනික පොහොර නිෂ්පාදකයින් විසින් ඉල්ලා සිටින ලදී.
ආංශික අධීක්ෂණ කාරක සභාවට සහභාගීවු තරුණ නියෝජිතයින් අදහස් දක්වමින් පැවසූයේ වී වගාවට මෙන්ම අනෙකුත් බෝග වර්ග වලටද එක් එක් බෝග කාණ්ඩය අනුව සහ වගා කරන ප්රදේශය අනුව පොහොර නිර්දේශ ලබා දිය යුතු බව හා ගැලපෙන පැකේජ සෑදිය යුතු බවය.
රැස්වීමට සඳහා කාරක සභාවේ සාමාජික මන්ත්රීවරුන් වන ගරු සී.බී රත්නායක මහතා, ගරු එස්.එම්. චන්ද්රසේන මහතා, ගරු කපිල අතුකෝරළ මහතා සහ කාරක සභාවේ සභාපතිතුමාගේ අවසරය මත ගරු උදයකාන්ත ගුණතිලක මහතා, ගරු යූ.කේ. සුමිත් උඩුකුඹුර මහතා සහ ගරු තිස්සකුට්ටිආරච්චි මහතා ද සහභාගී වූහ.
තවද, කෘෂිකර්ම අමාත්යාංශයේ ලේකම් ගුණදාස සමරසිංහ මහතා ඇතුළු කෘෂිකර්ම දෙපාර්තමේන්තුව, ගොවිජන සංවර්ධන දෙපාර්තමේන්තුව, ජාතික පොහොර ලේකම් කාර්යාලය, ශ්රී ලංකා කෘෂිකාර්මික පර්යේෂණ ප්රතිපත්ති සභාව, අපනයන සංවර්ධන මණ්ඩලය, හෙක්ටර් කොබ්බෑකඩුව කෘෂිකාර්මික පර්යේෂණ හා පුහුණු ආයතනය, මහනුවර ජාතික මූලික අධ්යයන ආයතනය සහ ශ්රී ලංකා ප්රමිති ආයතනයේ නිලධාරීන් ද සහභාගී වූහ. මෙයට අමතරව කාබනික පොහොර හා ජෛව පොහොර නිෂ්පාදනය කරන නිෂ්පාදකවරුන්ගේ සංගම්වල නියෝජිතයන්ද ආංශික අධීක්ෂණ කාරක සභාවට පත් කරන ලද තරුණ නියෝජිතයන්ද සහභාගී වූහ.


2026-11-14
ශ්රී ලංකන් ගුවන් සේවය මුහුණ දී ඇති මූල්ය අර්බුදය, අධික ගුවන් ගමන් ප්රමාදයන්, ණය බර සහ නව ගුවන් යානා ලබා ගැනීමේදී මතුව ඇති ප්රසම්පාදන ප්රමාදයන් පිළිබඳව යටිතල පහසුකම් හා උපායමාර්ගික සංවර්ධනය පිළිබඳ ආංශික අධීක්ෂණ කාරක සභාවේදී පුළුල් ලෙස සාකච්ඡා කෙරිණි.එම කාරක සභාව පාර්ලිමේන්තු මන්ත්රී ගරු එස්. එම්. මරික්කාර් මහතාගේ සභාපතිත්වයෙන් පසුගියදා පාර්ලිමේන්තුවේ දී රැස් වූ අවස්ථාවේදී මේ පිළිබඳව අවධානය යොමු විය.දැනට පවතින ගුවන් යානා 23 කින් සමන්විත සංචිතය ප්රමාණවත් නොවීම සහ එම ගුවන් යානා වර්ෂ 12 ක් පමණ පැරණි වීම හේතුවෙන් ගුවන් ගමන්වලට බලපාන තාක්ෂණික දෝෂ සහ ප්රමාදයන් පිළිබඳව මෙහිදී සාකච්ඡා විය. එක් ගුවන් යානයක තාක්ෂණික දෝෂයක් හෝ වෙනත් හේතුවක් මත හෝ ප්රමාදයක් ඇති වූ විට විකල්ප යානා යෙදවීමේ සීමා හේතුවෙන් සමස්ත ගුවන් ගමන් ජාලයටම බලපෑම් එල්ල වන බව ද මෙහිදී අනාවරණය විය.ගුවන් යානා ලබා ගැනීම සඳහා පසුගිය කාලයේ ක්රියාත්මක කළ සාමාන්ය ප්රසම්පාදන ක්රියාවලීන් අසාර්ථක වීම සහ ඒ ආශ්රිත දීර්ඝ ප්රමාදයන් පිළිබඳව ද කාරක සභාවේ අවධානය යොමු විය. මෙම තත්ත්වයට විසඳුමක් ලෙස ගුවන් යානා සහ ඒ ආශ්රිත උපකරණ මිලදී ගැනීම සඳහා විශේෂ ප්රසම්පාදන මාර්ගෝපදේශ මාලාවක් සකස් කර ඇති බවත්, එය ගැසට් කිරීම සඳහා කටයුතු යොදා ඇති බවත් මෙහිදී සඳහන් කෙරිණි. එමෙන්ම ප්රසම්පාදන කටයුතු සෘජුව අධීක්ෂණය කිරීම සඳහා අමාත්යාංශ මට්ටමින් විශේෂ ප්රසම්පාදන අංශයක් ද පිහිටුවා ඇති බව ද මෙහිදී ප්රකාශ විය.නව ප්රසම්පාදන මාර්ගෝපදේශ යටතේ ගුවන් යානා සංචිතය පුළුල් කිරීමට සැලසුම් කර ඇති අතර, ඉදිරි ජූනි මාසය වන විට නව නැරෝ-බොඩි ගුවන් යානයක් සහ වයිට්-බොඩි ගුවන් යානා දෙකක් සංචිතයට එක්කර ගැනීමට අපේක්ෂා කරන බව ද සාකච්ඡා විය. 2029 වන විට ගුවන් යානා සංචිතය අවම වශයෙන් යානා 29 ක් දක්වා ඉහළ නැංවීම, පස් අවුරුදු සැලැස්මේ ඉලක්කයක් බවද නිලධාරීහු සඳහන් කළහ.ශ්රී ලංකන් ගුවන් සේවයේ මූල්ය තත්ත්වය යහපත් කිරීම සඳහා මහා භාණ්ඩාගාරය මඟින් පැරණි බැංකු ණය සහ බැඳුම්කර ණය පවරා ගැනීම ඇතුළු පියවර ගෙන ඇති බව මෙහිදී පැහැදිලි කෙරිණි. එමෙන්ම ගුවන් යානා ලීසිං ගාස්තු අඩු කර ගැනීම, ඉන්ධන පිරිවැය පාලනය කිරීම සහ ගුවන් සේවයේ ආදායම් ඉහළ නැංවීම සඳහා වාණිජ උපායමාර්ග ක්රියාත්මක කිරීම පිළිබඳව ද අවධානය යොමු විය.මැදපෙරදිග කලාපයේ පවතින අර්බුදකාරී තත්ත්වය, ඉන්ධන මිල ඉහළ යාම සහ ජාත්යන්තර ගුවන් සේවා සමඟ පවතින තරගකාරීත්වය ද ශ්රී ලංකන් ගුවන් සේවයේ මෙහෙයුම් සහ ආදායම් කෙරෙහි බලපාන බව මෙහිදී සාකච්ඡා විය.තවද, ශ්රී ලංකන් ගුවන් සේවය ප්රතිව්යුහගත කිරීම සඳහා රජය විසින් පත් කරන ලද කමිටුව මඟින් නව ආයෝජකයන් ලබා ගැනීම, රාජ්ය-පෞද්ගලික හවුල්කාරීත්වයක් ඇති කිරීම හෝ රජය යටතේ පවත්වාගෙන යමින් හෝ පිරිවැය පියවාගත හැකි මට්ටමකට ගෙන ඒම ඇතුළු විකල්ප සලකා බලන බව ද සඳහන් විය.ඒ අනුව, ඉදිරි වසර දෙක හෝ තුන හෝ ඇතුළත ශ්රී ලංකන් ගුවන් සේවය පිරිවැය පියවාගත හැකි මට්ටමකට ගෙන ඒම සඳහා ගත යුතු පියවර ඇතුළත් සවිස්තරාත්මක වාර්තාවක් නොවැම්බර් 30 වැනිදාට පෙර පාර්ලිමේන්තුවට සහ අමාත්යාංශයට ඉදිරිපත් කරන ලෙස කාරක සභාව විසින් අදාළ බලධාරීන්ට උපදෙස් ලබා දෙන ලදී.මෙම කාරක සභා රැස්වීම සඳහා ගරු පාර්ලිමේන්තු මන්ත්රීවරුන් වන අජිත් පී. පෙරේරා, නලීන් බණ්ඩාර ජයමහ, රවීන්ද්ර බණ්ඩාර, මංජුල සුරවීර ආරච්චි, චතුර ගලප්පත්ති, ධනුෂ්ක රංගනාත්, ජගත් විතාන, ශාන්ත පද්ම කුමාර සුබසිංහ සහ නීතීඥ ගීතා හේරත් යන මහත්ම මහත්මීහු සහභාගී වූහ.
2026-11-14
ශ්රී ලංකාවේ ආනයන තීරුබදු ප්රතිපත්ති සහ වෙළෙඳ ගිවිසුම්වල වත්මන් තත්ත්වය සම්බන්ධයෙන් පාර්ලිමේන්තු ක්රම හා විධි පිළිබඳ කාරක සභාව එහි සභාපති ගරු පාර්ලිමේන්තු මන්ත්රී විජේසිරි බස්නායක මහතාගේ ප්රධානත්වයෙන් රැස් වූ අවස්ථාවේදී පුළුල් ලෙස සාකච්ඡා කෙරිණි.මෙහිදී, ශ්රී ලංකා වාණිජ දෙපාර්තමේන්තුවේ වැඩබලන අධ්යක්ෂ ජනරාල් සෝමසේන මහදිවුල්වැව මහතා මේ සම්බන්ධයෙන් කාරක සභාවට සවිස්තරාත්මක පැහැදිලි කිරීමක් සිදු කළේය. ශ්රී ලංකාවේ ද්විපාර්ශ්වික සහ බහුපාර්ශ්වික වෙළෙඳ ගිවිසුම්වල වත්මන් තත්ත්වය සහ ඒවා ඉදිරියට පවත්වාගෙන යාම ඇතුළු කරුණු පිළිබඳව මෙහිදී අවධානය යොමු විය.සාකච්ඡා මට්ටමේ පවතින වෙළෙඳ ගිවිසුම් සම්බන්ධයෙන් ශක්යතා අධ්යයන සිදු කරමින් ඒවා අඛණ්ඩව ඉදිරියට ගෙන යාමට අවශ්ය පියවර ගන්නා ලෙස කාරක සභාව අවධාරණය කළේය.මෙම කාරක සභා රැස්වීමට ගරු නියෝජ්ය අමාත්යවරුන් වන චතුරංග අබේසිංහ සහ එරංග වීරරත්න යන මහත්වරුන් ද, ගරු පාර්ලිමේන්තු මන්ත්රීවරුන් වන අශෝක සපුමල් රන්වල, තිළිණ සමරකෝන්, චම්පික හෙට්ටිආරච්චි සහ චතුර ගලප්පත්ති යන මහත්වරුන් ඇතුළු පිරිසක් සහභාගී වූහ.
2026-11-13
විදේශීය ත්රස්තවාදී සටන්කරුවන් වැළැක්වීමේ පනත් කෙටුම්පත සඳහා ආර්ථික සංවර්ධනය සහ අන්තර්ජාතික සබඳතා පිළිබඳ ආංශික අධීක්ෂණ කාරක සභාවේ අනුමැතිය හිමි විය.එම ආංශික අධීක්ෂණ කාරක සභාව එහි සභාපති ගරු පාර්ලිමේන්තු මන්ත්රී නීතිඥ ලක්මාලි හේමචන්ද්ර මෙනවියගේ ප්රධානත්වයෙන් පාර්ලිමේන්තුවේ දී පසුගියදා රැස් වූ අවස්ථාවේදී මෙම පනත් කෙටුම්පත සලකා බලා අනුමත කෙරිණි.විදේශීය ත්රස්තවාදී සටන්කරුවන්ගෙන් එල්ල වන තර්ජනය වැළැක්වීම සහ මැඩපැවැත්වීම සම්බන්ධයෙන් 2014 සැප්තැම්බර් මස 24 වැනි දින සම්මත කරන ලද එක්සත් ජාතීන්ගේ ආරක්ෂක මණ්ඩලයේ 2178 දරන යෝජනාව බලාත්මක කිරීම සඳහාත්, ඊට සම්බන්ධ හෝ ආනුෂංගික කරුණු සඳහා විධිවිධාන සැලසීම සඳහාත් මෙම පනත් කෙටුම්පත ඉදිරිපත් කර තිබේ.විදේශ කටයුතු, විදේශ රැකියා සහ සංචාරක අමාත්යවරයා විසින් මෙම පනත් කෙටුම්පත පසුගිය ඔක්තෝබර් මස 20 වැනි දින පළමු වර කියවීම සඳහා පාර්ලිමේන්තුවට ඉදිරිපත් කර තිබිණි.ශ්රී ලාංකික පුරවැසියකු හෝ ශ්රී ලාංකික පුරවැසියකු නොවන වෙනත් රටක පුරවැසියකු හෝ ශ්රී ලංකාව තුළ සිටියදී හෝ ශ්රී ලංකාවෙන් පිටතදී වරදක් සිදුකර ඇති අවස්ථාවක හෝ, එම ක්රියාව අදාළ රටේ නීතිය යටතේ ද වරදක් වන අවස්ථාවකදී මෙම පනත යටතේ ශ්රී ලංකාව තුළ නීතිමය ක්රියාමාර්ග ගැනීමට හැකි බව නිලධාරීහු කාරක සභාව හමුවේ පැහැදිලි කළහ.ත්රස්තවාදී ක්රියාවන්හි නිරත වීම, ඒවා සැලසුම් කිරීම, සූදානම් කිරීම හෝ ඒවාට සහභාගී වීම මෙන්ම ත්රස්තවාදී පුහුණුව ලබා දීම හෝ ලබා ගැනීම ද මෙම පනත යටතේ වැරදි ලෙස අර්ථ දක්වා ඇති බව නිලධාරීහු කාරක සභාවට දැනුම් දුන්හ.විදේශ රටවල පදිංචිව සිටින ශ්රී ලාංකිකයන් ඉලක්ක කර ගනිමින් වාර්ගික පදනම මත මෙම නීතිමය විධිවිධාන හඳුන්වා දී නොමැති බව ද නිලධාරීන් විසින් කාරක සභාවට අවධාරණය කරන ලදී.දීර්ඝ සාකච්ඡාවකින් අනතුරුව කාරක සභාව විසින් අදාළ පනත් කෙටුම්පත අනුමත කරන ලදී. කෙසේ වෙතත්, කාරක සභා සාමාජික ගරු පාර්ලිමේන්තු මන්ත්රී සිවඥානම් ශ්රීතරන් මහතා මෙම පනත් කෙටුම්පතට සිය විරෝධය පළ කළේය.මෙම කාරක සභා රැස්වීමට ගරු පාර්ලිමේන්තු මන්ත්රීවරුන් වන සුරංග රත්නායක, තිලිණ සමරකෝන්, විජේසිරි බස්නායක සහ සිවඥානම් ශ්රීතරන් යන මහත්වරුන් ඇතුළු පිරිසක් සහභාගී වූහ. එමෙන්ම විදේශ කටයුතු, විදේශ රැකියා සහ සංචාරක අමාත්යාංශය, ආරක්ෂක අමාත්යාංශය, නීතිපති දෙපාර්තමේන්තුව සහ නීති කෙටුම්පත් සම්පාදක දෙපාර්තමේන්තුව නියෝජනය කරමින් රාජ්ය නිලධාරීහු ද මෙම අවස්ථාවට එක්ව සිටියහ.
2026-11-13
ගුරු සේවයේ සිට විදුහල්පති සේවයට පත්වීමේදී ඇතිවන වැටුප් විෂමතා පිළිබඳව අධ්යාපනය, ශ්රම බලකාය සහ මානව ප්රාග්ධනය පිළිබඳ ආංශික අධීක්ෂණ කාරක සභාව විසින් පත් කරන ලද අනුකමිටුවේදී දීර්ඝ වශයෙන් සාකච්ඡා කෙරිණි.එම අනුකමිටුව එහි සභාපති ගරු පාර්ලිමේන්තු මන්ත්රී සුනිල් රාජපක්ෂ මහතාගේ ප්රධානත්වයෙන් පසුගියදා රැස්වූ අවස්ථාවේදී මෙම කරුණු සාකච්ඡාවට ලක් විය.මේ සඳහා විදුහල්පති සේවයේ වෘත්තීය සමිති නියෝජිතයින්, අධ්යාපන, උසස් අධ්යාපන සහ වෘත්තීය අධ්යාපන අමාත්යාංශය, මුදල්, ක්රමසම්පාදන සහ ආර්ථික සංවර්ධන අමාත්යාංශය නියෝජනය කරමින් නිලධාරීහු සහභාගී වූහ.ගුරු සේවයේ සිට විදුහල්පති සේවයට පිවිසීම උසස්වීමක් ලෙස නොව “නව පත්වීමක්” ලෙස සැලකීම මෙම වැටුප් විෂමතාවට හේතු වී ඇති බව වෘත්තීය සමිති නියෝජිතයෝ පෙන්වා දුන්හ.ගුරු සේවයේ I ශ්රේණියේ සිට විදුහල්පති සේවයේ III ශ්රේණියට පත්වීමේදී වැටුප් වර්ධක අතර පවතින සැලකිය යුතු වෙනස හේතුවෙන් මෙම තත්ත්වය තවදුරටත් උග්ර වන බව ද ඔවුහු සඳහන් කළහ.එසේම, විදුහල්පති සේවයට පත්වීමේදී ඇතිවන වැටුප් වෙනස පියවීම සඳහා ගැලපුම් දීමනාවක් ලබා දී තිබුණ ද, සේවා කාලය ඉදිරියට යාමේදී ගුරු සේවයේ තවදුරටත් රැඳී සිටියේ නම් හිමි වන ඉහළ වැටුප් වර්ධක නොලැබීම හේතුවෙන් යළිත් වැටුප් පරතරයක් ඇති වන බව ද ඔවුහු පෙන්වා දුන්හ.මේ හේතුවෙන් ගුරු සේවයේ I සහ II -I ශ්රේණිවල සේවය කරන ජ්යෙෂ්ඨ හා පළපුරුදු ගුරුවරුන් විදුහල්පති විභාගයට පෙනී සිටීමට සහ විදුහල්පති සේවයට පිවිසීමට අධෛර්යමත් වන තත්ත්වයක් මතුව ඇති බව ද මෙහිදී අවධාරණය කෙරිණි.කාරක සභාවට ඉදිරිපත් වූ කරුණු සලකා බලා මේ සම්බන්ධයෙන් රාජ්ය නිලධාරීන්ගේ වැටුප් හා විශ්රාම වැටුප් කොමිෂන් සභාව වෙත අදාළ නිර්දේශ ඉදිරිපත් කිරීමට පියවර ගන්නා බව අනුකමිටුවේ සභාපතිවරයා පැවසීය.මීට අමතරව, විදුහල්පති සේවයේ නියුතු නිලධාරීන් මුහුණ දෙන අනෙකුත් ගැටලු සම්බන්ධයෙන් අධ්යාපන, උසස් අධ්යාපන සහ වෘත්තීය අධ්යාපන අමාත්යාංශය, මුදල්, ක්රමසම්පාදන සහ ආර්ථික සංවර්ධන අමාත්යාංශය සහ ආයතන අධ්යක්ෂ ජනරාල් සමග සාකච්ඡා කිරීමට ද අනුකමිටුව විසින් තීරණය කරන ලදී.මෙම රැස්වීමට ගරු පාර්ලිමේන්තු මන්ත්රීවරුන් වන අබූබකර් අතම්බාවා, සුගත් වසන්ත ද සිල්වා සහ චානක මාදුගොඩ යන මහත්වරු ද සහභාගී වූහ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks