E   |   த   |  

2023-06-12

පුවත් කාණ්ඩ : කාරක සභා පුවත් 

සී/ස එක්සත් ප්‍රවෘත්ති පත්‍ර සමාගමේ පරිපාලන දුර්වලතා රැසක් ‘කෝප්’ කමිටුවේදී අනාවරණය වෙයි

  • අමාත්‍යාංශ ‍ලේකම්වරයාම ආයතනයේ සභාපතිවරයා ලෙස කටයුතු කිරීම පිළිබද අවධානය
  • ආයතනික සංයුක්ත සැලැස්මක් පිළියෙල කිරීමට උපදෙස්
  • මානව සම්පත් සැලැස්ම සති දෙකක් තුළ ඉදිරිපත් කිරීමට නියෝග
  • ආයතනයේ සේවය නොකළ උපදේශකවරුන්ට වැටුප් ගෙවීම සම්බන්ධයෙන් සතියක් තුළ වාර්තාවක් කැදවයි
  • මුදල් අමාත්‍යාංශ චක්‍රලේඛ අදාළ කරගැනීම පිළිබද නීතිපති උපදෙස් - ආයතනික වෙනස්කම් පිළිබද මහාභාරකරුගෙන් නිර්දේශ කැදවයි
  • පුවත්පත් ලිපියකට අදාළ නඩුවකදී රු. මිලියන 500ක් ගෙවීමට නියම කිරීමේ සිද්ධිය පිළිබද වාර්තාවක්
  • මිලියන 14ක මූල්‍ය වංචාවක් සිදුකළ  හිටපු අලෙවි ප්‍රධානියාට රු. මිලියන 2.5 ක් පාරිතෝශික ගෙවීම පිළිබද පුළුල් විමර්ශනයක්

 

පාර්ලිමේන්තු මන්ත්‍රී ගරු මහාචාර්ය රංජිත් බණ්ඩාර මහතාගේ සභාපතීත්වයෙන් 2023.06.08 දින රැස්වූ පොදු ව්‍යාපාර පිළිබද කාරක සභාවේදී සීමාසහිත එක්සත් ප්‍රවෘත්ති පත්‍ර සමාගමේ 2020 හා 2021 වසරවල විගණකාධිපති වාර්තා සහ වර්තමාන කාර්යසාධනය පිළිබද විමර්ශනය කිරීම සිදුවිය.

මෙහිදී පහත සදහන් කරුණු කෙරෙහි අවධානය යොමු විය.

 

අමාත්‍යාංශ ‍ලේකම්වරයාම ආයතනයේ සභාපතිවරයා ලෙස කටයුතු කිරීම පිළිබද අවධානය

මෙහිදී ජනමාධ්‍ය අමාත්‍යාංශ ලේකම්වරයා එක්සත් ප්‍රවෘත්ති පත්‍ර සමාගමේ සභාපති වරයා ලෙස කටයුතු කිරීම පිළිබඳව විගණකාධිපතිවරයා විමසීමක් කළේය. ආයතන සභාපතිවරයා අදාල අමාත්‍යංශයේ ප්‍රධාන ගිණුම් නිලධාරියා ලෙස කටයුතු කිරීමේදී අමාත්‍යංශයේ ලේකම්වරයාට දෙනු ලබන නියෝග ක්‍රියාවට නැංවීම හමුවේ ගැටලුකාරී තත්ත්වයක් පැන නැගිය හැකි බව පෙන්වා දෙන ලදී.

එහිදී පත්වීම් දෙකම ජනාධිපතිවරයා විසින් කරන ලද ඒවා බව අමාත්‍යංශ ලේකම්වරයා සඳහන් කරන ලදී. ඒ අනුව ඒ සම්බන්ධව තවදුරටත් කරුණු විමසීමක් සිදු නොකළ අතර එක්සත් ප්‍රවෘත්ති පත්‍ර සමාගමේ ප්‍රධාන කොටස්කරුවා වන මහා භාරකාරකරු වෙත, මේ සම්බන්ධයෙන් සුදුසු ක්‍රියාමාර්ග කඩිනමින් ගන්නා ලෙස ඉල්ලීමක් කරන ලදී.

 

ආයතනික සංයුක්ත සැලැස්මක පිළියෙල කිරීම

ආයතනය සතුව 2021-2024 වර්ෂ සදහා උපායමාර්ගික සැලැස්මක් පිළියෙල කර තිබුණද  සංයුක්ත සැලැස්මක් නොතිබීම සම්බන්ධයෙන් අවධානය යොමු විය. 2018 – 2020 කාලයේ උපක්‍රමික සැලැස්මක් වෙනුවෙන් රු. මිලියන 10 ක් වියදම්ව තිබීම පිළිබදව අවධානය යොමුවිය. මේ අනුව ආයතනයේ වරලත් ගණකාධිකාරිවරුන් ඇතුළු ප්‍රවීණයන් රැසක් සිටින බැවින් ඔවුන්ගේ දායකත්වයෙන් සංයුක්ත සැලැස්මක් සකස්  කරන ලෙසටත් උපදෙස් ලබා දීම සිදුවිය.

 

මානව සම්පත් සැලැස්ම සති දෙකක් තුළ කෝප් කමිටුවට ලබාදෙන්න

ආයතනයේ හිටපු 1200 කට ආසන්න සේවක සංඛ්‍යාව මේවන විට 972 දක්වා අඩුකොට ඇති බවත් මෙම ප්‍රමාණය 850 දක්වා අඩු කිරීමට අපේක්ෂා කරන බවත් ජනමාධ්‍ය අමාත්‍යාංශයේ ලේකම් සහ  එක්සත් ප්‍රවෘත්ති පත්‍ර සමාගමේ සභාපති අනුෂ පැල්පිට මහතා පැවසීය.

2017 වසරේදී උපදේශකවරියකට රු.මිලියන 3.1කට ආසන්න ගෙවීමක් සිදුකොට මෙන්ම 2022 වසරෙන් පසු කොන්ත්‍රාත් පදනම යටතේද මානව සම්පත් කලමණාකරණ සැලැස්මක් සකස්කර ඇති බවත් විගණකාධිපතිවරයා පෙන්වා දුන්නේය. මේ අනුව  සේවක සංඛ්‍යාව 850 කට සීමා කොට මෙලෙස සකසන ලද  මානව සම්පත් සැලැස්ම සති දෙකක් තුළ කමිටුව වෙත ලැබීමට සලස්වන ලෙස කෝප් සභාපතිවරයා ජනමාධ්‍ය අමාත්‍යංශ ලේකම්වරයාට නිර්දේශ කළේය.

 

ආයතනයේ සේවය නොකළ උපදේශකවරුන්ට වැටුප් ගෙවීම සම්බන්ධයෙන් සතියක් තුළ වාර්තාවක් කැදවයි

2020 දෙසැම්බර් 07 වන දින උපදේශකවරයෙකු  ලෙස සමාගමට බදවාගෙන රු මිලියන 1.8 ක මුදලක් ගෙවා තිබීම සහ ජනමාධ්‍ය අමාත්‍යාංශය වෙත නිදහස් කර තිබූ තවත් උපදේශකයෙකු සදහාද සමාගමට කිසිදු සේවයක් නොගෙන උපදේශක ගාස්තු වශයෙන් රු. ලක්ෂ 9ක මුදලක් ගෙවා තිබීම පිළිබද විගණකාධිපතිවරයා කරුණු පෙන්වා දුන්නේය. හිටපු අමාත්‍යවරයෙකුගේ නිර්දේශය මත මෙය සිදු කළ බව මෙහිදී අනාවරණය වූ අතර මේ සදහා අධ්‍යක්ෂ මණ්ඩලය වගකිවයුතු බව කමිටුව පෙන්වා දෙන ලදී.

එසේම මෙවැනි අතපෙවීම්වලින් තොරව ස්වාධීනව කටයුතු කරගෙනයාමට හැකිවන පරිදි මානව සම්පත් සැලැස්ම සකස් කරන ලෙස ද කමිටුව විසින් උපදෙස් දෙන ලදී. ඉදිරියේදී කිසිදු අයුරින් මෙවැනි ක්‍රියා සිදුවීමට ඉඩ නොතබන බව වත්මන් සභාපතිවරයා සහතික විය. ඒ අනුව මේ පිළිබදව වහාම කරුණු සොයාබලා වාර්තාවක් සතියක් තුළ ඉදිරිපත් කරන ලෙසත් ලේකම්වරයාට නියෝග කළේය.

 

මුදල් අමාත්‍යාංශ චක්‍රලේක අදාළ කරගැනීම පිළිබද නීතිපති උපදෙස් - ආයතනික වෙනස්කම් පිළිබද මහාභාරකරුගෙන් නිර්දේශ කැදවයි

මෙම ආයතනයට 1973 වසරේදී රජයට පවරා ගැනීමේදී මහාභාරකරුගේ යටතට පත් කර ඇති බැවින් මුදල් අමාත්‍යාංශයේ චක්‍රලේක ආයතනයට අදාළ වේද යන්න පිළිබදව අපහැදිළි තත්ත්වයක් ඇති බව නිලධාරීහු පැවසූහ. මේ පිළිබදව නීතිපතිගේ උපදෙස් ලබා ගන්නා ලෙස කමිටුව දන්වා සිටියේය. එසේම මෙම ආයතනය පාලනය කිරීම සදහා කවරනම් නීතිරීති සකස්කළ යුත්තේද යන්නත් සිදුවිය යුතු ආයතනින වෙනස්කම් මොනවාද යන්නත් දන්වා එවන ලෙස මහාභාරකරුට නිර්දේශ කළේය.

 

පුවත්පත් ලිපියකට රු මිලියන 500ක වන්දියක් ගෙවීමට නි‍යම කිරීමේ සිද්ධිය සම්බන්ධයෙන් වාර්තාවක් කැදවයි

සිළුමිණ පුවත්පතෙහි පළ වූ ලිපියකට අදාළව වන්දි ඉල්ලා ගොනු කළ නඩුවකදී පැමිණිලිකරුට මිලියන 500 ක වන්දියක් ගෙවීමට නියම කිරීම පිළිබදවද මෙහිදී අවධානය යොමුවිය.  මෙම නඩුව  2010 වසරේදී කොළඹ දිසා අධිකරණයේ කැදවූ අවස්ථාවේදී සමාගම වෙනුවෙන් පෙනී සිටි සමාගමේ නීතීඥවරයා වැරදි උසාවි කාමරයක සිටීම නිසා පැමිණිල්ලට පක්ෂව තීන්දුව ලබා දී රු. මිලියන 500ක වන්දියක් ගෙවන ලෙස අධිකරණය නියෝග කර ඇත. මේ පිළිබද මේවන විට ශ්‍රේෂ්ඨාධිකරණයේ අභියාචනා ‍ගොනුකර ඇතිබවත් අනාවරණය විය. සමාගමේ මෙම නීතිඥවරයාට එරෙහිව කිසිදු විනය ක්‍රියාමාර්ගයක් ගෙන නොතිබූ අතර 2020 වසරේදී විශ්‍රාම ගෙන ඇති බව ද අනාවරණය විය.  මේ සම්බන්ධ කඩිනම් නීති උපදෙස් ලබා ගෙන ගනු ලබන ක්‍රියාමාර්ග පිළිබදව සතියක් තුළ කෝප් කමිටුවට දන්වන ලෙස කෝප් සභාපතිවරයා නියෝග කළේය.

 

මිලියන 14ක  මූල්‍ය වංචාවක් සිදුකළ  හිටපු අලෙවි ප්‍රධානියාට රු. මිලියන 2.5 ක් පාරිතෝශික ගෙවීම පිළිබද පුළුල් විමර්ශනයක්

ආයතනයේ හිටපු අලෙවි ප්‍රධානී ආයතනයට 2017 වසරේදී සිදු කළ මිලියන 14ක  මූල්‍ය වංචාවක් සම්බන්ධයෙන් විධිමත් විනය පරීක්ෂණයකින් වැරදිකරු වුවද අවසානයේ ඔහුට පාරිතෝෂික දීමනා (gratuity) ලෙස රු මිලියන 2.5 කට ආසන්න මුදලක් ගෙවීම සම්බන්ධයෙන් මෙහිදී කරුණු අනාවරණය විය. මේ සම්බන්ධ විධිමත් විමර්ශනයක් සිදුකර ගනු ලබන ක්‍රියාමාර්ග සති දෙකක් තුළ  දන්වන ලෙසද කමිටුව දන්වා සිටියේය.

 

අගරු චෙක්පත්වලින් රු. මිලියන 22 කට ආසන්න මුදලක් ලබා ගැනීමට නෛතික පියවර කඩිනම් කිරීමට උපදෙස්

අගරු චෙක්පත්වලින් රු. මිලියන 22 කට ආසන්න මුදලක් ආයතනයට ලැබිය යුතු බවද මෙහිදී අනාවරණය විය. මේ සම්බන්ධයෙන් ගෙන ඇති නෛතික ක්‍රියාමාර්ග පිළිබද දැනුම් දෙන ලෙස කමිටුව උපදෙස් දුන්නේය.

මීට අමතරව විගණන ප්‍රමිතීන්ට අනුව සහ ප්‍රධාන ක්‍රියාකාරකම් ආවරණය වන පරිදි ප්‍රමාණවත් අභ්‍යන්තර විගණයක් සිදු නොවීම, රාජ්‍ය සහ පෞද්ගලික ආයතන සදහා ණය පදනම මත දැන්වීම් පළ කිරීමේදී වසර දෙකකට වැඩි කාලක සිට නොපියවූ ආයතන 189 ක  රු. මිලියන 20 කට ආසන්න හිගමුදල් ලබා ගැනීම කඩිනමින් කටයුතු කිරීමේ අවශ්‍යතාව පිළිබදව ද කමිටුවේ අවධානය යොමු විය.

එසේම ප්‍රගතිය සමාලෝචනය සදහා නැවත මාස හයක කාලයකින් සීමාසහිත එක්සත් ප්‍රවෘත්ති පත්‍ර සමාගම කැදවන බවද කෝප් සභාපතිවරයා පැවසීය.

පාර්ලිමේන්තු මන්ත්‍රීවරුන් වන ගරු මහින්දානන්ද අලුත්ගමගේ, ගරු දයාසිරි ජයසේකර, ගරු ඉරාන් වික්‍රමරත්න, ගරු ජගත් කුමාර සුමිත්‍රාආරච්චි, ගරු එම් රාමේශ්වරන්, ගරු රාජිකා වික්‍රමසිංහ, ගරු මධුර විතානගේ සහ ගරු මහාචාර්ය චරිත හේරත් යන මහත්වරු මෙම කාරක සභා රැස්වීමට එක්ව සිටියහ.

 

1 5



සම්බන්ධිත පුවත්

2026-11-16

අලි-මිනිස් ගැටුම අවම කිරීම සහ අලි සංරක්ෂණය සඳහා නව තාක්ෂණික හා ප්‍රායෝගික විසඳුම් සෙවීම පිළිබඳව ආංශික අධීක්ෂණ කාරක සභාවේ අවධානය

පරිසරය, කෘෂිකර්මය සහ සම්පත් තිරසාරත්වය පිළිබඳ ආංශික අධීක්ෂණ කාරක සභාව එහි සභාපති ගරු පාර්ලිමේන්තු මන්ත්‍රී හෙක්ටර් අප්පුහාමි මහතාගේ සභාපතිත්වයෙන් පසුගියදා (නොවැ. 13) පාර්ලිමේන්තුවේ දී රැස් විය.මෙහිදී අලි-මිනිස් ගැටුම පාලනය කිරීම, වල් අලින්ගේ සංක්‍රමණ රටා හඳුනාගැනීම සහ අලි සංරක්ෂණය සඳහා නව තාක්ෂණය යොදාගැනීම පිළිබඳව පුළුල් ලෙස සාකච්ඡා කෙරිණි. එමෙන්ම කාවන්තිස්ස ඇතාගේ මරණය සම්බන්ධයෙන් ද අවධානය යොමු විය.අලින්ගේ වාසස්ථාන අහිමි වීම, සාම්ප්‍රදායික අලි මංකඩ අවහිර වීම සහ ජනාවාස හා වගාබිම් ආශ්‍රිතව ආහාර සොයා යාම, අලි-මිනිස් ගැටුම වර්ධනය වීමට බලපාන ප්‍රධාන හේතු ලෙස මෙහිදී සාකච්ඡා විය. අලින්ගේ සංක්‍රමණ රටා හඳුනාගැනීම සඳහා GPS සහ සැටලයිට් කොලර් තාක්ෂණය යොදාගැනීමේ වැදගත්කම ද මෙහිදී අවධාරණය කෙරිණි.අලි-මිනිස් ගැටුම අවම කිරීම සඳහා ප්‍රාදේශීය මට්ටමින් වනජීවී නිලධාරීන්, ග්‍රාම නිලධාරීන් සහ ගම්වාසීන් සම්බන්ධ කරගත් ඒකාබද්ධ කමිටු පිහිටුවීම, ප්‍රජා සහභාගීත්වය ශක්තිමත් කිරීම සහ පූර්ව අනතුරු ඇඟවීමේ සන්නිවේදන ජාල ක්‍රියාත්මක කිරීම පිළිබඳව ද අදහස් හුවමාරු විය.එසේම රෝගී හා තුවාල ලැබූ අලින්ට ප්‍රතිකාර කිරීමේදී වනජීවී පශු වෛද්‍යවරුන් මුහුණ දෙන අභියෝග පිළිබඳව ද සාකච්ඡා කෙරිණි. වනජීවී දෙපාර්තමේන්තුවේ පශු වෛද්‍ය නිලධාරීන්ගේ සේවය, අලින් නිර්වින්දනය කිරීමේදී පවතින අවදානම් සහ ක්ෂේත්‍රයේදී ප්‍රතිකාර කිරීම සඳහා අවශ්‍ය ජංගම වෛද්‍ය පහසුකම් හා ජංගම එක්ස්-රේ යන්ත්‍ර වැනි තාක්ෂණික උපකරණවල අවශ්‍යතාවය ද මෙහිදී අවධානයට ලක් විය.මෙම අවස්ථාවට ගරු පාර්ලිමේන්තු මන්ත්‍රීවරුන් වන කිංස් නෙල්සන්, උපුල් කිත්සිරි, නීතීඥ එම්. ඒ. සී. එස්. චතුරි ගංගානි, සුදත් බලගල්ල, කිට්නන් සෙල්වරාජ් සහ නීතීඥ භාග්‍ය ශ්‍රී හේරත් යන මහත්ම මහත්මීහු සහභාගී වූහ. 


2026-11-14

ශ්‍රී ලංකන් ගුවන් සේවය ලාභදායී මට්ටමකට ගෙන ඒම සඳහා පස් අවුරුදු සැලැස්මක් - යානා සංචිතය ඉහළ නැංවීම සහ ණය බර පාලනය කිරීම පිළිබඳ අවධානය

ශ්‍රී ලංකන් ගුවන් සේවය මුහුණ දී ඇති මූල්‍ය අර්බුදය, අධික ගුවන් ගමන් ප්‍රමාදයන්, ණය බර සහ නව ගුවන් යානා ලබා ගැනීමේදී මතුව ඇති ප්‍රසම්පාදන ප්‍රමාදයන් පිළිබඳව යටිතල පහසුකම් හා උපායමාර්ගික සංවර්ධනය පිළිබඳ ආංශික අධීක්ෂණ කාරක සභාවේදී පුළුල් ලෙස සාකච්ඡා කෙරිණි.එම කාරක සභාව පාර්ලිමේන්තු මන්ත්‍රී ගරු එස්. එම්. මරික්කාර් මහතාගේ සභාපතිත්වයෙන් පසුගියදා පාර්ලිමේන්තුවේ දී රැස් වූ අවස්ථාවේදී මේ පිළිබඳව අවධානය යොමු විය.දැනට පවතින ගුවන් යානා 23 කින් සමන්විත සංචිතය ප්‍රමාණවත් නොවීම සහ එම ගුවන් යානා වර්ෂ 12 ක් පමණ පැරණි වීම හේතුවෙන් ගුවන් ගමන්වලට බලපාන තාක්ෂණික දෝෂ සහ ප්‍රමාදයන් පිළිබඳව මෙහිදී සාකච්ඡා විය. එක් ගුවන් යානයක තාක්ෂණික දෝෂයක් හෝ වෙනත් හේතුවක් මත හෝ ප්‍රමාදයක් ඇති වූ විට විකල්ප යානා යෙදවීමේ සීමා හේතුවෙන් සමස්ත ගුවන් ගමන් ජාලයටම බලපෑම් එල්ල වන බව ද මෙහිදී අනාවරණය විය.ගුවන් යානා ලබා ගැනීම සඳහා පසුගිය කාලයේ ක්‍රියාත්මක කළ සාමාන්‍ය ප්‍රසම්පාදන ක්‍රියාවලීන් අසාර්ථක වීම සහ ඒ ආශ්‍රිත දීර්ඝ ප්‍රමාදයන් පිළිබඳව ද කාරක සභාවේ අවධානය යොමු විය. මෙම තත්ත්වයට විසඳුමක් ලෙස ගුවන් යානා සහ ඒ ආශ්‍රිත උපකරණ මිලදී ගැනීම සඳහා විශේෂ ප්‍රසම්පාදන මාර්ගෝපදේශ මාලාවක් සකස් කර ඇති බවත්, එය ගැසට් කිරීම සඳහා කටයුතු යොදා ඇති බවත් මෙහිදී සඳහන් කෙරිණි. එමෙන්ම ප්‍රසම්පාදන කටයුතු සෘජුව අධීක්ෂණය කිරීම සඳහා අමාත්‍යාංශ මට්ටමින් විශේෂ ප්‍රසම්පාදන අංශයක් ද පිහිටුවා ඇති බව ද මෙහිදී ප්‍රකාශ විය.නව ප්‍රසම්පාදන මාර්ගෝපදේශ යටතේ ගුවන් යානා සංචිතය පුළුල් කිරීමට සැලසුම් කර ඇති අතර, ඉදිරි ජූනි මාසය වන විට නව නැරෝ-බොඩි ගුවන් යානයක් සහ වයිට්-බොඩි ගුවන් යානා දෙකක් සංචිතයට එක්කර ගැනීමට අපේක්ෂා කරන බව ද සාකච්ඡා විය. 2029 වන විට ගුවන් යානා සංචිතය අවම වශයෙන් යානා 29 ක් දක්වා ඉහළ නැංවීම, පස් අවුරුදු සැලැස්මේ ඉලක්කයක් බවද නිලධාරීහු සඳහන් කළහ.ශ්‍රී ලංකන් ගුවන් සේවයේ මූල්‍ය තත්ත්වය යහපත් කිරීම සඳහා මහා භාණ්ඩාගාරය මඟින් පැරණි බැංකු ණය සහ බැඳුම්කර ණය පවරා ගැනීම ඇතුළු පියවර ගෙන ඇති බව මෙහිදී පැහැදිලි කෙරිණි. එමෙන්ම ගුවන් යානා ලීසිං ගාස්තු අඩු කර ගැනීම, ඉන්ධන පිරිවැය පාලනය කිරීම සහ ගුවන් සේවයේ ආදායම් ඉහළ නැංවීම සඳහා වාණිජ උපායමාර්ග ක්‍රියාත්මක කිරීම පිළිබඳව ද අවධානය යොමු විය.මැදපෙරදිග කලාපයේ පවතින අර්බුදකාරී තත්ත්වය, ඉන්ධන මිල ඉහළ යාම සහ ජාත්‍යන්තර ගුවන් සේවා සමඟ පවතින තරගකාරීත්වය ද ශ්‍රී ලංකන් ගුවන් සේවයේ මෙහෙයුම් සහ ආදායම් කෙරෙහි බලපාන බව මෙහිදී සාකච්ඡා විය.තවද, ශ්‍රී ලංකන් ගුවන් සේවය ප්‍රතිව්‍යුහගත කිරීම සඳහා රජය විසින් පත් කරන ලද කමිටුව මඟින් නව ආයෝජකයන් ලබා ගැනීම, රාජ්‍ය-පෞද්ගලික හවුල්කාරීත්වයක් ඇති කිරීම හෝ රජය යටතේ පවත්වාගෙන යමින් හෝ පිරිවැය පියවාගත හැකි මට්ටමකට ගෙන ඒම ඇතුළු විකල්ප සලකා බලන බව ද සඳහන් විය.ඒ අනුව, ඉදිරි වසර දෙක හෝ තුන හෝ ඇතුළත ශ්‍රී ලංකන් ගුවන් සේවය පිරිවැය පියවාගත හැකි මට්ටමකට ගෙන ඒම සඳහා ගත යුතු පියවර ඇතුළත් සවිස්තරාත්මක වාර්තාවක් නොවැම්බර් 30 වැනිදාට පෙර පාර්ලිමේන්තුවට සහ අමාත්‍යාංශයට ඉදිරිපත් කරන ලෙස කාරක සභාව විසින් අදාළ බලධාරීන්ට උපදෙස් ලබා දෙන ලදී.මෙම කාරක සභා රැස්වීම සඳහා ගරු පාර්ලිමේන්තු මන්ත්‍රීවරුන් වන අජිත් පී. පෙරේරා, නලීන් බණ්ඩාර ජයමහ, රවීන්ද්‍ර බණ්ඩාර, මංජුල සුරවීර ආරච්චි, චතුර ගලප්පත්ති, ධනුෂ්ක රංගනාත්, ජගත් විතාන, ශාන්ත පද්ම කුමාර සුබසිංහ සහ නීතීඥ ගීතා හේරත් යන මහත්ම මහත්මීහු සහභාගී වූහ.


2026-11-14

ශ්‍රී ලංකාවේ ආනයන තීරුබදු ප්‍රතිපත්ති සහ වෙළෙඳ ගිවිසුම් සම්බන්ධයෙන් පාර්ලිමේන්තු ක්‍රම හා විධි පිළිබඳ කාරක සභාවේදී පුළුල් සාකච්ඡාවක්

ශ්‍රී ලංකාවේ ආනයන තීරුබදු ප්‍රතිපත්ති සහ වෙළෙඳ ගිවිසුම්වල වත්මන් තත්ත්වය සම්බන්ධයෙන් පාර්ලිමේන්තු ක්‍රම හා විධි පිළිබඳ කාරක සභාව එහි සභාපති ගරු පාර්ලිමේන්තු මන්ත්‍රී විජේසිරි බස්නායක මහතාගේ ප්‍රධානත්වයෙන් රැස් වූ  අවස්ථාවේදී පුළුල් ලෙස සාකච්ඡා කෙරිණි.මෙහිදී, ශ්‍රී ලංකා වාණිජ දෙපාර්තමේන්තුවේ වැඩබලන අධ්‍යක්ෂ ජනරාල් සෝමසේන මහදිවුල්වැව මහතා මේ සම්බන්ධයෙන් කාරක සභාවට සවිස්තරාත්මක පැහැදිලි කිරීමක් සිදු කළේය. ශ්‍රී ලංකාවේ ද්විපාර්ශ්වික සහ බහුපාර්ශ්වික වෙළෙඳ ගිවිසුම්වල වත්මන් තත්ත්වය සහ ඒවා ඉදිරියට පවත්වාගෙන යාම ඇතුළු කරුණු පිළිබඳව මෙහිදී අවධානය යොමු විය.සාකච්ඡා මට්ටමේ පවතින වෙළෙඳ ගිවිසුම් සම්බන්ධයෙන් ශක්‍යතා අධ්‍යයන සිදු කරමින් ඒවා අඛණ්ඩව ඉදිරියට ගෙන යාමට අවශ්‍ය පියවර ගන්නා ලෙස කාරක සභාව අවධාරණය කළේය.මෙම කාරක සභා රැස්වීමට ගරු නියෝජ්‍ය අමාත්‍යවරුන් වන චතුරංග අබේසිංහ සහ එරංග වීරරත්න යන මහත්වරුන් ද, ගරු පාර්ලිමේන්තු මන්ත්‍රීවරුන් වන අශෝක සපුමල් රන්වල, තිළිණ සමරකෝන්, චම්පික හෙට්ටිආරච්චි සහ චතුර ගලප්පත්ති යන මහත්වරුන් ඇතුළු පිරිසක් සහභාගී වූහ.


2026-11-13

විදේශීය ත්‍රස්තවාදී සටන්කරුවන් වැළැක්වීමේ පනත් කෙටුම්පතට ආංශික අධීක්ෂණ කාරක සභාවේ අනුමැතිය

විදේශීය ත්‍රස්තවාදී සටන්කරුවන් වැළැක්වීමේ පනත් කෙටුම්පත සඳහා ආර්ථික සංවර්ධනය සහ අන්තර්ජාතික සබඳතා පිළිබඳ ආංශික අධීක්ෂණ කාරක සභාවේ අනුමැතිය හිමි විය.එම ආංශික අධීක්ෂණ කාරක සභාව එහි සභාපති ගරු පාර්ලිමේන්තු මන්ත්‍රී නීතිඥ ලක්මාලි හේමචන්ද්‍ර මෙනවියගේ ප්‍රධානත්වයෙන් පාර්ලිමේන්තුවේ දී පසුගියදා රැස් වූ අවස්ථාවේදී මෙම පනත් කෙටුම්පත සලකා බලා අනුමත කෙරිණි.විදේශීය ත්‍රස්තවාදී සටන්කරුවන්ගෙන් එල්ල වන තර්ජනය වැළැක්වීම සහ මැඩපැවැත්වීම සම්බන්ධයෙන් 2014 සැප්තැම්බර් මස 24 වැනි දින සම්මත කරන ලද එක්සත් ජාතීන්ගේ ආරක්ෂක මණ්ඩලයේ 2178 දරන යෝජනාව බලාත්මක කිරීම සඳහාත්, ඊට සම්බන්ධ හෝ ආනුෂංගික කරුණු සඳහා විධිවිධාන සැලසීම සඳහාත් මෙම පනත් කෙටුම්පත ඉදිරිපත් කර තිබේ.විදේශ කටයුතු, විදේශ රැකියා සහ සංචාරක අමාත්‍යවරයා විසින් මෙම පනත් කෙටුම්පත පසුගිය ඔක්තෝබර් මස 20 වැනි දින පළමු වර කියවීම සඳහා පාර්ලිමේන්තුවට ඉදිරිපත් කර තිබිණි.ශ්‍රී ලාංකික පුරවැසියකු හෝ ශ්‍රී ලාංකික පුරවැසියකු නොවන වෙනත් රටක පුරවැසියකු හෝ ශ්‍රී ලංකාව තුළ සිටියදී හෝ ශ්‍රී ලංකාවෙන් පිටතදී වරදක් සිදුකර ඇති අවස්ථාවක හෝ, එම ක්‍රියාව අදාළ රටේ නීතිය යටතේ ද වරදක් වන අවස්ථාවකදී මෙම පනත යටතේ ශ්‍රී ලංකාව තුළ නීතිමය ක්‍රියාමාර්ග ගැනීමට හැකි බව නිලධාරීහු කාරක සභාව හමුවේ පැහැදිලි කළහ.ත්‍රස්තවාදී ක්‍රියාවන්හි නිරත වීම, ඒවා සැලසුම් කිරීම, සූදානම් කිරීම හෝ ඒවාට සහභාගී වීම මෙන්ම ත්‍රස්තවාදී පුහුණුව ලබා දීම හෝ ලබා ගැනීම ද මෙම පනත යටතේ වැරදි ලෙස අර්ථ දක්වා ඇති බව නිලධාරීහු කාරක සභාවට දැනුම් දුන්හ.විදේශ රටවල පදිංචිව සිටින ශ්‍රී ලාංකිකයන් ඉලක්ක කර ගනිමින් වාර්ගික පදනම මත මෙම නීතිමය විධිවිධාන හඳුන්වා දී නොමැති බව ද නිලධාරීන් විසින් කාරක සභාවට අවධාරණය කරන ලදී.දීර්ඝ සාකච්ඡාවකින් අනතුරුව කාරක සභාව විසින් අදාළ පනත් කෙටුම්පත අනුමත කරන ලදී. කෙසේ වෙතත්, කාරක සභා සාමාජික ගරු පාර්ලිමේන්තු මන්ත්‍රී සිවඥානම් ශ්‍රීතරන් මහතා මෙම පනත් කෙටුම්පතට සිය විරෝධය පළ කළේය.මෙම කාරක සභා රැස්වීමට ගරු පාර්ලිමේන්තු මන්ත්‍රීවරුන් වන සුරංග රත්නායක, තිලිණ සමරකෝන්, විජේසිරි බස්නායක සහ සිවඥානම් ශ්‍රීතරන් යන මහත්වරුන් ඇතුළු පිරිසක් සහභාගී වූහ. එමෙන්ම විදේශ කටයුතු, විදේශ රැකියා සහ සංචාරක අමාත්‍යාංශය, ආරක්ෂක අමාත්‍යාංශය, නීතිපති දෙපාර්තමේන්තුව සහ නීති කෙටුම්පත් සම්පාදක දෙපාර්තමේන්තුව නියෝජනය කරමින් රාජ්‍ය නිලධාරීහු ද මෙම අවස්ථාවට එක්ව සිටියහ.






© ශ්‍රී ලංකා පාර්ලි‌මේන්තුව.

සියලු හිමිකම් ඇවිරිණි.

නිර්මාණය සහ සංවර්ධනය  TekGeeks