E   |   සි   |  

2023-06-12

செய்தி வகைகள் : குழு செய்திகள் 

அசோசியேட்டட் நியுஸ்பேப்பர்ஸ் லிமிட்டட் நிறுவனத்தின் நிர்வாகக் குறைபாடுகள் தொடர்பில் கோப் குழுவின் கவனம்

  • அமைச்சின் செயலாளர் நிறுவனத்தின் தலைவராக செயற்படுவது தொடர்பில் கவனம்
  • நிறுவனத்தின் கூட்டுத் திட்டத்தைத் தயாரிக்குமாறு அறிவுறுத்தல்
  • மனிதவளத் திட்டத்தை இரண்டு வாரங்களுக்கு சமர்ப்பிக்குமாறு பணிப்புரை
  • நிறுவனத்தில் சேவையாற்றாத ஆலோசகர்களுக்கு சம்பளம் வழங்கியமை தொடர்பில் ஒரு வாரத்துக்குள் அறிக்கை வழங்கவும்
  • நிதி அமைச்சின் சுற்றுநிருபங்களை அமுல்படுத்துவது தொடர்பில் சட்டமா அதிபரின் ஆலோசனை - நிறுவனரீதியான மாற்றங்கள் தொடர்பில் பொது நம்பிக்கைப் பொறுப்பாளரின் பரிந்துரைகள் கோரல்
  • பத்திரிகை கட்டுரையொன்று தொடர்பான வழக்கில் ரூ. 500 மில்லியன் செலுத்த உத்தரவிட்ட சம்பவம் குறித்த அறிக்கை
  • 14 மில்லியன் நிதி மோசடி செய்த முன்னாள் சந்தைப்படுத்தல் பிரதானிக்கு 2.5 மில்லியயன் பணிக்கொடை வழங்கியமை தொடர்பில் முழுமையான விசாரணை

 

பாராளுமன்ற உறுப்பினர் கௌரவ (பேராசிரியர்) ரஞ்சித் பண்டார தலைமையில் 2023.06.08 ஆம் திகதி கூடிய அரசாங்க பொறுப்பு முயற்சிகள் பற்றிய குழுக் (கோப்) கூட்டத்தில் அசோசியேட்டட் நியுஸ்பேப்பர்ஸ் லிமிட்டட் (ANCL) நிறுவனத்தின் 2020 மற்றும் 2021 ஆம் ஆண்டுகளுக்கான கணக்காய்வாளர் நாயகத்தின் அறிக்கைகள் மற்றும் தற்போதைய செயலாற்றுகை தொடர்பில் விசாரணை மேற்கொள்ளப்பட்டது.

இதன்போது பின்வரும் விடயங்கள் தொடர்பில் கவனம் செலுத்தப்பட்டது.

அமைச்சின் செயலாளர் நிறுவனத்தின் தலைவராக செயற்படுவது தொடர்பில் கவனம்

வெகுசன ஊடக அமைச்சின் செயலாளர் அசோசியேட்டட் நியுஸ்பேப்பர்ஸ் லிமிட்டட் நிறுவனத்தின் தலைவராக செயற்படுவது தொடர்பில் கணக்காய்வாளர் நாயகம் இதன்போது வினவினார். நிறுவனத்தின் தலைவர் சம்பந்தப்பட்ட அமைச்சின் பிரதான கணக்கு அதிகாரியாக செயற்படும் போது அமைச்சின் செயலருக்கு வழங்கப்படும் பணிப்புரைகளை செயற்படுத்துவதில் சிக்கல் நிலைமை ஏற்படக்கூடும் என இதன்போது சுட்டிக்காட்டப்பட்டது.

இவ்விரு நியமனங்களும் ஜனாதிபதியினால் மேற்கொள்ளப்பட்டதாக அமைச்சின் செயலாளர் குறிப்பிட்டார். இதன்படி, இது தொடர்பில் மேலதிக விசாரணைகள் எதுவும் மேற்கொள்ளப்படவில்லை என்பதுடன், இது தொடர்பில் உரிய நடவடிக்கை எடுக்குமாறு ANCL நிறுவனத்தின் பிரதான பங்குதாரரான பொது நம்பிக்கைப் பொறுப்பாளரிடம் கோரிக்கை விடுக்கப்பட்டது.

நிறுவனத்தின் கூட்டுத் திட்டத்தைத் தயாரித்தல்

நிறுவனத்திடம் 2021-2024 வருடங்களுக்கான மூலோபாயத் திட்டம் தயாரிக்கப்பட்டிருந்தாலும் கூட்டுத் திட்டம் இல்லாமை தொடர்பில் கவனம் செலுத்தப்பட்டது. 2018 - 2020 காலப்பகுதியில் மூலோபாயத் திட்டமொன்றுக்கு ரூ. 10 மில்லியன் செலவு செய்யப்பட்டமை தொடர்பில் கவனம் செலுத்தப்பட்டது. அதற்கமைய, நிருவத்தில் பட்டயக் கணக்காளர்கள் உள்ளிட்ட நிபுணர்கள் பலர் காணப்படுவதால் அவர்களின் பங்களிப்பைப் பெற்று கூட்டுத் திட்டமொன்றைத் தாயாருக்குமாறு ஆலோசனை வழங்கப்பட்டது.

மனிதவளத் திட்டத்தை இரண்டு வாரங்களுக்கு கோப்குழுவில் சமர்ப்பிக்கவும்

நிறுவனத்திலிருந்த சுமார் 1200 பேர் கொண்ட பணியாளர்களை தற்பொழுது 972 வரை குறைத்துள்ளதாகவும், இந்தத் தொகையை 850 ஆகக் குறைக்க எதிர்பார்ப்பதாகவும் வெகுசன ஊடக அமைச்சின் செயலாளரும் ANCL நிறுவனத்தின் தலைவருமான அனுஷ பல்பிட்ட தெரிவித்து.

2017 இல் ஆலோசகர் ஒருவருக்கு ரூ. 3.1 மில்லியன் கொடுப்பனவு வழங்கியுள்ளதுடன், 2022 இன் பின்னர் ஒப்பந்த அடிப்படையில் மனிதவள முகாமைத்துவ திட்டமொன்று தயாரிக்கப்பட்டுள்ளமை தொடர்பில் கணக்காய்வாளர் நாயகம் சுட்டிக்காட்டினார். அதன்படி, 850 பணியாளர்களுக்கு மட்டுப்படுத்தி இவ்வாறு தயாரிக்கப்பட்ட மனிதவள முகாமைத்துவ திட்டத்தை குழுவுக்கு கிடைக்கப்பெறச்செய்யுமாறு கோப் தலைவர் வெகுசன ஊடக அமைச்சின் செயலாளருக்கு பரிந்துரை வழங்கினார்.

நிறுவனத்தில் சேவையாற்றாத ஆலோசகர்களுக்கு சம்பளம் வழங்கியமை தொடர்பில் ஒரு வாரத்துக்குள் அறிக்கை வழங்கவும்

2020 டிசம்பர் 07 ஆம் திகதி ஆலோசகர் ஒருவராக நிறுவனத்தில் இணைத்து ரூ. 1.8 மில்லியன் பணம் செலுத்தியுள்ளமை மற்றும் வெகுசன ஊடக அமைச்சுக்கு விடுவிக்கப்பட்ட ஆலோசகர் ஒருவருக்கு, நிறுவனத்துக்கு எந்தவித சேவையையும் பெற்றுக்கொள்ளாது ஆலோசனை கட்டணமாக ரூ. 9 இலட்சம் பணம்  செலுத்தியுள்ளமை தொடர்பில் கணக்காய்வாளர் நாயகம் சுட்டிக்காட்டினார். முன்னாள் அமைச்சர் ஒருவரின் பரிந்துரைக்கு அமைய இது மேகொள்ளப்பட்டுள்ளதாக இதன்போது புலப்பட்டதுடன் இதற்கு பணிப்பளார் சபை பொறுப்புக்கூற வேண்டும் என குழு சுட்டிக்காட்டியது.

அத்துடன், இவ்வாறான தலையீடுகள் இன்றி சுயாதீனமாகச் செயற்படக்கூடிய மனிதவள திட்டத்தைத் தயாரிக்குமாறும் குழுவினால் ஆலோசனை வளர்க்கப்பட்டது. எதிர்காலத்தில் எந்தவிதத்திலும் இவ்வாறான செயற்பாடுகள் இடம்பெற அனுமதிப்பதில்லை என தற்போதைய தலைவர் உறுதியளித்தார். அதற்கமைய, இது தொடர்பில் உடனடியாகக் கண்டறிந்து அறிக்கை சமர்ப்பிக்குமாறு செயலாளருக்குப் பணிப்புரை வழங்கப்பட்டது.

நிதி அமைச்சின் சுற்றுநிருபங்களை அமுல்படுத்துவது தொடர்பில் சட்டமா அதிபரின் ஆலோசனை - நிறுவனரீதியான மாற்றங்கள் தொடர்பில் பொது நம்பிக்கைப் பொறுப்பாளரின் பரிந்துரைகள் கோரல்

இந்த நிறுவனத்தை 1973 இல் அரசாங்கத்துக்குக் கையகப்படுத்தும் போது பொது நம்பிக்கைப் பொறுப்பாளரின் கீழ் கொண்டுவரப்பட்டுள்ளதாக நிதி அமைச்சின் சுற்றுநிருபங்கள் நிறுவனத்துக்குப் பொருந்துமா என்பது தொடர்பில் தெளிவின்மை உள்ளதாக அதிகாரிகள் தெரிவித்தனர். இது தொடர்பில் சட்டமா அதிபரின் ஆலோசனையைப் பெறுமாறு குழு அறிவித்தது. அத்துடன், இந்த நிறுவனத்தைக் கட்டுப்படுத்துவதற்கு எவ்வாறான சட்டங்களை தயாரிக்க வேண்டும் என்பது தொடர்பிலும் மேற்கொள்ளப்பட வேண்டிய நிறுவன ரீதியான மாற்றங்கள் எவை என்பது தொடர்பிலும் அறிவிக்குமாறு பொது நம்பிக்கைப் பொறுப்பாளருக்கு பரிந்துரை வழங்கப்பட்டது.

பத்திரிகை கட்டுரையொன்று தொடர்பான வழக்கில் ரூ. 500 மில்லியன் செலுத்த உத்தரவிட்ட சம்பவம் குறித்த அறிக்கை

சிலுமின பத்திரிகையில் பிரசுரிக்கப்பட்ட கட்டுரை ஒன்று தொடர்பில் நஷ்டஈடு கோரி தாக்கல் செய்யப்பட்ட வாதிக்கு 500 மில்லியன் ரூபாய் நஷ்டஈடு வழங்குமாறு  உத்தரவிடப்பட்டமை தொடர்பில் இதன்போது கவனம் செலுத்தப்பட்டது. இந்த வழக்கு 2010 இல் கொழும்பு மாவட்ட நீதிமன்றத்தில் விசாரணைக்கு அழைக்கப்பட்ட போது நிறுவனம் சார்பாக ஆஜராகியிருந்த நிறுவனத்தின் சட்டத்தரணி பிழையான நீதிமன்ற அறையில் இருந்ததால் வாதிக்கு சார்பாக தீர்ப்பு வழங்கப்பட்டு ரூ. 500 மில்லியன் நஷ்டஈடு வழங்குமாறு நீதிமன்ற உத்தரவு பிறப்பிக்கப்பட்டுள்ளது. இது தொடர்பில் தற்பொழுது உயர் நீதிமன்றத்தில் மேன்முறையீடு செய்யப்பட்டுள்ளமை தொடர்பில் இதன்போது புலப்பட்டது. நிறுவனத்தினால் இந்த சட்டத்தரணிக்கு எதிராக எந்தவொரு ஒழுங்கு நடவடிக்கையும் எடுக்கப்பட்டிருக்கவில்லை என்பதுடன் 2020 இல் ஓய்வு பெற்றுள்ளமை புலப்பட்டது. இது தொடர்பில் உடனடியாக சட்ட ஆலோசனை பெற்று எடுக்கவேண்டிய நடவடிக்கைகள் தொடர்பில் ஒரு வாரத்தில் கோப் குழுவுக்கு அறிவிக்குமாறு கோப் குழுவின் தலைவர் பணிப்புரை வழங்கினார்.

14 மில்லியன் நிதி மோசடி செய்த முன்னாள் சந்தைப்படுத்தல் பிரதானிக்கு 2.5 மில்லியயன் பணிக்கொடை வழங்கியமை தொடர்பில் முழுமையான விசாரணை

நிறுவனத்தின் முன்னாள் சந்தைப்படுத்தல் பிரதானி 2017 இல் நிறுவனத்துக்கு செய்த ரூ. 14 மில்லியன் நிதி மோசடி தொடர்பில் முறையான ஒழுக்க விசாரணையில் குற்றாவளியாகவிருந்தாலும், அவருக்கு பணிக்கொடையாக (gratuity) சுமார் ரூ. 2.5 மில்லியன் நிதி வழங்கியமை தொடர்பில் இதன்போது புலப்பட்டது. இது தொடர்பில் முறையான விசாரணையொன்றை மேற்கொண்டு எடுக்கக்கூடிய நடவடிக்கைகள் தொடர்பில் இரண்டு வாரங்களில் குழுவுக்கு அறிவிக்குமாறு கோப் குழு அறிவுறுத்தியது.

செல்லுபடியாகாத காசோலைகளின் சுமார் 22 மில்லியன் ரூபாய் பெற்றுக்கொள்வதற்கு உடனடியாக  சட்ட நடவடிக்கை எடுக்குமாறு ஆலோசனை

செல்லுபடியாகாத காசோலைகளிலிருந்து சுமார் 22 மில்லியன் ரூபாய் நிறுவனத்துக்கு கிடைக்கவேண்டும் என்பது இதன்போது புலப்பட்டது. இது தொடர்பில் எடுக்கப்பட்டுள்ள சட்ட நடவடிக்கைகள் தொடர்பில் அறிவிக்குமாறு குழு ஆலோசனை வழங்கியது.

அத்துடன், கணக்காய்வுத் தரங்களுக்கு அமைய மற்றும் பிரதான செயற்பாடுகளை உள்ளடக்கிய வகையில் போதுமான உள்ளகக் கணக்காய்வு இடம்பெறாமை, அரச மற்றும் தனியார் நிறுவனங்களுக்கு கடன் அடிப்படையில் விளம்பரம் வெளியிடும் போது இரண்டு வருடங்களுக்கு மேலாக செலுத்தாத 189 நிறுவனங்களின் சுமார் 20 மில்லியன் ரூபாய் நிலுவைகளை பெற்றுக்கொள்வதற்கு உடனடியாக நடவடிக்கை எடுக்கவேண்டியதன் அவசியம் தொடர்பில் குழுவின் கவனம் செலுத்தப்பட்டது.

மேலும், முன்னேற்ற மீளாய்வுக்காக மீண்டும் ஆறு மாதங்களில் வரையறுக்கப்பட்ட ஐக்கிய பத்திரிகைகள் நிறுவனத்தை அழைப்பதாக கோப் குழுவின் தலைவர் தெரிவித்தார்.

இந்தக் கூட்டத்தில் பாராளுமன்ற உறுப்பினர்களான கௌரவ மஹிந்தானந்த அலுத்கமகே, கௌரவ தயாசிறி ஜயசேகர, கௌரவ இரான் விக்ரமரத்ன, கௌரவ ஜகத்குமார சுமித்ராறச்சி, கௌரவ எம். ராமேஸ்வரன், கௌரவ ராஜிகா விக்ரமசிங்க, கௌரவ மதுர விதானகே மற்றும் கௌரவ (பேராசிரியர்) சரித ஹேரத் ஆகியோர் கலந்துகொண்டனர்.

 

1 5



தொடர்புடைய செய்திகள்

2026-11-16

யானை – மனித மோதலைக் குறைத்தல் மற்றும் யானைகளைப் பாதுகாப்பது தொடர்பில் புதிய தொழில்நுட்ப, நடைமுறைத் தீர்வுகளைக் கண்டறிவது குறித்து துறைசார் மேற்பார்வைக் குழுவில் கலந்துரையாடல்

சுற்றாடல், கமத்தொழில் மற்றும் வளங்களின் நிலைத்தன்மை பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் ஹெக்டர் அப்புஹாமி தலைமையில் அண்மையில் பாராளுமன்றத்தில் கூடியது.இதில், யானை – மனித மோதலைக் கட்டுப்படுத்துதல், காட்டு யானைகளின் இடம்பெயர்வு முறைகளைக் கண்டறிதல் மற்றும் யானைகளைப் பாதுகாப்பதற்குப் புதிய தொழில்நுட்பங்களைப் பயன்படுத்துதல் தொடர்பில் விரிவாகக் கலந்துரையாடப்பட்டது. அத்துடன், காவந்திஸ்ஸ யானையின் மரணம் தொடர்பிலும் கவனம் செலுத்தப்பட்டது.யானைகளின் வாழ்விடங்கள் இழக்கப்படுதல், பாரம்பரிய யானை வழித்தடங்கள் தடைப்படுதல் மற்றும் குடியிருப்புகள், விவசாய நிலங்களை அண்மித்த பகுதிகளில் உணவு தேடிச் செல்லுதல் ஆகியன யானை – மனித மோதல் அதிகரிப்பதற்கான பிரதான காரணங்களாக இதன்போது கலந்துரையாடப்பட்டன. யானைகளின் இடம்பெயர்வு முறைகளைக் கண்டறிவதற்காக GPS மற்றும் செய்மதிக் கழுத்துப்பட்டித் தொழில்நுட்பத்தைப் பயன்படுத்துவதன் முக்கியத்துவமும் இதன்போது வலியுறுத்தப்பட்டது.யானை – மனித மோதலைக் குறைப்பதற்காக பிரதேச மட்டத்தில் வனவிலங்கு அதிகாரிகள், கிராம உத்தியோகத்தர்கள் மற்றும் கிராம மக்களை உள்ளடக்கிய கூட்டுக் குழுக்களை அமைத்தல், சமூகப் பங்கேற்பை வலுப்படுத்துதல் மற்றும் முன்கூட்டிய எச்சரிக்கைத் தொடர்பாடல் வலையமைப்புகளைச் செயற்படுத்துதல் தொடர்பிலும் கருத்துக்கள் பரிமாறப்பட்டன.அத்துடன், நோய்வாய்ப்பட்ட மற்றும் காயமடைந்த யானைகளுக்குச் சிகிச்சையளிக்கும்போது வனவிலங்கு கால்நடை மருத்துவர்கள் எதிர்கொள்ளும் சவால்கள் குறித்தும் கலந்துரையாடப்பட்டது. வனவிலங்கு திணைக்களத்தின் கால்நடை மருத்துவ அதிகாரிகளின் சேவை, யானைகளுக்கு மயக்க மருந்து செலுத்தும்போது காணப்படும் ஆபத்துகள் மற்றும் களத்தில் சிகிச்சையளிப்பதற்குத் தேவையான நடமாடும் மருத்துவ வசதிகள், நடமாடும் எக்ஸ்-ரே இயந்திரங்கள் போன்ற தொழில்நுட்ப உபகரணங்களின் அவசியம் குறித்தும் இதன்போது கவனம் செலுத்தப்பட்டது.இக்கூட்டத்தில் கௌரவ பாராளுமன்ற உறுப்பினர்களான கிங்ஸ் நெல்சன், உபுல் கித்சிறி, சட்டத்தரணி எம்.ஏ.சி.எஸ். சதுரி கங்கானி, சுதத் பலகல்ல, கிட்ணன் செல்வராஜ் மற்றும் சட்டத்தரணி பாக்ய ஸ்ரீ ஹேரத் ஆகியோர் கலந்துகொண்டனர்.


2026-11-14

ஸ்ரீலங்கன் விமான சேவையை இலாபமீட்டும் நிலைக்குக் கொண்டுவர ஐந்தாண்டுத் திட்டம் – விமானங்களின் எண்ணிக்கையை அதிகரித்தல் மற்றும் கடன் சுமையைக் கட்டுப்படுத்துதல் தொடர்பில் கவனம்

ஸ்ரீலங்கன் விமான சேவை எதிர்நோக்கியுள்ள நிதி நெருக்கடி, அதிகளவிலான விமானப் பயணத் தாமதங்கள், கடன் சுமை மற்றும் புதிய விமானங்களைக் கொள்வனவு செய்வதில் ஏற்பட்டுள்ள கொள்வனவு நடைமுறைத் தாமதங்கள் தொடர்பில் உட்கட்டமைப்பு வசதிகள் மற்றும் மூலோபாய அபிவிருத்தி பற்றிய துறைசார் மேற்பார்வைக் குழுவில் விரிவாகக் கலந்துரையாடப்பட்டது.குறித்த குழு, அதன் தலைவர் கௌரவ பாராளுமன்ற உறுப்பினர் எஸ்.எம். மரிக்கார் தலைமையில் அண்மையில் பாராளுமன்றத்தில் கூடியபோதே இது தொடர்பில் கவனம் செலுத்தப்பட்டது.தற்போது 23 விமானங்களைக் கொண்டுள்ள விமானச் சேவையின் விமானத் தொகுதி போதுமானதாக இல்லாமை மற்றும் அந்த விமானங்கள் சுமார் 12 வருடங்கள் பழைமையானவையாக இருப்பதால் விமானப் பயணங்களைப் பாதிக்கும் தொழில்நுட்பக் கோளாறுகள் மற்றும் தாமதங்கள் தொடர்பில் இதன்போது கலந்துரையாடப்பட்டது. ஒரு விமானத்தில் தொழில்நுட்பக் கோளாறு அல்லது வேறு காரணங்களால் தாமதம் ஏற்படும்போது, மாற்று விமானங்களைப் பயன்படுத்துவதில் காணப்படும் மட்டுப்பாடுகள் காரணமாக ஒட்டுமொத்த விமானப் போக்குவரத்து வலையமைப்பும் பாதிக்கப்படுவதாகவும் இதன்போது சுட்டிக்காட்டப்பட்டது.விமானங்களைக் கொள்வனவு செய்வதற்காக கடந்த காலங்களில் முன்னெடுக்கப்பட்ட வழமையான கொள்வனவு நடைமுறைகள் தோல்வியடைந்தமை மற்றும் அதனுடன் தொடர்புடைய நீண்டகாலத் தாமதங்கள் குறித்தும் குழுவின் கவனம் செலுத்தப்பட்டது. இந்நிலைக்குத் தீர்வாக விமானங்கள் மற்றும் அவற்றுடன் தொடர்புடைய உபகரணங்களைக் கொள்வனவு செய்வதற்கான விசேட கொள்வனவு வழிகாட்டுதல்கள் தயாரிக்கப்பட்டுள்ளதுடன், அவற்றை வர்த்தமானியில் வெளியிடுவதற்கான நடவடிக்கைகள் எடுக்கப்பட்டுள்ளதாகவும் இதன்போது தெரிவிக்கப்பட்டது. அத்துடன், கொள்வனவு நடவடிக்கைகளை நேரடியாகக் கண்காணிப்பதற்காக அமைச்சு மட்டத்தில் விசேட கொள்வனவுப் பிரிவொன்றும் நிறுவப்பட்டுள்ளதாகத் தெரிவிக்கப்பட்டது.புதிய கொள்வனவு வழிகாட்டுதல்களின் கீழ் விமானத் தொகுதியை விரிவுபடுத்தத் திட்டமிடப்பட்டுள்ளதுடன், எதிர்வரும் ஜூன் மாதமளவில் புதிய குறுகிய உடற்பகுதியைக் கொண்ட (Narrow-body) விமானமொன்றையும், அகன்ற உடற்பகுதியைக் கொண்ட (Wide-body) இரண்டு விமானங்களையும் விமானத் தொகுதியில் இணைத்துக்கொள்ள எதிர்பார்க்கப்படுவதாகவும் கலந்துரையாடப்பட்டது. 2029ஆம் ஆண்டளவில் விமானத் தொகுதியை ஆகக்குறைந்தது 29 விமானங்களாக அதிகரிப்பது ஐந்தாண்டுத் திட்டத்தின் இலக்காகும் என்றும் குறிப்பிடப்பட்டது.ஸ்ரீலங்கன் விமான சேவையின் நிதி நிலைமையை மேம்படுத்துவதற்காக, பழைய வங்கிக் கடன்கள் மற்றும் பிணைமுறிக் கடன்கள் உள்ளிட்டவற்றைப் பொறுப்பேற்பது உட்பட பல்வேறு நடவடிக்கைகளை திறைசேரி முன்னெடுத்துள்ளதாக இதன்போது விளக்கமளிக்கப்பட்டது. அத்துடன், விமானங்களுக்கான குத்தகைக் கட்டணங்களைக் குறைத்தல், எரிபொருள் செலவுகளைக் கட்டுப்படுத்துதல் மற்றும் விமான சேவையின் வருமானத்தை அதிகரிப்பதற்கான வர்த்தக உபாயங்களை நடைமுறைப்படுத்துதல் தொடர்பிலும் கவனம் செலுத்தப்பட்டது.மத்திய கிழக்கு பிராந்தியத்தில் நிலவும் நெருக்கடி நிலைமை, எரிபொருள் விலை அதிகரிப்பு மற்றும் சர்வதேச விமான சேவைகளுடனான போட்டித்தன்மை ஆகியனவும் ஸ்ரீலங்கன் விமான சேவையின் செயற்பாடுகள் மற்றும் வருமானத்தில் தாக்கம் செலுத்துவதாக இதன்போது கலந்துரையாடப்பட்டது.மேலும், ஸ்ரீலங்கன் விமான சேவையை மறுசீரமைப்பதற்காக அரசாங்கத்தினால் நியமிக்கப்பட்ட குழு, புதிய முதலீட்டாளர்களைப் பெற்றுக்கொள்ளுதல், அரச-தனியார் பங்காண்மையை ஏற்படுத்துதல் அல்லது அரசாங்கத்தின் கீழ் தொடர்ந்து நிர்வகித்து, அதன் செலவுகளை ஈடுகட்டக்கூடிய நிலைக்குக் கொண்டுவருதல் உள்ளிட்ட மாற்று வழிகள் குறித்து ஆராய்ந்து வருவதாகவும் தெரிவிக்கப்பட்டது.அதற்கமைய, அடுத்த இரண்டு அல்லது மூன்று வருடங்களுக்குள் ஸ்ரீலங்கன் விமான சேவையை அதன் செலவுகளை ஈடுகட்டக்கூடிய நிலைக்குக் கொண்டுவருவதற்காக எடுக்கப்பட வேண்டிய நடவடிக்கைகள் உள்ளடங்கிய விரிவான அறிக்கையொன்றை நவம்பர் 30ஆம் திகதிக்கு முன்னர் பாராளுமன்றத்திற்கும் அமைச்சுக்கும் சமர்ப்பிக்குமாறு உரிய அதிகாரிகளுக்கு குழு அறிவுறுத்தியது.இந்தக் குழுக் கூட்டத்தில் கௌரவ பாராளுமன்ற உறுப்பினர்களான அஜித் பி. பெரேரா, நளின் பண்டார ஜயமஹ, ரவீந்திர பண்டார, மஞ்சுள சுரவீர ஆரச்சி, சதுர கலப்பத்தி, தனுஷ்க ரங்கநாத், ஜகத் விதான, சாந்த பத்ம குமார சுபசிங்க மற்றும் சட்டத்தரணி கீதா ஹேரத் ஆகியோர் கலந்துகொண்டனர்.


2026-11-14

இலங்கையின் இறக்குமதி வரிக் கொள்கைகள் மற்றும் வர்த்தக உடன்படிக்கைகள் தொடர்பில் வழி வகைகள் பற்றிய குழுவில் கலந்துரையாடப்பட்டது

இலங்கையின் இறக்குமதி வரிக் கொள்கைகள் மற்றும் வர்த்தக உடன்படிக்கைகள் தொடர்பில் கௌரவ பாராளுமன்ற உறுப்பினர் விஜேசிறி பஸ்நாயக்க அவர்களின் தலைமையில் கூடிய வழி வகைகள் பற்றிய குழுவில் விரிவாகக் கலந்துரையாடப்பட்டது.வணிகத் திணைக்களத்தின் பணிப்பாளர் நாயகம் (பதில்) சோமசேன மகாதிவுல்வேவ அவர்கள் இது பற்றிய விரிவான விளக்கத்தைக் குழுவுக்கு வழங்கினார். இலங்கையின் இரு தரப்பு மற்றும் பல்தரப்பு வர்த்தக உடன்படிக்கைகளின் நிலைமைகள் மற்றும் அவற்றைத் தொடர்ந்து முன்கொண்டு செல்வது உள்ளிட்ட விடயங்கள் குறித்து இங்கு கலந்துரையாடப்பட்டது.கலந்துரையாடல் மட்டத்தில் இருக்கும் வர்த்தக உடன்படிக்கைகள் குறித்து சாத்தியக் கூற்று ஆய்வுகளை மேற்கொண்டு தொடர்ச்சியாக அவற்றை முன்னெடுத்துச் செல்வதற்கான நடவடிக்கைகளை எடுக்குமாறு குழு வலியுறுத்தியது.இந்தக் குழுக் கூட்டத்தில் கௌரவ பிரதியமைச்சர்களான சதுரங்க அபேசிங்க, எரங்க வீரரத்ன மற்றும் கௌரவ பாராளுமன்ற உறுப்பினர்களான அசோக சபுமல் ரண்வல, திலின சமரக்கோன், சம்பிக்க ஹெட்டிஆரச்சி, சதுர கலப்பதி உள்ளிட்டோர் கலந்துகொண்டனர். 


2026-11-13

வெளிநாட்டுப் பயங்கரவாதிப் போராளிகளைத் தடுத்தல் சட்டமூலத்திற்கு துறைசார் மேற்பார்வைக் குழுவில் அங்கீகாரம்

வெளிநாட்டுப் பயங்கரவாதிப் போராளிகளைத் தடுத்தல் சட்டமூலத்திற்கு பொருளாதார அபிவிருத்தி மற்றும் சர்வதேச உறவுகள் பற்றிய துறைசார் மேற்பார்வைக் குழுவில் அங்கீகாரம் வழங்கப்பட்டது. சர்வதேச உறவுகள் பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் சட்டத்தரணி லக்மாலி ஹேமச்சந்திர அவர்களின் தலைமையில் அண்மையில் பாராளுமன்றத்தில் கூடியபோதே இச்சட்டமூலம் ஆராயப்பட்டு அங்கீகரிக்கப்பட்டது. வெளிநாட்டு பயங்கரவாதிப் போராளிகளால் எதிர்நோக்கப்படும் அச்சுறுத்தலைத் தடுத்தல் மற்றும் ஒடுக்குதல் தொடர்பான 2014ஆம் ஆண்டு செப்தெம்பர் மாதம் 24ஆம் திகதி ஏற்றுக்கொள்ளப்பட்ட ஐக்கிய நாடுகள் பாதுகாப்புப் பேரவைத் தீர்மானம் 2178 இற்கு பயன்கொடுப்பதற்கும், அத்துடன் அவற்றுடன் தொடர்புபட்ட அல்லது அவற்றின் இடைநேர்விளைவான கருமங்களுக்காக ஏற்பாடு செய்வதற்குமான சட்டமூலமாக இது சமர்ப்பிக்கப்பட்டுள்ளது.இச்சட்டமூலத்தை வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் கடந்த ஒக்டோபர் மாதம் 20ஆம் திகதி முதலாவது மதிப்பீட்டுக்காகப் பாராளுமன்றத்தில் சமர்ப்பித்திருந்தார்.இலங்கை பிரஜையொருவர் அல்லது இலங்கை பிரஜை  அல்லாத வேறொரு நாட்டின் பிரஜை ஒருவர் இலங்கையில் சமுகமாயிருக்கையில், அல்லது இலங்கைக்கு வெளியே தவறிழைத்திருந்து அது அந்நாட்டின் சட்டத்தின் கீழ் தவறொன்றாக இருப்பின் இச்சட்டத்தின் கீழ் இலங்கையில் நடவடிக்கை எடுக்க முடியும். பயங்கரவாத செயல்களை மேற்கொள்ளல், திட்டமிடுதல், தயார்செய்தல் அல்லது அதில் பங்குபற்றுதல், பயங்கரவாத பயிற்சிகளை வழங்குதல் அல்லது பெறுதல் போன்றவை இச்சட்டத்தின் கீழ் தவறுகளாகக் குறிப்பிடப்பட்டிருப்பதாக அதிகாரிகள் குழுவில் விளக்கமளித்தனர்.புலம்பெயர்ந்து வாழும் இலங்கையர்களை இன ரீதியாக இலக்குவைத்து கொண்டுவரப்படும் சட்ட ஏற்பாடு இல்லையென்றும் அதிகாரிகள் குறிப்பிட்டனர். விரிவான கலந்துரையாடல்களைத் தொடர்ந்து குறித்த சட்டமூலத்திற்கு குழு அங்கீகாரம் வழங்கியது. குழுவின் உறுப்பினரான கௌரவ பாராளுமன்ற உறுப்பினர் சிவஞானம் சிறிதரன் இச்சட்டமூலத்திற்கு தனது எதிர்ப்பினைப் பதிவுசெய்தார்.இக்குழுக் கூட்டத்தில் கௌரவ பாராளுமன்ற உறுப்பினர்களான சுரங்க ரத்னாயக்க, திலின சமரக்கோன், விஜேசிறி பஸ்நாயக்க, சிவஞானம் சிறிதரன் உள்ளிட்டோரும், வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சு, பாதுகாப்பு அமைச்சு மற்றும் சட்டமா அதிபர் திணைக்களம், சட்டவரைஞர் திணைக்களம் ஆகியவற்றைப் பிரதிநிதித்துவப்படுத்தி அரசாங்க அதிகாரிகளும் கலந்துகொண்டனர். 






பதிப்புரிமை © இலங்கை பாராளுமன்றம்.

முழுப்பதிப்புரிமையுடையது.

வடிவமைத்து உருவாக்கியது  TekGeeks