E   |   த   |  

2023-05-29

පුවත් කාණ්ඩ : කාරක සභා පුවත් 

ජාතික මැණික් හා ස්වර්ණාභරණ අධිකාරියේ පරිපාලන ගැටලු ඇතුළු අක්‍රමිකතා රැසක් ‘කෝප්’ කමිටුවේදී අනාවරණය වෙයි

  • මැණික් කර්මාන්තය නියාමනය කිරීමේ එකම බලධාරයා වන මැණික් හා ස්වර්ණාභරණ අධිකාරිය තුන්වන පාර්ශව සමග ඍජුව මැණීක් ගැරීමේ ව්‍යපෘතිවල නියැලීම නොකළ යුතු බවට අවධාරණය කෙරේ
  • අධිකාරිය සම්බන්ධයෙන් දිගින් දිගටම චෝදනා එල්ලවන පසුබිමක පසුගිය වසර 10ක කාල සීමාව තුළ වාර්තාවී ඇති සියලු අක්‍රමිතා ඇතුළු කටයුතු පිළිබද විධිමත් විමර්ශනයක් සිදුකරන ලෙසත් දැනුම් දෙයි
  • මැණික් ගැරීම සදහා බලපත්‍ර ලබා දීමේදී ඉහළ විනිවිදබවකින් යුතු ක්‍රමවේදයක් සකස් කරන ලෙස අධිකාරියට නියෝග
  • නිලධාරියෙකුගේ විෂමාචාර ක්‍රියා හේතුවෙන් වැඩතහනමකට ලක්ව මූලික විමර්ශනයක් පවත්වන අතරතුර හිටපු සභාපතිවරයාගේ ඉල්ලීමට නිදහස් කිරීම පිළිබද විමර්ශනයක්
  • ඩො. මි. 10 කට තක්සේරු කර තිබූ මැණික් පොකුරම ඉන් අනතුරුව ඩො. 10,000 කට ආසන්න මුදලකට තක්සේරු කිරීම පිළිබදව දැඩි අප්‍රසාදය
  • රු. මිලියන 19 ක වියදමින් ගිණුම් මෘදුකාංග පද්ධතියක් ස්ථාපිත කිරීමට පෞද්ලික ආයතනයක් සමග ගිවිසුම්ගත වුවද තවමත් එම කටයුතු නිමා වී නොමැති බව හෙළිවෙයි
  • ලෝක වෙළද මධ්‍යස්ථානයෙන් කඩකාමර ලබා ගැනීමෙන් රු. මිලියන 16කට ආසන්න ඇප මුදලක් අහිමි වීම පිළිබද වාර්තාවක් කැදවයි
  • අධිකාරි‍ය සදහා ගොඩනැගිල්ලක් කුලියට ගැනීමේදී වැඩි ලංසුවට යාම නිසා රු මිලියන 36ක අලාභයක්

 

පාර්ලිමේන්තු මන්ත්‍රී මහාචාර්ය ගරු රංජිත් බණ්ඩාර මහතාගේ සභාපතීත්වයෙන් 2023.05.24 දින රැස්වූ පොදු ව්‍යාපාර පිළිබද කාරක සභාවට (කෝප් කමිටුව), 2020 හා 2021 වර්ෂවල විගණකාධිපති වාර්තා සහ වර්තමාන කාර්යසාධනය පිළිබද පරීක්ෂා කිරීම සදහා ජාතික මැණික් හා ස්වර්ණාභරණ අධිකාරිය කැඳවා තිබිණි.

මෙහිදී පහත සදහන් කරුණු පිළිබදව විමර්ශන කටයුතු සිදුවිය.

 

මෙරට තුළ මැණික් කර්මාන්තය නියාමනය කිරීමේ එකම බලධරයා වන අධිකාරිය ව්‍යාපාරික කටයුතුවලින් ඈත් විය යුතු බව අවධාරණය කරයි

අධිකාරිය තුන්වන පාර්ශව සමග ඍජුව මැණීක් ගැරීමේ ව්‍යපෘතිවල නියැලීම සම්බන්ධයෙන් විගණකාධිපතිවරයා කරුණු පෙන්වා දුන්නේය. මැණික් හා ස්වර්ණාභරණ පනත අනුව මෙරට තුළ මැණික් කර්මාන්තය නියාමනය කිරීමේ එකම බලධාරයා වන බැවින් එම අධිකාරිය තුන්වන පාර්ශව සමග ඍජුව මැණීක් ගැරීමේ ව්‍යපෘතිවල නියැලීම නොකළ යුතු බවට කමිටුව විසින් අවධාරණය කරන ලදී.  

 

බලපත්‍ර ලබා දීමේදී ඉහළ විනිවිදබවකින් යුතු ක්‍රමවේදයක් සකස් කරන ලෙස නිර්දේශ

මැණික් පතල් සදහා බලපත්‍ර ලබා දීමේදී වාර්තාවී ඇති  අක්‍රමිතා රැසක් පිළිබද කමිටු සාමාජිකයෝ කරුණු දැක්වූහ.  ඇතැම් දූෂිත නිලධාරින් තම හිතවතුන්ට පතල් ලබා දීම නිසා ඉන් ලැබිය යුතු නිසි බදු ආදායමද රජයට අහිමිව ඇති බව  පෙන්වා දුන්හ.  අධිකාරිය බලපත්‍ර ලබා දීමේදී ඉහළ විනිවිදබවකින් යුතු ක්‍රමවේදයක් සකස් කරන ලෙස කෝප් කමිටු සභාපතිවරයා විසින් මෙහිදී අමාත්‍යාංශ ලේකම්වරියට නිර්දේශ කරන ලදී.

 

දිගින් දිගටම අධිකාරියට චෝදනා එල්ලවන පසුබිමක පසුගිය වසර 10ක වාර්තාවී ඇති අක්‍රමිතා ඇතුළු කටයුතු පිළිබද විධිමත් විමර්ශනයක් සිදුකරන ලෙස නියෝග

මැණික් හා ස්වර්ණාභරණ අධිකාරිය සම්බන්ධයෙන් දිගින් දිගටම චෝදනා එල්ලවන පසුබිමක පසුගිය වසර 10ක කාල සීමාව අධිකාරිය එළඹි ගිවිසුම් වාර්තාවී ඇති අක්‍රමිතා ඇතුළු කටයුතු පිළිබද විධිමත් විමර්ශනයක් සිදුකරන ලෙසත් අධිකාරිය නිවැරදි මාවතට ගැනීම සදහා නිසි යාන්ත්‍රණයක් සකස් කරන ලෙසත් දැනුම් දුන්නේය. අවශ්‍ය නම් ජේෂ්ඨ විශ්‍රාමික විගණන නිලධාරියෙකුගේ ද සහය ලබා ගන්නා ලෙස කමිටු සභාපතිවරයා විසින් උපදෙස් දෙන ලදී.

 

ඩො. මි. 10 කට තක්සේරු කර තිබූ මැණික් පොකුරම ඉන් අනතුරුව ඩො. 10,000 කට ආසන්න මුදලකට තක්සේරු කිරීම පිළිබද දැඩි අප්‍රසාදය

2021 වසරේ මෙරටින් හමුවූ ඩො. මි. 10 කට තක්සේරු කර තිබූ මැණික් පොකුරම ඉන් අනතුරුව ඩො. 10,000 කට ආසන්න මුදලකට තක්සේරු කිරීම පිළිබදව ද මෙහිදී සාකච්ඡා විය. වර්තමනයේ එහි ඇත්තේ කෞතුක වටිනාකමක් බවද මෙහිදී නිලධාරීහු පැවසූහ. මේ අනුව අදාළ නිලධාරීන්ගේ වෘත්තීය නිපුණත්වය පිළිබද ගැටලුවක් පවතින බව විගණකාධිපතිවරයා ඇතුළු කමිටුව කරුණු පෙන්වා දුන්හ.

 

ස්ථිර අධ්‍යක්ෂ ජනරාල්වරයෙකු නොමැතිවීම

අධිකාරියේ ස්ථිර අධ්‍යක්ෂ ජනරාල්වරයෙකු නොමැතිවීම පිළිබදව අවධානය යොමු විය. දැනට සිටින අධ්‍යක්ෂ ජනරාල්වරයාද පරිපාලන සේවයේ නිලධාරියෙකු වන බවත් ලේකම්වරිය පවසා සිටියාය. මේ අනුව ස්ථිර අධ්‍යක්ෂ ජනරාල්වරයෙකු කඩිනමින් පත් කිරීමට වහාම පියවර ගන්නා ලෙස කමිටුව විසින් උපදෙස් දෙන ලදී. පවතින වැටුප් තල ඒ සදහා බාධාවක් වේ නම් ඒ සදහා ජනාධිපතිවරයා, මුදල් අමාත්‍යාංශ ලේකම්වරයා හරහා පියවර ගැනීමට කෝප් කමිටුව මැදිහත් වන බවද කමිටු සභාපතිවරයා පැවසීය.

 

අධිකාරි‍ය සදහා ගොඩනැගිල්ලක් කුලියට ගැනීමේ ක්‍රියාවලිය සම්බන්ධයෙන් වාර්තාවක් කැදවයි

අධිකාරි‍ය සදහා ගොඩනැගිල්ලක් කුලියට ගැනීමේදී වැඩිමිලක් ඉදිරිපත් කර තිබූ ගොඩනැගිල්ලකට  මාසිකව රු. මිලියන 4.5 ක කුලී පදනම යටතේ 2021 වසරේ සිට 2023 වසර දක්වා කාලයකට ගිවිසුම් ගත වීම පිළිබදව ද විමර්ශනය කරන ලදී. පෞද්ගලික සමාගමක් මගින් අධිකාරිය පවත්වාගෙන ගිය ගොඩනැගිල්ල ආසන්නයේ සිදුකළ ඉදිකිරීම් කටයුතු නිසා අධිකාරියේ ගොඩනැගිල්ලට හානි සිදුවීමෙන් ඇති වූ අනාරක්ෂික තත්ත්වය මත මෙසේ සිදුකොට ඇති බවද හෙළිවිය. මේ අනුව අඩු ලංසුව ඉදිරිපත් කළ ආයතනය තෝරා නොගැනීම නිසා කුලියට ගත් වසර දෙකට රු මිලියන 36ක වැඩිපුර ගෙවිමක් කිරීමට සිදුවන බවද විගණකාධිපතිවරයා පෙන්වා දෙන ලදී. එසේම අධිකාරියේ ගොඩනැගිල්ලට හානි සිදුවීමට හේතුවූ පෞද්ගලික සමාගමට එරෙහිව නඩු විභාග වෙමින් පවතින බවද එකී සමාගමෙන් රු. මිලියන 152ක මුදලක් අයකරගත යුතු බවද අනාවරණය විය. මේ සම්බන්ධයෙන් ව්‍යාකූල තත්ත්වයක් නිරීක්ෂණය වන බැවින්  විධිමත් විමර්ශනයක් කර සති 2ක් තුළ වාර්තාවක් ලබා දෙන ලෙස අමාත්‍යාංශ ලේකම්වරයාට කෝප් කමිටු සභාපතිවරයා දැනුම් දුන්නේය.

 

ලෝක වෙළද මධ්‍යස්ථානයෙන් කුලී පදනම යටතේ වෙළද කුටි ලබා ගැනීමේදී හිමිවිය යුතු රු. මිලියන 16කට ආසන්න ඇප මුදලක් තවමත් නොලැබීම

පෞද්ගලික සමාගමක් සහ අධිකාරිය අතර ඇති කර ගත් ගිවිසුමකට අනුව රු. මිලියන 16කට ආසන්න ඇප මුදලකට ලෝක වෙළද මධ්‍යස්ථානයෙන් කඩකාමර 35 ක් ලබා ගෙන තිබියදී 2021 වසරේදී ගිවිසුම අවසන් වුවද එක් වෙළද කුටියක් භාර නොදීම හේතුවෙන් ඇප මුදල් නිදහස් කරගැනීමට නොහැකිව තිබිණි.මීට අදාළව නඩුකරයක්ද පවතින බවත් මෙහිදී හෙළී විය. මේ සම්බන්ධයෙන් නිලධාරීන් පැහැදිළි පිළිතුරු ලබාදීමට අපොහොසත් වූ අතර වහාම විමර්ශනය කර ඒ පිළිබදව වාර්තාවක් ලබා දෙන ලෙස අමාත්‍යාංශ ලේකම්වරියට නියෝග කලේය.

 

රු. මිලියන 19 ක වියදමින් ගිණුම් මෘදුකාංග පද්ධතියක් ස්ථාපිත කිරීමට ගිවිසුම්ගත වුවද තවමත් එම කටයුතු නිමා වී නොතිබීම

රු. මිලියන 19 ක පිරිවැයකට ආයතනයේ භාවිතය සදහා ගිණුම් මෘදුකාංග පද්ධතියක් ස්ථාපිත කිරීමට පෞද්ලික ආයතනයක් සමග ගිවිසුම්ගත වුවද තවමත් එම කටයුතු නිමා වී නොතිබීම පිළිබඳව අවධානය යොමුවිය. එම සමාගමට 2016 වසරේ සිට 2021 දක්වා රු. මිලියන 10 කට ආසන්න මුදලක්  ගෙවා තිබියදී තවමත් මෙම කාර්ය ඉටුකර නොතිබීම පිළිබදව දැඩි අප්‍රසාදය පළ කළ කමිටුව මේ පිළිබදව වහාම සොයා බලා වාර්තා කරන ලෙස ලේකම්වරියට දැනුම් දුන්නේය.

 

විෂමාචාර චෝදනා ලැබ වැඩතහනමකට ලක්වු නිලධාරියා විධිමත් පරීක්ෂණයකින් තොරව ‍නැවත සේවයේ පිහිටුවීම

අධ්‍යක්ෂ (ඉඩම් කැනිම්) නිලධාරීයාගේ විෂමාචාර ක්‍රියා හේතුවෙන් වැඩතහනමකට ලක්ව මූලික විමර්ශනයක් පවත්වන අතරතුර අභ්‍යන්තර විගණක විසින් විධිමත් පරීක්ෂණයකින් තොරව ඔහුව නිදහස් කොට ඇති බවද මෙහිදී අනාවරණය විය. එම චෝදනා ලැබූ නිලධාරියා හිටපු සභාපතිවරයාගෙන් කළ අභියාචනයක් හමුවේ අභ්‍යන්තර විගණක මෙම තීරණය ගෙන ඇති බව ද හෙළිවිය. කිසිදු බලපෑමකින් තොරව මේ පිළිබද සොයා බලා තීරණ ගන්නා ලෙස කෝප් කමිටුව මෙහිදී ලේකම්වරියට දැනුම් දුන්නේය.

 

1 2

 



සම්බන්ධිත පුවත්

2026-11-16

අලි-මිනිස් ගැටුම අවම කිරීම සහ අලි සංරක්ෂණය සඳහා නව තාක්ෂණික හා ප්‍රායෝගික විසඳුම් සෙවීම පිළිබඳව ආංශික අධීක්ෂණ කාරක සභාවේ අවධානය

පරිසරය, කෘෂිකර්මය සහ සම්පත් තිරසාරත්වය පිළිබඳ ආංශික අධීක්ෂණ කාරක සභාව එහි සභාපති ගරු පාර්ලිමේන්තු මන්ත්‍රී හෙක්ටර් අප්පුහාමි මහතාගේ සභාපතිත්වයෙන් පසුගියදා (නොවැ. 13) පාර්ලිමේන්තුවේ දී රැස් විය.මෙහිදී අලි-මිනිස් ගැටුම පාලනය කිරීම, වල් අලින්ගේ සංක්‍රමණ රටා හඳුනාගැනීම සහ අලි සංරක්ෂණය සඳහා නව තාක්ෂණය යොදාගැනීම පිළිබඳව පුළුල් ලෙස සාකච්ඡා කෙරිණි. එමෙන්ම කාවන්තිස්ස ඇතාගේ මරණය සම්බන්ධයෙන් ද අවධානය යොමු විය.අලින්ගේ වාසස්ථාන අහිමි වීම, සාම්ප්‍රදායික අලි මංකඩ අවහිර වීම සහ ජනාවාස හා වගාබිම් ආශ්‍රිතව ආහාර සොයා යාම, අලි-මිනිස් ගැටුම වර්ධනය වීමට බලපාන ප්‍රධාන හේතු ලෙස මෙහිදී සාකච්ඡා විය. අලින්ගේ සංක්‍රමණ රටා හඳුනාගැනීම සඳහා GPS සහ සැටලයිට් කොලර් තාක්ෂණය යොදාගැනීමේ වැදගත්කම ද මෙහිදී අවධාරණය කෙරිණි.අලි-මිනිස් ගැටුම අවම කිරීම සඳහා ප්‍රාදේශීය මට්ටමින් වනජීවී නිලධාරීන්, ග්‍රාම නිලධාරීන් සහ ගම්වාසීන් සම්බන්ධ කරගත් ඒකාබද්ධ කමිටු පිහිටුවීම, ප්‍රජා සහභාගීත්වය ශක්තිමත් කිරීම සහ පූර්ව අනතුරු ඇඟවීමේ සන්නිවේදන ජාල ක්‍රියාත්මක කිරීම පිළිබඳව ද අදහස් හුවමාරු විය.එසේම රෝගී හා තුවාල ලැබූ අලින්ට ප්‍රතිකාර කිරීමේදී වනජීවී පශු වෛද්‍යවරුන් මුහුණ දෙන අභියෝග පිළිබඳව ද සාකච්ඡා කෙරිණි. වනජීවී දෙපාර්තමේන්තුවේ පශු වෛද්‍ය නිලධාරීන්ගේ සේවය, අලින් නිර්වින්දනය කිරීමේදී පවතින අවදානම් සහ ක්ෂේත්‍රයේදී ප්‍රතිකාර කිරීම සඳහා අවශ්‍ය ජංගම වෛද්‍ය පහසුකම් හා ජංගම එක්ස්-රේ යන්ත්‍ර වැනි තාක්ෂණික උපකරණවල අවශ්‍යතාවය ද මෙහිදී අවධානයට ලක් විය.මෙම අවස්ථාවට ගරු පාර්ලිමේන්තු මන්ත්‍රීවරුන් වන කිංස් නෙල්සන්, උපුල් කිත්සිරි, නීතීඥ එම්. ඒ. සී. එස්. චතුරි ගංගානි, සුදත් බලගල්ල, කිට්නන් සෙල්වරාජ් සහ නීතීඥ භාග්‍ය ශ්‍රී හේරත් යන මහත්ම මහත්මීහු සහභාගී වූහ. 


2026-11-14

ශ්‍රී ලංකන් ගුවන් සේවය ලාභදායී මට්ටමකට ගෙන ඒම සඳහා පස් අවුරුදු සැලැස්මක් - යානා සංචිතය ඉහළ නැංවීම සහ ණය බර පාලනය කිරීම පිළිබඳ අවධානය

ශ්‍රී ලංකන් ගුවන් සේවය මුහුණ දී ඇති මූල්‍ය අර්බුදය, අධික ගුවන් ගමන් ප්‍රමාදයන්, ණය බර සහ නව ගුවන් යානා ලබා ගැනීමේදී මතුව ඇති ප්‍රසම්පාදන ප්‍රමාදයන් පිළිබඳව යටිතල පහසුකම් හා උපායමාර්ගික සංවර්ධනය පිළිබඳ ආංශික අධීක්ෂණ කාරක සභාවේදී පුළුල් ලෙස සාකච්ඡා කෙරිණි.එම කාරක සභාව පාර්ලිමේන්තු මන්ත්‍රී ගරු එස්. එම්. මරික්කාර් මහතාගේ සභාපතිත්වයෙන් පසුගියදා පාර්ලිමේන්තුවේ දී රැස් වූ අවස්ථාවේදී මේ පිළිබඳව අවධානය යොමු විය.දැනට පවතින ගුවන් යානා 23 කින් සමන්විත සංචිතය ප්‍රමාණවත් නොවීම සහ එම ගුවන් යානා වර්ෂ 12 ක් පමණ පැරණි වීම හේතුවෙන් ගුවන් ගමන්වලට බලපාන තාක්ෂණික දෝෂ සහ ප්‍රමාදයන් පිළිබඳව මෙහිදී සාකච්ඡා විය. එක් ගුවන් යානයක තාක්ෂණික දෝෂයක් හෝ වෙනත් හේතුවක් මත හෝ ප්‍රමාදයක් ඇති වූ විට විකල්ප යානා යෙදවීමේ සීමා හේතුවෙන් සමස්ත ගුවන් ගමන් ජාලයටම බලපෑම් එල්ල වන බව ද මෙහිදී අනාවරණය විය.ගුවන් යානා ලබා ගැනීම සඳහා පසුගිය කාලයේ ක්‍රියාත්මක කළ සාමාන්‍ය ප්‍රසම්පාදන ක්‍රියාවලීන් අසාර්ථක වීම සහ ඒ ආශ්‍රිත දීර්ඝ ප්‍රමාදයන් පිළිබඳව ද කාරක සභාවේ අවධානය යොමු විය. මෙම තත්ත්වයට විසඳුමක් ලෙස ගුවන් යානා සහ ඒ ආශ්‍රිත උපකරණ මිලදී ගැනීම සඳහා විශේෂ ප්‍රසම්පාදන මාර්ගෝපදේශ මාලාවක් සකස් කර ඇති බවත්, එය ගැසට් කිරීම සඳහා කටයුතු යොදා ඇති බවත් මෙහිදී සඳහන් කෙරිණි. එමෙන්ම ප්‍රසම්පාදන කටයුතු සෘජුව අධීක්ෂණය කිරීම සඳහා අමාත්‍යාංශ මට්ටමින් විශේෂ ප්‍රසම්පාදන අංශයක් ද පිහිටුවා ඇති බව ද මෙහිදී ප්‍රකාශ විය.නව ප්‍රසම්පාදන මාර්ගෝපදේශ යටතේ ගුවන් යානා සංචිතය පුළුල් කිරීමට සැලසුම් කර ඇති අතර, ඉදිරි ජූනි මාසය වන විට නව නැරෝ-බොඩි ගුවන් යානයක් සහ වයිට්-බොඩි ගුවන් යානා දෙකක් සංචිතයට එක්කර ගැනීමට අපේක්ෂා කරන බව ද සාකච්ඡා විය. 2029 වන විට ගුවන් යානා සංචිතය අවම වශයෙන් යානා 29 ක් දක්වා ඉහළ නැංවීම, පස් අවුරුදු සැලැස්මේ ඉලක්කයක් බවද නිලධාරීහු සඳහන් කළහ.ශ්‍රී ලංකන් ගුවන් සේවයේ මූල්‍ය තත්ත්වය යහපත් කිරීම සඳහා මහා භාණ්ඩාගාරය මඟින් පැරණි බැංකු ණය සහ බැඳුම්කර ණය පවරා ගැනීම ඇතුළු පියවර ගෙන ඇති බව මෙහිදී පැහැදිලි කෙරිණි. එමෙන්ම ගුවන් යානා ලීසිං ගාස්තු අඩු කර ගැනීම, ඉන්ධන පිරිවැය පාලනය කිරීම සහ ගුවන් සේවයේ ආදායම් ඉහළ නැංවීම සඳහා වාණිජ උපායමාර්ග ක්‍රියාත්මක කිරීම පිළිබඳව ද අවධානය යොමු විය.මැදපෙරදිග කලාපයේ පවතින අර්බුදකාරී තත්ත්වය, ඉන්ධන මිල ඉහළ යාම සහ ජාත්‍යන්තර ගුවන් සේවා සමඟ පවතින තරගකාරීත්වය ද ශ්‍රී ලංකන් ගුවන් සේවයේ මෙහෙයුම් සහ ආදායම් කෙරෙහි බලපාන බව මෙහිදී සාකච්ඡා විය.තවද, ශ්‍රී ලංකන් ගුවන් සේවය ප්‍රතිව්‍යුහගත කිරීම සඳහා රජය විසින් පත් කරන ලද කමිටුව මඟින් නව ආයෝජකයන් ලබා ගැනීම, රාජ්‍ය-පෞද්ගලික හවුල්කාරීත්වයක් ඇති කිරීම හෝ රජය යටතේ පවත්වාගෙන යමින් හෝ පිරිවැය පියවාගත හැකි මට්ටමකට ගෙන ඒම ඇතුළු විකල්ප සලකා බලන බව ද සඳහන් විය.ඒ අනුව, ඉදිරි වසර දෙක හෝ තුන හෝ ඇතුළත ශ්‍රී ලංකන් ගුවන් සේවය පිරිවැය පියවාගත හැකි මට්ටමකට ගෙන ඒම සඳහා ගත යුතු පියවර ඇතුළත් සවිස්තරාත්මක වාර්තාවක් නොවැම්බර් 30 වැනිදාට පෙර පාර්ලිමේන්තුවට සහ අමාත්‍යාංශයට ඉදිරිපත් කරන ලෙස කාරක සභාව විසින් අදාළ බලධාරීන්ට උපදෙස් ලබා දෙන ලදී.මෙම කාරක සභා රැස්වීම සඳහා ගරු පාර්ලිමේන්තු මන්ත්‍රීවරුන් වන අජිත් පී. පෙරේරා, නලීන් බණ්ඩාර ජයමහ, රවීන්ද්‍ර බණ්ඩාර, මංජුල සුරවීර ආරච්චි, චතුර ගලප්පත්ති, ධනුෂ්ක රංගනාත්, ජගත් විතාන, ශාන්ත පද්ම කුමාර සුබසිංහ සහ නීතීඥ ගීතා හේරත් යන මහත්ම මහත්මීහු සහභාගී වූහ.


2026-11-14

ශ්‍රී ලංකාවේ ආනයන තීරුබදු ප්‍රතිපත්ති සහ වෙළෙඳ ගිවිසුම් සම්බන්ධයෙන් පාර්ලිමේන්තු ක්‍රම හා විධි පිළිබඳ කාරක සභාවේදී පුළුල් සාකච්ඡාවක්

ශ්‍රී ලංකාවේ ආනයන තීරුබදු ප්‍රතිපත්ති සහ වෙළෙඳ ගිවිසුම්වල වත්මන් තත්ත්වය සම්බන්ධයෙන් පාර්ලිමේන්තු ක්‍රම හා විධි පිළිබඳ කාරක සභාව එහි සභාපති ගරු පාර්ලිමේන්තු මන්ත්‍රී විජේසිරි බස්නායක මහතාගේ ප්‍රධානත්වයෙන් රැස් වූ  අවස්ථාවේදී පුළුල් ලෙස සාකච්ඡා කෙරිණි.මෙහිදී, ශ්‍රී ලංකා වාණිජ දෙපාර්තමේන්තුවේ වැඩබලන අධ්‍යක්ෂ ජනරාල් සෝමසේන මහදිවුල්වැව මහතා මේ සම්බන්ධයෙන් කාරක සභාවට සවිස්තරාත්මක පැහැදිලි කිරීමක් සිදු කළේය. ශ්‍රී ලංකාවේ ද්විපාර්ශ්වික සහ බහුපාර්ශ්වික වෙළෙඳ ගිවිසුම්වල වත්මන් තත්ත්වය සහ ඒවා ඉදිරියට පවත්වාගෙන යාම ඇතුළු කරුණු පිළිබඳව මෙහිදී අවධානය යොමු විය.සාකච්ඡා මට්ටමේ පවතින වෙළෙඳ ගිවිසුම් සම්බන්ධයෙන් ශක්‍යතා අධ්‍යයන සිදු කරමින් ඒවා අඛණ්ඩව ඉදිරියට ගෙන යාමට අවශ්‍ය පියවර ගන්නා ලෙස කාරක සභාව අවධාරණය කළේය.මෙම කාරක සභා රැස්වීමට ගරු නියෝජ්‍ය අමාත්‍යවරුන් වන චතුරංග අබේසිංහ සහ එරංග වීරරත්න යන මහත්වරුන් ද, ගරු පාර්ලිමේන්තු මන්ත්‍රීවරුන් වන අශෝක සපුමල් රන්වල, තිළිණ සමරකෝන්, චම්පික හෙට්ටිආරච්චි සහ චතුර ගලප්පත්ති යන මහත්වරුන් ඇතුළු පිරිසක් සහභාගී වූහ.


2026-11-13

විදේශීය ත්‍රස්තවාදී සටන්කරුවන් වැළැක්වීමේ පනත් කෙටුම්පතට ආංශික අධීක්ෂණ කාරක සභාවේ අනුමැතිය

විදේශීය ත්‍රස්තවාදී සටන්කරුවන් වැළැක්වීමේ පනත් කෙටුම්පත සඳහා ආර්ථික සංවර්ධනය සහ අන්තර්ජාතික සබඳතා පිළිබඳ ආංශික අධීක්ෂණ කාරක සභාවේ අනුමැතිය හිමි විය.එම ආංශික අධීක්ෂණ කාරක සභාව එහි සභාපති ගරු පාර්ලිමේන්තු මන්ත්‍රී නීතිඥ ලක්මාලි හේමචන්ද්‍ර මෙනවියගේ ප්‍රධානත්වයෙන් පාර්ලිමේන්තුවේ දී පසුගියදා රැස් වූ අවස්ථාවේදී මෙම පනත් කෙටුම්පත සලකා බලා අනුමත කෙරිණි.විදේශීය ත්‍රස්තවාදී සටන්කරුවන්ගෙන් එල්ල වන තර්ජනය වැළැක්වීම සහ මැඩපැවැත්වීම සම්බන්ධයෙන් 2014 සැප්තැම්බර් මස 24 වැනි දින සම්මත කරන ලද එක්සත් ජාතීන්ගේ ආරක්ෂක මණ්ඩලයේ 2178 දරන යෝජනාව බලාත්මක කිරීම සඳහාත්, ඊට සම්බන්ධ හෝ ආනුෂංගික කරුණු සඳහා විධිවිධාන සැලසීම සඳහාත් මෙම පනත් කෙටුම්පත ඉදිරිපත් කර තිබේ.විදේශ කටයුතු, විදේශ රැකියා සහ සංචාරක අමාත්‍යවරයා විසින් මෙම පනත් කෙටුම්පත පසුගිය ඔක්තෝබර් මස 20 වැනි දින පළමු වර කියවීම සඳහා පාර්ලිමේන්තුවට ඉදිරිපත් කර තිබිණි.ශ්‍රී ලාංකික පුරවැසියකු හෝ ශ්‍රී ලාංකික පුරවැසියකු නොවන වෙනත් රටක පුරවැසියකු හෝ ශ්‍රී ලංකාව තුළ සිටියදී හෝ ශ්‍රී ලංකාවෙන් පිටතදී වරදක් සිදුකර ඇති අවස්ථාවක හෝ, එම ක්‍රියාව අදාළ රටේ නීතිය යටතේ ද වරදක් වන අවස්ථාවකදී මෙම පනත යටතේ ශ්‍රී ලංකාව තුළ නීතිමය ක්‍රියාමාර්ග ගැනීමට හැකි බව නිලධාරීහු කාරක සභාව හමුවේ පැහැදිලි කළහ.ත්‍රස්තවාදී ක්‍රියාවන්හි නිරත වීම, ඒවා සැලසුම් කිරීම, සූදානම් කිරීම හෝ ඒවාට සහභාගී වීම මෙන්ම ත්‍රස්තවාදී පුහුණුව ලබා දීම හෝ ලබා ගැනීම ද මෙම පනත යටතේ වැරදි ලෙස අර්ථ දක්වා ඇති බව නිලධාරීහු කාරක සභාවට දැනුම් දුන්හ.විදේශ රටවල පදිංචිව සිටින ශ්‍රී ලාංකිකයන් ඉලක්ක කර ගනිමින් වාර්ගික පදනම මත මෙම නීතිමය විධිවිධාන හඳුන්වා දී නොමැති බව ද නිලධාරීන් විසින් කාරක සභාවට අවධාරණය කරන ලදී.දීර්ඝ සාකච්ඡාවකින් අනතුරුව කාරක සභාව විසින් අදාළ පනත් කෙටුම්පත අනුමත කරන ලදී. කෙසේ වෙතත්, කාරක සභා සාමාජික ගරු පාර්ලිමේන්තු මන්ත්‍රී සිවඥානම් ශ්‍රීතරන් මහතා මෙම පනත් කෙටුම්පතට සිය විරෝධය පළ කළේය.මෙම කාරක සභා රැස්වීමට ගරු පාර්ලිමේන්තු මන්ත්‍රීවරුන් වන සුරංග රත්නායක, තිලිණ සමරකෝන්, විජේසිරි බස්නායක සහ සිවඥානම් ශ්‍රීතරන් යන මහත්වරුන් ඇතුළු පිරිසක් සහභාගී වූහ. එමෙන්ම විදේශ කටයුතු, විදේශ රැකියා සහ සංචාරක අමාත්‍යාංශය, ආරක්ෂක අමාත්‍යාංශය, නීතිපති දෙපාර්තමේන්තුව සහ නීති කෙටුම්පත් සම්පාදක දෙපාර්තමේන්තුව නියෝජනය කරමින් රාජ්‍ය නිලධාරීහු ද මෙම අවස්ථාවට එක්ව සිටියහ.






© ශ්‍රී ලංකා පාර්ලි‌මේන්තුව.

සියලු හිමිකම් ඇවිරිණි.

නිර්මාණය සහ සංවර්ධනය  TekGeeks