2023-05-29
• இரத்தினக்கல் தொழிற்துறையை ஒழுங்குபடுத்தும் ஒரேயோரு அதிகார சபையான தேசிய இரத்திணக்கல் ஆபரண அதிகாரசபை மூன்றாம் தரப்பினருடன் நேரடியாக இரத்தினக்கல் அகழ்வுகளில் ஈடுபடக்கூடாது என வலியுறுத்து.
• அதிகாரசபைக்கு எதிராகத் தொடர்ச்சியாக குற்றச்சாட்டுகள் முன்வைக்கப்பட்டு வரும் நிலையில், கடந்த 10 வருடங்களில் பதிவாகியுள்ள அனைத்து முறைகேடுகள் மற்றும் செயற்பாடுகள் தொடர்பில் முறையான விசாரணைகளை மேற்கொள்ளுமாறும் தெரிவிப்பு.
• இரத்திரனக்கல் அகழ்விற்கான உரிமங்களை வழங்குவதில் மிகவும் வெளிப்படையான பொறிமுறையொன்றைத் தயாரிக்க அதிகாரிகளுக்குப் பணிப்புரை.
• அதிகாரி ஒருவரின் தவறான நடத்தை காரணமாக பதவிநீக்கத்துக்கு உள்ளாகி ஆரம்பகட்ட விசாரணைகள் நடைபெற்று வரும் நிலையில் முன்னாள் தலைவரின் கோரிக்கைக்கு அமைய விடுவிக்கப்பட்டமை தொடர்பில் விசாரணை.
• 10 மில்லியன் அமெரிக்க டொலருக்கு மதிப்பிடப்பட்ட இரத்தினக்கல் தொகுதி 10,000 அமெரிக்க டொலருக்கு மதிப்பீடு செய்யப்பட்டமை தொடர்பில் கடும் அதிருப்தி.
• 19 மில்லியன் ரூபா செலவில் கணக்கியலுக்கான மென்பொருள் கட்டமைப்பை நிறுவுவதற்கு தனியார் நிறுவனத்துடன் ஒப்பந்தம் கைச்சாத்திடப்பட்ட போதிலும், அதற்கான பணிகள் இன்னும் நிறைவடையவில்லை எனத் தெரிவிப்பு.
• உலக வர்த்தக மையத்திலிருந்து கடைகளைப் பெறுவதன் மூலம் 16 மில்லியன் ரூபாவுக்கும் அதிகமான இழப்பு ஏற்பட்டமை குறித்து அறிக்கை கோரல்.
• அதிகாரசபைக்கான கட்டடத்தை வாடகைக்கு எடுக்கும் போது அதிக விலைக்கு பெறப்பட்டமையால் 36 மில்லியன் ரூபா நட்டம்.
பாராளுமன்ற உறுப்பினர் கௌரவ (பேராசிரியர்) ரஞ்சித் பண்டார தலைமையில் 2023.05.24ஆம் திகதி கூடிய அரசாங்கப் பொறுப்பு முயற்சிகள் பற்றிய குழு (கோப் குழு) 2020, 2021ஆம் ஆண்டுக்கான கணக்காய்வாளர் நயாகத்தின் அறிக்கை மற்றும் தற்போதைய செயலாற்றுகை குறித்து ஆராய்வதற்காகத் தேசிய இரத்திணக்கல் ஆபரண அதிகாரசபையினை அழைத்திருந்தது.
பின்வரும் விடயங்கள் தொடர்பில் விசாரணைகள் நடத்தப்பட்டன
இரத்தினக்கல் தொழிற்துறையை ஒழுங்குபடுத்தும் ஒரேயோரு அதிகார சபையான தேசிய இரத்திணக்கல் ஆபரண அதிகாரசபை மூன்றாம் தரப்பினருடன் நேரடியாக இரத்தினக்கல் அகழ்வுகளில் ஈடுபடக்கூடாது என வலியுறுத்து
அதிகாரசபையானது மூன்றாம் தரப்பினருடன் நேரடியாக இரத்தினக்கல் அகழ்வு வியாபாரத்தில் ஈடுபடுவது குறித்து கணக்காய்வாளர் நாயகம் சுட்டிக்காட்டினார். இரத்தினக்கற்கள் மற்றும் ஆபரண சட்டத்தின்படி, இலங்கையில் இரத்தினக்கல் தொழிற்துறையை ஒழுங்குபடுத்தும் ஒரே அதிகாரசபை இது என்பதால், அந்த அதிகாரசபை மூன்றாம் தரப்பினருடன் நேரடியாக இரத்தினக்கல் அகழ்வு நடவடிக்கைகளில் ஈடுபடக்கூடாது என்று குழு வலியுறுத்தியது.
இரத்திரனக்கல் அகழ்விற்கான உரிமங்களை வழங்குவதில் மிகவும் வெளிப்படையான பொறிமுறையொன்றைத் தயாரிக்கப் பணிப்புரை
இரத்தினக்கல் அகழ்வுக்கான சுரங்கங்களுக்கு அனுமதிப்பத்திரம் வழங்கும் போது பல முறைகேடுகள் இடம்பெற்றுள்ளதாக குழுவின் உறுப்பினர்கள் சுட்டிக்காட்டியுள்ளனர். சில ஊழல் அதிகாரிகள் கண்ணிவெடிகளை தங்களின் நண்பர்களுக்கு வழங்குவதால் அரசாங்கத்திற்கு உரிய வரி வருமான இழப்பு ஏற்படுவதாகச் சுட்டிக்காட்டப்பட்டது. அதிகாரசபையினால் அனுமதிப்பத்திரங்கள் வழங்கப்படும்போது அதிக வெளிப்படைத்தன்மையுடன் கூடிய பொறிமுறையொன்று தயாரிக்கப்பட வேண்டும் எனக் கோப் குழுவின் தலைவர் அமைச்சின் செயலாளருக்கு பரிந்துரைத்தார்.
தொடர்ச்சியாக அதிகாரசபை மீது குற்றச்சாட்டுக்கள் சுமத்தப்படும் நிலையில் கடந்த 10 வருடங்களில் இடம்பெற்ற மோசடிகள் உள்ளிட்ட நடவடிக்கைகள் குறித்து முறையான விசாரணை நடத்தப் பணிப்புரை
இரத்தினக்கல் மற்றும் ஆபரண அதிகார சபை தொடர்பில் தொடர்ச்சியாக குற்றச்சாட்டுக்கள் எழுந்துள்ள நிலையில், கடந்த 10 வருடங்களில் இடம்பெற்றுள்ள முறைகேடுகள் மற்றும் மேற்கொள்ளப்பட்ட உடன்படிக்கைகள் தொடர்பில் முறையான விசாரணைகள் நடத்தப்பட்டு, முறையான பொறிமுறையொன்றை உருவாக்க வேண்டும் எனக் குழு வலியுறுத்தியது. இதற்கான வழிகாட்டல் தேவைப்பட்டால் ஓய்வுபெற்ற சிரேஷ்ட கணக்காய்வாளர் ஒருவரின் உதவியை நாடுமாறும் குழுவின் தலைவர் அறிவுறுத்தினார்.
10 மில்லியன் அமெரிக்க டொலருக்கு மதிப்பிடப்பட்ட இரத்தினக்கல் தொகுதி 10,000 அமெரிக்க டொலருக்கு மதிப்பீடு செய்யப்பட்டமை தொடர்பில் கடும் அதிருப்தி
2021ஆம் ஆண்டில் இந்நாட்டில் கண்டுபிடிக்கப்பட்ட 10 மில்லியன் அமெரிக்க டொலர் பெறுமதியான இரத்தினக்கல் தொகுதிக்கு பின்னர் 10,000 டொலர் மதிப்பீடு செய்யப்பட்டமை குறித்துக் கலந்துரையாடப்பட்டது. தற்பொழுது இதற்கு அருங்காட்சி மதிப்பு இருப்பதாக அதிகாரிகள் தெரிவித்தனர். இதற்கு அமைய அதிகாரிகளின் தொழில்ரீதியான திறமை குறித்து பிரச்சினை இருப்பதாக கணக்காய்வாளர் நாயகம் சுட்டிக்காட்டினார்.
நிரந்தரமான பணிப்பாளர் நாயகம் இல்லாமை
அதிகார சபைக்கு நிரந்தர பணிப்பாளர் நாயகம் ஒருவர் இல்லாமை இங்கு கவனம் செலுத்தப்பட்டது. தற்போதைய பணிப்பாளர் நாயகமும் நிர்வாக சேவையில் உள்ள அதிகாரியே என செயலாளர் தெரிவித்தார். எனவே, நிரந்தர பணிப்பாளர் நாயகத்தை நியமிப்பதற்கான நடவடிக்கைகளை உடனடியாக மேற்கொள்ளுமாறு குழு அறிவுறுத்தியது. அதற்கு தற்போதுள்ள சம்பள விகிதங்கள் தடையாக இருந்தால் கோப் குழு தலையிட்டு நிதியமைச்சு, ஜனாதிபதியின் செயலாளர் ஆகியோரின் ஊடாக நடவடிக்கை எடுக்கப்படும் என குழுவின் தலைவர் தெரிவித்தார்.
அதிகாரசபைக்காக ஒரு கட்டடத்தை வாடகைக்கு எடுக்கும் செயன்முறை தொடர்பாக அறிக்கையொன்றை சமர்ப்பிக்கக் கோரிக்கை
அதிகார சபைக்கு கட்டடம் ஒன்றை வாடகைக்கு எடுக்கும் போது அதிக விலைக்கு வழங்கப்பட்ட கட்டடத்திற்கு 4.5 மில்லியன் ரூபா மாதாந்த வாடகை அடிப்படையில் 2021 ஆம் ஆண்டு முதல் 2023 ஆம் ஆண்டு வரையிலான காலப்பகுதிக்கு ஒப்பந்தம் மேற்கொள்ளப்பட்டதாகவும் தெரிவிக்கப்பட்டது. தனியார் நிறுவனத்தினால் அதிகாரசபை இயங்கி வந்த கட்டிடத்திற்கு அருகில் நிர்மாணப்பணிகள் மேற்கொள்ளப்பட்டதன் காரணமாக அதிகாரசபையின் கட்டிடம் சேதமடைவதால் பாதுகாப்பற்ற நிலையில் இவ்வாறு செய்யப்பட்டுள்ளதாகவும் தெரியவந்துள்ளது. இதன்படி, குறைந்த விலை மனுவைச் மர்ப்பித்த நிறுவனத்தை தெரிவு செய்யாத காரணத்தினால், பணியமர்த்தப்பட்ட இரண்டு வருடங்களுக்கு மேலதிகமாக 36 மில்லியன் ரூபா செலுத்த வேண்டியுள்ளதாக கணக்காய்வாளர் நாயகம் சுட்டிக்காட்டினார். மேலும், அதிகாரசபையின் கட்டடத்தை சேதப்படுத்திய தனியார் நிறுவனம் மீதும் வழக்கு நிலுவையில் உள்ளதோடு, அந்த நிறுவனத்திடமிருந்து ரூ. 152 மில்லியன் தொகை மீளப் பெறப்பட வேண்டும் எனவும் தெரிவிக்கப்பட்டுள்ளது. இது தொடர்பில் குழப்பமான சூழல் காணப்படுவதால், இது தொடர்பில் முறையான விசாரணைகளை மேற்கொண்டு 2 வாரங்களுக்குள் அறிக்கையை வழங்குமாறு கோப் குழுவின் தலைவர் அமைச்சின் செயலாளருக்கு அறிவித்தார்.
உலக வர்த்தக மையத்திலிருந்து கடைகளைப் பெறுவதன் மூலம் 16 மில்லியன் ரூபாவுக்கும் அதிகமான வைப்பு இழப்பு ஏற்பட்டமை குறித்து அறிக்கை கோரல்
தனியார் நிறுவனத்துக்கும், அதிகாரசபைக்கும் இடையே ஏற்படுத்தப்பட்ட ஒப்பந்தத்தின் படி சுமார் 16 மில்லியன் ரூபா பிணைத்தொகைக்கு உலக வர்த்தக மையத்தில் 35 கடைகள் பெறப்பட்டபோதும், ஒப்பந்தம் 2021 இல் முடிவடைந்து போயிருந்தாலும் ஒரு கடை மீள ஒப்படைக்கப்படாததால் பிணைத்தொகையை விடுவிக்க முடியாதுபோயுள்ளது. இது தொடர்பான வழக்கு உள்ளமையும் இங்கு தெரியவந்தது. இது குறித்து தெளிவான பதில் அளிக்கத் தவறியதால், உடனடியாக விசாரணை நடத்தி அறிக்கை அளிக்குமாறு அமைச்சின் செயலருக்கு குழு உத்தரவிட்டது.
19 மில்லியன் ரூபா செலவில் கணக்கியலுக்கான மென்பொருள் கட்டமைப்பை நிறுவுவதற்கு ஒப்பந்தம் செய்யப்பட்டபூதும் இன்னமும் பணி நிறைவடையவில்லை
19 மில்லியன் ரூபா செலவில், குறித்த நிறுவன பாவனைக்கான கணக்கியல் மென்பொருளை நிறுவுவதற்கு தனியார் நிறுவனத்துடன் ஒப்பந்தம் மேற்கொள்ளப்பட்ட போதிலும், அதற்கான பணிகள் இன்னும் நிறைவடையவில்லை என்பது தொடர்பில் கவனம் செலுத்தப்பட்டது. கடந்த 2016ஆம் ஆண்டு முதல் 2021ஆம் ஆண்டு வரை நிறுவனத்திற்கு சுமார் 10 மில்லியன் ரூபா பணம் வழங்கப்பட்ட போதிலும் இதுவரையில் இந்தப் பணிகளை நிறைவு செய்யவில்லை எனவும் தெரிவிக்கப்பட்டது. இது தொடர்பில் தனது அதிருப்தியை வெளியிட்ட குழு, இதுபற்றி உடனடியாக ஆராய்ந்து அறிக்கை சமர்ப்பிக்குமாறு செயலாளருக்கு அறிவுறுத்தியது.
முறையான விசாரணையின்றி இடைநீக்கம் செய்யப்பட்ட அதிகாரியை மீண்டும் பணியில் சேர்த்தல்
முதற்கட்ட விசாரணை நடத்தியபோது, முறைகேடு காரணமாகப் பணிப்பாளர் (நிலச் சுரங்கம்) பணி இடைநீக்கம் செய்யப்பட்டு, உள்ளகக் கணக்காய்வாளரினால் முறையான விசாரணையின்றி பணிநீக்கம் செய்யப்பட்டதும் தெரியவந்தது. முன்னாள் தலைவரிடமிருந்து குற்றம் சாட்டப்பட்ட அதிகாரி செய்த முறையீட்டின் பேரில் உள்ளக கணக்காய்வாளர் இந்த முடிவை எடுத்துள்ளதாகவும் தெரியவந்துள்ளது. இது தொடர்பில் ஆராய்ந்து எவ்வித செல்வாக்கும் இன்றி தீர்மானம் எடுக்குமாறு கோப் குழு அமைச்சின் செயலாளருக்கு அறிவித்தது.
2026-11-16
சுற்றாடல், கமத்தொழில் மற்றும் வளங்களின் நிலைத்தன்மை பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் ஹெக்டர் அப்புஹாமி தலைமையில் அண்மையில் பாராளுமன்றத்தில் கூடியது.இதில், யானை – மனித மோதலைக் கட்டுப்படுத்துதல், காட்டு யானைகளின் இடம்பெயர்வு முறைகளைக் கண்டறிதல் மற்றும் யானைகளைப் பாதுகாப்பதற்குப் புதிய தொழில்நுட்பங்களைப் பயன்படுத்துதல் தொடர்பில் விரிவாகக் கலந்துரையாடப்பட்டது. அத்துடன், காவந்திஸ்ஸ யானையின் மரணம் தொடர்பிலும் கவனம் செலுத்தப்பட்டது.யானைகளின் வாழ்விடங்கள் இழக்கப்படுதல், பாரம்பரிய யானை வழித்தடங்கள் தடைப்படுதல் மற்றும் குடியிருப்புகள், விவசாய நிலங்களை அண்மித்த பகுதிகளில் உணவு தேடிச் செல்லுதல் ஆகியன யானை – மனித மோதல் அதிகரிப்பதற்கான பிரதான காரணங்களாக இதன்போது கலந்துரையாடப்பட்டன. யானைகளின் இடம்பெயர்வு முறைகளைக் கண்டறிவதற்காக GPS மற்றும் செய்மதிக் கழுத்துப்பட்டித் தொழில்நுட்பத்தைப் பயன்படுத்துவதன் முக்கியத்துவமும் இதன்போது வலியுறுத்தப்பட்டது.யானை – மனித மோதலைக் குறைப்பதற்காக பிரதேச மட்டத்தில் வனவிலங்கு அதிகாரிகள், கிராம உத்தியோகத்தர்கள் மற்றும் கிராம மக்களை உள்ளடக்கிய கூட்டுக் குழுக்களை அமைத்தல், சமூகப் பங்கேற்பை வலுப்படுத்துதல் மற்றும் முன்கூட்டிய எச்சரிக்கைத் தொடர்பாடல் வலையமைப்புகளைச் செயற்படுத்துதல் தொடர்பிலும் கருத்துக்கள் பரிமாறப்பட்டன.அத்துடன், நோய்வாய்ப்பட்ட மற்றும் காயமடைந்த யானைகளுக்குச் சிகிச்சையளிக்கும்போது வனவிலங்கு கால்நடை மருத்துவர்கள் எதிர்கொள்ளும் சவால்கள் குறித்தும் கலந்துரையாடப்பட்டது. வனவிலங்கு திணைக்களத்தின் கால்நடை மருத்துவ அதிகாரிகளின் சேவை, யானைகளுக்கு மயக்க மருந்து செலுத்தும்போது காணப்படும் ஆபத்துகள் மற்றும் களத்தில் சிகிச்சையளிப்பதற்குத் தேவையான நடமாடும் மருத்துவ வசதிகள், நடமாடும் எக்ஸ்-ரே இயந்திரங்கள் போன்ற தொழில்நுட்ப உபகரணங்களின் அவசியம் குறித்தும் இதன்போது கவனம் செலுத்தப்பட்டது.இக்கூட்டத்தில் கௌரவ பாராளுமன்ற உறுப்பினர்களான கிங்ஸ் நெல்சன், உபுல் கித்சிறி, சட்டத்தரணி எம்.ஏ.சி.எஸ். சதுரி கங்கானி, சுதத் பலகல்ல, கிட்ணன் செல்வராஜ் மற்றும் சட்டத்தரணி பாக்ய ஸ்ரீ ஹேரத் ஆகியோர் கலந்துகொண்டனர்.
2026-11-14
ஸ்ரீலங்கன் விமான சேவை எதிர்நோக்கியுள்ள நிதி நெருக்கடி, அதிகளவிலான விமானப் பயணத் தாமதங்கள், கடன் சுமை மற்றும் புதிய விமானங்களைக் கொள்வனவு செய்வதில் ஏற்பட்டுள்ள கொள்வனவு நடைமுறைத் தாமதங்கள் தொடர்பில் உட்கட்டமைப்பு வசதிகள் மற்றும் மூலோபாய அபிவிருத்தி பற்றிய துறைசார் மேற்பார்வைக் குழுவில் விரிவாகக் கலந்துரையாடப்பட்டது.குறித்த குழு, அதன் தலைவர் கௌரவ பாராளுமன்ற உறுப்பினர் எஸ்.எம். மரிக்கார் தலைமையில் அண்மையில் பாராளுமன்றத்தில் கூடியபோதே இது தொடர்பில் கவனம் செலுத்தப்பட்டது.தற்போது 23 விமானங்களைக் கொண்டுள்ள விமானச் சேவையின் விமானத் தொகுதி போதுமானதாக இல்லாமை மற்றும் அந்த விமானங்கள் சுமார் 12 வருடங்கள் பழைமையானவையாக இருப்பதால் விமானப் பயணங்களைப் பாதிக்கும் தொழில்நுட்பக் கோளாறுகள் மற்றும் தாமதங்கள் தொடர்பில் இதன்போது கலந்துரையாடப்பட்டது. ஒரு விமானத்தில் தொழில்நுட்பக் கோளாறு அல்லது வேறு காரணங்களால் தாமதம் ஏற்படும்போது, மாற்று விமானங்களைப் பயன்படுத்துவதில் காணப்படும் மட்டுப்பாடுகள் காரணமாக ஒட்டுமொத்த விமானப் போக்குவரத்து வலையமைப்பும் பாதிக்கப்படுவதாகவும் இதன்போது சுட்டிக்காட்டப்பட்டது.விமானங்களைக் கொள்வனவு செய்வதற்காக கடந்த காலங்களில் முன்னெடுக்கப்பட்ட வழமையான கொள்வனவு நடைமுறைகள் தோல்வியடைந்தமை மற்றும் அதனுடன் தொடர்புடைய நீண்டகாலத் தாமதங்கள் குறித்தும் குழுவின் கவனம் செலுத்தப்பட்டது. இந்நிலைக்குத் தீர்வாக விமானங்கள் மற்றும் அவற்றுடன் தொடர்புடைய உபகரணங்களைக் கொள்வனவு செய்வதற்கான விசேட கொள்வனவு வழிகாட்டுதல்கள் தயாரிக்கப்பட்டுள்ளதுடன், அவற்றை வர்த்தமானியில் வெளியிடுவதற்கான நடவடிக்கைகள் எடுக்கப்பட்டுள்ளதாகவும் இதன்போது தெரிவிக்கப்பட்டது. அத்துடன், கொள்வனவு நடவடிக்கைகளை நேரடியாகக் கண்காணிப்பதற்காக அமைச்சு மட்டத்தில் விசேட கொள்வனவுப் பிரிவொன்றும் நிறுவப்பட்டுள்ளதாகத் தெரிவிக்கப்பட்டது.புதிய கொள்வனவு வழிகாட்டுதல்களின் கீழ் விமானத் தொகுதியை விரிவுபடுத்தத் திட்டமிடப்பட்டுள்ளதுடன், எதிர்வரும் ஜூன் மாதமளவில் புதிய குறுகிய உடற்பகுதியைக் கொண்ட (Narrow-body) விமானமொன்றையும், அகன்ற உடற்பகுதியைக் கொண்ட (Wide-body) இரண்டு விமானங்களையும் விமானத் தொகுதியில் இணைத்துக்கொள்ள எதிர்பார்க்கப்படுவதாகவும் கலந்துரையாடப்பட்டது. 2029ஆம் ஆண்டளவில் விமானத் தொகுதியை ஆகக்குறைந்தது 29 விமானங்களாக அதிகரிப்பது ஐந்தாண்டுத் திட்டத்தின் இலக்காகும் என்றும் குறிப்பிடப்பட்டது.ஸ்ரீலங்கன் விமான சேவையின் நிதி நிலைமையை மேம்படுத்துவதற்காக, பழைய வங்கிக் கடன்கள் மற்றும் பிணைமுறிக் கடன்கள் உள்ளிட்டவற்றைப் பொறுப்பேற்பது உட்பட பல்வேறு நடவடிக்கைகளை திறைசேரி முன்னெடுத்துள்ளதாக இதன்போது விளக்கமளிக்கப்பட்டது. அத்துடன், விமானங்களுக்கான குத்தகைக் கட்டணங்களைக் குறைத்தல், எரிபொருள் செலவுகளைக் கட்டுப்படுத்துதல் மற்றும் விமான சேவையின் வருமானத்தை அதிகரிப்பதற்கான வர்த்தக உபாயங்களை நடைமுறைப்படுத்துதல் தொடர்பிலும் கவனம் செலுத்தப்பட்டது.மத்திய கிழக்கு பிராந்தியத்தில் நிலவும் நெருக்கடி நிலைமை, எரிபொருள் விலை அதிகரிப்பு மற்றும் சர்வதேச விமான சேவைகளுடனான போட்டித்தன்மை ஆகியனவும் ஸ்ரீலங்கன் விமான சேவையின் செயற்பாடுகள் மற்றும் வருமானத்தில் தாக்கம் செலுத்துவதாக இதன்போது கலந்துரையாடப்பட்டது.மேலும், ஸ்ரீலங்கன் விமான சேவையை மறுசீரமைப்பதற்காக அரசாங்கத்தினால் நியமிக்கப்பட்ட குழு, புதிய முதலீட்டாளர்களைப் பெற்றுக்கொள்ளுதல், அரச-தனியார் பங்காண்மையை ஏற்படுத்துதல் அல்லது அரசாங்கத்தின் கீழ் தொடர்ந்து நிர்வகித்து, அதன் செலவுகளை ஈடுகட்டக்கூடிய நிலைக்குக் கொண்டுவருதல் உள்ளிட்ட மாற்று வழிகள் குறித்து ஆராய்ந்து வருவதாகவும் தெரிவிக்கப்பட்டது.அதற்கமைய, அடுத்த இரண்டு அல்லது மூன்று வருடங்களுக்குள் ஸ்ரீலங்கன் விமான சேவையை அதன் செலவுகளை ஈடுகட்டக்கூடிய நிலைக்குக் கொண்டுவருவதற்காக எடுக்கப்பட வேண்டிய நடவடிக்கைகள் உள்ளடங்கிய விரிவான அறிக்கையொன்றை நவம்பர் 30ஆம் திகதிக்கு முன்னர் பாராளுமன்றத்திற்கும் அமைச்சுக்கும் சமர்ப்பிக்குமாறு உரிய அதிகாரிகளுக்கு குழு அறிவுறுத்தியது.இந்தக் குழுக் கூட்டத்தில் கௌரவ பாராளுமன்ற உறுப்பினர்களான அஜித் பி. பெரேரா, நளின் பண்டார ஜயமஹ, ரவீந்திர பண்டார, மஞ்சுள சுரவீர ஆரச்சி, சதுர கலப்பத்தி, தனுஷ்க ரங்கநாத், ஜகத் விதான, சாந்த பத்ம குமார சுபசிங்க மற்றும் சட்டத்தரணி கீதா ஹேரத் ஆகியோர் கலந்துகொண்டனர்.
2026-11-14
இலங்கையின் இறக்குமதி வரிக் கொள்கைகள் மற்றும் வர்த்தக உடன்படிக்கைகள் தொடர்பில் கௌரவ பாராளுமன்ற உறுப்பினர் விஜேசிறி பஸ்நாயக்க அவர்களின் தலைமையில் கூடிய வழி வகைகள் பற்றிய குழுவில் விரிவாகக் கலந்துரையாடப்பட்டது.வணிகத் திணைக்களத்தின் பணிப்பாளர் நாயகம் (பதில்) சோமசேன மகாதிவுல்வேவ அவர்கள் இது பற்றிய விரிவான விளக்கத்தைக் குழுவுக்கு வழங்கினார். இலங்கையின் இரு தரப்பு மற்றும் பல்தரப்பு வர்த்தக உடன்படிக்கைகளின் நிலைமைகள் மற்றும் அவற்றைத் தொடர்ந்து முன்கொண்டு செல்வது உள்ளிட்ட விடயங்கள் குறித்து இங்கு கலந்துரையாடப்பட்டது.கலந்துரையாடல் மட்டத்தில் இருக்கும் வர்த்தக உடன்படிக்கைகள் குறித்து சாத்தியக் கூற்று ஆய்வுகளை மேற்கொண்டு தொடர்ச்சியாக அவற்றை முன்னெடுத்துச் செல்வதற்கான நடவடிக்கைகளை எடுக்குமாறு குழு வலியுறுத்தியது.இந்தக் குழுக் கூட்டத்தில் கௌரவ பிரதியமைச்சர்களான சதுரங்க அபேசிங்க, எரங்க வீரரத்ன மற்றும் கௌரவ பாராளுமன்ற உறுப்பினர்களான அசோக சபுமல் ரண்வல, திலின சமரக்கோன், சம்பிக்க ஹெட்டிஆரச்சி, சதுர கலப்பதி உள்ளிட்டோர் கலந்துகொண்டனர்.
2026-11-13
வெளிநாட்டுப் பயங்கரவாதிப் போராளிகளைத் தடுத்தல் சட்டமூலத்திற்கு பொருளாதார அபிவிருத்தி மற்றும் சர்வதேச உறவுகள் பற்றிய துறைசார் மேற்பார்வைக் குழுவில் அங்கீகாரம் வழங்கப்பட்டது. சர்வதேச உறவுகள் பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் சட்டத்தரணி லக்மாலி ஹேமச்சந்திர அவர்களின் தலைமையில் அண்மையில் பாராளுமன்றத்தில் கூடியபோதே இச்சட்டமூலம் ஆராயப்பட்டு அங்கீகரிக்கப்பட்டது. வெளிநாட்டு பயங்கரவாதிப் போராளிகளால் எதிர்நோக்கப்படும் அச்சுறுத்தலைத் தடுத்தல் மற்றும் ஒடுக்குதல் தொடர்பான 2014ஆம் ஆண்டு செப்தெம்பர் மாதம் 24ஆம் திகதி ஏற்றுக்கொள்ளப்பட்ட ஐக்கிய நாடுகள் பாதுகாப்புப் பேரவைத் தீர்மானம் 2178 இற்கு பயன்கொடுப்பதற்கும், அத்துடன் அவற்றுடன் தொடர்புபட்ட அல்லது அவற்றின் இடைநேர்விளைவான கருமங்களுக்காக ஏற்பாடு செய்வதற்குமான சட்டமூலமாக இது சமர்ப்பிக்கப்பட்டுள்ளது.இச்சட்டமூலத்தை வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் கடந்த ஒக்டோபர் மாதம் 20ஆம் திகதி முதலாவது மதிப்பீட்டுக்காகப் பாராளுமன்றத்தில் சமர்ப்பித்திருந்தார்.இலங்கை பிரஜையொருவர் அல்லது இலங்கை பிரஜை அல்லாத வேறொரு நாட்டின் பிரஜை ஒருவர் இலங்கையில் சமுகமாயிருக்கையில், அல்லது இலங்கைக்கு வெளியே தவறிழைத்திருந்து அது அந்நாட்டின் சட்டத்தின் கீழ் தவறொன்றாக இருப்பின் இச்சட்டத்தின் கீழ் இலங்கையில் நடவடிக்கை எடுக்க முடியும். பயங்கரவாத செயல்களை மேற்கொள்ளல், திட்டமிடுதல், தயார்செய்தல் அல்லது அதில் பங்குபற்றுதல், பயங்கரவாத பயிற்சிகளை வழங்குதல் அல்லது பெறுதல் போன்றவை இச்சட்டத்தின் கீழ் தவறுகளாகக் குறிப்பிடப்பட்டிருப்பதாக அதிகாரிகள் குழுவில் விளக்கமளித்தனர்.புலம்பெயர்ந்து வாழும் இலங்கையர்களை இன ரீதியாக இலக்குவைத்து கொண்டுவரப்படும் சட்ட ஏற்பாடு இல்லையென்றும் அதிகாரிகள் குறிப்பிட்டனர். விரிவான கலந்துரையாடல்களைத் தொடர்ந்து குறித்த சட்டமூலத்திற்கு குழு அங்கீகாரம் வழங்கியது. குழுவின் உறுப்பினரான கௌரவ பாராளுமன்ற உறுப்பினர் சிவஞானம் சிறிதரன் இச்சட்டமூலத்திற்கு தனது எதிர்ப்பினைப் பதிவுசெய்தார்.இக்குழுக் கூட்டத்தில் கௌரவ பாராளுமன்ற உறுப்பினர்களான சுரங்க ரத்னாயக்க, திலின சமரக்கோன், விஜேசிறி பஸ்நாயக்க, சிவஞானம் சிறிதரன் உள்ளிட்டோரும், வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சு, பாதுகாப்பு அமைச்சு மற்றும் சட்டமா அதிபர் திணைக்களம், சட்டவரைஞர் திணைக்களம் ஆகியவற்றைப் பிரதிநிதித்துவப்படுத்தி அரசாங்க அதிகாரிகளும் கலந்துகொண்டனர்.