2020-11-26
පුවත් කාණ්ඩ : කාරක සභා පුවත්
ලෝක වෙළඳපොලේ ඉන්ධන මිල විචලනය වුවද ස්ථාවර ඉන්ධන මිලක් පවත්වා ගෙන යාම නව රජයේ ප්රතිපත්තිය වන බව ගරු බලශක්ති අමාත්ය උදය ගම්මන්පිල මහතා පැවසීය.
සෑම ආණ්ඩුවක් යටතේම තෙල් සංස්ථාව පාඩු ලබන ආයතනයක් වන බැවින් විකල්ප බලශක්ති මුලයන්ට යෑමේ ප්රවේශයන් පිළිබඳව පාර්ලිමේන්තු මන්ත්රී වසන්ත යයාපාබණ්ඩාර මහතා යොමු කළ ප්රශ්නයට පිළිතුරු දෙමින් එතුමා මේ බව ප්රකාශ කර සිටියේ, බලශක්ති කටයුතු පිළිබඳ අමාත්යාංශයීය උපදේශක කාරක සභාව පාර්ලිමේන්තුවේදී ඊයේ 25 වන දින රැස් වූ අවස්ථාවේදීය.
තවදුරටත් අදහස් දක්වමින් බලශක්ති අමාත්යවරයා ප්රකාශ කර සිටියේ විචලනය වන ඉන්ධන මිල පොදු ප්රවාහන සේවා භාවිතා කරන බහුතරයක් ජනතාවට තදින් දැනෙන සුළු බැවින් ස්ථාවර මිලක් පවත්වා ගෙන යාමට පවතින රජය තීරණය කර ඇති බවත්, ඒ අනුව ස්ථායිකරණ අරමුදලක් බිහි කිරීම පිළිබද වැඩිදුර අධ්යයන සිදු කෙරෙමින් පවතින බවත් ය.
එමෙන්ම, මින් පෙර ඛනිජ තෙල් ප්රවාහනය දුම්රිය ගමනාගනය ඔස්සේ සිදු කළ අතර ඒ හේතුවෙන් පේරාදෙණිය වැනි දුම්රිය ස්ථාන ආශ්රිතව ගබඩා පහසුකම් සංවර්ධනය කළ නමුත් බවුසර් මගින් වර්තමානයේ ඛනිජ තෙල් ප්රවාහනය කිරීමේ ප්රවණතාවය වැඩි බැවින් ගමනාගමන තදබදය ඉහළ ගොස් ඇති බවටත්, සම්පත් නිසි ලෙස භාවිතා නොවන බවටත් මෙහිදී පාර්ලිමේන්තු මන්ත්රී උදයන කිරිඳිගොඩ මහතා විසින් බලශක්ති අමාත්යවරයාගේ අවධානය යොමු කරනු ලැබීය.
එයට එකඟ වෙමින් බලශක්ති අමාත්ය උදය ගම්මන්පිල මහතා පවසා සිටියේ තදබදය හා සම්පත් භාවිතයට අමතරව එය වියදම අධික ක්රමවේදයක් බවත්, එමගින් පරිසර දුෂණය සිදුවන බවත් ය. දැනට 35% දුම්රිය මගින්ද, 65% බවුසර් මගින්ද, ඛනිජ තෙල් ප්රවාහනය කිරීම සිදුවන බවත් ඉදිරියේදී බවුසර් හා දුම්රිය ගමනාගමය අතර ඇති සමතුලිතතාවයට රැක ගනිමින් 60% දක්වා දුම්රිය ගමනාගනය ඔස්සේ ඛනිජ තෙල් ප්රවාහනය කිරීම සඳහා කටයතු කිරීමට තමන් බලාපොරොත්තු වන බව අමාත්යවරයා තවදුරටත් පැවසීය.
ඛනිජ තෙල් පොදු ගබඩා පර්යන්තයේ ආයතනික අතපසුවීමක් මත සේවකයන් පිරිසක් ස්ථිර කරීමේ ගැටළුවක් පවතින බවත් ඒ සඳහා යම් වැඩපිළිවෙලක් සකස් කොට එම සේවක පිරිස හට සාධාරණයක් ඉටු කර දෙන ලෙසට පාර්ලිමේන්තු මන්ත්රී චන්දිම වීරක්කොඩි මහතා ඉල්ලීමක් කළ අතර ඒ පිළිබඳව මාසික කළමණාකරන රැස්වීමේදී සාකච්ඡා කොට කඩිනම් පිළිතුරක් ලබා දෙන බවට බලශක්ති අමාත්යවරයා කීවේය.
බලශක්ති කටයුතු පිළිබඳ අමාත්යාංශයීය උපදේශක කාරක සභා රැස්වීම සඳහා පාර්ලිමේන්තු මන්ත්රීවරු වන ගුණතිලක රාජපක්ෂ, වසන්ත යාපාබණ්ඩාර, උදයන කිරිඳිගොඩ, චන්දිම වීරක්කොඩි, කේ. දිලීබන්, ශාන්ත බණ්ඩාර, චාල්ස් නිර්මලනාදන්, නිරෝෂන් පෙරේරා, ජානක වක්කුඹුර යන මන්ත්රීවරු ඇතුළු අමාත්යංශ නිලධාරීහු සහභාගී වුහ.
2026-06-12
ප්රංශ ජනරජයේ නව ශ්රී ලංකා තානාපතිවරයා සහ යුනෙස්කෝ වේ ශ්රී ලංකා නිත්ය නියෝජිත පත්කිරීම සඳහා පාර්ලිමේන්තුවේදී පසුගියදා (10) රැස් වූ උසස් නිලතල පිළිබඳ කාරක සභාව අනුමැතිය ලබාදී ඇත.ඒ අනුව ප්රංශ ජනරජයේ නව ශ්රී ලංකා තානාපති සහ එක්සත් ජාතීන්ගේ අධ්යාපනික, විද්යාත්මක හා සංස්කෘතික සංවිධානයේ (යුනෙස්කෝ) ශ්රී ලංකා නිත්ය නියෝජිතවරයා ලෙස පී. ආර්. එස්. එස්. ගුණරත්න මහතාගේ නාමයෝජනාවට උසස් නිලතල පිළිබඳ කාරක සභාවේ අනුමැතිය හිමි විය.ගරු පාර්ලිමේන්තු මන්ත්රී වෛද්ය නිහාල් අබේසිංහ මහතාගේ ප්රධානත්වයෙන් රැස් වූ උසස් නිලතල පිළිබඳ කාරක සභාවට, කාරක සභාවේ සාමාජික ගරු අමාත්යවරුන් වන ආචාර්ය අනිල් ජයන්ත, නීතිඥ හර්ෂණ නානායක්කාර, රාමලිංගම් චන්ද්රසේකර්, ආචාර්ය උපාලි පන්නිලගේ, සරෝජා සාවිත්රි පෝල්රාජ්, ආචාර්ය හිනිදුම සුනිල් සෙනෙවි, ගරු නියෝජ්ය අමාත්ය වෛද්ය හංසක විජේමුණි සහ ගරු පාර්ලිමේන්තු මන්ත්රීවරුන් වන රිසාඩ් බදියුදීන්, කුමාර ජයකොඩි, කදිරවේලු ෂන්මුගම් කුගදාසන්,ජනාධිපති නීතිඥ එම්. නිසාම් කාරියප්පර් යන මහත්ම මහත්මීහු සහභාගී වූහ.
2026-06-11
රාජ්ය ණය ගෙවීම සඳහා මහා භාණ්ඩාගාරය සතුව තිබූ ඇමෙරිකානු ඩොලර් මිලියන 2.5ක් අස්ථානගත වීම සම්බන්ධයෙන් මුදල් අමාත්යාංශය විසින් රජයේ මුදල් පිළිබඳ කාරක සභාව වෙත ලබා දී තිබූ වාර්තාව සම්බන්ධයෙන් සාකච්ඡා කිරීම සඳහා එම කාරක සභාව පසුගියදා (ජුනි 08) පාර්ලිමේන්තුවේදී රැස් විය. ගරු පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන් රැස්වූ එම කාරක සභාවට ගරු නියෝජ්ය අමාත්යවරුන් වන චතුරංග අබේසිංහ, ආචාර්ය කෞෂල්යා ආරියරත්න, නිශාන්ත ජයවීර සහ ගරු පාර්ලිමේන්තු මන්ත්රීවරුන් වන රවී කරුණානායක, හර්ෂණ රාජකරුණා, නිමල් පලිහේන, නීතීඥ චිත්රාල් ප්රනාන්දු, විජේසිරි බස්නායක සහ නීතීඥ ලක්මාලි හේමචන්ද්ර යන මහත්ම මහත්මීහු සහභාගී වූහ. මෙම සාකච්ඡාව සඳහා මුදල්, ක්රමසම්පාදන හා ආර්ථික සංවර්ධන අමාත්යාංශයේ ලේකම් ආචාර්ය හර්ෂණ සූරියප්පෙරුම, ශ්රී ලංකා මහ බැංකුවේ අධිපති ආචාර්ය නන්දලාල් වීරසිංහ, ශ්රී ලංකා පරිගණක හදිසි ප්රතිචාර සංසදයේ (CERT) නිලධාරීන් ඇතුළු පිරිසක්ද සහභාගී වූහ. මෙහිදී ඉදිරිපත් කර තිබූ වාර්තාව සම්බන්ධයෙන් දීර්ඝ වශයෙන් සාකච්ඡා කිරීම සිදු වූ අතර, මහ බැංකු නිලධාරීහු මෙම වාර්තාව පරීක්ෂා කර බැලීමෙන් අනතුරුව ඒ සම්බන්ධයෙන් ඔවුන්ගේ තවත් වාර්තාවක්ද රජයේ මුදල් පිළිබඳ කාරක සභාවට ඉදිරිපත් කිරීමට කටයුතු කරන බව දන්වා සිටියහ. ඒ අනුව මෙම වාර්තා දෙකම සලකා බැලීමෙන් අනතුරුව අවසන් වාර්තාවක් සකස් කර පාර්ලිමේන්තුවට ඉදිරිපත් කරන බව රජයේ මුදල් පිළිබඳ කාරක සභාවේ සභාපතිවරයා පැවසීය.
2026-06-09
මෝටර් රථ ප්රවාහන දෙපාර්තමේන්තුව සම්බන්ධයෙන් රජයේ ගිණුම් පිළිබඳ කාරක සභාව (COPA) විසින් සිදුකරන ලද විමර්ශනවල කරුණු ඇතුළත් වාර්තාව, නීතිපතිවරයාගේ නිරීක්ෂණ සහ අවශ්ය ඉදිරි කටයුතු සඳහා යොමු කිරීම සඳහා වූ යෝජනාවට පාර්ලිමේන්තුවේ අනුමැතිය අද දින (ජුනි 09) හිමි විය.මෙම වාර්තාව දසවැනි පාර්ලිමේන්තුවේ පළමුවැනි සභා වාරය තුළ 2025 මාර්තු 10 සහ 21 යන දිනවල මෝටර් රථ ප්රවාහන දෙපාර්තමේන්තුව සම්බන්ධයෙන් රජයේ ගිණුම් පිළිබඳ කාරක සභාව සිදු කළ විමර්ශනවල කරුණු ඇතුළත් වන අතර, එය 2025 ජූලි 25 දින ප්රකාශන මාලා අංක 243 යටතේ පාර්ලිමේන්තුවට ඉදිරිපත් කර තිබිණි.පාර්ලිමේන්තුවේ ස්ථාවර නියෝග අංක 119(4) හි විධිවිධාන ප්රකාරව අදාළ වාර්තාව මුදල් අමාත්යවරයාගේ සහ විෂය භාර අමාත්යවරයාගේ නිරීක්ෂණ සඳහා යොමු කර තිබූ අතර, එම අමාත්යවරුන්ගේ පිළිතුරු පාර්ලිමේන්තුවේ සභාගත කිරීමෙන් අනතුරුව 2026 මාර්තු 04 දින රජයේ ගිණුම් පිළිබඳ කාරක සභාව විසින් කරුණු යළි සලකා බලන ලදී.එහිදී මෝටර් රථ ප්රවාහන දෙපාර්තමේන්තුවේ සිදුව ඇතැයි අනාවරණය වූ මූල්යමය අක්රමිකතා සහ වංචා සම්බන්ධයෙන් කඩිනම් නීතිමය ක්රියාමාර්ග ගැනීමේ අවශ්යතාව අවධාරණය කරමින්, කාරක සභා වාර්තාව නීතිපතිවරයා වෙත යොමු කිරීම සඳහා පාර්ලිමේන්තුවේ අනුමැතිය ලබා ගැනීමට ඒකමතිකව තීරණය කෙරිණි.ඒ අනුව, “රජයේ ගිණුම් පිළිබඳ කාරක සභාව විසින් 2025 මාර්තු 10 සහ 21 දිනයන්හි මෝටර් රථ ප්රවාහන දෙපාර්තමේන්තුව පිළිබඳ සිදු කරන ලද විමර්ශන සම්බන්ධයෙන් කරුණු ඇතුළත්, 2025 ජූලි 25 දින පාර්ලිමේන්තුවේ සභාගත කරන ලද ප්රකාශන මාලා අංක 243 දරන වාර්තාව නීතිපතිවරයාගේ නිරීක්ෂණ සහ අවශ්ය කටයුතු සඳහා යොමු කළ යුතුය” යන යෝජනාව පාර්ලිමේන්තුව විසින් අද දින අනුමැතිය ලබාදෙන ලදී.පාර්ලිමේන්තුවට ඉදිරිපත් කළ කාරක සභා වාර්තාවක් මීට ඉහතදී මෙලෙස නීතිපතිවරයාගේ නිරීක්ෂණ සහ ඉදිරි නීතිමය කටයුතු සඳහා යොමු කර නොතිබූනු අතර, එවැනි ක්රියාමාර්ගයක් පාර්ලිමේන්තුව විසින් ගනු ලැබූ පළමු අවස්ථාව ද මෙය වෙයි.
2026-06-08
2018 අංක 35 දරන මුදල් පනත සංශෝධනය කිරීම සඳහා යෝජිත මුදල් (සංශෝධන) පනත් කෙටුම්පත රජයේ මුදල් පිළිබඳ කාරක සභාවේදී සලකා බලා අනුමත කෙරිණි.ගරු පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන් පසුගියදා පාර්ලිමේන්තුවේදී රැස්වූ මෙම කාරක සභාවට ගරු නියෝජ්ය අමාත්ය නිශාන්ත ජයවීර මහතා සහ ගරු පාර්ලිමේන්තු මන්ත්රීවරයන් වන රවී කරුණානායක, හර්ෂණ රාජකරුණා, නීතිඥ ලක්මාලි හේමචන්ද්ර සහ විජේසිරි බස්නායක යන මහත්ම මහත්මීහු සහභාගී වූහ.ශ්රී ලංකාවේ විදුලි සංදේශ ක්ෂේත්රයේ යටිතල පහසුකම් පුළුල් කිරීම සහ ඩිජිටල් සම්බන්ධතාවය ඉහළ නැංවීම ඉලක්ක කර ගනිමින් මෙම සංශෝධනය යෝජනා වී ඇත. 2026 අයවැය මගින් මුලින්ම ඉදිරිපත් කරන ලද මෙම යෝජනාව මගින් අලුතින් ඉදි කරන දූරකථන සන්නිවේදන කුළුණු සඳහා පනවා ඇති බද්දෙන් තාවකාලික සහනයක් ලබා දීම අපේක්ෂා කෙරේ. මෙම පනත් කෙටුම්පත 2026 අප්රේල් මස ගැසට් මගින් ප්රසිද්ධ කර ඇති අතර, 2026 ජනවාරි 01 වන දින හෝ ඊට පසුව හෝ ක්රියාත්මක වන නව සන්නිවේදන කුළුණු සඳහා වසර පහක බදු නිදහසක් ලබා දීම එහි ප්රධාන ප්රතිපාදනය වේ.එසේම 2011 අංක 21 දරන විදුලි සංදේශ බදු පනත සංශෝධනය කිරීම සඳහා වන පනත් කෙටුම්පත ද කාරක සභාවේ අවධානයට ලක් විය. වත්මන් බදු අනුපාතයන් නීත්යානුකූලව විධිමත් කිරීම හා යාවත්කාලීන කිරීම මෙන්ම, බදු ගෙවීම් පැහැර හරිනු ලැබූ අවස්ථාවල (Bad Debts) අනුගමනය කළ යුතු ක්රියාපටිපාටිය පැහැදිලි කිරීම සහ 2014 වසරේ සිට ක්රියාත්මක බදු අනුපාතයන් සම්බන්ධ ගැටලු නිරාකරණය කරමින් බදු පාලනය වඩාත් විනිවිදභාවයකින් සිදු කිරීම බව මෙහිදී නිලධාරීහු කාරක සභාවට පැහැදිලි කළහ.මෙහිදී බදු අනුපාතයන් විධිමත් කිරීම සහ නෛතික රාමුව ශක්තිමත් කිරීම සම්බන්ධ සංශෝධන සඳහා කාරක සභාවේ අනුමැතිය හිමි වූ අතර, නොගෙවූ බිල්පත් මත තිබෙන බදු ( Telecom Levy ) අඩු කිරීමේ අවසරය ලබාදීමට අදාළ යෝජනාව සඳහා අනුමැතිය හිමි නොවීය.එම යෝජනාව ඉදිරිපත් කරමින් නිලධාරීන් සඳහන් කළේ වත්මන් පනත යටතේ පාරිභෝගිකයන් විසින් ගෙවීම් පැහැර හරින අවස්ථාවලදී බදු ගණනය කිරීම සම්බන්ධ පැහැදිලි ප්රතිපාදන නොමැති බැවින්, නියමිත කාලසීමාවක් තුළ ක්රියාකරුවන්ට නොගෙවූ බිල්පත් මත තිබෙන බදු මුදල්වලින් අඩු කිරීමට අවසර ලබා දීමට යෝජනා කර ඇති බවයි.කෙසේ වෙතත්, සුළු ව්යාපාරිකයන්ට මෙවැනි සහන නොලැබෙන පසුබිමක, සීමිත විශාල සමාගම් පිරිසකට මෙම සහනය ලබා දීම අසාධාරණ බව කාරක සභාව අවධාරණය කරන ලදී. එක් ප්රධාන සමාගමක් 2022 වසරේ සිට මෙම බදු සහනය ඉල්ලා සිටින බවත්, එය සමස්ත වෙළඳපොළ සාධාරණත්වයට බාධාවක් විය හැකි බවත් කාරක සභාව විසින් පෙන්වා දෙන ලදී. පාරිභෝගිකයාගෙන් බදු අය කර ගැනීම සමාගම්වල වගකීමක් වන අතර ඔවුන්ගේ අපොහොසත් වීම රජයේ ආදායම අඩු කිරීමට හේතුවක් නොවිය යුතු බව ද කාරක සභා සභාපතිවරයා අවධාරණය කර සිටියේය. ඒ අනුව, නොගෙවූ බිල්පත් මත තිබෙන බදු අඩු කිරීමේ ප්රතිපාදනය සම්බන්ධයෙන් තවදුරටත් කරුණු පැහැදිලි කරගැනීම සඳහා එය ඉදිරි දිනයකදී නැවත සලකා බැලීමට කාරක සභාව තීරණය කෙරිණි.මේ අතර, මාර්ගගත සූදු ක්රියාකාරකම් සඳහා රජයේ ලාංඡනය අවභාවිත කිරීම සම්බන්ධයෙන් ද කාරක සභාවේ අවධානය යොමු විය. ශ්රී ලංකා රජයේ ලාංඡනය භාවිත කරමින් "Licensed" යනුවෙන් සඳහන් කර මාර්ගගත කැසිනෝ ප්රචාරණයන් සිදු කිරීම පිළිබඳව කාරක සභාව විමසූ අතර, අදාළ නිලධාරීන් සඳහන් කළේ මෙතෙක් කිසිදු මාර්ගගත සූදු ආයතනයකට බලපත්ර නිකුත් කර නොමැති බවයි.මෙම, සිද්ධිය සම්බන්ධයෙන් වහාම සොයා බලා කාරක සභාව දැනුවත් කිරීමට පියවර ගන්නා ලෙස අදාළ ආයතන වෙත උපදෙස් ලබා දීමට කාරක සභාව තීරණය කරන ලදී.තව ද මූල්ය, බදු සහ ආර්ථික ප්රතිපත්ති සම්බන්ධයෙන් නිකුත් කර ඇති ගැසට් නිවේදන හතරකට අදාළ නියෝග සලකා බැලූ අතර, ඒ සඳහා කාරක සභාවේ අනුමැතිය හිමිවිය.ඒ අනුව, ආනයනික භාණ්ඩ වර්ගීකරණය හා බදු අය කිරීම විධිමත් කිරීම සඳහා වරාය හා ගුවන් තොටුපළ සංවර්ධන බද්ද සහ නිෂ්පාදන බද්ද යටතේ සංයෝජිත වර්ගීකරණ සංකේතාංක (HS Codes) සඳහා නව ජාතික උපබෙදුම් හඳුන්වා දීම පිළිබඳ නියෝග සලකා බැලිණි.තව ද, දේශීය රෙදිපිළි කර්මාන්තය සඳහා සාධාරණ තරඟකාරී පරිසරයක් නිර්මාණය කිරීමේ අරමුණින් ආනයනික රෙදිපිළි මත පනවා තිබූ සෙස් බද්ද ඉවත් කොට 2026 අප්රේල් 01 දින සිට ක්රියාත්මක වන පරිදි 18%ක එකතු කළ අගය මත බද්දක් (VAT) පැනවීමට අදාළ නියෝග මෙහිදී සලකා බැලිණි. මෙම වෙනස්කම හේතුවෙන් ආනයන අවස්ථාවේදී ගෙවිය යුතු බදු ප්රමාණය ඉහළ ගිය ද, VAT බද්ද සඳහා ලියාපදිංචි වී ඇති ආයතනවලට එම බදු මුදල Credit ලෙස නැවත ලබා ගත හැකි බැවින්, ඔවුන්ට ඉන් සහනයක් සැලසෙන බව නිලධාරීන් විසින් පෙන්වා දෙන ලදී.එමෙන්ම, ස්වභාවික ආපදාවලින් පීඩාවට පත් ජනතාවට කඩිනමින් සහන සැලසීම උදෙසා, ආපදා සහන ගෙවීම් රිසිට්පත් මුද්දර ගාස්තුවෙන් නිදහස් කිරීමට අදාළ නියෝගය ද මෙහිදී සලකා බැලිණි.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
