පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
ප්රවේශ වී ඔබේ පාර්ලිමේන්තුව සමඟ සම්බන්ධ වන්න
2016-03-21
කථානායක ගරු කරු ජයසූරිය මහතාගේ ප්රධානත්වයෙන් යුත්, වාරිමාර්ග සහ ජල සම්පත් කළමනාකරණ රාජ්ය අමාත්ය ගරු වසන්ත සේනානායක, නගර සැලසුම්කරණ සහ ජල සම්පාදන රාජ්ය අමාත්ය ගරු (වෛද්ය) සුදර්ශනී ප්රනාන්දුපුල්ලේ, පාර්ලිමේන්තු මන්ත්රී ගරු කේ. කාදර් මස්තාන්, ගරු කවීන්දිරන් කෝදීස්වරන් සහ පාර්ලිමේන්තුවේ මහ ලේකම් ධම්මික දසනායක යන මහත්ම මහත්මීගේ සහභාගීත්වයෙන් යුතු ඉහළ පෙළේ නියෝජිත පිරිසක් 2016 මාර්තු මස 19 වැනි දින සිට 23 වැනි දින දක්වා සැම්බියා ජනරජයේ ලුසාකා නගරයේ පැවැත්වෙන අන්තර් පාර්ලිමේන්තු සංගමයේ 134 වැනි සම්මේලනයට සහභාගී වෙති.
අන්තර් පාර්ලිමේන්තු සංගමයේ පාර්ලිමේන්තු මන්ත්රීවරුන්ගේ මානව හිමිකම් පිළිබඳ කොමිසම විසින් පාර්ලිමේන්තු මන්ත්රීවරුන් විසින් ඉදිරිපත් කර ඇති පැමිණිලි සම්බන්ධයෙන් සිදු කරනු ලබන විමර්ශන පිළිබඳව තොරතුරු සපයාදීම පිණිස 2016 මාර්තු මස 18 වැනි දින පැවැත්වෙන එම සංගමයේ සැසියට සහභාගී වන ලෙස මෙම නියෝජිත පිරිසට එම සංගමය විසින් ආරාධන කර තිබේ. මේ වන විට හිටපු පාර්ලිමේන්තු මන්ත්රීවරුන් වන අභාවප්රාප්ත ගරු ජෝසප් පරරාජසිංහම්, ගරු නඩරාජා රවිරාජ්, ගරු ටී මහේෂ්වරන්, ගරු ඩී.එම්. දසනායක යන මහත්වරුන්ගේ ඝාතනයන් පිළිබව සහ පාර්ලිමේන්තු මන්ත්රී ගරු එස්. ශ්රීදරන් මහතා ඝාතනය කිරීමට ගත් උත්සාහය යන සිද්ධීන් සම්බන්ධයෙන් මෙම කොමිසම ඉදිරියේ විමර්ශන 05 ක් සිදු කෙරෙමින් පවතී.
බංග්ලාදේශය, ස්විට්සර්ලන්තය, බහරේන්, එක්සත් රාජධානිය, ජර්මනිය, සෙනගාලය, ඇෆ්ගනිස්ථානය, චිලී සහ කොන්ගෝ ප්රජාතාන්ත්රික ජනරජය යන රටවල සාමාජිකයින්ගෙන් සමන්විත වන අන්තර් පාර්ලිමේන්තු සංගමයේ පාර්ලිමේන්තු මන්ත්රීවරුන්ගේ මානව හිමිකම් පිළිබඳ කොමිසම විසන් ආරම්භයේදීම ශ්රී ලංකා නියෝජිත පිරිස එම කොමිසම වෙනුවෙන් ඉතා උණුසුම් ලෙස පිළිගන්නා ලදී. අන්තර් පාර්ලිමේන්තු සංගමයේ පාර්ලිමේන්තු මන්ත්රීවරුන්ගේ මානව හිමිකම් පිළිබඳ කොමිසමෙහි සභාපති ගරු ඒ.බී.එම්. ෆාස්ලේ කරීම් චවුඩ්හරි මහතා එකී පැමිණිලි සම්බන්ධයෙන් කොමිසම විසින් සිදුකරගෙන යනු ලබන විමර්ශනවලට ශ්රී ලංකා පාර්ලිමේන්තුව විසින් ලබාදෙන සහයෝගය සහ අනුග්රහය පිළිබඳව නියෝජිත පිරිසට ස්තුතිය පළ කළේය.
එකී සිදුවීම්වලට අදාළ වර්තමාන තත්ත්වය සහ ඒ සම්බන්ධයෙන් අත්කරගෙන ඇති ප්රගතිය පිළිබඳව කොමිසම වෙත පැහැදිලි කිරීමක් සිදු කළ කථානායක ගරු කරු ජයසූරිය මහතා, එම සිද්ධීන්ගෙන් බොහොමයක් මේ වන විට අධිකරණ ඉදිරියේ විභාග වෙමින් පවතින බවත්, ඒ සම්බන්ධයෙන් අඛණ්ඩව කටයුතු සිදු කෙරෙමින් පවතින බවත් පැවසීය. එම නඩුවලට අදාළ තීන්දු ලැබුණු වහාම එම තීන්දු පිළිබඳව කොමිසම දැනුවත් කරන ලෙසට ඉල්ලා සිටි කොමිසම, හැකි ඉක්මනින් ඒ සම්බන්ධයෙන් අවසන් නිගමනයකට එළඹෙනු දැකීම සිය අපේක්ෂාව බව ද සඳහන් කළේය.
මානව හිමිකම් ආරක්ෂා කිරීම කෙරෙහි සුභවාදී ප්රතිඵල ගෙන දිය හැකි ක්රියාමාර්ග වන, ආණ්ඩුක්රම ව්යවස්ථාවේ 19 වැනි සංශෝධනය යටතේ ස්වාධීන කොමිෂන් සභා ස්ථාපිත කිරීම සහ පාර්ලිමේන්තු කාරක සභා ක්රමය ශක්තිමත් කිරීම යන කටයුතුවල ප්රගතිය පිළිබඳව ද කොමිසම ගරු කථානායකතුමාගෙන් විමසා සිටියේය. වර්තමානයේ එම කොමිෂන් සභා මනා ලෙස ක්රියාත්මක කිරීම සම්බන්ධයෙන් අවශ්ය කරන පියවර මේ වනවිටත් ගෙන ඇති බව කොමිසම වෙත පැහැදිලි කළ කථානායකතුමා, ජනතාවගේ ප්රජාතන්ත්රවාදී අයිතීන් තවදුරටත් ශක්තිමත් කිරීම පිණිස මෙරට සඳහා නව ආණ්ඩුක්රම ව්යවස්ථාවක් සකස් කර ගනු වස් ආණ්ඩුක්රම ව්යවස්ථා මණ්ඩලයක් පිහිටුවීම සඳහා වන යෝජනාවක් 2016 මාර්තු මස 09 වැනි දින පාර්ලිමේන්තුව විසින් සම්මත කර ගෙන ඇති බව ද කොමිසම වෙත පැහැදිලි කළේය.
2026-11-21
අයවැය කාල සීමාව තුළ පනත් කෙටුම්පත් ත්රිත්වයක දෙවැනිවර කියවීමේ විවාදයන් පැවැත්වීමට ඊයේ (නොවැ. 20) කථානායක වෛද්ය ජගත් වික්රමරත්න මහතාගේ සභාපතීත්වයෙන් රැස්වූ පාර්ලිමේන්තු කටයුතු පිළිබඳ කාරක සභාවේ දී තීරණය වූ බව පාර්ලිමේන්තුවේ මහ ලේකම් කුෂානි රෝහණදීර මහත්මිය පැවසුවාය.ඒ අනුව, නොවැම්බර් 23 සඳුදා, පෙ.ව. 11.00 සිට ප.ව. 6.00 දක්වා විදේශ කටයුතු, විදේශ රැකියා සහ සංචාරක අමාත්යාංශයේ වැය ශීර්ෂය විවාදයට ගැනීමෙන් අනතුරුව, ප.ව. 6.00 සිට ප.ව. 6.30 දක්වා විදේශීය ත්රස්තවාදී සටන්කරුවන් වැළැක්වීමේ පනත් කෙටුම්පත දෙවැනිවර කියවීමේ විවාදය පැවැත්වීමට මෙහිදී තීරණය වී තිබේ. තවද, දෙසැම්බර් 05 සෙනසුරාදා, පෙ.ව. 11.00 සිට ප.ව. 6.00 දක්වා තරුණ කටයුතු සහ ක්රීඩා අමාත්යාංශයේ සහ කාන්තා සහ ළමා කටයුතු අමාත්යාංශයේ වැය ශීර්ෂ විවාදයට ගැනීමෙන් අනතුරුව, ප.ව. 6.00 සිට ප.ව. 9.00 දක්වා ශ්රී ලංකා ක්රිකට් පනත් කෙටුම්පත විවාදයට ගැනීමටත් (දෙවැනිවර කියවීම) නියමිතව ඇත.එසේම, දෙසැම්බර් 07 සඳුදා, පෙ.ව. 11.00 සිට ප.ව. 6.00 දක්වා රාජ්ය පරිපාලන, පළාත් සභා සහ පළාත් පාලන අමාත්යාංශයේ සහ කම්කරු අමාත්යාංශයේ වැය ශීර්ෂ විවාදයට ගැනීමෙන් අනතුරුව ප.ව. 6.00 සිට ප.ව. 6.30 දක්වා ජලභීතිකා රෝගය තුරන් කිරීමේ සහ සුනඛයන් ලියාපදිංචි කිරීමේ පනත් කෙටුම්පතට අදාළ කාරක සභා අවස්ථාව සහ තෙවැනිවර කියවීම පැවැත්වීමටත් මෙහිදී තීරණය වී තිබේ. (මෙම පනත් කෙටුම්පත 2026 ඔක්තෝබර් 23 දින දෙවැනිවර කියවීමේ විවාදය පවත්වා කල් තබා ඇත) ඒ අනුව ඉහත දිනයන්හි සභාව කල් තබන අවස්ථාවේ යෝජනා විවාදයට නොගැනේ.මේ අතර, පාර්ලිමේන්තු විශේෂ කාරක සභා පත් කිරීමට අදාළ යෝජනා ත්රිත්වයකට ද පාර්ලිමේන්තු කටයුතු පිළිබඳ කාරක සභාවේ අනුමතිය හිමි වී තිබේ. ඒ අනුව, කොවිඩ්-19 වසංගතය හේතුවෙන් ශ්රී ලංකාවේ දී මියගිය පුද්ගලයන්ගේ මෘත දේහයන් බැහැර කිරීමේදී නිර්දේශිත ප්රමිතීන් සහ ආරක්ෂිත ක්රියාපටිපාටීන්, සංස්කෘතික වටිනාකම් සහ ආගමික නිදහස උල්ලංඝනය කරමින් කටයුතු කර ඇති බවට එල්ල වී ඇති චෝදනා ඇතුළු ඒ සම්බන්ධ කරුණු පිළිබඳව විමර්ශනය කර පාර්ලිමේන්තුවට වාර්තා කිරීම සඳහා වන පාර්ලිමේන්තු විශේෂ කාරක සභාවක් පත් කිරීම, ස්වාධීන තරුණ කොමිෂන් සභාවක් පිහිටුවීම සම්බන්ධයෙන් කරුණු සලකා බලා නිර්දේශ ඉදිරිපත් කිරීම සඳහා පාර්ලිමේන්තුවේ විශේෂ කාරක සභාවක් පත් කිරීම සහ කාවන්තිස්ස ඇතාගේ මරණය, ඊට අදාළ බලධාරීන්ගේ ක්රියාකලාපය සහ වනජීවී ආරක්ෂණ නීති ක්රියාත්මක කිරීම පරීක්ෂා කර බැලීම, එවැනි සිද්ධියක් නැවත සිදුවීම වළක්වා ගැනීම උදෙසා නිර්දේශ ඉදිරිපත් කිරීමට විශේෂ කාරක සභාවක් පත් කිරීම සඳහා වන යෝජනා ත්රිත්වයට පාර්ලිමේන්තු කටයුතු පිළිබඳ කාරක සභාවේ අනුමතිය හිමිව ඇත.
2026-11-20
2027 වසර සඳහා වන විසර්ජන පනත් කෙටුම්පත දෙවැනිවර කියවීම වැඩි ඡන්ද 97 කින් පාර්ලිමේන්තුවේ දී අද (නොවැ. 20) සම්මත විය. අද ප.ව. 6.50 ට පමණ දෙවැනිවර කියවීමේ ඡන්ද විමසීම පැවැත්වූ අතර එහිදී අයවැයට පක්ෂව ඡන්ද 157 ක් ද විරුද්ධව ඡන්ද 60ක් ද හිමිය. 2027 වසර සදහා වන විසර්ජන පනත් කෙටුම්පත දෙවැනිවර කියවීම හෙවත් ‘අයවැය කථාව’ මුදල් අමාත්යවරයා ලෙස ගරු ජනාධිපති අනුර කුමාර දිසානායක මහතා පසුගිය 12 වැනිදා පාර්ලිමේන්තුවට ඉදිරිපත් කළේය. අනතුරුව නොවැම්බර් 13 සිට අද (20) දක්වා, දින 7 ක් විසර්ජන පනත් කෙටුම්පත (අයවැය) දෙවැනිවර කියවීමේ විවාදය පැවැත්විණි.කාරක සභා අවස්ථා විවාදය නොවැම්බර් 21 සිට දෙසැම්බර් 14 වැනිදා දක්වා දින 19 ක් පැවැත්වේ. මේ අනුව, 2027 මූල්ය වර්ෂය සදහා වන අයවැය තෙවනවර කියවීමේ ඡන්ද විමසීම දෙසැම්බර් 14 වැනිදා ප.ව. 6.00 ට පැවැත්වීමට නියමිතය.
2026-11-20
වැව් රක්ෂිතයේ පාමුල හෝ ආරක්ෂිත කලාපය තුළ හෝ අනවසරෙන් ඉදිකර ඇති ව්යාපාරික ස්ථාන සහ පදිංචි ස්ථාන 2196 න් 1417 ක් වාරිමාර්ග දෙපාර්තමේන්තුව යටතේ ඇති වැව් ආශ්රිතවත්, ඉතිරි 779 ශ්රී ලංකා මහවැලි අධිකාරිය යටතේ ඇති වැව් ආශ්රිතවත් සිදු වී ඇති බවත් ඉඩම් සහ වාරිමාර්ග ගරු නියෝජ්ය අමාත්ය අරවින්ද සෙනරත් මහතා පැවසීය. ගරු පාර්ලිමේන්තු මන්ත්රී සුරංග රත්නායක මහතා වාචික පිළිතුරු අපේක්ෂාවෙන් යොමු කළ ප්රශ්නවලට පාර්ලිමේන්තුවේ දී පිළිතුරු ලබා දෙමින් නියෝජ්ය අමාත්යවරයා මේ බව සඳහන් කළේය.වාරිමාර්ග දෙපාර්තමේන්තුව යටතේ ඇති වැව් ආශ්රිත අනවසර ඉදිකිරීම් 102 ක් 2022 සිට මේ දක්වා ඉවත් කර ඇති බවත්, ශ්රී ලංකා මහවැලි අධිකාරිය යටතේ ඇති වැව් ආශ්රිතව ඉදිකිරීම් 779 ක් තවදුරටත් ඉවත් කිරීමට ඇති බවත් නියෝජ්ය අමාත්යවරයා කීවේය.වාරිමාර්ග දෙපාර්තමේන්තුව යටතේ ලියාපදිංචි වී ඇති වැව් 700 ක් ඇති බවත්, ශ්රී ලංකා මහවැලි අධිකාරිය යටතේ ලියාපදිංචි වී ඇති වැව් 483 ක් ඇති බවත් පෙන්වාදුන් නියෝජ්ය අමාත්යවරයා අනවසර ඉදිකිරීම් ඉවත් කර වැව් රක්ෂිත ප්රදේශ නීත්යානුකූලව සංරක්ෂණය කිරීම සඳහා වාරිමාර්ග දෙපාර්තමේන්තුව සහ ශ්රී ලංකා මහවැලි අධිකාරිය ක්රියාමාර්ග ගෙන ඇති බව ද වැඩිදුරටත් ප්රකාශ කළේය.
2026-11-20
පුරාවිද්යා දෙපාර්තමේන්තුව විසින් මොණරාගල දිස්ත්රික්කය තුළ සංරක්ෂණය කර ඇති ස්ථාන අතරින් දේශීය සහ විදේශීය සංචාරකයින් සඳහා නැරඹීමට ස්ථාන 05 ක් විවෘත කර ඇති බවත්, බුදුරුවගල, මාලිගාවිල, යුධගනාව සහ ගලබැද්ද පුරාවිද්යා ස්ථාන මෙන්ම දෙමටමල් විහාරය මෙලෙස විවෘතව පවතින බවත් බුද්ධශාසන, ආගමික සහ සංස්කෘතික කටයුතු ගරු අමාත්ය ආචාර්ය හිනිදුම සුනිල් සෙනෙවි මහතා පැවසීය.ගරු පාර්ලිමේන්තු මන්ත්රී නීතිඥ සරත් කුමාර මහතා වාචික පිළිතුරු අපේක්ෂාවෙන් ඉදිරිපත් කළ ප්රශ්නවලට පිළිතුරු ලබා දෙමින් අමාත්යවරයා මේ බව ප්රකාශ කළේය. මොණරාගල දිස්ත්රික්කය තුළ පිහිටා ඇති මේ වන විට ලියාපදිංචි කර ඇති පුරාවිද්යා ස්ථාන සංඛ්යාව 137 ක් බව ද ඒවා ගලබැද්ද, මාලිගාවිල, බුදුරුවගල සහ බිබිල යන පුරාවිද්යා කලාප 04 කට අයත් වන බව ද අමාත්යවරයා කිවේය. මෙම කලාපවලට අයත් භුමි ප්රමාණය විග්රහ කළ අමාත්යවරයා, ගලබැද්ද කලාපයට වර්ග කිලෝමීටර 2000.1 ක්, මාලිගාවිල කලාපයට වර්ග කිලෝමීටර 1199.2 ක්, බුදුරුවගල කලාපයට 1426.2 ක් සහ බිබිල කලාපයට 713.1 ක් අයත් බව ද සඳහන් කළේය.නැරඹීමට පැමිණෙන දේශීය හා විදේශීය සංචාරකයින් සඳහා බුදුරුවගල පුරාවිද්යා ස්ථානයට මධ්යම සංස්කෘතික අරමුදල මඟින් ද, යුධගනාව පුරාවිද්යා ස්ථානයට විහාරස්ථානය මඟින් ද, දෙමටමල් විහාරයට විහාරස්ථානය මඟින් ද සනීපාරක්ෂක පහසුකම් සහ අනෙකුත් යටිතල පහසුකම් ප්රමාණවත් පරිදි සපයා තිබෙන බවත්, මාලිගාවිල පුරාවිද්යා ස්ථානයේ සහ ගලබැද්ද පුරාවිද්යා ස්ථානයේ ඇති යටිතල පහසුකම් තවදුරටත් දියුණු කළ යුතු බවත් අමාත්යවරයා වැඩිදුරටත් පෙන්වා දුන්නේය.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks


