3044/’12
ගරු අකිල විරාජ් කාරියවසම් මහතා,— වැවිලි කර්මාන්ත අමාත්යතුමාගෙන් ඇසීමට,—
(අ) කළුතර දිස්ත්රික්කයේ මතුගම, අගලවත්ත සහ බුලත්සිංහල යන ප්රදේශවල පෞද්ගලීකරණය කළ රාජ්ය අංශයේ වතුවල කම්කරු ජනතාවගේ සනීපාරක්ෂක කටයුතු වෙනුවෙන් වෙන් කළ මුදල් එම වතු සමාගම් විසින් කපාහැර ඇති බැවින් එම කම්කරු ජනතාව දැඩි සෞඛ්යමය ගැටලුවලට මුහුණ පා ඇති බව එතුමා දන්නෙහිද?
(ආ) (i) ඉහත සඳහන් ප්රදේශවල ජීවත් වන වතු කම්කරු පවුල් සංඛ්යාව කොපමණද;
(ii) එම වතු කම්කරු ජනතාවට ලබා දී ඇති සෞඛ්ය පහසුකම් කවරේද;
(iii) එම වතු කම්කරු ප්රජාව තුළ මේ වන විට පවතින ළමා හා මාතෘ මරණ, බෝනොවන රෝග වැළඳීම්, අනිසි ගැබ් ගැනීම් සහ මන්දපෝෂණයට අදාළ සංඛ්යාත්මක දත්ත කවරේද;
(iv) එම ප්රදේශවලට අවශ්ය සනීපාරක්ෂක හා සෞඛ්ය පහසුකම් කඩිනමින් ලබාදීමට කටයුතු කරන්නේද;
යන්න එතුමා සඳහන් කරන්නෙහිද?
(ඇ) නොඑසේ නම්, ඒ මන්ද?
අසන ලද දිනය
2013-06-19
අසන ලද්දේ
ගරු අකිල විරාජ් කාරියවසම් මහතා, පා.ම.
අමාත්යාංශය
වැවිලි කර්මාන්ත
ව්යවස්ථාදායකය
ශ්රී ලංකා ප්රජාතාන්ත්රික සමාජවාදී ජනරජයේ හත්වැනි පාර්ලිමේන්තුව
සභාවාරය
1 වැනි සභාවාරය
(අ) එවැනි මුදල් කපා හැරීමක් සිදු කර නොමැති බව මතුගම, අගලවත්ත සහ බුලත්සිංහල ප්රදේශවල ක්රියාත්මක වැවිලි සමාගම් වාර්තා කර ඇත.
එම වැවිලි සමාගම් මතුගම, අගලවත්ත හා බුලත්සිංහල යන ප්රදේශවල කම්කරු ජනතාවගේ සුබසාධන කටයුතු වෙනුවෙන් පසු ගිය වසරවල මුදල් වියදම් කර ඇති ආකාරය පහත පරිදි වේ.
වර්ෂය වියදම් කර ඇති මුදල
2011 රුපියල් 3,110,086.00
2012 රුපියල් 9,891,894.00
2013 රුපියල් 8,503,025.00 (ජුනි 30 දක්වා)
2014 අපේක්ෂිත රුපියල් 25,679,741.00
(ආ) (i) මතුගම - පවුල් 3518
අගලවත්ත - පවුල් 1309
බුලත්සිංහල - පවුල් 5099
(ii) සෞඛ්ය දෙපාර්තමේන්තුව හා පළාත් සෞඛ්ය ආයතන විසින් රටෙහි සෙසු ප්රදේශ වෙත ලබා දෙනු ලබන සෞඛ්ය පහසුකම් සියල්ල වතු කම්කරු ජනතාව වෙත ද ලබා දී ඇත.
ඊට අමතරව පහත සඳහන් පහසුකම් ලබා දී ඇත.
* වතු සෞඛ්ය මධ්යස්ථාන හා වතු රෝහල් මගින් සෞඛ්ය පහසුකම් ලබා දීම.
* වතුවල බෙහෙත් ශාලා හා වෛද්ය සායන පැවැත්වීම. අවශ්ය බෙහෙත් වර්ග වැවිලි මානව සංවර්ධන භාරය හා රජය විසින් සපයා දී ඇත.
* වැවිලි මානව සංවර්ධන භාරය හා වැවිලි ක්ෂේත්රය සඳහා ක්රියාත්මක වූ වැවිලි සංවර්ධන ව්යාපෘතිය මගින් වැසිකිළි හා අනෙකුත් සනීපාරක්ෂක පහසුකම් ලබා දීම.
* පවුල් සෞඛ්ය සේවිකා, පවුල් සුබ සාධන නිලධාරි, වතු සෞඛ්ය නිලධාරි හා ළමා උයන් පාලිකා යන නිලධාරින්ගේ සේවය වතු කම්කරු ජනතාව වෙත සපයා දීම.
* පෙර පසල් දරුවන්ට පෝෂ්යදායී ආහාර ලබා දීම හා පාසල් දරුවන්ට දිවා ආහාරය ලබා දීම.
* වතු කම්කරුවන් සඳහා ගිලන්රථ සේවා පහසුකම් ලබා දීම.
* කලුතර ප්රාදේශීය සෞඛ්ය සේවා අධ්යක්ෂ හා වැවිලි මානව සංවර්ධන භාරයේ ගාල්ල ප්රාදේශීය අධ්යක්ෂ යන අයගේ මඟ පෙන්වීම යටතේ පවුල් සැලසුම්, මුඛ පිළිකා හඳුනා ගැනීම, ඇස් පරීක්ෂාව, ඩෙංගු, උණසන්නිපාතය හා ඒඩ්ස් රෝගය හඳුනා ගැනීම සම්බන්ධයෙන් වතු සේවකයන් දැනුවත් කිරීම.
වැවිලි මානව සංවර්ධන භාරය විසින් සපයා ඇති දත්ත අනුව මේ වන විට මෙම ප්රදේශ සදහා ලබා දී ඇති සෞඛ්ය හා සනීපාරක්ෂක පහසුකම්.
|
කොට්ඨාසය |
වැසිකිලි පහසුකම් |
ජල පහසුකම් |
පවතින බෙහෙත්ශාලා ගණන (Dispensaries) |
||
|
|
තනි |
පොදු |
තනි |
පොදු |
|
|
මතුගම |
1150 |
433 |
316 |
1743 |
06 |
|
අගලවත්ත |
309 |
234 |
27 |
726 |
02 |
|
බුලත්සිංහල |
1661 |
257 |
389 |
1497 |
06 |
(iii) මතුගම, අගලවත්ත සහ බුලත්සිංහල යන ප්රදේශවල ක්රියාත්මක වැවිලි සමාගම්හි 2012 වසරේ දත්ත අනුව,
• ළමා හා මාතෘ මරණ - 01
• අනිසි ගැබ් ගැනීම් - 33
• මන්ද පෝෂණ තත්ත්වයන් - 40
• බෝ නොවන රෝග සම්බන්ධයෙන් වූ දත්තයන් වාර්තා වී නොමැත.
(iv) සාමාන්ය පරිදි සෞඛ්ය දෙපාර්තමේන්තුව හා පළාත් සෞඛ්ය ආයතන මඟින් රටෙහි සෙසු ප්රදේශ වෙත ලබා දෙනු ලබන සෞඛ්ය පහසුකම් සියල්ල වතු කම්කරු ජනතාව වෙතද ලබා දෙන අතර, මෙයට අමතරව වැවිලි සංවර්ධන මානව භාරය විසින් හා වතු සමාගම් මඟින් සපයනු ලබන පහසුකම්ද නොකඩවා පවත්වාගෙන යනු ලැබේ.
වතු සේවකයන් හට සෞඛ්ය හා අනෙකුත් සනීපාරක්ෂක පහසුකම් සැපයීම සම්බන්ධයෙන් වැඩි අවධානයක් යොමු කරන ලෙස සියලු වැවිලි සමාගම් සමඟ පවත්වනු ලබන ස්වර්ණමය කොටස් හිමිකරුවන්ගේ රැස්වීමේදී උපදෙස් ලබා දී ඇත.
අඩු පාඩු පවතින්නේ නම් ඒ පිළිබඳව සොයා බලා පහසුකම් සැපයීමට පියවර ගනු ලැබේ.
(ඇ) වතු සේවකයන් හට සනීපාරක්ෂක හා සෞඛ්ය පහසුකම් ලබා දීමට දිගින් දිගටම කටයුතු කර ඇති බැවින් අදාළ නොවේ.
පිළිතුරු දුන් දිනය
2013-10-02
විසින් පිළිතුරු දෙන ලදී
ගරු මහින්ද සමරසිංහ මහතා, පා.ම.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
