2853/’12
ගරු අජිත් පී. පෙරේරා මහතා,— විදුලිබල හා බලශක්ති අමාත්යතුමාගෙන් ඇසීමට,—
(අ) ඉන්දියාවේ, තමිල්නාඩු ප්රාන්තයේ, කන්යාකුමාරි දිස්ත්රික්කයේ, කූඩන්කුලම් න්යෂ්ටික විදුලි බලාගාරය (Kudankulam Nuclear Power Plant) නම් ව්යාපෘතියක් ක්රියාත්මක වන බව එතුමා දන්නෙහිද?
(ආ) (i) එම න්යෂ්ටික විදුලි බලාගාරයේ ධාරිතාවය කොපමණද;
(ii) එහි සිට ශ්රී ලංකාවේ මුහුදු සීමාවට ඇති දුර ප්රමාණය කොපමණද;
(iii) එය පිහිටි ස්ථානයේ සිට ශ්රී ලංකාවට ඇති දුර ප්රමාණය කොපමණද;
(iv) එහි ස්ථාන තක්සේරු වාර්තාව (Site Evaluation Study Report) ශ්රී ලංකා රජයට ලැබී තිබේද;
(v) එහි ආරක්ෂක විශ්ලේෂණ වාර්තාව (Safety Analysis Report) ශ්රී ලංකා රජයට ලැබී තිබේද;
(vi) ඉහත වාර්තා සභාගත කරන්නේද;
යන්න එතුමා සඳහන් කරන්නෙහිද?
(ඇ) (i) ඉහත සඳහන් විදුලි බලාගාරය හේතුවෙන් ශ්රී ලංකාවේ පරිසරයට සිදුවිය හැකි බලපෑම පිළිබඳ ශ්රී ලංකා රජය මේ වන විට සිදුකර ඇති අධ්යයනයන් කවරේද;
(ii) එම අධ්යයනයන්හි වාර්තා සභාගත කරන්නේද;
(iii) ඉහත කී න්යෂ්ටික විදුලි බලාගාරය හේතුවෙන් ශ්රී ලංකාවේ පරිසරයට සිදුවන හානි වැළැක්වීම සඳහා ශ්රී ලංකාවේ රජය විසින් ගෙන ඇති පියවර කවරේද;
යන්න එතුමා මෙම සභාවට දන්වන්නෙහිද?
(ඈ) නොඑසේ නම්, ඒ මන්ද?
අසන ලද දිනය
2012-10-25
අසන ලද්දේ
ගරු අජිත් පී. පෙරේරා මහතා, පා.ම.
අමාත්යාංශය
විදුලිබල හා බලශක්ති
ව්යවස්ථාදායකය
ශ්රී ලංකා ප්රජාතාන්ත්රික සමාජවාදී ජනරජයේ හත්වැනි පාර්ලිමේන්තුව
සභාවාරය
1 වැනි සභාවාරය
ගරු පාඨලී චම්පික රණවක මහතා (විදුලිබල හා බලශක්ති අමාත්යතුමා)
(மாண்புமிகு பாட்டளி சம்பிக ரணவக்க - மின்வலு, எரிசக்தி அமைச்சர்)
(The Hon. Patali Champika Ranawaka - Minister of Power and Energy)
ගරු නියෝජ්ය කථානායකතුමනි, මා මුලින්ම ස්තුතිවන්ත වනවා, අපේ ගරු අජිත් පී. පෙරේරා මන්ත්රීතුමාට මෙම ප්රශ්නය ඇසීම ගැන. මොකද, මේ පිළිබඳව විවිධ ආකාරයෙන් විවිධ ජනමාධ්යවල පළ වූ නිසා ඒ සම්බන්ධයෙන් පැහැදිලි කිරීමට මා එතුමාගෙන් පොඩි වේලාවක් ඉල්ලා සිටිනවා. ඇතැම් මාධ්ය හා පුද්ගලයින් මා ප්රකාශ කළේ යැයි සඳහන් කරමින්, ඇතැම් විට ඉන්දියාවේ හෝ විදේශ මාධ්ය උපුටා ගනිමින් කුඩන්කුලම් බලාගාරයෙන් කිසිදු අනතුරක් සිදු නොවන්නේ යැයි වාර්තා කර තිබෙනවා. ඒ වාගේම තවත් මාධ්ය හා පුද්ගලයින් මා ප්රකාශ කළේ යැයි සඳහන් කරමින් ඇතැම් විට ඉන්දීය හෝ විදේශීය මාධ්ය උපුටා ගනිමින් එකී බලාගාරයෙන් ලක්ෂ 15ක පමණ ශ්රී ලාංකික ජනතාවගේ ජීවිත අනතුරේ හෙළා ඇති බව ප්රකාශ කර තිබෙනවා.
මෙහිදී මා ප්රකාශ කරන්න ඕනෑ, න්යෂ්ටික බලාගාරයක ආරක්ෂාව පිළිබඳව ඕනෑම රටක් අනිවාර්යෙන්ම සියයට 100ක සහතිකයක් ලබා දෙන බවත්, ඒවා අන්තර්ජාතික වශයෙනුත් නිරීක්ෂණය වන බවත්. එසේ වුණත් න්යෂ්ටික අනතුරු හෝ විකිරණ කාන්දු වීම් පිළිබඳව, ඒවා කිසි දා කිසිම ආකාරයකින් සිදු නොවනවාය කියලා මා හට හෝ වෙනත් කිසිම අයකුට ප්රකාශ කරන්න බැහැ. කළ හැකි එකම දේ, මෙවැන්නක් ඇති වීම වැළැක්වීමත්, ඒ වාගේම එවැන්නක් ඇති වුණොත් ක්රියාත්මක කිරීම සඳහා පිළියම් යෙදීමත් පමණයි.
ගරු නියෝජ්ය කථානායකතුමනි, අද ලෝකය ගත්තොත් න්යෂ්ටික ප්රතිකාරක - nuclear reactors - 454ක් රටවල් 36ක තිබෙනවා. ඉන්දියාවේ දැනට බලාගාර 8ක ප්රතිකාරක 20ක් ක්රියාත්මක කර තිබෙනවා. තවත් 4ක් ඉදි කරමින් තිබෙනවා. තවත් 10ක් සැලසුම් කර තිබෙනවා. ඒ වාගේම තවත් ප්රතිකාරක 15ක් යෝජනා කර තිබෙනවා. පළමු න්යෂ්ටික ප්රතිකාරකය ඉන්දියාවේ ක්රියාත්මක වෙලා තිබෙන්නේ 1969 ඔක්තෝබර් මාසයේ 28වන දායි.
දැන් මා මන්ත්රීතුමාගේ ප්රශ්නයට පිළිතුර දෙන්නම්.
(අ) ඔව්. මෙම ව්යාපෘතිය ක්රියාත්මක කෙරෙනුයේ ඉන්දියාවේ තමිල්නාඩු ප්රාන්තයේ තිරුනෙල්වේලි දිස්ත්රික්කයේයි. එතුමා කියා තිබෙන දිස්ත්රික්කයේ නොවෙයි තිබෙන්නේ තිරුනෙල්වේලි දිස්ත්රික්කයේයි.
(ආ) (i) දැනට මෙගා වොට් 2,000යි. ඉදිරියේදී මෙගා වොට් 6,000 දක්වා වැඩි කරන්න අවශ්ය පියවර ගන්නවා.
(ii) කිලෝමීටර් 100ක් පමණ.
(iii) කල්පිටියට කිලෝමීටර් 220ක් පමණ දුරින්. (කෙටිම දුර)
(iv) නැත.
(v) නැත.
(vi) ඉහත (iv) හා (v) අනුව පැන නොනඟී.
(ඇ) (i) මෙම විදුලි බලාගාරයට සෘජුව අදාළ නොවූවද, අන්තර් ජාතික පරමාණුක බලශක්ති ආයතනය මඟින් නිකුත් කර ඇති විකිරණශීලී හදිසි අවස්ථාවලට සූදානම් වීම හා සැලසුම් සකස් කිරීමේ නිර්ණායක සහිත වාර්තාවේ දත්ත මත පදනම්ව පරමාණුක බලශක්ති අධිකාරිය විසින් පරිසරය කෙරෙහි ඇති විය හැකි බලපෑම් තක්සේරු කර ඇති අතර අදාළ වාර්තාව සමාලෝචනය කෙරෙමින් පවතී.
(ii) නැත. ඉහත දැක් වූ පරිදි වාර්තාව සමාලෝචන අවස්ථාවේ පවතී.
(iii) න්යෂ්ටික විදුලි බලාගාරයක හදිසි අනතුරක් ඇති වීමක් සිදු වීමේ හැකියාව ඉතා විරලය. එවැනි හදිසි අනතුරක් ඇති වුවහොත් එය අන්තර් ජාතික පරමාණුක බලශක්ති ආයතනය විසින් නිර්දේශ කර ඇති විද්යාත්මක ප්රවේශයක් වන විකිරණශීලී ආපදා කළමනාකරණ සැලසුම්කරණයක් තුළින් කළමනාකරණය කර ගත හැකිය. පරමාණුක බලශක්ති අධිකාරිය මේ වන විටත් විකිරණශීලී ආපදා කළමනාකරණ වැඩසටහනක් සකස් කර ඇත. ඒ අනුව, පහත සඳහන් පියවර ගෙන ඇත.
1. න්යෂ්ටික ආපදා පිළිබඳ පූර්ව අනතුරු හැඟවීමේ පද්ධතියක් ස්ථාපිත කිරීම.
2. ආපදා කළමනාකරණ අමාත්යාංශය හා එක්ව විකිරණශීලී ආපදා සැලැස්මක් කෙටුම්පත් කර අවශ්ය මානව සම්පත් බඳවා ගැනීමට කටයුතු කිරීම.
3. විමර්ශන උපකරණ වැනි භෞතික සම්පත් ශක්තිමත් කිරීම පිණිස අය වැය ඇස්තමේන්තු හරහා අරමුදල් ලබා ගැනීමට කටයුතු කිරීම.
4. ද්විපාර්ශ්වික සහයෝගිතාව ලබා ගැනීම සම්බන්ධයෙන් ඉන්දියානු රජය සමඟ සාකච්ඡා සිදු කිරීම.
5. පරමාණුක බලශක්ති අධිකාරියද මේ වන විට ජාතික විකිරණශීලී ආපදා කළමනාකරණය පිළිබඳ ජාතික මධ්යස්ථානයක් පිහිටුවා වසර කිහිපයකින් අංග සම්පූර්ණ ආයතනයක් ලෙසට සංවර්ධනය කිරීම සඳහා වන ව්යාපෘති යෝජනාවක් සකස් කර ඇති අතර එම යෝජනාව අමාත්ය මණ්ඩලයේ අනුමැතිය සඳහා ඉදිරිපත් කිරීමට නියමිතය.
(ඈ) පැන නොනඟී.
පිළිතුරු දුන් දිනය
2012-10-25
විසින් පිළිතුරු දෙන ලදී
ගරු පාඨලී චම්පික රණවක මහතා, පා.ම.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
