490/2025
ගරු සුනිල් රත්නසිරි මහතා,— රාජ්ය පරිපාලන, පළාත් සභා සහ පළාත් පාලන අමාත්යතුමාගෙන් ඇසීමට,—
(අ) (i) “පොළොන්නරුව සිටි සෙන්ටර්”හි ඇති මුළු කඩකාමර සංඛ්යාව කොපමණද;
(ii) ඒ අතරින් මේ වනවිට බදු දී ඇති කඩකාමර සංඛ්යාව කොපමණද;
(iii) “පොළොන්නරුව සිටි සෙන්ටර්” ගොඩනැගිල්ල බදු දීම සහ එහි ඇති කඩකාමර බෙදා දීම සම්බන්ධයෙන් 2019 වර්ෂයේදී ආණ්ඩුකාරවරයාගේ ප්රධානත්වයෙන් පැවති සාකච්ඡාවේදී ගනු ලැබූ තීරණ කවරේද;
(iv) මේ වනවිට එම තීරණ ක්රියාත්මක වන්නේද;
(v) ඉහත කඩකාමර බදු දීමෙන් පොළොන්නරුව මහා නගර සභාවට අලාභයක් සිදු වී තිබේ නම්, එම අලාභය අදාළ පාර්ශ්වයන්ගෙන් අය කර ගන්නේද;
යන්න එතුමා මෙම සභාවට දන්වන්නෙහිද?
(ආ) නොඑසේ නම්, ඒ මන්ද?
අසන ලද දිනය
2025-03-05
අසන ලද්දේ
ගරු සුනිල් රත්නසිරි මහතා, පා.ම.
අමාත්යාංශය
රාජ්ය පරිපාලන, පළාත් සභා සහ පළාත් පාලන
ව්යවස්ථාදායකය
ශ්රී ලංකා ප්රජාතාන්ත්රික සමාජවාදී ජනරජයේ දසවැනි පාර්ලිමේන්තුව
සභාවාරය
1 වැනි සභාවාරය
(අ) (i) කඩ කාමර 57කි.
(ii) කඩ කාමර 52කි.
(iii) 2019 සැප්තැම්බර් 24 දින ගරු ආණ්ඩුකාර නිල නිවසේ පැවති සාකච්ඡාවේ යෝජනා ඇමුණුම මඟින් ඉදිරිපත් කර තිබෙනවා. එම ඇමුණුම සභාගත* කරනවා.
(iv) මේ වන විට ක්රියාත්මක කර තිබෙනවා.
(v) බදුකරුවන් විසින් නිසි පරිදි කඩ කුලී ගෙවා නොමැති කඩ කාමර 06ක් 2024 පෙබරවාරි 26වන දින මුද්රා තබන ලද අතර, මහනගර සභා ආඥාපනතේ 266 වගන්තිය ප්රකාරව 2025 මාර්තු 03 දිනෙන් වාස බද්ද අවසන් කිරීමේ දැන්වීම නිකුත් කිරීමටත්, ඉන් අනතුරුව මාසයක් ඇතුළත අදාළ කඩ කාමර නගර සභාව වෙත පවරා ගැනීමටත් කටයුතු සිදු කරමින් තිබෙනවා. ඒ වාගේම හිඟ ආදායම් අය කර ගැනීම සඳහා අධිකරණ ක්රියාමාර්ග ගැනීම පිණිස නීති නිලධාරිනිය කටයුතු කරමින් ඉන්නවා.
(ආ) අදාළ නොවේ.
* සභාමේසය මත තබන ලද ඇමුණුම:
சபாபீடத்தில் வைக்கப்பட்ட இணைப்பு :
Annex tabled:
පොළොන්නරුව පොදු වෙළෙඳ සංකීර්ණය දීර්ඝ කාලීන බදු පදනම යටතේ බදු දීම සඳහා වූ රැස්වීම සඳහා සහභාගි වූවන්,
දිනය :- 2019.09.14
වේලාව :- පෙ.ව. 10.00
ස්ථානය :- ආණ්ඩුකාර නිල නිවස
සහභාගි වූවන් :-
|
අනු අංකය |
නම |
තනතුර |
|
01 |
ගරු සරත් ඒකනායක මැතිතුමා |
ආණ්ඩුකාරතුමා |
|
02 |
එච්.එම්.පී. බණ්ඩාර මහතා |
ප්රධාන ලේකම් |
|
03 |
ගරු එල්.ජී. චානක සිදත් රණසිංහ මැතිතුමා |
නගරාධිපතිතුමා |
|
04 |
පාලිත අබේවර්ධන මහතා |
බ.ප. සභාවේ නීති නිලධාරි |
|
05 |
එම්. කොඩිප්පිලි ආරච්චි මෙනවිය |
පළාත් පාලන කොමසාරිස් |
|
06 |
එච්.එම්. වින්ද්යා ප්රසාදිනී හේරත් මිය |
නාගරික කොමසාරිස්(වැ.බ) |
|
07 |
ඩබ්ලිව්.ජී.එස්. සුනිමල් බණ්ඩාර මහතා |
නාගරික ඉංජිනේරු |
|
08 |
එන්.ටී.එස්. පීරිස් මහතා |
නාගරික ගණකාධිකාරි |
|
09 |
කේ. දේවිකා සෙනෙවිරත්න මිය |
නීති නිලධාරි |
පොළොන්නරුව මහ නගර සභාව විසින් ඉදිකර ඇති පොදු වෙළෙඳ සංකීර්ණය දීර්ඝ කාලීනව බදු දීම.
උක්ත කරුණ සම්බන්ධයෙන් උතුරුමැද පළාත් ගරු ආණ්ඩුකාරතුමාගේ ප්රධානත්වයෙන් හා ගරු නගරාධිපතිතුමාගේත්, ප්රධාන ලේකම් - උතුරු මැද පළාත, පළාත් පාලන කොමසාරිස් - උතුරු මැද පළාත් සභාව සහ මහ නගර සභාවේ මාණ්ඩලික නිලධාරින්ගේද සහභාගිත්වයෙන් 2019.09.14වන දින පැවති සාකච්ඡාවේදී ගත් තීරණ සම්බන්ධයෙන් පිළියෙල කර ඉදිරිපත් කරන වාර්තාවයි.
මෙම සාකච්ඡාවේදී විශේෂඥ උපදෙස් ලබා ගැනීම සඳහා බස්නාහිර පළාත් සභාවේ නීති නිලධාරි පාලිත අබේවර්ධන මහතා සහභාගි විය.
භුක්තිය බැහැර කිරීමට අපේක්ෂිත ආකාරය:
අදාළ කඩ කාමර අංග සම්පූර්ණ කරන ලද ඉදිකිරීම් වන අතර, ස්ථාවර ව්යාපාරික කාර්යයන් වෙනුවෙන් දිර්ඝ කාලීන භුක්තිය බැහැර කිරීම යටතේ කටයුතු කිරීම සුරක්ෂිත ආයෝජනයක් ලෙස සැලකිය හැක. එම නිස අවම වශයෙන් පොළොන්නරුව මහ නගර සභාව තීරණය කරන පරිදි වසර 30ක දීර්ඝ කාලීන බදු පදනමක් යටතේ ලබා දීම උචිත බව යෝජනා විය.
ආයෝජන අවස්ථා සඳහා යෝජනා කැඳවීම:
මෙහි දේපළ වඩා ඵලදායී අන්දමින් ව්යාපාරික අවස්ථා සඳහා විවෘත කරනු වස් ව්යාපාරික යෝජනා "ආයෝජන යෝජනා" වශයෙන් කැඳවීමට තීරණය විය. මෙය ප්රධාන ජාතික පුවත්වල පළ කරනු ලබන දැන්වීමක් මඟින් -භාෂා ත්රිත්වයෙන්- යෝජනා කැඳවීම වඩා සුදුසු වන අතර පිළිගත් වෙළෙඳ සන්නාම යටතේ වූ ව්යාපාර සඳහා ඍජුව ආරාධනා කිරීම ද සිදු කළ යුතු බවට යෝජනා විය.
මෙම ආයෝජන යෝජනා මහ නගර සභාව වෙත ලැබුණු පසු ඒවා ඇගැයීම් කිරීම සඳහා නාගරික ඉංජිනේරුගේ සභාපතිත්වයෙන් නීති නිලධාරි - පොළොන්නරුව මහ නගර සභාව, ගණකාධිකාරි - පළාත් පාලන දෙපාර්තමේන්තුව යන අයගේ සහභාගිත්වයෙන් ඇගයුම් මණ්ඩලයක් පත් කර ගැනීමට තීරණය විය.
ඉහත කී ආයෝජන යෝජනා කැඳවීමේ යෝජනාව සහ ඇගයුම් මණ්ඩලය පත් කර ගැනීමේ යෝජනාව සඳහා මහා සභා අනුමැතිය ලබා ගත යුතුය.
මහ නගර සභා ආඥා පනතේ 40(1)ඊ වගන්තියේ සඳහන් විධිවිධාන අනුව දීර්ඝ කාලීනව බදු දීම සඳහා උතුරුමැද පළාත් ගරු ආණ්ඩුකාරතුමාගේ අනුමැතිය ලබා ගැනීම ද කළ යුතු ය. තවද මෙම ගොඩනැඟිල්ල මහල් තුනකින් -කඩ කාමර 58කින්- සමන්විත වේ. මේවා මහල් වශයෙන් හෝ කඩ කාමර වශයෙන් බදු දීම ඇගයුම් මණ්ඩලයේ තීරණය අනුව සිදු කිරීමට ද යෝජනා විය.
පිළිතුරු දුන් දිනය
2025-03-05
විසින් පිළිතුරු දෙන ලදී
ගරු (මහාචාර්ය) ඒ.එච්.එම්.එච්. අබයරත්න මහතා, පා.ම.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
