2025-10-15
පුවත් කාණ්ඩ : කාරක සභා පුවත්
යෝජිත කම්කරු නීති ප්රතිසංස්කරණය යටතේ ප්රධාන පනත් කෙටුම්පත් හතරක් හඳුන්වා දීම පිළිබඳව සලකා බලමින් සිටින බව ගරු කම්කරු අමාත්ය ආචාර්ය අනිල් ජයන්ත ප්රනාන්දු මහතා ප්රකාශ කළේය. ඒ කම්කරු කටයුතු පිළිබඳ අමාත්යාංශයීය උපදේශක කාරක සභාව පසුගිය 08 වන දා ගරු කම්කරු අමාත්ය ආචාර්ය අනිල් ජයන්ත ප්රනාන්දු මහතාගේ ප්රධානත්වයෙන් රැස්වූ අවස්ථාවේදී ය. ගරු කම්කරු නියෝජ්ය අමාත්ය මහින්ද ජයසිංහ මහතා ද රැස්වීමට සහභාගී විය.
මෙහිදී අදහස් දක්වමින් අමාත්යාංශයේ ලේකම්වරයා, දැනට භාවිතයේ පවතින කම්කරු නීති 14ක ප්රතිසංස්කරණ අධ්යයනය කිරීම සඳහා සාමාජිකයින් 17 දෙනෙකුගෙන් යුත් කමිටුවක් පත් කර ඇති බව ප්රකාශ කළේය. මෙම කමිටුව ප්රථමයෙන් රැස්වී ප්රධාන වශයෙන් ශ්රමයට අදාළ පනත් කෙටුම්පත් හතරක් සකස් කිරීම සඳහා මූලික එකඟතාවයකට පැමිණි බව ද ඔහු පැවසුවේය. වෘත්තීය සමිති, ශ්රමය, වෘත්තීය ආරක්ෂාව සහ ශ්රමයෙන් ඉවත් වීම යන කරුණු හතරක් සඳහා වෙනම පනත් කෙටුම්පත් සකස් කිරීමට කමිටුව එකඟතාවයකට පැමිණ ඇති බවත් නව නීති සම්පාදනය කරන තෙක් පවතින නීතිවලට අවශ්ය සංශෝධන සිදු කරන බවත් අමාත්යාංශ ලේකම්වරයා වැඩි දුරටත් අදහස් දක්වමින් සඳහන් කළේය. එමෙන්ම රාත්රියේ වැඩ කරන කාන්තාවන් පිළිබඳ නීතිය, කම්කරු ආරක්ෂණ පනත සහ සේවයෙන් ඉවත්කිරීමක් සිදුවුවහොත් රක්ෂණයට අදාළ කරුණු සඳහා ද සංශෝධන සිදු කරන බව අමාත්යාංශ ලේකම්වරයා පැවසුවේය.
තවද වෘත්තීය ආරක්ෂාව සහ සෞඛ්යය පිළිබඳ ජාතික ප්රතිපත්තියක් සකස් කිරීමේ කටයුතු අවසන් අදියරට පැමිණ ඇති බවත් එය ඉක්මනින් ප්රකාශයට පත් කිරීමට අපේක්ෂා කරන බවත් මෙහිදී අදහස් දක්වමින් අමාත්යාංශ නිලධාරීහු පැවසුහ.
ඒ සමඟම, කම්කරු දෙපාර්තමේන්තුවේ තොරතුරු පද්ධතිය කාලෝචිත ආකාරයකින් යාවත්කාලීන කිරීමට පියවර ගෙන ඇති බවත්, රජයේ ඩිජිටල්කරණ වැඩසටහන යටතේ, සේවකයින් ශ්රම බලකායට ඇතුළු වූ වහාම මෙම තොරතුරු පද්ධතියට ඇතුළත් කිරීම සඳහා සංශෝධන සිදු කරන බවත් එම නිලධාරීහු පැවසුහ.
මෙහිදී අදහස් දැක්වූ කාරක සභාවේ සභාපතිවරයා වෘත්තීය සමිති ඇතුළු අදාළ පාර්ශ්වයන් සමඟ සවිස්තරාත්මක සාකච්ඡා කිරීමෙන් පසු යෝජිත කම්කරු නීති ප්රතිසංස්කරණ කෙටුම්පත් සකස් කරන බව පැවසුවේය.
මෙම රැස්වීමට ගරු පාර්ලිමේන්තු මන්ත්රීවරුන් සහ රජයේ නිලධාරීන් ඇතුළු පිරිසක් සහභාගී වූහ.
2026-05-25
නව අධ්යාපන ප්රතිසංස්කරණ ක්රියාත්මක කිරීමේ ප්රගතිය අධ්යාපනය, ශ්රම බලකාය සහ මානව ප්රාග්ධනය පිළිබඳ ආංශික අධීක්ෂණ කාරක සභාවේදී විමසා බැලිණි.එම කාරක සභාව ගරු පාර්ලිමේන්තු මන්ත්රී හේෂා විතානගේ අංකුඹුර ආරච්චි මහතාගේ සභාපතිත්වයෙන් පාර්ලිමේන්තුවේදී පසුගියදා (මැයි 19) රැස්වූ අවස්ථාවේදී මේ පිළිබඳව දීර්ඝ ලෙස සාකච්ඡා කෙරිණි.නව අධ්යාපන ප්රතිසංස්කරණ ක්රියාත්මක වන ආකාරය පිළිබඳව අධ්යාපන, උසස් අධ්යාපන සහ වෘත්තීය අධ්යාපන අමාත්යාංශයේ ලේකම් නාලක කලුවැව මහතා කාරක සභාව දැනුවත් කළේය.මේ අවස්ථාව සඳහා ගරු විපක්ෂ නායක සජිත් ප්රේමදාස මහතා, කාරක සභා සාමාජික ගරු මන්ත්රීවරුන්, පළාත් අධ්යාපන ලේකම්වරුන්, විදුහල්පතිවරුන් ඇතුළු පිරිසක් සහභාගී වී සිටියහ.
2026-05-25
කමිටුව සඳහා මහජන අදහස් ලබා ගැනීමටත් එකඟතාවයමැතිවරණ සම්බන්ධයෙන් වන නීති (පළාත් සභා ඡන්ද විමසීමට අදාළ නීති හැර) සමාලෝචනය කර පාර්ලිමේන්තුවට වාර්තා කිරීම සඳහාත්, ඒ පිළිබඳව සිය යෝජනා සහ නිර්දේශ ඉදිරිපත් කිරීම සඳහාත් වන පාර්ලිමේන්තු විශේෂ කාරක සභාව, එහි සභාපති රාජ්ය පරිපාලන, පළාත් සභා සහ පළාත් පාලන ගරුඅමාත්ය (මහාචාර්ය) ඒ.එච්.එම්.එච්. අබයරත්න මහතාගේ ප්රධානත්වයෙන් පසුගියදා පාර්ලිමේන්තුවේදී රැස් විය.මැතිවරණ ක්රමයට අදාළ වන නීති, එනම් ඡන්ද හිමියන් ලියාපදිංචි කිරීමේ පනත, පළාත් පාලන ආයතන ඡන්ද විමසීම් පනත, පාර්ලිමේන්තු මැතිවරණ පනත, ජනාධිපතිවරයා තෝරා පත් කර ගැනීම පිළිබඳ පනත සහ එම පනත්වලට වසර ගණනාවක් තුළ සිදු කරන ලද සංශෝධන සහ එකී පනත්වල විධිවිධානයන්ට අදාළ වන විශේෂ විධිවිධාන පනත් සමාලෝචනය කිරීමද මෙම කාරක සභාවේ මුඛ්ය අරමුණයි.ඊට අමතරව, උක්ත පනත් ප්රතිශෝධනය කිරීමේ, සංශෝධනය කිරීමේ සහ ඒකාබද්ධ කිරීමේ අවශ්යතාවය ඇගයීම සහ මැතිවරණ සම්බන්ධයෙන් වන වර්තමාන නීති සඳහා අවශ්ය ප්රතිසංස්කරණ සහ සංශෝධන නිර්දේශ කිරීම ද මෙම කාරක සභාව වෙත පැවරී තිබේ.ඉහත සඳහන් කරුණු සම්බන්ධයෙන් පුළුල් අධ්යයනයක් සිදු කිරීම සඳහා කාරක සභාව විසින් අවශ්ය යැයි තීරණය කරනු ලබන පරිදි, ඕනෑම තැනැත්තෙකු එම කාරක සභාව ඉදිරියට කැඳවීමට ද, ඕනෑම ලියවිල්ලක් හෝ වාර්තාවක් හෝ ලබා දෙන ලෙසට ඕනෑම තැනැත්තෙකුට නියම කිරීමට ද, එකී සියලු සාක්ෂි ලිඛිතව හෝ වාචිකව හෝ, ලබා ගැනීමට ද කාරක සභාවට බලය හිමිවේ. තවද, කාරක සභාවේ කටයුතුවලට සහාය පිණිස අදාළ ක්ෂේත්රයන්හි විශේෂඥ දැනුමක් ඇති පුද්ගලයන්ගේ සහ ප්රවීණයන්ගේ සේවය ලබා ගැනීමට ද අවස්ථාව හිමි ව තිබේ. ඒ අනුව, කාරක සභාවේ කටයුතු සඳහා මහජන අදහස් ලබා ගැනිමට සහ මෙම සමාලෝචන ක්රියාවලිය පිළිබඳ පුළුල්ව මහජනතාව දැනුවත් කිරීමටද සාමාජික මන්ත්රීවරයන්ගේ ඒකඟතාවය හිමි විය. මෙම කාරක සභාවට ගරු නියෝජ්ය අමාත්ය (නීතිඥ) සුනිල් වටගල, ගරු පාර්ලිමේන්තු මන්ත්රීවරයන් වන රවී කරුණානායක, ජේ.සී. අලවතුවල, හර්ෂණ රාජකරුණා, කදිරවේලු ෂන්මුගම් කුගදාසන්, රුවන්තිලක ජයකොඩි, (නීතිඥ) තුෂාරි ජයසිංහ, චන්දිම හෙට්ටිආරච්චි යන මහත්ම මහත්මීහු සහභාගී වූහ.
2026-05-21
නොරොච්චෝලේ ලක්විජය බලාගාරයෙන් පරිසරයට සිදු වන බලපෑම සොයා බලා නිර්දේශ ඉදිරිපත් කිරීම සඳහා පරිසරය, කෘෂිකර්මය සහ සම්පත් තිරසාරත්වය පිළිබඳ ආංශික අධීක්ෂණ කාරක සභාව විසින් අනුකාරක සභාවක් ගරු පාර්ලිමේන්තු මන්ත්රී (නීතීඥ) භාග්ය ශ්රී හේරත් මහතාගේ සභාපතිත්වයෙන් යුතුව පත් කරන ලදී.පරිසරය, කෘෂිකර්මය සහ සම්පත් තිරසාරත්වය පිළිබඳ ආංශික අධීක්ෂණ කාරක සභාව එහි සභාපති ගරු පාර්ලිමේන්තු මන්ත්රී හෙක්ටර් අප්පුහාමි මහතාගේ සභාපතිත්වයෙන් පසුගියදා පාර්ලිමේන්තුවේදී රැස් වූ අවස්ථාවේදී මෙම අනුකාරක සභාව පත් කෙරිණි. මෙහිදී නොරොච්චෝලේ ලක්විජය බලාගාරයෙන් පරිසරයට සිදු වන බලපෑම සම්බන්ධයෙන් සාකච්ඡා කිරීමට පරිසර අමාත්යාංශය, බලශක්ති අමාත්යාංශය, සෞඛ්ය සහ ජනමාධ්ය අමාත්යාංශය සහ තවත් ආයතන කිහිපයක් නියෝජනය කරමින් නිලධාරීහු සහභාගි වී සිටියහ. නොරොච්චෝලේ බලාගාරයේ ක්රියාකාරීත්වය හේතුවෙන් පරිසරයට වන බලපෑම, ඒ සම්බන්ධයෙන් වගකීම දරන පාර්ශ්ව හා ඒ ඒ ආයතනවලින් යම් අඩුපාඩුවක් සිදුව ඇත් ද යන්න පිළිබඳව දීර්ඝ වශයෙන් සාකච්ඡා කිරීමෙන් අනතුරුව මේ සම්බන්ධ වැඩි දුර කරුණු පරීක්ෂා කිරීම සඳහා මෙම අනුකාරක සභාව පත් කිරීම සිදු විය.ශ්රී ලංකාවේ ජර්මානු, ජපාන හා චීන තානාපති කාර්යාල සහ ඉන්දියානු මහ කොමසාරිස් කාර්යාලය සමග සාකච්ඡා කොට එම රටවල බලාගාර ආශ්රිතව භාවිතා කරන නව තාක්ෂණය හඳුනාගැනීම සම්බන්ධයෙන් නිලධාරීන් සඳහා පුහුණු වැඩසටහන් ලබා ගැනීමට අවස්ථාව ලබා දෙන ලෙසට කාරක සභාව විසින් ඉල්ලීමක් කරන බවද කාරක සභාවේ සභාපතිවරයා මෙහිදී පැවසුවේය.
2026-05-21
කාර්යසාධන වාර්තා පහකට රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාව විසින් එහි සභාපති ගරු පාර්ලිමේන්තු මන්ත්රී (වෛද්ය) නජිත් ඉන්දික මහතාගේ සභාපතිත්වයෙන් පසුගියදා පාර්ලිමේන්තුවේදී රැස්වූ අවස්ථාවේදී අනුමැතිය ලබා දෙන ලදී. මේ අනුව 2023 හා 2024 වර්ෂවල ජනාධිපති ලේකම් කාර්යාලයේ කාර්යසාධන වාර්තා සහ 2024 වර්ෂයේ ජනාධිපති අරමුදලේ කාර්යසාධන වාර්තාව, කාරක සභාවේදී දීර්ඝ වශයෙන් සලකා බැලීමෙන් අනතුරුව අනුමත කිරීම සිදු විය. එසේම 2023 හා 2024 වර්ෂවල අග්රාමාත්ය කාර්යාලයේ වාර්ෂික කාර්යසාධන වාර්තාවන්ද කාරක සභාවේදී සලකා බැලීමෙන් අනතුරුව මෙලෙස අනුමත කෙරිණි.මීට අමතරව බලයලත් මිනින්දෝරුවරුන් විසින් සකස් කරන පිඹුරුපත් ලියාපදිංචි කිරීමට හැකි වන පරිදි 2002 අංක 17 දරන මිනින්දෝරු පනත සංශෝධනය කිරීම සම්බන්ධයෙන් ගරු පාර්ලිමේන්තු මන්ත්රී අජිත් පී. පෙරේරා මහතා විසින් කාරක සභාවට ඉදිරිපත් කරන ලද යෝජනාව සම්බන්ධයෙන්ද කාරක සභාවේදී සාකච්ඡා විය.ගරු පාර්ලිමේන්තු මන්ත්රීවරුන් වන, අජිත් පී. පෙරේරා, මුජිබුර් රහුමාන්, ජනාධිපති නීතිඥ ෆයිසර් මුස්තාපා, ධර්මප්රිය විජේසිංහ, එම්.කේ.එම්. අස්ලම් සහ මේජර් ජෙනරාල් (විශ්රාමික) ජී.ඩී. සූරියබණ්ඩාර යන මහත්වරු සහභාගී වූහ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
