2025-03-03
පුවත් කාණ්ඩ : කාරක සභා පුවත්
පාසැල් දරුවන් සහ ශ්රී ලංගම වාර ප්රවේශපත්ර (සීසන්) ඇති පුරවැසියන් මග හැර ධාවනය වන ශ්රීලංගම බස්රථ රියදුරන් සම්බන්ධයෙන්, ප්රවාහන, මහාමාර්ග, වරාය සහ සිවිල් ගුවන් සේවා අමාත්යාංශයීය උපදේශක කාරක සභාවේදී සාකාච්ඡා විය.
මෙහිදී ප්රවාහන, මහාමාර්ග, වරාය සහ සිවිල් ගුවන් සේවා ගරු අමාත්ය බිමල් රත්නායක මහතා පවසා සිටියේ ඕනෑම පුරවැසියෙකුට මේ සම්බන්ධයෙන් 1958 අංකයට දැනුම් දීමක් කළ හැකි බවයි. මේ පිළිබඳව තමා දැනුවත් බවත්, මෙවැනි අකටයුතු සම්බන්ධයෙන් දැඩි ක්රියාමාර්ග ගැනීමට පසුබට නොවන වන බවත්, මේ පිළිබඳව ලංගම රියදුරන් සහ කොන්දොස්තරවරුන් දැනුවත් කර ඇති බවත් එතුමා තවදුරත් අදහස් දක්වමින් පැවසීය.
ප්රවාහන, මහාමාර්ග, වරාය සහ සිවිල් ගුවන් සේවා අමාත්යාංශයීය උපදේශක කාරක සභාව ගරු අමාත්ය බිමල් රත්නායක මහතාගේ සභාපතිත්වයෙන් 2025.02.28 දින පාර්ලිමේන්තුවේදී රැස් වූ අවස්ථාවේදී මෙම කරුණු සාකච්ඡා විය. මෙම කාරක සභාවට වරාය හා සිවිල් ගුවන් සේවා ගරු නියෝජ්ය අමාත්ය ජනිත රුවන් කොඩිතුවක්කු , ප්රවාහන සහ මහාමාර්ග ගරු නියෝජ්ය අමාත්ය (වෛද්ය) ප්රසන්න ගුණසේන යන මහත්වරුන් ඇතුළු පක්ෂ විපක්ෂ මන්ත්රීවරුන් ද එම අමාත්යාංශයට අනුබද්ධිත රාජ්ය ආයතනයන්හී නිලධාරිහු ද සහභාගි වූහ.
තවද මෙහිදී අදහස් දැක්වූ සභාපතිවරයා, තාක්ෂණය පවා තිබියදී වන අලින්ට සිදුවන හානිය සම්බන්ධයෙන් ක්රියාත්මක වීමට දුම්රිය දෙපාර්තමේන්තු නිලධාරීන්ගේ උනන්දුවක් නොමැති වීම පිළිබඳව කණගාටු වන බව පැවසුවේය. මීනගයා දුම්රිය අනතුරින් මියගිය වන අලින් 6 දෙනා සම්බන්ධ සිදුවීම ඉතාමත් කනගාටුදායක සිදුවීමක් බවත්, එය එසේ සිදුව තිබියදී දුම්රිය දෙපාර්තමේන්තු නිලධාරීන් තමන් සතු GPS දත්ත තාක්ෂණය මෙවන් සිදුවීම් අවම කරගැනීම සඳහා යොදා ගැනීමට කිසිඳු උනන්දුවක් නොදැක්වීම පිළිබඳව සභාපතිවරයා තම අප්රසාදය පළ කර සිටියේය.
මේ තත්ත්වයන් වළක්වා ගැනීමට ගත හැකි සියලු ක්රියාමාර්ගයන් ගැනීමට දුම්රිය දෙපර්තෙමේන්තු නිලධාරීන් හට අමාත්ය බිමල් රත්නායක මහතා විසින් උපදෙස් ලබා දෙනු ලැබුවේය. මෙහිදී දුම්රිය දෙපාර්තමේන්තු නිලධාරීන් පවසා සිටියේ මේ සම්බන්ධයෙන් මේ වන විටත් සාකච්ඡා සිදුකරන බවත්, ගත යුතු ක්රියාමාර්ග කඩිනමින් ගැනීමට කටයුතු කරනු ලබන බවයි. දුම්රිය දෙපාර්තමේන්තුව තුළ කාර්යක්ෂම කළමනාකරණ පද්ධතියක් සකස් කිරීම සඳහා එම විෂයට අදාළව පාර්ලිමේන්තු මන්ත්රීවරුන්ගෙන් සමන්විත කාරක සභාවක් පිහිටුවීම ද මෙහිදී සිදු විය.
එමෙන්ම වරායෙන් නිෂ්කාශනය කර නොමැති බහාලුම් (කන්ටේනර්) ගැටලුව සම්බන්ධයෙන් මේ වන විට ගෙන ඇති ක්රියාමාර්ග පිළිබඳව ද නිලධාරීහු විසින් මන්ත්රීවරයන් දැනුවත් කළහ.
ඒ අනුව, මෙම බහාලූම් වරාය තුළ සිරවීම හේතුවෙන් ඇතිව ඇති ප්රමාදය මග හරවා ගැනීමට කඩිනමින් නිලධාරී බඳවා ගත් බවත්, වරාය තුළ තද බදය අවම කිරීමේ අරමුණින් වරයට පිවිසෙන රථ ගාල් කිරීම සඳහා බ්ලුමැන්ඩල් හි අක්කර දෙක හමරාක ඉඩ ප්රමාණයක් රේගුව වෙත භාර දී තිබෙන බවත් සිවිල්, ගුවන් සේවා නියෝජ්ය අමාත්ය ජනිත රුවන් කොඩිතුවක්කු මහතා පැවසීය. තව ද, Port Community System ඩිජිටල් තාක්ෂණ වැඩසටහන තිරසාර විසඳුමක් ලෙස දිගු කාලීන වැඩපිළිවෙලක් වශයෙන් ආරම්භ කර තිබෙන බවද නියෝජ්ය අමාත්යවරයා තවදුරටත් පැවසීය.
තව ද, 2023 වර්ෂය සඳහා ශ්රී ලංකා වරාය අධිකාරියේ වාර්ෂික වාර්තාව සහ 2023 වර්ෂය සඳහා ජය කන්ටේනර් ටර්මිනල්ස් ලිමිටඩ්හි වාර්ෂික වාර්තාව අමාත්යාංශයීය උපදේශක කාරක සභාවේ දී සලකා බැලුණු අතර එම වාර්තා සම්මත කරන ලදී.
එසේම, ප්රවාහන, මහාමාර්ග, වරාය සහ සිවිල් ගුවන් සේවා ආශ්රිත ගැටලු සඳහා නෛතික සහ පරිපාලනමය විසදුම් සෙවීමට ප්රවාහන, මහාමාර්ග, වරාය සහ සිවිල් ගුවන් සේවා කටයුතු පිළිබඳ අමාත්යාංශයීය උපදේශක කාරක සභාව යටතේ පත් කරනු ලැබූ අනු කමිටු ත්රිත්වයේ වර්තමාන තත්ත්වය සම්බන්ධයෙන් එහි කමිටු සභාපතිවරු විසින් ප්රගති සමාලෝචනයක් ද ඉදිරිපත් කරන ලදී.
2026-08-21
විවෘත පාර්ලිමේන්තු මුලාරම්භය සඳහා වන පාර්ලිමේන්තු සංසදය විසින් සංවිධානය කරනු ලබන “Voice to Policy” සංවාදමය ප්රාදේශීය වැඩසටහන් මාලාවේ දෙවැන්න මඩකලපුව දිස්ත්රික් තරුණ ප්රජාව සඳහා අගෝස්තු 29 වැනිදා මඩකලපුව ‘East Lagoon’ හෝටල් පරිශ්රයේදී පැවැත්වීමට නියමිතව තිබේ.විවෘත පාර්ලිමේන්තු මුලාරම්භය සඳහා වන පාර්ලිමේන්තු සංසදයේ සම සභාපතිවරුන් වන ගරු අමාත්ය මහාචාර්ය ක්රිෂාන්ත අබේසේන සහ ගරු ෂානක්කියන් රාජපුත්තිරන් රාසමාණික්කම් යන මහත්වරුන්ගේ ප්රධානත්වයෙන් පසුගියදා (අගෝ. 19) පාර්ලිමේන්තුවේදී පැවති සාකච්ඡාවේදී මීට අදාළ සංවිධාන කටයුතු පිළිබඳ සාකච්ඡා කෙරිණි. තරුණ නියෝජිතයන්ගේ සහභාගීත්වයෙන් විවෘත පාර්ලිමේන්තු සංකල්පය තවදුරටත් ප්රවර්ධනය කිරීමේ අරමුණින් මෙම වැඩමුළු මාලාව සංවිධානය කෙරෙන අතර සංසදයේ සාමාජික මන්ත්රීවරු මෙන්ම මඩකලපුව දිස්ත්රික් පාර්ලිමේන්තු මන්ත්රීවරුන් මෙම අවස්ථාවට සහභාගී වීමට නියමිතය.මෙම වැඩමුළු මගීන් විශේෂයෙන් තරුණ ප්රජාව පාර්ලිමේන්තු කටයුතු, ව්යවස්ථාදායක ක්රියාවලිය සහ විවෘත පාර්ලිමේන්තු මූලධර්ම පිළිබඳ දැනුවත් කිරීම මෙන්ම, පාර්ලිමේන්තුව සහ පුරවැසියන් අතර සම්බන්ධතාව තවදුරටත් ශක්තිමත් කිරීම අපේක්ෂා කෙරේ.මෙම වැඩමුළුව සඳහා සහභාගීවීමට අපේක්ෂා කරන මඩකලපුව දිස්ත්රික්කයේ වයස අවු 18 – 35 අතර තරුණ තරුණියන් https://forms.gle/aVp5UzhLbtPSmVap8 සබැඳිය ඔස්සේ අදාළ පෝරමය සම්පූර්ණ කොට අගොස්තු 24 දිනට පෙර ලියාපදිංචි විය විය යුතුය. එසේම සහභාගී වන්නන් කිසිදු දේශපාලන පක්ෂයක් හෝ ව්යාපාරයක් හෝ ප්රවර්ධනය කරන සංකේතවලින් තොර ඇඳුමින් සැරසී සිටිය යුතු බවත් සංසදය විසින් දැනුම් දෙන ලදී. මෙම රැස්වීමට සංසදයේ සාමාජික මන්ත්රීවරු සහ වැඩමුළු මාලාව සඳහා අනුග්රාහකත්වය සපයන සංවර්ධන සහකරු වන CII (Coalition for Inclusive Impact) ආයතනයේ නියෝජිතයෝ එක්ව සිටියහ.එසේම මෙම රැස්වීමේදී ‘INTER Pares’ ව්යාපෘතියේ නියෝජිතයන් සමග මාර්ගගත තාක්ෂණය ඔස්සේ සාකච්ඡාවක් පැවති අතර සංසදයේ ඉදිරි වැඩසටහන් සඳහා එම ආයතනයේ සහය ලබා ගැනීමේ හැකියාව පිළිබඳව අවධානය යොමු විය. එම සාකච්ඡාවේ සම්බන්ධීකරණය සඳහා දායකත්වය දුන් Westminster Foundation for Democracy (WFD) හි මෙරට නියෝජිත සංජය විග්නරාජා මහතා ද මෙම අවස්ථාවට එක්විය.
2026-08-18
අමාත්යාංශ ලේකම්වරයෙකුගේ සහ රජයේ ව්යවස්ථාපිත මණ්ඩල/ ආයතන තුනක සභාපතිවරුන්ගේ පත්වීම් සඳහා උසස් නිලතල පිළිබඳ කාරක සභාවේ අනුමැතිය පසුගියදා හිමිවිය.ඒ අනුව, සෞඛ්ය සහ ජනමාධ්ය අමාත්යාංශයේ ලේකම්වරයා ලෙස වෛද්ය අනිල් ජාසිංහ මහතාගේ පත් කිරීම, කොළඹ නෙළුම් කුළුණ කළමනාකරණ (පෞද්ගලික) සමාගමේ සභාපතිවරයා ලෙස එස්.ඒ.එම්. පීරිස් මහතාගේ පත් කිරීම, සීමාසහිත කුරුණෑගල වැවිලි සමාගමේ සභාපතිවරයා ලෙස එච්.එම්.පී. රත්නායක මහතා පත් කිරීම සහ ජාතික රක්ෂණ භාර අරමුදලේ සභාපතිනිය ලෙස (ආචාර්ය) ඩබ්ලිව්.එම්.වී. වනසිංහ මහත්මිය පත් කිරීම කාරක සභාව විසින් අනුමත කරන ලදී.ගරු අග්රාමාත්ය (ආචාර්ය) හරිනි අමරසූරියගේ සභාපතීත්වයෙන් පැවැති මෙම කාරක සභා රැස්වීමට, ගරු අමාත්ය රාමලිංගම් චන්ද්රසේකර්, ගරු පාර්ලිමේන්තු මන්ත්රීවරුන් වන කුමාර ජයකොඩි සහ නීතිඥ දයාසිරි ජයසේකර යන මහත්වරු ද සහභාගී වූහ.
2026-08-18
විවෘත පාර්ලිමේන්තු මුලාරම්භය සඳහා වන පාර්ලිමේන්තු සංසදය විසින් ගම්පහ දිස්ත්රික් තරුණ ප්රජාව සඳහා සංවිධානය කළ “Voice to Policy” සංවාද වැඩසටහන පසුගියදා (අගෝ. 16) මීගමුව ජෙට්වින් බ්ලූ හෝටල් පරිශ්රයේදී පැවැත්වුණු අතර මෙහිදී ගම්පහ දිස්ත්රික් තරුණ ප්රජාවගේ ප්රතිපත්තිමය යෝජනා සෘජුවම පාර්ලිමේන්තු මන්ත්රීවරුන්ට ඉදිරිපත් කිරීමට අවස්ථාව හිමි විය.විවෘත පාර්ලිමේන්තු සංකල්පය තවදුරටත් ප්රවර්ධනය කිරීමේ අරමුණින් දිවයිනේ සියලු දිස්ත්රික්ක ආවරණය වන පරිදි විවෘත පාර්ලිමේන්තු මුලාරම්භය සඳහා වන පාර්ලිමේන්තු සංසදය විසින් සංවිධානය කෙරෙන වැඩමුළු මාලාවේ පළමු වැඩසටහන ලෙස ගම්පහ දිස්ත්රික් තරුණ ප්රජාව වෙනුවෙන් මෙම වැඩසටහන පැවැත්විණි. තරුණ ප්රජාවට සිය අදහස්, ගැටලු සහ ප්රතිපත්තිමය යෝජනා සෘජුවම පාර්ලිමේන්තු මන්ත්රීවරුන් වෙත ඉදිරිපත් කිරීමට අවස්ථාව ලබා දීම මෙහි ප්රධාන අරමුණ වූ අතර, වැඩමුළුව සඳහා ගම්පහ දිස්ත්රික්කය නියෝජනය කරමින් තරුණ තරුණියෝ සහභාගී වූහ.මෙම අවස්ථාව සඳහා විවෘත පාර්ලිමේන්තු මුලාරම්භය සඳහා වන පාර්ලිමේන්තු සංසදයේ සම සභාපතිවරුන් වන ගරු අමාත්ය මහාචාර්ය ක්රිෂාන්ත අබේසේන සහ ගරු ෂානක්කියන් රාජපුත්තිරන් රාසමාණික්කම්, ගරු පාර්ලිමේන්තු මන්ත්රීවරුන් වන නීතිඥ චමින්ද්රාණි කිරිඇල්ල, එස්. එම්. මරික්කාර්, විශ්රාමික ලුතිනන් කමාණ්ඩර් එන්. ආර්. ප්රගීත් මධුරංග, විශ්රාමික මේජර් ජෙනරාල් ජී. ඩී. සූරියබණ්ඩාර සහ චම්පික හෙට්ටිආරච්චි යන මහත්ම මහත්මීහු සහභාගී වූහ.මෙහිදී තරුණ ප්රජාව විසින් අධ්යාපනය සහ උසස් අධ්යාපනය, දේශපාලන සහභාගීත්වය, වෘත්තීය පුහුණුව, රැකියා අවස්ථා, තාක්ෂණය, ව්යවසායකත්වය සහ තරුණයන් සඳහා පවතින අවස්ථා හා තොරතුරු වෙත ප්රවේශය ඇතුළු කරුණු රැසක් සම්බන්ධයෙන් සිය අදහස් හා යෝජනා සංසදය වෙත ඉදිරිපත් කරන ලදී.විශේෂයෙන් උසස් අධ්යාපන පාඨමාලා සහ උපාධි සම්පූර්ණ කිරීමට ගතවන කාලය අවම කිරීම, දේශපාලනයට සම්බන්ධ වීමට අපේක්ෂා කරන තරුණයන් සඳහා වැඩි අවස්ථා නිර්මාණය කිරීම සහ තරුණ ව්යවසායකත්වය පුළුල් කිරීම ඇතුළු කරුණු කෙරෙහි මෙහිදී අවධානය යොමු විය.තරුණ ප්රජාව විසින්ම සිය ප්රමුඛ ගැටලු හඳුනාගෙන, ඒවා සාකච්ඡා කර, පොදු කරුණු ලෙස වර්ගීකරණය කර ප්රතිපත්තිමය අවධානය යොමු විය යුතු ක්ෂේත්ර තෝරා ගැනීමෙන් අනතුරුව ඒවා පිළිබඳව පාර්ලිමේන්තු මන්ත්රීවරයන් සමඟ සෘජු සංවාදයක් පැවැත්වීම මෙම වැඩසටහනේ විශේෂත්වයක් වූයේය. වැඩසටහනේදී ඉදිරිපත් වූ තරුණ යෝජනා පාර්ලිමේන්තුවේ ඉදිරි සලකා බැලීම සඳහා යොමු කිරීමට පාර්ලිමේන්තු සංසදය සිය අවධානය යොමු කළේය. එමෙන්ම, අදාළ කරුණු සම්බන්ධයෙන් තරුණ නියෝජිතයන්ට පාර්ලිමේන්තුවේ අදාළ ආංශික අධීක්ෂණ කාරක සභා සමඟ ඉදිරියේදී සම්බන්ධ වීමට අවස්ථාව ලබා දීම පිළිබඳව ද සාකච්ඡා කෙරිණි.තවද, වැඩසටහනේදී මතු වූ නිර්දේශ සහ යෝජනා ලේඛනගත කර විවෘත පාර්ලිමේන්තු සංසදය වෙත ඉදිරිපත් කිරීම සඳහා තරුණ වාර්තාකරුවන් (Youth Rapporteur) පත් කිරීම ද මෙහිදී සිදු විය.මෙම මෙම වැඩමුළුව CII (Coalition for Inclusive Impact) ආයතනයේ සංවිධානය සහයෝගීත්වයෙන් සහ NDI (National Democratic Institute) ආයතනයේ අනුග්රාහකත්වයෙන් පැවැත්විණි.
2026-08-14
එල් නිනෝ (El Niño) තත්ත්වය ඇතුළු දේශගුණික විපර්යාස හමුවේ ශ්රී ලංකාවේ දේශගුණික ඔරොත්තු දීමේ හැකියාව ශක්තිමත් කිරීම සඳහා ප්රතික්රියාශීලී අර්බුද කළමනාකරණයෙන් ඔබ්බට ගොස් පූර්ව සූදානම් පාලන ක්රමවේදයක් (Anticipatory Crisis Governance) ස්ථාපිත කළ යුතු බව ශ්රී ලංකා දේශගුණය පිළිබඳ පාර්ලිමේන්තු සංසදයේදී අවධාරණය කෙරිණි.ගරු විරුද්ධ පාර්ශ්වයේ නායක පාර්ලිමේන්තු මන්ත්රී සජිත් ප්රේමදාස සහ ගරු පාර්ලිමේන්තු මන්ත්රී මහාචාර්ය එල්.එම්. අබේවික්රම යන මහත්වරුන්ගේ සම සභාපතිත්වයෙන් පාර්ලිමේන්තුවේදී පසුගියදා පැවති මෙම රැස්වීමේදී දේශගුණික විපර්යාස, එල් නිනෝ තත්ත්වය, කෘෂිකර්මාන්තය, ජල කළමනාකරණය, වනජීවී සංරක්ෂණය, අලි-මිනිස් ගැටුම, ආපදා කළමනාකරණය සහ පාරිසරික කළමනාකරණය ඇතුළු කරුණු රැසක් පිළිබඳව සාකච්ඡා කෙරිණි.රැස්වීමේ ප්රධාන විශේෂඥ කරුණු දැක්වීම සිදු කළ බටහිර ඕස්ට්රේලියා විශ්වවිද්යාලයේ වෙරළ සාගර විද්යාව පිළිබඳ වින්ත්රොප් මහාචාර්ය චරිත පට්ටිආරච්චී මහතා, දේශගුණික අවදානම් හමුවේ කල්තියා සූදානම් වීම, විද්යාත්මක දත්ත මත පදනම් වූ ප්රතිපත්ති සම්පාදනය සහ ආපදා කළමනාකරණය ශක්තිමත් කිරීමේ අවශ්යතාව පෙන්වා දුන්නේය. ඉන්දියාවේ ඔඩිෂා ප්රාන්තයේ ආපදා කළමනාකරණ ආදර්ශය ද මෙහිදී සාකච්ඡා වූ අතර, 2019 වසරේ සුළි කුණාටුවකදී පැය 24ක් තුළ පුද්ගලයන් මිලියනයක් පමණ ආරක්ෂිත ස්ථාන වෙත ගෙන යෑමට එම ප්රාන්තයට හැකි වූ බව පෙන්වා දෙන ලදී.අලි-මිනිස් ගැටුම පිළිබඳ අනුකමිටුවේ සභාපති ආචාර්ය සුමිත් පිලපිටිය මහතා විසින් ඉදිරිපත් කළ අන්තර්වාර වාර්තාව මගින්, දේශගුණික තත්ත්වයන් හමුවේ අලි-මිනිස් ගැටුම තීව්ර විය හැකි බැවින් ප්රජා මූලික විදුලි වැටවල්, කන්නයට අදාළ කුඹුරු වැටවල්, වනජීවී වාසස්ථාන සහ ජල කළමනාකරණය ඇතුළු කෙටි හා දිගුකාලීන ක්රියාමාර්ග අවශ්ය බව පෙන්වා දෙන ලදී.එල් නිනෝ ඔරොත්තු දීමේ ස්වාධීන විශේෂඥ උපදේශක කණ්ඩායමේ සභාපති මහාචාර්ය සම්පත් සෙනෙවිරත්න මහතා විසින් ඉදිරිපත් කළ අන්තර්වාර වාර්තාව මගින් කෘෂිකර්මාන්තය, ජෛව විවිධත්වය, ජල සුරක්ෂිතතාව සහ ග්රාමීය ආර්ථිකය කෙරෙහි දේශගුණික විපර්යාසවල බලපෑම විශ්ලේෂණය කර ඇති අතර, විද්යාත්මක පදනමක් සහිත දේශගුණික විපර්යාසවලට ඔරොත්තුදීමේ හැකියාවක් පිළිබඳ උපාය මාර්ගික රාමුවක් (Strategic Climate Resilience Framework) යෝජනා කර ඇත.වනජීවී සංරක්ෂණය සම්බන්ධයෙන් පශු වෛද්ය නිලධාරීන්ගේ හිඟය පියවීම, වනජීවී කළමනාකරණය ශක්තිමත් කිරීම සහ ජාතික උද්යාන ආශ්රිත මිනිස් ක්රියාකාරකම්, ප්ලාස්ටික් හා අපද්රව්ය හේතුවෙන් සිදුවන පාරිසරික හානි අවම කිරීම පිළිබඳව අවධානය යොමු විය. සංවේදී පූජනීය ප්රදේශවල පාරිසරික බලපෑම් අවම කිරීම, සංචාරක ක්ෂේත්රය සඳහා Differential Pricing ක්රමවේදය හඳුන්වාදීම සහ උද්යාන යටිතල පහසුකම් සංවර්ධනය පිළිබඳව ද යෝජනා ඉදිරිපත් විය.දේශගුණික විපර්යාස හමුවේ ශ්රී ලංකාවේ ඔරොත්තු දීමේ හැකියාව ශක්තිමත් කිරීම සඳහා විද්යාත්මක දත්ත මත පදනම් වූ ප්රතිපත්ති, ආයතනික සම්බන්ධීකරණය සහ කල්තියා සූදානම් වීමේ ක්රමවේද ශක්තිමත් කිරීමේ අවශ්යතාව ද අවධාරණය කෙරිණි.මෙම අවස්ථාව සඳහා ගරු පාර්ලිමේන්තු මන්ත්රීවරුන්, රාජ්ය නිලධාරීන්, ජාත්යන්තර ආයතන සහ සංවර්ධන හවුල්කරුවන්, පර්යේෂකයින්, තරුණ නියෝජිතයින් සහ සිවිල් සංවිධාන නියෝජිතයන් සහභාගී විය.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
