2025-02-10
පාර්ලිමේන්තුවේ ගරු කථානායක (වෛද්‍ය) ජගත් වික්‍රමරත්න මහතාගේ ප්‍රධානත්වයෙන් යුත් ශ්‍රී ලංකා පාර්ලිමේන්තුවේ නියෝජිත පිරිසක් 2025 පෙබරවාරි 6 සිට 10 දක්වා පාකිස්ථානයේ ලාහෝර් හි පැවති පොදුරාජ්‍ය මණ්ඩලීය පාර්ලිමේන්තු සංගමයේ (CPA) ආසියානු සහ අග්නිදිග ආසියානු කලාපීය පළමු ඒකාබද්ධ සමුළුවට සහභාගී වූහ. කලාපයේ ජාතික පාර්ලිමේන්තු සහ පළාත් ව්‍යවස්ථාදායකයන් නියෝජනය කරන කථානායකවරු, අමාත්‍යවරු, පාර්ලිමේන්තු මන්ත්‍රීවරු, වෘත්තිකයන් සහ නිලධාරීහු මෙම ගෞරවනීය අවස්ථාවට සහභාගී වූහ.
මේ අනුව CPA ආසියානු කලාපයේ කලාපීය විධායක කමිටුවේ සභාපතිවරයා ලෙස ගරු කථානායක (වෛද්‍ය) ජගත් වික්‍රමරත්න මහතා, පාර්ලිමේන්තුවේ මහලේකම් සහ CPA ආසියානු කලාපයේ කලාපීය ලේකම් කුෂානි රෝහණධීර මහත්මිය, ජාතික ඒකාබද්ධතා ගරු නියෝජ්ය අමාත්‍ය මුනීර් මුලාෆර් මහතා සහ ගරු පාර්ලිමේන්තු මන්ත්‍රීවරයන් වන නීතීඥ තුෂාරි ජයසිංහ, කේ. ඉලංකුමාරන් සහ නීතිඥ චිත්‍රාල් ප්‍රනාන්දු යන මහත්ම මහත්මීන්ගෙන් සමන්විත දූත පිරිස ශ්‍රී ලංකාව නියෝජනය කළහ.
කලාපීය සහයෝගීතාව ශක්තිමත් කිරීම සහ තිරසාර සංවර්ධනය සඳහා පාර්ලිමේන්තු උපාය මාර්ග ඉදිරියට ගෙන යාම කෙරෙහි මෙහිදී අවධානය යොමුවිය. "ආසියාවේ සහ අග්නිදිග ආසියාවේ සමානාත්මතාවය සහ තිරසාර අනාගතය සඳහා පාර්ලිමේන්තු උපාය මාර්ග" යන තේමාව යටතේ පැවති මෙම සමුළුව, කාන්තාවන්, තරුණයින් සහ ආබාධ සහිත පුද්ගලයින් බලගැන්වීම, දේශගුණික විපර්යාස සඳහා කලාපීය සහයෝගීතාව වැඩි දියුණු කිරීම, පුනර්ජනනීය බලශක්තිය ප්‍රවර්ධනය කිරීම, ආපදාවලට මුහුණ දීමේ හැකියාව වර්ධනය කිරීම, තිරසාර සංචාරක කර්මාන්තය ශක්තිමත් කිරීම සහ දේශපාලනයේදී සාධාරණ ලෙස නියෝජන අවස්ථාවන් ලබාදීම වැඩිදියුණු කිරීම වැනි ප්‍රධාන කලාපීය කරුණු පිළිබඳව මෙහිදී සාකච්ඡා කෙරිණි.
සමුළුවේ සමාරම්භක උත්සවය 2025 පෙබරවාරි 7 වන සිකුරාදා පැවති අතර මෙම අවස්ථාවට පාකිස්ථාන ජාතික සභාවේ ගරු කථානායක සර්දාර් අයාස් සාදික් මහතා ප්‍රධාන ආරාධිත අමුත්තා ලෙස සහභාගී විය. සමාරම්භක උත්සවය අමතමින්, ශ්‍රී ලංකා පාර්ලිමේන්තුවේ ගරු කථානායක (වෛද්‍ය) ජගත් වික්‍රමරත්න මහතා අවධාරණය කර සිටියේ විශේෂයෙන් ආර්ථික වර්ධනයට සහ මහජන විශ්වාසයට සැලකිය යුතු බාධකයක් ලෙස පවතින දූෂණයට එරෙහිව සටන් කිරීමේදී සාමූහිකත්වය සහ තිරසාර සංවර්ධනය ඉතා වැදගත් බවයි.
පාරදෘෂ්‍ය පාලනය, වගවීම සහ සදාචාරාත්මක නායකත්වය සඳහා ඇති අවශ්‍යතාවය ඔහු අවධාරණය කළ අතර, රාජ්‍ය අංශයේ ඩිජිටල්කරණය ක්‍රියාත්මක කිරීම, දූෂණ විරෝධී නීති ශක්තිමත් කිරීම සහ රාජ්‍ය-පෞද්ගලික හවුල්කාරිත්වයන් වැඩිදියුණු කරමින් ආයතනික අන්තර් සම්බන්ධතාව වැඩිදියුණු කිරීම ආදි පියවරයන් සඳහා ශ්‍රී ලංකාව ගෙන ඇති ක්‍රියාමාර්ග පිළිබඳව මෙහිදී කථානායකවරයා කරුණු පැහැදිළි කළේය . තවද, තිරසාරභාවය ප්‍රවර්ධනය කරමින් පාරිසරික, සමාජීය සහ සදාචාරාත්මක වටිනාකම් වැඩිදියුණු කිරීම අරමුණු කරගනිමින් ගරු ජනාධිපතිවරයා ඇතුළු රජය විසින් ආරම්භ කරන ලද ‘Clean Sri Lanka’ ව්‍යාපෘතිය පිළිබඳව ද ගරු කථානායක (වෛද්‍ය) ජගත් වික්‍රමරත්න මහතා විසින් මෙහිදී කරුණු පැහැදිළි කරන ලදී.
මේ අතර ගරු පාර්ලිමේන්තු මන්ත්‍රීනි නීතිඥ තුෂාරි ජයසිංහ මහත්මිය, "පළාත් පාලනය ශක්තිමත් කිරීම: ඵලදායී විමධ්‍යගතකරණය සඳහා ව්‍යවස්ථාදායක මාර්ග" යන මැයෙන් පැවති සැසියේ සාමාජිකාවක් ලෙස සහභාගී වූවාය.
ශ්‍රී ලංකාවේ ජාතික, පළාත් සහ ප්‍රාදේශීය යන පාලන ව්‍යුහය සහ පළාත් පාලන ආයතන පාලනය කරන ව්‍යවස්ථාදායක රාමුව පිළිබඳව ඇය විස්තර කළ අතර, සේවා සැපයීම, ආර්ථික සංවර්ධනය සහ පාලනය සම්බන්ධයෙන් පළාත් සභා සහ පළාත් පාලන ආයතනවල තීරණාත්මක කාර්යභාරය අවධාරණය කළාය. ජනතාවගේ ඉල්ලීම පරිදි රජය වත්මන් ක්‍රමයට ගැළපෙන පරිදි ඉදිරි ප්‍රතිසංස්කරණ සිදුකිරීමට අපේක්ෂා කරන බව ඇය තවදුරටත් ප්‍රකාශ කළාය.
මෙහිදී පාකිස්තාන පාර්ලිමේන්තුවේ ගරු කථානායකවරයා ද ශ්‍රී ලංකාවේ සෞඛ්‍ය සේවය ඇගයීමට ලක්කළ අතර එය කලාපය සඳහා ආදර්ශයක් බව පෙන්වා දුන්නේය. මෙමගින් ලෝක සෞඛ්‍ය සේවය තුළ ශ්‍රී ලංකාව ලබා ඇති සැලකිය යුතු ජයග්‍රහණ සහ කලාපීය සෞඛ්‍ය ක්ෂේත්‍රය තුළ එහි ක්‍රියාකාරී භූමිකාව පිළිබඳව විශේෂ අවධානය යොමු විය.
පාකිස්ථානයේ වැඩබලන ජනාධිපති සහ සෙනෙට් සභාවේ සභාපති ගරු සයිඩ් යූසුෆ් රාසා ගිලානි මහතා සමාප්ති උත්සවයේ ප්‍රධාන ආරාධිත අමුත්තා ලෙස සහභාගී විය.
ජාතික ඒකාබද්ධතා ගරු නියෝජ්ය අමාත්‍ය මුනීර් මුලාෆර් මහතා, සමුළුවේ සමාප්ති උත්සවයේදී අදහස් දක්වමින්, කලාපය මුහුණ දෙන ප්‍රධාන අභියෝග සම්බන්ධයෙන් සාමූහිකව කටයුතු කිරීමේ අවශ්‍යතාවය අවධාරණය කළේය. එසේම පන්ජාබ් පළාත් සභාව, පොදුරාජ්‍ය මණ්ඩලීය පාර්ලිමේන්තු සංගමයේ (CPA) ලේකම් කාර්යාලය සහ ලාහෝර් ජනතාව, සමුළුව සාර්ථක කර ගැනීම සඳහා දැක්වූ සුවිශේෂී දායකත්වය පිළිබඳව නියෝජ්ය අමාත්‍යවරයා සිය කෘතවේදීත්වය පළකර සිටියේය.
තිරසාර සංවර්ධන ඉලක්ක (SDGs) සාක්ෂාත් කර ගැනීම සඳහා සහ ආසියාව සහ අග්නිදිග ආසියාව තුළ ප්‍රජාතන්ත්‍රවාදී ආයතන ශක්තිමත් කරමින් කලාපීය සහයෝගීතාවය සඳහා ඇති කැපවීම නැවත තහවුරු කිරීමට මෙම සමුළුව ශ්‍රී ලංකාවට වැදගත් අවස්ථාවක් විය.
2026-11-14
දුම්රියේ ගැටී අලි ඇතුන් මිය යාම වැළැක්වීම සඳහා තිරසර විසඳුමක් ලබා දීමේ අරමුණින් ගනු ලැබූ ක්‍රියාමාර්ග රැසක් සභාගත කෙරෙයි. මෙම ක්‍රියාමාර්ග මඟින් දුම්රිය යටිතල පහසුකම් වැඩිදියුණු කිරීම, දුම්රිය සේවකයන් දැනුවත් කිරීම, වන අලි වාසස්ථාන කළමනාකරණය කිරීම සහ නවීන නිරීක්ෂණ හා හඳුනාගැනීමේ තාක්ෂණයන් හඳුන්වා දීම තුළින් දුම්රියේ ගැටී වන අලි මිය යාම අවම කිරීම අරමුණු කර ඇත.ගරු පාර්ලිමේන්තු මන්ත්‍රී නලින් බණ්ඩාර ජයමහ මහතා වාචික පිළිතුරු අපේක්ෂාවෙන් ඉදිරිපත් කළ ප්‍රශ්නවලට පරිසර ගරු අමාත්‍ය වෛද්‍ය දම්මික පටබැඳි මහතාගේ සභාගත කළ පිළිතුරෙන් ඉහත කරුණු අනාවරණය විය. පාර්ලිමේන්තුවේ දී සභාගත කරන ලද පිළිතුරට අනුව ,දුම්රිය දෙපාර්තමේන්තුවේ නැගෙනහිර දුම්රිය මාර්ගයේ දෙපස හොඳින් දර්ශනය වන හා වඩා හොඳින් වේගය පාලනය කළ හැකි දියුණු දුම්රිය කට්ටල හඳුන්වා දීම මෙන්ම ගල්ඔය හන්දියේ සිට හිඟුරක්ගොඩ හා ගල්ඔය හන්දියේ සිට කන්තලේ දෙසට සම්පූර්ණයෙන් අලි මාරුවන දුම්රිය මාර්ගය කි.මී. 27 ක් හඳුනාගෙන ඇති අතර එම ස්ථානවල ගල්අතුරා වන අලින්ට පහසුවෙන් ගමන් කිරීමට හැකිවන පරිදි දුම්රිය මාර්ගයේ සිල්පර අතර හිස්තැන් පිරීයන පරිදි කොන්ක්‍රීට් ගල් කියුබ් 800 ක් අතුරා අවසන් කොට ඇත.දුම්රිය මාර්ගයේ සමහර ස්ථානවල හා වංගු සහිත ස්ථානවල ගැවසෙන වන අලින් දුම්රිය රියදුරන්ට නොපෙනෙන බැවින් එම ස්ථානවල මීටර් 10 සිට 20 දක්වා යටි පඳුරු ඉවත් කිරීමට කටයුතු කරන අතර මේ යටතේ වන සංරක්ෂණ දෙපාර්තමේන්තුව විසින් කි.මී. 20 ක් සුද්ද පවිත්‍ර කොට තිබේ.දුම්රිය දෙපාර්තමේන්තුවේ රියදුරන්, දුම්රිය ස්ථානාධිපති, දුම්රිය මාර්ග භාරව කටයුතු කරන ඉංජිනේරුවරුන් හා දුම්රියේ රියදුරු සහායක නිලධාරීන් සඳහා දැනුවත් කිරීමේ වැඩසටහන් 2025.05.16 හා 17 යන දිනයන්හි සිදු කෙරිණි.හබරණ දුම්රිය ස්ථානය පසුකර කන්තලේ දෙසට ගමන් කිරීමේදී හමුවන වනසංරක්ෂණ රක්ෂිතය තුළ දුම්රිය මාර්ගයෙන් සැලකිය යුතු දුරින් ඔබ්බට ජලය සපයා ගැනීමට හැකියාවක් ඇති වැව් දෙකක් ඉදි කිරීම හා සුපෝෂණ කටයුතු සඳහා රු. මිලියන 25.4 ක ප්‍රතිපාදන වාරිමාර්ග දෙපාර්තමේන්තුව වෙත ලබා දී ඇත. ගල්ඔය හා මින්නේරිය අතර 141 ස්ථානයේ කාසිකොටේ දුම්රිය මාර්ගය හරහා අලි ගමන් කරන ස්ථානය නිරීක්ෂණය සඳහා CCTV Camera සවි කර ඇති අතර එය, අනුරාධපුර මෙහෙයුම් මැදිරිය මඟින් නිරීක්ෂණ කටයුතු කෙරෙන අතර වන අලි හඳුනා ගැනීම සඳහා Thermal Detector Camera දුම්රිය මත සවි කිරීමේ නියමු ව්‍යාපෘතියක් ආරම්භ කරමින් අඛණ්ඩව පරීක්ෂණ කටයුතු ශ්‍රී ලංකා දුම්රිය දෙපාර්තමේන්තුව, ආතර් සී ක්ලාක් පර්යේෂණ ආයතනය මගින් සිදු කෙරෙයි. දුම්රියේ ගැටීමෙන් 2020 වර්ෂයේ සිට 2026.10.12 දක්වා කාලය තුළ අලි ඇතුන් 81 දෙනෙකු මියගොස් ඇති බව සභාගත කළ වාර්තාවේ සඳහන් වෙයි.
2026-11-12
දෙවැනිවර කියවීමේ විවාදය හෙට (නොවැ. 13) සිට නොවැම්බර් 20 දක්වාකාරක සභා අවස්ථාවේ විවාදය නොවැම්බර් 21 සිට දෙසැම්බර් 14 දක්වා 2027 වසර සඳහා වන විසර්ජන පනත් කෙටුම්පතේ දෙවැනිවර කියවීම (අයවැය කථාව) මුදල් අමාත්‍යවරයා ලෙස ගරු ජනාධිපති අනුර කුමාර දිසානායක මහතා විසින් අද (12) පාර්ලිමේන්තුවට ඉදිරිපත් කරන ලදී.අද ප.ව. 1.30 ට පමණ අයවැය යෝජනා සමඟ ගරු ජනාධිපතිවරයා පාර්ලිමේන්තුවේ පිහිටි ජනාධිපතිවරයාගේ කාර්යාලයේ සිට සභාගර්භයට පැමිණි අතර ප.ව. 6.30 දක්වා අය වැය යෝජනා ඉදිරිපත් කරන ලදී.විදෙස් තානාපතිවරුන්, ඉහළ පෙළේ රාජ්‍ය නිලධාරීන්, ආරක්ෂක අංශ ප්‍රධානීන්, විනිසුරුවරුන් ඇතුළු ආරාධිතයන් රැසක් මෙම අවස්ථාවට සහභාගී වූහ. 2027 වසර සඳහා වන විසර්ජන පනත් කෙටුම්පතට අදාළ විවාදය (අයවැය විවාදය) නොවැම්බර් 13 සිට දෙසැම්බර් 14 දක්වා දින 26 ක් පැවැත්වීමට නියමිතව තිබේ.2026 ඔක්තෝබර් 07 වැනිදා පළමුවර කියවීම සඳහා පාර්ලිමේන්තුවට ඉදිරිපත් කළ 2027 වසර සඳහා වන විසර්ජන පනත් කෙටුම්පත, දෙවැනිවර කියවීමේ විවාදය හෙට (13) සිට නොවැම්බර් 20 දක්වා දින 07 ක් පැවැත්වීමට නියමිතය. අනතුරුව නොවැම්බර් 20 වැනිදා ප.ව. 6.00 ට අයවැය දෙවැනිවර කියවීමේ ඡන්ද විමසීම පැවැත්වේ.2027 වසර සඳහා වන විසර්ජන පනත් කෙටුම්පතට අදාළ කාරක සභා අවස්ථාවේ විවාදය නොවැම්බර් 21 සිට දෙසැම්බර් 14 දක්වා සෙනසුරාදා දින 04 ක්ද ඇතුළුව දින 19 ක් පැවැත්වීමට නියමිතව ඇත. ඉන් අනතුරුව විසර්ජන පනත් කෙටුම්පත තෙවනවර කියවීමේ ඡන්ද විමසීම දෙසැම්බර් 14 වැනිදා ප.ව. 6.00 ට පැවැත්වීමට නියමිතව තිබේ.
2026-11-12
“ශ්‍රී ලංකා ක්‍රිකට්” නමැති පනත් කෙටුම්පත සම්බන්ධයෙන් ශ්‍රේෂ්ඨාධිකරණයේ තීරණයආණ්ඩුක්‍රම ව්‍යවස්ථාවේ 121(1) ව්‍යවස්ථාව ප්‍රකාරව, ශ්‍රේෂ්ඨාධිකරණය හමුවේ අභියෝගයට ලක් කරන ලද “ශ්‍රී ලංකා ක්‍රිකට්” නමැති පනත් කෙටුම්පත සම්බන්ධයෙන් ශ්‍රේෂ්ඨාධිකරණයේ තීරණය ගරු කථානායක වෛද්‍ය ජගත් වික්‍රමරත්න මහතා අද (නොවැ. 12) පාර්ලිමේන්තුවට නිවේදනය කළේය.එම නිවේදනයට අනුව, පනත් කෙටුම්පතේ 29 වගන්තිය ආණ්ඩුක්‍රම ව්‍යවස්ථාවේ 14(1)(ඇ) ව්‍යවස්ථාව උල්ලංඝනය කරන බවත්, ආණ්ඩුක්‍රම ව්‍යවස්ථාවේ 84(2) ව්‍යවස්ථාවේ දක්වා ඇති විශේෂ බහුතර ඡන්දයෙන් පමණක් සම්මත කළ හැකි බවත් ශ්‍රේෂ්ඨාධිකරණය විසින් තීරණය කර ඇත.කෙසේ වෙතත්, ශ්‍රේෂ්ඨාධිකරණය විසින් යෝජනා කරන ලද සංශෝධනය කාරක සභා අවස්ථාවේ දී සිදු කිරීමෙන් පසු එම අනනුකූලතාවය ඉවත් වන අතර පනත් කෙටුම්පත පාර්ලිමේන්තුවේ සරල බහුතර ඡන්දයෙන් සම්මත කළ හැකි ය.තවද, පනත් කෙටුම්පතේ 7(1) වගන්තිය ආණ්ඩුක්‍රම ව්‍යවස්ථාවේ 12(1) ව්‍යවස්ථාව උල්ලංඝනය කරන බවත්, එය ආණ්ඩුක්‍රම ව්‍යවස්ථාවේ 84(2) ව්‍යවස්ථාවේ දක්වා ඇති විශේෂ බහුතර ඡන්දයෙන් පමණක් සම්මත කළ හැකි බවත් ශ්‍රේෂ්ඨාධිකරණය විසින් තීරණය කර ඇත.කෙසේ වෙතත්, ශ්‍රේෂ්ඨාධිකරණය විසින් යෝජනා කරන ලද සංශෝධනය කාරක සභා අවස්ථාවේ දී සිදු කිරීමෙන් පසු එම අනනුකූලතාවය ඉවත් වන අතර පනත් කෙටුම්පත පාර්ලිමේන්තුවේ සරල බහුතර ඡන්දයෙන් සම්මත කළ හැකි ය.තවද, ඉහත කරුණුවලට යටත්ව පනත් කෙටුම්පතේ අනෙකුත් කිසිදු විධිවිධානයක් ආණ්ඩුක්‍රම ව්‍යවස්ථාවේ කිසිදු විධිවිධානයකට අනනුකූල නොවන බව ශ්‍රේෂ්ඨාධිකරණය තවදුරටත් තීරණය කර ඇත.“ත්‍රස්තවාදයෙන් රාජ්‍යය ආරක්ෂා කිරීමේ” නමැති පනත් කෙටුම්පත පිළිබඳ ශ්‍රේෂ්ඨාධිකරණයේ තීරණයආණ්ඩුක්‍රම ව්‍යවස්ථාවේ 121(1) ව්‍යවස්ථාව ප්‍රකාරව, ශ්‍රේෂ්ඨාධිකරණය හමුවේ අභියෝගයට ලක් කරන ලද “ත්‍රස්තවාදයෙන් රාජ්‍යය ආරක්ෂා කිරීමේ” නමැති පනත් කෙටුම්පත පිළිබඳ ශ්‍රේෂ්ඨාධිකරණයේ තීරණයද කථානායකවරයා පාර්ලිමේන්තුවට දැනුම් දුන්නේය.එම නිවේදනය අනුව, ශ්‍රේෂ්ඨාධිකරණය විසින් තීරණය කර ඇත්තේ පහත සඳහන් සංශෝධන කාරක සභා අවස්ථාවේ දී සිදු කිරීමෙන් අනතුරුව (ඉන් සංශෝධන තුනක් දැනටමත් අතිරේක සොලිසිටර් ජනරාල්තුමා විසින් සිදු කිිරීමට එකඟ වී ඇත.) මෙම පනත් කෙටුම්පත පාර්ලිමේන්තුවේ සරල බහුතර ඡන්දයෙන් සම්මත කළ හැකි බවයි:-• “එම පොලිස් නිලධාරියාගේ ඉල්ලීම මත” යන වචන ඇතුළත් කිරීම මගින් 26(2) වගන්තිය සංශෝධනය කළ යුතු අතර, එම ඇතුළත් කිරීමෙන් අනතුරුව 26(2) වගන්තිය පහත පරිදි විය යුතු ය:-“(1) උපවගන්තිය යටතේ යම් සැකකරුවකු මහෙස්ත්‍රාත්වරයකු වෙත ඉදිරිපත් කිරීමෙන් පසු, වැඩිදුර විමර්ශන සිදු කිරීමේ අරමුණින් සැකකරු වැඩිදුරටත් දීර්ඝ කරන ලද කාලයක් සඳහා රඳවා තබා ගැනීමට අවශ්‍ය බවට විශ්වාස කිරීමට එම විමර්ශනය සිදු කරනු ලබන පොලිස් නිලධාරියාට සාධාරණ හේතු ඇති අවස්ථාවක දී, එම පොලිස් නිලධාරියාගේ ඉල්ලීම මත, මහෙස්ත්‍රාත්වරයා විසින් ලිඛිතව හේතු වාර්තා කරමින්, පැය විසිහතරක් නොඉක්මවන වැඩිදුර කාලසීමාවක් සඳහා එම සැකකරු අත්අඩංගුවේ තබා ගැනීම සඳහා බලය දෙනු ලැබිය හැකි ය”;• ඵලදායී අධිකරණ අධීක්ෂණයක් සහතික කිරීම සඳහා, 59(5)(ආ) වගන්තියේ සඳහන් “අභියාචනාධිකරණය” යන වචන වෙනුවට “ශ්‍රේෂ්ඨාධිකරණය” යන වචන ආදේශ කිරීමෙන් සංශෝධනය කළ යුතු ය;• අනවශ්‍ය ප්‍රතිපාදනයක් වන බැවින්, පනත් කෙටුම්පතේ 60(7) වගන්තිය ඉවත් කළ යුතු ය; සහ• 66(1) වගන්තිය පහත පරිදි නැවත සකස් කළ යුතු ය:-“මෙම පනත යටතේ නිකුත් කරන ලද හෝ කරන ලද විධායක නියෝගයක්, මෙහෙයුම් විධානයක් හෝ නියමයක් ආණ්ඩුක්‍රම ව්‍යවස්ථාවේ 126, 140 හෝ 141 ව්‍යවස්ථා යටතේ වූ නඩු කටයුතුවලදී ප්‍රශ්න කරනු ලැබිය හැකි ය.”“ආගමන” නමැති පනත් කෙටුම්පත පිළිබඳ ශ්‍රේෂ්ඨාධිකරණයේ තීරණයකථානායකවරයා විසින් නිවේදනය කරන ලද “ආගමන” නමැති පනත් කෙටුම්පත පිළිබඳ ශ්‍රේෂ්ඨාධිකරණයේ තීරණය පහත පරිදි වේ.• 43(3) වගන්තිය, එහි වර්තමාන ස්වරූපයෙන්, ආණ්ඩුක්‍රම ව්‍යවස්ථාවේ 12(1) සහ 14(1)(එ) ව්‍යවස්ථා සමඟ අනනුකූල වේ. කෙසේ වුවද, ශ්‍රේෂ්ඨාධිකරණ තීරණයේ සඳහන් කර ඇති පරිදි 43(3) වගන්තිය ප්‍රතියෝජනය කර නව 43(4) වගන්තිය ඇතුළත් කිරීමෙන් මෙම අනනුකූලතාවය ඉවත් වනු ඇත.• 169 වගන්තිය, එහි වර්තමාන ස්වරූපයෙන්, ආණ්ඩුක්‍රම ව්‍යවස්ථාවේ 76 ව්‍යවස්ථාව ද සැලකිල්ලට ගත් කළ, 12(1) ව්‍යවස්ථාවට අනනුකූල වේ. කෙසේ වුවද, ශ්‍රේෂ්ඨාධිකරණ තීරණයේ සඳහන් කර ඇති ආකාරයට 169(1) සහ 169(3) වගන්ති සංශෝධනය කිරීමෙන් මෙම අනනුකූලතාවය ඉවත් වනු ඇත.• 45 සහ 65 වගන්ති, එහි වර්තමාන ස්වරූපයෙන්, ආණ්ඩුක්‍රම ව්‍යවස්ථාවේ 12(1) ව්‍යවස්ථාව සමඟ අනනුකූල වේ. කෙසේ වුවද, 45(1) වගන්තිය ශ්‍රේෂ්ඨාධිකරණ තීරණයේ සඳහන් කර ඇති පරිදි සංශෝධනය කිරීමෙන් සහ ආගමන පහසුකම් සඳහා වන පිරිවැය සම්බන්ධයෙන් යෝජිත විධිවිධානයක් සුදුසු අංකනයක් යටතේ ඇතුළත් කිරීමෙන්, මෙම අනනුකූලතාවයන් ඉවත් වනු ඇත.• සලකා බලන ලද කරුණු පදනම් කරගෙන ආණ්ඩුක්‍රම ව්‍යවස්ථාව සමඟ වෙනත් කිසිදු අනනුකූලතාවයක් නොමැත. එසේම, “ලිඛිත” යන වචනය ඉවත් කිරීමෙන් 174 වගන්තිය සංශෝධනය කරන බවට ලබා දී ඇති එකඟතාවය ශ්‍රේෂ්ඨාධිකරණය විසින් සටහන් කර ඇත.• හඳුනාගත් අනනුකූලතාවයන් ඉවත් කිරීම සඳහා අවශ්‍ය සංශෝධන සිදු නොකරන්නේ නම්, අදාළ විධිවිධාන ආණ්ඩුක්‍රම ව්‍යවස්ථාවේ 84(2) ව්‍යවස්ථාව මඟින් නියම කර ඇති විශේෂ බහුතර ඡන්දයෙන් සම්මත කළ යුතු ය,යනුවෙන් ශ්‍රේෂ්ඨාධිකරණය විසින් තීරණය කර ඇත.ශ්‍රේෂ්ඨාධිකරණයේ උක්ත තීරණ අද දින පාර්ලිමේන්තුවේ කටයුතු දැක්වෙන නිල වාර්තාවේ මුද්‍රණය කළ යුතු බවට කථානායකවරයා නියෝග කළේය.
2026-11-11
ශ්‍රී ලංකාවේ ඇමෙරිකා එක්සත් ජනපද තානාපති කාර්යාලයේ වැඩබලන තානාපති / නියෝජ්ය ප්‍රධාන දූත මණ්ඩල නිලධාරී ඩේවිස් මයර්ස් (Davis Myers) මහතා පසුගියදා පාර්ලිමේන්තුවේ ගරු නියෝජ්ය කථානායක වෛද්‍ය රිස්වි සාලි මහතා හමු වී සුහද සාකච්ඡාවක නිරත විය. මෙම අවස්ථාවට පාර්ලිමේන්තුවේ මහලේකම් කුෂානි රෝහණදීර මහත්මිය ද එක්ව සිටියාය.නියෝජ්ය කථානායකවරයා විසින් මයර්ස් මහතා උණුසුම් ලෙස පිළිගනු ලැබූ අතර, ශ්‍රී ලංකාව සහ ඇමෙරිකා එක්සත් ජනපදය අතර පවතින දිගුකාලීන සබඳතා එහිදී යළිත් සිහිපත් කළ අතර විශේෂයෙන්ම අභියෝගාත්මක අවස්ථාවන්හිදී ඇමෙරිකානු රජය ශ්‍රී ලංකාවට ලබා දුන් අඛණ්ඩ සහයෝගය පිළිබඳව සිය කෘතඥතාව පළ කළේය. එසේම පාර්ලිමේන්තු කටයුතු ශක්තිමත් කිරීම සහ ආයතනික ධාරිතාව වර්ධනය කිරීම සඳහා අන්තර්ජාතික සංවර්ධනය සඳහා වූ එක්සත් ජනපද නියෝජිතායතනය (USAID) මඟින් ලබා දුන් සහාය ද අගය කළේය.මෙහිදී පාර්ලිමේන්තුවේ මහලේකම් කුෂානි රෝහණදීර මහත්මිය, ශ්‍රී ලංකාවේ ඇමෙරිකානු තානාපති කාර්යාලය සහ ඇමෙරිකානු කොංග්‍රස් අයවැය කාර්යාලය (U.S. Congressional Budget Office - CBO) එක්ව සංවිධානය කළ ශ්‍රී ලංකා පාර්ලිමේන්තු මන්ත්රීවරුන්ගේ ඇමෙරිකානු කොංග්‍රස් මණ්ඩලයේ සංචාරය පිළිබඳව අදහස් දැක්වූවාය. එමෙන්ම USAID ආයතනය මඟින් පාර්ලිමේන්තුවේ මහජන සම්බන්ධතා වැඩසටහන් ශක්තිමත් කිරීම ඇතුළු විවිධ ක්ෂේත්‍රයන්හි ලබා දුන් සහාය පිළිබඳව ද ඇය සිහිපත් කළාය.ශ්‍රී ලංකාව සහ ඇමෙරිකා එක්සත් ජනපදය අතර සහයෝගීතාව අඛණ්ඩව පවත්වාගෙන යාමටත්, එය තවදුරටත් ශක්තිමත් කිරීමටත් තම කැපවීම මයර්ස් මහතා යළිත් අවධාරණය කළේය. පාර්ලිමේන්තු ගොඩනැගිල්ලේ අලංකාරය සහ එහි ගෘහ නිර්මාණ ශිල්පීය වැදගත්කම මෙන්ම ශ්‍රී ලංකාවේ ස්වාභාවික සුන්දරත්වය ද ඔහු අගය කළේය.දෙපාර්ශ්වය අතර සමුද්‍රීය ආරක්ෂාව සහ මත්ද්‍රව්‍ය උවදුර මැඩලීම සඳහා ගත යුතු ක්‍රියාමාර්ග ඇතුළු දෙරටටම වැදගත් කරුණු පිළිබඳව සුහද සාකච්ඡා පැවැත්විණි.මයර්ස් මහතා පාර්ලිමේන්තු ගොඩනැගිල්ලේ නිරීක්ෂණ චාරිකාවක ද නිරත වූ අතර, එහිදී ගොඩනැගිල්ලේ ගෘහ නිර්මාණ ලක්ෂණ සහ පාර්ලිමේන්තුවේ පහසුකම් පිළිබඳව නිලධාරින් විසින් ඔහුට කරුණු පැහැදිලි කරන ලදී.ශ්‍රී ලංකාවේ ඇමෙරිකානු තානාපති කාර්යාලයේ දේශපාලන නිලධාරී රේචල් හගින්ස් මහත්මිය සහ දේශපාලන විශේෂඥ නස්රීන් මරික්කාර් මහත්මිය ද මෙම අවස්ථාවට එක්ව සිටියහ.
පාර්ලිමේන්තු අත්පොත
ශ්‍රී ලංකාවේ මැතිවරණ ක්‍රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්‍රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
