2024-05-16
පුවත් කාණ්ඩ : කාරක සභා පුවත්
වසර 19ක් පමා වී ඇති 2003 අංක 09 දරන පාරිභෝගික කටයුතු පිළිබඳ අධිකාරිය පනත සංශෝධනය කිරීම කඩිනමින් අවසන් කරන ලෙස පොදු ව්යාපාර පිළිබඳ කාරක සභාව විසින් පාරිභෝගික සේවා අධිකාරියට පසුගියදා දැනුම් දෙන ලදී.
පාරිභෝගික කටුයුතු පිළිබඳ අධිකාරියේ 2021 සහ 2022 මුදල් වර්ෂවල විගණකාධිපති වාර්තා සහ වත්මන් කාර්ය සාධනය පරීක්ෂා කිරීම සදහා පොදු ව්යාපාර පිළිබඳ කාරක සභාවේ සභාපති පාර්ලිමේන්තු මන්ත්රී ගරු රෝහිත අබේගුණවර්ධන මහතාගේ ප්රධානත්වයෙන් පොදු ව්යාපාර පිළිබඳ කාරක සභාව පසුගියදා රැස්වූ අවස්ථාවේදී මෙම දැනුම් දීම සිදු කෙරිණි.
ශ්රී ලංකා රේගුව හා සම්බන්ධ වෙමින් මහාපරිමාණ තොග ව්යාපාර වැටලීම් සිදු කිරීම සදහා විධිමත් වැඩපිළිවෙලක් සකස් කිරීම පිළිබඳ අවධානය යොමු වූ අවස්ථාවේදී වෙළඳ අමාත්යාංශ ලේකම්වරයා පවසා සිටියේ වත්මන් පනත අනුව වැටලීම් කිරීම සදහා බලය ඇත්තේ සිල්ලර වෙළදාම සම්බන්ධයෙන් පමණක් බවත් තොග හෝ නිෂ්පාදකයාගේ ගබඩා පරීක්ෂා කර නෛතික පියවර ගැනීමට බලයක් නැති බවයි. මේ අනුව අදාළ අංශ ආවරණය වන ලෙස පනත සංශෝධනය කිරීම සිදුවන බවත් මේ වන විට එය අවසන් අදියරේ පවතින බවත් ඒ මහතා පැවසීය. මෙහිදී කාරක සභා සභාපතිවරයා අවධාරණය කළේ 2004 වසරේ ආරම්භ කළ පනත සංශෝධනය කිරීම වසර 19ක් පමා වී ඇති බැවින් මෙම කටයුතු කඩිනමින් නිමා කරන ලෙසයි.
එහෙත් විගණකාධිපතිවරයා ඇතුළු කාරක සභාව පෙන්වා දුන්නේ තොග යන වචනය පැහැදිළිව පනතේ සදහන් කර ඇති බවයි. නමුත් ලේකම්වරයා පෙන්වා දුන්නේ නීතිපතිවරයා සමග මේ සම්බන්ධයෙන් සාකච්ඡා කළ බවත් ඒ සදහා පනත සංශෝධනය කිරීම සිදුකළ යුතු බවයි. මීට පෙර කෝප් කමිටු රැස්වීමේදී මේ සම්බන්ධ කිසිදු සදහනක් සිදු නොකළේ මන්දැයි මෙහිදී කාරක සභාව අධිකාරියේ නිලධාරීන්ගෙන් විමසන ලදී.
එසේම ජනමාධ්ය ඔස්සේ වෙළදපොළ මිල පාලනය පිළිබඳව නිරතුරුව දැනුවත් කිරීමේ අවශ්යතාව දැඩිව අවධාරණය කරන ලදී. ඒ සදහා අවශ්ය සියලු පහසුකම් සැපයීමට සූදානම් බවද මෙම රැස්වීමට සහභාගී වූ ජනමාධ්ය රාජ්ය අමාත්ය ශාන්ත බණ්ඩාර මහතා පැවසීය.
කාර්ය මණ්ඩලයේ පුරප්පාඩු 185 ක් පැවතීම සම්බන්ධයෙන් ද අවධානය යොමු විය. විමර්ශන නිලධාරීන් 450ක් සිටිය යුතු වුවද දැනට සේවය කරන්නේ 341 ක් බවත් අනාවරණය විය. තවද මෙම 341 ක් දෙනාගෙන් ද දිස්ත්රික් මට්ටමේ සේවය කරන්නේ 277ක් බවද නිලධාරීහු පැවසූහ. මේ අනුව අදාළ පුරප්පාඩු පිරවීමට මෙන්ම විමර්ශන නිලධාරීන් වඩාත් කාර්යක්ෂම ලෙස සේවයේ යෙදවිමට කඩිනමින් පියවර ගන්නා ලෙස ද කාරක සභා සභාපතිවරයා දැනුම් දුන්නේය.
එසේම පාරිභෝගික ද්රව්යන්හි නියැදි පරීක්ෂාව සදහා පරීක්ෂණාගාර පහසුකම් ලබා ගැනීමේදී අදාළ ප්රතිපාදන හිගකම ඇතුළු ගැටලු පිළිබඳව ද සාකච්ඡා විය. රාජ්ය ආයතන සමග සාකච්ඡා කර සහනදායි මුදලකට මෙම මේ සදහා ඇති හැකියාව පිළිබඳ සොයාබලන ලෙස ද කාරක සභාව විසින් දැනුම් දෙන ලදී.
වැටලීම් සිදුවන ප්රමාණයන් ප්රමාණවත් නොවීම පිළිබඳව ද අවධානය යොමු විය. 2023 වසරේ කීරී සම්බා සදහා උපරිම සිල්ලර මිලක් නියමකර තිබියදී සිදුකළ වැටලීම් සංඛ්යාව 1%ක් පමණක් බව අනාවරණය විය. මෙම වැටලීම්වලින් සිදු කරන්නේ මෙරට ජනතාව ආරක්ෂා කිරීම බැවින් ඒ සදහා විමර්ශන නිලධාරීන් නිසි ලෙස යොදවමින් කාර්යක්ෂම ලෙස සිදුකරන ලෙස දැනුම් දුන්නේය. වැටලීම් සම්බන්ධ ඉලක්කයන් ලබාදී කටයුතු කරන බවද අධිකාරියේ වැඩබලන සභාපතිවරිය පැවසුවාය. ඒ සම්බන්ධ වාර්තාවක් සතියක් ඇතුළත කාරක සභාවට යොමු කර ලෙස ද දැනුම් දෙන ලදී.
අනාරක්ෂිත හා තත්ත්වයෙන් බාල නිෂ්පාදන මගින් පාරිභෝගිකයන් ආරක්ෂා කිරීම සදහා හදුනාගත් නිෂ්පාදන කීපයක් සදහා ආරක්ෂිත ක්රමවේදයක් සකස් කිරීමට පෞද්ගලික සමාගමක් සමග 2014 වසරේ අධිකාරිය ගිවිසුමකට එලැඹ තිබූ බවත් ඒ සම්බන්ධයෙන් නිකුත් කර තිබූ විධානයක් නිෂ්ප්රභා කර ගැනීම සදහා අධිකාරියට විරුද්ධව සමාගම් කිහිපයක් නඩු ගොනු කර තිබූ බවත් මෙහිදී අනාවරණය විය. නිකුත් කර තිබූ වාරණ නියෝගය ඉවත්කරගැනීමට අධිකාරිය ප්රමාද වීම නිසා ව්යාපෘතිය ප්රමාදවීම හේතුවෙන් අදාළ පෞද්ගලික සමාගම ජාත්යන්තර බේරුම්කරණ අධිකරණයේ රු. බිලියන 2.7ක් ගෙවන ලෙස අධිකාරියට එරෙහිව 2018 වසරේ නඩු පවරා ඇති බවත් මෙහිදී හෙළි විය. මේ අනුව මේ සම්බන්ධයෙන් වගකිවයුතු පාර්ශ්ව හදුනා ගැනීම සදහා අපරාධ පරීක්ෂණ දෙපාර්තමේන්තුවේ පැමිණිලි සිදුකරන ලෙසත් තවදුරටත් අභ්යන්තර පරීක්ෂණයක් ද සිදු කරන ලෙසත් ඒ පිළිබඳව මාස දෙකක් තුළ කාරක සභාවට වාර්තා කරන ලෙස ද දැනුම් දෙන ලදී.
මහජනතාවගේ ආරක්ෂාව වෙනුවෙන් පවතින පාරිභොගික කටයුතු අධිකාරිය මෙම අඩුලුහුඩුකම් නිවැරදි කරගනිමින් වඩාත් කාර්යක්ෂම මාවතකට අවතීර්ණ විය යුතු බව කාරක සභා සභාපතිවරයා විසින් අවධාරණය කරන ලදී.
රාජ්ය අමාත්යවරුන් වන ගරු ඉන්දික අනුරුද්ධ සහ ගරු ශාන්ත බණ්ඩාර, පාර්ලිමේන්තු මන්ත්රීවරුන් වන ගරු මහින්දානන්ද අලුත්ගමගේ, ගරු ප්රේම්නාත් සී. දොලවත්ත, ගරු යූ. කේ. සුමිත් උඩුකුඹුර, ගරු සංජීව එදිරිමාන්න, ගරු එම් රාමේශ්වරන්, ගරු රාජිකා වික්රමසිංහ සහ ගරු මධුර විතානගේ යන මහත්ම මහත්මීහු මෙම කාරක සභා රැස්වීමට එක්ව සිටියහ.
2026-05-29
වර්තමාන රජයේ ජාතික ප්රතිපත්තිය අනුව “නිර්බාධිත පරිසරයක් - අන්තර්කරණය වූ සමාජයක්” නිර්මාණය කිරීම උදෙසා, ආබාධ සහිත තැනැත්තන් අන්තර්කරණය, සේවා සහ පහසුකම් සැලසීම වෙනුවෙන් 2027 වර්ෂයේ දී ක්රියාත්මක කළ යුතු වැඩසටහන් සඳහා අයවැය යෝජනා ලබා ගැනීමේ වැඩසටහනක් ආබාධ සහිත තැනැත්තන් සඳහා වන පාර්ලිමේන්තු සංසදය විසින් පවත්වන ලදි. ඒ ගරු පාර්ලිමේන්තු මන්ත්රී සුගත් වසන්ත ද සිල්වා මහතාගේ සභාපතිත්වයෙන් එම සංසදය පාර්ලිමේන්තුවේදී මේ මස 25 සහ 27 දිනයන්වලදී රැස්වූ අවස්ථාවේදීය. ආබාධ සහිත තැනැත්තන් අන්තර්කරණය මෙන්ම ඔවුන්ට සේවා සහ පහසුකම් සැලසීම සඳහා පවතින බාධක හඳුනාගනිමින්, ඊට තිරසර විසඳුම් ලබාදීම උදෙසා ආබාධ සහිත තැනැත්තන් සඳහා වන පාර්ලිමේන්තු සංසදය බහුවිධ ප්රවේශයකින් ක්රියාත්මක වෙමින් පවතී. එහි දිගුවක් ලෙස 2027 වර්ෂයට අදාළ අයවැය යෝජනා ඉදිරිපත් කිරීම තුළින් ආබාධ සහිත ප්රජාවගේ අයිතිවාසිකම් සුරක්ෂිත කිරීමත්, ඔවුන්ගේ පූර්ණ හා ඵලදායි සමාජ සහභාගීත්වය වඩාත් සංවිධිත ආකාරයට තහවුරු කිරීමත්, අපේක්ෂා කෙරේ.ඒ අනුව, දැනට ක්රියාත්මක කරමින් පවතින වැඩසටහන් අඛණ්ඩව පවත්වාගෙන යාමටත්, නව යෝජනා ක්රියාත්මක කිරීම සඳහාත්, ආබාධ සහිත තැනැත්තන්ගේ සංවිධාන නියෝජිතයින්, ඔවුන් වෙනුවෙන් පෙනී සිටින සංවිධාන නියෝජිතයින් සහ ආබාධ සහිත ක්ෂේත්රයේ ක්රියාකාරී වෘත්තීයවේදීන්ගේ සහභාගීත්වයෙන් මෙම යෝජනා ලබාගැනීම සිදු විය. මෙම පාර්ලිමේන්තු සංසදයේ රැස්වීම සඳහා එහි සාමාජික මන්ත්රීවරු පිරිසක්ද සහභාගී වූහ.
2026-05-29
වැටුප් සහිතව වැඩ තහනමට ලක්ව සිටින රියදුරන් පිළිබඳ සාකච්ඡාවක් ප්රවාහන, මහාමාර්ග සහ නාගරික සංවර්ධන කටයුතු පිළිබඳ අමාත්යාංශයීය උපදේශක කාරක සභාවේදී පසුගියදා පාර්ලිමේන්තුයව්දී සිදු කෙරිණි. ඒ ප්රවාහන, මහාමාර්ග සහ නාගරික සංවර්ධන ගරු අමාත්ය බිමල් රත්නායක මහතාගේ සභාපතීත්වයෙන් එම කාරක සභාව රැස් වූ අවස්ථාවේදීය. විවිධ විනය ගැටලු හේතුවෙන් රියදුරන් 400ක් 500ක් පමණ වැඩ තහනමට ලක්ව සිටින බවත් ඔවුන්ගෙන් ඇතැම් රියදුරන් තවමත් වැටුප් ලබා ගනිමින් සිටින බවත් පැමිණි නිලධාරීහු පෙන්වා දුන්හ. විවිධ නීතිමය තත්ත්වයන් යටතේ අධිකරණ ක්රියාමාර්ග නිසා මෙලෙස වැටුප් ගෙවීම සිදු වන බවත් එසේ වැඩ තහනමට ලක්ව සිටින ඇතැම් රියදුරන් පෞද්ගලික බස්රථ වල රියදුරු වෘත්තියේ යෙදෙමින් ආදායම් උපයන බවත් නිලධාරීහු වැඩිදුරටත් ප්රකාශ කළහ.මේ පිළිබඳ දීර්ඝව සාකච්ඡා කිරීමෙන් අනතුරුව, අවශ්ය නීති උපදෙස් කඩිනමින් ලබාගෙන විනය ක්රියාමාර්ග ගැනීමේ ක්රමවේද සම්බන්ධයෙන් නැවත සලකා බලන ලෙස ගරු අමාත්යවරයා විසින් නිලධාරීන්ට උපදෙස් ලබා දෙන ලදි.එසේම ප්රවාහන ක්ෂේත්රය හා සම්බන්ධ නීතිමය රාමුව ශක්තිමත් කිරීම තුළින් සාධනීය දිශානතියක් කරා ප්රවාහන ක්ෂේත්රය යොමු කරවීම සඳහා වන අනු කාරක සභාවේ සහ දුම්රිය දෙපාර්තමේන්තුව, කාර්යක්ෂම සහ සතුටුදායක සේවා උත්පාදනය කරන ස්ථානයක් බවට පත් කිරීම සඳහා වන අනු කාරක සභාවේ අවසන් වාර්තාව සහ අතුරු වාර්තාව පිළිවෙළින් ඉදිරිපත් කිරීම සිදු විය.ප්රවාහන, මහාමාර්ග සහ නාගරික සංවර්ධන අංශවල දිවයිනේ විවිධ ප්රදේශවල පවතින ගැටලු මෙහිදී ගරු මන්ත්රීවරයන් විසින් කාරක සභා සභාපතිවරයාගේ අවධානයට යොමු කරන ලදී. මේ පිළිබඳ කරුණු විමසූ කාරක සභා සභාපතිවරයා අවශ්ය පියවර ගැනීම සදහා නිලධාරීන්ට උපදෙස් ලබා දුන්නේය.ගරු නියෝජ්ය කාරක සභා සභාපතිනි හේමාලි වීරසේකර, ගරු නියෝජ්ය අමාත්යවරුන් වන එරංග ගුණසේකර, (වෛද්ය) ප්රසන්න ගුණසේන යන මහත්වරුන්, කාරක සභා සාමාජික මන්ත්රීවරයන් ඇතුළු මැති ඇමතිවරු පිරිසක් ද, ප්රවාහන, මහාමාර්ග සහ නාගරික සංවර්ධන අමාත්යාංශයේ නිලධාරීහු පිරිසක් ද මෙම කාරක සභා රැස්වීමට සහභාගී වූහ.
2026-05-29
දේශගුණික විපර්යාස හේතුවෙන් ශ්රී ලංකාවේ අලි ඇතුන් සහ දිවියන්ට එල්ල වන අහිතකර බලපෑම් අවම කිරීම පිළිබඳව සාකච්ඡාවක් ශ්රී ලංකා දේශගුණය පිළිබඳ පාර්ලිමේන්තු සංසදය විසින් පසුගියදා පාර්ලිමේන්තුවේදී පවත්වන ලදී.එම සංසදයේ සම සභාපතිවරුන් වන ගරු විපක්ෂ නායක සජිත් ප්රේමදාස සහ පාර්ලිමේන්තු මන්ත්රී (මහාචාර්ය) එල්.එම්. අබේවික්රම යන මහත්වරුන්ගේ ප්රධානත්වයෙනි.මෙහිදී එල්-නිනො සහ ලා-නිනෝ දේශගුණික තත්ත්වයන්, අලි ඇතුන් සහ දිවියන්ගේ ජීවන රටාවට ඇති කරන බලපෑම් පිළිබඳව මෙම සාකච්ඡාවේදී විශේෂ අවධානය යොමු කෙරුණු අතර වනජීවී සංරක්ෂණ දෙපාර්තමේන්තුවේ නිලධාරීහු ඒ සම්බන්ධයෙන් කරුණු පැහැදිලි කළහ.දේශගුණික විපර්යාස නිසා වනජීවීන්ට සිදුවන බලපෑම් පිළිබඳව පුළුල් අවධානයක් යොමු කරන බවත්, එහි පළමු පියවර ලෙස අලි ඇතුන් සහ දිවියන් සම්බන්ධ ගැටලු පිළිබඳව විශේෂ අවධානයක් යොමු කරන බවත් ගරු විපක්ෂ නායක සජිත් ප්රේමදාස මහතා සඳහන් කළේය. තවද, මෙම ගැටලුව සම්බන්ධයෙන් ඉදිරියේදී පුළුල් අධ්යයනයක් සිදු කර අදාළ පාර්ශ්වයන් වෙත නිර්දේශ ඉදිරිපත් කිරීමට අපේක්ෂා කරන බව ද හෙතෙම වැඩිදුරටත් පැවසීය.මෙම සාකච්ඡාව සඳහා දේශගුණික විශේෂඥයින් සහ පරිසරවේදීන් ද සහභාගී වී සිය අදහස් සහ යෝජනා ඉදිරිපත් කළහ. මිනිස් – අලි ගැටුම් අවම කිරීම ඇතුළු වනජීවී ආරක්ෂාවට අදාළ කරුණු රැසක් ද මෙහිදී සාකච්ඡා කෙරිණි.ගරු පාර්ලිමේන්තු මන්ත්රීවරුන් වන අජිත් පී. පෙරේරා, චම්පික හෙට්ටිආරච්චි, රියාස් ෆාරුක් සහ චන්දිම හෙට්ටිආරච්චි යන මහත්වරුන් මෙම රැස්වීමට සහභාගී වූහ.
2026-05-29
2002 අංක 25 දරන සාපරාධී කාරණාවල දී අන්යෝන්ය සහයෝගිතාව දැක්වීමේ පනත යටතේ ශ්රී ලංකා ප්රජාතාන්ත්රික සමාජවාදී ජනරජයේ ආණ්ඩුව සහ මාලදිවයින් ජනරජයේ ආණ්ඩුව අතර 2025 ජූලි මස දී අත්සන් කරන ලද ගිවිසුම සම්බන්ධයෙන් අධිකරණ සහ ජාතික ඒකාබද්ධතා අමාත්යවරයා විසින් පනවන ලද නියමය අධිකරණ සහ ජාතික ඒකාබද්ධතා කටයුුතු පිළිබඳ අමාත්යාංශයීය උපදේශක කාරක සභාවේදී සලකා බැලීමෙන් අනතුරුව අනුමත කෙරිණි. අධිකරණ සහ ජාතික ඒකාබද්ධතා කටයුුතු ගරු අමාත්ය (නීතීඥ) හර්ෂණ නානායක්කාර මහතාගේ සභාපතිත්වයෙන් එම කාරක සභාව පාර්ලිමේන්තුවේදී පසුගියදා රැස්වූ අවස්ථාවේ මෙලෙස අනුමැතිය හිමිවිය. 2026 ජනවාරි 05 දිනැති අංක 2470/04 දරන අති විශේෂ ගැසට් පත්රයේ පළ කරන ලද මෙම නියමය 2026.05.19 වැනි දින පාර්ලිමේන්තුවට ඉදිරිපත් කර ඇත. ශ්රී ලංකාවේ ආණ්ඩුව සහ මාලදිවයින් ජනරජයේ ආණ්ඩුව අතර ඇති කරගත් මෙම ගිවිසුම මගින් සාපරාධී කාරණාවලදී දෙපාර්ශවයටම අන්යෝන්ය නෛතික සහයෝගීතාව දැක්වීමට මඟ පාදයි. ඒ අනුව අති විශේෂ ගැසට් පත්රයේ සඳහන් පරිදි මෙම නියමය මගින්, ත්රස්තවාදයට සම්බන්ධ අපරාධ සහ ත්රස්තවාදයට මුදල් සැපයීම සඳහා භාවිත කිරීමට අදහස් කරන ලද අරමුදල්, අපරාධයකින් උත්පාදිත දේ සහ අපරාධ මෙවලම් සොයා ගැනීම, තහනම් කිරීම, අහිමි කිරීම හෝ රාජසන්තක කිරීම ඇතුළු අපරාධ වැළැක්වීම, විමර්ශනය කිරීම, නඩු පැවරීම සහ මැඩ පැවැත්වීම සම්බන්ධ සාපරාධී කාරණාවල දී අන්යෝන්ය නෛතික සහයෝගීතාව දැක්වීම මගින් ගිවිසුමේ දෙපාර්ශවයේම භූමිකාව වඩාත් ඵලදායී ලෙස ඉටු කිරීම පිළිබඳව සලකා බලනු ලැබේ. අධිකරණ ක්ෂේත්රයේ පවතින පුරප්පාඩු සම්බන්ධයෙන්ද මෙහිදී අවධානය යොමු වූ අතර 2018 වසරෙන් පසු බඳවා ගැනීම් සිදු නොකිරීම නිසා මේ දක්වා පුරප්පාඩු 2647 ක් ඇති බව නිලධාරීහු පැවසූහ. ඒ අනුව බඳවා ගැනීම් කඩිනමින් සිදු කරන ලෙස අමාත්යවරයා අදාළ නිලධාරීන්ට උපදෙස් ලබා දුන්නේය. මීට අමතරව, ගරු මන්ත්රීවරු අධිකරණ, බන්ධනාගාර හා නීති ක්ෂේත්රයට අදාළව පවතින ගැටලු කාරක සභාවට ඉදිරිපත් කළ අතර ඒවාට විසඳුම් ලබා දීම සම්බන්ධයෙන් කාරක සභා සභාපතිවරයා විසින් අදාළ නිලධාරීන්ට උපදෙස් ලබා දෙන ලදී. ගරු නියෝජ්ය අමාත්ය (නීතීඥ) සුනිල් වටගල මහතා ඇතුළු ගරු මන්ත්රීවරු පිරිසක් ද අධිකරණ සහ ජාතික ඒකාබද්ධතා අමාත්යාංශය සහ ඒ යටතේ ඇති ආයතන නියෝජනය කරන නිලධාරීහු පිරිසක් ද මෙම කාරක සභා රැස්වීමට සහභාගී වූහ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
