2024-02-12
පාර්ලිමේන්තු මහලේකම්ගේ කාර්යමණ්ඩලයට එක් වූ නවක සේවකයින් සඳහා සිදු කෙරෙන සේවක අනුස්ථාපන (සමාරම්භක) පුහුණු වැඩටහන පසුගියදා (පෙබ. 02) පාර්ලිමේන්තුවේදී පැවැත්විණි. පාර්ලිමේන්තු මහලේකම් කුෂානි රෝහණධීර මහත්මිගේ ප්රධානත්වයෙන් පැවැත්වූ එම වැඩසටහනට පාර්ලිමේන්තු කාර්යමණ්ඩල ප්රධානී සහ නියෝජ්ය මහලේකම් චමින්ද කුලරත්න, සහකාර මහලේකම් හංස අබේරත්න යන මහත්වරුන්ද සහභාගී වූහ.
පාර්ලිමේන්තුවේ මානව සම්පත් සංවර්ධන කාර්යාංශය විසින් සංවිධනය කළ මෙම වැඩසටහන සඳහා සේවකයින් 60 ක් පමණ සභාගීවී සිටියහ.
මිලියන ගණනක් වූ පිරිසක් අතරින් මෙරට උත්තරීතරම ආයතනය වන පාර්ලිමේන්තුවේ සේවය එක්වීමට ලැබීම භාග්යයක් කොට සලකන ලෙස පාර්ලිමේන්තු මහලේකම් කුෂානි රෝහණධීර මහත්මිය සේවක පිරිස ආමන්ත්රණය කරමින් පැවසුවාය. පාර්ලිමේන්තුවේ සම්ප්රදායන් ආරක්ෂා කරගනිමින් එහි කිර්තිය වර්ධනය කිරීම සෑම සේවකයෙකුගේම වගකීම වන බව මෙහිදී මහලේකම්වරිය සිහිපත් කළාය. විනය ගරුකව, උපරිම කාර්යක්ෂමතාවයකින්, අවංකව රාජකාරිය ඉටුකරන ලෙස සඳහන් කළ ඇය, ඉදිරියේදී පුද්ගල කාර්යසාධනය මත පදනව්ම උසස්වීම් ලබාදීම සිදු කරන බව අවධාරණය කළේය.
එස් 5 (5S) සංකල්පය අනුගමනය කිරීමෙන් යහපත්වූ කාර්යාල පුරුදු සහ භාවිතාවන් ඇති කරගැනීමේ වැදගත්කම පිළිබඳව පාර්ලිමේන්තු කාර්යමණ්ඩල ප්රධානී සහ නියෝජ්ය මහලේකම් චමින්ද කුලරත්න මහතා මෙහිදී දීර්ඝලෙස කරණු දැක්වුවේය. පාර්ලමේන්තු සේවය පිළිබඳව ද නවකයින් දැනුවත් කළ නියෝජ්ය මහලේකම්වරයා පාර්ලමේන්තු සේවයේ පවතින විශ්වසනීය බව ආරක්ෂා කිරීමේ වැදගත්කම ද අවධාරණය කළේය.
පාර්ලිමේන්තු සේවකයින් සියලු දෙනා ආයතනයේ පවතින විනය කාර්ය පටිපාටිය පිළිබඳව දැනුවත් වියයුතු බවත් ඊට අනුකුලව සිය රාජකාරි කටයුතු සිදු කිරීමේ වැදගත්කම පිළිබඳව පුහුණු සැසියේදී අදහස් දක්වමින් සහකාර මහලේකම් හංස අබේරත්න මහතා අවධාරණය කළේය.
මෙහිදී පාර්ලිමේන්තු දෙපාර්තමේන්තු ප්රධානීන් වන පරිපාලන නියෝජ්ය අධ්යක්ෂ ශ්යාමා ප්රනාන්දු, අධ්යක්ෂ ව්යවස්ථාදායක සේවා හා සන්නිවේදන අධ්යක්ෂ (වැඩ බලන) එච්.ඊ. ජනකාන්ත සිල්වා, වේත්රධාරී කුෂාන් ජයරත්න, හැන්සාඩ් සංස්කාරක නයනි ලොකුකොඩිකාර ද සිල්වා, ආහාර හා ගෘහපාලන සේවා දෙපාර්තමේන්තුවේ අධ්යක්ෂ රාජ් එදිරිසිංහ, මුල්ය දෙපාර්තමේන්තුවේ අධ්යක්ෂ සරත් කුමාර, තොරතුරු පද්ධති හා කළමනාකරණ දෙපාර්තමේන්තුවේ අධ්යක්ෂ යු. නවගමුව, පරිපාලන සහකාර අධ්යක්ෂ (ආයතන අංශය) කමල් උඩපොළ, මානව සම්පත් සංවර්ධන කාර්යාංශයේ ප්රධානී මංජුලා විතානගේ, සම්බන්ධිකරණ ඉංජිනේරු දෙපාර්තමේන්තුවේ සහකාර සම්බන්ධිකරණ ඉංජිනේරු කුෂාන් හැන්නදි යන මහත්ම මහත්මීහු තම දෙපාර්තමේන්තුවල කාර්ය භාරයන් පිළිබඳව නවකයින් දැනුවත් කළහ.
2026-09-11
• විසි දෙවන ආණ්ඩුක්රම ව්යවස්ථා සංශෝධනය සැප්තැම්බර් 24 සහ 25 විවාදයටසැප්තැම්බර් 22 සිට 25 දක්වා පැවැත්වීමට නියමිත මීළඟ පාර්ලිමේන්තු සතියේ කටයුතු තීරණය වූ බව පාර්ලිමේන්තුවේ මහ ලේකම් කුෂානි රෝහණදීර මහත්මිය පවසයි. ගරු කථානායක වෛද්ය ජගත් වික්රමරත්න මහතාගේ ප්රධානත්වයෙන් ඊයේ (සැප්. 10) රැස්වූ පාර්ලිමේන්තු කටයුතු පිළිබඳ කාරක සභාවේදී මෙම කටයුතු තීරණය වී ඇත.පාර්ලිමේන්තුව රැස්වන මෙම සෑම දිනක ම පෙ.ව. 9.30 සිට පෙ.ව. 10.00 දක්වා කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන්කර ඇත. පෙ.ව. 10.00 සිට 11.00 දක්වා කාලය වාචික පිළිතුරු අපේක්ෂා කරන ප්රශ්න සඳහා වෙන් කර ඇති අතර පෙ.ව. 11.00 සිට 11.30 දක්වා කාලය ස්ථාවර නියෝග 27(2) යටතේ වන ප්රශ්න සඳහා වෙන් කර තිබේ.මේ අනුව, සැප්තැම්බර් 22 අගහරුවාදා පෙ.ව. 11.30 සිට ප.ව. 5.00 දක්වා ඛනිජ තෙල් සම්පත් පනත යටතේ අංක 2497/37 දරන අති විශේෂ ගැසට් පත්රයේ පළ කරන ලද නියෝග සහ අපනයන කෘෂිකර්මාන්තය ප්රවර්ධන (සංශෝධන) පනත් කෙටුම්පත (දෙවැනි වර කියවීම) විවාදයට ගැනීමට තීරණය වී ඇත. අනතුරුව ප.ව. 5.00 ට පෞද්ගලික මන්ත්රී පනත් කෙටුම්පතක් වන ට්රෙඩ්සෝ සංවර්ධන පදනම (සංස්ථාගත කිරීමේ) පනත් කෙටුම්පත දෙවැනි වර කියවීමෙන් අනතුරුව ව්යවස්ථාදායක ස්ථාවර කාරක සභාව වෙත යොමු කිරීමට නියමිතව ඇත.ඉන්පසු ප.ව. 5.00 සිට ප.ව. 5.30 දක්වා විපක්ෂය විසින් ගෙනෙනු ලබන සභාව කල්තබන අවස්ථාවේ යෝජනාව විවාදයට ගැනීමට නියමිතය.සැප්තැම්බර් 23 බදාදා පෙ.ව. 11.30 සිට ප.ව. 5.00 දක්වා ශ්රී ලංකා වරලත් මාධ්ය වෘත්තිකයන්ගේ ආයතනය පනත් කෙටුම්පත දෙවැනි වර කියවීමේ විවාදය පැවැත්වීමටත් තීරණය කර තිබේ. අනතුරුව ප.ව. 5.00 සිට ප.ව. 5.30 දක්වා සභාව කල්තබන අවස්ථාවේ ප්රශ්න සඳහා කාලය වෙන් කර තිබේ.සැප්තැම්බර් 24 බ්රහස්පතින්දා පෙ.ව. 11.30 සිට ප.ව. 7.00 දක්වා විසි දෙවන ආණ්ඩුක්රම ව්යවස්ථා සංශෝධන පනත් කෙටුම්පත සහ අධිකරණ සංවිධාන (සංශෝධන) පනත් කෙටුම්පත දෙවන වර කියවීමේ විවාදය පැවැත්වීම සඳහා කාලය වෙන් කර ඇත. ආණ්ඩුක්රම ව්යවස්ථාවේ 121 ව්යවස්ථාව ප්රකාරව මෙම පනත් කෙටුම්පත්වලට එරෙහිව ගොනුකර ඇති පෙත්සම්වලට අදාළ ශ්රේෂ්ඨාධිකරණ තීරණය ලබා දීමෙන් අනතුරුව එය ගරු කථානායකවරයා විසින් සභාවට නිවේදනය කිරීමට යටත්ව අදාළ දෙදින විවාදය පැවැත්වීමට එකඟත්වය පළ වී ඇත. සැප්තැම්බර් 25 සිකුරාදා පෙ.ව. 11.30 සිට ප.ව. 7.00 දක්වා විසි දෙවන ආණ්ඩුක්රම ව්යවස්ථා සංශෝධන පනත් කෙටුම්පත සහ අධිකරණ සංවිධාන (සංශෝධන) පනත් කෙටුම්පත දෙවන වර කියවීමේ විවාදය දෙවැනි දිනටත් පැවැත්වීමට මෙහිදී තීරණය වී තිබේ.
2026-09-09
ආරක්ෂක මාණ්ඩලික ප්රධානී (ඉවත් කිරීමේ) පනත් කෙටුම්පත අද (සැප්. 09) පාර්ලිමේන්තුවේදී සම්මත විය.අදාළ පනත් කෙටුම්පතේ දෙවැනිවර කියවීමේ විවාදය අද පෙරවරු 11.00 සිට පස්වරු 5.00 දක්වා පාර්ලිමේන්තුවේදී පැවැති අතර, අනතුරුව ඡන්ද විමසීමකින් තොරව එය සම්මත කෙරිණි.මෙම පනත් කෙටුම්පත පළමුවර කියවීම සඳහා 2026 අගෝස්තු 04 දින පාර්ලිමේන්තුවට ඉදිරිපත් කර තිබිණි. ආරක්ෂක මාණ්ඩලික ප්රධානී තනතුර ස්ථාපිත කරමින් හඳුන්වාදුන් 2009 අංක 35 දරන ආරක්ෂක මාණ්ඩලික ප්රධානී පනත ඉවත් කිරීම සඳහා මෙම පනත් කෙටුම්පත ඉදිරිපත් කර තිබේ.2009 වසරේදී සම්මත කරන ලද එම පනත මගින් කාලීන අවශ්යතා අනුව සන්නද්ධ හමුදා සහ ආරක්ෂක අමාත්යාංශය අතර කටයුතු සම්බන්ධීකරණය ඇතුළු කාර්යයන් සඳහා ආරක්ෂක මාණ්ඩලික ප්රධානී තනතුර ස්ථාපිත කර තිබිණි.ඒ අනුව මෙම පනත් කෙටුම්පත මගින් 2009 අංක 35 දරන ආරක්ෂක මාණ්ඩලික ප්රධානී පනත ඉවත් කිරීමත් සමඟ ආරක්ෂක මාණ්ඩලික ප්රධානී තනතුරද අවසන් කිරීමට නියමිතය.තවද, මෙම පනත ක්රියාත්මක වීමත් සමඟ ආරක්ෂක මාණ්ඩලික ප්රධානී කාර්යාලයට අයත් සියලු චංචල හා නිශ්චල දේපළ, ආරක්ෂක විෂය පවරා ඇති අමාත්යවරයාගේ අමාත්යාංශය වෙත පැවරෙනු ඇති.
2026-09-09
වසර 50කට අධික කාලයක් භාවිතා කර ඇති පැරණි හා යල් පැන ගිය යන්ත්රෝපකරණ ක්රමයෙන් ඉවත් කර, නවීන තාක්ෂණයෙන් සමන්විත කාර්යක්ෂම උපකරණ මිලදී ගනිමින්, ජාත්යන්තර වෙළෙඳපොළ ඉලක්ක කරගත් ඉහළ තාක්ෂණයෙන් සහ උසස් ආරක්ෂිත මුද්රණ (Smart Security Printing) හැකියාවන්ගෙන් සමන්විත නවීන මුද්රණ ඒකකයක් ස්ථාපිත කිරීම සඳහා රජයේ මුද්රණ නීතිගත සංස්ථාව නවීකරණය කිරීමට අවශ්ය සැලසුම් සකස් කර ඇති බව ආචාර්ය හරිනි අමරසූරිය ගරු අග්රාමාත්ය සහ අධ්යාපන,උසස් අධ්යාපන සහ වෘත්තීය අධ්යාපන අමාත්යතුමිය පාර්ලිමේන්තුවේදී පැවසුවාය.වාචික පිළිතුරු අපේක්ෂාවෙන් ගරු පාර්ලිමේන්තු මන්ත්රී මේජර් ජෙනරාල් (විශ්රාමික) ජී.ඩී. සූරියබණ්ඩාර මහතා විසින් යොමු කළ ප්රශ්නවලට පිළිතුරු දෙමින් අග්රාමාත්යවරිය මේ බව ප්රකාශ කළාය.රජයේ මුද්රණ නීතිගත සංස්ථාවේ ස්ථීර සේවකයන් 445 දෙනෙකු සහ කොන්ත්රාත් පදනමින් තවත් සේවකයන් 21 දෙනෙකු සේවයේ නිරත වන බව අග්රාමාත්යවරිය පැවසුවාය.පාදුක්ක, වටරැක ප්රදේශයේ ක්රියාකාරී තත්ත්වයේ පවතින රජයේ මුද්රණ නීතිගත සංස්ථාවේ මුද්රණාලය මඟින් රජයෙන් ලැබෙන ඇණවුම් පරිදි පාසල් පෙළපොත්/මොඩියුල මුද්රණය, ආරක්ෂිත මුද්රණ කටයුතු ( පළාත් ප්රශ්න පත්ර මුද්රණය, ලොතරැයි මුද්රණය හා රහස් ලේඛන මුද්රණය) සිදු කරන බව ද ඇය සඳහන් කළාය.එමෙන්ම, SPC අභ්යාස පොත් මුද්රණය, විවිධ රාජ්ය ආයතන සඳහා මුද්රණ කටයුතු, අනෙකුත් වාණිජ මුද්රණ කටයුතු, පුද්ගලික මුද්රණ ඇණවුම් කටයුතු සහ මැතිවරණ මුද්රණ කටයුතු සිදු කරන අතර, දිවයිනේ දිස්ත්රික්ක කිහිපයක් පුරා SPC අලෙවිසැල් ජාලය ද පවත්වාගෙන යන බව අග්රාමාත්යවරිය සඳහන් කළාය.අමාත්යාංශය යටතේ මුද්රණාලයක් පැවතීම හේතුවෙන් රජයට ප්රතිලාභ රැසක් අත්වන බව ද අග්රාමාත්යවරිය පෙන්වා දුන්නාය.ඒ අනුව, වෙළෙඳපොළ මිල පාලනය කිරීමේ සාධකයක් ලෙස රාජ්ය මුද්රණ නීතිගත සංස්ථාව පැවතීම, වෙළෙඳපොළ ප්රමිතිය හා ගුණාත්මකභාවය පාලනය කිරීම, විශ්වාසදායී ආරක්ෂිත මුද්රණ (Security Printing) ඒකකයක අවශ්යතාව සපුරාලීම සහ රාජ්ය අංශයේ එකම රාජ්ය ව්යවසාය ආයතනය ලෙස රජයේ මුද්රණ නීතිගත සංස්ථාව පැවතීම ඒ අතර වන බව ඇය සඳහන් කළාය.මහා පරිමාණ මුද්රණ යන්ත්රණයක අවශ්යතාව සැපයීම, රජය සතු මුද්රණ යන්ත්රණයක අවශ්යතාව සපුරාලීම සහ මුද්රණ කටයුතු සඳහා පවතින පිරිවැය අවම කර ගැනීම ද එහි ප්රතිලාභ අතර වන බව අග්රාමාත්යවරිය පෙන්වා දුන්නාය.එමෙන්ම, දීර්ඝ කාලයක සිට රාජ්ය ආයතනයක් ලෙස රැකියා අවස්ථා සලසා දෙමින් පුහුණු මානව සම්පතක් සහිත වීම සහ රාජ්ය භාගය ලෙස රජයට ප්රතිලාභ අත්වීමට ඉඩ සැලසීම ද රජයේ මුද්රණ නීතිගත සංස්ථාව පැවතීමෙන් ලැබෙන ප්රතිලාභ ලෙස අග්රාමාත්යවරිය වැඩිදුරටත් පෙන්වා දුන්නාය.
2026-09-08
“ශ්රී ලංකා වරලත් මාධ්ය වෘත්තිකයන්ගේ ආයතනය” නමැති පනත් කෙටුම්පත පිළිබඳ ශ්රේෂ්ඨාධිකරණයේ තීරණයආණ්ඩුක්රම ව්යවස්ථාවේ 121(1) ව්යවස්ථාව ප්රකාරව, ශ්රේෂ්ඨාධිකරණය හමුවේ අභියෝගයට ලක් කරන ලද “ශ්රී ලංකා වරලත් මාධ්ය වෘත්තිකයන්ගේ ආයතනය” නමැති පනත් කෙටුම්පත පිළිබඳ ශ්රේෂ්ඨාධිකරණයේ තීරණය තමා වෙත ලැබී ඇති බව ගරු කථානායක වෛද්ය ජගත් වික්රමරත්න මහතා අද (08) පාර්ලිමේන්තුවට නිවේදනය කළේය. එම නිවේදනය පහත පරිදි වේ. පනත් කෙටුම්පතේ 3(එ) වගන්තිය අපැහැදිලි වන අතර, එබැවින් ආණ්ඩුක්රම ව්යවස්ථාවේ 12(1) සහ 14(1)(උ) ව්යවස්ථාවන්ට අනනුකූල වන බව ද, එය සම්මත කළ හැක්කේ ආණ්ඩුක්රම ව්යවස්ථාවේ 84(2) ව්යවස්ථාව යටතේ අවශ්ය වන විශේෂ බහුතර ඡන්දයෙන් පමණක් බව හා එම වගන්තිය ඉවත් කරනු ලැබුවහොත් එම අනනුකූලතාවය තවදුරටත් නොපවතින බව ද;(i) පනත් කෙටුම්පතේ 4(ච) වගන්තිය ආණ්ඩුක්රම ව්යවස්ථාවේ 12(1) සහ 14(1)(උ) ව්යවස්ථාවන්ට අනනුකූල වන බවත්, එය සම්මත කළ හැක්කේ ආණ්ඩුක්රම ව්යවස්ථාවේ 84(2) ව්යවස්ථාව යටතේ අවශ්ය වන විශේෂ බහුතර ඡන්දයෙන් පමණක් බව හා ශ්රේෂ්ඨාධිකරණය විසින් යෝජනා කර ඇති පරිදි එම වගන්තිය සංශෝධනය කරනු ලැබුවහොත් එම අනනුකූලතාවය තවදුරටත් නොපවතින බව ද;(ii) පනත් කෙටුම්පතේ 5(4)(ආ) වගන්තිය ආණ්ඩුක්රම ව්යවස්ථාවේ 12(1) ව්යවස්ථාවට අනනුකූල වන බව ද, එය සම්මත කළ හැක්කේ ආණ්ඩුක්රම ව්යවස්ථාවේ 84(2) ව්යවස්ථාව යටතේ අවශ්ය වන විශේෂ බහුතර ඡන්දයෙන් පමණක් බව හා ශ්රේෂ්ඨාධිකරණය විසින් යෝජනා කර ඇති පරිදි 5 වගන්තිය සංශෝධනය කරනු ලැබුවහොත් එම අනනුකූලතාවය තවදුරටත් නොපවතින බව ද,(iii) පනත් කෙටුම්පතේ ඉතිරි වගන්ති ආණ්ඩුක්රම ව්යවස්ථාවට අනනුකූල නොවන බව ද,ශ්රේෂ්ඨාධිකරණය විසින් තීරණය කර ඇත.“විසි දෙවන ආණ්ඩුක්රම ව්යවස්ථා සංශෝධනය” නමැති පනත් කෙටුම්පත සම්බන්ධයෙන් ශ්රේෂ්ඨාධිකරණය වෙත ඉදිරිපත් කරන ලද පෙත්සම්2026 අගෝස්තු 19, 20 හා 21 දිනැති නථානායකවරයාගේ නිවේදනයන්හි සඳහන් පෙත්සම් නවයට අමතරව ආණ්ඩුක්රම ව්යවස්ථාවේ 121(1) ව්යවස්ථාව ප්රකාරව, “විසි දෙවන ආණ්ඩුක්රම ව්යවස්ථා සංශෝධනය” නමැති පනත් කෙටුම්පත සම්බන්ධයෙන් ශ්රේෂ්ඨාධිකරණය වෙත ඉදිරිපත් කරන ලද පෙත්සම්වල පිටපත් පහත සඳහන් පරිදි තමා වෙත ලැබී ඇති බව ද ගරු කථානායකවරයා පාර්ලිමේන්තුවට දැනුම් දුන්නේය.• 2026 අගෝස්තු 21 දින පෙත්සම් හතයි • 2026 අගෝස්තු 24 දින පෙත්සම් හතරයි • 2026 අගෝස්තු 25 දින පෙත්සම් අටයි • 2026 අගෝස්තු 28 දින පෙත්සම් පහයි • 2026 අගෝස්තු 31 දින පෙත්සම් තිස් එකයි • 2026 සැප්තැම්බර් 01 දින පෙත්සම් දහයයි • 2026 සැප්තැම්බර් 03 දින පෙත්සම් තුනයි • 2026 සැප්තැම්බර් 04 දින පෙත්සම් දෙකයි “දූෂණ විරෝධී (සංශෝධන)” නමැති පනත් කෙටුම්පත සම්බන්ධයෙන් ශ්රේෂ්ඨාධිකරණය වෙත ඉදිරිපත් කරන ලද පෙත්සම්ආණ්ඩුක්රම ව්යවස්ථාවේ 121(1) ව්යවස්ථාව ප්රකාරව, “දූෂණ විරෝධී (සංශෝධන)” නමැති පනත් කෙටුම්පත සම්බන්ධයෙන් ශ්රේෂ්ඨාධිකරණය වෙත ඉදිරිපත් කරන ලද පෙත්සම් පහළොවක පිටපත්, තමා වෙත ලැබී ඇති බව ද ගරු කථානායකවරයා පාර්ලිමේන්තුවට දැනුම් දුන්නේය. “අධිකරණ සංවිධාන (සංශෝධන)” නමැති පනත් කෙටුම්පත සම්බන්ධයෙන් ශ්රේෂ්ඨාධිකරණය වෙත ඉදිරිපත් කරන ලද තවත් පෙත්සම්2026 අගෝස්තු 19 දින කථානායකවරයාගේ නිවේදනයෙහි සඳහන් පෙත්සමට අමතරව, ආණ්ඩුක්රම ව්යවස්ථාවේ 121(1) ව්යවස්ථාව ප්රකාරව, “අධිකරණ සංවිධාන (සංශෝධන)” නමැති පනත් කෙටුම්පත සම්බන්ධයෙන් ශ්රේෂ්ඨාධිකරණය වෙත ඉදිරිපත් කරන ලද තවත් පෙත්සම් හතක පිටපත් ලැබී ඇති බව ද ගරු කථානායක වෛද්ය ජගත් වික්රමරත්න මහතා පාර්ලිමේන්තුවට නිවේදනය කළේය.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
