බලන්න

01

E   |   த   |  

2023-11-23

පුවත් කාණ්ඩ : කාරක සභා පුවත් 

‘අස්වැසුම’ ප්‍රතිලාභ යෝජනා ක්‍රමයේ අභියාචනා ක්‍රියාවලිය ක්‍රියාත්මක කිරීම හා එහි දෙවන අදියර ක්‍රියාත්මක කිරීම සඳහා ග්‍රාම නිලධාරීන්ගේ සේවාව ලබා ගැනීම සම්බන්ධව ක්‍රම සහ විධි කාරක සභාවේ අවධානය

  • ‘අස්වැසුම’ සුභසාධක ප්‍රතිලාභ යෝජනා ක්‍රමයේ අභියාචනා ක්‍රියාවලිය සහ දෙවෙනි අදියර ක්‍රියාත්මක කිරීමේදී පහසුකම් සපයන්නෙකු ලෙස කටයුතු කිරීමට ක්‍රම සහ විධි පිළිබඳ කාරක සභාව සූදානම්
  • අස්වැසුම සඳහා ග්‍රාම නිලධාරීන්ට බලය පැවරීමේ දී එම නිලධාරීන් දඬුවමට යටත් වන 2002 අංක 02 දරන සුභසාධක ප්‍රතිලාභ පනතේ 21 සහ 22 වෙනි වගන්ති පරිච්ඡින්න කිරීමට සළකා බැලීමට උපදෙස්
  • අස්වැසුම රාජකාරි ඉටු කිරීමේදී ග්‍රාම නිලධාරීන් සඳහා ගෙවිය යුතු දීමනාව සම්බන්ධයෙන් මුදල් අමාත්‍යාංශය සමග සාකච්ඡා කර කාරක සභාවට දැනුම්දීමට නිර්දේශ

 

පාර්ලිමේන්තුවේ ක්‍රම සහ විධි කාරක සභාවේ 18 වෙනි රැස්වීම එහි සභාපති පාර්ලිමේන්තු මන්ත්‍රී පාඨලී චම්පික රණවක මහතාගේ ප්‍රධානත්වයෙන් ඊයේ (නොවැ. 22) පෙරවරුවේ පාර්ලිමේන්තු පරිශ්‍රයේ දී පැවැත්විණ.

මෙහිදී ‘අස්වැසුම’ ප්‍රතිලාභ යෝජනා ක්‍රමයේ අභියාචනා ක්‍රියාවලිය ක්‍රියාත්මක කිරීමේ දී හා එහි දෙවන අදියර ක්‍රියාත්මක කිරීම සඳහා ග්‍රාම නිලධාරීන්ගේ සේවාව ලබා ගැනීම සම්බන්ධව සාකච්ඡා කෙරුණි.

මෙම සාකච්ඡාව සඳහා සුභසාධක ප්‍රතිලාභ මණ්ඩලයේ නිලධාරීන්, ආයතන අධ්‍යක්ෂ ජනරාල් සහ ග්‍රාම නිලධාරී වෘත්තීය සමිති වන ශ්‍රී ලංකා එක්සත් ග්‍රාම නිලධාරී සංගමය, සමස්ත ලංකා නිදහස් ග්‍රාම නිලධාරී සංගමය, ශ්‍රී ලංකා ප්‍රගතිශිලී ග්‍රාම නිලධාරී සංගමය, ශ්‍රී ලංකා ග්‍රාම නිලධාරී සංගමය, උපාධිධාරී ග්‍රාම නිලධාරී සංගමය, රජයේ ග්‍රාම නිලධාරීන්ගේ සංගමය, ශ්‍රී ලංකා පරිපාලන ග්‍රාම නිලධාරීන්ගේ සංගමය, සමස්ත ලංකා පරිපාලන ග්‍රාම නිලධාරීන්ගේ සංගමය, ශ්‍රී ලංකා එක්සත් ගම්පත ග්‍රාම නිලධාරී සංගමය යන සංගම්වල නියෝජිතයන් කැඳවා තිබුණි.

අස්වැසුම ප්‍රතිලාභ යෝජනා ක්‍රමයේ අභියාචනා ක්‍රියාවලිය සහ එහි දෙවන අදියරය ක්‍රියාත්මක කිරීමට අදාළව ග්‍රාම නිලධාරීන්ගේ සේවය ලබා ගැනීම සඳහා මූලික වශයෙන් ග්‍රාම නිලධාරීන්ගේ සේවා ව්‍යවස්ථාව සම්බන්ධ ගැටළු සඳහා රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන  අමාත්‍යාංශය විසින් විසඳුමක් සෙවිය යුතු බවත්, ඔවුන් සමග ග්‍රාම නිලධාරී වෘත්තීය සමිති පවත්වන සාකච්ඡාවක් වෙනුවෙන් පහසුකම් සපයන්නෙකු ලෙස අවශ්‍ය සම්බන්ධීකරණය ලබා දීමට ක්‍රම සහ විධි පිළිබඳ කාරක සභාව සූදානම් බවත් සභාපතිවරයා මෙහිදී දැනුම් දුන්නේය.

අස්වැසුම යෝජනා ක්‍රමය හා සම්බන්ධ වීම සඳහා ග්‍රාම නිලධාරීවරුන්ගේ පාර්ශවයෙන් මතුව ඇති ගැටළු සම්බන්ධයෙන් මෙහිදී සභාපතිවරයා විසින් විමසන ලදී. එහිදී මූලික වශයෙන් අස්වැසුම යෝජනා ක්‍රමය සමග සම්බන්ධවීමේදී ග්‍රාම නිලධාරීවරුන්ගෙන් බලාපොරොත්තු වන නිශ්චිත කාර්යභාරය කුමක්ද යන්න සඳහන් කරමින් ලිඛිතව බලය පැවරීමක් අවශ්‍ය බව ග්‍රාම නිලධාරීහු කියා සිටියහ. එ‍මෙන්ම, අස්වැසුම රාජකාරිවලදී අධීක්ෂණ නිලධාරියෙකු ලෙස පරිපාලන ග්‍රාම නිලධාරීන් පත් කිරීමේ අවශ්‍යතාවයද පෙන්වා දෙනු ලැබිණ. එමෙන්ම, අස්වැසුම රාජකාරි ඉටු කිරීමේදී ග්‍රාම නිලධාරීන්ට ලැබෙන නීතිමය රැකවරණය, කාර්ය වගකීම් සඳහා වන කාලරාමුව සහ නිලධාරීන් සඳහා ගෙවන දීමනාව කොපමණ ද සහ එම දීමනාව පවත්නා ජීවන වියදමට සහ අදාළ කාර්යභාරය සඳහා ප්‍රමාණවත් මුදලක් විය යුතුය යන්න නිශ්චිත වශයෙන් ලිඛිතව බලය පැවරීමේ දී අත්‍යවශ්‍ය වන බව ද මෙහිදී අවධාරණය කෙරිණි. කාරක සභා සභාපති ගරු පාඨලී චම්පික රණවක මහතා මෙහිදී පෙන්වා දුන්නේ මින් පෙර රජය සමෘද්ධි වැඩසටහන සමග ‘විදාතා’ මධ්‍යස්ථාන ඇති කිරීම මගින් ජනතාවට තාක්ෂණය ලබා දීමේ වැඩපිළිවෙලක් ද, මහ බැංකුව විසින් සෞභාග්‍යා වැනි ණය යෝජනා ක්‍රමයක් ද ආරම්භ කළාක් මෙන් ඒකාබද්ධ වැඩපිළිවෙලක් අස්වැසුම වැනි ප්‍රතිලාභ යෝජනා ක්‍රම සඳහා සම්බන්ධ කිරීමේ වැදගත් වන බවයි.

ශ්‍රී ලංකාව පුරා සිටින පරිපාලන ග්‍රාම නිලධාරීවරුන් 332 දෙනා සහ එක් ග්‍රාම නිලධාරී වෘත්තීය සමිතියකින් තිදෙනෙක් බැගින් ග්‍රාම නිලධාරී නියෝජිතයන් සම්බන්ධ කරගෙන අස්වැසුම ක්‍රියාවලියේ අභියාචනා ක්‍රියාවලිය සහ දෙවෙනි අදියරය ක්‍රියාත්මක කිරීම සඳහා එකඟතාවක්  ලබා ගැනීමට අදාළව වගවීම, තාක්ෂණික වශයෙන් සිදු විය යුතු වෙනස්වීම්, දීමනා යනාදිය නිශ්චය කර ගැනීමට සාකච්ඡාවක් කැඳවන ලෙස ද සභාපතිවරයා මෙහිදී නිර්දේශ කළේය.

එසේම අස්වැසුම රාජකාරි ඉටු කිරීමේදී ග්‍රාම නිලධාරීන්ගේ හා පරිපාලන ග්‍රාම නිලධාරීන්ගේ වගකීම් ලිඛිතව ලබා දීම, අස්වැසුම සඳහා ග්‍රාම නිලධාරීන්ට බලය පැවරීමේ දී නීතිමය වශයෙන් ඔවුන් දඬුවමට ලක් කළ හැකි  අදාළ පනතේ  21 සහ 22 වෙනි වගන්ති යළි සමාලෝචනය කර පරිච්ඡින්න කිරීම සදහා සලකා බැලීමටත් මෙහිදී සභාපතිවරයා නිර්දේශ කරන ලදි. එමෙන්ම, මෙවැනි වැඩසටහන් සඳහා නිර්ණායක සැකසීමේදී බිම් මට්ටමින් අදහස් ලබා ගැනීමේ අවශ්‍යතාවයද කාරක සභා සභාපතිවරයා පෙන්වා දුන්නේය.

මීට අමතරව ඉරුදේණියාව ප්‍රදේශයේ අලි මිනිස් ගැටුම පිළිබඳවද මෙහිදී සාකච්ඡා කෙරුණි.

මෙම සාකච්ඡාව සඳහා රාජ්‍ය අමාත්‍ය ගරු ශෂින්ද්‍ර රාජපක්ෂ, පාර්ලිමේන්තු මන්ත්‍රීවරුන් වන ගරු අශෝක් අබේසිංහ, ගරු සංජීව එදිරිමාන්න, ගරු නාලක බණ්ඩාර කෝට්ටෙගොඩ හා ගරු වසන්ත යාපා බණ්ඩාර යන මහත්වරුන් ද එක්ව සිටියහ.

 

1 2

3



සම්බන්ධිත පුවත්

2026-11-14

ශ්‍රී ලංකන් ගුවන් සේවය ලාභදායී මට්ටමකට ගෙන ඒම සඳහා පස් අවුරුදු සැලැස්මක් - යානා සංචිතය ඉහළ නැංවීම සහ ණය බර පාලනය කිරීම පිළිබඳ අවධානය

ශ්‍රී ලංකන් ගුවන් සේවය මුහුණ දී ඇති මූල්‍ය අර්බුදය, අධික ගුවන් ගමන් ප්‍රමාදයන්, ණය බර සහ නව ගුවන් යානා ලබා ගැනීමේදී මතුව ඇති ප්‍රසම්පාදන ප්‍රමාදයන් පිළිබඳව යටිතල පහසුකම් හා උපායමාර්ගික සංවර්ධනය පිළිබඳ ආංශික අධීක්ෂණ කාරක සභාවේදී පුළුල් ලෙස සාකච්ඡා කෙරිණි.එම කාරක සභාව පාර්ලිමේන්තු මන්ත්‍රී ගරු එස්. එම්. මරික්කාර් මහතාගේ සභාපතිත්වයෙන් පසුගියදා පාර්ලිමේන්තුවේ දී රැස් වූ අවස්ථාවේදී මේ පිළිබඳව අවධානය යොමු විය.දැනට පවතින ගුවන් යානා 23 කින් සමන්විත සංචිතය ප්‍රමාණවත් නොවීම සහ එම ගුවන් යානා වර්ෂ 12 ක් පමණ පැරණි වීම හේතුවෙන් ගුවන් ගමන්වලට බලපාන තාක්ෂණික දෝෂ සහ ප්‍රමාදයන් පිළිබඳව මෙහිදී සාකච්ඡා විය. එක් ගුවන් යානයක තාක්ෂණික දෝෂයක් හෝ වෙනත් හේතුවක් මත හෝ ප්‍රමාදයක් ඇති වූ විට විකල්ප යානා යෙදවීමේ සීමා හේතුවෙන් සමස්ත ගුවන් ගමන් ජාලයටම බලපෑම් එල්ල වන බව ද මෙහිදී අනාවරණය විය.ගුවන් යානා ලබා ගැනීම සඳහා පසුගිය කාලයේ ක්‍රියාත්මක කළ සාමාන්‍ය ප්‍රසම්පාදන ක්‍රියාවලීන් අසාර්ථක වීම සහ ඒ ආශ්‍රිත දීර්ඝ ප්‍රමාදයන් පිළිබඳව ද කාරක සභාවේ අවධානය යොමු විය. මෙම තත්ත්වයට විසඳුමක් ලෙස ගුවන් යානා සහ ඒ ආශ්‍රිත උපකරණ මිලදී ගැනීම සඳහා විශේෂ ප්‍රසම්පාදන මාර්ගෝපදේශ මාලාවක් සකස් කර ඇති බවත්, එය ගැසට් කිරීම සඳහා කටයුතු යොදා ඇති බවත් මෙහිදී සඳහන් කෙරිණි. එමෙන්ම ප්‍රසම්පාදන කටයුතු සෘජුව අධීක්ෂණය කිරීම සඳහා අමාත්‍යාංශ මට්ටමින් විශේෂ ප්‍රසම්පාදන අංශයක් ද පිහිටුවා ඇති බව ද මෙහිදී ප්‍රකාශ විය.නව ප්‍රසම්පාදන මාර්ගෝපදේශ යටතේ ගුවන් යානා සංචිතය පුළුල් කිරීමට සැලසුම් කර ඇති අතර, ඉදිරි ජූනි මාසය වන විට නව නැරෝ-බොඩි ගුවන් යානයක් සහ වයිට්-බොඩි ගුවන් යානා දෙකක් සංචිතයට එක්කර ගැනීමට අපේක්ෂා කරන බව ද සාකච්ඡා විය. 2029 වන විට ගුවන් යානා සංචිතය අවම වශයෙන් යානා 29 ක් දක්වා ඉහළ නැංවීම, පස් අවුරුදු සැලැස්මේ ඉලක්කයක් බවද නිලධාරීහු සඳහන් කළහ.ශ්‍රී ලංකන් ගුවන් සේවයේ මූල්‍ය තත්ත්වය යහපත් කිරීම සඳහා මහා භාණ්ඩාගාරය මඟින් පැරණි බැංකු ණය සහ බැඳුම්කර ණය පවරා ගැනීම ඇතුළු පියවර ගෙන ඇති බව මෙහිදී පැහැදිලි කෙරිණි. එමෙන්ම ගුවන් යානා ලීසිං ගාස්තු අඩු කර ගැනීම, ඉන්ධන පිරිවැය පාලනය කිරීම සහ ගුවන් සේවයේ ආදායම් ඉහළ නැංවීම සඳහා වාණිජ උපායමාර්ග ක්‍රියාත්මක කිරීම පිළිබඳව ද අවධානය යොමු විය.මැදපෙරදිග කලාපයේ පවතින අර්බුදකාරී තත්ත්වය, ඉන්ධන මිල ඉහළ යාම සහ ජාත්‍යන්තර ගුවන් සේවා සමඟ පවතින තරගකාරීත්වය ද ශ්‍රී ලංකන් ගුවන් සේවයේ මෙහෙයුම් සහ ආදායම් කෙරෙහි බලපාන බව මෙහිදී සාකච්ඡා විය.තවද, ශ්‍රී ලංකන් ගුවන් සේවය ප්‍රතිව්‍යුහගත කිරීම සඳහා රජය විසින් පත් කරන ලද කමිටුව මඟින් නව ආයෝජකයන් ලබා ගැනීම, රාජ්‍ය-පෞද්ගලික හවුල්කාරීත්වයක් ඇති කිරීම හෝ රජය යටතේ පවත්වාගෙන යමින් හෝ පිරිවැය පියවාගත හැකි මට්ටමකට ගෙන ඒම ඇතුළු විකල්ප සලකා බලන බව ද සඳහන් විය.ඒ අනුව, ඉදිරි වසර දෙක හෝ තුන හෝ ඇතුළත ශ්‍රී ලංකන් ගුවන් සේවය පිරිවැය පියවාගත හැකි මට්ටමකට ගෙන ඒම සඳහා ගත යුතු පියවර ඇතුළත් සවිස්තරාත්මක වාර්තාවක් නොවැම්බර් 30 වැනිදාට පෙර පාර්ලිමේන්තුවට සහ අමාත්‍යාංශයට ඉදිරිපත් කරන ලෙස කාරක සභාව විසින් අදාළ බලධාරීන්ට උපදෙස් ලබා දෙන ලදී.මෙම කාරක සභා රැස්වීම සඳහා ගරු පාර්ලිමේන්තු මන්ත්‍රීවරුන් වන අජිත් පී. පෙරේරා, නලීන් බණ්ඩාර ජයමහ, රවීන්ද්‍ර බණ්ඩාර, මංජුල සුරවීර ආරච්චි, චතුර ගලප්පත්ති, ධනුෂ්ක රංගනාත්, ජගත් විතාන, ශාන්ත පද්ම කුමාර සුබසිංහ සහ නීතීඥ ගීතා හේරත් යන මහත්ම මහත්මීහු සහභාගී වූහ.


2026-11-14

ශ්‍රී ලංකාවේ ආනයන තීරුබදු ප්‍රතිපත්ති සහ වෙළෙඳ ගිවිසුම් සම්බන්ධයෙන් පාර්ලිමේන්තු ක්‍රම හා විධි පිළිබඳ කාරක සභාවේදී පුළුල් සාකච්ඡාවක්

ශ්‍රී ලංකාවේ ආනයන තීරුබදු ප්‍රතිපත්ති සහ වෙළෙඳ ගිවිසුම්වල වත්මන් තත්ත්වය සම්බන්ධයෙන් පාර්ලිමේන්තු ක්‍රම හා විධි පිළිබඳ කාරක සභාව එහි සභාපති ගරු පාර්ලිමේන්තු මන්ත්‍රී විජේසිරි බස්නායක මහතාගේ ප්‍රධානත්වයෙන් රැස් වූ  අවස්ථාවේදී පුළුල් ලෙස සාකච්ඡා කෙරිණි.මෙහිදී, ශ්‍රී ලංකා වාණිජ දෙපාර්තමේන්තුවේ වැඩබලන අධ්‍යක්ෂ ජනරාල් සෝමසේන මහදිවුල්වැව මහතා මේ සම්බන්ධයෙන් කාරක සභාවට සවිස්තරාත්මක පැහැදිලි කිරීමක් සිදු කළේය. ශ්‍රී ලංකාවේ ද්විපාර්ශ්වික සහ බහුපාර්ශ්වික වෙළෙඳ ගිවිසුම්වල වත්මන් තත්ත්වය සහ ඒවා ඉදිරියට පවත්වාගෙන යාම ඇතුළු කරුණු පිළිබඳව මෙහිදී අවධානය යොමු විය.සාකච්ඡා මට්ටමේ පවතින වෙළෙඳ ගිවිසුම් සම්බන්ධයෙන් ශක්‍යතා අධ්‍යයන සිදු කරමින් ඒවා අඛණ්ඩව ඉදිරියට ගෙන යාමට අවශ්‍ය පියවර ගන්නා ලෙස කාරක සභාව අවධාරණය කළේය.මෙම කාරක සභා රැස්වීමට ගරු නියෝජ්‍ය අමාත්‍යවරුන් වන චතුරංග අබේසිංහ සහ එරංග වීරරත්න යන මහත්වරුන් ද, ගරු පාර්ලිමේන්තු මන්ත්‍රීවරුන් වන අශෝක සපුමල් රන්වල, තිළිණ සමරකෝන්, චම්පික හෙට්ටිආරච්චි සහ චතුර ගලප්පත්ති යන මහත්වරුන් ඇතුළු පිරිසක් සහභාගී වූහ.


2026-11-13

විදේශීය ත්‍රස්තවාදී සටන්කරුවන් වැළැක්වීමේ පනත් කෙටුම්පතට ආංශික අධීක්ෂණ කාරක සභාවේ අනුමැතිය

විදේශීය ත්‍රස්තවාදී සටන්කරුවන් වැළැක්වීමේ පනත් කෙටුම්පත සඳහා ආර්ථික සංවර්ධනය සහ අන්තර්ජාතික සබඳතා පිළිබඳ ආංශික අධීක්ෂණ කාරක සභාවේ අනුමැතිය හිමි විය.එම ආංශික අධීක්ෂණ කාරක සභාව එහි සභාපති ගරු පාර්ලිමේන්තු මන්ත්‍රී නීතිඥ ලක්මාලි හේමචන්ද්‍ර මෙනවියගේ ප්‍රධානත්වයෙන් පාර්ලිමේන්තුවේ දී පසුගියදා රැස් වූ අවස්ථාවේදී මෙම පනත් කෙටුම්පත සලකා බලා අනුමත කෙරිණි.විදේශීය ත්‍රස්තවාදී සටන්කරුවන්ගෙන් එල්ල වන තර්ජනය වැළැක්වීම සහ මැඩපැවැත්වීම සම්බන්ධයෙන් 2014 සැප්තැම්බර් මස 24 වැනි දින සම්මත කරන ලද එක්සත් ජාතීන්ගේ ආරක්ෂක මණ්ඩලයේ 2178 දරන යෝජනාව බලාත්මක කිරීම සඳහාත්, ඊට සම්බන්ධ හෝ ආනුෂංගික කරුණු සඳහා විධිවිධාන සැලසීම සඳහාත් මෙම පනත් කෙටුම්පත ඉදිරිපත් කර තිබේ.විදේශ කටයුතු, විදේශ රැකියා සහ සංචාරක අමාත්‍යවරයා විසින් මෙම පනත් කෙටුම්පත පසුගිය ඔක්තෝබර් මස 20 වැනි දින පළමු වර කියවීම සඳහා පාර්ලිමේන්තුවට ඉදිරිපත් කර තිබිණි.ශ්‍රී ලාංකික පුරවැසියකු හෝ ශ්‍රී ලාංකික පුරවැසියකු නොවන වෙනත් රටක පුරවැසියකු හෝ ශ්‍රී ලංකාව තුළ සිටියදී හෝ ශ්‍රී ලංකාවෙන් පිටතදී වරදක් සිදුකර ඇති අවස්ථාවක හෝ, එම ක්‍රියාව අදාළ රටේ නීතිය යටතේ ද වරදක් වන අවස්ථාවකදී මෙම පනත යටතේ ශ්‍රී ලංකාව තුළ නීතිමය ක්‍රියාමාර්ග ගැනීමට හැකි බව නිලධාරීහු කාරක සභාව හමුවේ පැහැදිලි කළහ.ත්‍රස්තවාදී ක්‍රියාවන්හි නිරත වීම, ඒවා සැලසුම් කිරීම, සූදානම් කිරීම හෝ ඒවාට සහභාගී වීම මෙන්ම ත්‍රස්තවාදී පුහුණුව ලබා දීම හෝ ලබා ගැනීම ද මෙම පනත යටතේ වැරදි ලෙස අර්ථ දක්වා ඇති බව නිලධාරීහු කාරක සභාවට දැනුම් දුන්හ.විදේශ රටවල පදිංචිව සිටින ශ්‍රී ලාංකිකයන් ඉලක්ක කර ගනිමින් වාර්ගික පදනම මත මෙම නීතිමය විධිවිධාන හඳුන්වා දී නොමැති බව ද නිලධාරීන් විසින් කාරක සභාවට අවධාරණය කරන ලදී.දීර්ඝ සාකච්ඡාවකින් අනතුරුව කාරක සභාව විසින් අදාළ පනත් කෙටුම්පත අනුමත කරන ලදී. කෙසේ වෙතත්, කාරක සභා සාමාජික ගරු පාර්ලිමේන්තු මන්ත්‍රී සිවඥානම් ශ්‍රීතරන් මහතා මෙම පනත් කෙටුම්පතට සිය විරෝධය පළ කළේය.මෙම කාරක සභා රැස්වීමට ගරු පාර්ලිමේන්තු මන්ත්‍රීවරුන් වන සුරංග රත්නායක, තිලිණ සමරකෝන්, විජේසිරි බස්නායක සහ සිවඥානම් ශ්‍රීතරන් යන මහත්වරුන් ඇතුළු පිරිසක් සහභාගී වූහ. එමෙන්ම විදේශ කටයුතු, විදේශ රැකියා සහ සංචාරක අමාත්‍යාංශය, ආරක්ෂක අමාත්‍යාංශය, නීතිපති දෙපාර්තමේන්තුව සහ නීති කෙටුම්පත් සම්පාදක දෙපාර්තමේන්තුව නියෝජනය කරමින් රාජ්‍ය නිලධාරීහු ද මෙම අවස්ථාවට එක්ව සිටියහ.


2026-11-13

විදුහල්පති සේවයේ වැටුප් විෂමතා පිළිබඳව ආංශික අධීක්ෂණ කාරක සභා අනුකමිටුවේ දී සාකච්ඡා කෙරේ

ගුරු සේවයේ සිට විදුහල්පති සේවයට පත්වීමේදී ඇතිවන වැටුප් විෂමතා පිළිබඳව අධ්‍යාපනය, ශ්‍රම බලකාය සහ මානව ප්‍රාග්ධනය පිළිබඳ ආංශික අධීක්ෂණ කාරක සභාව විසින් පත් කරන ලද අනුකමිටුවේදී දීර්ඝ වශයෙන් සාකච්ඡා කෙරිණි.එම අනුකමිටුව එහි සභාපති ගරු පාර්ලිමේන්තු මන්ත්‍රී සුනිල් රාජපක්ෂ මහතාගේ ප්‍රධානත්වයෙන් පසුගියදා රැස්වූ අවස්ථාවේදී මෙම කරුණු සාකච්ඡාවට ලක් විය.මේ සඳහා විදුහල්පති සේවයේ වෘත්තීය සමිති නියෝජිතයින්, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය, මුදල්, ක්‍රමසම්පාදන සහ ආර්ථික සංවර්ධන අමාත්‍යාංශය නියෝජනය කරමින් නිලධාරීහු  සහභාගී වූහ.ගුරු සේවයේ සිට විදුහල්පති සේවයට පිවිසීම උසස්වීමක් ලෙස නොව “නව පත්වීමක්” ලෙස සැලකීම මෙම වැටුප් විෂමතාවට හේතු වී ඇති බව වෘත්තීය සමිති නියෝජිතයෝ පෙන්වා දුන්හ.ගුරු සේවයේ I ශ්‍රේණියේ සිට විදුහල්පති සේවයේ III ශ්‍රේණියට පත්වීමේදී වැටුප් වර්ධක අතර පවතින සැලකිය යුතු වෙනස හේතුවෙන් මෙම තත්ත්වය තවදුරටත් උග්‍ර වන බව ද ඔවුහු සඳහන් කළහ.එසේම, විදුහල්පති සේවයට පත්වීමේදී ඇතිවන වැටුප් වෙනස පියවීම සඳහා ගැලපුම් දීමනාවක් ලබා දී තිබුණ ද, සේවා කාලය ඉදිරියට යාමේදී ගුරු සේවයේ තවදුරටත් රැඳී සිටියේ නම් හිමි වන ඉහළ වැටුප් වර්ධක නොලැබීම හේතුවෙන් යළිත් වැටුප් පරතරයක් ඇති වන බව ද ඔවුහු පෙන්වා දුන්හ.මේ හේතුවෙන් ගුරු සේවයේ I සහ  II -I ශ්‍රේණිවල සේවය කරන ජ්‍යෙෂ්ඨ හා පළපුරුදු ගුරුවරුන් විදුහල්පති විභාගයට පෙනී සිටීමට සහ විදුහල්පති සේවයට පිවිසීමට අධෛර්යමත් වන තත්ත්වයක් මතුව ඇති බව ද මෙහිදී අවධාරණය කෙරිණි.කාරක සභාවට ඉදිරිපත් වූ කරුණු සලකා බලා මේ සම්බන්ධයෙන් රාජ්‍ය නිලධාරීන්ගේ වැටුප් හා විශ්‍රාම වැටුප් කොමිෂන් සභාව වෙත අදාළ නිර්දේශ ඉදිරිපත් කිරීමට පියවර ගන්නා බව අනුකමිටුවේ සභාපතිවරයා පැවසීය.මීට අමතරව, විදුහල්පති සේවයේ නියුතු නිලධාරීන් මුහුණ දෙන අනෙකුත් ගැටලු සම්බන්ධයෙන් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය, මුදල්, ක්‍රමසම්පාදන සහ ආර්ථික සංවර්ධන අමාත්‍යාංශය සහ ආයතන අධ්‍යක්ෂ ජනරාල් සමග සාකච්ඡා කිරීමට ද අනුකමිටුව විසින් තීරණය  කරන ලදී.මෙම රැස්වීමට ගරු පාර්ලිමේන්තු මන්ත්‍රීවරුන් වන අබූබකර් අතම්බාවා, සුගත් වසන්ත ද සිල්වා සහ චානක මාදුගොඩ යන මහත්වරු ද සහභාගී වූහ.






© ශ්‍රී ලංකා පාර්ලි‌මේන්තුව.

සියලු හිමිකම් ඇවිරිණි.

නිර්මාණය සහ සංවර්ධනය  TekGeeks