2023-11-09
ඉන්දියාවේ සහ චීනයේ මෙරට මහ කොමසාරිස්වරයෙකු/තානාපතිවරයෙකු සදහා පුරප්පාඩු පවතින බැවින් එම තනතුරු සඳහා සුදුසු සහ ස්ථිර අයවළුන් පත් කිරීම සදහා අවශ්ය මැදිහත්වීම කඩිනමින් සිදු කරන ලෙස ජාත්යන්තර සබඳතා පිළිබඳ ආංශික අධීක්ෂණ කාරක සභාවේ සභාපති පාර්ලිමේන්තු මන්ත්රී ගරු නාමල් රාජපක්ෂ මහතා විදේශ කටයුතු අමාත්යාංශ නිලධාරීන්ට පසුගියදා (නොවැ. 07) උපදෙස් දුන්නේය.
ශ්රී ලංකාව සමග සමීප සබදතා පවත්වන බලවත් රාජ්යයන් ද්විත්වයක් වන ඉන්දියාව සහ චීනය සදහා මෙරට තානාපතිවරුන් පත් කිරීම කඩිනමින් සිදුවිය යුතු බැවින් ජනාධිපති ලේකම් කාර්යාලය සමග සම්බන්ධීකරණයෙන් එම කටයුතු සිදු කරන ලෙස ද කමිටු සභාපතිවරයා දැනුම් දුන්නේය.
විදෙස් තානාපති කාර්යාලවල සේවය කිරීම සදහා අවශ්ය සේවකයන් සංඛ්යාව නොසිටීම පිළිබදව ද මෙහිදී අවධානය යොමු විය. සීමාවාසික පුහුණු ව ලබන්නන් 25 දෙනෙකු බදවා ගෙන ඇති බවත් ඔවුන් අමාත්යාංශයේ සේවය සදහා යොදවා ඇති බවත් මෙහිදී අනාවරණය වූ අතර එම පුරප්පාඩු කඩිනමින් සම්පූර්ණ කරන ලෙසට නිලධාරීන්ට උපදෙස් ලබා දීම සිදුවිය.
ශ්රී ලංකාව සහ අනෙකුත් ආසියානු රටවල් අතර පවතින වෙළද සබඳතා පිළිබදව ද ශ්රී ලංකා මහබැංකුවේ නිලධාරීන් මෙහිදී අදහස් දැක්වූ අතර ඉදිරිපත් කිරීමක්ද (Presentation) සිදු කරන ලදී. ආසියානු රටවල් සමග ශ්රී ලංකාව පවතින වෙළද ගිවිසුම් සහ ඒවායේ සාධනීය වර්ධනයන් සදහා අවශ්ය මැදිහත්වීම් පිළිබදව ද මෙහිදී සාකච්ඡා විය.
මේ අතර ශ්රී ලංකාවේ සහ ඊජිප්තුවේ ද්වීපාර්ශ්වික සබදතා සහ විදේශ ප්රතිපත්ති පිළිබදව සාකච්ඡා කිරීම සදහා ශ්රී ලංකාවේ ඊජිප්තු තානාපති මජීඩ් මොස්ලේ මහතා මෙම අවස්ථාවට ස්වේච්ඡා පදනමින් සහභාගී විය.
ගෝලීය අභියෝගවලට මුහුණදීමේ දී ශ්රී ලංකාව සහ ඊජිප්තුව වසර ගණනාවක් මුළුල්ලේ ඉතා හොද මිත්රත්වයකින් කටයුතු කළ බවත් ඉදිරියේදී වෙළඳ, අයෝජන, තාක්ෂණය ආදී ක්ෂේත්ර සම්බන්ධයෙන් එම ද්වීපාර්ශ්වික සබඳතා තවදුරටත් ශක්තිමත් කළ යුතු බවත් තානාපති මජීඩ් මොස්ලේ මහතා පැවසීය.
ඊජිප්තුවේ සාර්ථකව ක්රියාත්මක වන ශ්රී ලංකාවේ ව්යාපාර පිළිබදවද හදුන්වා දුන් තානාපතිවරයා දෙරටේ ආයෝජන අවස්ථා පුළුල් කිරීමෙන් ආර්ථික සහයෝගීතාව ශක්තිමත් කිරීමේ අවශ්යතාව අවධාරණය කළේය.
ජාත්යන්තර ප්රදර්ශන, පරිසරය සම්බන්ධ කමිටු, සංචාරක කර්මාන්තය ප්රවර්ධනය, පාර්ලිමේන්තු මිත්රත්ව සංසදය යනාදි ක්රමවේදයන් ඔස්සේ දෙරට අතර සබදතා තර කර ගැනීමේ අවශ්යතාව තානාපතිවරයා මෙහිදී වැඩිදුරටත්පෙන්වා දුන්නේය.
කාරක සභා සාමාජිකයන් වන පාර්ලිමේන්තු මන්ත්රී ගරු මහාචාර්ය ජී.එල්. පීරිස්, ගරු නිරෝෂන් පෙරේරා, ගරු නීතිඥ එස්. එම්. එම්. මුෂාරෆ්, ගරු ශානක්කියන් රාසමානික්කම්, ගරු ආචාර්ය හරිනි අමරසූරිය යන මහත්ම මහත්මීන් ඇතුළු මන්ත්රීවරයන් පිරිසක් ද පාර්ලිමේන්තුවේ කාර්ය මණ්ඩල ප්රධානී සහ නියෝජ්ය මහලේකම් චමින්ද කුලරත්න මහතා ද මෙම අවස්ථාවට එක්විය.
එසේම මෙම රැස්වීම සඳහා විදේශ කටයුතු අමාත්යාංශය, මුදල් අමාත්යාංශය, ශ්රී ලංකා මහ බැංකුව, ආගමන හා විගමන දෙපාර්තමේන්තුව, ශ්රී ලංකා අපනයන සංවර්ධන මණ්ඩලය, ශ්රී ලංකා අයෝජන මණ්ඩලය, ශ්රී ලංකා සංචාරක සංවර්ධන අධිකාරිය සහ ශ්රි ලංකා සංචාරක ප්රවර්ධන කාර්යාංශය නියෝජනය කරමින් නිලධාරීන් පිරිසක් සහභාගී විය.
2026-09-18
2026-09-18
දිත්වා සුළි කුණාටුවට මුහුණ දීම සඳහා පූර්ව සූදානමක් නොමැති වීම සම්බන්ධයෙන් පූර්ණ අධ්යයනයක් සිදු කර වාර්තා කිරීමටත්, ඒ පිළිබඳ යෝජනා සහ නිර්දේශ පාර්ලිමේන්තුවට ඉදිරිපත් කිරීමටත් වන පාර්ලිමේන්තු විශේෂ කාරක සභාව විසින් මෙම ආපදා අවස්ථාවේදී පළාත් පාලන ආයතනවල සම්බන්ධීකරණය සිදු වූ ආකාරය විමසා බැලීම සඳහා ප්රාදේශීය සභා සහ නගර සභා නියෝජිතයන් කාරක සභාවට කැඳවීමට තීරණය කරන ලදී.විශේෂයෙන්, ආපදා අවස්ථාවේදී ප්රාදේශීය සභා සහ නගර සභා ඇතුළු පළාත් පාලන ආයතන නිල සන්නිවේදන හා සම්බන්ධීකරණ ක්රියාවලියට සම්බන්ධ වූ ආකාරය පිළිබඳව වැඩිදුර විමර්ශනය කිරීමේ අවශ්යතාව කාරක සභා සාමාජිකයින් මෙහිදී පෙන්වා දුන්හ.ගරු අමාත්ය වෛද්ය නලින්ද ජයතිස්ස මහතාගේ සභාපතිත්වයෙන් පාර්ලිමේන්තුවේදී පසුගියදා (සැප්. 10) රැස් වූ කාරක සභාවේදී, මහනුවර සහ මාතලේ දිස්ත්රික්කවල ආපදා කළමනාකරණ ක්රියාවලිය පිළිබඳව ව්යසන කළමනාකරණය සඳහා වූ ජාතික සභාවේ සාමාජිකයින් සහ මහනුවර, මාතලේ දිස්ත්රික් ලේකම්වරුන්ගෙන් කරුණු විමසා බැලීය.ඒ අනුව, 2025 නොවැම්බර් මස 23 සිට 27 දක්වා කාලය තුළ මෙම ප්රදේශවල ඇති වූ අධික වර්ෂාපතනය, නායයෑම් සහ ගංවතුර තත්ත්වයන් හමුවේ පූර්ව අනතුරු ඇඟවීම්, රාජ්ය ආයතන අතර සන්නිවේදනය සහ හදිසි ප්රතිචාර ක්රියාවලිය පිළිබඳව මෙහිදී කාරක සභාවේ අවධානය යොමු විය.එමෙන්ම, හදිසි ආපදා අවස්ථාවලදී අනුගමනය කළ යුතු විධිමත් ලිඛිත ක්රියා පටිපාටි සකස් කිරීම, ආපදා පෙරහුරු නිතිපතා පැවැත්වීම සහ පූර්ව අනතුරු ඇඟවීමේ පද්ධති තවදුරටත් කාර්යක්ෂම කිරීමේ අවශ්යතාව පිළිබඳව ද සාකච්ඡා කෙරිණි.මෙම රැස්වීම සඳහා කාරක සභා සාමාජික ගරු නියෝජ්ය අමාත්යවරුන් වන මේජර් ජනරාල් (විශ්රාමික) අරුණ ජයසේකර සහ ඇන්ටන් ජයකොඩි යන මහත්වරුන් ද, ගරු පාර්ලිමේන්තු මන්ත්රීවරුන් වන නීතිඥ අනුරාධ ජයරත්න, රෝහිණී කුමාරි විජේරත්න, කන්දසාමි ප්රභු, රුවන් මාපලගම සහ වෛද්ය පත්මනාදන් සත්යලිංගම් යන මහත්ම මහත්මීහු ද සහභාගි වූහ.
2026-09-17
ශ්රී ලංකාවේ ඛනිජ තෙල් සම්පත් ගවේෂණය සහ සංවර්ධනය සඳහා ආයෝජන යෝජනා කැඳවීම හා අදාළ ක්රියාවලිය විධිමත් කිරීම සඳහා වන නියෝගයට බලශක්ති කටයුතු පිළිබඳ අමාත්යාංශීය උපදේශක කාරක සභාවේ අනුමැතිය හිමි විය. වරාය සහ සිවිල් ගුවන් සේවා සහ බලශක්ති අමාත්ය අනුර කරුණාතිලක මහතාගේ සභාපතිත්වයෙන් පාර්ලිමේන්තුවේදී පසුගියදා (සැප්. 11) පැවති අමාත්යාංශයීය උපදේශක කාරක සභා රැස්වීමේදී මෙම අනුමැතිය ලැබිණි.2021 අංක 21 දරන ඛනිජ තෙල් සම්පත් පනතේ 17 වැනි වගන්තිය සමඟ කියවිය යුතු එම පනතේ 48 වැනි වගන්තිය යටතේ බලශක්ති අමාත්යවරයා විසින් සාදන ලද සහ අමාත්ය මණ්ඩලය විසින් අනුමත කරන ලද මෙම නියෝගය, 2026 ජූලි 16 දිනැති අංක 2497/37 දරන අති විශේෂ ගැසට් පත්රයේ පළ කර තිබිණි.මෙම නියෝගය මඟින් හඳුනාගත් බිම් කොටස් එකක් හෝ වැඩි ගණනක් තුළ ඛනිජතෙල් සම්පත් ගවේෂණය කිරීමට හෝ සංවර්ධනය කිරීමට අපේක්ෂා කරන තැනැත්තෙකු, ආයෝජන යෝජනාවක්, අදාළ ලංසු කැඳවීමේ නිශ්චිතව දක්වා ඇති පරිපාලන ගාස්තු ගෙවීමක් සමඟ ඉදිරිපත් කළ යුතුය.මෙම රැස්වීමට බලශක්ති නියෝජ්ය අමාත්ය අර්කම් ඉල්යාස් මහතා, පාර්ලිමේන්තු මන්ත්රීවරුන් සහ බලශක්ති අමාත්යාංශයේ නිලධාරීන් ඇතුළු පිරිසක් සහභාගී වූහ.
2026-09-17
විශ්වවිද්යාලවල සිදු වන නවක වදය සම්බන්ධයෙන් සිදු කරන විමර්ශන කටයුතු පිළිබඳව වින්දිත සිසුන් තුළ විශ්වාසයක් ඇති වන ආකාරයෙන් විශ්වවිද්යාල මඟින් අවශ්ය ක්රියාමාර්ග ගත යුතු බව ආචාර්ය හරිනි අමරසූරිය, ගරු අග්රාමාත්ය සහ අධ්යාපන, උසස් අධ්යාපන හා වෘත්තීය අධ්යාපන අමාත්යතුමිය අවධාරණය කළාය.අග්රාමාත්යවරියගේ ප්රධානත්වයෙන් පාර්ලිමේන්තුවේදී පැවති අධ්යාපන, උසස් අධ්යාපන හා වෘත්තීය අධ්යාපන කටයුතු පිළිබඳ අමාත්යාංශයීය උපදේශක කාරක සභාවේ උසස් අධ්යාපන ක්ෂේත්රයට අදාළ අනුකාරක සභා රැස්වීමේදී මේ පිළිබඳව අවධානය යොමු විය.උසස් අධ්යාපන ක්ෂේත්රයේ, විශේෂයෙන් විශ්වවිද්යාලවල පවතින පුරප්පාඩු පිරවීම සහ නවක වදය සම්බන්ධ සිදුවීම් පිළිබඳව ගත යුතු ක්රියාමාර්ග සම්බන්ධයෙන් මෙහිදී දීර්ඝ වශයෙන් සාකච්ඡා කෙරිණි.විශ්වවිද්යාලවල නවක වදය පාලනය කිරීම සම්බන්ධයෙන් විශ්වවිද්යාල වෙත සදාචාරාත්මක වගකීමක් පවතින බවත්, නවක වදයට ලක් වන සිසුන්ට විශ්වවිද්යාලවල පවතින විමර්ශන ක්රියාවලිය සම්බන්ධයෙන් විශ්වාසයක් ඇති විය යුතු බවත් අග්රාමාත්යවරිය පෙන්වා දුන්නාය.ඒ අනුව, නවක වදය සම්බන්ධයෙන් සිදු කරන විමර්ශන කටයුතු කාර්යක්ෂම හා ඵලදායී විය යුතු අතර, වින්දිත සිසුන්ට කඩිනමින් සහනයක් ලබා දිය හැකි වන පරිදි එම කටයුතු සිදුකළ යුතු බව ද අග්රාමාත්යවරිය අවධාරණය කළාය.එමෙන්ම, විශ්වවිද්යාලවල පවතින පුරප්පාඩු පිරවීම සඳහා අමාත්යාංශය මඟින් අනුමත කර ඇති පත්වීම් මෙතෙක් සිදුකර නොමැති වීම සම්බන්ධයෙන් ද අග්රාමාත්යවරිය විශ්වවිද්යාල උපකුලපතිවරුන්ගෙන් විමසා සිටියාය. අනුමත කර ඇති පුරප්පාඩු කඩිනමින් පිරවීම සඳහා අවශ්ය ක්රියාමාර්ග ගන්නා ලෙස ද අග්රාමාත්යවරිය එහිදී නිලධාරීන්ට උපදෙස් ලබා දුන්නාය.මෙම රැස්වීමට ග්රාමීය සංවර්ධන, සමාජ ආරක්ෂණ හා සමාජ සවිබලගැන්වීම් අමාත්ය ගරු ආචාර්ය උපාලි පන්නිලගේ, අධ්යාපන හා උසස් අධ්යාපන ගරු නියෝජ්ය අමාත්ය වෛද්ය මධුර සෙනෙවිරත්න සහ ගරු පාර්ලිමේන්තු මන්ත්රී මංජුල සුගත් රත්නායක යන මහත්වරුන් ඇතුළු විශ්වවිද්යාල උපකුලපතිවරුන්, විශ්වවිද්යාල ප්රතිපාදන කොමිෂන් සභාවේ සභාපතිවරයා ඇතුළු නියෝජිතයින් රැසක් සහභාගී වූහ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
