2023-11-01
පුවත් කාණ්ඩ : කාරක සභා පුවත්
ජාතික උරුමයන් සුරැකීම උදෙසා ක්රියාත්මක වීම පිණිස වන පාර්ලිමේන්තු සංසදයේ සිව්වැනි සභාවාරය පාර්ලිමේන්තු මන්ත්රී ජයන්ත සමරවීර මහතාගේ සභාපතිත්වයෙන් 2023.10.24 වැනිදා පාර්ලිමේන්තුවේදී පැවැත්විණි.
මෙම අවස්ථාව සඳහා ජ්යෙෂ්ඨ මහාචාර්ය පුජ්යපාද ඉඳුරාගාරේ ධම්මරතන ස්වාමීන්ද්රයන් වහන්සේ, මහාචාර්ය පුජ්යපාද මැදගොඩ අභයතිස්ස ස්වාමීන්ද්රයන් වහන්සේ මෙන්ම පුරාවිද්යා ක්ෂේත්රය තුළ ස්වෙච්ජාවෙන් කටයුතු කරණු ලබන සංවිධාන නියෝජනය කරමින්, මතුගම සෙනෙවිරුවන්, වෛද්ය වසන්ත බණ්ඩාර, හිටපු පුරාවිද්යා කොමසාරිස් මහාචාර්ය සේනරත් බණ්ඩාර දිසානායක, වෛද්ය ගාමිණී ජයවීර, මේජර් ජෙනරල් විජිත රවිප්රිය, සුනිල් චන්ද්රකුමාර, එස්. කේ. සේනානායක යන මහත්වරුන් සහභාගී වුහ.
ශ්රී ලංකාවේ ජාතික උරුමයන් හඳුනාගැනීම, සංරක්ෂණය කිරීම හා කළමනාකරණය කිරීම සඳහා උපාය මාර්ගික වැඩ පිළිවෙලක් සක් කිරීම වෙනුවෙන් මෙම පාර්ලිමේන්තු සංසදය ක්රියාත්මක වෙමින් පවතී.
පසුගිය සභාවාර වලදී මෙම සංසදය හමුවට රාජ්ය ආයතන හා නිලධාරීන් කැඳවා සාකච්ජා කළ බවත් මේ වනවිට ශ්රී ලංකාවේ ජාතික උරුමයන් හඳුනාගැනීම,සංරක්ෂණය කිරීම හා කළමනාකරණය කිරීම පිළිබඳව ඔවුන් යෝජනාවලියක් සකස්කරමින් සිටින බවත් සභාපතිවරයා සංසදය හමුවේ කරුණු දක්වමින් පැවසුවේය.
ඒ අනුව රාජ්ය ආයතන හා ස්වෙච්ජා සංවිධානවල අදහස් හා යෝජනා එකතුවෙන් ශ්රී ලංකාවේ ජාතික උරුමයන් හඳුනාගැනීම, සංරක්ෂණය කිරීම හා කළමනාකරණය සඳහා එක් උපායමාර්ගික වැඩ පිළිවෙලක් සකස්කිරීම අවසන් අරමුණ බවට පත් ඇති බව සභාපතිවරයා වැඩි දුරටත් අදහස් දක්වමින් පවසුවේය.
ශ්රී ලංකාව තුළ මේ වනවිට ලෝක උරුම ලෙස ස්ථාන 8ක් ප්රකාශට පත් කර ඇති නමුත් ජාතික උරුම ලෙස කිසිවක් ප්රකාශයට පත් කර නොමැති බව මෙහිදී අදහස් දක්වමින් සභාපතිවරයා පැවසුවේය. ඒ අනුව මෙතරම් ප්රෞඩ ඉතිහාසයක් හිමි ශ්රී ලංකාවේ ජාතික උරුම හඳුනාගනිමින් ඒවා සංරක්ෂණය කර කළමනාකරණ කිරීමේ දැඩි අවශ්යතාවය සභාපතිවරයා පෙන්වා දුන්නේය.
ශ්රී ලංකාව තුළ දෙලක්ෂ පනස් දහසකට අධික පුරාවිද්යාත්මක වටිනා කමින් යුත් පුරා වස්තූන් පවතින බවත් මේ මොහොත වන විට වාර්තා කර ඇත්තේ ඉන් දාහත් දහසකට අධික පුරාවිද්යාත්මක වස්තූන් ප්රමාණයක් පමණක් බව සංසදය හමුවේ කරුණු දක්වමින් ස්වෙච්ජා සංවිධාන ප්රධානීහු පැවසුහ.
ශ්රී ලංකාවේ ජාතික උරුමයන් සුරැකීම වෙනුවෙන් විධිමත් අයුරින් ගවේෂණය කර සැකසූ වාර්තා කිසිවක් ක්රියාත්මක නොකර යටපත් කර ඇති බව සංසදය හමුවේ අදහස් දක්වමින් මහාචාර්ය පුජ්යපාද ඉඳුරාගාරේ ධම්මරතන ස්වාමීන්ද්රයන් වහන්සේ පැවසූහ. ඒ අනුව එම වාර්තාවල දක්වා ඇති නිර්දේශ ක්රියාත්මක කිරීමේ අවශ්යතාවයද උන්වහන්සේ සංසදය හමුවේ පෙන්වා දුන්හ.
මේ අතර මෙරට ජාතික උරුම උරුමයන් සුරැකීම වෙනුවෙන් ජාතික උරුම කළමනාකරණ පනතක් සකස් විය යුතු බව ස්වේච්ජා සංවිධාන ප්රධානීහු මෙහිදී අවධාරණය කළහ. ඒ ඔස්සේ විධිමත් ආකාරයෙන් ශ්රී ලංකාවේ ජාතික උරුමයන් හඳුනාගැනීම, සංරක්ෂණය කිරීම හා කළමනාකරණයට අවස්ථා සැලසෙන බවද ඔවුහු පැවසූහ.
ජාතික උරුම සුරැකීම වෙනුවෙන් ඒ සඳහා ස්ථාපිත වී ඇති සියලු ආයතන ඒකාබද්ධව නියාමන ආයතනයක් පිහිටුවීමේ අවශ්යතාවයද ස්වෙච්ජා සංවිධාන ප්රධානීහු සංසදය හමුවේ කරුණු දක්වමින් අවධාරණය කළහ.
එමෙන්ම පුරාවිද්යා විෂය පතයට අදාළව මේ වනවිට පවතින නඩු කටයුතු හැකි ඉක්මනින් අවසන් කිරීමේ වැදගත්කම මෙන්ම, එම නඩු කටුතු වෙනම අධිකරණයක් මගින් පවත්වාගෙන යමින් එම නඩු කටයුතු හැකි ඉක්මනින් අවසන් කිරීමේ හැකියාව පිළිබඳවද සංසදය තුළ සාකච්ජා විය.
පුරාවිද්යා දෙපාර්තමේන්තුව දැනට පත්ව ඇති අකාර්යක්ෂම තත්ත්වයෙන් මුදවාගෙන වඩා කාර්යක්ෂම ආයතනයක් බවට පත් කිරීමේ දැඩි අවශ්යතාවයද ස්වෙච්ජා සංවිධාන ප්රධානීහු මෙහිදී අවධාරණය කළහ.
ජාතික උරුමයන් ආරක්ෂා කිරීම උදෙසා ප්රථමයෙන්ම දිවයිනේ සියලු විශ්ව විද්යාල වලින් පුරාවිද්යා විෂය හදාරා පිටව යන උපාධිධාරීන් නිසි ආයතන වල ස්ථාන ගත කිරීමේ වැදගත් කම ගැන මෙන්ම පාසල් පද්ධතිය තුළ දරුවන්ට ජාතික උරුමයන්ගේ වටිනාකම් හා ඒවා ආරක්ෂා කිරීමේ වැදගත්කම පිළිබඳ දැනුම ලබාදීමේ අවශ්යතාවය ගැනද සංසදය තුල දීර්ඝ ලෙස සකච්ජා විය.ඒ සඳහා වන දැනුම පාසැල් හා දහම් පාසල් විෂය නිර්දේශ තුළට ඇතුළත් කිරීමේ අවශ්යතාව ගැනද මෙහිදී සකච්ජා විය.
තවද දෙස් විදෙස් සංචාරක කර්මාන්තය ප්රවර්ධනය උදෙසා මෙරට ජාතික උරුමයන් යොදා ගැනීමටද අවධානය යොමු කළයුතු බවත් ඒ ඔස්සේ මෙරට ප්රෞඩත්වය ලොව පුරා ප්රචලිත කිරීමට,විදේශ විනිමය උත්පාදනයට සේම ලාංකේය පුරවැසියන්ට තම රටේ අභිමානය ගැන මනා වැටහීමක් ලබා ගැනීමටත් හැකි බව ස්වෙච්ජා සංවිධාන ප්රධානීහු පැවසූහ. දිවයිනේ කුමන හෝ ස්ථානයක පුරා වස්තූන්ට සිදුකරන හානි පිළිබඳව අදාළ අංශ වෙත ක්ෂණිකව දැනුම් දීම සඳහා දුරකථන ඇමතුම් මධ්යස්ථනයක් ස්ථාපිත කිරීමේ අවශ්යතාවයද මෙහිදී ස්වෙච්ජා සංවිධාන ප්රධානීහු අවධාරණය කළහ. ස්වෙච්ජා සංරක්ෂණය සම්මේලනයක් පිහිටුවීමේ අවශ්යතාවය හා ඒ ඔස්සේ ජාතික උරුමයන් ආරක්ෂා කිරීමට ලැබෙන දායකත්වය සම්බන්ධයෙන්ද සංසදය තුළ කරුණු සාකච්ජා විය.
2026-07-08
රේගු ආඥා පනත යටතේ යෝජනා සම්මතයක් සහ ශ්රී ලංකා අපනයන සංවර්ධන පනත යටතේ නියමයන් දෙකක් සලකා බැලීමෙන් අනතුරුව ඒවා පාර්ලිමේන්තුවේ අනුමැතිය සඳහා ඉදිරිපත් කිරීමට රජයේ මුදල් පිළිබඳ කාරක සභාව විසින් අනුමැතිය ලබා දෙන ලදී. ගරු පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන් පසුගියදා (ජූලි 06) පාර්ලිමේන්තුවේදී රැස්වූ මෙම කාරක සභාවේදී ඉහත තීරණය ගනු ලැබීය. ඒ අනුව, (235 අධිකාරිය වූ) රේගු ආඥා පනත යටතේ අංක 2478/03 දරන අති විශේෂ ගැසට් පත්රයේ පළ කර ඇති යෝජනා සම්මතය සහ ශ්රී ලංකා අපනයන සංවර්ධන පනත යටතේ අංක 2478/04 හා 2479/38 දරන අති විශේෂ ගැසට් පත්රවල පළ කර ඇති නියමයන් කාරක සභාව විසින් සලකා බලන ලදී. මෙම අවස්ථාවට මුදල් අමාත්යාංශය, ශ්රී ලංකා රේගුව සහ ශ්රී ලංකා අපනයන සංවර්ධන මණ්ඩලය නියෝජනය කරමින් නිලධාරීහු සහභාගිවී සිටියහ.ජාතික තීරු බදු ප්රතිපත්තිය ක්රියාත්මක කිරීම සම්බන්ධයෙන් වන 2026 අයවැය යෝජනාව පරිදි මෙරටට ආනයනය කරන භාණ්ඩ මත ක්රියාත්මකව පැවතී පැවතී 0%, 15% සහ 20% වන රේගු ආනයන බදු අනුපාතයන් 0%, 10%, 20% සහ 30% ලෙස කාණ්ඩ හතරක් වන පරිදි 2026 අප්රේල් 01 වැනිදා සිට ක්රියාත්මක කිරීම මේ අනුව සිදුවේ. මෙම සංශෝධන හුදෙක් බදු අනුපාත වෙනස් කිරීමක් නොව, ඉදිරි දශකය සඳහා රටේ වෙළෙඳ හා ආයෝජන පරිසරය හැඩගස්වන ජාතික තීරුබදු ප්රතිපත්තිය ක්රියාත්මක කිරීමේ ආරම්භය බව කාරක සභාවේදී අවධාරණය කෙරිණි. විද්යාත්මක හා පුරෝකථනය කළ හැකි තීරුබදු ව්යුහයක් ස්ථාපිත කිරීම මඟින් ශ්රී ලංකාව ගෝලීය සැපයුම් දාමයන් සමඟ වඩාත් කාර්යක්ෂමව සම්බන්ධ කිරීම මෙම ප්රතිපත්තියේ ප්රධාන අරමුණ බව නිලධාරීහු පැහැදිලි කළහ.මෙම ප්රතිපත්තිය යටතේ, එක්සත් ජාතීන්ගේ පුළුල් ආර්ථික වර්ගීකරණය (BEC Revision 5) පදනම් කරගත් නව සිව්-වැදෑරුම් තීරුබදු ව්යුහයක් හඳුන්වා දීමට යෝජනා කර ඇති අතර, එමඟින් HS කේත රැසක් ප්රතිසංවිධානය කිරීමට නියමිතය. ප්රාග්ධන භාණ්ඩ, අතරමැදි භාණ්ඩ, සංවේදී අතරමැදි භාණ්ඩ සහ පාරිභෝජන භාණ්ඩ යන ප්රධාන කාණ්ඩ හතර යටතේ නව බදු ව්යුහය ක්රියාත්මක කෙරෙන අතර, දේශීය කර්මාන්ත ආරක්ෂා කිරීම සහ රාජ්ය ආදායම් ස්ථාවරව පවත්වා ගැනීම පිළිබඳව ද අවධානය යොමු කර ඇත.ඉදිකිරීම් ක්ෂේත්රයට සහනයක් ලබාදීමේ අරමුණින් ටයිල් සඳහා දැනට පවතින 85-90% ඉහළ ඵලදායී බදු අනුපාතය 2029 වන විට පියවරෙන් පියවර 20% දක්වා අඩු කිරීමට සැලසුම් කර ඇති බව ද අනාවරණය විය. එමඟින් ඉදිකිරීම් පිරිවැය අඩුවී නිවාස හා යටිතල පහසුකම් ආයෝජන සඳහා ධනාත්මක බලපෑමක් ඇතිවනු ඇතැයි අපේක්ෂා කෙරේ.දේශීය කර්මාන්තවල ඉල්ලීම් සැලකිල්ලට ගනිමින් විවිධ ක්ෂේත්ර සඳහා නව ජාතික උප-බෙදුම් හඳුන්වාදීමට ද යෝජනා කර තිබේ.තවද, 2029 වන විට CESS සහ PAL වැනි පැරා තීරුබදු ක්රමානුකූලව ඉවත් කර සරල තීරු බදු ක්රමයක් කරා ගමන් කිරීම රජයේ ඉලක්කය බවද නිලධාරීහු පෙන්වා දුන්හ. බදු ලිහිල් කිරීමත් සමඟ ඇතිවිය හැකි අහිතකර බලපෑම් අවම කිරීම සඳහා ගත හැකි පියවරයන් පිළිබඳව ද කාරක සභාව උපදෙස් ලබා දුන්නේය.මෙම බදු ප්රතිසංස්කරණ මඟින් ඉදිරි වසර පහ තුළ ශ්රී ලංකාවේ අපනයන ආදායම ඇමරිකානු ඩොලර් බිලියන 18 සිට බිලියන 36 දක්වා දෙගුණ කිරීමේ අපනයන සංවර්ධන මණ්ඩලයේ ඉලක්කය සපුරා ගැනීමට සහාය වනු ඇති බවද සඳහන් විය. විශේෂයෙන් ඉලෙක්ට්රොනික උපකරණ, රබර් නිෂ්පාදන, ඖෂධ හා තොරතුරු තාක්ෂණ ක්ෂේත්රවල ගෝලීය සැපයුම් දාමයන් සමඟ ඒකාබද්ධ වීම සඳහා මෙම ප්රතිපත්තිය වැදගත් පදනමක් වනු ඇතැයි ද ප්රකාශ විණි.එමෙන්ම, වෙළෙඳ දත්ත යාවත්කාලීන කිරීමේ ප්රමාදය පිළිබඳවද කාරක සභාව දැඩි අවධානය යොමු කළේය. වෙළඳ හා ආයෝජන ප්රතිපත්ති දෙපාර්තමේන්තුව සතු වෙළෙඳ දත්ත 2021 වසරෙන් පසු යාවත්කාලීන වී නොමැති බව සභාපතිවරයාගේ අවධානයට ලක් වූ අතර, දත්ත මත පදනම් වූ ප්රතිපත්ති සම්පාදනය සඳහා අවශ්ය සියලු වෙළෙඳ දත්ත සහ අදාළ තොරතුරු සතියක් ඇතුළත යාවත්කාලීන කරන ලෙස අදාළ නිලධාරීන්ට කාරක සභාව උපදෙස් ලබා දුන්නේය.මෙම ගැසට් නිවේදන අද (08) පාර්ලිමේන්තුවේ විවාදයට ගැනීමෙන් අනතුරුව අනුමැතිය ලබා ගැනීමට ගැනීමට නියමිතය.ගරු නියෝජ්ය අමාත්ය චතුරංග අබේසිංහ, ගරු නියෝජ්ය අමාත්ය ආචාර්ය කෞශල්යා ආරියරත්න, ගරු පාර්ලිමේන්තු මන්ත්රීවරයන් වන රවි කරුණානායක, හර්ෂණ රාජකරුණා සහ නීතීඥ ලක්මාලි හේමචන්ද්ර යන මහත්ම මහත්මීහු මෙම කාරක සභා රැස්වීමට සහභාගී වූහ.
2026-07-08
වඩාත් යහපත් පොදු ප්රවාහනයක් උදෙසා පොකුරු බස් සමාගම් ක්රමය ආරම්භ කිරීමට කටයුතු කරන බවත් ඒ සඳහා අමාත්ය මණ්ඩල අනුමැතිය පසුගියදා හිමි වූ බවත් ප්රවාහන, මහාමාර්ග සහ නාගරික සංවර්ධන අමාත්ය ගරු අමාත්ය බිමල් රත්නායක මහතා පැවසීය. පාර්ලිමේන්තුවේදී ඊයේ (ජූලි 07) පැවති ප්රවාහන, මහාමාර්ග සහ නාගරික සංවර්ධන කටයුතු පිළිබඳ අමාත්යාංශයීය උපදේශක කාරක සභාවේ සභාපතිවරයා ලෙස අදහස් දක්වමින් ඒ මහතා මේ බව සඳහන් කළේය. ඒ අනුව 177, 170 සහ 190 යන මාර්ග අංකයන්හි ධාවනය වන බස් රථවලට අදාළව, නියමු ව්යාපෘතියක් ලෙස මෙය ආරම්භ කරන බවත් අමාත්යවරයා වැඩිදුරටත් අදහස් දක්වමින් පැවසීය.සාමාන්ය සේවා, අර්ධ සුඛෝපභෝගී සේවා, සුඛෝපභෝගී සේවා හා අධි සුඛෝපභෝගී සේවා ලෙස පෙර පැවති කාණ්ඩ හතරෙන් අර්ධ සුඛෝපභෝගී සේවා හා අධි සුඛෝපභෝගී සේවා කාණ්ඩ දෙක ඉවත් කිරීමට කටයුතු කර ඇති බව ද අමාත්යවරයා සඳහන් කළේය. අර්ධ සුඛෝපභෝගී සේවා සම්බන්ධයෙන් අධිකරණමය කටයුත්තක් පවතින බවත් ඊට අදාළ කරුණු අධිකරණයට ඉදිරිපත් කිරීමට අපේක්ෂා කරන බවත් ඇමතිවරයා ප්රකාශ කළේය. දුර ගමන් සේවා සහ කෙටි දුර ගමන් සේවා සඳහා බස් ගාස්තු තීරණය කිරීමට එකම සූත්රයක් භාවිතා කිරීම සාධාරණ නොවන බැවින් දුර ගමන් සේවා සඳහා දැරීමට සිදුවන වැඩි පිරිවැය සැලකිල්ලට ගෙන දුර ගමන් බස් ගාස්තු තීරණය කිරීම සඳහා වෙනම ක්රමවේදයක් හදුන්වා දෙන බවද අමාත්ය බිමල් රත්නායක මහතා පැවසීය. බස් කර්මාන්තය රැක ගැනීමටත් පාරිභෝගිකයා ආරක්ෂා කර ගැනීමටත් කටයුතු කරන බව ද ඒ මහතා අවධාරණය කළේය. ඉන්ධන මිල අඩුවීමේදී බස් ගාස්තු අඩු කිරීමට ඇති හැකියාව පිළිබඳව කාරක සභා සභාපතිවරයා නිලධාරීන්ගෙන් කරුණු විමසා සිටියේය. තෙල් මිල අඩුවන ප්රමාණයට සාපේක්ෂව අනෙකුත් පිරිවැය තවදුරටත් ඉහළ මට්ටමක පැවතීම ගැටලුවක් බව නිලධාරීහු එහිදී පෙන්වා දුන්හ. මාර්ග අනතුරු අවම කිරීම, පාපැදි සහ යතුරු පැදි සඳහා වෙනම මං තීරුවක් සකස් කිරීම, මාර්ග සංවර්ධන කටයුතු, මගී ජනතාවට ඉතිරි මුදල් නොලැබීම සම්බන්ධ පැමිණිලි ඇතුළු කරුණු රැසක් පිළිබඳව ද කාරක සභාවේ අවධානය යොමු වූ අතර අදාළ පියවර ගැනීම සඳහා නිලධාරීන්ට උපදෙස් ලබා දීම ද සිදුවිය. එසේම ප්රවාහන හා නාගරික සංවර්ධන ක්ෂේත්රවලට අදාළව ගරු මන්ත්රීවරු ඉදිරිපත් කළ ගැටලුවලට කඩිනම් විසඳුම් ලබා දීමට මැදිහත් වන ලෙස ද කාරක සභා සභාපතිවරයා නිලධාරීන්ට උපදෙස් ලබා දුන්නේය.තවද, (203 අධිකාරිය වූ ) මෝටර් වාහන පනත යටතේ ප්රවාහන, මහාමාර්ග සහ නාගරික සංවර්ධන අමාත්යවරයා විසින් සාදන ලදුව, 2026 මාර්තු 19 දිනැති අංක 2480/22 දරන අති විශේෂ ගැසට් පත්රයේ පළ කරන ලද නියෝග සලකා බැලීමෙන් අනතුරුව පාර්ලිමේන්තුවේ අනුමැතිය සඳහා ඉදිරිපත් කිරීමට ද මෙහිදී කාරක සභාවේ එකඟත්වය පළවිය. අධිවේගී මාර්ගවල ගමන් ගන්නා වාහනවල නිෂ්පාදකයා විසින් ආසන පටි සවිකර නොමැති ආසන සඳහා ආසන පටි සවිකිරීමට ලබා දුන් සහන කාලය ප්රමාණවත් නොවන බව නිරීක්ෂණය වූ බැවින් එම සහන කාලය 2026.03.20 වැනි දිනයෙන් ආරම්භ වී 2026.06.19 වැනි දිනයෙන් අවසාන වන දින දක්වා දීර්ඝ කිරීම සඳහා මෙම නියෝග ප්රකාශයට පත්කර ඇත.නාගරික සංවර්ධන ගරු නියෝජ්ය අමාත්ය එරංග ගුණසේකර මහතා ඇතුළු මැති ඇමතිවරු රැසක් ද මහාමාර්ග සහ නාගරික සංවර්ධන කටයුතු අමාත්යාංශය නියෝජනය කරන නිලධාරීන් පිරිසක් ද මෙම කාරක සභා රැස්වීමට සහභාගී විය.
2026-07-07
සංචාරක කර්මාන්තය ප්රවර්ධනය කිරීම සඳහා දිවයිනේ විවිධ ප්රදේශවල ක්රියාත්මක කර ඇති ව්යාපෘතිවල වත්මන් ප්රගතිය සහ සංචාරක ක්ෂේත්රය තවදුරටත් සංවර්ධනය කිරීම සඳහා ලබන වසරේ අයවැයෙන් වෙන් කිරීමට යෝජිත ප්රතිපාදන පිළිබඳව විදේශ කටයුතු, විදේශ රැකියා හා සංචාරක කටයුතු පිළිබඳ අමාත්යාංශීය උපදේශක කාරක සභාවේදී දීර්ඝ වශයෙන් සාකච්ඡා කෙරිණි.ඒ, එම උපදේශක කාරක සභාව එහි සභාපති, විදේශ කටයුතු, විදේශ රැකියා හා සංචාරක ගරු අමාත්ය විජිත හේරත් මහතාගේ ප්රධානත්වයෙන් පසුගියදා පාර්ලිමේන්තුවේදී රැස් වූ අවස්ථාවේදීය.මෙහිදී, ශ්රී ලංකාව විදේශ රටවල් සමඟ එළඹ ඇති වෙළෙඳ ගිවිසුම්වල වත්මන් තත්ත්වය පිළිබඳව ද කාරක සභාවේ අවධානය යොමු විය. විදේශ වෙළෙඳ ගිවිසුම් සමාලෝචනය කිරීම සඳහා විශේෂ කමිටුවක් පත් කර ඇති බවත්, එම කමිටුවේ වාර්තාව ලැබීමෙන් අනතුරුව අවශ්ය ප්රතිපත්තිමය තීරණ ගනු ලබන බවත් කාරක සභාවේ සභාපතිවරයා සඳහන් කළේය.එමෙන්ම, සංචාරක කර්මාන්තය තවදුරටත් ප්රවර්ධනය කිරීම සඳහා දිවයිනේ විවිධ ප්රදේශවල ක්රියාත්මක කළ හැකි නව ව්යාපෘති හා වැඩසටහන් සම්බන්ධයෙන් පාර්ලිමේන්තු මන්ත්රීවරුන් විසින් යෝජනා රැසක් කාරක සභාවේ අවධානයට යොමු කරන ලදී.මෙම රැස්වීමට විදේශ කටයුතු හා විදේශ රැකියා ගරු නියෝජ්ය අමාත්ය අරුන් හේමචන්ද්ර , සංචාරක ගරු නියෝජ්ය අමාත්ය මහාචාර්ය රුවන් රණසිංහ යන මහත්වරු සහ කාරක සභාවේ සාමාජික ගරු පාර්ලිමේන්තු මන්ත්රීවරු සහභාගි වූහ.
2026-07-06
2025 වසරේ සහ 2026 වසරේ පළමු කාර්තුවේ ශ්රී ලංකාවේ රාජ්ය මූල්ය කාර්යසාධනය, රාජ්ය ආදායම් රැස් කිරීම, රාජ්ය වියදම් කළමනාකරණය, රාජ්ය ණය තත්ත්වය සහ ප්රතිපත්තිමය ප්රගතිය පිළිබඳ විමර්ශන වාර්තාව ගරු පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන් පසුගියදා පාර්ලිමේන්තුවේදී රැස් වූ රජයේ මුදල් පිළිබඳ කාරක සභාවේදී විමසා බලන ලදී. මෙම කාරක සභාවට ගරු නියෝජ්ය අමාත්යවරුන් වන චතුරංග අබේසිංහ, ආචාර්ය කෞෂල්යා ආරියරත්න, නිශාන්ත ජයවීර, අර්කම් ඉල්යාස්, පාර්ලිමේන්තු මන්ත්රීවරුන් වන රවී කරුණානායක, හර්ෂණ රාජකරුණා, තිළිණ සමරකෝන්, නිමල් පලිහේන, එම්.කේ.එම්. අස්ලම්, අජිත් අගලකඩ, චම්පික හෙට්ටිආරච්චි, නීතිඥ ලක්මාලි හේමචන්ද්ර සහ මාර්ගගත තාක්ෂණය ඔස්සේ විජේසිරි බස්නායක යන මහත්ම මහත්මීහු සහභාගි වූහ.මෙහිදී 2025 වර්ෂයේ රාජ්ය ආදායම් රැස් කිරීම ඇස්තමේන්තුගත ඉලක්ක ඉක්මවා වාර්තාගත ප්රගතියක් පෙන්නුම් කර ඇති බව අනාවරණය වූ අතර, දේශීය ආදායම් දෙපාර්තමේන්තුව, ශ්රී ලංකා රේගුව සහ සුරාබදු දෙපාර්තමේන්තුව සිය ආදායම් ඉලක්ක සාර්ථකව සපුරා ඇති බව නිලධාරීහු කාරක සභාවට දැනුම් දුන්හ. එමෙන්ම 2026 වර්ෂයේ පළමු කාර්තුවේදී ද ආදායම් රැස් කිරීම අපේක්ෂිත මට්ටම ඉක්මවා ඇති බව එම නිලධාරීහු සඳහන් කළහ.රාජ්ය වියදම් සම්බන්ධයෙන් සිදු කළ විමර්ශනයේදී වැටුප් හා දීමනා, විශ්රාම වැටුප් සහ සෞඛ්ය ක්ෂේත්රයේ වියදම් සැලකිය යුතු ලෙස ඉහළ ගොස් ඇති බවත්, විශේෂයෙන් විශ්රාම වැටුප් පද්ධතියේ දිගුකාලීන මූල්ය තිරසරභාවය සම්බන්ධයෙන් ප්රතිපත්තිමය අවධානයක් යොමු කළ යුතු බවත් කාරක සභාව විසින් අවධාරණය කරන ලදී. එසේම ප්රාග්ධන වියදම් යටතේ මාර්ග සංවර්ධන කටයුතු සඳහා සැලකිය යුතු මුදලක් වැය කර ඇති බව ද මෙහිදී අනාවරණය විය.තවද රාජ්ය ණය කළමනාකරණය, ණය සේවාකරණය, මුදල් රක්ෂිත පවත්වාගෙන යාම සහ පොලී අනුපාතවල බලපෑම පිළිබඳව ද දීර්ඝ ලෙස සාකච්ඡා කෙරිණි.සුරාබදු දෙපාර්තමේන්තුවේ සුරාබදු ඩිජිටල් ස්ටිකර් ව්යාපෘතියේ පිරිවැය හා එහි විනිවිදභාවය පිළිබඳව ද කාරක සභාවේ අවධානය යොමු වූ අතර, ඉදිරි ටෙන්ඩර් ක්රියාවලීන් වඩාත් විනිවිදභාවයෙන් හා පිරිවැය කාර්යක්ෂමතාවය සැලකිල්ලට ගනිමින් ක්රියාත්මක කිරීමේ අවශ්යතාව කාරක සභාව විසින් පෙන්වා දෙන ලදී.දේශීය අදායම් දෙපාර්තමේන්තුවේ 2025-2026 කාල සීමාව තුළ ප්රගතියද සාකච්ඡා කෙරිණි. මෙහිදී RAMIS පද්ධතිය තවදුරටත් සංවර්ධනය කිරීම, බදු ගෙවන්නන් සඳහා පහසු වෙබ් අඩවියක් සහ ජංගම යෙදුමක් හඳුන්වා දීම පිළිබඳව ද සාකච්ඡා කෙරිණි.ශ්රී ලංකා රේගුව සමග පැවති සාකච්ඡාවේදී, රථවාහන සඳහා ණයවර ලිපි විවෘත කිරීමේදී දේශ සීමා නීතිරීති උල්ලංඝනය වීම (Cross-border LC violation) නිසා මුදා හැරීමෙන් තොරව තවමත් වරායේ වාහන නවතා ඇති බව හෙළි විය. එබැවින්, ප්රමාද ගාස්තු අය කර හෝ සුදුසු පිළියමක් සාකච්ඡා කොට වාහන කඩිනමින් වරාය අංගනයෙන් නිදහස් කළ යුතු බව කාරක සභාව විසින් අවධාරණය කරන ලදී.වාහන සඳහා පනවා ඇති අධික බදු පිළිබඳ කාරක සභා සාමාජිකයන් සාකච්ඡා කළහ. Electric සහ Hybrid වාහන සඳහා ඒවායේ මිල මත පදනම්ව බදු පැනවීමෙන් (අඩු මිල රථ සඳහා අඩු බදු) රථවාහන මිල සැලකිය යුතු ලෙස වෙනස් වන බවට ද මෙහිදී අදහස් ඉදිරිපත් විය. මේ වාහනවල ඉන්ධන කාර්යක්ෂමතාව, බදු ප්රතිපත්ති සඳහා සැලකිල්ලට ගත හැකි බව සාකච්ඡා විය.මෙහිදී රාජ්ය ආදායම් වර්ධනය යහපත් ප්රවණතාවක් පෙන්නුම් කළද, විශ්රාම වැටුප්, රාජ්ය ණය සහ පුනරාවර්තන වියදම් පාලනය කිරීම සඳහා දිගුකාලීන ව්යුහාත්මක ප්රතිසංස්කරණ ක්රියාත්මක කිරීමේ අවශ්යතාව කාරක සභාව විසින් අවධාරණය කරන ලදී. එමෙන්ම, රාජ්ය මූල්ය කළමනාකරණයේ විනිවිදභාවය, කාර්යක්ෂමතාව සහ ඩිජිටල්කරණය තවදුරටත් ශක්තිමත් කිරීම රටේ මූල්ය ස්ථාවරත්වය තහවුරු කිරීම සඳහා අත්යවශ්ය බව ද මෙහිදී පෙන්වා දෙන ලදී.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
