2023-10-16
පාර්ලිමේන්තු ක්රියාදාමයට පුරවැසියන් සක්රීයව සම්බන්ධ කර ගැනීමේ විවෘත පාර්ලිමේන්තු ක්රමවේදය පිළිබදව රාජ්ය නිලධාරීන් දැනුවත් කිරීමේ විශේෂ වැඩමුලුවක් අග්රාමාත්ය ගරු දිනේශ් ගුණවර්ධන මහතාගේ ප්රධානත්වයෙන් 2023.10.12 දින පැවැත්විණි.
විවෘත පාර්ලිමේන්තුවකට මූලාරම්භයක් සදහා වන පාර්ලිමේන්තු සංසදය, පාර්ලිමේන්තුවේ සන්නිවේදන දෙපාර්තමේන්තුව සහ ජාතික ප්රජාතන්ත්රවාදී ආයතනය (NDI) සමග එක්ව සංවිධානය කළ මෙම වැඩමුළුව සදහා අමාත්යාංශ ලේකම්වරු, දිස්ත්රික් ලේකම්වරු ඇතුළු ජ්යෙෂ්ඨ රාජ්ය නිලධාරීන් රැසක් එක්ව සිටියහ.
පාර්ලිමේන්තුව සහ රාජ්ය නිලධාරීන් සමග මෙරට ප්රතිපත්ති සම්පාදනය ඇතුළු ව්යවස්ථාදායක ක්රියාවලියට සම්බන්ධවීමේ අවස්ථාව මහජනතාවට ඉදිරියේදී තවදුරටත් පුළුල් වන බව පාර්ලිමේන්තුවේ නියෝජ්ය කථානායක ගරු අජිත් රාජපක්ෂ මහතා මෙහිදී පැවසීය. ආංශික අධීක්ෂණ කාරක සභා හරහා දේශපාලන අධිකාරිය සහ රාජ්ය නිලධාරීන් සමග විවිධ දේශපාලන අදහස් දරන තරුණ කොටස් ඇතුළු මහජනතාවට සම්බන්ධ වීමට අවස්ථාව හිමිවී ඇති බව ද ඒ මහතා පෙන්වා දුන්නේය.
පාර්ලිමේන්තුවේ ඉතා වැදගත් පනත් සම්පාදනය ඇතුළු කටයුතු සිදු වුවද ඒවා මාධ්ය හරහා ජනගත නොවීම නිසා දේශපාලඥයන්ට මෙන්ම රාජ්ය නිලධාරීන්ට විශාල අභියෝගයකට මුහුණ දීමට සිදුවන බවද ඒ මහතා පෙන්වා දුන්නේය.
දේශපාලන පක්ෂ පාට භේදයකින් තොරව මහජන නියෝජිතයන් ඇතුළ මහජනතාව විවෘත පාර්ලිමේන්තුවකට මූලාරම්භයක් සදහා වන පාර්ලිමේන්තු සංසදය සමග සම්බන්ධ වෙමින් කටයුතු කිරීම සතුටට කාරණයක් බව ද ලැබූ විශාල ජයග්රහණයක් බවද මෙහිදී එම කාරක සභාවේ සභාපති මයන්ත දිසානායක මහතා පැවසීය. සිවිල් සංවිධාන 13 ක් ඇතුළු පාර්ශ්වයන්ගේ සහයෝගීත්වයෙන් දිවයින පුරා ක්රියාත්මක කර ඇති මෙම දැනුවත් කිරීමේ වැඩසටහන් මාලාවට මෙන්ම විවෘත පාර්ලිමේන්තු ක්රමවේදය සමග ජනතාව අත්වැල් බැදගනිමින් සිටින බවත් සභාපතිවරයා පැවසීය. මේ අනුව ප්රජාතන්ත්රවාදය ආරක්ෂා කරගනිමින් කටයුතු කිරීමේ වැදගත්කම ද මෙහිදී සභාපතිවරයා අවධාරණය කළේය.
මෙම සංසදයේ හිටපු සභාපති සහ හිටපු නියෝජ්ය කථානායක ගරු ආනන්ද කුමාරසිරි මහතා අදහස් දක්වමින් මෙහිදී පෙන්වා දුන්නේ මැතිවරණයකින් පසු පාර්ලිමේන්තුවේ 225 දෙනාට පාලනය බාරදී බලා නොසිට පාර්ලිමේන්තුව හා සහසම්බන්ධවෙමින් කටයුතු කිරීම අවශ්ය බවයි. ඉන්දියාව වැනි රටක් ඒ සදහා හොද උදාහණයක් බවත් ඒ මහතා පැවසීය. එසේම 8 වැනි පාර්ලිමේන්තුවේදී ආරම්භ කළ මෙම සංසදයේ කටයුතු මේ වන විට වඩාත් පුළුල් කරමින් සිදු කරන මෙහෙවර පිළිබදව ගරු මයන්ත දිසානායක මහතා ඇතුළු සාමාජිකයන්ට ස්තූතිවන්ත වන බවද හිටපු නියෝජ්ය කථානායකවරයා පැවසීය.
මෙහිදී අදහස් දක්වමින් අග්රාමාත්ය ලේකම් අනුර දිසානායක මහතා පවසා සිටියේ ප්රජාතන්තවාදය ශක්තිමත් කරමින් ගන්නා මෙවැනි ක්රියාවලින්ට සහය දෙමින් එම අභියෝග ජය ගැනීමේ විශාල වගකීමක් රාජ්ය නිලධාරීන් සතුවන බවයි.
මෙහිදී අදහස් දැක්වු පාර්ලිමේන්තුවේ වැඩබලන මහලේකම් චමින්ද කුලරත්න මහතා පෙන්වා දුන්නේ මහජනතාව ව්යවස්ථාදායක ක්රියාවලියට සම්බන්ධ කර ගැනීමේ විවෘත පාර්ලිමේන්තු සංකල්පය වඩාත් ශක්තිමත් කිරීම සදහා වත්මන් ආංශික අධීක්ෂණ කාරක සභා පිහිටුවීම ඉතා වැදගත් පියවරයක් බවයි. එම කාරක සභා 17න් 8ක සභාපතිවරුන් විපක්ෂය ද 9ක් ආණ්ඩු පක්ෂය ද නියෝජනය කිරීම ප්රජාතන්ත්රවාදී පියවරයක් බව ද පෙන්වා දුන්නේය. එසේම මෙම කාරක සභාවට තරුණයන් ඇතුළු මහජනතාවට සහභාගී වීමට අවස්ථාව හිමිව ඇති බව ද පෙන්වා දුන්නේය. ස්ථාවර නියෝග අනුව ඕනෑම පනත් කෙටුම්පතක් දෙවනවර කියවීම සදහා පාර්ලිමේන්තුවට ඉදිරිපත් කිරීමට ප්රථම අදාළ ආංශික අධීක්ෂණ කාරක සභාවේ සාකච්ඡාවට ගෙන නිර්දේශය ලබා ගැනීම අවශ්ය බැවින් වඩාත් විවෘතව ව්යවස්ථායක කටයුතු සිදු කිරීමේ අවකාශය ඇති බව ද වැඩබලන මහලේකම්වරයා පෙන්වා දුන්නේය.
එසේම අදාළ අමාත්යවරයා කාරක සභාවේ සාමාජිකයෙකු නොවන නිසා අදාළ පනත් කෙටුම්පතේ අවශ්යතාව සහ ප්රතිපත්තිමය කරුණු කාරක සභාවට ඉදිරිපත් කිරීමේ සම්පූර්ණ වගකීම රාජ්ය නිලධාරීන්ට හිමි වන බව ඒ මහතා පෙන්වා දුන්නේය. කමිටු ප්රමාණය වැඩි වීම නිසා රාජ්ය නිලධාරීන්ට මුහුණ දීමට සිදුවන ගැටලු පවතී නම් ඉදිරියේදී එම තත්ත්වය විසදීම ද මැදිහත් වන බව ද ඒ මහතා පැවසීය.
එසේම මෙහිදී පාර්ලිමේන්තුවේ සහකාර මහලේකම් හංස අබේරත්න මහතා විසින් විවෘත පාර්ලිමේන්තු සංකල්පය තුළ මහජන ප්රවේශය වැඩි කිරීම පිළිබදව අදහස් දක්වන ලදී.
අනතුරුව විවෘත පාර්ලිමේන්තු සංකල්පය තුළ පවතින අභියෝග ජයගැනීම පිළිබද දේශපාලන අධිකාරිය සහ පරිපාලන අධිකාරය සතු වගකීම් සහ අභියෝග පිළිබදව විවෘත සංවාදයක්ද මෙහිදී පැවැත්විණි.
විවෘත පාර්ලිමේන්තුවකට මූලාරම්භයක් සදහා වන පාර්ලිමේන්තු සංසදයේ ලේකම් ගරු ප්රේම්නාත් සී. දොලවත්ත එසේම සාමාජික පාර්ලිමේන්තු මන්ත්රීවරුන් වන ගරු ඩිලාන් පෙරේරා, ගරු මොහොමඩ් මුසම්මිල්, ගරු සුජිත් සංජය පෙරේරා සහ ගරු වීරසුමන වීරසිංහ යන මහත්වරු මෙම අවස්ථාවට සහභාගී වූහ.
2026-09-18
ජර්මානු පාර්ලිමේන්තුවේ දකුණු ආසියානු පාර්ලිමේන්තු කණ්ඩායමට අයත් නියෝජිත පිරිසක් දෙරට අතර පාර්ලිමේන්තු සහයෝගීතාව තවදුරටත් ශක්තිමත් කර ගැනීමේ අරමුණින් 2026 සැප්තැම්බර් 16 වන දින ශ්රී ලංකා පාර්ලිමේන්තුවේ සංචාරයක නිරත වූහ. ජර්මානු පාර්ලිමේන්තු මන්ත්රී නික්ලාස් කැපර් (Nicklas Kappe) මහතාගේ ප්රධානත්වයෙන් පැමිණි නියෝජිත පිරිසට ජර්මානු පාර්ලිමේන්තු මන්ත්රීවරුන් වන ජෙරොල්ඩ් ඔටන් (Gerold Otten), යොහාන් සාටෝෆ් (Johann Saathoff) සහ උලෙ ෂාවුස් (Ulle Schauws) යන මහත්ම මහත්මීහු ඇතුළත් වූහ. එමෙන්ම නියෝජිත පිරිස සමඟ ශ්රී ලංකාවේ ජර්මානු වැඩබලන තානාපතිනි සාරා හැසල්බර්ච් (Chargé d’Affaires), පාර්ලිමේන්තු ලේකම් කාර්යාලයේ කාර්ය මණ්ඩල සාමාජික කැට්රීනා බියෙනර්ට් (Katerina Bienert) සහ දේශපාලන කටයුතු පිළිබඳ ජ්යෙෂ්ඨ උපදේශිකා ධාරිණී දළුවත්ත (Dharini Daluwatte) යන මහත්මීන්ද එක්ව සිටියහ.ගරු නියෝජ්ය කථානායක වෛද්ය රිස්වි සාලි මහතා විසින් නියෝජිත පිරිස උණුසුම් අයුරින් පිළිගත් අතර අනතුරුව එම නියෝජිත පිරිස ශ්රී ලංකා - ජර්මානු පාර්ලිමේන්තු මිත්රත්ව සංගමයේ සාමාජිකයින් සමඟ දිවා භෝජන සංග්රහයකට ද එක්විය. ශ්රී ලංකා - ජර්මානු පාර්ලිමේන්තු මිත්රත්ව සංගමයේ සභාපති, ගරු අමාත්ය නීතිඥ හර්ෂණ නානායක්කාර මහතා ඇතුළු පාර්ලිමේන්තු මන්ත්රීවරු පිරිසක් එම සාකච්ඡාවට සහභාගී වූ අතර, පාර්ලිමේන්තුවේ වැඩබලන මහලේකම් හංස අබේරත්න මහතා ද ඊට එක්ව සිටියේය.මෙම සාකච්ඡාවේදී පාර්ලිමේන්තු ක්රියා පටිපාටි සහ කාරක සභා ක්රමය, කාන්තා දේශපාලන නියෝජනය සහ නායකත්වය ඉහළ නැංවීම, ස්ත්රී පුරුෂ සමාජභාවීය සමානාත්මතාවය තහවුරු කිරීම මෙන්ම දේශපාලන ක්රියාවලියට තරුණ පරම්පරාවේ වැඩි දායකත්වයක් ලබාගැනීම කෙරෙහි අවධානය යොමු විය. අවංකභාවය සහ නීතියට ගරු කිරීම සම්බන්ධයෙන් තරුණ තරුණියන් අතර වර්ධනය වෙමින් පවතින උනන්දුව පිළිබඳව ද දෙපාර්ශ්වය විසින් අදහස් හුවමාරු කර ගන්නා ලදී. වාර්ගික හා ආගමික ගැටලු විසඳීම සහ සියලු ප්රජාවන් අතර විශ්වාසය ගොඩනැංවීමේ වැදගත්කම පිළිබඳව ද මෙහිදී අවධානය යොමු විය.දිවා භෝජන සංග්රහයෙන් අනතුරුව, නියෝජිත පිරිස අමාත්යාංශීය උපදේශක කාරක සභා ත්රිත්වයක් සහ ආංශික අධීක්ෂණ කාරක සභා ද්විත්වයක් සමඟ ඒකාබද්ධ සාකච්ඡාවකට එක් වූහ. ඒ අනුව මෙම සාකච්ඡාවට බලශක්ති කටයුතු පිළිබඳ අමාත්යාංශයීය උපදේශක කාරක සභාව, මුදල්, ක්රම සම්පාදන සහ ආර්ථික සංවර්ධන කටයුතු පිළිබඳ අමාත්යාංශයීය උපදේශක කාරක සභාව, විදේශ කටයුතු, විදේශ රැකියා සහ සංචාරක කටයුතු පිළිබඳ අමාත්යාංශයීය උපදේශක කාරක සභාව, ආර්ථික සංවර්ධනය සහ අන්තර්ජාතික සබඳතා පිළිබඳ ආංශික අධීක්ෂණ කාරක සභාව සහ යටිතල පහසුකම් සහ උපාය මාර්ගික සංවර්ධනය පිළිබඳ ආංශික අධීක්ෂණ කාරක සභාව යන කාරක සභා සම්බන්ධ විය.ආර්ථික සංවර්ධනය සහ අන්තර්ජාතික සබඳතා පිළිබඳ ආංශික අධීක්ෂණ කාරක සභාවේ සභාපති, ගරු පාර්ලිමේන්තු මන්ත්රීනි නීතිඥ ලක්මාලි හේමචන්ද්ර සහ යටිතල පහසුකම් හා උපායමාර්ගික සංවර්ධනය පිළිබඳ ආංශික අධීක්ෂණ කාරක සභාවේ සභාපති ගරු පාර්ලිමේන්තු මන්ත්රී එස්. එම්. මරික්කාර් යන මහත්ම මහත්මීහු ඇතුළු එම කාරක සභා නියෝජනය කරන ගරු පාර්ලිමේන්තු මන්ත්රීවරුන් පිරිසක් ද මෙම සාකච්ඡාවට සහභාගී වූහ. එමෙන්ම අධ්යක්ෂ (ව්යවස්ථාදායක සේවා) එම්. ජයලාත් පෙරේරා මහතා ඇතුළු පාර්ලිමේන්තු නිලධාරීහු පිරිසක් ද එක්ව සිටියහ.ජර්මානු පාර්ලිමේන්තු නියෝජිත පිරිස විසින් හඳුනාගෙන තිබූ උනන්දුවක් දක්වන ක්ෂේත්රවලට අදාළව, අන්යෝන්ය වශයෙන් වැදගත් වන කරුණු පිළිබඳව සාකච්ඡා කිරීමේ අරමුණින් මෙම සාකච්ඡාව පවත්වන ලදී. අදාළ කාරක සභාවල ප්රධාන කාර්යභාරයන්, වත්මන් ක්රියාකාරකම් සහ උපායමාර්ගික ප්රමුඛතා පිළිබඳව මෙහිදී අදහස් හුවමාරු කර ගැනීම සිදු විය. අපද්රව්ය කළමනාකරණය, ජලය පිරිපහදු කිරීම සහ ජල සම්පාදනය , විදුලිබල හා බලශක්ති ක්ෂේත්රය මෙන්ම ආර්ථික හා උපායමාර්ගික සංවර්ධනයට අදාළ දෙරටේ අත්දැකීම් පිළිබඳව ද මෙහිදී සාකච්ඡා විය.මෙම හමුව ශ්රී ලංකාවේ සහ ජර්මනියේ පාර්ලිමේන්තු මන්ත්රීවරුන් අතර අත්දැකීම් සහ අදහස් හුවමාරු කර ගැනීම සඳහා වැදගත් අවස්ථාවක් වූ අතර, දෙරට අතර පාර්ලිමේන්තු සංවාදය, සහයෝගීතාව සහ අන්යෝන්ය අවබෝධය තවදුරටත් ශක්තිමත් කිරීමට ද දායක විය.
2026-09-14
ශ්රී ලංකා මුස්ලිම් කොංග්රසයේ ජාතික ලැයිස්තු පාර්ලිමේන්තු මන්ත්රී එම්.එස්. අබ්දුල් වාහිද් මහතා සිය පාර්ලිමේන්තු මන්ත්රී ධුරයෙන් ඉල්ලා අස්වීමේ ලිපිය තමා වෙත ලබාදී ඇති බව පාර්ලිමේන්තුවේ වැඩ බලන මහ ලේකම් හංස අබේරත්න මහතා මැතිවරණ කොමිෂන් සභාවේ සභාපතිවරයා වෙත ලිපියක් යොමු කරමින් දන්වා තිබේ.එම්.එස්. අබ්දුල් වාහිද් මහතාගේ ලිපියට අනුව, ඉහත ඉල්ලා අස්වීම 2026 සැප්තැම්බර් මස 14 වැනි දින සිට බලපැවැත්වෙන බවද වැඩ බලන මහ ලේකම්වරයා සඳහන් කර ඇත.ඒ අනුව, දසවැනි පාර්ලිමේන්තුවේ මන්ත්රී ධුරයක පුරප්පාඩුවක් ඇති වී තිබෙන බව 1981 අංක 1 දරන පාර්ලිමේන්තු මැතිවරණ පනතේ 64(5) වගන්තිය ප්රකාරව මැතිවරණ කොමිෂන් සභාවේ සභාපතිවරයා වෙත දැනුම් දී තිබේ.
2026-09-11
ශ්රී ලංකාවේ චීන මහජන සමූහාණ්ඩුවේ නව තානාපති ගරු වේයි හුවාෂියැං (Wei Huaxiang) මහතා පසුගිය සැප්. 10 වැනිදා පාර්ලිමේන්තු පරිශ්රයේදී ගරු කථානායක වෛද්ය ජගත් වික්රමරත්න මහතා හමුවිය. මෙම අවස්ථාවට පාර්ලිමේන්තුවේ මහලේකම් කුෂානි රෝහණදීර මහත්මිය ද සහභාගී වූවාය.නව තානාපතිවරයා උණුසුම් ලෙස පිළිගත් ගරු කථානායකවරයා, ශ්රී ලංකාවේ චීන තානාපති ධුරයට පත්වීම පිළිබඳව ඒ මහතා වෙත සුබපැතුම් පළ කළේය. එමෙන්ම ශ්රී ලංකාව සහ චීනය අතර දීර්ඝ කාලයක් පුරා පවතින මිත්රශීලී සහ සමීප සබඳතා තවදුරටත් ශක්තිමත් කිරීමේ වැදගත්කම ද කථානායකවරයා මෙහිදී අවධාරණය කළේය.විවිධ අභියෝගාත්මක අවස්ථාවලදී, විශේෂයෙන් ශ්රී ලංකාව මුහුණ දුන් මෑත කාලීන ආර්ථික අර්බුදයේදී, සැබෑ මිතුරෙකු ලෙස චීනය ශ්රී ලංකාවට ලබාදුන් අඛණ්ඩ සහයෝගය පිළිබඳව ශ්රී ලංකාවේ කෘතඥතාව පළ කරන බව ගරු කථානායකවරයා සඳහන් කළේය. මෑතකදී ඇති වූ දිට්වා සුළි කුණාටුවෙන් පසු චීනය ලබාදුන් සහයෝගය මෙන්ම මෙරට පාසල් සිසුන් සඳහා පාසල් නිල ඇඳුම් සඳහා අවශ්ය රෙදි ලබාදීම ඇතුළු සහයෝගය ද ඔහු මෙහිදී ඔහුගේ ඇගයීමට ලක් විය.පාර්ලිමේන්තු රාජ්ය තාන්ත්රික කටයුතුවල වැදගත්කම පෙන්වා දෙමින් ගරු කථානායකවරයා, ශ්රී ලංකා සහ චීන පාර්ලිමේන්තු අතර සහයෝගීතාව ශක්තිමත් කිරීම සඳහා පාර්ලිමේන්තු හුවමාරු වැඩසටහන් ඇතුළු ක්රියාමාර්ග ගෙන ඇති බව සඳහන් කළේය. ඉදිරියේදී ද ශ්රී ලංකා - චීන පාර්ලිමේන්තු මිත්රත්ව සංගමය හරහා වැඩසටහන් සහ නව ක්රියාමාර්ග ක්රියාත්මක කරමින් දෙරට අතර සබඳතා තවදුරටත් ශක්තිමත් කිරීමට කටයුතු කරන බව ද ඔහු පැවසීය. එසේම ශ්රී ලංකා - චීන පාර්ලිමේන්තු මිත්රත්ව සංගමය දෙරට අතර සබඳතා ශක්තිමත් කිරීම සඳහා වැදගත් වේදිකාවක් ලෙස කටයුතු කරන බවද ඒ මහතා සඳහන් කළේය. රජය විසින් දූෂණයට එරෙහිව ගෙන යන ක්රියාමාර්ග සහ ජාතික සංහිඳියාව ඇති කිරීම සඳහා සිදුකරන වැඩපිළිවෙළ පිළිබඳව ද ගරු කථානායකවරයා චීන තානාපතිවරයා දැනුවත් කළේය. තවද, එක් තීරයක් - එක් මාවතක් (Belt and Road Initiative) වැඩසටහන යටතේ ශ්රී ලංකාව සහ චීනය අතර සහයෝගීතාව විවිධ ක්ෂේත්ර වෙත පුළුල් වී ඇති බවත්, එමඟින් දෙරටේ ජනතාවට ප්රතිලාභ රැසක් ලැබී ඇති බවත් ඔහු සඳහන් කළේය.ගරු කථානායකවරයා ලබාදුන් උණුසුම් පිළිගැනීම පිළිබඳව ස්තූතිය පළ කළ තානාපති වේයි හුවාෂියැං මහතා, ශ්රී ලංකාවේ ජනතාවගේ සුහදශීලී බව සහ සිනහව තමන්ගේ සිත් ගත් බව සඳහන් කළේය. ශ්රී ලංකාව “සිනහවෙන් පිරි සුන්දර දිවයිනක්” ලෙස හඳුන්වමින්, මෙරටට පැමිණි දා සිට තමන් වෙත ලබාදුන් උණුසුම් පිළිගැනීම සහ ආගන්තුක සත්කාරය පිළිබඳව ද ඔහු සිය ප්රසාදය පළ කළේය. චීනය සහ ශ්රී ලංකාව අතර පවතින දීර්ඝ ඉතිහාසයකට හිමිකම් කියන සබඳතා පිළිබඳව අදහස් දැක්වූ තානාපතිවරයා, සියවස් ගණනාවක් පුරා දෙරට අතර පැවති නාවික සහ සංස්කෘතික හුවමාරු සිහිපත් කළේය. දෙරට අතර රාජ්ය තාන්ත්රික සබඳතා ස්ථාපිත කිරීමෙන් අනතුරුව ද එම සබඳතා අඛණ්ඩව වර්ධනය වී ඇති බව ඔහු සඳහන් කළේය.2025 වසරේදී ජනාධිපති අනුර කුමාර දිසානායක මහතා සහ අග්රාමාත්ය ආචාර්ය හරිනි අමරසූරිය චීනයේ සිදු කළ සංචාරයන්හිදී චීන ජනාධිපති ෂී ජින්පිං මහතා සමඟ පැවැත්වූ සාකච්ඡා ද තානාපතිවරයා මෙහිදී සිහිපත් කළේය. එම ඉහළ පෙළේ හමුවීම් දෙරට අතර සබඳතා තවදුරටත් වර්ධනය කිරීම සඳහා නව උපායමාර්ගික මඟපෙන්වීමක් ලබාදුන් බව ද ඔහු පැවසීය.චීනය සිය අසල්වැසි රාජ්යතාන්ත්රික ප්රතිපත්තිය තුළ ශ්රී ලංකාවට ප්රමුඛ ස්ථානයක් ලබාදෙන බව සඳහන් කළ තානාපති වේයි හුවාෂියැං මහතා, ශ්රී ලංකාවේ ආර්ථික සංවර්ධනය සහ ජනතාවගේ ජීවන තත්ත්වය ඉහළ නැංවීම සඳහා ඉදිරියටත් සහයෝගයෙන් කටයුතු කිරීමට චීනය සූදානම් බව ප්රකාශ කළේය.2027 වසරේදී ශ්රී ලංකාව සහ චීනය අතර රාජ්ය තාන්ත්රික සබඳතා ස්ථාපිත කර වසර 70ක් සම්පූර්ණ වන අතර, දෙරට අතර රබර් - සහල් ගිවිසුමට වසර 75ක් සම්පූර්ණ වීම ද සනිටුහන් කෙරේ. මෙම වැදගත් අවස්ථා දෙරට අතර පවතින දිගුකාලීන මිත්රත්වය තවදුරටත් ශක්තිමත් කර ගැනීමට අවස්ථාවක් වනු ඇති බව මෙහිදී අවධාරණය කෙරිණි.දෙරට අතර පවතින දීර්ඝකාලීන මිත්රත්වය තවදුරටත් ශක්තිමත් කිරීම, අන්යෝන්ය ප්රතිලාභ සහිත සහයෝගීතාව පුළුල් කිරීම සහ ශ්රී ලංකාවේ සිටින චීන ආයතන හා පුරවැසියන්ගේ නීත්යානුකූල අයිතිවාසිකම් සහ අවශ්යතා ආරක්ෂා කිරීම සඳහා ඉදිරියේදී කටයුතු කිරීමට තමන් කැපවී සිටින බව ද තානාපති වේයි හුවාෂියැං මහතා සඳහන් කළේය.
2026-09-11
• විසි දෙවන ආණ්ඩුක්රම ව්යවස්ථා සංශෝධනය සැප්තැම්බර් 24 සහ 25 විවාදයටසැප්තැම්බර් 22 සිට 25 දක්වා පැවැත්වීමට නියමිත මීළඟ පාර්ලිමේන්තු සතියේ කටයුතු තීරණය වූ බව පාර්ලිමේන්තුවේ මහ ලේකම් කුෂානි රෝහණදීර මහත්මිය පවසයි. ගරු කථානායක වෛද්ය ජගත් වික්රමරත්න මහතාගේ ප්රධානත්වයෙන් ඊයේ (සැප්. 10) රැස්වූ පාර්ලිමේන්තු කටයුතු පිළිබඳ කාරක සභාවේදී මෙම කටයුතු තීරණය වී ඇත.පාර්ලිමේන්තුව රැස්වන මෙම සෑම දිනක ම පෙ.ව. 9.30 සිට පෙ.ව. 10.00 දක්වා කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන්කර ඇත. පෙ.ව. 10.00 සිට 11.00 දක්වා කාලය වාචික පිළිතුරු අපේක්ෂා කරන ප්රශ්න සඳහා වෙන් කර ඇති අතර පෙ.ව. 11.00 සිට 11.30 දක්වා කාලය ස්ථාවර නියෝග 27(2) යටතේ වන ප්රශ්න සඳහා වෙන් කර තිබේ.මේ අනුව, සැප්තැම්බර් 22 අගහරුවාදා පෙ.ව. 11.30 සිට ප.ව. 5.00 දක්වා ඛනිජ තෙල් සම්පත් පනත යටතේ අංක 2497/37 දරන අති විශේෂ ගැසට් පත්රයේ පළ කරන ලද නියෝග සහ අපනයන කෘෂිකර්මාන්තය ප්රවර්ධන (සංශෝධන) පනත් කෙටුම්පත (දෙවැනි වර කියවීම) විවාදයට ගැනීමට තීරණය වී ඇත. අනතුරුව ප.ව. 5.00 ට පෞද්ගලික මන්ත්රී පනත් කෙටුම්පතක් වන ට්රෙඩ්සෝ සංවර්ධන පදනම (සංස්ථාගත කිරීමේ) පනත් කෙටුම්පත දෙවැනි වර කියවීමෙන් අනතුරුව ව්යවස්ථාදායක ස්ථාවර කාරක සභාව වෙත යොමු කිරීමට නියමිතව ඇත.ඉන්පසු ප.ව. 5.00 සිට ප.ව. 5.30 දක්වා විපක්ෂය විසින් ගෙනෙනු ලබන සභාව කල්තබන අවස්ථාවේ යෝජනාව විවාදයට ගැනීමට නියමිතය.සැප්තැම්බර් 23 බදාදා පෙ.ව. 11.30 සිට ප.ව. 5.00 දක්වා ශ්රී ලංකා වරලත් මාධ්ය වෘත්තිකයන්ගේ ආයතනය පනත් කෙටුම්පත දෙවැනි වර කියවීමේ විවාදය පැවැත්වීමටත් තීරණය කර තිබේ. අනතුරුව ප.ව. 5.00 සිට ප.ව. 5.30 දක්වා සභාව කල්තබන අවස්ථාවේ ප්රශ්න සඳහා කාලය වෙන් කර තිබේ.සැප්තැම්බර් 24 බ්රහස්පතින්දා පෙ.ව. 11.30 සිට ප.ව. 7.00 දක්වා විසි දෙවන ආණ්ඩුක්රම ව්යවස්ථා සංශෝධන පනත් කෙටුම්පත සහ අධිකරණ සංවිධාන (සංශෝධන) පනත් කෙටුම්පත දෙවන වර කියවීමේ විවාදය පැවැත්වීම සඳහා කාලය වෙන් කර ඇත. ආණ්ඩුක්රම ව්යවස්ථාවේ 121 ව්යවස්ථාව ප්රකාරව මෙම පනත් කෙටුම්පත්වලට එරෙහිව ගොනුකර ඇති පෙත්සම්වලට අදාළ ශ්රේෂ්ඨාධිකරණ තීරණය ලබා දීමෙන් අනතුරුව එය ගරු කථානායකවරයා විසින් සභාවට නිවේදනය කිරීමට යටත්ව අදාළ දෙදින විවාදය පැවැත්වීමට එකඟත්වය පළ වී ඇත. සැප්තැම්බර් 25 සිකුරාදා පෙ.ව. 11.30 සිට ප.ව. 7.00 දක්වා විසි දෙවන ආණ්ඩුක්රම ව්යවස්ථා සංශෝධන පනත් කෙටුම්පත සහ අධිකරණ සංවිධාන (සංශෝධන) පනත් කෙටුම්පත දෙවන වර කියවීමේ විවාදය දෙවැනි දිනටත් පැවැත්වීමට මෙහිදී තීරණය වී තිබේ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
