2023-09-21
පුවත් කාණ්ඩ : කාරක සභා පුවත්
පළාත් පාලන මැතිවරණ නොපැවැත්වීම හේතුවෙන්, ඒ සඳහා නාමයෝජනා බාර දුන් අපේක්ෂකයින් මහත් අපහසුතාවයකට පත්ව ඇති බවත්, මෙම අර්බුදකාරී තත්වයට පිළියමක් ලෙස එසේ බාරදුන් නාමයෝජනා අවලංගු කිරීමට කටයුතු කිරීමටත් අද දින පැවති රාජ්ය පරිපාලන, ස්වදේශ කටයුතු, පළාත් සභා හා පළාත් පාලන කටයුතු පිළිබඳ අමාත්යාංශයීය උපදේශක කාරක සභාවේදී ඒකමතික එකඟත්වය හිමි විය.
මෙලෙස ඒකමතික එකඟත්වය හිමි වුයේ අග්රාමාත්ය සහ රාජ්ය පරිපාලන, ස්වදේශ කටයුතු, පළාත් සභා හා පළාත් පාලන අමාත්ය ගරු දිනේෂ් ගුණවර්ධන මහතාගේ ප්රධානත්වයෙන් ඊයේ (සැප්. 20) පාර්ලිමේන්තුවේදී පැවති රාජ්ය පරිපාලන, ස්වදේශ කටයුතු, පළාත් සභා හා පළාත් පාලන කටයුතු පිළිබඳ අමාත්යාංශයීය උපදේශක කාරක සභාවේදීය.
ක්ෂේත්ර නිලධාරීන්ට තම මැතිවරණ බල ප්රදේශය තුළ ඡන්දය ඉල්ලීමට ඇති බාධා සහ එම බාධා ඉවත් කිරීම සඳහා අදාළ පනත සංශෝධනය කිරීම පිළිබඳව මෙහිදී සාකච්ඡාවට ලක් විය. මේ සඳහා නීතිපති උපදෙස් පරිදි, සංශෝධනයට ලක් වූ පනතක්, සංශෝධනයට පෙර පැවති ලෙස නැවතත් වෙනස් කිරීමට අවශ්ය නම්, ඒ සඳහා පාර්ලිමේන්තුවේ 2/3ක බහුතර අනුමතිය සහ ජනමත විචාරණයක් අවශ්ය බව පැමිණ සිටි නිලධාරීහු පැවසූහ.
තවද, පළාත් සභා අමාත්යාංශවල ලේකම්වරු ස්ථානමාරු කිරීමේ ක්රමවේදය ක්රමවත් කිරීම සහ සේවා ව්යවස්ථාවේ සඳහන් පරිදි ප්රාදේශීය ලේකම්වරු සඳහා ස්ථාන මාරු කිරීම් සිදු කිරීම සම්බන්ධයෙන් ප්රගති සමාලෝචනය කිරීමද මෙහිදී සිදු විය.
පළාත් රාජ්ය සේවයේ නිලධාරීන්ට නිසිපරිදි ස්ථානගත නොකිරීම පිළිබදවත් මෙහිදී අවධානය යොමු විය. ඒ අනුව ප්රාදේශීය ලේකම්වරුන් ඇතුළු සියලු පරිපාලන නිලධාරීන්ගේ ස්ථානගත කිරීම් නිසිපරිදි සිදුකළ යුතු බවට ද අග්රාමාත්යවරයා අවධාරණය කළේය. ඒ අනුව වහාම ඒ සදහා පියවර ගන්නා ලෙස අග්රාමාත්යවරයා නිලධාරීන්ට උපදෙස් ලබා දුන්නේය.
රාජ්ය සේවයට අලුතින් බඳවා ගැනීම් සිදු කිරීම පිළිබඳ අලුත් තීරණයක් නොමැති බැවින් හා පළාත් සහ සමස්ත රාජ්ය සේවය තුළ පුරප්පාඩු පවත්නා නිසාත්, එම පුරප්පාඩු සඳහා කළමනාකරණ සේවා නිලධාරී තෙවන ශ්රේණියේ සීමිත තරඟ විභාගයෙන් ඉහළ ලකුණු ප්රමාණයක් ලබා ගෙන මේ වන විටත් පත්වීම් ලබා සිටින සේවකයන් එම පුරප්පාඩු පවත්නා තනතුරැ වල පිහිටු වීමට කටයුතු කිරීම පිළිබඳව ද මෙහිදී සාකච්ඡා විය.
අග්රාමාත්ය සහ රාජ්ය පරිපාලන, ස්වදේශ කටයුතු, පළාත් සභා හා පළාත් පාලන අමාත්ය ගරු දිනේෂ් ගුණවර්ධන මහතාගේ ප්රධානත්වයෙන් පැවති මෙම අමාත්යාංශයීය උපදේශක කාරක සභාවට ගරු ජානක වක්කුඹුර, ගරු අශෝක ප්රියන්ත මහතා ඇතුලු රාජ්ය අමාත්යවරුන්, ගරු විපක්ෂ නායකවරයා, ගරු පාර්ලිමේන්තු මන්ත්රීවරයන්, අදාළ රාජ්ය ආයතන සහ දෙපාර්තමේන්තු නිලධාරීහු රැසක් සහභාගී වූහ.
2026-05-19
විදේශ රැකියාවල නියුතු දෙමාපියන්ගේ වයස අවුරුදු 2-13 අතර වන දරුවන් දිවා සුරැකුම් මධ්යස්ථානවල සිටී නම් ඔවුන්ට මසකට රු. 10,000/- ක දීමනාවක් ගෙවීමට තීරණය කළ බව විදේශ සේවා නියුක්ති කාර්යාංශයේ නිලධාරීහු කාන්තා සහ ළමා කටයුතු පිළිබඳ අමාත්යාංශයීය උපදේශක කාරක සභාවට පැවසූහ.එම කාරක සභාව ගරු අමාත්ය සරෝජා සාවිත්රි පෝල්රාජ් මහත්මියගේ ප්රධානත්වයෙන් සහ ගරු නියෝජ්ය අමාත්ය (වෛද්ය) නාමල් සුදර්ශන මහතාගේ සහභාගිත්වයෙන් පසුගියදා පාර්ලිමේන්තුවේදී රැස් වූ අවස්ථාවේදී නිලධාරීහු මේ බව සඳහන් කළහ. කුඩා දරුවන් සිටින කාන්තාවන් විදේශගත වීම හේතුවෙන් සමාජය තුළ පැන නගින ගැටලු සම්බන්ධයෙන් මැදිහත් වන ලෙස මීට පෙර කාරක සභාවේදී විදේශ සේවා නියුක්ති කාර්යාංශයේ සාමාන්යාධිකාරී (දේශීය කටයුතු) වෙත මෙම කාරක සභාව ලබා දුන් උපදෙස්වල ප්රගතිය විමසීමේදී විදේශ සේවා නියුක්ති කාර්යාංශයේ නිලධාරීහු මේ බව පවසා සිටියහ. මේ අනුව විදේශ රැකියාවල නියුතු දෙමාපියන්ගේ මාසික ආදායම ඇ. ඩො. 400ට වැඩි නම් මෙම දීමනාව හිමි වන බවත්, ඒ සඳහා මූලිකව රු. මිලියන 10ක මුදලක් වෙන් කර ඇති බවත් එම නිලධාරීහු පැවසූහ. එසේම, මීට අදාළ අනුමතිය ලබා ගැනීමේ කටයුතු අවසන් අදියරේ පවතින බවත්, ඉන්පසු දිස්ත්රික් ලේකම් කාර්යාල හරහා අදාළ පිළිගත් දිවා සුරැකුම් මධ්යස්ථානයට මාසිකව ගෙවීම් සිදු කළ හැකි බවත් ඔවුහු සඳහන් කළහ. වඩාත් සාධනීය පියවරක් ලෙස හඳුනාගත හැකි මෙය පිළිබඳව ජනතාව දැනුවත් කිරීමට පියවර ගන්නා ලෙස කාරක සභා සභාපතිනි ගරු අමාත්ය සරෝජා සාවිත්රි පෝල්රාජ් මහත්මිය මෙහිදී පෙන්වා දුන්නාය. පෙර පැවති කාරක සභාවේදී උපදෙස් ලබා දුන් පරිදි පොලිස් නිලධාරිනියන්ගේ පුරප්පාඩු පිරවීමේ ප්රගතිය සම්බන්ධයෙන් මෙහිදි සාකච්ඡා කෙරුණු අතර මේ වන විට උපපොලිස් පරීක්ෂකවරියන් 50 දෙනෙකු බඳවා ගැනීමට සහ පොලිස් කොස්තාපල්වරියන් 2600 දෙනෙකු බඳවා ගැනීමට අයදුම්පත් කැඳවා ඇති බව අනාවරණය විය. එසේම දමිල භාෂාව කතා කළ හැකි පොලිස් නිලධාරිනියන් බඳවා ගැනීම සඳහා සමාජ මාධ්ය ඔස්සේ විශේෂ ප්රචාරණ වැඩසටහන් ආරම්භ කර ඇති බවත් ශ්රී ලංකා පොලිසිය නියෝජනය කරමින් පැමිණි නිලධාරිනියක් කාරක සභාවට පැවසුවාය. දමිළ භාෂාව කතා කළ හැකි පවුල් සෞඛ්ය සේවිකාවන්ගේ පුරප්පාඩු පවතින බැවින් ඒ පිළිබඳව ද විශේෂ අවධානය යොමු කළ යුතු බව කාරක සභා සභාපතිනිය අවධාරණය කළාය. දමිළ මාධ්යයෙන් අධ්යාපන පොදු සහතික පත්ර (උසස් පෙළ) විභාගය අවසන් කළ සිසු සිසුවියන්ව මේ පිළිබඳව දැනුවත් කිරීම සඳහා පියවර ගන්නා ලෙස ද කාරක සභා සභාපතිනිය මෙහිදී උපදෙස් ලබා දුන්නාය. පරිවාස හා ළමාරක්ෂක සේවා දෙපාර්තමේන්තුව, ජාතික ළමා ආරක්ෂණ අධිකාරිය සහ අනෙකුත් ආයතන සතු මෙරට ළමුන්ට අදාළ සියලු දත්ත එ්කරාශී කොට ජාතික දත්ත පද්ධතියක් සැකසීමට අදාළ ප්රගතිය පිළිබඳව ද කාරක සභා සභාපතිවරිය කරුණු විමසීම් කළාය. ඩිජිටල් ආර්ථික අමාත්යාංශයේ මැදිහත්වීමෙන් දත්ත පද්ධතියක් සැකසීමේ එම කටයුතු මෙම වසර තුළ අවසන් කිරීමට හැකි වනු ඇතැයි ද ඇය සඳහන් කළාය.ළමා අපයෝජන සිද්ධීන්ට අදාළව නීතිය කඩිනමින් ක්රියාත්මක කිරීම සඳහා සහය වීම සහ ඉන්පසු ඇති වන තත්ත්වයන් කළමනාකරණය කිරීම සඳහා අදාළ සියලු ආයතන කඩිනමින් හා මනා සම්බන්ධීකරණයකින් යුතුව ක්රියාත්මක විමේ අවශ්යතාව කාරක සභාවේදී අවධාරණය කෙරිණි. ඒ අනුව, ප්රාදේශීය ලේකම් කාර්යාල, පරිවාස හා ළමාරක්ෂක සේවා දෙපාර්තමේන්තුව, ජාතික ළමා ආරක්ෂණ අධිකාරිය, ශ්රී ලංකා පොලිසිය ඇතුළු සියලු ආයතන නියෝජනය කරන නිලධාරීන් එකම කණ්ඩායමක් ලෙස සහයෝගයෙන් යුතුව කටයුතු කළ යුතු බව ගරු අමාත්ය සරෝජා සාවිත්රි පෝල්රාජ් මහත්මිය පෙන්වා දුන්නාය.කාන්තාවන්ට සහ ළමුන්ට එරෙහි අපයෝජන හෝ වෙනත් සිද්ධීන් සම්බන්ධයෙන් කඩිනම් පියවර ගැනීම හෝ වෙන යම් අඩුපාඩු පිළිබඳව ඕනෑම මොහොතක තමාට පෞද්ගලිකව දුරකථනයෙන් හෝ වට්ස්ඇප් මාර්ගයෙන් දැනුම් දිය හැකි හැකි බවත්, හැකි ඉක්මණින් ඒ සඳහා මැදිහත් වීමට පියවර ගන්නා බවත් කාරක සභා සභාපතිනිය පැවසුවාය. පෙර පාසැල් ගුරු දීමනාව වැඩි කිරීම, සෑම පෙර පාසැල් දරුවෙකුටම උදෑසන ආහාරය නොමිලේ ලබා දීම සහ පෙර පාසැල් ගුරුවන්ට දායක විශ්රාම වැටුපක් ලබා දීම සඳහා ලබන වසරේ අයවැය යෝජනා ඉදිරිපත් කිරීමට අපේක්ෂා කරන බව ද අමාත්යවරිය සදහන් කළාය. රජයේ රැකියාවන්හි නියුතු කාන්තාවන් ස්ථාන මාරු කිරීමේදී ඇති වන ප්රායෝගික ගැටලු, පෙර පාසැල් හා දිවා සුරැකුම් මධ්යස්ථාන නියාමනය ආදී කරුණු පිළිබඳව ද මෙහිදී අවධානය යොමු විය. එසේම කාන්තා හා ළමා කටයුතුවලට අදාළව පවතින ගැටලු ගරු පාර්ලිමේන්තු මන්ත්රීවරුන් විසින් කාරක සභාවේ අවධානයට ඉදිරිපත් කළ අතර කාරක සභාව විසින් ඒවා පිළිබඳව නිලධාරීන්ගෙන් කරුණු විමසා අදාළ පියවර ගන්නා ලෙස උපදෙස් දෙන ලදී. කාන්තා හා ළමා කටයුතු අමාත්යාංශයේ ලේකම් ඩබ්.එම්.ඩී.ටී වික්රමසිංහ මහත්මිය ඇතුළු නිලධාරීහු පිරිසක් ද මෙම කාරක සභා රැස්වීමට සහභාගී වූහ.
2026-05-15
ශ්රී ලංකාවේ ඉන්දීය මහ කොමසාරිස් කාර්යාලයේ ආරාධනයකට අනුව කාන්තා හා ළමා කටයුතු අමාත්ය ගරු සරෝජා සවිත්රි පෝල්රාජ් මහත්මියගේ ප්රධානත්වයෙන් යුත් ශ්රී ලංකා පාර්ලිමේන්තු මන්ත්රීවරියන්ගේ සංසදයේ නියෝජිත පිරිසක්, මේ මස 10 සිට 16 දක්වා ඉන්දියාවේ නිල සංචාරයක නිරත වෙමින් සිටී.ශ්රී ලංකාව සහ ඉන්දියාව අතර පවත්නා දිගුකාලීන පාර්ලිමේන්තු, සංස්කෘතික සහ ද්විපාර්ශ්වික සබඳතා තවදුරටත් ශක්තිමත් කරමින්, කාන්තා සවිබල ගැන්වීම, පාර්ලිමේන්තු කටයුතු, සමාජ සංවර්ධනය සහ ස්ත්රී-පුරුෂ සමාජභාවය පිළිබඳ සංවේදී පාලනයට ආශ්රිත කරුණු සම්බන්ධයෙන් සහයෝගීතාව ප්රවර්ධනය කිරීම මෙම සංචාරයේ අරමුණයි.නියෝජිත පිරිස පාර්ලිමේන්තු සංකීර්ණයේ පිහිටා ඇති මහත්මා ගාන්ධි පිළිරුව වෙත පුෂ්පෝපහාර දැක්වීම සිදු කළ අතර, ලෝක් සභාවේ කථානායක ගරු ඕම් බිර්ලා මහතා සමඟද සාකච්ඡා පැවැත්වූහ. එහිදී දෙපාර්ශ්වයම අන්තර්-පාර්ලිමේන්තු සහයෝගිතාව ශක්තිමත් කිරීමේ වැදගත්කම අවධාරණය කළහ.නියෝජිත පිරිස ඉන්දියාවේ කාන්තා හා ළමා සංවර්ධන අමාත්යාංශයේ නිලධාරීන් හමුවී සාකච්ඡා පැවැත්වූහ. එහිදී ශ්රී ලංකා නියෝජිත පිරිස, කාන්තා හා ළමා සංවර්ධන අමාත්යවරිය ගරු අන්නපූර්ණා දේවී මහත්මිය සමග කාන්තා සවිබල ගැන්වීමේ වැඩසටහන්, ළමා සුභසාධනය, ස්ත්රී-පුරුෂ සමාජභාවී සංවේදී ප්රතිපත්ති සහ දෙරට අතර සහයෝගීතාව වැඩි දියුණු කිරීම සහ හොඳම භාවිතයන් හුවමාරු කර ගැනීමේ අවස්ථා පිළිබඳව ඵලදායී සාකච්ඡා පැවැත්වූහ.මෙම නියෝජිත පිරිස දිල්ලි පොලිස් කොමසාරිස්වරයාද හමුවී, කාන්තාවන්ට හා ළමුන්ට එරෙහි අපරාධ වැළැක්වීම සහ ඒවාට මුහුණ දීමේදී අනුගමනය කරන හොඳම ක්රමවේද හා උපාය මාර්ග පිළිබඳව ඵලදායී සාකච්ඡා පැවැත්වූහ. එහිදී විශේෂයෙන් කාන්තා හා ළමා ආරක්ෂාව, ආරක්ෂණ යාන්ත්රණ, නීතිමය බලාත්මක කිරීම සහ ප්රජා දැනුවත් කිරීමේ වැඩසටහන් පිළිබඳව විශේෂ අවධානය යොමු විය.නියෝජිත පිරිස, කාන්තා නායකත්වයෙන් යුත් ස්වයං සහාය කණ්ඩායම් (Self-Help Groups) සමඟ මෙන්ම ඉන්දීය වාණිජ හා කර්මාන්ත මණ්ඩල සම්මේලනයේ කාන්තා සංවිධානයේ (FICCI FLO) නියෝජිතයින් සමඟ සාකච්ඡා පැවැත්වූහ.සංචාරය අතරතුර, නියෝජිත පිරිස ඉන්දීය පාර්ලිමේන්තුවේ ප්රජාතන්ත්රවාදය සඳහා වූ පාර්ලිමේන්තු පර්යේෂණ සහ පුහුණු ආයතනය (PRIDE) විසින් සංවිධානය කරන ලද පුළුල් වැඩසටහනකට සහභාගී වෙමින් සිටී. මෙම වැඩසටහනට ඉන්දියානු පාර්ලිමේන්තු ක්රමය, කමිටු පද්ධතිය, පාර්ලිමේන්තු වරප්රසාද හා ආචාරධර්ම පිළිබඳ සැසි මෙන්ම කාන්තා නායකත්වයෙන් යුතු සංවර්ධන වැඩසටහන් සහ කාන්තාවන් හා ළමුන් සම්බන්ධ ගැටලු විසඳීම සඳහා ඉන්දියාව විසින් අනුගමනය කරන හොඳම ක්රමවේද පිළිබඳ සාකච්ඡාද ඇතුළත් වේ.ඉදිරි දිනවලදී නියෝජිත පිරිස නවදිල්ලි ප්රධාන අමාත්යවරයා සමඟ සාකච්ඡා පැවැත්වීමට නියමිත අතර අග්රා නගරයේ පිහිටි ටාජ් මහල්, අග්රා කොටුව ඇතුළු වැදගත් සංස්කෘතික හා ඓතිහාසික ස්ථානවල සංචාරය කිරීමටද නියමිතය.ශ්රී ලංකා පාර්ලිමේන්තු මන්ත්රීවරියන්ගේ සංසදය විසින් පාර්ලිමේන්තු කටයුතු හා ප්රජා සම්බන්ධතා වැඩසටහන් මඟින් ස්ත්රී-පුරුෂ සමානාත්මතාවය, කාන්තා සවිබල ගැන්වීම සහ සමාජ ඇතුළත් කිරීම ප්රවර්ධනය කිරීමේදී වැදගත් භූමිකාවක් අඛණ්ඩව ඉටු කරමින් සිටී.මෙම සංචාරය සඳහා රෝහිණී කුමාරි විජේරත්න, ඔෂානි උමංගා, ක්රිෂ්නන් කලෙයිචෙල්වි, නීතිඥ චමින්ද්රානි කිරිඇල්ල, නීතිඥ නිලන්ති කොට්ටහච්චි, එම්.ඒ.සී.එස්. චතුරි ගංගානි, නීතිඥ නිලූෂා ලක්මාලි ගමගේ, නීතිඥ තුෂාරි ජයසිංහ, නීතිඥ අනුෂ්කා තිලකරත්න, නීතිඥ ඒ.එම්.එම්. රත්වත්තේ, නීතිඥ හසාර ලියනගේ, අම්බිකා සාමිවෙල්, නීතිඥ ලක්මාලි හේමචන්ද්ර, නීතිඥ ගීතා හේරත් යන ගරු පාර්ලිමේන්තු මන්ත්රීවරියෝ සහභාගී වී සිටිති.නියෝජිත පිරිසට පාර්ලිමේන්තුවේ මහලේකම් හා පාර්ලිමේන්තු මන්ත්රීවරියන්ගේ සංසදයේ ලේකම් කුෂානි රෝහණදීර මහත්මිය, පාර්ලිමේන්තුවේ ජ්යෙෂ්ඨ නිලධාරීන් වන සහකාර ප්රධාන නිලධාරී හෂ්මි ප්රනාන්දුපුල්ලේ, ජ්යෙෂ්ඨ පාර්ලිමේන්තු පරිවර්තක චමිලා නිස්සංගා සහ ජ්යෙෂ්ඨ සහකාර පාර්ලිමේන්තු සන්ධාන නිලධාරී රනිල් නානායක්කාර යන මහත්ම මහත්මින්ද සහභාගී වූහ.
2026-05-15
රජය සතු ව්යාපාරවල යහපැවැත්මට ශක්තිමත් අභ්යන්තර විගණන ක්රියාවලියක් අත්යවශ්යයි - රජය සතු ව්යාපාර මූල්ය ප්රධානීන් සහ අභ්යන්තර විගණන නිලධාරීන් අමතමින් කෝප් කමිටු සභාපති වෛද්ය නිශාන්ත සමරවීර මහතා අවධාරණය කරයිරජය සතු ව්යාපාරවල යහපැවැත්මට ශක්තිමත් අභ්යන්තර විගණන ක්රියාවලියක් අත්යවශ්ය බව රජය සතු ව්යාපාර මූල්ය ප්රධානීන් සහ අභ්යන්තර විගණන නිලධාරීන් අමතමින් පොදු ව්යාපාර පිළිබඳ කාරක සභාවේ (කෝප්) සභාපති වෛද්ය නිශාන්ත සමරවීර මහතා පසුගියදා අවධාරණය කළේය. රජය සතු ව්යාපාර ආයතනවල අභ්යන්තර විගණනය සහ මූල්ය අධීක්ෂණය ශක්තිමත් කිරීම පිළිබඳව කෝප් කමිටුව විසින් එක්සත් ජාතීන්ගේ සංවර්ධන අරමුදලේ (UNDP) අනුග්රහයෙන් පසුගියදා ශ්රී ජයවර්ධනපුර කෝට්ටේ මොනාක් ඉම්පීරියල් හෝටල් පරිශ්රයේදී සංවිධානය කළ වැඩමුළුවක් අමතමින් කෝප් කමිටු සභාපතිවරයා මේ බව පවසා සිටියේය. මෙහිදී අදහස් දැක්වූ කෝප් සභාපතිවරයා, රජය සතු ව්යපාර ක්ෂේත්රයේ පවතින අසංවිධිත බව ඉවත් කිරීම සඳහා ක්රියාකාරී මැදිහත්වීමක් සිදුකළ යුතු බවත් රාජ්යයට වග කියන නිලධාරීන් ලෙස ඉහළ කාර්ය සාධනයක් පෙන්වීම අපේක්ෂා කරන බවත් පෙන්වා දුන්නේය. සියලු රජය සතු ව්යාපාර ප්රධානීන් මීට පෙර කැඳවා සාර්ථක වැඩමුළුවක් පැවැත්වීමට හැකි වූ බව සඳහන් කළ කෝප් කමිටු සභාපතිවරයා, මූල්ය විනය සහ අභ්යන්තර විගණන ක්රියාවලිය ශක්තිමත් කිරීමේ අරමුණින් මෙලෙස සියලු ආයතනවල අභ්යන්තර විගණන නිලධාරීන් සහ මූල්ය ප්රධානීන් කැඳවා දැනුවත් කිරීමක් සිදු කිරීමට තීරණය කළ බවත් පවසා සිටියේය. එසේම රජය සතු ව්යාපාර ආයතන 457ක් පවතින නිසා එම සියලු ආයතන කෝප් කමිටුවට කැඳවීම ප්රායෝගිකව අපහසු බැවින් එම ආයතනවල කාර්යසාධනය පරීක්ෂා කිරීම සඳහා ඩිජිටල් ක්රමවේදයක් සකස් කිරීමට අපේක්ෂා කරන බවත් කෝප් කමිටු සභාපතිවරයා වැඩිදුරටත් පැවසීය. "රාජ්ය විගණනය සහ රාජ්ය ආයතනවල කාර්යභාරය, වගකීම් හා සහයෝගීතාව" පිළිබඳ විගණකාධිපති සමුදිකා ජයරත්න මහත්මිය මෙහිදී සිය දේශනය ඉදිරිපත් කළාය. රජය සතු ආයතනයන්හි අරමුදල්වල හිමිකරුවන් මහජනතාව බැවින් ඒවා මහජනතාව වෙනුවෙන් නිසි පරිදි කළමනාකරණය කළ යුතු බවත් ඒ සඳහා නිසි මූල්ය විනයක් සහ අභ්යන්තර විගණනයක් පවත්වා ගනිමින් රාජ්ය විගණනයට සහය ලබාදිය යුතු බවත් ඇය පෙන්වා දුන්නාය. එසේම කළමනාකරණ විගණන දෙපාර්තමේන්තුවේ අධ්යක්ෂ ජනරාල් ඒ. පී කුරුම්බලපිටිය මහතා විසින් “ජනතාවට වගවීම තහවුරු කිරීම සඳහා අභ්යන්තර විගණනයේ කාර්යභාරය” පිළිබඳව සහ හිටපු විගණකාධිපති, කෝප් සහ කෝපා කමිටුවල උපදේශක සරත් මායාදුන්නේ මහතා විසින් “ජනතාවට වගවීම කෙරෙහි රජය සතු ව්යාපාරවල කාර්යභාරය” පිළිබඳව දේශන ඉදිරිපත් කරන ලදී. රජය සතු ව්යාපාර ආයතනවල නිලධාරීන්ට සිය විෂයට අදාළව ප්රශ්න විමසීම සඳහා ද මෙහිදී අවකාශය සැලසිණි. අභ්යන්තර විගණක තනතුර අදාළ ආයතනයේ ප්රධානියා යටතට පත් කිරීම වෙනුවට අමාත්යාංශ ලේකම්වරයාට වාර්තා කරනු ලබන වඩාත් ස්වාධීන තනතුරක් බවට පත් කිරීමේ අවශ්යතාව ඇතුළු කරුණු මෙහිදී සාකච්ඡා කෙරිණි. පාර්ලිමේන්තුවේ ව්යවස්ථාදායක සේවා අධ්යක්ෂ එම්.ජයලත් පෙරේරා සහ රජය සතු ව්යාපාර ආයතන 300කට ආසන්න ප්රමාණයක අභ්යන්තර විගණන නිලධාරීහු සහ මූල්ය අංශයේ ප්රධානීහු මෙම වැඩමුළුව සඳහා සහභාගී වූහ.
2026-05-08
ශ්රී ලංකා පාර්ලිමේන්තුවේ සේවයේ නියුතු කාර්ය මණ්ඩලයේ දරුවන්ට සහාය වීම පිණිස, “ලිට්ල් රූට්ස්” (Little Roots) දිවා සුරැකුම් මධ්යස්ථානය සහ පෙර පාසල පසුගියදා (මැයි 06) කෘෂිකර්ම, පශු සම්පත්, ඉඩම් සහ වාරිමාර්ග අමාත්යාංශයේ “ගොවිජන මන්දිරය” පරිශ්රයේ දී නිල වශයෙන් විවෘත කෙරිණි.පාර්ලිමේන්තු මන්ත්රීවරියන්ගේ සංසදයේ ඉල්ලීමක් මත සමස්ත චීන කාන්තා සම්මේලනය (ACWF) විසින් ශ්රී ලංකා පාර්ලිමේන්තුව වෙත ප්රදානය කරන ලද චීන යුවාන් 1,000,000 ක පරිත්යාගය යොදා ගනිමින් මෙම “ලිට්ල් රූට්ස්” (Little Roots) නව දිවා සුරැකුම් මධ්යස්ථානය සහ පෙර පාසල ඉදි කොට තිබේ. දෙමාපියන් තම වෘත්තීය වගකීම් ඉටු කරන අතරතුර දරුවන්ගේ අධ්යාපනයට සහ මුල් ළමාවිය සංවර්ධනය කිරීමට අවශ්ය ආරක්ෂිත සහ උත්තේජක පරිසරයක් සැපයීම මෙම නව දිවා සුරැකුම් මධ්යස්ථානය සහ පෙර පාසල පිහිටුවීමේ අරමුණයි.“ලිට්ල් රූට්ස්” (Little Roots) දිවා සුරැකුම් මධ්යස්ථානය සහ පෙර පාසල ශ්රී ලංකා පාර්ලිමේන්තුව, කාන්තා සහ ළමා කටයුතු අමාත්යාංශය, කෘෂිකර්ම, පශු සම්පත්, ඉඩම් සහ වාරිමාර්ග අමාත්යාංශය යන ආයතනයන්හි සමූහ ව්යාපෘතියක් ලෙස ඉදි කෙරිණි. මෙහි මුල් අදියරේදී පාර්ලිමේන්තු කාර්ය මණ්ඩලය සහ කෘෂිකර්ම, පශු සම්පත්, ඉඩම් සහ වාරිමාර්ග අමාත්යාංශ කාර්ය මණ්ඩලය සඳහා විවෘත වන අතර ඉදිරියේදී එය අනෙකුත් ආයතන දක්වා වඩාත් පුළුල් කිරීමට අපේක්ෂිත ය. මෙම අවස්ථාවට කෘෂිකර්ම, පශු සම්පත් සහ ඉඩම් ගරු අමාත්ය කේ.ඩී. ලාල්කාන්ත, කාන්තා සහ ළමා කටයුතු ගරු අමාත්ය සහ පාර්ලිමේන්තු මන්ත්රීවරියන්ගේ සංසදයේ සභාපතිනි සරෝජා සාවිත්රි පෝල්රාජ්, කාන්තා සහ ළමා කටයුතු ගරු නියෝජ්ය අමාත්ය වෛද්ය නාමල් සුදර්ශන, කෘෂිකර්ම ගරු නියෝජ්ය අමාත්ය නාමල් කරුණාරත්න, පශු සම්පත්, ඉඩම් හා වාරිමාර්ග ගරු නියෝජ්ය අමාත්ය සුසිල් රණසිංහ, ජනමාධ්ය ගරු නියෝජ්ය අමාත්ය ආචාර්ය කෞෂල්යා ආරියරත්න, පාර්ලිමේන්තුවේ නියොජ්ය කාරක සභා සභාපති හේමාලි වීරසේකර, පාර්ලිමේන්තු මන්ත්රීවරියන්ගේ සංසදයේ සම උප සභාපතිනි සමන්මලී ගුණසිංහ, ශ්රී ලංකාවේ චීන තානාපති කාර්යාලය නියෝජනය කරමින් සංස්කෘතික කටයුතු භාර උපදේශක ජි ලිලී (Ji Lili )තෙවන ලේකම් ජියැං චැං (Jiang Chang) පාර්ලිමේන්තුවේ මහලේකම් සහ පාර්ලිමේන්තු මන්ත්රීවරියන්ගේ සංසදයේ ලේකම් කුෂානි රෝහණදීර, කාන්තා සහ ළමා කටයුතු අමාත්යාංශ ලේකම් තරංගනී වික්රමසිංහ, කෘෂිකර්ම අමාත්යාංශ ලේකම් ඩී. පී. වික්රමසිංහ යන මහත්ම මහත්මීන් සහභාගී වුහ. මෙයට අමතරව පාර්ලිමේන්තු නිලධාරීන්, අමාත්යාංශ නිලධාරීන්, දෙමව්පියන් සහ දරු දැරියන් පිරිසක්ද මෙම අවස්ථාවට එක්ව සිටියහ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
