E   |   த   |  

2023-05-11

පුවත් කාණ්ඩ : කාරක සභා පුවත් 

වෘත්තීය පුහුණු අධිකාරියේ පරිපාලනය සම්පූර්ණයෙන් බිඳ වැටිලා - අධ්‍යක්ෂ ජනරාල් ඇතුළු ප්‍රධාන තනතුරු 7 ක් පුරප්පාඩු - ‘කෝප්’ කමිටුවේදී අනාවරණය වෙයි

  • අධ්‍යක්ෂ ජනරාල්වරිය අනිවාර්ය නිවාඩු යැවීම ඇතුළු හිටපු සභාපතිවරයාගේ  අනීතික පරිපාලන තීන්දු නිසා සිදුවූ අලාභය පියවා ගැනීම ඇතුළු ඉදිරි පියවර සම්බන්ධයෙන් පරීක්ෂණයක් පවත්වා සති දෙකක් තුළ වාර්තා කරන ලෙස අමාත්‍යාංශයට දන්වයි
  • කැඳවීමක් ලබාදී තිබියදී කමිටුව මඟහරින ලද හිටපු සභාපතිවරයා නැවත කැදවීමටත් තීරණයක්  
  • එවැනි පුද්ගලයන් රාජ්‍ය අංශයේ තනතුරු සදහා යළි පත් නොකරන ලෙසටත් ජනාධිපති ලේකම්වරයා ඇතුළු බලධාරීන්ට දන්වා සිටීමටත් තීරණය කෙරේ
  • මූල්‍ය අධ්‍යක්ෂ ඇතුළු ආයතනයේ ප්‍රධාන තනතුරු 7 ක්ම පුරප්පාඩුව පවතින බවත් අනාවරණයක්
  • නව අධ්‍යක්ෂ ජනරාල්වරියක් පත් කිරීමේ කටයුතු කඩිනම් කිරීමටත් උපදෙස්
  • අධිකාරියේ අරමුණට පරිබාහිරව සිදුකර ඇති කටයුතු පිළිබඳවත් කමිටුවේ දැඩි අවධානය

 

2023 මාර්තු 23 වැනිදා පවත්වන ලද පොදු ව්‍යාපාර පිළිබඳ කාරක සභාවේ නිර්දේශ ක්‍රියාත්මක කිරීමේ ප්‍රගතිය සමාලෝචනය සදහා වෘත්තීය පුහුණු අධිකාරිය 2023.05.09 වැනිදා ගරු මහාචාර්ය රංජිත් බණ්ඩාර මහතාගේ සභාපතීත්වයෙන් රැස්වූ කෝප් කමිටුවට කැඳවා තිබිණි.

මෙහිදී විගණකාධිපතිවරගේ නිරීක්ෂණ අනුව පහත සදහන් කරුණු කෙරෙහි කමිටුවේ මූලික අවධානය යොමු විය.

 

අධ්‍යක්ෂ ජනරාල්වරිය අනීතිකව අනිවාර්ය නිවාඩු යැවීම ඇතුළු වැරදි පරිපාලන තීන්දු පිළිබඳ  හිටපු සභාපතිවරයාගේ ක්‍රියාකලාපය සහ අධිකාරියේ පරිපාලනය සම්පූර්ණයෙන් බිඳ වැටීම

හිටපු සභාපතිවරයා විසින් වෘත්තීය පුහුණු අධිකාරියේ හිටපු අධ්‍යක්ෂ ජනරාල්වරිය නීත්‍යානුකූල නොවන ලෙස අනිවාර්ය නිවාඩු යැවීම කමිටුවේ දැඩි දෝෂදර්ශනයට ලක්විය. අධ්‍යක්ෂ මණ්ඩල තීරණයක් නොමැතිව මෙය සිදු කර ඇතිබවත් තවත් තනතුරු 10 ක අදාළ පුද්ගලයන් රාජකාරියක් නොමැතිව මාරු කර ඇති බවත් මෙහිදී අනාවරණය විය.  

මෙම සභාපතිවරයාගේ ක්‍රියාකලාපය නිසා රජයට හා ආයතනයට විශාල මූල්‍ය පාඩුවක්ද සිදුව ඇතිබවත් අධිකාරියේ පරිපාලනය ඉතා බරපතල තත්ත්වයකට වැටී ඇති බවත් කෝප් සභාපතිවරයා පෙන්වා දුන්නේය.

මෙම තත්ත්වය හමුවේ අමාත්‍යාංශයේ මැදිහත් වීම ප්‍රමාණවත් නොවන බවත් මෙම විෂය සම්බන්ධයෙන් අමාත්‍යාංශය වගකීම් විරහිතව කටයුතු කර ඇති බවත් පැවසු කෝප් සභාපතිවරයා ඒ පිළිබදව සිය දැඩි අප්‍රසාදය පළ කළේය.

මේ අනුව මේ පිළිබදව කඩිනම් විමර්ශනයක් සිදු කර මෙම මූල්‍ය පාඩුව අයකර ගැනීම ඇතුළු ඉදිරි ක්‍රියාමාර්ග සති දෙකක් තුළ දන්වන ලෙස අමාත්‍යාංශ ලේකම්වරයාට දැනුම් දුන්නේය.

එසේම මෙවැනි පුද්ගයන් යළි රාජ්‍ය සේවයේ තනතුරු සදහා පත් නොකිරීමට වගබලා ගැනීම සදහා ජනාධිපති ලේකම්වරයාට, අධ්‍යාපන අමාත්‍යාංශය සහ පරිපාලන අමාත්‍යාංශවල ලේකම්වරුන්ට දන්වා සිටීමට කටයුතු කරන බවද කෝප් සභාපතිවරයා සදහන් කළේය.  එසේම අල්ලස් හා දූෂණ විමර්ශන කොමිෂන් සභාවට ද මේ සම්බන්ධයෙන් කටයුතු කිරීමට දන්වා සිටින බවද සභාපතිවරයා පැවසීය.

තවද  ආයතනයේ පරිපාලනමය ගැටලු, මූල්‍ය පාලනය, ආයතනික විනය, වත්කම් කළමනාකරණය, මානව සම්පත් කළමනාකරණය යන අංශ පිළිබද පරීක්ෂණයක් සිදු කරන ලෙස විගණකාධිපතිවරයා විසින් අමාත්‍යාංශයට නිර්දේශයක් ලබා දුන් බවත් එහි වාර්තාව මසක් ඇතුළත කමිටුවට ලබා දෙන ලෙසත් දැනුම් දුන්නේය.

 

ආයතනික සංයුක්ත සැලැස්මක් සැකසීමේ ප්‍රගතිය විමර්ශනය

අධිකාරියේ ඉදිරි වැඩපිළිවෙල සහිත සංයුක්ත සැලැස්මක් නොතිබූ බැවින් එය සකස් කිරීමට පසුගිය කෝප් රැස්වීමේදී ලබා දුන් නිර්දේශය ක්‍රියාත්මක කිරීමේ ප්‍රගතිය විමර්ශනය කරන ලදී. මෙහිදී අධිකාරියේ වත්මන් සභාපතිවරයා පැවසුවේ පසුගිය අප්‍රේල් 27 වැනි දින පැවැත්වූ වැඩමුලුවකදී මෙහි කටයුතු ආරම්භ කළ බවත් ඉදිරි තෙමසක කාලසීමාව තුළ නිම කිරීමට අපේක්ෂා කරන බවත්ය.

 

නව අධ්‍යක්ෂ ජනරාල්වරියක් ඇතුළු පුරප්පාඩුව පවතින ප්‍රධාන තනතුරු 7 ට පත් කිරීම් සිදු කිරීම

අධිකාරියේ අධ්‍යක්ෂ ජනරාල්වරිය මැයි මාසයේ විශ්‍රාම යාමට නියමිත බැවින් නව අධ්‍යක්ෂ ජනරාල්වරියක් පත් කිරීම සදහා පියවර ගැනීමට ලබා දුන් පසුගිය කමිටු රැස්වීමේ නිර්දේශය පිළිබදව ද අවධානය යොමුවිය.

එසේම මේ වන විට අධ්‍යක්ෂ (මුදල්), විගණන නිලධාරී, අධ්‍යක්ෂ (පරිපාලන) ඇතුළු ප්‍රධාන තනතුරු 7 ක් පුරප්පාඩුව පවතින බවත් එ් අනුව පරිපාලනය මුළුමනින්ම අඩාලවී ඇති බවත් මෙහිදී හෙළි විය. එබැවින්  එම තනතුරු කඩිනමින් සම්පූර්ණ කිරීමට පියවර ගන්නා ලෙසත් කමිටුව උපදෙස් දුන්නේය. නව බදවා ගැනීම් සිදු කරනු ලබන්නේ අග්‍රාමාත්‍ය ලේකම්වරයාගේ ප්‍රධානත්වයෙන් යුතු කමිටුවක් මගින් බැවින් එ් පිළිබදව වහාම සොයා බලා සති දෙකකින් කමිටුවට දන්වන ලෙසද කෝප් සභාපතිවරයා අධ්‍යාපන අමාත්‍යාංශ ලේකම්වරයාට දැනුම් දුන්නේය.

 

අධිකාරියේ අරමුණට පරිබාහිරව සිදුකර ඇති කටයුතු කර ඇති අවස්ථා

අහංගම හෝටල් පාසැල සංචාරක හෝටලයක් ලෙස රු. මිලියන 148 කට ආසන්න මුදලක් වැය කිරමින් නවීකරණය කිරීම, පොතුවිල් හෝටල් පාසැල් පරිශ්‍රයේ සංචාරකයන්ට නවාතැන් පහසුකම් ලබා දෙන කාමර 10 ක් ඉදිකිරීම ඇතුළු  කරුණු පිළිබදව ද මෙහිදී අවධානය යොමුවිය. අධිකාරියේ අරමුණුවලින් පරිබාහිව විශාල මුදලක් වැය කරමින් මෙම ව්‍යාපෘති ක්‍රියාත්මක කළද අද වන විට මේවා පවත්වාගෙන යාමට අසීරු තත්ත්වයක් උදා වී ඇති බව අනාවරණය විය.

 

රැකියා වෙළදපොළට ගැළපෙන පරිදි වෘත්තීය පුහුණු වැඩසටහන් ක්‍රියාත්මක කිරීම

මේවන විට කොරියාවේ පුහුණු වෙල්ඩින් ශිල්පීන් 10,000කට ආසන්න ප්‍රමාණයකට ඉල්ලුම  තිබුණද දැනට මෙරටින් යවා ඇත්තේ 300 කට ආසන්න ප්‍රමාණයක් බව අනාවරණය විය. මේ අනුව රැකියා වෙළදපොළ ඉලක්ක කරගනිමින් පුහුණු වැඩසටහන් ක්‍රියාත්මක කිරීමේ අවශ්‍යතාව අවධාරණය කරන ලදී. මේ සදහා පෞද්ගලික අංශයේද සහය ලබා ගෙන ක්‍රියාත්මක කළ හැකි වැඩසටහන් සංයුක්ත සැලැස්මට ඇතුළත් කොට ක්‍රියාත්මක කරන ලෙස කෝප් සභාපතිවරයා උපදෙස් ලබා දෙන ලදී.

මිලියන 50 ක ආසන්න මුදලක් වෙන් කර තිබියදීත් අවශ්‍ය පුහුණු භාණ්ඩ සහ උපකරණ මිලදී ගෙන නොතිබීම, ආරම්භ නොකරන ලද ව්‍යාපෘති සදහා විශාල වියදමක් දරා තිබීම ආදි කරුණු පිළිබදව මෙහිදී විමර්ශන කටයුතු සිදුවිය.

රාජ්‍ය අමාත්‍යවරුන් වන ගරු ජගත් පුෂ්පකුමාර, ගරු ජානක වක්කුඹුර, පාර්ලිමේන්තු මන්ත්‍රීවරුන් වන ගරු මහින්දානන්ද අලුත්ගමගේ, ගරු දයාසිරි ජයසේකර, ගරු ඉරාන් වික්‍රමරත්න, ගරු චමින්ද විජේසිරි, ගරු (මේජර්) සුදර්ශන දෙනිපිටිය, ගරු ප්‍රේම්නාත් සී දොලවත්ත, ගරු උපුල් මහේන්ද්‍ර රාජපක්ෂ, ගරු රාජිකා වික්‍රමසිංහ, ගරු මධුර විතානගේ, ගරු ජගත් කුමාර සුමිත්‍රාආරච්චි සහ ගරු (මහාචාර්ය) චරිත හේරත් යන මහත්ම මහත්මීහු මෙම අවස්ථාවට සහභාගී වූහ.

 

1 3

10 15



සම්බන්ධිත පුවත්

2026-11-16

අලි-මිනිස් ගැටුම අවම කිරීම සහ අලි සංරක්ෂණය සඳහා නව තාක්ෂණික හා ප්‍රායෝගික විසඳුම් සෙවීම පිළිබඳව ආංශික අධීක්ෂණ කාරක සභාවේ අවධානය

පරිසරය, කෘෂිකර්මය සහ සම්පත් තිරසාරත්වය පිළිබඳ ආංශික අධීක්ෂණ කාරක සභාව එහි සභාපති ගරු පාර්ලිමේන්තු මන්ත්‍රී හෙක්ටර් අප්පුහාමි මහතාගේ සභාපතිත්වයෙන් පසුගියදා (නොවැ. 13) පාර්ලිමේන්තුවේ දී රැස් විය.මෙහිදී අලි-මිනිස් ගැටුම පාලනය කිරීම, වල් අලින්ගේ සංක්‍රමණ රටා හඳුනාගැනීම සහ අලි සංරක්ෂණය සඳහා නව තාක්ෂණය යොදාගැනීම පිළිබඳව පුළුල් ලෙස සාකච්ඡා කෙරිණි. එමෙන්ම කාවන්තිස්ස ඇතාගේ මරණය සම්බන්ධයෙන් ද අවධානය යොමු විය.අලින්ගේ වාසස්ථාන අහිමි වීම, සාම්ප්‍රදායික අලි මංකඩ අවහිර වීම සහ ජනාවාස හා වගාබිම් ආශ්‍රිතව ආහාර සොයා යාම, අලි-මිනිස් ගැටුම වර්ධනය වීමට බලපාන ප්‍රධාන හේතු ලෙස මෙහිදී සාකච්ඡා විය. අලින්ගේ සංක්‍රමණ රටා හඳුනාගැනීම සඳහා GPS සහ සැටලයිට් කොලර් තාක්ෂණය යොදාගැනීමේ වැදගත්කම ද මෙහිදී අවධාරණය කෙරිණි.අලි-මිනිස් ගැටුම අවම කිරීම සඳහා ප්‍රාදේශීය මට්ටමින් වනජීවී නිලධාරීන්, ග්‍රාම නිලධාරීන් සහ ගම්වාසීන් සම්බන්ධ කරගත් ඒකාබද්ධ කමිටු පිහිටුවීම, ප්‍රජා සහභාගීත්වය ශක්තිමත් කිරීම සහ පූර්ව අනතුරු ඇඟවීමේ සන්නිවේදන ජාල ක්‍රියාත්මක කිරීම පිළිබඳව ද අදහස් හුවමාරු විය.එසේම රෝගී හා තුවාල ලැබූ අලින්ට ප්‍රතිකාර කිරීමේදී වනජීවී පශු වෛද්‍යවරුන් මුහුණ දෙන අභියෝග පිළිබඳව ද සාකච්ඡා කෙරිණි. වනජීවී දෙපාර්තමේන්තුවේ පශු වෛද්‍ය නිලධාරීන්ගේ සේවය, අලින් නිර්වින්දනය කිරීමේදී පවතින අවදානම් සහ ක්ෂේත්‍රයේදී ප්‍රතිකාර කිරීම සඳහා අවශ්‍ය ජංගම වෛද්‍ය පහසුකම් හා ජංගම එක්ස්-රේ යන්ත්‍ර වැනි තාක්ෂණික උපකරණවල අවශ්‍යතාවය ද මෙහිදී අවධානයට ලක් විය.මෙම අවස්ථාවට ගරු පාර්ලිමේන්තු මන්ත්‍රීවරුන් වන කිංස් නෙල්සන්, උපුල් කිත්සිරි, නීතීඥ එම්. ඒ. සී. එස්. චතුරි ගංගානි, සුදත් බලගල්ල, කිට්නන් සෙල්වරාජ් සහ නීතීඥ භාග්‍ය ශ්‍රී හේරත් යන මහත්ම මහත්මීහු සහභාගී වූහ. 


2026-11-14

ශ්‍රී ලංකන් ගුවන් සේවය ලාභදායී මට්ටමකට ගෙන ඒම සඳහා පස් අවුරුදු සැලැස්මක් - යානා සංචිතය ඉහළ නැංවීම සහ ණය බර පාලනය කිරීම පිළිබඳ අවධානය

ශ්‍රී ලංකන් ගුවන් සේවය මුහුණ දී ඇති මූල්‍ය අර්බුදය, අධික ගුවන් ගමන් ප්‍රමාදයන්, ණය බර සහ නව ගුවන් යානා ලබා ගැනීමේදී මතුව ඇති ප්‍රසම්පාදන ප්‍රමාදයන් පිළිබඳව යටිතල පහසුකම් හා උපායමාර්ගික සංවර්ධනය පිළිබඳ ආංශික අධීක්ෂණ කාරක සභාවේදී පුළුල් ලෙස සාකච්ඡා කෙරිණි.එම කාරක සභාව පාර්ලිමේන්තු මන්ත්‍රී ගරු එස්. එම්. මරික්කාර් මහතාගේ සභාපතිත්වයෙන් පසුගියදා පාර්ලිමේන්තුවේ දී රැස් වූ අවස්ථාවේදී මේ පිළිබඳව අවධානය යොමු විය.දැනට පවතින ගුවන් යානා 23 කින් සමන්විත සංචිතය ප්‍රමාණවත් නොවීම සහ එම ගුවන් යානා වර්ෂ 12 ක් පමණ පැරණි වීම හේතුවෙන් ගුවන් ගමන්වලට බලපාන තාක්ෂණික දෝෂ සහ ප්‍රමාදයන් පිළිබඳව මෙහිදී සාකච්ඡා විය. එක් ගුවන් යානයක තාක්ෂණික දෝෂයක් හෝ වෙනත් හේතුවක් මත හෝ ප්‍රමාදයක් ඇති වූ විට විකල්ප යානා යෙදවීමේ සීමා හේතුවෙන් සමස්ත ගුවන් ගමන් ජාලයටම බලපෑම් එල්ල වන බව ද මෙහිදී අනාවරණය විය.ගුවන් යානා ලබා ගැනීම සඳහා පසුගිය කාලයේ ක්‍රියාත්මක කළ සාමාන්‍ය ප්‍රසම්පාදන ක්‍රියාවලීන් අසාර්ථක වීම සහ ඒ ආශ්‍රිත දීර්ඝ ප්‍රමාදයන් පිළිබඳව ද කාරක සභාවේ අවධානය යොමු විය. මෙම තත්ත්වයට විසඳුමක් ලෙස ගුවන් යානා සහ ඒ ආශ්‍රිත උපකරණ මිලදී ගැනීම සඳහා විශේෂ ප්‍රසම්පාදන මාර්ගෝපදේශ මාලාවක් සකස් කර ඇති බවත්, එය ගැසට් කිරීම සඳහා කටයුතු යොදා ඇති බවත් මෙහිදී සඳහන් කෙරිණි. එමෙන්ම ප්‍රසම්පාදන කටයුතු සෘජුව අධීක්ෂණය කිරීම සඳහා අමාත්‍යාංශ මට්ටමින් විශේෂ ප්‍රසම්පාදන අංශයක් ද පිහිටුවා ඇති බව ද මෙහිදී ප්‍රකාශ විය.නව ප්‍රසම්පාදන මාර්ගෝපදේශ යටතේ ගුවන් යානා සංචිතය පුළුල් කිරීමට සැලසුම් කර ඇති අතර, ඉදිරි ජූනි මාසය වන විට නව නැරෝ-බොඩි ගුවන් යානයක් සහ වයිට්-බොඩි ගුවන් යානා දෙකක් සංචිතයට එක්කර ගැනීමට අපේක්ෂා කරන බව ද සාකච්ඡා විය. 2029 වන විට ගුවන් යානා සංචිතය අවම වශයෙන් යානා 29 ක් දක්වා ඉහළ නැංවීම, පස් අවුරුදු සැලැස්මේ ඉලක්කයක් බවද නිලධාරීහු සඳහන් කළහ.ශ්‍රී ලංකන් ගුවන් සේවයේ මූල්‍ය තත්ත්වය යහපත් කිරීම සඳහා මහා භාණ්ඩාගාරය මඟින් පැරණි බැංකු ණය සහ බැඳුම්කර ණය පවරා ගැනීම ඇතුළු පියවර ගෙන ඇති බව මෙහිදී පැහැදිලි කෙරිණි. එමෙන්ම ගුවන් යානා ලීසිං ගාස්තු අඩු කර ගැනීම, ඉන්ධන පිරිවැය පාලනය කිරීම සහ ගුවන් සේවයේ ආදායම් ඉහළ නැංවීම සඳහා වාණිජ උපායමාර්ග ක්‍රියාත්මක කිරීම පිළිබඳව ද අවධානය යොමු විය.මැදපෙරදිග කලාපයේ පවතින අර්බුදකාරී තත්ත්වය, ඉන්ධන මිල ඉහළ යාම සහ ජාත්‍යන්තර ගුවන් සේවා සමඟ පවතින තරගකාරීත්වය ද ශ්‍රී ලංකන් ගුවන් සේවයේ මෙහෙයුම් සහ ආදායම් කෙරෙහි බලපාන බව මෙහිදී සාකච්ඡා විය.තවද, ශ්‍රී ලංකන් ගුවන් සේවය ප්‍රතිව්‍යුහගත කිරීම සඳහා රජය විසින් පත් කරන ලද කමිටුව මඟින් නව ආයෝජකයන් ලබා ගැනීම, රාජ්‍ය-පෞද්ගලික හවුල්කාරීත්වයක් ඇති කිරීම හෝ රජය යටතේ පවත්වාගෙන යමින් හෝ පිරිවැය පියවාගත හැකි මට්ටමකට ගෙන ඒම ඇතුළු විකල්ප සලකා බලන බව ද සඳහන් විය.ඒ අනුව, ඉදිරි වසර දෙක හෝ තුන හෝ ඇතුළත ශ්‍රී ලංකන් ගුවන් සේවය පිරිවැය පියවාගත හැකි මට්ටමකට ගෙන ඒම සඳහා ගත යුතු පියවර ඇතුළත් සවිස්තරාත්මක වාර්තාවක් නොවැම්බර් 30 වැනිදාට පෙර පාර්ලිමේන්තුවට සහ අමාත්‍යාංශයට ඉදිරිපත් කරන ලෙස කාරක සභාව විසින් අදාළ බලධාරීන්ට උපදෙස් ලබා දෙන ලදී.මෙම කාරක සභා රැස්වීම සඳහා ගරු පාර්ලිමේන්තු මන්ත්‍රීවරුන් වන අජිත් පී. පෙරේරා, නලීන් බණ්ඩාර ජයමහ, රවීන්ද්‍ර බණ්ඩාර, මංජුල සුරවීර ආරච්චි, චතුර ගලප්පත්ති, ධනුෂ්ක රංගනාත්, ජගත් විතාන, ශාන්ත පද්ම කුමාර සුබසිංහ සහ නීතීඥ ගීතා හේරත් යන මහත්ම මහත්මීහු සහභාගී වූහ.


2026-11-14

ශ්‍රී ලංකාවේ ආනයන තීරුබදු ප්‍රතිපත්ති සහ වෙළෙඳ ගිවිසුම් සම්බන්ධයෙන් පාර්ලිමේන්තු ක්‍රම හා විධි පිළිබඳ කාරක සභාවේදී පුළුල් සාකච්ඡාවක්

ශ්‍රී ලංකාවේ ආනයන තීරුබදු ප්‍රතිපත්ති සහ වෙළෙඳ ගිවිසුම්වල වත්මන් තත්ත්වය සම්බන්ධයෙන් පාර්ලිමේන්තු ක්‍රම හා විධි පිළිබඳ කාරක සභාව එහි සභාපති ගරු පාර්ලිමේන්තු මන්ත්‍රී විජේසිරි බස්නායක මහතාගේ ප්‍රධානත්වයෙන් රැස් වූ  අවස්ථාවේදී පුළුල් ලෙස සාකච්ඡා කෙරිණි.මෙහිදී, ශ්‍රී ලංකා වාණිජ දෙපාර්තමේන්තුවේ වැඩබලන අධ්‍යක්ෂ ජනරාල් සෝමසේන මහදිවුල්වැව මහතා මේ සම්බන්ධයෙන් කාරක සභාවට සවිස්තරාත්මක පැහැදිලි කිරීමක් සිදු කළේය. ශ්‍රී ලංකාවේ ද්විපාර්ශ්වික සහ බහුපාර්ශ්වික වෙළෙඳ ගිවිසුම්වල වත්මන් තත්ත්වය සහ ඒවා ඉදිරියට පවත්වාගෙන යාම ඇතුළු කරුණු පිළිබඳව මෙහිදී අවධානය යොමු විය.සාකච්ඡා මට්ටමේ පවතින වෙළෙඳ ගිවිසුම් සම්බන්ධයෙන් ශක්‍යතා අධ්‍යයන සිදු කරමින් ඒවා අඛණ්ඩව ඉදිරියට ගෙන යාමට අවශ්‍ය පියවර ගන්නා ලෙස කාරක සභාව අවධාරණය කළේය.මෙම කාරක සභා රැස්වීමට ගරු නියෝජ්‍ය අමාත්‍යවරුන් වන චතුරංග අබේසිංහ සහ එරංග වීරරත්න යන මහත්වරුන් ද, ගරු පාර්ලිමේන්තු මන්ත්‍රීවරුන් වන අශෝක සපුමල් රන්වල, තිළිණ සමරකෝන්, චම්පික හෙට්ටිආරච්චි සහ චතුර ගලප්පත්ති යන මහත්වරුන් ඇතුළු පිරිසක් සහභාගී වූහ.


2026-11-13

විදේශීය ත්‍රස්තවාදී සටන්කරුවන් වැළැක්වීමේ පනත් කෙටුම්පතට ආංශික අධීක්ෂණ කාරක සභාවේ අනුමැතිය

විදේශීය ත්‍රස්තවාදී සටන්කරුවන් වැළැක්වීමේ පනත් කෙටුම්පත සඳහා ආර්ථික සංවර්ධනය සහ අන්තර්ජාතික සබඳතා පිළිබඳ ආංශික අධීක්ෂණ කාරක සභාවේ අනුමැතිය හිමි විය.එම ආංශික අධීක්ෂණ කාරක සභාව එහි සභාපති ගරු පාර්ලිමේන්තු මන්ත්‍රී නීතිඥ ලක්මාලි හේමචන්ද්‍ර මෙනවියගේ ප්‍රධානත්වයෙන් පාර්ලිමේන්තුවේ දී පසුගියදා රැස් වූ අවස්ථාවේදී මෙම පනත් කෙටුම්පත සලකා බලා අනුමත කෙරිණි.විදේශීය ත්‍රස්තවාදී සටන්කරුවන්ගෙන් එල්ල වන තර්ජනය වැළැක්වීම සහ මැඩපැවැත්වීම සම්බන්ධයෙන් 2014 සැප්තැම්බර් මස 24 වැනි දින සම්මත කරන ලද එක්සත් ජාතීන්ගේ ආරක්ෂක මණ්ඩලයේ 2178 දරන යෝජනාව බලාත්මක කිරීම සඳහාත්, ඊට සම්බන්ධ හෝ ආනුෂංගික කරුණු සඳහා විධිවිධාන සැලසීම සඳහාත් මෙම පනත් කෙටුම්පත ඉදිරිපත් කර තිබේ.විදේශ කටයුතු, විදේශ රැකියා සහ සංචාරක අමාත්‍යවරයා විසින් මෙම පනත් කෙටුම්පත පසුගිය ඔක්තෝබර් මස 20 වැනි දින පළමු වර කියවීම සඳහා පාර්ලිමේන්තුවට ඉදිරිපත් කර තිබිණි.ශ්‍රී ලාංකික පුරවැසියකු හෝ ශ්‍රී ලාංකික පුරවැසියකු නොවන වෙනත් රටක පුරවැසියකු හෝ ශ්‍රී ලංකාව තුළ සිටියදී හෝ ශ්‍රී ලංකාවෙන් පිටතදී වරදක් සිදුකර ඇති අවස්ථාවක හෝ, එම ක්‍රියාව අදාළ රටේ නීතිය යටතේ ද වරදක් වන අවස්ථාවකදී මෙම පනත යටතේ ශ්‍රී ලංකාව තුළ නීතිමය ක්‍රියාමාර්ග ගැනීමට හැකි බව නිලධාරීහු කාරක සභාව හමුවේ පැහැදිලි කළහ.ත්‍රස්තවාදී ක්‍රියාවන්හි නිරත වීම, ඒවා සැලසුම් කිරීම, සූදානම් කිරීම හෝ ඒවාට සහභාගී වීම මෙන්ම ත්‍රස්තවාදී පුහුණුව ලබා දීම හෝ ලබා ගැනීම ද මෙම පනත යටතේ වැරදි ලෙස අර්ථ දක්වා ඇති බව නිලධාරීහු කාරක සභාවට දැනුම් දුන්හ.විදේශ රටවල පදිංචිව සිටින ශ්‍රී ලාංකිකයන් ඉලක්ක කර ගනිමින් වාර්ගික පදනම මත මෙම නීතිමය විධිවිධාන හඳුන්වා දී නොමැති බව ද නිලධාරීන් විසින් කාරක සභාවට අවධාරණය කරන ලදී.දීර්ඝ සාකච්ඡාවකින් අනතුරුව කාරක සභාව විසින් අදාළ පනත් කෙටුම්පත අනුමත කරන ලදී. කෙසේ වෙතත්, කාරක සභා සාමාජික ගරු පාර්ලිමේන්තු මන්ත්‍රී සිවඥානම් ශ්‍රීතරන් මහතා මෙම පනත් කෙටුම්පතට සිය විරෝධය පළ කළේය.මෙම කාරක සභා රැස්වීමට ගරු පාර්ලිමේන්තු මන්ත්‍රීවරුන් වන සුරංග රත්නායක, තිලිණ සමරකෝන්, විජේසිරි බස්නායක සහ සිවඥානම් ශ්‍රීතරන් යන මහත්වරුන් ඇතුළු පිරිසක් සහභාගී වූහ. එමෙන්ම විදේශ කටයුතු, විදේශ රැකියා සහ සංචාරක අමාත්‍යාංශය, ආරක්ෂක අමාත්‍යාංශය, නීතිපති දෙපාර්තමේන්තුව සහ නීති කෙටුම්පත් සම්පාදක දෙපාර්තමේන්තුව නියෝජනය කරමින් රාජ්‍ය නිලධාරීහු ද මෙම අවස්ථාවට එක්ව සිටියහ.






© ශ්‍රී ලංකා පාර්ලි‌මේන්තුව.

සියලු හිමිකම් ඇවිරිණි.

නිර්මාණය සහ සංවර්ධනය  TekGeeks