පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
ප්රවේශ වී ඔබේ පාර්ලිමේන්තුව සමඟ සම්බන්ධ වන්න
2022-11-26
ප්රතිව්යුහගත කිරීමටත් යෝජනා කැඳවන ලෙස දැනුම් දෙයි !
ලංකා ධීවර සංස්ථාවේ 2019 වර්ෂය සදහා විගණාකාධිපති වාර්තාව සහ වත්මන් කාර්ය සාධනය පිළිබඳ විමර්ශනය සදහා ගරු මහාචාර්ය රංජිත් බණ්ඩාර මහතාගේ සභාපතීත්වයෙන් පොදු ව්යාපාර පිළිබද කාරක සභාව ඊයේ (නොවැ. 25) රැස්විය.
ලංකා ධීවර සංස්ථාවේ පවතින ගැටලු සහ රාජ්ය පෞද්ගලික හවුල්කාරිත්වය යටතේ ධීවර සංස්ථාව ලාභ උපයන ආයතනයක් බවට පත් කිරීම සඳහා ගතයුතු ක්රියාමාර්ග පිළිබදව මෙහිදී දීර්ඝ ලෙස සාකච්ඡා විය.
මෙහිදී ධීවර අමාත්යාංශයේ ලේකම්වරිය වන ආර්.එම් අයි රත්නායක මහත්මියට සහ ලංකා ධීවර සංස්ථාවේ සභාපති චතුරංග උඩවත්ත මහතා ඇතුළු නිලධාරීන්ට පහත දැක්වෙන කෝප් කමිටු නිර්දේශ ලබා දෙන ලදී.
[1]. 2016 වර්ෂයේදී ලංකා ධීවර සංස්ථාව ලාභ ඉපැයීම සදහා බද්ධ ව්යාපාරයක් ලෙස ක්රියාත්මක කිරීමට කැබිනට් තිරණයක් ගෙන තිබුණි. නමුත් මේ වෙන තුරු එය ක්රියාවට නැංවී නොමැති බව කෝප් කමිටුවට නිරීක්ෂණය විය. හැකි ඉක්මනින් ඒ පිළිබඳ අවශ්ය කටයුතු සලසා කෝප් කමිටුව දැනුවත් කිරීම.
[2]. ලංකා ධීවර සංස්ථාවේ මූලික අරමුණ ක්රියාත්මක කිරීමට ගැලපෙන ආකාරයට සංයුක්ත සැලැස්ම නැවත සකස් කරන්නෙ කෙසේද යන්න කෝප් කමිටුවට දැනුම් දීම.
[3]. එම සංයුක්ත සැලැස්ම ක්රියාත්මක කිරීම සඳහා වන තාත්වික ක්රියාමාර්ග ඇගයීමක් සකස් කොට එහි දළ සැලස්ම 2023 ජනවාරි 3 ට පෙර කෝප් කමිටුවට ඉදිරිපත් කිරීම.
[4]. ලංකා ධීවර සංස්ථාවේ ණයගැතියන් හඳුනාගැනීම සහ ණය රැස් කර ගැනීමේ ක්රමවේදය පිළිබඳව සති 3 ක් ඇතුළත කෝප් කමිටුවට දැනුම් දීම.
[5]. රු මිලියන 600 ක පමණ ප්රමාණයක් වන ලංකා ධීවර සංස්ථාවේ සේවක අර්ථසාධක අරමුදලට (EPF) සහ සේවක භාරකාර අරමුදලට (ETF) ගෙවීම සම්බන්ධයෙන් ගනු ලබන ක්රියාමාර්ග සති 2 ක් ඇතුළත කෝප් කමිටුවට වාර්තා කිරීම. එලෙස ප්රමාද වීම ඉතාමත් නරක පූර්වාදර්ශයක් බවද කෝප් සභාපතිවරයා සදහන් කළේය.
[6]. 2018 සිට ප්රමාදවී පවතින ලංකා ධීවර සංස්ථාවේ වාර්ෂික වාර්තා සහ විගණකාධිපතිතුමාට සපයන මූල්ය වාර්තා ඉදිරිපත් කිරීම පිළිබඳව තාත්වික ඇගයීමක් සති 2 ක් ඇතුළත කෝප් කමිටුවට දැනුම් දීම.
[7]. ධීවර සංස්ථාව ලාභ ලබන ආකාරයට ප්රතිව්යුහගත කිරීම සිදු කරන අකාරය පිළිබඳ සැලැස්මක් ඉදිරිපත් කිරීම.
1957 වසරේ සම්මත කරන ලද පනතකට අනුව 1965 වසරේදී පිහිටුවනු ලැබූ ධීවර සංස්ථාවේ වත්මන් ක්රියාකාරීත්වය පනතේ අරමුණුවලට වෙනස් බව මෙහිදී කමිටුව පෙන්වා දුන්නේය. මසුන් ඇල්ලීමේ මෙහෙයුම්වල නිරත වීම , මත්ස්ය පිරිසැකසුම, මත්ස්ය ආනයනය හා අපනයනය යනාදී පුළුල් කාර්යන් පනතේ සදහන් වුවද අද වන විට සිදු වන්නේ මත්ස්ය වෙළදාම පමණක් බවත් මෙහිදී හෙළි විය.
මත්ස්ය වෙළදාම පමණක් සිදුකිරීම සදහා රාජ්ය සංස්ථාවක් අනවශ්ය බවත් එබැවින් ධීවර සංස්ථාවේ කාර්ය භාර්ය වඩාත් පුළුල් වී එය ලාභ ලබන තත්ත්වයට පත්විය යුතු බවත් කෝප් සභාපතිවරයා මෙහිදී පෙන්වා දුන්නේය. ඒ අනුව පනත සංශෝධනය කිරීමට හෝ කාලීන නව අරමුණු සහිත නව සැලැස්මක් සමග ඉදිරියට යා යුතු බව ද ඒමහතා පෙන්වා දුන්නේය.
ධීවර සංස්ථාව මගින් රෝහල්වල ආහාරවේලට දේශීය මත්ස්ය විශේෂයක් සැපයීම සදහා අවකාශය තිබුණද ඒ වෙනුවට ආනයනික තලපත් මත්ස්ය විශේෂය සැපයීම සම්බන්ධවද කමිටුවේ අවධානය යොමුවිය. ඒ අනුව මේ පිළිබදව කරුණු සොයා බලා රෝහල්වලට සපයන ආනයනික තලපත් වෙනුවට ආදේශක මත්ස්ය විශේෂයක් භාවිතා කිරීමට ඇති හැකියාව පිළිබද සති දෙකක් තුළ දැනුම් දෙන ලෙස කෝප් කමිටු සභාපතිවරයා ධීවර සංස්ථාවට උපදෙස් දුන්නේය.
එසේම ධීවර සංස්ථාවේ පවතින ගැටලු විසදා නිවැරදි මාවතකට අවතීර්ණ කිරීමට වත්මන් සභාපතිවරයා දරන උත්සාහය අගය කළ කෝප් සභාපතිවරයා මෙම නිර්දේශ ක්රියාත්මක වීම පිළිබද විමර්ශනය සදහා ධීවර සංස්ථාව නැවත ජනවාරි තෙවන සතියේ කැඳවන බවද මෙහිදී පැවසීය.
මෙම කාරක සභාව සඳහා රාජ්ය අමාත්යවරුන් වන ගරු ජානක වක්කුඹුර, ගරු ලොහාන් රත්වත්තේ, ගරු ඉන්දික අනුරුද්ධ, ගරු ශාන්ත බණ්ඩාර, පාර්ලිමේන්තු මන්ත්රීවරුන් වන ගරු රවුෆ් හකීම්, ගරු පාඨලී චම්පික රණවක, ගරු මහින්දානන්ද අලුත්ගමගේ, ගරු දයාසිරි ජයසේකර, ගරු ඉරාන් වික්රමරත්න, ගරු රෝහිණි කුමාරි විජේරත්න, ගරු සංජීව එදිරිමාන්න, ගරු ජගත් කුමාර සුමිත්රාරච්චි, ගරු මේජර් සුදර්ශන දෙනිපිටිය, ගරු ප්රේම්නාත් සී. දොලවත්ත, ගරු උපුල් මහේන්ද්ර රාජපක්ෂ, ගරු රාජිකා වික්රමසිංහ සහ ගරු මධුර විතානගේ යන මහත්ම මහත්මීහු සහභාගී වූහ.
2026-11-18
කෘෂිකර්ම දෙපාර්තමේන්තුවට අදාළ දිගුකාලීනව නිරවුල් නොවූ අත්තිකාරම් ගිණුම් හතරක කාරක පාඩු කපා හැරීම සඳහා එකඟතාවය ලබා දීම රජයේ ගිණුම් පිළිබඳ කාරක සභාව එහි සභාපති ගරු පාර්ලිමේන්තු මන්ත්රී කබීර් හෂීම් මහතාගේ සභාපතිත්වයෙන් ඊයේ (නොවැ. 17) පාර්ලිමේන්තුවේ දී රැස්වූ අවස්ථාවේදී සිදු විය.ඒ අනුව, 1996 වර්ෂයේදී අවසන් කරන ලද අර්තාපල් වගා ව්යාප්ත කිරීමේ වැඩසටහනට අදාළ අත්තිකාරම් ගිණුමේ රුපියල් මිලියන 23.97 ක පාඩුවක් ද, වැලිසර කෘෂිකාර්මික වැඩපළ මෙහෙයවීමේ අත්තිකාරම් ගිණුමේ රුපියල් මිලියන 5 ක පාඩුවක් ද, කෘෂිකාර්මික අලුත්වැඩියා වැඩපළ අත්තිකාරම් ගිණුමේ රුපියල් මිලියන 35.7 ක පාඩුවක් ද, නාරාහේන්පිට කෘෂිකාර්මික මධ්යම බඩු ගබඩාව පිළිබඳ අත්තිකාරම් ගිණුමේ රුපියල් 421,884 පාඩුවක් ද නිරවුල් කිරීම පිළිබඳව මෙහිදී සලකා බැලිණි.මෙම ගිණුම්වල දිගුකාලීනව පවතින පාඩු සහ ගිණුම් ශේෂයන්හි නොගැළපීම් නිරවුල් කිරීම සඳහා ඉදිරිපත් වූ කරුණු සලකා බැලූ කාරක සභාව, අදාළ ගිණුම්වල පාඩු කපා හැරීමට සහ ශේෂ වෙනස්කම් නිවැරදි කිරීමට එකඟතාව පළ කළේය.එමෙන්ම, මෙවැනි ගිණුම් ගැටලු අනාගතයේදී ඇති වීම වළක්වා ගැනීම සඳහා විධිමත් ගිණුම් පවත්වාගෙන යාම, නිසි විගණන ක්රියාවලියක් අනුගමනය කිරීම සහ මූල්ය පාලනය ශක්තිමත් කිරීමේ වැදගත්කම ද මෙහිදී අවධාරණය කෙරිණි.මෙම රැස්වීම සඳහා ගරු නියෝජ්ය අමාත්ය විශ්රාමික මේජර් ජෙනරාල් අරුණ ජයසේකර, ගරු මන්ත්රීවරයන් වන අජිත් පී. පෙරේරා, හෙක්ටර් අප්පුහාමි, නීතීඥ තුෂාරි ජයසිංහ, සුසන්ත කුමාර නවරත්න, ලාල් ප්රේමනාත්, ඔෂානි උමංගා, නීතීඥ සාගරිකා අතාවුද, කවීන්දිරන් කෝඩීස්වරන්, සුනිල් රත්නසිරි සහ රුවන්තිලක ජයකොඩි යන මහත්ම මහත්මීහු සහභාගී වූහ.
2026-11-18
ගම්පහ දිස්ත්රික් “සණස” සංගමයේ සිදුව ඇති මූල්ය අක්රමිකතා සහ තැන්පත්කරුවන්ගේ මුදල් ආපසු ගෙවීමට නොහැකි වීම සම්බන්ධයෙන් සාකච්ඡා කිරීම සඳහා රජයේ ගිණුම් පිළිබඳ කාරක සභාව විසින් පත් කරන ලද සමූපකාර ක්ෂේත්රයේ පවතින අර්බුදය සම්බන්ධයෙන් පරීක්ෂා කිරීම සඳහා වන අනු කාරක සභාව එහි සභාපති ගරු පාර්ලිමේන්තු මන්ත්රී රුවන්තිලක ජයකොඩි මහතාගේ සභාපතිත්වයෙන් පසුගියදා (නොවැ. 16) පාර්ලිමේන්තුවේ දී රැස් විය.ගම්පහ දිස්ත්රික් “සණස” සංගමයේ කළමනාකරණ දුර්වලතා පිළිබඳ විගණකාධිපති වාර්තාවේ කරුණු මෙහිදී විමර්ශනයට ලක් වූ අතර, සංගමයේ මුදල් අදාළ අනුමැතියකින් තොරව පෞද්ගලික ආයතනවල ආයෝජනය කිරීම හේතුවෙන් මතුව ඇති මූල්ය අර්බුදය පිළිබඳව දීර්ඝ ලෙස සාකච්ඡා කෙරිණි. එම ආයෝජන හේතුවෙන් සාමාජිකයන්ගේ මෙන්ම බාහිර තැන්පත්කරුවන්ගේ තැන්පතු මුදල් ආපසු ගෙවීමට නොහැකි තත්ත්වයක් උද්ගත වී ඇති බව මෙහිදී අනාවරණය විය.තවද, සමූපකාර දෙපාර්තමේන්තුවේ අධීක්ෂණ හා නියාමන ක්රියාවලියේ පැවති දුර්වලතා, සංගමයේ වත්කම් නිරවුල් කිරීමේ ගැටලු, අධිකරණ තහනම් නියෝග සහ අදාළ වගකිවයුතු පාර්ශ්වයන්ට එරෙහිව නීතිමය ක්රියාමාර්ග ගැනීමේ අවශ්යතාව පිළිබඳව ද සාකච්ඡා කෙරිණි.තැන්පත්කරුවන්ගේ මුදල් ආපසු ලබා දීම සඳහා සංගමය සතු වත්කම් තක්සේරු කර ඒවා විකිණීමේ හැකියාව සොයා බැලීම, අධිකරණය මඟින් පනවා ඇති වත්කම් බැහැර කිරීමේ තහනම් නියෝග ඉවත් කර ගැනීමට අවශ්ය පියවර ගැනීම සහ දැනට පවතින මුදල් තැන්පත්කරුවන් අතර සාධාරණ පදනමකින් බෙදා හැරීම පිළිබඳව ද මෙහිදී අවධානය යොමු විය.එමෙන්ම, අනුමත නොකළ ආයෝජන සිදුකිරීම සම්බන්ධයෙන් වගකිවයුතු හිටපු අධ්යක්ෂ මණ්ඩල සාමාජිකයන්ගෙන් අධිභාර අයකර ගැනීම, අදාළ පෞද්ගලික සමාගමට එරෙහිව නීතිමය ක්රියාමාර්ග ගැනීම සහ නිම නොකළ ව්යාපෘති අවසන් කර ඒවායින් ආදායම් උපයා ගැනීමේ හැකියාව පිළිබඳව ද සාකච්ඡා කෙරිණි.තැන්පත්කරුවන්ගේ මුළු තැන්පතු මුදල ආපසු ලබා දීම සඳහා පැහැදිලි හා ප්රායෝගික ක්රමවේදයක් ඉදිරිපත් කිරීමේ අවශ්යතාව අවධාරණය වූ අතර, ඉදිරි ක්රියාමාර්ග පිළිබඳව සමූපකාර සංවර්ධන දෙපාර්තමේන්තුවේ බස්නාහිර පළාත් සහ ගම්පහ දිස්ත්රික් නිලධාරීන් සමඟ ද මෙහිදී සාකච්ඡා සිදු විය.මෙම රැස්වීම සඳහා අනු කාරක සභාවේ ගරු මන්ත්රීවරයන් වන නීතීඥ තුෂාරි ජයසිංහ, ටී. කේ. ජයසුන්දර සහ සුසන්ත කුමාර නවරත්න යන මහත්ම මහත්මීහු සහභාගී වූහ.
2026-11-17
පාර්ලිමේන්තුවේ විද්යා, තාක්ෂණය සහ ඩිජිටල් පරිණාමනය පිළිබඳ ආංශික අධීක්ෂණ කාරක සභාව විද්යා හා තාක්ෂණ අමාත්යාංශය යටතේ පවතින ආයතන කිහිපයක නිරීක්ෂණ චාරිකාවක නිරත විය. ඒ අනුව, කාරක සභාව අද (නොවැ. 17) ශ්රී ලංකා නැනෝ තාක්ෂණ ආයතනය (පුද්ගලික) සමාගම (SINTEC) සහ ශ්රී ලංකා ජෛව තාක්ෂණ ආයතනය (පුද්ගලික) සමාගම (SLIBTEC) යන ආයතන සිය නිරීක්ෂණයට ලක් කළ අතර, අදාළ ආයතනවල 2025/2026 වසරවල ප්රගතිය සමාලෝචනය කිරීම, 2027 වසර සඳහා ක්රියාකාරී සැලැස්ම සලකා බැලීම සහ ආයතන පරිශ්රවල කටයුතු නිරීක්ෂණය කිරීම මෙම චාරිකාවේ අරමුණයි.කාරක සභාවේ ගරු සභාපති පාර්ලිමේන්තු මන්ත්රී වෛද්ය ජනක සේනාරත්න මහතාගේ ප්රධානත්වයෙන් සිදු කරන ලද උක්ත නිරීක්ෂණ චාරිකාවට ගරු පාර්ලිමේන්තු මන්ත්රීවරුන් වන තනුර දිසානායක, ලසිත් භාෂණ ගමගේ සහ චතුර ගලප්පත්ති යන මහතුවරු එක්ව සිටියහ.
2026-11-17
ගුරු සේවයේ සිට විදුහල්පති සේවයට පත්වීමේදී ඇතිවන වැටුප් විෂමතා පිළිබඳව අධ්යාපනය, ශ්රම බලකාය සහ මානව ප්රාග්ධනය පිළිබඳ ආංශික අධීක්ෂණ කාරක සභාව විසින් පත් කරන ලද අනුකමිටුවේදී තවදුරටත් සාකච්ඡා කෙරිණි.එම අනුකමිටුව එහි සභාපති ගරු පාර්ලිමේන්තු මන්ත්රී සුනිල් රාජපක්ෂ මහතාගේ ප්රධානත්වයෙන් පසුගියදා රැස්වූ අවස්ථාවේදී මෙම කරුණු සාකච්ඡාවට ලක් විය.මෙම සාකච්ඡාව සඳහා අධ්යාපන, උසස් අධ්යාපන සහ වෘත්තීය අධ්යාපන අමාත්යාංශය, මුදල්, ක්රමසම්පාදන සහ ආර්ථික සංවර්ධන අමාත්යාංශය, රාජ්ය පරිපාලන පළාත් සභා සහ පළාත් පාලන අමාත්යාංශය සහ රාජ්ය සේවා කොමිෂන් සභාව නියෝජනය කරමින් ජ්යෙෂ්ඨ නිලධාරීහු සහභාගී වූහ.ගුරු සේවයේ නිලධාරීන් විදුහල්පති සේවයට පත්වීමේදී ඇතිවී තිබෙන වැටුප් වර්ධක පරතරයන් සහ විෂමතාවයන් පිළිබඳව මෙහිදී දීර්ඝ වශයෙන් සාකච්ඡා විය. එක් සේවාවකට පමණක් වෙන් වෙන්ව වැටුප් සංශෝධන සිදු කිරීමෙන් සමස්ත රාජ්ය සේවයේ අනෙකුත් සේවාවන් සමඟ සංසන්දනාත්මකව ගැටලු මතුවන බවට මෙහිදී කරුණු ඉදිරිපත් කෙරිණි.සේවා ව්යවස්ථාව සහ බඳවා ගැනීමේ වයස් සීමා සංශෝධනය, විදුහල්පති විශේෂ දීමනා සහ ප්රවාහන පහසුකම්, පාසල් වර්ගීකරණය සහ පුරප්පාඩු සම්පූර්ණ කිරීම, විධිමත් ස්ථාන මාරු ප්රතිපත්තිය, ගුරු සහ විදුහල්පති නිල නිවාස ප්රතිසංස්කරණය ඇතුළු කරුණු පිළිබඳව අනුකාරක සභාව විසින් නිලධාරීන් සමඟ දීර්ඝ ලෙස සාකච්ඡා කරන ලදී.මේ සම්බන්ධයෙන් තවදුරටත් සාකච්ඡා කිරීමෙන් අනතුරුව යෝජනා සහිත අවසාන වාර්තාව ආංශික අධීක්ෂණ කාරක සභාවට ඉදිරිපත් කිරීමට නියමිතය.මෙම රැස්වීමට ගරු පාර්ලිමේන්තු මන්ත්රීවරුන් වන අබූබකර් අතම්බාවා, සුගත් වසන්ත ද සිල්වා, සුජීව දිසානායක සහ චානක මාදුගොඩ යන මහත්වරු ද සහභාගී වූහ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks



