පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
ප්රවේශ වී ඔබේ පාර්ලිමේන්තුව සමඟ සම්බන්ධ වන්න
2022-10-20
මෙරට ව්යවසායකත්වය සදහා පවතින බාධක ඉවත්කොට නව ප්රතිපත්තිමය රාමුවක් කඩිනමින් සැකසීම සදහා සියලු අදාළ ආයතන සම්බන්ධීකරණයෙන් සති දෙකක් තුළ මූලික සාකච්ඡාවක් සංවිධානය කරන ලෙස ප්රතිපත්ති සම්පාදනය කිරීමේදී ප්රමුඛතා හඳුනා ගැනීම පිළිබඳ ජාතික සභා අනු කමිටුවේ සභාපති පාර්ලිමේන්තු මන්ත්රී ගරු නාමල් රාජපක්ෂ මහතා ඊයේ (ඔක්. 19) මිනිස් බල හා රැකී රක්ෂා දෙපාර්තමේන්තුවේ අධ්යක්ෂ ජනරාල් අනූෂා ගෝකුල මහත්මියට උපදෙස් ලබා දුන්නේය.
ව්යවසායක් මෙරට ආරම්භ කිරීම මේ වන විට සංකීර්ණ ක්රියාවලියක් වී ඇති බැවින් දියුණු රටවල මෙන් එය ඉතා සරල සහ පහසු කාර්යක් ලෙස සකස් වීමට ප්රතිපත්තිමය රාමුවක් සකස් විය යුතු බවද අනුකමිටුවේදී අවධාරණය කෙරිණි. ප්රාදේශීය ලේකම් සහ දිස්ත්රික් ලේකම් කාර්යාල සහ අදාළ ආයතන සම්බන්ධීකරණයෙන් මෙම ක්රියාවලිය වඩාත් පහසුවෙන් කාර්යක්ෂමව සිදු කිරීමට අවශ්ය නෛතික සහ ප්රතිපත්තිමය වෙනස්කම් මීළග කමිටු රැස්වීමේදී සාකච්ඡාකොට තීරණය කිරීමට ද අනුකමිටුවේ එකඟත්වය පළ විය.
ව්යවසායකත්වය හා ආයෝජන දිරිමත් කිරීම සම්බන්ධ ජාතික ප්රතිපත්ති සම්පාදනය කිරීම පිළිබද සාකච්ඡා කිරීම සදහා මිනිස් බල හා රැකී රක්ෂා දෙපාර්තමේන්තුව හා නීතිපති දෙපාර්තමේන්තුවේ නිලධාරීහු කෙටි, මධ්යම හා දිගුකාලීන ප්රතිපත්ති සම්පාදනය කිරීමේදී ප්රමුඛතා හඳුනා ගැනීම පිළිබඳ ජාතික සභා අනු කමිටුවට ඊයේ (19) කැඳවා තිබූ අවස්ථාවේදී මෙම නිර්දේශ ලබා දෙන ලදී.
ව්යවසායකත්වය ඇතුළු වෘත්තිය මාර්ගෝපදේශනය මෙරට සිසු දරු දැරියන්ට හිමිවිය යුතු අයිතියක් බැවින් මෙරට පාසැල් අධ්යාපන පද්ධතියට එය ඇතුළත් වන ලෙස අධ්යාපන ප්රතිපත්තීන් වෙනස් විය යුතු බව මිනිස් බල හා රැකී රක්ෂා දෙපාර්තමේන්තුවේ අධ්යක්ෂ ජනරාල් අනූෂා ගෝකුල මහත්මිය මෙහිදී පෙන්වා දුන්නාය.
මෑතකදී කරන ලද සමීක්ෂණයකට අනුව මෙරට අධ්යාපනය, රැකියාවක් හෝ කිසිදු පුහුණුවක් නොමැති තරුණ පිරිස (Not in Employment, Education, Training / NEET) ලක්ෂ 8 කට ආසන්න බවත් වෘත්තීය අරමුණක්ද නොමැති ඔවුන්ට ව්යවසායකත්වය ඇතුළු වෘත්තීය මගපෙන්වීමක් අත්යවශ්ය බවත් ඇය පෙන්වා දුන්නාය.
විශේෂයෙන්ම දියුණුවට පත් වූ ව්යවසායකයන් පිළිබද චරිතාපදාන ආදියද මෙරට අධ්යාපන විෂය නිර්දේශයන්ට ඇතුළත් විය යුතු බවත් පාසැල් අවධියේ සිටම සාම්ප්රදායික රැකියාවන්ගෙන් ඔබ්බට ගිය නව වෘත්තීය අවස්ථා සහ ව්යවසායකත්වය පිළිබද දරුවන් දැනුවත් කළ යුතු බවත් කමිටුවේදී සාකච්ඡා විය. මේ අනුව 9 ශ්රේණියේ සිට හෝ තමන්ගේ හැකියාව සහ කැමැත්ත මත අදාළ වෘත්තිය ක්ෂේත්රයක් තෝරා ගැනීම පිණිස නිසි මගපෙන්වීම සදහා අධ්යාපන ප්රතිපත්තීන් සකස් විය යුතු බවද ඊට අදාළ යෝජනා අධ්යාපන අමාත්යාංශය ඉදිරිපත් කොට ප්රතිපත්ති සකස් කරන ලෙසද කමිටුව විසින් උපදෙස් ලබා දෙන ලදී.
අමාත්ය නසීර් අහමඩ්, පාර්ලිමේන්තු මන්ත්රීවරුන් වන පවිත්රා වන්නිආරච්චි, සාගර කාරියවසම්, වජිර අබේවර්ධන, අලි සබ්රි රහීම් යන මහත්ම මහත්මීහූ ද මෙම අවස්ථාවට එක්ව සිටියහ.
මේ අතර විදුලිබල සහ බලශක්ති ක්ෂේත්රයට අදාළව නව ප්රතිපත්ති සම්පාදනය කිරීම පිළිබදව ද සාකච්ඡාවක් අද පැවැත්විණි. මෙම සාකච්ඡාවට විදුලිබල සහ බලශක්ති අමාත්ය කංචන විජේසේකර මහතා, රාජ්ය අමාත්ය ඩි.වී. චානක, පාර්ලිමේන්තු මන්ත්රීවරුන් වන ජොන්ස්ටන් ප්රනාන්දු, පවිත්රා වන්නිආරච්චි, සාගර කාරියවසම්, විදුලිබල අමාත්යාංශ ලේකම් මාපා පතිණ ඇතුළු මහත්ම මහත්මීහු පිරිසක් එක්ව සිටියහ.
ප්රසම්පාදන ක්රියාවලිය කඩිනම් කිරීමේ අවශ්යතාව ඇතුළු විදුලිබල සහ බලශක්ති ක්ෂේත්රයේ අදාළ ආයතනවල කාර්යක්ෂමතාව වැඩිදියුණු කිරීමට අදාළව සිදුවිය යුතු ප්රතිපත්තිමය වෙනස්කම් පිළිබඳව මූලික කරුණු මෙහිදී සාකච්ඡා විය.
2026-11-18
කෘෂිකර්ම දෙපාර්තමේන්තුවට අදාළ දිගුකාලීනව නිරවුල් නොවූ අත්තිකාරම් ගිණුම් හතරක කාරක පාඩු කපා හැරීම සඳහා එකඟතාවය ලබා දීම රජයේ ගිණුම් පිළිබඳ කාරක සභාව එහි සභාපති ගරු පාර්ලිමේන්තු මන්ත්රී කබීර් හෂීම් මහතාගේ සභාපතිත්වයෙන් ඊයේ (නොවැ. 17) පාර්ලිමේන්තුවේ දී රැස්වූ අවස්ථාවේදී සිදු විය.ඒ අනුව, 1996 වර්ෂයේදී අවසන් කරන ලද අර්තාපල් වගා ව්යාප්ත කිරීමේ වැඩසටහනට අදාළ අත්තිකාරම් ගිණුමේ රුපියල් මිලියන 23.97 ක පාඩුවක් ද, වැලිසර කෘෂිකාර්මික වැඩපළ මෙහෙයවීමේ අත්තිකාරම් ගිණුමේ රුපියල් මිලියන 5 ක පාඩුවක් ද, කෘෂිකාර්මික අලුත්වැඩියා වැඩපළ අත්තිකාරම් ගිණුමේ රුපියල් මිලියන 35.7 ක පාඩුවක් ද, නාරාහේන්පිට කෘෂිකාර්මික මධ්යම බඩු ගබඩාව පිළිබඳ අත්තිකාරම් ගිණුමේ රුපියල් 421,884 පාඩුවක් ද නිරවුල් කිරීම පිළිබඳව මෙහිදී සලකා බැලිණි.මෙම ගිණුම්වල දිගුකාලීනව පවතින පාඩු සහ ගිණුම් ශේෂයන්හි නොගැළපීම් නිරවුල් කිරීම සඳහා ඉදිරිපත් වූ කරුණු සලකා බැලූ කාරක සභාව, අදාළ ගිණුම්වල පාඩු කපා හැරීමට සහ ශේෂ වෙනස්කම් නිවැරදි කිරීමට එකඟතාව පළ කළේය.එමෙන්ම, මෙවැනි ගිණුම් ගැටලු අනාගතයේදී ඇති වීම වළක්වා ගැනීම සඳහා විධිමත් ගිණුම් පවත්වාගෙන යාම, නිසි විගණන ක්රියාවලියක් අනුගමනය කිරීම සහ මූල්ය පාලනය ශක්තිමත් කිරීමේ වැදගත්කම ද මෙහිදී අවධාරණය කෙරිණි.මෙම රැස්වීම සඳහා ගරු නියෝජ්ය අමාත්ය විශ්රාමික මේජර් ජෙනරාල් අරුණ ජයසේකර, ගරු මන්ත්රීවරයන් වන අජිත් පී. පෙරේරා, හෙක්ටර් අප්පුහාමි, නීතීඥ තුෂාරි ජයසිංහ, සුසන්ත කුමාර නවරත්න, ලාල් ප්රේමනාත්, ඔෂානි උමංගා, නීතීඥ සාගරිකා අතාවුද, කවීන්දිරන් කෝඩීස්වරන්, සුනිල් රත්නසිරි සහ රුවන්තිලක ජයකොඩි යන මහත්ම මහත්මීහු සහභාගී වූහ.
2026-11-18
ගම්පහ දිස්ත්රික් “සණස” සංගමයේ සිදුව ඇති මූල්ය අක්රමිකතා සහ තැන්පත්කරුවන්ගේ මුදල් ආපසු ගෙවීමට නොහැකි වීම සම්බන්ධයෙන් සාකච්ඡා කිරීම සඳහා රජයේ ගිණුම් පිළිබඳ කාරක සභාව විසින් පත් කරන ලද සමූපකාර ක්ෂේත්රයේ පවතින අර්බුදය සම්බන්ධයෙන් පරීක්ෂා කිරීම සඳහා වන අනු කාරක සභාව එහි සභාපති ගරු පාර්ලිමේන්තු මන්ත්රී රුවන්තිලක ජයකොඩි මහතාගේ සභාපතිත්වයෙන් පසුගියදා (නොවැ. 16) පාර්ලිමේන්තුවේ දී රැස් විය.ගම්පහ දිස්ත්රික් “සණස” සංගමයේ කළමනාකරණ දුර්වලතා පිළිබඳ විගණකාධිපති වාර්තාවේ කරුණු මෙහිදී විමර්ශනයට ලක් වූ අතර, සංගමයේ මුදල් අදාළ අනුමැතියකින් තොරව පෞද්ගලික ආයතනවල ආයෝජනය කිරීම හේතුවෙන් මතුව ඇති මූල්ය අර්බුදය පිළිබඳව දීර්ඝ ලෙස සාකච්ඡා කෙරිණි. එම ආයෝජන හේතුවෙන් සාමාජිකයන්ගේ මෙන්ම බාහිර තැන්පත්කරුවන්ගේ තැන්පතු මුදල් ආපසු ගෙවීමට නොහැකි තත්ත්වයක් උද්ගත වී ඇති බව මෙහිදී අනාවරණය විය.තවද, සමූපකාර දෙපාර්තමේන්තුවේ අධීක්ෂණ හා නියාමන ක්රියාවලියේ පැවති දුර්වලතා, සංගමයේ වත්කම් නිරවුල් කිරීමේ ගැටලු, අධිකරණ තහනම් නියෝග සහ අදාළ වගකිවයුතු පාර්ශ්වයන්ට එරෙහිව නීතිමය ක්රියාමාර්ග ගැනීමේ අවශ්යතාව පිළිබඳව ද සාකච්ඡා කෙරිණි.තැන්පත්කරුවන්ගේ මුදල් ආපසු ලබා දීම සඳහා සංගමය සතු වත්කම් තක්සේරු කර ඒවා විකිණීමේ හැකියාව සොයා බැලීම, අධිකරණය මඟින් පනවා ඇති වත්කම් බැහැර කිරීමේ තහනම් නියෝග ඉවත් කර ගැනීමට අවශ්ය පියවර ගැනීම සහ දැනට පවතින මුදල් තැන්පත්කරුවන් අතර සාධාරණ පදනමකින් බෙදා හැරීම පිළිබඳව ද මෙහිදී අවධානය යොමු විය.එමෙන්ම, අනුමත නොකළ ආයෝජන සිදුකිරීම සම්බන්ධයෙන් වගකිවයුතු හිටපු අධ්යක්ෂ මණ්ඩල සාමාජිකයන්ගෙන් අධිභාර අයකර ගැනීම, අදාළ පෞද්ගලික සමාගමට එරෙහිව නීතිමය ක්රියාමාර්ග ගැනීම සහ නිම නොකළ ව්යාපෘති අවසන් කර ඒවායින් ආදායම් උපයා ගැනීමේ හැකියාව පිළිබඳව ද සාකච්ඡා කෙරිණි.තැන්පත්කරුවන්ගේ මුළු තැන්පතු මුදල ආපසු ලබා දීම සඳහා පැහැදිලි හා ප්රායෝගික ක්රමවේදයක් ඉදිරිපත් කිරීමේ අවශ්යතාව අවධාරණය වූ අතර, ඉදිරි ක්රියාමාර්ග පිළිබඳව සමූපකාර සංවර්ධන දෙපාර්තමේන්තුවේ බස්නාහිර පළාත් සහ ගම්පහ දිස්ත්රික් නිලධාරීන් සමඟ ද මෙහිදී සාකච්ඡා සිදු විය.මෙම රැස්වීම සඳහා අනු කාරක සභාවේ ගරු මන්ත්රීවරයන් වන නීතීඥ තුෂාරි ජයසිංහ, ටී. කේ. ජයසුන්දර සහ සුසන්ත කුමාර නවරත්න යන මහත්ම මහත්මීහු සහභාගී වූහ.
2026-11-17
පාර්ලිමේන්තුවේ විද්යා, තාක්ෂණය සහ ඩිජිටල් පරිණාමනය පිළිබඳ ආංශික අධීක්ෂණ කාරක සභාව විද්යා හා තාක්ෂණ අමාත්යාංශය යටතේ පවතින ආයතන කිහිපයක නිරීක්ෂණ චාරිකාවක නිරත විය. ඒ අනුව, කාරක සභාව අද (නොවැ. 17) ශ්රී ලංකා නැනෝ තාක්ෂණ ආයතනය (පුද්ගලික) සමාගම (SINTEC) සහ ශ්රී ලංකා ජෛව තාක්ෂණ ආයතනය (පුද්ගලික) සමාගම (SLIBTEC) යන ආයතන සිය නිරීක්ෂණයට ලක් කළ අතර, අදාළ ආයතනවල 2025/2026 වසරවල ප්රගතිය සමාලෝචනය කිරීම, 2027 වසර සඳහා ක්රියාකාරී සැලැස්ම සලකා බැලීම සහ ආයතන පරිශ්රවල කටයුතු නිරීක්ෂණය කිරීම මෙම චාරිකාවේ අරමුණයි.කාරක සභාවේ ගරු සභාපති පාර්ලිමේන්තු මන්ත්රී වෛද්ය ජනක සේනාරත්න මහතාගේ ප්රධානත්වයෙන් සිදු කරන ලද උක්ත නිරීක්ෂණ චාරිකාවට ගරු පාර්ලිමේන්තු මන්ත්රීවරුන් වන තනුර දිසානායක, ලසිත් භාෂණ ගමගේ සහ චතුර ගලප්පත්ති යන මහතුවරු එක්ව සිටියහ.
2026-11-17
ගුරු සේවයේ සිට විදුහල්පති සේවයට පත්වීමේදී ඇතිවන වැටුප් විෂමතා පිළිබඳව අධ්යාපනය, ශ්රම බලකාය සහ මානව ප්රාග්ධනය පිළිබඳ ආංශික අධීක්ෂණ කාරක සභාව විසින් පත් කරන ලද අනුකමිටුවේදී තවදුරටත් සාකච්ඡා කෙරිණි.එම අනුකමිටුව එහි සභාපති ගරු පාර්ලිමේන්තු මන්ත්රී සුනිල් රාජපක්ෂ මහතාගේ ප්රධානත්වයෙන් පසුගියදා රැස්වූ අවස්ථාවේදී මෙම කරුණු සාකච්ඡාවට ලක් විය.මෙම සාකච්ඡාව සඳහා අධ්යාපන, උසස් අධ්යාපන සහ වෘත්තීය අධ්යාපන අමාත්යාංශය, මුදල්, ක්රමසම්පාදන සහ ආර්ථික සංවර්ධන අමාත්යාංශය, රාජ්ය පරිපාලන පළාත් සභා සහ පළාත් පාලන අමාත්යාංශය සහ රාජ්ය සේවා කොමිෂන් සභාව නියෝජනය කරමින් ජ්යෙෂ්ඨ නිලධාරීහු සහභාගී වූහ.ගුරු සේවයේ නිලධාරීන් විදුහල්පති සේවයට පත්වීමේදී ඇතිවී තිබෙන වැටුප් වර්ධක පරතරයන් සහ විෂමතාවයන් පිළිබඳව මෙහිදී දීර්ඝ වශයෙන් සාකච්ඡා විය. එක් සේවාවකට පමණක් වෙන් වෙන්ව වැටුප් සංශෝධන සිදු කිරීමෙන් සමස්ත රාජ්ය සේවයේ අනෙකුත් සේවාවන් සමඟ සංසන්දනාත්මකව ගැටලු මතුවන බවට මෙහිදී කරුණු ඉදිරිපත් කෙරිණි.සේවා ව්යවස්ථාව සහ බඳවා ගැනීමේ වයස් සීමා සංශෝධනය, විදුහල්පති විශේෂ දීමනා සහ ප්රවාහන පහසුකම්, පාසල් වර්ගීකරණය සහ පුරප්පාඩු සම්පූර්ණ කිරීම, විධිමත් ස්ථාන මාරු ප්රතිපත්තිය, ගුරු සහ විදුහල්පති නිල නිවාස ප්රතිසංස්කරණය ඇතුළු කරුණු පිළිබඳව අනුකාරක සභාව විසින් නිලධාරීන් සමඟ දීර්ඝ ලෙස සාකච්ඡා කරන ලදී.මේ සම්බන්ධයෙන් තවදුරටත් සාකච්ඡා කිරීමෙන් අනතුරුව යෝජනා සහිත අවසාන වාර්තාව ආංශික අධීක්ෂණ කාරක සභාවට ඉදිරිපත් කිරීමට නියමිතය.මෙම රැස්වීමට ගරු පාර්ලිමේන්තු මන්ත්රීවරුන් වන අබූබකර් අතම්බාවා, සුගත් වසන්ත ද සිල්වා, සුජීව දිසානායක සහ චානක මාදුගොඩ යන මහත්වරු ද සහභාගී වූහ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks


