පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
ප්රවේශ වී ඔබේ පාර්ලිමේන්තුව සමඟ සම්බන්ධ වන්න
2021-10-25
සෑම මැතිවරණයකදීම මහජන නියෝජිතයන් තේරීමේදී කොට්ඨාස ක්රමය සහ සමානුපාතික ක්රමය පිළිවෙළින් 70% සහ 30% ආකාරයට බෙදීයන ක්රමවේදය අනුගමනය කිරීම යෝග්ය බව ජාතික නිදහස් පෙරමුණ පාර්ලිමේන්තු විශේෂ කාරක සභාව හමුවේ සාක්ෂි දෙමින් පසුගියදා (22) පැවසීය.
පාර්ලිමේන්තු විශේෂ කාරක සභාව එහි සභාපති, සභානායක, අමාත්ය දිනේෂ් ගුණවර්ධන මහතාගේ ප්රධානත්වයෙන් රැස් වූ අවස්ථාවේ, එම පක්ෂයේ පාර්ලිමේන්තු මන්ත්රී රාජ්ය අමාත්ය ජයන්ත සමරවිර මහතා පැවසුවේ ප්රාදේශීය සභා මට්ටමට විධායක බලතල උපරිම වශයෙන් විමධ්යගත කිරීම සහ කොට්ඨාස මට්ටමින් ජනසභා පිහිටුවීම සඳහා ප්රතිපාදන සැලසීම ඉතා වැදගත් බවයි.
නව ව්යවස්ථාව යටතේ පළාත් පාලන මැතිවරණය මගින් තෝරා පත්කර ගන්නා පළාත් පාලන ආයතන ප්රධානීන්ගේ පළාත් කවුන්සිලය පළාත් සංවර්ධන සභාව බවට පරිවර්තනය කළ යුතුය. එම සභාවලට මහජන පරමාධිපත්යයට අදාළ විධායක බලතල පමණක් පැවරීම සුදුසු බවත් ඒ මගින් පළාත් සභා මැතිවරණය අහෝසි කිරීම සිදු කළ යුතු බවත් ජාතික නිදහස් පෙරමුණ පෙන්වා දුන්නේය.
පළාත් පාලන බල ප්රදේශයක ජන සභාවක ඡන්දදායකයින්ගෙන් තුනෙන් දෙකක බහුතර අත්සන් සහිත ඉල්ලීමක් මගින් අදාළ කොට්ඨාශයේ මන්ත්රීවරයාට ලබාදුන් ජනවරම ආපසු ලබාගැනීම සඳහා සහ අතුරු මැතිවරණ පැවැත්වීම සඳහා ප්රතිපාදන සැලසීම සිදුකළ යුතුය. සෑම මහජන නියෝජිතයකු විසින්ම මැතිවරණයට නාම යෝජනා බාරදීමට පෙර මැතිවරණ කොමසාරිස්වරයා වෙත වත්කම් බැරකම් ප්රකාශ ලබාදිය යුතු අතර මැතිවරණ කොමසාරිස්වරයා විසින් මැතිවරණයට සති 4කට පෙර එම තොරතුරු ප්රකාශයට පත් කිරීම සුදුසු බවත් ජයන්ත සමරවීර මහතා කාරක සභාවේදී යෝජනා කළේය.
මහජන නියෝජිතයකු විසින් මහජනයාට ලබාදෙන පොදු මැතිවරණ පොරොන්දු ලිඛිතව ඉදිරිපත් කළ යුතුය. ඒවා සමාජ ගිවිසුම් ලෙස සැළකීම සඳහා නීතිමය ප්රතිපාදන පැනවීම යෝග්ය වේ. ඊට අදාළ පැමිණිලි විභාග කිරීම සඳහා විශේෂ විනිසුරු මඩුල්ලක් පත්කිරීම සඳහා නීතිමය ප්රතිපාදන පැනවීමේ අවශ්යතාවද හෙතෙම අවධාරණය කළේය.
පාර්ලිමේන්තු මැතිවරණයකදී ජනතා පරමාධිපත්ය විකෘතිවීම වැළැක්වීම සඳහා ජාතික ලැයිස්තුව මගින් පත්කරන මන්ත්රීවරුන් ප්රමාණය සමස්ත මන්ත්රීවරුන්ගෙන් 5% දක්වා අඩු කළ යුතු බවටද එම පෙරමුණ සඳහන් කළේය.
මැතිවරණයේදී වියදම් කිරීමට අපේක්ෂිත මුදල් ප්රමාණය සහ වැයකරන ආකාරය දැක්වෙන අය වැය සහිත ප්රකාශයක් මැතිවරණ කොමසාරිස්වරයාට ලබාදීම සිදු කළ යුතු බවද ඔවුහු යෝජනා කළහ.
ජාතිවාදී සහ ආගම්වාදී නාමකරණය සහිත පක්ෂ ලියාපදිංචිය අත්හිටුවීම සහ පවතින පක්ෂවල නම් වෙනස් කිරීම සඳහා ප්රතිපාදන සැලසීම, ජනාධිපතිවරණය සහ පාර්ලිමේන්තු මැතිවරණය ඡන්ද පත්රිකා දෙකක් මගින් එකම අවස්ථාවක පැවැත්වීම සහ එම මැතිවරණ භාරකාර රජයක් යටතේ පැවැත්වීම, ජනාධිපතිවරණ, පාර්ලිමේන්තු මැතිවරණ සහ ප්රාදේශිය සභා සහ සියළුම මැතිවරණ සඳහා මැතිවරණ පැවැත්වීමේ කාලසීමා නීතිය මගින් පැනවීම සහ දේශපාලන තීන්දු මගින් ඒවා වෙනස් කිරීමට ඉඩ නොතැබීම පාර්ලිමේන්තු විශේෂ කාරක සභාව හමුවේ ජාතික නිදහස් පෙරමුණ ඉදිරිපත් කළ යෝජනා අතර විය.
ජාතික හෙළ උරුමයද පාර්ලිමේන්තු විශේෂ කාරක සභාව හමුවේ සාක්ෂි ලබා දුන්නේය. පාර්ලිමේන්තු, පළාත් සභා සහ පළාත් පාලන යන පාලන මට්ටම් තුන සඳහාම කේවල සහ සමානුපාත ක්රමයට පත්වන මන්ත්රීන් සංඛ්යාව 60:40 අනුපාතයකින් යුතුව මිශ්ර මන්ත්රී නියෝජනයක් ලෙස පැවතිය යුතු බව ඔවුහු අවධාරණය කළහ.
පළාත් සභා සහ පළාත් පාලන මැතිවරණය සෑම වසර 4 කට වරක් වසරේ නිශ්චිත වකවානුවක් තුළ එක් දිනයක එකවර පැවැත්වීමටද ජාතික හෙළ උරුමය යෝජනා කළේය.
සෑම මැතිවරණයකදීම අපේක්ෂක ලැයිස්තුවේ සියයට විසි පහක කාන්තා නියෝජනය සහතික කළ යුතු අතර, සමානුපාතික නියෝජනයේදී එකී නියෝජනය තුනෙන් එකක් ලෙස සහතික කළ යුතු බවද එම පක්ෂය කාරක සභාවේදී පෙන්වා දුන්නේය.
මෙම කාරක සභා රැස්වීමට අමාත්යවරුන් වන නිමල් සිරිපාල ද සිල්වා, මහාචාර්ය ජී.එල්.පීරිස්, ඩග්ලස් දේවානන්දා, විමල් වීරවංශ යන මහත්වරුද, පාර්ලිමේන්තු මන්ත්රීවරුන් වන රවුෆ් හකීම්, කබීර් හෂීම්, මනෝ ගනේෂන්, මධුර විතානගේ යන මහත්වරුද සභභාගි වූහ.
නීතිපති දෙපාර්තමේන්තුව සහ මැතිවරණ කොමිෂන් සභාව යන ආයතනවල නිලධාරිහුද මේ අවස්ථාවට සහභාගී වූහ.
පාර්ලිමේන්තු විශේෂ කාරක සභාවේ මීළඟ රැස්වීම් ලබන මස 08 වැනිදා පස්වරුවේ පැවැත්වෙන බව එහි ලේකම්, පාර්ලිමේන්තුවේ කාර්ය මණ්ඩල ප්රධානි හා නියෝජ්ය මහ ලේකම් කුෂානි රෝහණදීර මහත්මිය පවසන්නීය.
2026-11-20
ගෘහස්ථ ගෑස් සම්බන්ධයෙන් පාරිභෝගිකයින්ට අහිතකර බලපෑමක් ඇති නොවන පරිදි තීරණ ගැනීම සහතික කරන ලෙස පරිසරය, කෘෂිකර්මය සහ සම්පත් තිරසාරත්වය පිළිබඳ ආංශික අධීක්ෂණ කාරක සභාව විසින් පාරිභෝගික කටයුතු පිළිබඳ අධිකාරියට අවධාරණය කරන ලදී.පරිසරය, කෘෂිකර්මය සහ සම්පත් තිරසාරත්වය පිළිබඳ ආංශික අධීක්ෂණ කාරක සභාව එහි සභාපති ගරු පාර්ලිමේන්තු මන්ත්රී හෙක්ටර් අප්පුහාමි මහතාගේ ප්රධානත්වයෙන් පාර්ලිමේන්තුවේ දී පසුගියදා (නොවැ. 18) රැස් වූ අවස්ථාවේදී මේ පිළිබඳව සාකච්ඡා කෙරිණි.ශ්රී ලංකාවේ ගෘහස්ථ ගෑස් බෙදා හරින පෞද්ගලික සමාගමක් විසින් ගෑස් සිලින්ඩරයක මිල සැලකිය යුතු ලෙස ඉහළ දැමීම සම්බන්ධයෙන් සාකච්ඡා කිරීම සඳහා වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්යාංශයේ සහ පාරිභෝගික කටයුතු පිළිබඳ අධිකාරියේ නිලධාරීන් කාරක සභාව හමුවට කැඳවා තිබිණි.ගෑස් මිල ඉහළ යාම හේතුවෙන් පාරිභෝගිකයින්ට සිදු වන අපහසුතාව පිළිබඳව අවධානය යොමු කරමින් තමන් මේ සඳහා මැදිහත් වූ බව සඳහන් කළ පාරිභෝගික කටයුතු පිළිබඳ අධිකාරියේ සභාපතිවරයා, ගෘහස්ථ ගෑස් සඳහා මිල තීරණය කිරීමේ බලය තම අධිකාරියට නොමැති බව ද පැවසීය. එසේ වුවද, අදාළ පෞද්ගලික සමාගම සමඟ පැවැත් වූ සාකච්ඡාවල ප්රතිඵලයක් ලෙස මිල අඩු කිරීමට පියවර ගත් බව ද ඔහු කාරක සභාවට පැවසුවේය.ගෘහස්ථ ගෑස් සිලින්ඩර බෙදා හරින අදාළ පෞද්ගලික සමාගමට වෙළෙඳපොළේ හිමි කොටස අඩු බැවින්, එම සමාගමට ගෑස් වැඩි මිලකට මිලදී ගැනීමට සිදු වන බවත්, ඒ අනුව මිලදී ගත් මිලට සාපේක්ෂව ගෑස් සිලින්ඩරයක මිල ඉහළ දැමීමට සිදු වූ බවත් එම සමාගම තමන්ට පැහැදිලි කළ බව ද සභාපතිවරයා වැඩිදුරටත් සඳහන් කළේය.කෙසේ වෙතත්, ඉදිරියේදී ගෘහස්ථ ගෑස් සැපයුමට බාධා ඇති නොවන බවට සහතික කරන ලෙසත්, මිල ඉහළ යාම් හේතුවෙන් පාරිභෝගිකයින් පීඩාවට පත් නොවන බවට වගබලා ගන්නා ලෙසත් කාරක සභාව විසින් මෙහිදී අවධාරණය කරන ලදී.මෙම කාරක සභා රැස්වීමට ගරු පාර්ලිමේන්තු මන්ත්රීවරුන් වන උපුල් කිත්සිරි, එම්. ඒ. සී. එස්. චතුරි ගංගානි, සුසන්ත කුමාර නවරත්න, සුදත් බලගල්ල, කිට්නන් සෙල්වරාජ් සහ ඥානමුත්තු ශ්රීනේසන් යන මහත්ම මහත්මීහු ඇතුළු පිරිසක් සහභාගී වූහ.
2026-11-20
පළමුවර කියවීම සඳහා පාර්ලිමේන්තුවට ඉදිරිපත් කර ඇති ආගමන පනත් කෙටුම්පතට රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාවේ අනුමතිය හිමි විය. එම පනත් කෙටුම්පත සම්බන්ධයෙන් ලබා දී ඇති ශ්රේෂ්ඨාධිකරණ තීරණයට අනුව, කාරක සභා අවස්ථාවේ සංශෝධනවලට යටත්ව මෙම අනුමතිය ලබා දීම සිදු විය. එම කාරක සභාව එහි ගරු පාර්ලිමේන්තු මන්ත්රී වෛද්ය නජිත් ඉන්දික මහතාගේ ප්රධානත්වයෙන් පසුගියදා (නොවැ. 18) පාර්ලිමේන්තුවේ දී රැස් වූ අවස්ථාවේදී ආගමන පනත් කෙටුම්පත පිළිබඳව සාකච්ඡා කෙරිණි. කාරක සභා සාමාජික මන්ත්රීවරු, මහජන ආරක්ෂක අමාත්යාංශයේ නිලධාරීහු, ආගමන හා විගමන දෙපාර්තමේන්තුවේ පාලක ජනරාල්වරයා ඇතුළු එම දෙපාර්තමේන්තුවේ නිලධාරීහු ද නීතිපති දෙපාර්තමේන්තුවේ සහ නීති කෙටුම්පත් දෙපාර්තමේන්තුවේ නියෝජිතයෝ ද මෙම රැස්වීමට සහභාගී වූහ.(351 වන අධිකාරිය වූ) ආගාමික හා විගාමික පනත සහ 1971 අංක 53 දරන විදේශ ගමන් බලපත්ර සහ පිටවීමේ අවසර පනත යන පනත් දෙකම ඉවත් කරමින්, වර්තමාන ජාත්යන්තර ප්රමිතීන්ට සහ නවීන තාක්ෂණයට ගැලපෙන පරිදි මෙම නව පනත හඳුන්වා දෙනු ලබන බවත් නිලධාරීහු මෙහිදී සඳහන් කළහ.මෙම පනත් කෙටුම්පත ශ්රේෂ්ඨාධිකරණය හමුවේ අභියෝගයට ලක් වීමෙන් අනතුරුව ශ්රේෂ්ඨාධිකරණය විසින් ලබා දුන් තීන්දු සහ සංශෝධන සියල්ල කෙටුම්පතට ඇතුළත් කර ඇති බවත්, විශේෂයෙන්ම, ජෛවමිතික තොරතුරු (Biometric Data) ලබා ගැනීමේදී සහ ගබඩා කිරීමේදී පෞද්ගලික දත්ත ආරක්ෂණ පනතට (Personal Data Protection Act) අනුකූල වන පරිදි නෛතික සුරක්ෂිතතාව තහවුරු කර ඇති බවත් නිලධාරීහු සඳහන් කළහ.එසේම පාලක, නියෝජ්ය පාලක සහ බලයලත් නිලධාරී වැනි පැරණි තනතුරු වෙනුවට පාලක ජනරාල්, අතිරේක පාලක ජනරාල් සහ ආගමන නිලධාරීන් ලෙස තනතුරු නාමයන් යාවත්කාලීන කර ඇති බව මෙහිදී නිලධාරීහු සඳහන් කළහ. එමෙන්ම, නීති විරෝධී ලෙස මෙරටට ඇතුළුවීම වැළැක්වීම සඳහා අවශ්ය අවස්ථාවලදී අමාත්යවරයාගේ ඉල්ලීම මත ජනාධිපතිවරයා විසින් ගැසට් නිවේදන මඟින් බලය පවරනු ලබන ත්රිවිධ හමුදා සහ වෙරළ ආරක්ෂක නිලධාරීන්ට (Coast Guard) ද සීමිත බලතල ක්රියාත්මක කිරීමට ප්රතිපාදන සලසා තිබේ.තවද, ශ්රී ලංකාවෙන් නීත්යානුකූලව පිටවී වෙනත් රටකදී ව්යාජ ගමන් බලපත්ර භාවිත කරමින් සිදු කරන මනුෂ්ය ජාවාරම් සහ සංවිධානාත්මක අපරාධ සම්බන්ධයෙන් මෙරට නීතිය යටතේ නඩු පැවරීමටත්, එවැනි සංවිධානාත්මක නීති විරෝධී ක්රියාවලට අදාළ නඩු මහාධිකරණය හමුවේ විභාග කිරීමටත් නව පනතින් බලතල පැවරේ. එසේම විදේශ ගමන් බලපත්රවල මුද්රා තැබීමකින් තොරව භාවිත කළ හැකි ස්වයංක්රීය ඉලෙක්ට්රොනික ද්වාර (E-Gates) ක්රියාත්මක කිරීම ඇතුළු තාක්ෂණික අවශ්යතා සදහා නෛතික රාමුව මෙමඟින් සපයා ඇති බවත් නිලධාරීහු සඳහන් කළහ.ශ්රී ලාංකිකයන් සමඟ විවාහ වන විදේශිකයන් සඳහා මෙරට වීසා ලබා දීමේදී ඇති නෛතික තත්ත්වයන් සහ ඊට අදාළ ගැටලු සම්බන්ධයෙන් ද මෙහිදී අවධානය යොමු විය.
2026-11-18
කෘෂිකර්ම දෙපාර්තමේන්තුවට අදාළ දිගුකාලීනව නිරවුල් නොවූ අත්තිකාරම් ගිණුම් හතරක කාරක පාඩු කපා හැරීම සඳහා එකඟතාවය ලබා දීම රජයේ ගිණුම් පිළිබඳ කාරක සභාව එහි සභාපති ගරු පාර්ලිමේන්තු මන්ත්රී කබීර් හෂීම් මහතාගේ සභාපතිත්වයෙන් ඊයේ (නොවැ. 17) පාර්ලිමේන්තුවේ දී රැස්වූ අවස්ථාවේදී සිදු විය.ඒ අනුව, 1996 වර්ෂයේදී අවසන් කරන ලද අර්තාපල් වගා ව්යාප්ත කිරීමේ වැඩසටහනට අදාළ අත්තිකාරම් ගිණුමේ රුපියල් මිලියන 23.97 ක පාඩුවක් ද, වැලිසර කෘෂිකාර්මික වැඩපළ මෙහෙයවීමේ අත්තිකාරම් ගිණුමේ රුපියල් මිලියන 5 ක පාඩුවක් ද, කෘෂිකාර්මික අලුත්වැඩියා වැඩපළ අත්තිකාරම් ගිණුමේ රුපියල් මිලියන 35.7 ක පාඩුවක් ද, නාරාහේන්පිට කෘෂිකාර්මික මධ්යම බඩු ගබඩාව පිළිබඳ අත්තිකාරම් ගිණුමේ රුපියල් 421,884 ක පාඩුවක් ද නිරවුල් කිරීම පිළිබඳව මෙහිදී සලකා බැලිණි.මෙම ගිණුම්වල දිගුකාලීනව පවතින පාඩු සහ ගිණුම් ශේෂයන්හි නොගැළපීම් නිරවුල් කිරීම සඳහා ඉදිරිපත් වූ කරුණු සලකා බැලූ කාරක සභාව, අදාළ ගිණුම්වල පාඩු කපා හැරීමට සහ ශේෂ වෙනස්කම් නිවැරදි කිරීමට එකඟතාව පළ කළේය.එමෙන්ම, මෙවැනි ගිණුම් ගැටලු අනාගතයේදී ඇති වීම වළක්වා ගැනීම සඳහා විධිමත් ගිණුම් පවත්වාගෙන යාම, නිසි විගණන ක්රියාවලියක් අනුගමනය කිරීම සහ මූල්ය පාලනය ශක්තිමත් කිරීමේ වැදගත්කම ද මෙහිදී අවධාරණය කෙරිණි.මෙම රැස්වීම සඳහා ගරු නියෝජ්ය අමාත්ය විශ්රාමික මේජර් ජෙනරාල් අරුණ ජයසේකර, ගරු මන්ත්රීවරයන් වන අජිත් පී. පෙරේරා, හෙක්ටර් අප්පුහාමි, නීතීඥ තුෂාරි ජයසිංහ, සුසන්ත කුමාර නවරත්න, ලාල් ප්රේමනාත්, ඔෂානි උමංගා, නීතීඥ සාගරිකා අතාවුද, කවීන්දිරන් කෝඩීස්වරන්, සුනිල් රත්නසිරි සහ රුවන්තිලක ජයකොඩි යන මහත්ම මහත්මීහු සහභාගී වූහ.
2026-11-18
ගම්පහ දිස්ත්රික් “සණස” සංගමයේ සිදුව ඇති මූල්ය අක්රමිකතා සහ තැන්පත්කරුවන්ගේ මුදල් ආපසු ගෙවීමට නොහැකි වීම සම්බන්ධයෙන් සාකච්ඡා කිරීම සඳහා රජයේ ගිණුම් පිළිබඳ කාරක සභාව විසින් පත් කරන ලද සමූපකාර ක්ෂේත්රයේ පවතින අර්බුදය සම්බන්ධයෙන් පරීක්ෂා කිරීම සඳහා වන අනු කාරක සභාව එහි සභාපති ගරු පාර්ලිමේන්තු මන්ත්රී රුවන්තිලක ජයකොඩි මහතාගේ සභාපතිත්වයෙන් පසුගියදා (නොවැ. 16) පාර්ලිමේන්තුවේ දී රැස් විය.ගම්පහ දිස්ත්රික් “සණස” සංගමයේ කළමනාකරණ දුර්වලතා පිළිබඳ විගණකාධිපති වාර්තාවේ කරුණු මෙහිදී විමර්ශනයට ලක් වූ අතර, සංගමයේ මුදල් අදාළ අනුමැතියකින් තොරව පෞද්ගලික ආයතනවල ආයෝජනය කිරීම හේතුවෙන් මතුව ඇති මූල්ය අර්බුදය පිළිබඳව දීර්ඝ ලෙස සාකච්ඡා කෙරිණි. එම ආයෝජන හේතුවෙන් සාමාජිකයන්ගේ මෙන්ම බාහිර තැන්පත්කරුවන්ගේ තැන්පතු මුදල් ආපසු ගෙවීමට නොහැකි තත්ත්වයක් උද්ගත වී ඇති බව මෙහිදී අනාවරණය විය.තවද, සමූපකාර දෙපාර්තමේන්තුවේ අධීක්ෂණ හා නියාමන ක්රියාවලියේ පැවති දුර්වලතා, සංගමයේ වත්කම් නිරවුල් කිරීමේ ගැටලු, අධිකරණ තහනම් නියෝග සහ අදාළ වගකිවයුතු පාර්ශ්වයන්ට එරෙහිව නීතිමය ක්රියාමාර්ග ගැනීමේ අවශ්යතාව පිළිබඳව ද සාකච්ඡා කෙරිණි.තැන්පත්කරුවන්ගේ මුදල් ආපසු ලබා දීම සඳහා සංගමය සතු වත්කම් තක්සේරු කර ඒවා විකිණීමේ හැකියාව සොයා බැලීම, අධිකරණය මඟින් පනවා ඇති වත්කම් බැහැර කිරීමේ තහනම් නියෝග ඉවත් කර ගැනීමට අවශ්ය පියවර ගැනීම සහ දැනට පවතින මුදල් තැන්පත්කරුවන් අතර සාධාරණ පදනමකින් බෙදා හැරීම පිළිබඳව ද මෙහිදී අවධානය යොමු විය.එමෙන්ම, අනුමත නොකළ ආයෝජන සිදුකිරීම සම්බන්ධයෙන් වගකිවයුතු හිටපු අධ්යක්ෂ මණ්ඩල සාමාජිකයන්ගෙන් අධිභාර අයකර ගැනීම, අදාළ පෞද්ගලික සමාගමට එරෙහිව නීතිමය ක්රියාමාර්ග ගැනීම සහ නිම නොකළ ව්යාපෘති අවසන් කර ඒවායින් ආදායම් උපයා ගැනීමේ හැකියාව පිළිබඳව ද සාකච්ඡා කෙරිණි.තැන්පත්කරුවන්ගේ මුළු තැන්පතු මුදල ආපසු ලබා දීම සඳහා පැහැදිලි හා ප්රායෝගික ක්රමවේදයක් ඉදිරිපත් කිරීමේ අවශ්යතාව අවධාරණය වූ අතර, ඉදිරි ක්රියාමාර්ග පිළිබඳව සමූපකාර සංවර්ධන දෙපාර්තමේන්තුවේ බස්නාහිර පළාත් සහ ගම්පහ දිස්ත්රික් නිලධාරීන් සමඟ ද මෙහිදී සාකච්ඡා සිදු විය.මෙම රැස්වීම සඳහා අනු කාරක සභාවේ ගරු මන්ත්රීවරයන් වන නීතීඥ තුෂාරි ජයසිංහ, ටී. කේ. ජයසුන්දර සහ සුසන්ත කුමාර නවරත්න යන මහත්ම මහත්මීහු සහභාගී වූහ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks


