2020-12-03
පුවත් කාණ්ඩ : කාරක සභා පුවත්
2018 වසරේ දේශීය ආදායම් බදු දෙපාර්තමේන්තුවේ මුළු හිඟ ආදායම රුපියල් ට්රිලියන 1.3 ක් බව ඊයේ (02) පාර්ලිමේන්තුවේදී අනාවරණය වූයේ රජයේ ගිණුම් පිළිබඳ කාරක සභාවේදී එහි සභාපති මහාචාර්ය තිස්ස විතාරණ මහතා කළ විමසීමකදීය.
මෙම හිඟ ආදායම්වලින් බහුතරය රාජ්ය ආයතන විසින් ගෙවියයුතු ඒවා බවද, එම සමහර ආයතන අදාළ බදු ගෙවීම සඳහා සුදුසු මූල්ය තත්ත්වයක දැනට නොසිටින බව ස්වාධීන මණ්ඩලයක් විසින් තීරණය කර ඇති බව ද මෙහිදී දේශීය ආදායම් බදු දෙපාර්තමේන්තු නිලධාරීන් විසින් සඳහන් කෙරිණි. එම ආයතන පිළිබඳව සම්පූර්ණ වාර්තාවක් ලබා දෙන ලෙස කමිටුව විසින් ආදායම් බදු දෙපාර්තමේන්තුව වෙත නිර්දේශයක් ලබා දෙන ලදි.
මෙම අතිවිශාල හිඟ බදු ආදායමට තවත් හේතුවක් ලෙස විගණාකාධීපති දෙපාර්තමේන්තුව විසින් පෙන්වා දී තිබුණේ , රුපියල් බිලියන 03 ක වටිනාකමින් යුතු චෙක් පත් 8060 ක චෙක්පත් අගරුවීම යි. ඒ සම්බන්ධව මේ වන විටද බදු ගෙවන්නන් 65 කගෙන් යුතු අසාධු ලේඛනයක් සකස් කර ඇති බව දේශීය ආදායම් බදු දෙපාර්තමේන්තු නිලධාරීහු කමිටුවට පෙන්වා දුන්හ.
පාර්ලිමේන්තුවේ රජයේ ගිණුම් කාරක සභාව හමුවට දේශීය ආදායම් බදු දෙපාර්තමේන්තුව ඊයේ කැඳවා තිබුණු අතර , එම රැස්වීමට අමාත්යවරුන් සහ මන්ත්රීවරුන් රැසක්ද සහභාගීව සිටියහ. මුදල් අමාත්යාංශ ලේකම් සහ භාණ්ඩාගාර ලේකම් එස් .ආර්. ආටිගල මහතා සම්බන්ධ වූ මෙම රැස්වීමට දේශීය ආදායම් බදු කොමසාරිස් සී.ජේ.පී. සිරිවර්ධන මහතා ඇතුළු එම දෙපාර්තමේන්තුවේ ඉහළ නිලධාරීන් ද, විගණාකාධීපති දෙපාර්තමේන්තුවේ ඉහළ නිලධාරීන් ද එක්ව සිටියහ.
2017 මුල් භාගයේ පටන් දේශීය ආදායම් බදු දෙපාර්තමේන්තුව බදු අය කිරීම වඩා විධිමත්කරණය සඳහා RAMIS නම් පරිගණකගත පද්ධතියක් යොදාගෙන ඇති අතර ආදායම් බදු, ලිපි ගොනු මඟින් අය කිරීමට වඩා සාර්ථකත්වයක් එයින් දෙපාර්තමේන්තුව ලබා ඇති බව මෙහිදී නිලධාරීන් විසින් සඳහන් කෙරීණි.
එසේ වුවද, ගරු මන්ත්රීවරයන් විසින් පෙන්වා දුන්නේ , රු.බිලියන 4 කට අධික මුදලක් වැය කර ස්ථාපිත කළ මෙම පද්ධතියට බදු සංශෝධනයක් සිදුවන සෑම අවස්ථාවකදීම එම තොරතුරු පද්ධතියට එක්කිරීමට සිංගප්පූරු සමාගමට තවත් රු .බිලියන 3 කට වැඩි මුදලක් ගෙවීමට සිදුවීම නිසා ගැටලුසහගත තත්ත්වයක් උද්ගත වන බවයි. එනිසා, බදු සංශෝධන පිළිබඳව එක්වර ගෙවීම් සිදුකිරීමට සමාගම හා කිසියම් නිශ්චිත එකඟතාවයකට පැමිණිය යුතු බව අමාත්ය දුමින්ද දිසානායක මහතා විසින් යෝජනා කෙරිණ.
මෙහිදී කරුණු පැහැදිලි කළ මුදල් අමාත්යාංශලේකම් සහ භාණ්ඩාගාර ලේකම් එස් .ආර්. ආටිගල මහතා මෙවර අයවැයෙන් වසර 05 ක අඛණ්ඩ, ස්ථාවර බදු ප්රතිපත්තියක් යෝජනා කරන ලද්දේ බදු ගෙවන්නන්ගේ මෙන්ම එකතු කරන්නන්ගේ ද ප්රායෝගික පහසුව සඳහා බව පෙන්වා දුන්නේය.
එසේම, දේශීය ආදායම් බදු කොමසාරිස් සී.ජේ.පී. සිරිවර්ධන මහතා කියා සිටියේ, කොවිඩ් සමයෙහි පවතින සීමා මධ්යයේ වුවද බදු ගෙවීම සඳහා මාර්ගගත පද්ධතියක් සහ 1944 විශේෂ දුරකථන සේවාවක් යොදා ගනිමින් බදු මඟින් දේශීය ආදායම වර්ධනය සඳහා සිය උපරිම උත්සාහය ගන්නා බවයි.
ගරු ආචාර්ය හරිනි අමරසූරිය මහත්මිය මෙහිදී කළ විමසීමකට අනුව , ආදායම් බදු කොමසාරිස්වරයා කියා සිටියේ දැනට මාර්ගගත පද්ධතිය භාවිත කර දෙපාර්තමේන්තුවට බදු ගෙවන්නන් සිටින්නේ 12%ක් පමණක් බවයි. මේ තත්ත්වය ශීඝ්රයෙන් ඉහළ නැංවීම සඳහා මෙවර අයවැයේ පටන් ව්යාපාර ක්ෂේත්රයේ (Cooperate Sector) බදු ගෙවන්නන්ට මාර්ගගත පද්ධතිය භාවිතය අනිවාර්ය කර ඇතැයි ද මුදල් අමාත්යාංශලේකම්වරයා මෙහිදී සඳහන් කළේය. කෙසේවෙතත් මෙරට බදු එකතු නොකරන ප්රමාණය 30%ක් පමණ වෙතැයි කමිටු සභාපති තිස්ස විතාරණ මහතා සඳහන් කළ මතය ද රට තුළ තිබෙන බවත් එම නිලධාරිහූ පිළිගත්හ.
එහිදී නිලධාරීන් කළ පැහැදිලි කිරීමට අනුව, ශ්රී ලංකාවේ මහා පරිමාණයේ බදු ගෙවන්නන් 2192 ක් සිටින අතර එයින් 532 ක් බදු ආදායමෙන් 70.2% ක් ගෙවීමට දායක වෙති.
මෙම රැස්වීමට, රාජ්ය අමාත්ය ලසන්ත අලගියවන්න, දුමින්ද දිසානායක මෙන්ම පාර්ලිමේන්තු මන්ත්රීවරයන් වන තිස්ස අත්තනායක, ගුණපාල රත්නසේකර, අකිල වලේබොඩ, වීරසුමන වීරසිංහ, මහාචාර්ය රංජිත් බණ්ඩාර, අජිත් රාජපක්ෂ, ශ්රිවඥානම් ශ්රීධරන් සහ හරිනි අමරසූරිය මහත්ම-මහත්මීන් සහභාගී වූහ.
2026-09-01
විවෘත පාර්ලිමේන්තු මුලාරම්භය සඳහා වන පාර්ලිමේන්තු සංසදය විසින් සංවිධානය කරනු ලබන “Voice to Policy” සංවාදමය ප්රාදේශීය වැඩසටහන් මාලාවේ තෙවැන්න මහනුවර දිස්ත්රික් තරුණ ප්රජාව සඳහා මේ මස 05 වැනිදා මහනුවර ‘ගෝල්ඩන් ක්රවුන්’ හෝටල් පරිශ්රයේදී පැවැත්වීමට නියමිතව තිබේ.තරුණ නියෝජිතයන්ගේ සහභාගීත්වයෙන් විවෘත පාර්ලිමේන්තු සංකල්පය තවදුරටත් ප්රවර්ධනය කිරීමේ අරමුණින් සංවිධානය කෙරෙන මෙම වැඩසටහන, විවෘත පාර්ලිමේන්තු මුලාරම්භය සඳහා වන පාර්ලිමේන්තු සංසදයේ සම සභාපතිවරුන් වන ගරු අමාත්ය මහාචාර්ය ක්රිෂාන්ත අබේසේන සහ ගරු පාර්ලිමේන්තු මන්ත්රී ෂානක්කියන් රාසමාණික්කම් යන මහත්වරුන්ගේ ප්රධානත්වයෙන් පැවැත්වේ. එසේම සංසදයේ සාමාජික මන්ත්රීවරු මෙන්ම මහනුවර දිස්ත්රික් පාර්ලිමේන්තු මන්ත්රීවරුන් ද මෙම අවස්ථාවට සහභාගී වීමට නියමිතය.මෙම වැඩමුළු මගීන් විශේෂයෙන් තරුණ ප්රජාව පාර්ලිමේන්තු කටයුතු, ව්යවස්ථාදායක ක්රියාවලිය සහ විවෘත පාර්ලිමේන්තු මූලධර්ම පිළිබඳ දැනුවත් කිරීම මෙන්ම, පාර්ලිමේන්තුව සහ පුරවැසියන් අතර සම්බන්ධතාව තවදුරටත් ශක්තිමත් කිරීම අපේක්ෂා කෙරේ.මෙම වැඩමුළුව සඳහා සහභාගීවීමට අපේක්ෂා කරන මහනුවර දිස්ත්රික්කයේ වයස අවු 18 – 35 අතර තරුණ තරුණියන් https://forms.gle/aVp5UzhLbtPSmVap8 සබැඳිය ඔස්සේ අදාළ පෝරමය සම්පූර්ණ කොට සැප්තැම්බර් 03 මධ්යහ්න 12.00ට පෙර ලියාපදිංචි විය විය යුතුය. එසේම සහභාගී වන්නන් කිසිදු දේශපාලන පක්ෂයක් හෝ ව්යාපාරයක් ප්රවර්ධනය කරන සංකේතවලින් තොර ඇඳුමින් සැරසී සිටිය යුතු වේ. CII (Coalition for Inclusive Impact) ආයතනයේ අනුග්රාහක දායකත්වයෙන් මෙම වැඩමුළු මාලාව සංවිධානය කෙරේ.
2026-08-25
මෙරට මැතිවරණ පද්ධතිය (පළාත් සභා හැර) වඩාත් කාර්යක්ෂම, විනිවිදභාවයෙන් යුතු සහ ජනතා අපේක්ෂාවන්ට ගැළපෙන පරිදි ප්රතිසංස්කරණය කිරීම සඳහා පත් කළ විශේෂඥ මණ්ඩලයේ ඉදිරි කටයුතු සම්බන්ධයෙන් සාකච්ඡා කිරීම සඳහා විශේෂ රැස්වීමක් පාර්ලිමේන්තුවේදී ඊයේ පැවැත්විණි.මැතිවරණ සම්බන්ධයෙන් වන නීති (පළාත් සභා ඡන්ද විමසීමට අදාළ නීති හැර) සමාලෝචනය කර පාර්ලිමේන්තුවට වාර්තා කිරීම සහ ඒ සම්බන්ධයෙන් යෝජනා හා නිර්දේශ ඉදිරිපත් කිරීම සඳහා පත් කළ පාර්ලිමේන්තු විශේෂ කාරක සභාවේ සභාපති, රාජ්ය පරිපාලන, පළාත් සභා සහ පළාත් පාලන ගරු අමාත්ය මහාචාර්ය ඒ.එච්.එම්.එච්. අබයරත්න මහතාගේ ප්රධානත්වයෙන් මෙම සාකච්ඡාව පැවැත්විණි. එහිදී විශේෂඥ මණ්ඩලයේ කාර්යභාරය, සමාලෝචනයට ලක් කළ යුතු කරුණු මෙන්ම ඉදිරි කටයුතු ක්රියාත්මක කළ යුතු ආකාරය පිළිබඳව ද දීර්ඝ වශයෙන් සාකච්ඡා කෙරිණි.මෙහිදී, මැතිවරණ ප්රතිසංස්කරණ සම්බන්ධයෙන් මහජනතාව සහ විවිධ සංවිධාන විසින් ඉදිරිපත් කර ඇති යෝජනා 31ක් ගැඹුරින් සමාලෝචනය කර, ඒ සම්බන්ධයෙන් අවශ්ය නිර්දේශ ඉදිරිපත් කිරීමට විශේෂඥ මණ්ඩලය කටයුතු කිරීමට නියමිතය. එම සමාලෝචන ක්රියාවලියේදී විශ්වවිද්යාල ප්රජාව සහ පර්යේෂණ ආයතන විසින් සිදු කර ඇති අදාළ අධ්යයන හා පර්යේෂණ ද සැලකිල්ලට ගැනීමට නියමිතය.මෙම සමාලෝචන ක්රියාවලිය සඳහා මාස දෙකක කාලයක් ලබා දී ඇති අතර, එහිදී පවතින මැතිවරණ ක්රමයේ අඩුපාඩු හඳුනා ගැනීම මෙන්ම, අවශ්යතාව පවතින්නේ නම් වඩාත් සාධනීය ලක්ෂණ සහිත නව මැතිවරණ ක්රමවේදයක් හා මැතිවරණ සංස්කෘතියක් ගොඩනැඟීම සඳහා අවශ්ය නිර්දේශ ඉදිරිපත් කිරීම කෙරෙහි අවධානය යොමු කිරීමට නියමිතය.ඒ අනුව, කාරක සභාවේ අවසන් අරමුණ වන්නේ පවතින ක්රමවේදයට සංශෝධන කිහිපයක් එක් කිරීම පමණක් නොව, වර්තමාන අවශ්යතා සහ ජනතා අපේක්ෂාවන්ට ගැළපෙන වඩාත් විශ්වාසනීය, ප්රජාතන්ත්රවාදී සහ කාර්යක්ෂම මැතිවරණ පද්ධතියක් සඳහා අවශ්ය ප්රතිපත්තිමය හා නීතිමය නිර්දේශ සහිත වාර්තාවක් පාර්ලිමේන්තුවට ඉදිරිපත් කිරීමයි.මෙම රැස්වීමට කාරක සභා සාමාජික ගරු පාර්ලිමේන්තු මන්ත්රීවරුන් වන රුවන්තිලක ජයකොඩි, නීතිඥ තුෂාරි ජයසිංහ සහ චන්දිම හෙට්ටිආරච්චි යන මහත්ම මහත්මීහු සහභාගී වූහ.
2026-08-25
තැපැල් දෙපාර්තමේන්තුවේ 2004 වර්ෂයේ සිට 2025 වර්ෂය දක්වා සිදුව ඇති මූල්ය වංචා සහ විනය විරෝධී ක්රියා සම්බන්ධයෙන් සිදු කෙරෙන විමර්ශනවල ප්රගතිය පිළිබඳව රජයේ ගිණුම් පිළිබඳ කාරක සභාවේදී (COPA විශේෂ අවධානය යොමු කෙරිණි. ඒ රජයේ ගිණුම් පිළිබඳ කාරක සභාව (COPA) විසින් 2026 අප්රේල් 07 වැනිදා ලබා දුන් නිර්දේශ ක්රියාත්මක කිරීමේ ප්රගතිය සහ තැපැල් දෙපාර්තමේන්තුවේ වර්තමාන කාර්යසාධනය පිළිබඳව විමර්ශනය කිරීම සඳහා එම කාරක සභාව එහි සභාපති ගරු පාර්ලිමේන්තු මන්ත්රී කබීර් හෂීම් මහතාගේ ප්රධානත්වයෙන් පසුගිය 20 වැනිදා පාර්ලිමේන්තුවේදී රැස් වූ අවස්ථාවේදීය.විමර්ශන කටයුතු වඩාත් විධිමත් කිරීම සඳහා නව පරිගණකගත මෘදුකාංග පද්ධතියක් හඳුන්වා දී ඇති බවත්, ඒ මඟින් විමර්ශන ගොනු පිළිබඳ තොරතුරු යාවත්කාලීන කර ඒවායේ ප්රගතිය අධීක්ෂණය කිරීමට කටයුතු කර ඇති බවත් මෙහිදී අනාවරණය විය. සුළු ස්වභාවයේ සිදුවීම් වෙනුවෙන් දීර්ඝ විමර්ශන පවත්වා සම්පත් වැය කිරීම වෙනුවට, වැදගත් මූල්ය වංචා සහ බරපතළ විනය විරෝධී ක්රියා සම්බන්ධයෙන් ප්රමුඛතාව ලබා දී විමර්ශන කඩිනම් කිරීමේ අවශ්යතාව කාරක සභාව අවධාරණය කළේය.තවද, ඇතැම් විමර්ශන වසර ගණනාවක් තිස්සේ අවසන් නොවීම, චෝදනා ලැබූ ඇතැම් පුද්ගලයන් අතුරුදන් වීම හෝ මියයාම හෝ, ඇතැම් සිද්ධීන් සම්බන්ධයෙන් නීතිමය ක්රියාමාර්ග ප්රමාද වීම සහ විමර්ශන අංශයේ පවතින මානව සම්පත් හිඟය පිළිබඳව ද මෙහිදී සාකච්ඡා කෙරිණි.මූල්ය වංචා සම්බන්ධයෙන් චෝදනා එල්ල වී ඇති නිලධාරීන්ට එරෙහි විමර්ශන සහ විනය ක්රියාමාර්ග නියමිත කාලසීමාවක් තුළ අවසන් කිරීමේ අවශ්යතාව ද කාරක සභාව අවධාරණය කළේය. එමෙන්ම, විමර්ශන අවසන් කර අදාළ වගකිවයුතු පාර්ශ්වයන්ගෙන් අලාභ අයකර ගැනීම සඳහා ගත යුතු ක්රියාමාර්ග කඩිනම් කරන ලෙස ද උපදෙස් ලබා දෙන ලදී.තැපැල් දෙපාර්තමේන්තුවේ මූල්ය පාලනය සහ අභ්යන්තර පාලන ක්රමවේද තවදුරටත් ශක්තිමත් කිරීමේ අවශ්යතාව පිළිබඳව ද කාරක සභාවේ අවධානය යොමු විය.මේ අතර, තැපැල් දෙපාර්තමේන්තුවේ අතිකාල දීමනා කළමනාකරණය විධිමත් කිරීම සම්බන්ධයෙන් ද මෙහිදී සාකච්ඡා කෙරිණි. කළමනාකරණ සේවා දෙපාර්තමේන්තුව මඟින් පළාත් නවයම සහ මධ්යම තැපැල් හුවමාරුව ආවරණය වන පරිදි සිදු කළ වැඩ අධ්යයනය මත පදනම්ව ප්රශස්ත සේවක සංඛ්යාවක් (Optimum Cadre) හඳුන්වා දීමට කටයුතු කරන බව නිලධාරීහු පැවසූහ.අතිකාල දීමනා ගෙවීමේදී සේවක පැමිණීම නිවැරදිව තහවුරු කිරීම සඳහා ඇඟිලි සලකුණු යන්ත්ර භාවිතයට ගෙන ඇති බවත්, ඉදිරියේදී එම දත්ත පදනම් කර ගනිමින් අතිකාල දීමනා ගෙවීම් වඩාත් විධිමත් කිරීමට කටයුතු කරන බවත් මෙහිදී සඳහන් විය.තැපැල් සේවාව නවීකරණය කිරීම සහ ඩිජිටල්කරණය කිරීම පිළිබඳව ද කාරක සභාවේ අවධානය යොමු වූ අතර, Speed Post, Cash on Delivery සහ International Courier වැනි අගය එකතු කළ සේවාවන් තවදුරටත් පුළුල් කිරීම, තැපැල් බැංකු සේවා ඩිජිටල්කරණය කිරීම සහ නව තාක්ෂණය ඔස්සේ තැපැල් දෙපාර්තමේන්තුවේ ආදායම් වර්ධනය කිරීමේ වැඩපිළිවෙළ පිළිබඳව සාකච්ඡා කෙරිණි.එමෙන්ම, තැපැල් දෙපාර්තමේන්තුව සතු උපතැපැල් කාර්යාල ජාලය ප්රතිව්යුහගත කිරීමේදී ජනතාවට අත්යවශ්ය සේවාවන් සැපයෙන දුෂ්කර ප්රදේශවල උපතැපැල් කාර්යාල වසා දැමීමකින් තොරව පවත්වාගෙන යාමේ වැදගත්කම ද මෙහිදී අවධාරණය කෙරිණි.මෙම රැස්වීම සඳහා කාරක සභා සාමාජික ගරු නියෝජ්ය අමාත්ය නලීන් හේවගේ, කාරක සභා සාමාජික ගරු මන්ත්රීවරයන් වන චානක මාදුගොඩ, ඔෂානි උමංගා, නීතීඥ සාගරිකා අතාවුද, මංජුල සුරවීරආරච්චි, චන්දන සූරියආරච්චි, අජන්ත ගම්මැද්දගේ, ලාල් ප්රේමනාත්, රුවන්තිලක ජයකොඩි සහ සුනිල් රත්නසිරි යන මහත්ම මහත්මීහු සහභාගී වූහ.
2026-08-24
බන්ධනාගාරවල පවතින තදබදය අවම කිරීම සඳහා ගත හැකි ක්රියාමාර්ග පිළිබඳව පොලිස් දෙපාර්තමේන්තුවේ අදහස් හා යෝජනා ලබා ගැනීම කෙරෙහි රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාවේ අවධානය යොමු විය.එම කාරක සභා සභාපති ගරු පාර්ලිමේන්තු මන්ත්රී වෛද්ය නජිත් ඉන්දික මහතාගේ ප්රධානත්වයෙන් පාර්ලිමේන්තුවේදී පසුගිය දා පැවති මෙම රැස්වීමේදී, විශේෂයෙන් මත්ද්රව්ය සම්බන්ධයෙන් අත්අඩංගුවට ගැනීමේ සිට නඩු පැවරීම දක්වා පොලිස් දෙපාර්තමේන්තුවේ ක්රියාවලිය මෙන්ම, ඒ සඳහා පවතින නෛතික බාධා ඉවත් කිරීම සම්බන්ධයෙන් ද සාකච්ඡා කෙරිණි.එහිදී මත්ද්රව්ය සම්බන්ධ නඩු කටයුතු ප්රමාද වීම, රජයේ රස පරීක්ෂක වාර්තා ලබාගැනීමේ ප්රමාදයන් සහ එමගින් රක්ෂිත බන්ධනාගාරගතව සිටින සැකකරුවන්ගේ සංඛ්යාව ඉහළ යාම පිළිබඳව ද අවධානය යොමු විය.මත්ද්රව්ය මර්දනයේදී පුද්ගලයන් අත්අඩංගුවට ගැනීම පමණක් නොව, මත්ද්රව්ය ජාවාරම් ජාල සහ ඒවාට සම්බන්ධ නීති විරෝධී මූල්ය ගනුදෙනු හඳුනාගෙන පාලනය කිරීම සඳහා නවීන තාක්ෂණය භාවිත කිරීමේ අවශ්යතාව ද මෙහිදී අවධාරණය කෙරිණි. එමෙන්ම දුරකථන සමාගම් මගින් ක්රියාත්මක කරනු ලබන ඩිජිටල් මුදල් හුවමාරු ක්රම මත්ද්රව්ය ජාවාරම්කරුවන් විසින් නීති විරෝධී මූල්ය ගනුදෙනු සඳහා අවභාවිත කිරීම වැළැක්වීම සඳහා සුදුසු නියාමන ක්රමවේද හඳුන්වා දීමේ අවශ්යතාව ද මෙහිදී පෙන්වා දෙන ලදී.තවද, මත්ද්රව්යවලට ඇබ්බැහි වූ පුද්ගලයන් සම්බන්ධයෙන් බන්ධනාගාරගත කිරීම වෙනුවට ප්රජාමූලික පුනරුත්ථාපන වැඩපිළිවෙළක් ශක්තිමත් කිරීම, අපරාධ වැළැක්වීම සඳහා මහජන සහභාගිත්වය වැඩිදියුණු කිරීම සහ පවතින නීති කාලීන අවශ්යතාවන්ට ගැළපෙන පරිදි සංශෝධනය කිරීමේ අවශ්යතාව ද සාකච්ඡාවට ලක් විය.එමෙන්ම, අපරාධ විමර්ශන කටයුතු කඩිනම් කිරීම සඳහා පොලිස් දෙපාර්තමේන්තුව තුළ නවීන අධිකරණ වෛද්ය විද්යාගාරයක් (Forensic Laboratory) ස්ථාපිත කිරීමේ අවශ්යතාව පිළිබඳව ද අදහස් ඉදිරිපත් විය. විද්යාත්මක සාක්ෂි විශ්ලේෂණය කඩිනම් කිරීම මඟින් නඩු කටයුතු වේගවත් කර බන්ධනාගාර තදබදය අවම කිරීමට හැකි වනු ඇති බව ද මෙහිදී පෙන්වා දෙන ලදී.මීට අමතරව, පොලිස් නිලධාරීන්ගේ සුබසාධනය, වෘත්තීය පුහුණුව සහ විමර්ශන කුසලතා ඉහළ නැංවීම මෙන්ම පොලිස් කාර්ය සාධනය ඇගයීමේ ක්රමවේද වැඩිදියුණු කිරීම පිළිබඳව ද අවධානය යොමු විය.මෙම කාරක සභා රැස්වීමට කාරක සභා සාමාජික ගරු පාර්ලිමේන්තු මන්ත්රීවරුන් වන අජිත් පී. පෙරේරා, ජී.ජී. පොන්නම්බලම්, මුජිබුර් රහුමාන්, එම්.කේ.එම්. අස්ලම්, වෛද්ය සෙල්ලතම්බි තිලකනාදන්, ධර්මප්රිය විජේසිංහ චන්දන සූරියආරච්චි සහ මේජර් ජෙනරාල් (විශ්රාමික) ජී.ඩී. සූරියබණ්ඩාර යන මහත්වරුන් සහභාගි වූ අතර මහජන ආරක්ෂක හා පාර්ලිමේන්තු කටයුතු අමාත්යාංශයේ ලේකම් ඩී.ඩබ්ලිව්.ආර්.බී. සෙනෙවිරත්න මහතා සහ පොලිස්පති නීතිඥ ප්රියන්ත වීරසූරිය මහතා ඇතුළු පොලිස් දෙපාර්තමේන්තුවේ ජ්යෙෂ්ඨ නිලධාරීහු පිරිසක් ද මෙම අවස්ථාවට එක්ව සිටියහ.
පාර්ලිමේන්තු අත්පොත
ශ්රී ලංකාවේ මැතිවරණ ක්රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
