ගරු චමින්ද ලලිත් කුමාර මහතා,— ග්‍රාමීය සංවර්ධන, සමාජ ආරක්ෂණ සහ ප්‍රජා සවිබලගැන්වීම් අමාත්‍යතුමාගෙන් ඇසීමට,— (1)
(අ) (i) සමාජ ආරක්ෂණ මණ්ඩලය පිහිටුවීමේ අරමුණු කවරේද;
(ii) එම මණ්ඩලය මඟින් ක්‍රියාත්මක කරනු ලබන දායක විශ්‍රාම වැටුප් ක්‍රම සංඛ්‍යාව කොපමණද;
(iii) එම විශ්‍රාම වැටුප් ක්‍රම කවරේද;
(iv) එම එක් එක් විශ්‍රාම වැටුප් ක්‍රම සඳහා මේ දක්වා දායකවී ඇති පුද්ගලයන් සංඛ්‍යාව කොපමණද;
(v) එලෙස දායකවී ඇති පුද්ගලයන් අතරින් මේ වනවිට විශ්‍රාම වැටුප් ලබන පුද්ගලයන් සංඛ්‍යාව කොපමණද;
යන්න එතුමා මෙම සභාවට දන්වන්නෙහිද?
(ආ) නොඑසේ නම්, ඒ මන්ද?
අසන ලද දිනය
2026-09-25
අසන ලද්දේ
ගරු චමින්ද ලලිත් කුමාර මහතා, පා.ම.
අමාත්‍යාංශය
ග්‍රාමීය සංවර්ධන, සමාජ ආරක්ෂණ සහ ප්‍රජා සවිබලගැන්වීම්
ව්‍යවස්ථාදායකය
ශ්‍රී ලංකා ප්‍රජාතාන්ත්‍රික සමාජවාදී ජනරජයේ දසවැනි පාර්ලිමේන්තුව
සභාවාරය
1 වැනි සභාවාරය
(අ) (i) 1999 අංක 33 දරන පනතින් සංශෝධනයට ලක්වූ 1996 අංක 17 දරන සමාජ ආරක්ෂණ මණ්ඩලය පනත මඟින් පිහිටුවා ඇති ශ්‍රී ලංකා සමාජ ආරක්ෂණ මණ්ඩලයේ අරමුණ, ධීවර හා කෘෂිකර්ම නොවන අංශවල ස්වයං රැකියාවල නියුතු තැනැත්තන් සඳහා විශ්‍රාම වැටුපක් හා සමාජ ආරක්ෂණ ප්‍රතිලාභ යෝජනා ක්‍රමයක් පිහිටුවීම සහ එම යෝජනා ක්‍රමය පරිපාලනය කිරීම හා කළමනාකරණය කිරීම වේ.
(ii) ප්‍රධාන වශයෙන් දැනට යෝජනා ක්‍රම 2ක් ක්‍රියාත්මක වෙනවා. මීට කලින් යෝජනා ක්‍රම කිහිපයක් ක්‍රියාත්මක වුවත්, 2012 වර්ෂයේදී ඒවා අත්හිටුවා තිබෙනවා.
(iii) ප්‍රධාන විශ්‍රාම වැටුප් ක්‍රම දෙකකි.
1. "සුරැකුම" විශ්‍රාම වැටුප් යෝජනා ක්‍රමය
වයස අවුරුදු 18-59 අතර තැනැත්තන් සඳහා ක්‍රියාත්මක වන අතර, අවිධිමත් අංශයේ සේවයේ නියුතු රාජ්‍ය විශ්‍රාම වැටුපක් නොලබන සියලු ප්‍රජාව වෙත ක්‍රියාත්මක කරනු ලබනවා. ඒ වාගේම, විශේෂ ඉලක්කගත කණ්ඩායම් වෙනුවෙන් ඔවුන්ගේ අවශ්‍යතා අනුව පහත සඳහන් විශ්‍රාම වැටුප් ක්‍රම තුන "සුරැකුම" විශ්‍රාම වැටුප් යෝජනා ක්‍රමය යටතේ අපි හඳුන්වා දී තිබෙනවා.
2. "ආරස්සාව" පූර්ව විශ්‍රාම වැටුප් යෝජනා ක්‍රමය
වයස අවුරුදු 17 දක්වා වන දරුවන් වෙනුවෙන් හඳුන්වා දී ඇති පූර්ව සැලසුම් විශ්‍රාම වැටුප් යෝජනා ක්‍රමයකි. මේ යටතේ දෙමව්පිය/ භාරකරුවන්ගේ භාරකාරත්වය යටතේ දරුවන් සාමාජික කරන්න පුළුවන්. වයස අවුරුදු 18 වන විට ගිණුම කල් පිරෙනවා. කල් පිරුණු ගිණුමේ ශේෂය පදනම් කරගෙන "සුරැකුම" විශ්‍රාම වැටුප් යෝජනා ක්‍රමයට එකවර මුදල් ගෙවූ දායකයෙකු ලෙස අන්තර්ග්‍රහණය කරනවා.
(iv) "සුරැකුම" විශ්‍රාම වැටුප් යෝජනා ක්‍රමය සඳහා මේ වන කොට සාමාජික සංඛ්‍යාව 106,532ක් දායක වෙලා තිබෙනවා. ඒ වාගේම "ආරස්සාව" විශ්‍රාම වැටුප් යෝජනා ක්‍රමය සඳහා සාමාජික සංඛ්‍යාව 551,549යි. සම්පූර්ණ ගණන 658,081යි.
(v) 2026 ජූලි මාසය වන විට විශ්‍රාම වැටුප් ලබන පුද්ගලයන් සංඛ්‍යාව 37,474යි. 2026 ජූලි මාසය සඳහා රුපියල් 39,000,5000.00ක් - දළ වශයෙන් මිලියන තිස්නවයක් - ඒ අයගේ විශ්‍රාම වැටුප් වෙනුවෙන් ගෙවා තිබෙනවා.
(ආ) අදාළ නොවේ.
පිළිතුරු දුන් දිනය
2026-09-25
විසින් පිළිතුරු දෙන ලදී
ගරු (ආචාර්ය) උපාලි පන්නිලගේ මහතා, පා.ම.
පාර්ලිමේන්තු අත්පොත
ශ්‍රී ලංකාවේ මැතිවරණ ක්‍රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්‍රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
