ගරු හෙක්ටර් අප්පුහාමි මහතා,— කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යතුමාගෙන් ඇසීමට,— (1)
(අ) (i) ඉඩම් ප්‍රතිසංස්කරණ කොමිෂන් සභාව සතු ඉඩම් ‘බැහැර නොකරන ලෙස’ දන්වමින් ජනාධිපති ජ්‍යෙෂ්ඨ සහකාර ලේකම්වරයකු විසින් කොමිෂන් සභාව වෙත ලිපියක් යොමු කරන ලද දිනය කවරේද;
(ii) එම ලිපිය ලැබීමෙන් පසුවද ඉඩම් බැහැර කර ඇති බව දන්නේද;
(iii) එසේ නම්, එම බැහැර කොට ඇති ඉඩම් ප්‍රමාණය කොපමණද;
(iv) එලෙස ඉඩම් බැහැර කිරීමට හේතුව කවරේද;
(v) එම ඉඩම් ලබාදී ඇති පුද්ගලයන්ගේ නම් කවරේද;
(vi) කොමිෂන් සභාව සතු ඉඩම් නිසි නියාමනයකට ලක්කිරීමට ගනු ලබන ක්‍රියාමාර්ග කවරේද;
යන්න එතුමා මෙම සභාවට දන්වන්නෙහිද?
(ආ) නොඑසේ නම්, ඒ මන්ද?
අසන ලද දිනය
2026-07-22
අසන ලද්දේ
ගරු හෙක්ටර් අප්පුහාමි මහතා, පා.ම.
අමාත්‍යාංශය
කෘෂිකර්ම, පශු සම්පත්, ඉඩම් සහ වාරිමාර්ග
ව්‍යවස්ථාදායකය
ශ්‍රී ලංකා ප්‍රජාතාන්ත්‍රික සමාජවාදී ජනරජයේ දසවැනි පාර්ලිමේන්තුව
සභාවාරය
1 වැනි සභාවාරය
(අ) (i) 2023.05.25
(ii) ඔව්.
(iii) 2023 වර්ෂයේ සිට විකිණීම් හා බදු දීම් වශයෙන් බැහැර කරන ලද මුළු ඉඩම් ප්‍රමාණය අක්කර 1,581 රූඩ් 1 පර්චස් 9.95කි.
(iv) 2023.05.25 දිනැති ලිපියට ප්‍රතිචාරව ඔප්පු ඉල්ලා නිතර නිතර මහජන විමසීම් ඉදිරිපත් වීම හේතු කොටගෙන ඉඩම් ප්‍රතිසංස්කරණ කොමිෂන් සභාව විසින් 2023.06.02 දින මහජනතාව වෙත ඔප්පු ලබා දීම සඳහා ගත යුතු ක්‍රියාමාර්ග පිළිබඳ උපදෙස් විමසා ජනාධිපති ලේකම් වෙත ලිපියක් යොමු කර ඇත.
ඒ අනුව එවකට විෂය භාර ගරු ඉඩම් අමාත්‍යතුමා විසින් හිටපු ජනාධිපතිතුමා සමඟ කරන ලද සාකච්ඡාවේදී ඔප්පු ලබා දීම සඳහා අවශ්‍ය පියවර ගන්නා ලෙස උපදෙස් ලබා දුන් බවත්, ඒ බව 2023.08.02 දිනැති ලිපිය මඟින් ඉඩම් ප්‍රතිසංස්කරණ කොමිෂන් සභාවටද පිටපත් සහිතව අමාත්‍යාංශ ලේකම්තුමා වෙත දන්වා ඇත.
තවද, අමාත්‍යාංශ ලේකම් විසින් 2023.08.18 දිනැතිව ඉඩම් ප්‍රතිසංස්කරණ කොමිෂන් සභාව සතු ඉඩම්වල පදිංචිව හා භුක්ති විඳිමින් සිටි තැනැත්තන් වෙත ඔප්පු ලබා දීමට පියවර ගන්නා ලෙස ඉඩම් ප්‍රතිසංස්කරණ කොමිෂන් සභාව වෙත උපදෙස් ලබා දී ඇත.
ඒ අනුව ඉඩම් ප්‍රතිසංස්කරණ කොමිෂන් සභාවේ අනුමැතිය ලබා ගැනීමෙන් පසු විෂය භාර අමාත්‍යවරයාගේ අනුමැතියට යටත්ව ඉඩම් ප්‍රතිසංස්කරණ පනතේ ඇති ප්‍රතිපාදන ප්‍රකාරව බැහැර කර ඇත.
(v) අදාළ ලේඛනය CD තැටියක් මඟින් ඉදිරිපත් කරමි. එම CD තැටිය සභාගත* කරමි.
(vi) ඉඩම් ප්‍රතිසංස්කරණ කොමිෂන් සභාවේ ප්‍රාදේශීය කාර්යාල 20ක් මඟින් ඒ ඒ දිස්ත්‍රික්කවලට අදාළ කටයුතු නියාමනය කරනු ලබන අතර, පාලන චක්‍රලේඛ අංක 2024/03 හා 2024/03 සංශෝධන 02 පරිදි ඉඩම් බැහැර කිරීම සිදු කරයි.
(ආ) අදාළ නොවේ.
පිළිතුරු දුන් දිනය
2026-09-22
විසින් පිළිතුරු දෙන ලදී
ගරු අරවින්ද සෙනරත් මහතා, පා.ම.
පාර්ලිමේන්තු අත්පොත
ශ්‍රී ලංකාවේ මැතිවරණ ක්‍රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්‍රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
