2025-02-28
கொழும்பு மாநகரசபைக்குச் சொந்தமான பொரள்ளை மயானத்தின் உத்தியோகபூர்வ விடுதியை மோசடியாகப் பயன்படுத்தி கொழும்பு மாநகரசபையின் ஊழியர் ஒருவர் மலர்சாலையொன்றை நடத்தி வந்தமை அரசாங்கக் கணக்குகள் பற்றிய குழுவின் (கோபா குழு) விசாரணைகளில் தெரியவந்தது.
அரசாங்கக் கணக்குகள் பற்றிய குழு கடந்த பெப்ரவரி 25 மற்றும் 27ஆம் திகதிகளில் கௌரவ பாராளுமன்ற உறுப்பினர் அரவிந்த செனரத் அவர்களின் தலைமையில் கூடியபோது இடம்பெற்ற விசாரணைகளிலேயே இந்த விடயம் வெளிப்பட்டது. இந்த இரு தினங்களிலும் கொழும்பு மாநகரசபையின் 2022 மற்றும் 2023ஆம் ஆண்டுக்கான கணக்காய்வாளர் நாயகத்தின் அறிக்கை குறித்து ஆராய்வதற்காக அதிகாரிகள் அழைக்கப்பட்டிருந்தனர்.
பொரள்ளை மயானத்திற்குச் சொந்தமான காணியில் அனுமதி பெறப்படாத கட்டடத்தில் சட்டவிரோதமான முறையில் வர்த்தகச் செயற்பாடு முன்னெடுக்கப்படுகின்றமை தொடர்பில் கொழும்பு மாநகரசபை எந்தவிதமான நடவடிக்கையும் எடுக்கவில்லையென கணக்காய்வாளர் நாயகம் முதலாவது நாளில் சுட்டிக்காட்டினார். 2023.07.06ஆம் திகதிக்கு முன்னர் இது தொடர்பில் எடுக்கப்பட்ட நடவடிக்கைகள் மற்றும் குறித்த கட்டடத்தை மீண்டும் கொழும்பு மாநகரசபைக்குப் பெற்றுக்கொள்வது உள்ளிட்ட அறிவுறுத்தல் உள்ளடங்கலான அறிக்கையை குழுவிடம் சமர்ப்பிக்குமாறு இதற்கு முன்னர் கூடிய அரசாங்க கணக்குகள் பற்றிய குழுவினால் பணிப்புரை விடுக்கப்பட்டிருந்தது. இதற்கு அமைய கொழும்பு மாநகரசபையினால் அறிக்கையொன்று சமர்ப்பிக்கப்பட்டிருந்தாலும் கட்டடத்தை மீளப் பெற்றுக்கொள்ளும் விடயத்தில் முன்னேற்றம் பற்றி எதுவும் அதில் குறிப்பிடப்பட்டிருக்கவில்லை.
மாநகரசபையில் பணியாற்றும் ஊழியர் ஒருவர் பொரள்ளை மயானத்திற்குச் சொந்தமான உத்தியோகபூர்வ விடுதி மற்றும் அதற்கான காணியை சட்டவிரோதமாகப் பயன்படுத்தி முன்னெடுத்துவரும் வியாபார நடவடிக்கை குறித்து அதிகாரிகள் குழுவுக்கு விளக்கமளித்தனர். குறித்த ஊழியர் இதற்கு முன்னர் பணியிடைநிறுத்தம் செய்யப்பட்டு பின்னர் மீண்டும் சேவையில் சேர்த்துக்கொள்ளப்பட்ட நபர் என்றும் அவர்கள் தெரிவித்தனர். இந்த மலர்சாலை கொழும்பு நகரில் அமைக்கப்பட்டுள்ள மலர்சாலையாகப் பதிவுசெய்யப்பட்டுள்ளதா என குழுவின் தலைவர் அதிகாரிகளிடம் கேள்வியெழுப்பினார். மலர்சாலையை நடத்திச் செல்வதற்கான அனுமதி பெறப்படாது சட்டவிரோதமாக முன்னெடுக்கப்படும் மலர்சாலையாக இருந்தபோதும், கம்பனிகள் பதிவாளர் திணைக்களத்தின் கீழ் வியாபார நிறுவனமாகப் பதிவுசெய்யப்பட்டுள்ளதாக அதிகாரிகள் பதிலளித்தனர். எனினும், சுற்றுச்சூழல் அறிக்கை இன்றி மலர்சாலையை எவ்வாறு நடத்திச் செல்ல முடியும் என குழுவின் தலைவர் கேள்வியெழுப்பினார். எனினும், அவ்வாறு அனுமதி பெறாமல் இயங்க முடியாது என அதிகாரிகள் சுட்டிக்காட்டினர். எனவே, சட்டவிரோதமாக நடத்திச் செல்லப்படும் இந்த மலர்சாலையைத் தடைசெய்ய நடவடிக்கை எடுக்குமாறு குழுவினால் அறிவுறுத்தப்பட்டது.
கோபா குழுவில் ஆஜராகியிருந்த கொழும்பு மாநகரசபையின் அப்போதைய மாநகர ஆணையாளர் குறித்த சட்டவிரோத மலர்சாலை தொடர்பில் தன்னிடமிருந்த தகவல்களை குழுவில் சமர்ப்பித்தார். இந்தத் தகவலின் அடிப்படையில் குறித்த மலர்சாலை 1994ஆம் ஆண்டு முதல் நடத்திவரப்படுகின்றமை புலப்பட்டது. போலியான ஆவணங்களைச் சமர்ப்பித்து குறித்த மலர்சாலை மற்றும் அதன் காணியின் உரிமையைப் பெற்றுக்கொள்ள சம்பந்தப்பட்ட ஊழியர் எடுத்த முயற்சி தோல்வியடைந்திருப்பதாகவும், இது தொடர்பில் தான் மீண்டும் மீண்டும் நடவடிக்கை எடுத்தமையால் உயிர் அச்சுறுத்தலுக்குக் கூட எதிர்கொள்ள நேர்ந்ததாகவும் அவர் குழுவில் தெரிவித்தார்.
இந்தச் சட்டவிரோத நடவடிக்கை பகிரங்கமாக மேற்கொள்ளப்பட்டது எனச் சுட்டிக்காட்டிய முன்னாள் மாநகர ஆணையாளர், 1994 முதல் 2020 வரையான காலப்பகுதியில் குறித்த கட்டடம் மற்றும் காணி மோசடியாகப் பயன்படுத்தப்பட்டமையால் கொழும்பு மாநகரசபைக்கு 41 மில்லியன் ரூபா நஷ்டம் ஏற்பட்டிருப்பதாகவும் சுட்டிக்காட்டினார். அத்துடன், அரசாங்க ஊழியர் வியாபாரா நடவடிக்கைகளில் ஈடுபடுவது சட்டவிரோதம் என்பதால் அவ்வப்போது குறித்த மலர்ச்சாலையின் பெயரை மோசடியாக மாற்றுவதாகவும் அவர் மேலும் தெரிவித்தார். குறித்த மலர்ச்சாலையை நடத்திச்செல்லும் கொழும்பு மாநகரசபை ஊழியர், கொவிட் தொற்றுநோய் காலப் பகுதியில் உயிரிழந்தவரின் உடலை அடக்கம் செய்வதற்கு 6 இலட்சம் ரூபாவை இலஞ்சமாகக் கேட்டமை மற்றும் பொரள்ளை பொது மயானத்தினால் வழங்கப்படும் பற்றுச்சீட்டை மோசடியான முறையில் வழங்கியமைக்காக குற்றஞ்சாட்டப்பட்ட நபர் என்றும் குழுவில் தெரியவந்தது.
நீண்ட காலமாக மேற்கொள்ளப்படும் இந்த மோசடியான நடவடிக்கை தனி ஒரு நபரினால் மாத்திர மேற்கொள்ளக் கூடியது அல்ல என்றும் இதன் பின்னணியில் பல அதிகாரிகள் இருப்பார்கள் என்றும் குழுவின் உறுப்பினர்கள் சுட்டிக்காட்டினர். எனவே பொதுச்சொத்துக்கள் சட்டத்தின் கீழ் குறித்த நபருக்கு எதிராக நடவடிக்கை எடுக்குமாறு குழு ஆலோசனை வழங்கியது. இதற்கு அமைய குறித்த நபரினால் அரசாங்க சொத்து மோசடியாக பயன்படுத்தப்பட்டு வியாபார நடவடிக்கை முன்னெடுக்கப்பட்டமை குறித்து விசாரணை நடத்தி இரண்டு வாரங்களுக்குள் அறிக்கை சமர்ப்பிக்குமாறு குழுவின் தலைவர் மேல்மாகாண சபையின் பிரதம செயலாளருக்கு அறிவுறுத்தல் வழங்கினார். அதேநேரம், சட்டவிரோதமாக நடத்தப்படும் இந்த மலர்ச்சாலை தொடர்பான தகவல்களை வெளிப்படுத்திய முன்னாள் மாநகர ஆணையாளருக்குப் பாராட்டுக்களைத் தெரிவித்த குழு, இந்தப் பாராட்டு அவரின் தனிப்பட்ட கோப்புக்கு ஆற்றுப்படுத்தப்பட வேண்டும் என்றும் சுட்டிக்காட்டியது.
அத்துடன், கொழும்பு மாநகர சபையின் கீழுள்ள வாகனத் தரிப்பிட வாடகை வருமானம் குறித்தும் குழுவில் கவனம் செலுத்தப்பட்டது. 2024 ஆம் ஆண்டு வரையில் வாகனத் தரிப்பிடத்திற்கான ஒப்பந்தக்காரர்களிடமிருந்து பெறப்பட வேண்டிய நிலுவைத் தொகை 580 மில்லியன் ரூபாய் என குழுவில் தெரிய வந்தது. எனினும், 2025 ஆம் ஆண்டுக்கான வாகனத் தரிப்பிட ஒப்பந்தக்காரர்களை தெரிவு செய்யும்போது நிலுவைத் தொகை செலுத்த வேண்டிய ஒப்பந்ததாரர்களை தெரிவு செய்யாமல் இருக்க நடவடிக்கை எடுத்திருப்பதாக அதிகாரிகள் தெரிவித்தனர். இந்த நிலுவைத் தொகையை அறவிடுவதற்கான நடவடிக்கைகளை ஆரம்பித்திருப்பதாக அவர்கள் சுட்டிக்காட்டினார் மேலும் கொழும்பு மாநகர சபையின் உறுப்பினர்களின் வாகனங்களை நிறுத்துவதற்காக ஒதுக்கப்பட்ட இடத்தை வேறு நபர்களுக்கு விற்பனை செய்தமை கணக்காய்வு அறிக்கையில் இருப்பதாகவும் சுட்டிக்காட்டப்பட்டது. இதற்குப் பதிலளித்த அதிகாரிகள், கொழும்பு மாநகர சபை உறுப்பினர்களுக்கு பாரம்பரியமாக அவர்களின் அலுவலகங்களுக்கு அருகில் வாகன நிறுத்துமிடம் ஒதுக்கப்படுவதாகத் தெரிவித்தனர். அதன்படி, அவர்களுக்கு ஒதுக்கப்பட்ட இடத்தை வேறு தரப்பினருக்கு விற்றவர்களிடமிருந்து மீட்பதற்கான சாத்தியக்கூறுகளை ஆராயுமாறு குழுவின் தலைவர் அவர்களுக்கு அறிவுறுத்தினார்.
கொழும்பு மாநகர சபையினால் அறிமுகப்படுத்தப்பட்ட smart street lighting திட்டம் குறித்தும் குழுவில் நீண்ட நேரம் கலந்துரையாடப்பட்டது. இந்தத் திட்டத்தின் மூலம் கொழும்பு மாநகர சபைக்கு எந்தப் பணமும் செலவாகாது என விவரிக்கப்பட்டபோதும், இதனால் கொழும்பு மாநகர சபைக்கு 2.45 பில்லியன் ரூபா இழப்பு ஏற்பட்டிருப்பதாக முன்னாள் ஆணையாளர் குழுவில் தெரிவித்தார். திட்டத்தை நிர்வகித்து வந்த நிறுவனத்தின் சில நிபந்தனைகளுக்கு தான் உடன்படாததால், அந்த நிறுவனத்தின் அதிகாரி ஒருவர் தன்னை மிரட்டி, தேசிய பாதுகாப்பிற்கு அச்சுறுத்தல் ஏற்படுத்தும் கருத்தை வெளியிட்டதாக அவர் குழுவின் முன்னிலையில் குறிப்பிட்டார். அந்தக் காலப் பகுதியில் கொழும்பில் உள்ள ஒரு பாதுகாப்பு வலயத்திற்கான வீதி விளக்குகள் குறித்த நிறுவனத்தின் கட்டுப்பாட்டில் இருந்ததாகவும், அது தேசிய பாதுகாப்புக்கு அச்சுறுத்தலாக இருந்தமையால் அதைப் பற்றி சம்பந்தப்பட்ட துறையினருக்கு அறிவிக்க நடவடிக்கை எடுத்திருந்ததாகவும் அவர் மேலும் தெரிவித்தார்.இது பற்றிக் கருத்துத் தெரிவித்த குழுவின் தலைவர், இந்த விடயம் தீவிரமானது என்பதால் உடனடியாகக் குற்றப் புலனாய்வுப் பிரிவில் முறையிடுமாறு அதிகாரிகளுக்கு அறிவுறுத்தினார்.
இதேவேளை, கொழும்பு மாநகர சபைக்கு செலுத்தப்பட வேண்டிய வரி வருமான நிலுவைத் தொகை 500 கோடி ரூபாவிற்கு அதிகமாக உள்ளது என கணக்காய்வாளர் நாயகம் சுட்டிக்காட்டினார். கொழும்பு மாநகர சபையின் வரி வருவாயில் ஆண்டுதோறும் அதிகரிப்பு காணப்பட்டாலும், நிலுவைத் தொகையை வசூலிப்பதற்கான முறையான கட்டமைப்பு இ்லலாமையால், வசூலிக்கப்பட வேண்டிய வரி நிலுவைத் தொகையும் வருடாந்தம் அதிகரித்து வருவதாக கணக்காய்வாளர் நாயகம் மேலும் தெரிவித்தார்.
இந்த நிலுவைத் தொகை பல வருடங்களாக அதிகரித்து வருவதாகவும், இந்தச் சூழ்நிலையைத் தவிர்ப்பதற்கு வரி செலுத்தப்பட வேண்டிய சொத்துக்கள் சரியான முறையில் அடையாளம் காணப்படுவது அவசியம் என அதிகாரிகள் சுட்டிக்காட்டினர். இந்த சொத்துக்களை அடையாளம் காண ஒரு கணக்கெடுப்பு நடத்தப்படும் என்றும், நிலுவைத் தொகையை செலுத்துபவர்கள் மற்றும் அந்தப் பணத்தின் அளவு குறித்து தெளிவான தகவல்கள் பெறப்படும் என்றும் அதிகாரிகள் மேலும் தெரிவித்தனர்.
இந்த வரி நிலுவையைச் சேகரிப்பதற்கான பொருத்தமான காலக்கெடுவை உள்ளடக்கிய அறிக்கை தயாரிக்கப்பட வேண்டியதன் அவசியத்தை குழுவின் உறுப்பினர்கள் வலியுறுத்தினர். இதற்கு அமைய அடையாளம் காணப்பட்ட சொத்துக்கள் அமைந்துள்ள கொழும்பு கோட்டை பகுதியில் ஒரு மாதத்திற்குள் நிலுவைத் தொகையை வசூலிக்கும் திட்டத்தைத் தொடங்குமாறு குழு அறிவுறுத்தியது. கொழும்பின் பிற பகுதிகளில் உள்ள சொத்துக்களை அடையாளம் கண்டு, நிலுவையில் உள்ள தொகைகளை உடனடியாக வசூலிப்பதற்கான காலக்கெடுவுடன் கூடிய திட்டமொன்றை அறிக்கையாகத் தயாரித்து ஒரு வாரத்திற்குள் அதனைக் குழுவிடம் சமர்ப்பிக்குமாறும் குழுவின் தலைவர் அறிவுறுத்தினார்.
அதேநேரம், கொழும்பு மாநகரசபையின் கீழ் உள்ள தீர்க்கப்படாத காணிகளின் பிரச்சினைகளுக்கு தீர்வு காண்பதில் ஏற்பட்டுள்ள முன்னேற்றம் குறித்தும் குழு கவனம் செலுத்தியது. நில அளவைத் திணைக்களம் மற்றும் வெளித் தரப்பினரின் பங்களிப்புடன், இந்த ஆண்டு இறுதிக்குள் கொழும்பு மாநகர சபைக்குச் சொந்தமான அனைத்துக் காணிகளின் விடுவிப்பையும் உறுதி செய்ய முடியும் என்று அதிகாரிகள் தெரிவித்தனர்.
இக்கூட்டத்தில் குழுவின் உறுப்பினர்களான கௌரவ பிரதியமைச்சர்களான நலின் ஹேவகே, அன்டன் ஜயக்கொடி, சுகத் திலகரத்ன, கௌரவ பாராளுமன்ற உறுப்பினர்களான ருவன்திலக ஜயக்கொடி, சந்தன சூரியாராச்சி, (சட்டத்தரணி) சாகரிகா அதாவுட, ஒஷானி உமங்கா, சுசந்த குமார நவரட்ண, (வைத்தியர்) ஜனக சேனாரத்ன, தினிந்து சமன், லால் பிரேமநாத் ஆகியோரும் அரசாங்க அதிகாரிகள் பலரும் கலந்துகொண்டனர்.
2026-11-14
ஸ்ரீலங்கன் விமான சேவை எதிர்நோக்கியுள்ள நிதி நெருக்கடி, அதிகளவிலான விமானப் பயணத் தாமதங்கள், கடன் சுமை மற்றும் புதிய விமானங்களைக் கொள்வனவு செய்வதில் ஏற்பட்டுள்ள கொள்வனவு நடைமுறைத் தாமதங்கள் தொடர்பில் உட்கட்டமைப்பு வசதிகள் மற்றும் மூலோபாய அபிவிருத்தி பற்றிய துறைசார் மேற்பார்வைக் குழுவில் விரிவாகக் கலந்துரையாடப்பட்டது.குறித்த குழு, அதன் தலைவர் கௌரவ பாராளுமன்ற உறுப்பினர் எஸ்.எம். மரிக்கார் தலைமையில் அண்மையில் பாராளுமன்றத்தில் கூடியபோதே இது தொடர்பில் கவனம் செலுத்தப்பட்டது.தற்போது 23 விமானங்களைக் கொண்டுள்ள விமானச் சேவையின் விமானத் தொகுதி போதுமானதாக இல்லாமை மற்றும் அந்த விமானங்கள் சுமார் 12 வருடங்கள் பழைமையானவையாக இருப்பதால் விமானப் பயணங்களைப் பாதிக்கும் தொழில்நுட்பக் கோளாறுகள் மற்றும் தாமதங்கள் தொடர்பில் இதன்போது கலந்துரையாடப்பட்டது. ஒரு விமானத்தில் தொழில்நுட்பக் கோளாறு அல்லது வேறு காரணங்களால் தாமதம் ஏற்படும்போது, மாற்று விமானங்களைப் பயன்படுத்துவதில் காணப்படும் மட்டுப்பாடுகள் காரணமாக ஒட்டுமொத்த விமானப் போக்குவரத்து வலையமைப்பும் பாதிக்கப்படுவதாகவும் இதன்போது சுட்டிக்காட்டப்பட்டது.விமானங்களைக் கொள்வனவு செய்வதற்காக கடந்த காலங்களில் முன்னெடுக்கப்பட்ட வழமையான கொள்வனவு நடைமுறைகள் தோல்வியடைந்தமை மற்றும் அதனுடன் தொடர்புடைய நீண்டகாலத் தாமதங்கள் குறித்தும் குழுவின் கவனம் செலுத்தப்பட்டது. இந்நிலைக்குத் தீர்வாக விமானங்கள் மற்றும் அவற்றுடன் தொடர்புடைய உபகரணங்களைக் கொள்வனவு செய்வதற்கான விசேட கொள்வனவு வழிகாட்டுதல்கள் தயாரிக்கப்பட்டுள்ளதுடன், அவற்றை வர்த்தமானியில் வெளியிடுவதற்கான நடவடிக்கைகள் எடுக்கப்பட்டுள்ளதாகவும் இதன்போது தெரிவிக்கப்பட்டது. அத்துடன், கொள்வனவு நடவடிக்கைகளை நேரடியாகக் கண்காணிப்பதற்காக அமைச்சு மட்டத்தில் விசேட கொள்வனவுப் பிரிவொன்றும் நிறுவப்பட்டுள்ளதாகத் தெரிவிக்கப்பட்டது.புதிய கொள்வனவு வழிகாட்டுதல்களின் கீழ் விமானத் தொகுதியை விரிவுபடுத்தத் திட்டமிடப்பட்டுள்ளதுடன், எதிர்வரும் ஜூன் மாதமளவில் புதிய குறுகிய உடற்பகுதியைக் கொண்ட (Narrow-body) விமானமொன்றையும், அகன்ற உடற்பகுதியைக் கொண்ட (Wide-body) இரண்டு விமானங்களையும் விமானத் தொகுதியில் இணைத்துக்கொள்ள எதிர்பார்க்கப்படுவதாகவும் கலந்துரையாடப்பட்டது. 2029ஆம் ஆண்டளவில் விமானத் தொகுதியை ஆகக்குறைந்தது 29 விமானங்களாக அதிகரிப்பது ஐந்தாண்டுத் திட்டத்தின் இலக்காகும் என்றும் குறிப்பிடப்பட்டது.ஸ்ரீலங்கன் விமான சேவையின் நிதி நிலைமையை மேம்படுத்துவதற்காக, பழைய வங்கிக் கடன்கள் மற்றும் பிணைமுறிக் கடன்கள் உள்ளிட்டவற்றைப் பொறுப்பேற்பது உட்பட பல்வேறு நடவடிக்கைகளை திறைசேரி முன்னெடுத்துள்ளதாக இதன்போது விளக்கமளிக்கப்பட்டது. அத்துடன், விமானங்களுக்கான குத்தகைக் கட்டணங்களைக் குறைத்தல், எரிபொருள் செலவுகளைக் கட்டுப்படுத்துதல் மற்றும் விமான சேவையின் வருமானத்தை அதிகரிப்பதற்கான வர்த்தக உபாயங்களை நடைமுறைப்படுத்துதல் தொடர்பிலும் கவனம் செலுத்தப்பட்டது.மத்திய கிழக்கு பிராந்தியத்தில் நிலவும் நெருக்கடி நிலைமை, எரிபொருள் விலை அதிகரிப்பு மற்றும் சர்வதேச விமான சேவைகளுடனான போட்டித்தன்மை ஆகியனவும் ஸ்ரீலங்கன் விமான சேவையின் செயற்பாடுகள் மற்றும் வருமானத்தில் தாக்கம் செலுத்துவதாக இதன்போது கலந்துரையாடப்பட்டது.மேலும், ஸ்ரீலங்கன் விமான சேவையை மறுசீரமைப்பதற்காக அரசாங்கத்தினால் நியமிக்கப்பட்ட குழு, புதிய முதலீட்டாளர்களைப் பெற்றுக்கொள்ளுதல், அரச-தனியார் பங்காண்மையை ஏற்படுத்துதல் அல்லது அரசாங்கத்தின் கீழ் தொடர்ந்து நிர்வகித்து, அதன் செலவுகளை ஈடுகட்டக்கூடிய நிலைக்குக் கொண்டுவருதல் உள்ளிட்ட மாற்று வழிகள் குறித்து ஆராய்ந்து வருவதாகவும் தெரிவிக்கப்பட்டது.அதற்கமைய, அடுத்த இரண்டு அல்லது மூன்று வருடங்களுக்குள் ஸ்ரீலங்கன் விமான சேவையை அதன் செலவுகளை ஈடுகட்டக்கூடிய நிலைக்குக் கொண்டுவருவதற்காக எடுக்கப்பட வேண்டிய நடவடிக்கைகள் உள்ளடங்கிய விரிவான அறிக்கையொன்றை நவம்பர் 30ஆம் திகதிக்கு முன்னர் பாராளுமன்றத்திற்கும் அமைச்சுக்கும் சமர்ப்பிக்குமாறு உரிய அதிகாரிகளுக்கு குழு அறிவுறுத்தியது.இந்தக் குழுக் கூட்டத்தில் கௌரவ பாராளுமன்ற உறுப்பினர்களான அஜித் பி. பெரேரா, நளின் பண்டார ஜயமஹ, ரவீந்திர பண்டார, மஞ்சுள சுரவீர ஆரச்சி, சதுர கலப்பத்தி, தனுஷ்க ரங்கநாத், ஜகத் விதான, சாந்த பத்ம குமார சுபசிங்க மற்றும் சட்டத்தரணி கீதா ஹேரத் ஆகியோர் கலந்துகொண்டனர்.
2026-11-14
இலங்கையின் இறக்குமதி வரிக் கொள்கைகள் மற்றும் வர்த்தக உடன்படிக்கைகள் தொடர்பில் கௌரவ பாராளுமன்ற உறுப்பினர் விஜேசிறி பஸ்நாயக்க அவர்களின் தலைமையில் கூடிய வழி வகைகள் பற்றிய குழுவில் விரிவாகக் கலந்துரையாடப்பட்டது.வணிகத் திணைக்களத்தின் பணிப்பாளர் நாயகம் (பதில்) சோமசேன மகாதிவுல்வேவ அவர்கள் இது பற்றிய விரிவான விளக்கத்தைக் குழுவுக்கு வழங்கினார். இலங்கையின் இரு தரப்பு மற்றும் பல்தரப்பு வர்த்தக உடன்படிக்கைகளின் நிலைமைகள் மற்றும் அவற்றைத் தொடர்ந்து முன்கொண்டு செல்வது உள்ளிட்ட விடயங்கள் குறித்து இங்கு கலந்துரையாடப்பட்டது.கலந்துரையாடல் மட்டத்தில் இருக்கும் வர்த்தக உடன்படிக்கைகள் குறித்து சாத்தியக் கூற்று ஆய்வுகளை மேற்கொண்டு தொடர்ச்சியாக அவற்றை முன்னெடுத்துச் செல்வதற்கான நடவடிக்கைகளை எடுக்குமாறு குழு வலியுறுத்தியது.இந்தக் குழுக் கூட்டத்தில் கௌரவ பிரதியமைச்சர்களான சதுரங்க அபேசிங்க, எரங்க வீரரத்ன மற்றும் கௌரவ பாராளுமன்ற உறுப்பினர்களான அசோக சபுமல் ரண்வல, திலின சமரக்கோன், சம்பிக்க ஹெட்டிஆரச்சி, சதுர கலப்பதி உள்ளிட்டோர் கலந்துகொண்டனர்.
2026-11-13
வெளிநாட்டுப் பயங்கரவாதிப் போராளிகளைத் தடுத்தல் சட்டமூலத்திற்கு பொருளாதார அபிவிருத்தி மற்றும் சர்வதேச உறவுகள் பற்றிய துறைசார் மேற்பார்வைக் குழுவில் அங்கீகாரம் வழங்கப்பட்டது. சர்வதேச உறவுகள் பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் சட்டத்தரணி லக்மாலி ஹேமச்சந்திர அவர்களின் தலைமையில் அண்மையில் பாராளுமன்றத்தில் கூடியபோதே இச்சட்டமூலம் ஆராயப்பட்டு அங்கீகரிக்கப்பட்டது. வெளிநாட்டு பயங்கரவாதிப் போராளிகளால் எதிர்நோக்கப்படும் அச்சுறுத்தலைத் தடுத்தல் மற்றும் ஒடுக்குதல் தொடர்பான 2014ஆம் ஆண்டு செப்தெம்பர் மாதம் 24ஆம் திகதி ஏற்றுக்கொள்ளப்பட்ட ஐக்கிய நாடுகள் பாதுகாப்புப் பேரவைத் தீர்மானம் 2178 இற்கு பயன்கொடுப்பதற்கும், அத்துடன் அவற்றுடன் தொடர்புபட்ட அல்லது அவற்றின் இடைநேர்விளைவான கருமங்களுக்காக ஏற்பாடு செய்வதற்குமான சட்டமூலமாக இது சமர்ப்பிக்கப்பட்டுள்ளது.இச்சட்டமூலத்தை வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் கடந்த ஒக்டோபர் மாதம் 20ஆம் திகதி முதலாவது மதிப்பீட்டுக்காகப் பாராளுமன்றத்தில் சமர்ப்பித்திருந்தார்.இலங்கை பிரஜையொருவர் அல்லது இலங்கை பிரஜை அல்லாத வேறொரு நாட்டின் பிரஜை ஒருவர் இலங்கையில் சமுகமாயிருக்கையில், அல்லது இலங்கைக்கு வெளியே தவறிழைத்திருந்து அது அந்நாட்டின் சட்டத்தின் கீழ் தவறொன்றாக இருப்பின் இச்சட்டத்தின் கீழ் இலங்கையில் நடவடிக்கை எடுக்க முடியும். பயங்கரவாத செயல்களை மேற்கொள்ளல், திட்டமிடுதல், தயார்செய்தல் அல்லது அதில் பங்குபற்றுதல், பயங்கரவாத பயிற்சிகளை வழங்குதல் அல்லது பெறுதல் போன்றவை இச்சட்டத்தின் கீழ் தவறுகளாகக் குறிப்பிடப்பட்டிருப்பதாக அதிகாரிகள் குழுவில் விளக்கமளித்தனர்.புலம்பெயர்ந்து வாழும் இலங்கையர்களை இன ரீதியாக இலக்குவைத்து கொண்டுவரப்படும் சட்ட ஏற்பாடு இல்லையென்றும் அதிகாரிகள் குறிப்பிட்டனர். விரிவான கலந்துரையாடல்களைத் தொடர்ந்து குறித்த சட்டமூலத்திற்கு குழு அங்கீகாரம் வழங்கியது. குழுவின் உறுப்பினரான கௌரவ பாராளுமன்ற உறுப்பினர் சிவஞானம் சிறிதரன் இச்சட்டமூலத்திற்கு தனது எதிர்ப்பினைப் பதிவுசெய்தார்.இக்குழுக் கூட்டத்தில் கௌரவ பாராளுமன்ற உறுப்பினர்களான சுரங்க ரத்னாயக்க, திலின சமரக்கோன், விஜேசிறி பஸ்நாயக்க, சிவஞானம் சிறிதரன் உள்ளிட்டோரும், வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சு, பாதுகாப்பு அமைச்சு மற்றும் சட்டமா அதிபர் திணைக்களம், சட்டவரைஞர் திணைக்களம் ஆகியவற்றைப் பிரதிநிதித்துவப்படுத்தி அரசாங்க அதிகாரிகளும் கலந்துகொண்டனர்.
2026-11-13
ஆசிரியர் சேவையிலிருந்து அதிபர் சேவைக்கு நியமிக்கப்படும்போது ஏற்படும் சம்பள முரண்பாடுகள் தொடர்பில் கல்வி, தொழிற்படை மற்றும் மனித மூலதனம் பற்றிய துறைசார் மேற்பார்வைக் குழுவினால் நியமிக்கப்பட்ட உபகுழுவில் விரிவாக ஆராயப்பட்டது.குறித்த உபகுழு அதன் தலைவர் கௌரவ பாராளுமன்ற உறுப்பினர் சுனில் ராஜபக்ஷ அவர்களின் தலைமையில் அண்மையில் கூடியபோதே இது பற்றி ஆராயப்பட்டது.அதிபர் சேவையில் உள்ள தொழிற்சங்கங்களின் பிரதிநிதிகள், கல்வி உயர்கல்வி மற்றும் தொழிற்கல்வி அமைச்சு, நிதி, திட்டமிடல் மற்றும் பொருளாதார அமைச்சு ஆகியவற்றின் அதிகாரிகள், முகாமைத்துவ சேவைத் திணைக்களத்தின் அதிகாரிகள் உள்ளிட்ட பலரும் இதில் கலந்துகொண்டனர்.ஆசிரியர் சேவையில் 2014 ஒக்டோபர் 22ஆம் திகதி வெளியிடப்பட்ட இலங்கை அதிபர் சேவைப் பிரமாணக் குறிப்பின் பிரகாரம், ஆசிரியர் சேவையிலிருந்து அதிபர் சேவைக்கு இணைவது பதவி உயர்வாகக் கருதப்படாமல் “புதிய நியமனம்” எனக் கருதப்படுவதன் காரணமாக சம்பள முரண்பாடு ஏற்பட்டிருப்பதாக அதிபர் சேவையில் உள்ள தொழிற்சங்கங்களின் பிரதிநிதிகள் குழுவில் சுட்டிக்காட்டினர்.ஆசிரியர் சேவையின் முதலாம் தரத்திலிருந்து அதிபர் சேவையின் IIIஆம் தரத்திற்கு நியமிக்கப்படும்போது, சம்பள அதிகரிப்புகளுக்கு இடையிலான பாரிய வேறுபாடு காரணமாக இந்த நிலைமை மேலும் தீவிரமடைவதாக அவர்கள் குறிப்பிட்டார். அத்துடன், 03/2014 சுற்றறிக்கையின் மூலம் அதிபர் சேவைக்கு நியமிக்கப்படும்போது ஏற்படும் சம்பள வேறுபாட்டை ஈடுசெய்வதற்காக சரிசெய்தல் கொடுப்பனவு வழங்கப்பட்ட போதிலும், சேவைக்காலம் அதிகரிக்கும்போது ஆசிரியர் சேவையில் தொடர்ந்திருந்தால் கிடைக்கக்கூடிய உயர்ந்த சம்பள அதிகரிப்புகள் கிடைக்காத காரணத்தால் மீண்டும் சம்பள இடைவெளி ஏற்படுவதாகவும் தெரிவித்தனர்.இதன் காரணமாக ஆசிரியர் சேவையின் முதலாம் மற்றும் 2-Iஆம் தரங்களில் உள்ள சிரேஷ்ட மற்றும் அனுபவமிக்க ஆசிரியர்கள் அதிபர் பரீட்சைக்குத் தோற்றுவதற்கும் அதிபர் சேவையில் இணைவதற்கும் தயக்கம் காட்டும் நிலை ஏற்பட்டுள்ளதாகவும் இங்கு சுட்டிக்காட்டப்பட்டது.இது விடயம் தொடர்பில் குழுவிற்கு சமர்ப்பிக்கப்பட்ட விடயங்களை ஆராய்ந்து சம்பள ஆணைக்குழுவுக்கு உரிய பரிந்துரைகளை அனுப்பிவைக்க நடவடிக்கை எடுக்கப்படும் என உபகுழுவின் தலைவர் வலியுறுத்தினார்.அது மாத்திரமன்றி, அதிபர் சேவையில் உள்ளவர்கள் எதிர்கொள்ளும் ஏனைய பிரச்சினைகள் குறித்து கல்வி அமைச்சு மற்றும் முகாமைத்துவ சேவைத் திணைக்களத்துடன் கலந்துரையாடல்களை நடத்துவதற்கும் உபகுழு இங்கு தீர்மானித்தது. இந்தக் குழுக் கூட்டத்தில் கௌரவ பாராளுமன்ற உறுப்பினர்களான அபூபக்கர் ஆதம்பாவா, சுகத் வசந்த.த சில்வா மற்றும் சானக மாதுகொட ஆகியோரும் கலந்துகொண்டனர்.
பாராளுமன்றத்திற்கு வருகை தருதல்
பாராளுமன்றத்தின் கையேடு
இலங்கையில் தேர்தல் முறை
பாராளுமன்றம் எவ்வாறு செயல்படுகிறது
பாராளுமன்ற அலுவல்கள்
பதிப்புரிமை © இலங்கை பாராளுமன்றம்.
முழுப்பதிப்புரிமையுடையது.
வடிவமைத்து உருவாக்கியது TekGeeks
