2026-02-17
பாராளுமன்ற ஓய்வூதியம் (நீக்குதல்) சட்டமூலம் 152 மேலதிக வாக்குகளால் இன்றையதினம் (பெப். 17) பாராளுமன்றத்தில் நிறைவேற்றப்பட்டது.
இந்தச் சட்டமூலம் மீதான இரண்டாவது மதிப்பீட் விவாதம் இன்று மு.ப 11.30 மணி முதல் பி.ப 5.30 மணிவரை இடம்பெற்றது. இதனைத் தொடர்ந்து நடத்தப்பட்ட வாக்கெடுப்பில் சட்டமூலத்திற்கு ஆதரவாக 154 வாக்குகளும், எதிராக 02 வாக்குகளும் பதிவாகின.
இதனைத் தொடர்ந்து குழு நிலையில் கௌரவ பாராளுமன்ற உறுப்பினர்களான ரவி கருணாநாயக்க மற்றும் சாமர சம்பத் ஆகியோர் சட்டமூலத்தின் மூன்றாவது பிரிவுக்கு திருத்தங்களை முன்வைத்தனர். அவற்றை ஏற்றுக் கொள்ளவில்லையென நீதி மற்றும் தேசிய ஒருமைப்பாட்டு அமைச்சரினால் தெரிவிக்கப்பட்டதுடன், இதன்போது சாமர சம்பத் அவர்கள் தனது திருத்தத்திற்கு வாக்கெடுப்பு நடத்தப்பட வேண்டும் எனக் கோரிக்கை விடுத்தார். இதற்கு அமைய குறித்த சட்டமூலத்தை திருத்தங்கள் இன்றி நிறைவேற்றுவதற்கு ஆதரவாக 152 வாக்குகளும், முன்மொழியப்பட்ட திருத்தத்தை ஏற்றுக் கொள்வதற்கு ஆதரவாக 4 வாக்குகளும் அளிக்கப்பட்டன.
அத்துடன், கௌரவ பாராளுமன்ற உறுப்பினர் ரவி கருணாநாயக்க அவர்களினால் சட்டமூலத்தின் 4வது பிரிவுக்கு திருத்தம் முன்வைக்கப்பட்டதுடன், இதனை ஏற்றுக் கொள்ளவில்லையென நீதி மற்றும் சமூக ஒருமைப்பாட்டு அமைச்சரினால் அறிவிக்கப்பட்டது. இதனைத் தொடர்ந்து மூன்றாவது மதிப்பீட்டின் பின்னர் சட்டமூலம் திருத்தங்கள் இன்றி நிறைவேற்றப்பட்டது.
இந்தச் சட்டமூலம் நீதி மற்றும் தேசிய ஒருமைப்பாட்டு அமைச்சரினால் 2026 ஜனவரி 07ஆம் திகதி முதலாவது மதிப்பீட்டுக்காகப் பாராளுமன்றத்தில் சமர்ப்பிக்கப்பட்டது.
இந்தச் சட்டமூலத்திற்கு கௌரவ சபாநாயகர் (வைத்தியர்) ஜகத் விக்கிரமரத்ன அவர்கள் இன்று தனது கையொப்பத்தையிட்டு சான்றுரைப்படுத்தினார். இதற்கு அமைய குறித்த சட்டமூலம் 2026ஆம் ஆண்டின் 5ஆம் இலக்க பாராளுமன்ற ஓய்வூதியம் (நீக்குதல்) சட்டமாக நடைமுறைக்கு வருகின்றது.
இச்சட்டத்தின் ஊடாக தேசிய அரசுப் பேரவையின் 1977ஆம் ஆண்டின் 1ஆம் இலக்க பாராளுமன்ற ஓய்வூதியச் சட்டம் நீங்குகின்றது. இதற்கு அமைய சட்டத்தின் 3வது பிரிவின் நியதிகளின் படி ஓய்வூதியமொன்றறைப் பெற்றுக்கொள்வதற்கு உரித்துடையவரானவரும் மற்றும் இச்சட்டம் தொடங்கும் தேதிக்கு முன்னதாக ஓய்வூதியமொன்றைப் பெற்றுக்கொள்கின்றவருமான எவரேனும் ஆளுக்கு இச்சட்டம் தொடங்கும் தேதியன்றும் அதன் பின்னரும் அத்தகைய ஓய்வூதியம் நிறுத்தப்படும்.
2026-11-04
2026ஆம் ஆண்டின் 8ஆம் இலக்க குறைநிரப்பு மதிப்பீட்டை விவாதத்திற்கு எடுத்துக்கொள்ள கௌரவ சபாநாயகர் வைத்தியர் ஜகத் விக்கிரமரத்ன அவர்களின் தலைமையில் இன்று (நவ. 04) நடைபெற்ற பாராளுமன்ற அலுவல்கள் பற்றிய குழுக் கூட்டத்தில் தீர்மானிக்கப்பட்டது.திரட்டு நிதியிலிருந்து அல்லது அரசாங்கத்திற்குச் சொந்தமான வேறு ஏதேனும் நிதியத்திலிருந்து அல்லது நிதியிலிருந்து 4,261 மில்லியன் ரூபாவை (ரூ.4,261,000,000.00) இலங்கை விமானப்படைக்கு வழங்குவதற்காக இந்தக் குறைநிரப்பு மதிப்பீடு சமர்ப்பிக்கப்பட்டுள்ளது.மாறிவரும் செயற்பாட்டுச் சூழல், வங்காள விரிகுடா மற்றும் அதனைச் சூழவுள்ள பகுதிகளில் நிலவும் அனர்த்தங்களுக்கு உள்ளாகக்கூடிய வகையிலான தொடர்ச்சியான பாதகமான காலநிலை நிலைமைகளால் ஏற்படக்கூடிய உடனடி அச்சுறுத்தல்கள் ஆகியவற்றைக் கருத்திற்கொண்டு, இலங்கை விமானப்படையில் ஆளில்லா விமானக் கட்டமைப்பொன்றை நிறுவுவதற்காக இந்த நிதி ஒதுக்கப்படவுள்ளது.இதற்கு மேலதிகமாக, ஏற்கனவே தீர்மானிக்கப்பட்டதற்கு அமைவாக.ப 11.30 மணி முதல் பி.ப 5.00 மணி வரை நம்பிக்கைப் பொறுப்புகள் (திருத்தச்) சட்டமூலம் மீதான இரண்டாவது மதிப்பீடு விவாதம் இடம்பெறவுள்ளது. (அரசியலமைப்பின் 121ஆம் உறுப்புரையின் பிரகாரம் உயர்நீதிமன்றத்தில் எவ்வித மனுக்களும் தாக்கல் செய்யப்படாத பட்சத்தில்) வெள்ளிக்கிழமை (06) பாராளுமன்ற அலுவல்களில் எவ்வித மாற்றமும் இல்லை.
2026-11-04
குடிசன மற்றும் புள்ளிவிபரத் திணைக்களத்தின் 2024ஆம் ஆண்டுக்கான குடிசன மற்றும் வீட்டுவசதிகள் தொகைமதிப்பிற்கு அமைய இலங்கையில் தற்போது மொத்தமாக 727,293 இயலாமையுள்ள நபர்கள் இருப்பதாக கிராமிய அபிவிருத்தி, சமூகப் பாதுகாப்பு மற்றும் சமூக வலுவூட்டல் அமைச்சர் கௌரவ கலாநிதி உபாலி பன்னிலகே, இயலாமையுள்ள நபர்களின் நலன்புரிக்காக முன்னெடுக்கப்பட்டுள்ள நடவடிக்கைகள் குறித்து விரிவாக விளக்கமளித்தார்.கௌரவ பாராளுமன்ற உறுப்பினர் சுகத் வசந்த.த சில்வா அவர்களால் வாய்மூல விடைக்காகக் எழுப்பப்பட்ட கேள்விக்குப் பதிலளிக்கும்போதே அமைச்சர் இதனைத் தெரிவித்தார்.அமைச்சர் வழங்கிய விளக்கத்தின்படி, குறைந்த வருமானம் பெறும் இயலாமையுள்ள நபர்களுக்கு மாதாந்தம் 10,000 ரூபா வாழ்வாதாரக் கொடுப்பனவு வழங்குதல், விசேட உதவி உபகரணங்களை வழங்குதல், செவிப்புலன் கருவிகள் மற்றும் அவற்றுக்கான உதிரிப்பாகங்களைக் கொள்வனவு செய்வதற்காக அதிகபட்சமாக 50,000 ரூபா நிதியுதவி வழங்குதல் ஆகிய நடவடிக்கைகள் முன்னெடுக்கப்படுகின்றன.வீடற்ற இயலாமையுள்ள நபர் ஒருவர் உள்ள குடும்பமொன்றுக்கு வீடமைப்புக்காக அதிகபட்சமாக 1,000,000 ரூபாவும், வீடுகளைப் புனரமைப்பதற்காக அதிகபட்சமாக 50,000 ரூபா நிதியுதவியும், சுகாதார வசதிகளை மேம்படுத்துவதற்காக 150,000 ரூபாவும் வழங்குவதற்கு நடவடிக்கை எடுக்கப்பட்டுள்ளது.இதற்கு மேலதிகமாக, வீடமைப்பு மற்றும் நீர்வழங்கல் அமைச்சின் ஊடாக மேல் மாகாணத்தில் மாற்றுத்திறனாளிகளின் சுகாதார வசதிகளை மேம்படுத்துவதற்காக ஒருவருக்கு தலா 10 இலட்சம் ரூபா நிதியுதவி வழங்கப்படுகின்றது.கல்வி உபகரணங்களைக் கொள்வனவு செய்வதற்கான நிதியுதவி வழங்குதல், மருத்துவ வசதிகளைப் பெற்றுக்கொள்வதற்கு உதவுதல் மற்றும் ஜனாதிபதி அலுவலகத்தின் தலையீட்டின் கீழ் மருத்துவ உதவிகளுக்காக அதிகபட்சமாக 100,000 ரூபா நிதியுதவி வழங்குதல் ஆகிய நடவடிக்கைகளும் முன்னெடுக்கப்படுகின்றன.இயலாமையுள்ள நபர்களுக்கு அல்லது அவர்களின் பராமரிப்பாளர்கள் சுயதொழிலில் ஈடுபடுவதற்குத் தேவையான நிதியுதவியும் வழங்கப்படுகின்றது. அத்துடன், விசேட கல்விப் பிரிவுகள் மற்றும் நிறுவனங்களுக்கு விளையாட்டு உபகரணங்கள், இசைக்கருவிகள் ஆகியவற்றை வழங்குவதற்கும் நடவடிக்கை எடுக்கப்பட்டுள்ளது. இயலாமையுள்ள நபர்களுக்குச் சேவைகளை வழங்கும் நிறுவனங்களின் அபிவிருத்திக்காக அதிகபட்சமாக 500,000 ரூபா நிதியுதவியும் வழங்கப்படுகின்றது.மேலும், நடமாடும் கண் சிகிச்சை முகாம்களின் ஊடாக இலவச மூக்குக் கண்ணாடிகள் வழங்கப்படுவதுடன், இயலாமையுள்ள நபர்கள் பொதுமக்கள் பயன்படுத்தும் இடங்களுக்கு இலகுவாகச் சென்று வருவதற்குத் தேவையான வசதிகளை மேம்படுத்தும் வேலைத்திட்டங்களும் நடைமுறைப்படுத்தப்படுகின்றன.தொழிற்பயிற்சிகளை வழங்கி வேலைவாய்ப்புகளைப் பெற்றுக்கொடுத்தல், 16 வயதுக்குக் குறைந்த இயலாமையுள்ள சிறுவர்களை ஆரம்பகாலத் தலையீட்டுத் திட்டங்களின் ஊடாகக் கல்வியில் ஈடுபடுத்துதல், அதற்குத் தேவையான திறன் விருத்தி மற்றும் பகல்நேரப் பராமரிப்பு வசதிகளை ஏற்படுத்திக் கொடுத்தல் ஆகிய நடவடிக்கைகளும் முன்னெடுக்கப்படுகின்றன.இதற்கு மேலதிகமாக, குறைந்த வருமானம் பெறும் குடும்பங்களைச் சேர்ந்த இயலாமையுள்ள மாணவர்களுக்கு மாதாந்தம் 5,000 ரூபா கொடுப்பனவு வழங்கப்படுகின்றது. அத்துடன், உயர்கல்வியைத் தொடரும் இயலாமையுள்ள மாணவர்களுக்கும் கல்வி அமைச்சின் ஊடாக மாதாந்தம் 5,000 ரூபா கொடுப்பனவு வழங்குவதற்கு நடவடிக்கை எடுக்கப்பட்டுள்ளது.
2026-11-04
இலங்கையில் 2021ஆம் ஆண்டு முதல் 2025ஆம் ஆண்டு வரையான காலப்பகுதியில் வீதி விபத்துகளினால் ஏற்பட்ட வருடாந்த உயிரிழப்புகளின் சராசரி எண்ணிக்கை 2,536 ஆகவும், காயமடைந்தவர்களின் வருடாந்த சராசரி எண்ணிக்கை 22,483 ஆகவும் காணப்படுவதாக சுகாதார பிரதி அமைச்சர் கௌரவ வைத்தியர் ஹன்சக விஜேமுனி தெரிவித்தார்.கௌரவ பாராளுமன்ற உறுப்பினர் வைத்தியர் பத்மநாதன் சத்தியலிங்கம் அவர்கள் வாய்மூல விடைக்காக எழுப்பிய கேள்விக்குப் பதிலளிக்கும் போதே கௌரவ பிரதியமைச்சர் இந்தத் தகவல்களை வழங்கினார்.வீதி விபத்துகளினால் தற்காலிகமாகவும் நிரந்தரமாகவும் அங்கவீனமடையும் நபர்களின் சராசரி எண்ணிக்கை சுமார் 25,000 ஆகும் என்றும் அவர் குறிப்பிட்டார்.அத்துடன், சர்வதேச அளவுகோல்களுக்கு அமைய, ஒரு நாட்டின் வீதி விபத்துகளினால் அதன் பொருளாதாரத்தின் உற்பத்தித்திறனுக்கு ஏற்படும் இழப்பு (Productivity Loss), அந்நாட்டின் மொத்த தேசிய உற்பத்தியில் 3 சதவீதம் முதல் 5 சதவீதம் வரையான அளவைக் கொண்டிருக்கும் என நம்பப்படுவதாகவும் பிரதியமைச்சர் மேலும் தெரிவித்தார்.
2026-11-03
பிற நாடுகளின் பிரத்தியேக பொருளாதார வலயங்களுக்குள் பிரவேசித்தமை காரணமாக, 2020 ஆம் ஆண்டு முதல் 2026 ஒக்டோபர் 23 ஆம் திகதி வரை 145 மீன்பிடிப் படகுகளுடன் 795 மீனவர்கள் கைது செய்யப்பட்டுள்ளதாகவும், அவர்களில் 753 மீனவர்கள் 66 மீன்பிடிப் படகுகளுடன் இதுவரை விடுவிக்கப்பட்டுள்ளதாகவும் சுகாதாரம் மற்றும் வெகுஜன ஊடக அமைச்சர் வைத்தியர் நளிந்த ஜயதிஸ்ஸ தெரிவித்தார்.கௌரவ பாராளுமன்ற உறுப்பினர் ஹெக்டர் அப்புஹாமி அவர்கள் வாய்மூல விடைக்காக முன்வைத்த கேள்விகளுக்காக கடற்றொழில், நீரியல் வளங்கள் மற்றும் கடல் வளங்கள் அமைச்சர் சார்பில் பதில் வழங்கும்போதே அவர் இவ்வாறு குறிப்பிட்டார்.2024 ஆம் ஆண்டின் புள்ளிவிபரங்களின்படி, மொத்தம் 49,271 மீன்பிடிப் படகுகள் கடற்றொழிலில் ஈடுபட்டு வருவதாகக் குறிப்பிட்ட அமைச்சர், அவற்றில் 4,869 பதிவு செய்யப்பட்ட பலநாள் மீன்பிடிப் படகுகள், 880 ஒருநாள் மீன்பிடிப் படகுகள் (IDAY), வெளிப்புற இயந்திரங்களைக் கொண்ட 24,823 படகுகள் (OFRP), இயந்திரங்களைக் கொண்ட 2,709 பாரம்பரியப் படகுகள் (MTRB), இயந்திரங்கள் அற்ற 15,037 பாரம்பரியப் படகுகள் (NTRB) மற்றும் இயந்திரமற்ற கரைவலைப் படகுகள் (NBSB) 953 என்பன உள்ளடங்குவதாகத் தெரிவித்தார்.இவற்றில் 4,869 பலநாள் மீன்பிடிப் படகுகளும் சர்வதேசக் கடற்பரப்பில் மீன்பிடிப்பதற்கான சட்டபூர்வ அனுமதிப்பத்திரங்களைப் பெற்றுள்ளதாகவும் அமைச்சர் குறிப்பிட்டார். சில சந்தர்ப்பங்களில், சீரற்ற காலநிலை, பலத்த காற்று அல்லது தொழில்நுட்பக் கோளாறுகள் காரணமாக மீன்பிடிப் படகுகள் பிற நாடுகளின் பிரத்தியேக பொருளாதார வலயங்களுக்குள் பிரவேசிக்கும் நிலை ஏற்படுவதாகவும் அவர் தெரிவித்தார்.அதேவேளை, சில படகுகளின் மீகாமர்கள் வேண்டுமென்றே பிற நாடுகளின் கடல் எல்லைகளுக்குள் பிரவேசித்து, அங்குள்ள மீன் வளங்களைப் பயன்படுத்தி மீன்பிடிக்கும் சம்பவங்களும் பதிவாகியுள்ளதாக அமைச்சர் வலியுறுத்தினார்.வெளிநாடுகளில் கைது செய்யப்படும் மீனவர்களின் எண்ணிக்கை வேகமாகக் குறைந்து வருவதாகக் குறிப்பிட்ட அமைச்சர், 2026 ஆம் ஆண்டில் இதுவரை 7 மீன்பிடிப் படகுகளுடன் 40 மீனவர்கள் மட்டுமே கைது செய்யப்பட்டுள்ளதாகத் தெரிவித்தார்.வெளிநாடுகளில் கைது செய்யப்படும் மீனவர்கள் மற்றும் மீன்பிடிப் படகுகள் தொடர்பில், சம்பந்தப்பட்ட நாடுகளில் அமைந்துள்ள இலங்கைத் தூதரகங்கள் நேரடியாகச் செயற்படுவதாகவும், அதற்கமைய கைது செய்யப்பட்ட மீனவர்கள் மற்றும் மீன்பிடிப் படகுகள் தொடர்பில் தேவையான அனைத்து சட்டரீதியான மற்றும் இராஜதந்திர ரீதியான தலையீடுகளையும் அந்தந்தத் தூதரகங்கள் மேற்கொள்வதாகவும் அமைச்சர் தெரிவித்தார்.மேலும், அனர்த்தங்களுக்கு உள்ளாகும் படகுகள் உள்ளிட்ட ஏனைய மீன்பிடிப் படகுகள் தொடர்பான தேவையான தொழில்நுட்ப அறிக்கைகளை கடற்றொழில் மற்றும் நீரியல் வளங்கள் திணைக்களம் வழங்குவதாகவும், சில சந்தர்ப்பங்களில் மீனவர்களை மீண்டும் நாட்டுக்கு அழைத்து வருவதற்குத் தேவையான விமானப் பயணச்சீட்டுகளைக்கூட அத்திணைக்களம் வழங்குவதாகவும் அமைச்சர் மேலும் தெரிவித்தார்.
பாராளுமன்றத்திற்கு வருகை தருதல்
பாராளுமன்றத்தின் கையேடு
இலங்கையில் தேர்தல் முறை
பாராளுமன்றம் எவ்வாறு செயல்படுகிறது
பாராளுமன்ற அலுவல்கள்
பதிப்புரிமை © இலங்கை பாராளுமன்றம்.
முழுப்பதிப்புரிமையுடையது.
வடிவமைத்து உருவாக்கியது TekGeeks
