பாராளுமன்றத்தின் கையேடு
இலங்கையில் தேர்தல் முறை
பாராளுமன்றம் எவ்வாறு செயல்படுகிறது
பாராளுமன்ற அலுவல்கள்
உள் நுழைந்து உங்கள் பாராளுமன்றத்துடன் இணைந்து கொள்க
2023-09-06
இலங்கைப் பாராளுமன்றத்தில் இயலாமையுடன் கூடியவர்களின் உரிமைகளை மேலும் உறுதிப்படுத்தும் வேலைத்திட்டத்தை துரிதப்படுத்தும் நோக்கில் விழிப்புணர்வூட்டும் செயலமர்வு சில தெரிவு செய்யப்பட்ட பணியாட்தொகுதி அங்கத்தவர்களுக்கும் பாராளுமன்ற உறுப்பினர்களுக்கும் 2023 ஆகஸ்ட் 18 முதல் 23 ஆம் திகதி வரையான காலப்பகுதியில் இடம்பெற்றது.
இதில் இயலாமையுடன் கூடியவர்களை உள்வாங்குவதற்கான பாராளுமன்ற செயலணி, பாராளுமன்றத் தொடர்பாடல் திணைக்களத்தின் ஊடகப் பிரிவு மற்றும் பொதுமக்கள் வெளித்தொடர்புப் பிரிவு, பெண்கள் மற்றும் பாலின சமத்துவம் தொடர்பான பாராளுமன்ற விசேட குழுவின் உறுப்பினர்கள் கலந்துகொண்டனர்.
இயலாமையுடன் கூடியவர்களை உள்வாங்குவது தொடர்பில் பாராளுமன்றத்தை வலுப்படுத்தும் நீண்ட கால வேலைத்திட்டத்தின் ஓர் அங்கமாக இந்த நிகழ்ச்சியைக் குறிப்பிட முடியும்.
முழுப் பாராளுமன்ற வழக்கத்தையும், டிஜிட்டல் மற்றும் சமூக வெளிகளை இயலாமையுடன் கூடியவர்களுக்கு நட்புறவானதாக மாற்றுவதற்கு தற்பொழுது இலங்கை பாராளுமன்றம் நடவடிக்கை எடுத்து வருகின்றது. இயலாமையுடன் கூடியவர்களுக்கு பாராளுமன்றத்துக்கு பிரவேசிப்பதற்கான இயலுமை தொடர்பான விரிவான பகுப்பாய்வு இந்த வருட ஆரம்பத்தில் மேற்கொள்ளப்பட்டது. அந்த அறிக்கைக்கு அமைய, பௌதிகக் கட்டடங்கள், பாராளுமன்ற இணையத்தளம் மற்றும் டிஜிட்டல் பொதுவெளி என்பன இயலாமையுடன் கூடியவர்களுக்கு நட்புறவானதாக மாற்றுதல் மற்றும் பணியாட்களினதும் பாராளுமன்ற உறுப்பினர்களினதும் இயலுமை அபிவிருத்தி உள்ளிட்ட விருத்தி செய்யப்பட வேண்டிய பல துறைகள் பரிந்துரைக்கப்பட்டுள்ளன.
இதன் விளைவாக இது தொடர்பில் தொடர்ச்சியாகவும் நிலைபேறான முறையுடனும் பணியாற்றுவதற்காக இயலாமையுடன் கூடியோரை உள்ளடக்குவது மீதான விசேட செயலணியை பாராளுமன்ற செயலாளர் நாயகம் நியமித்தார். செயலணியானது அனைத்து திணைக்களங்களினதும் தலைவர்களை உள்ளடக்கியிருப்பதுடன் பாராளுமன்றத்தின் உதவி செயலாளர் நாயகத்தினால் தலைமை தாங்கப்படுகிறது. மேலும் மதிப்பீட்டு அறிக்கையின் சிபார்சுகளுக்கு பதிலளிக்கும் வகையில், பாராளுமன்றம் மற்றும் பாராளுமன்றச் செயலகம் என்பவற்றின் சூழமைவில் இயலாமையுடன் கூடியவர்களை உள்ளடக்கிக்கொள்ளும் பல்வேறு அம்சங்கள் மீது கவனம் குவிக்கும் மொடியுல்களுடன் ஒரு பயிற்சிக் கையேடு விருத்தி செய்யப்பட்டது. கையேடானது உள்ளுர் கருத்துப் பரிமாற்ற மொழிகளுக்கு மொழிபெயர்க்கப்படும் என்பதுடன் எதிர்காலத்தில் இயலுமையை பலப்படுத்துவதற்காக பயன்படுத்தப்படும்.
சூழல், மனப்பாங்கு மற்றும் நிறுவன ரீதியாகக் காணப்படும் தடைகளுக்கு முகங்கொடுக்கும் இயலாமையுடன் கூடியவர்கள், அங்கவீனம் மாத்திரமல்லாமல் சமூகத்தில் பொதுவான பிரஜையாக இருப்பதற்கும் தடைகள் காணப்படுவதாக இங்கு சுட்டிக்காட்டப்பட்டது.
இந்த அமர்வுகளின்பொழுது பங்குபற்றுனர்கள் ஒரு அடிப்படை உணர்வூட்டல் ஊடாக கொண்டு செல்லப்பட்டதுடன், அதிலே மனித உரிமைகள் பார்வைநோக்கிலிருந்து இயலாமையுடன் கூடியோரைப் புரிந்துகொள்ளுதல் மற்றும் கருத்துருவாக்கத்தின் முக்கியத்துவம் என்பனவற்றுக்கு அழுத்தம் கொடுக்கப்பட்டன. இம் மாதிரியானது இயலாமையுடன் கூடிய ஆட்களுக்கான எல்லா மனித உரிமைகளையும் முழுமையாகவும் சமனாகவும் அனுபவிப்பதை உறுதிப்படுத்துகிறது, அவர்களது பிறப்புரிமையாக வந்த மகத்துவத்தை மதித்தல், சம சந்தர்ப்பங்கள் மீது கவனம் குவித்தல் என்பவற்றுடன் சமூகத்தில் பாரபட்சமின்மை மற்றும் பங்குபற்றுகையை அமுல்படுத்துவதை இது ஊக்கவிக்கிறது. இயலாமையுடன் கூடிய ஆட்களை சமூக அனுதாபம் தேவையான ஆட்களாக அல்லாமல் சம உரிமை கொண்டவர்களாக சமூகம் பார்ப்பதை இது உறுதி செய்கிறது.
ஆகவே இவ்வாறான தடைகளை அகற்றினால் இயலாமையுடன் கூடிய பின்னணி ஏற்படுவதில்லை என்பதுடன், சமூகம் மற்றும் நிறுவன ரீதியாக, இயலாமையுடன் கூடியவர்களுக்கு மேற்குறிப்பிட்ட தடைகள் இன்றி சாதாரண நபர் ஒருக்கு போன்று சமூகத்தில் பங்கெடுக்கக் கூடிய வகையில் தடைகளை நீக்குவதற்கு நம் முயற்சிக்க வேண்டும் என இங்கு வலியுறுத்தப்பட்டது.
இந்த நிகழ்ச்சிகளில் பங்குபற்றியவர்கள் இயலாமையுடன் கூடியவர்களின் யதார்த்தங்களை நன்கு புரிந்துகொள்ளவும் உதவும் வகையில் பிரயோக ரீதியான செயற்பாடுகளில் ஈடுபட்டனர். ஒரு தொகுதி உள்நாட்டுப் பயிற்சியாளர்கள் அவதானிப்பாளர்களாக நிகழ்ச்சிகளில் இணைந்து கொண்டதுடன், இந்த துறை தொடர்பான பல வருடங்கள் அனுபவம் கொண்ட சர்வதேச பயிற்சியாளர் ஒருவரால் இந்த நிகழ்ச்சிகள் முன்னெடுக்கப்பட்டன. பாராளுமன்றத்தின் இந்த முயற்சிக்கு தேசிய ஜனநாயக நிறுவகத்தினால் ஆதரவளிக்கப்பட்டதுடன் USAID இனால் நிதி அனுசரணை வழங்கப்பட்டது.
2026-11-16
கொரியக் குடியரசின் தேசிய சட்டமன்றத்தைப் பிரதிநிதித்துவப்படுத்தும் சிறுவர், சனத்தொகை மற்றும் சுற்றுச்சூழல் தொடர்பான கொரிய பாராளுமன்ற லீக்கின் (CPE) தூதுக்குழுவினர் அண்மையில் இலங்கைப் பாராளுமன்றத்தின் கௌரவ பிரதி சபாநாயகர் வைத்தியர் ரிஸ்வி சாலி அவர்களைச் சந்தித்தனர்.சுற்றுச்சூழல் மீள்திறன், சனத்தொகைக் கொள்கைகள், கல்வி மற்றும் பொருளாதாரப் பரிமாற்றங்கள் ஆகிய துறைகளில் இரு நாடுகளுக்கும் இடையிலான இருதரப்பு ஒத்துழைப்பை மேலும் வலுப்படுத்துவது தொடர்பில் இங்கு கலந்துரையாடப்பட்டது. இச்சந்திப்பில் பாராளுமன்றத்தின் செயலாளர் நாயகம் குஷானி ரோஹணதீரவும் கலந்துகொண்டார்.கொரிய தேசிய சட்டமன்றத்தின் புலனாய்வுக் குழுவின் தலைவரும், சிறுவர், சனத்தொகை மற்றும் சுற்றுச்சூழல் தொடர்பான கொரிய பாராளுமன்ற லீக்கின் உப தலைவருமான கௌரவ லீ யாங்-சூ (Lee Yang-soo) தலைமையில் கொரியத் தூதுக்குழுவினர் வருகை தந்தனர். இத்தூதுக்குழுவில் குறித்த லீக்கின் உறுப்பினர் கௌரவ குவாக் சாங்-இயோன் (Kwak Sang-eon), கொரிய – இலங்கை பாராளுமன்ற நட்புறவுச் சங்கத்தின் உப தலைவரான கௌரவ கிம் சோ-ஹீ (Kim So-hee) மற்றும் இலங்கைக்கான கொரியக் குடியரசின் தூதுவர் கௌரவ யூன்-ஜுங் கிம் (Youn-Jung Kim) ஆகியோரும் உள்ளடங்கியிருந்தனர்.1989 ஆம் ஆண்டில் ஸ்தாபிக்கப்பட்ட சிறுவர், சனத்தொகை மற்றும் சுற்றுச்சூழல் தொடர்பான கொரிய பாராளுமன்ற லீக், காலநிலை மாற்றம், சனத்தொகை மற்றும் சிறுவர் நலன் தொடர்பான உலகளாவிய சவால்களை எதிர்கொள்வதற்காக சர்வதேச பாராளுமன்ற ஒத்துழைப்பை மேம்படுத்தும் நோக்கில் செயற்பட்டு வருகின்றது.2027 ஆம் ஆண்டில் இலங்கைக்கும் கொரியக் குடியரசுக்கும் இடையிலான இராஜதந்திர உறவுகள் ஏற்படுத்தப்பட்டு 50 ஆண்டுகள் பூர்த்தியடைவதைக் கருத்திற்கொண்டு, இரு நாடுகளுக்கும் இடையில் நிலவும் நீண்டகால நட்புறவையும் ஒத்துழைப்பையும் மேலும் வலுப்படுத்துவதற்கான எதிர்பார்ப்பை இரு தரப்பினரும் இதன்போது வலியுறுத்தினர்.இலங்கையை அண்மையில் பாதித்த சீரற்ற காலநிலை நிலைமைகள் தொடர்பில் பிரதி சபாநாயகர் இதன்போது தெரிவித்தார். குறிப்பாக, கடுமையான வெள்ளப்பெருக்கு மற்றும் மண்சரிவுகள் காரணமாக உட்கட்டமைப்பு வசதிகளுக்கும் விவசாய நிலங்களுக்கும் ஏற்பட்டுள்ள கணிசமான சேதங்கள் குறித்து அவர் எடுத்துரைத்தார்.அத்துடன், பிறப்பு வீதம் குறைவடைதல் மற்றும் வேகமாக முதியோர் எண்ணிக்கை அதிகரித்தல் உள்ளிட்ட இலங்கை எதிர்கொள்ளும் சனத்தொகை சார் சவால்கள் குறித்தும் அவர் விளக்கமளித்தார். இந்நிலைமைகள் எதிர்காலத்தில் தங்கியிருப்போர் விகிதம் மற்றும் தொழிலாளர் சக்தியில் கிடைப்பனவு ஆகியவற்றில் குறிப்பிடத்தக்க தாக்கத்தை ஏற்படுத்தக்கூடும் என்றும் அவர் சுட்டிக்காட்டினார். இலங்கையின் இலவசக் கல்வி முறைமை மற்றும் அதனை மேலும் வலுப்படுத்துவதில் காணப்படும் சவால்கள் குறித்தும் இதன்போது கலந்துரையாடப்பட்டது.கொரியக் குடியரசில் குறைவடைந்து வரும் பிறப்பு வீதத்தை எதிர்கொள்வதற்காக முன்னெடுக்கப்பட்டுள்ள நடவடிக்கைகள் தொடர்பில் கருத்துத் தெரிவித்த கொரியப் பிரதிநிதிகள், புதிதாகத் திருமணமான தம்பதியினருக்கான குறைந்த வாடகை வீடமைப்புத் திட்டங்கள், குறைந்த வட்டி வீதத்திலான கடன்கள் மற்றும் வீடமைப்புக்கான ஊக்குவிப்புகள் உள்ளிட்ட பல்வேறு கொள்கை நடவடிக்கைகள் குறித்து விளக்கமளித்தனர்.ஓய்வூதியப் பாதுகாப்பில் காணப்படும் இடைவெளிகளைக் குறைப்பதற்காக ஓய்வுபெறும் வயதெல்லையை 60 இலிருந்து 65 ஆக அதிகரிப்பது தொடர்பான முன்மொழிவுகள் குறித்தும் தூதுக்குழுவினர் கருத்துக்களைப் பகிர்ந்துகொண்டனர். இத்தகைய கொள்கைகளை நடைமுறைப்படுத்தும்போது இளைஞர் தலைமுறையினருக்குப் போதுமான வேலைவாய்ப்புகளை உறுதிப்படுத்துவதன் முக்கியத்துவத்தையும் அவர்கள் வலியுறுத்தினர்.பொருளாதார அபிவிருத்தியுடன் சுற்றுச்சூழல் பாதுகாப்பிற்கும் முன்னுரிமை வழங்கப்பட வேண்டியதன் முக்கியத்துவத்தை இரு தரப்பினரும் வலியுறுத்தினர். இயற்கை அனர்த்தங்கள் காரணமாக பல வருடங்களாக ஈட்டப்பட்ட பொருளாதார முன்னேற்றத்திற்குப் பாதிப்புகள் ஏற்படக்கூடும் என்றும் இதன்போது சுட்டிக்காட்டப்பட்டது.இலங்கையில் கொரியக் கலாசாரம், குறிப்பாக கொரிய பாப் இசை பிரபலமடைந்து வருவது மற்றும் இரு நாடுகளுக்கும் இடையிலான சுற்றுலாத்துறையை மேலும் விரிவுபடுத்துவதற்கான சாத்தியக்கூறுகள் குறித்தும் கலந்துரையாடப்பட்டது.மேலும், தென்கொரியாவில் தொழில்புரியும் இலங்கை இளைஞர், யுவதிகளுக்குக் கிடைக்கக்கூடிய தொழில்நுட்ப மற்றும் தொழிற்பயிற்சி வாய்ப்புகளின் நன்மைகள் குறித்தும் இரு தரப்பினரும் கவனம் செலுத்தினர். இப்பயிற்சி வாய்ப்புகள் ஊடாக தொழில்சார் திறன்களை மேம்படுத்துவதுடன், இலங்கைக்கும் பொருளாதார நன்மைகளைப் பெற்றுக்கொள்ள முடியும் என்றும் இதன்போது குறிப்பிடப்பட்டது.அடுத்த வருடம் தென்கொரியாவில் நடைபெறவுள்ள சுற்றுச்சூழல் மற்றும் அபிவிருத்தி தொடர்பான ஆசிய – பசுபிக் பாராளுமன்ற உறுப்பினர்களின் மாநாட்டில் (APPCED) கலந்துகொள்ளுமாறு இலங்கைப் பாராளுமன்றத்திற்குக் கொரியத் தூதுக்குழுவினர் அழைப்பு விடுத்தனர். குறித்த மாநாட்டில் பல நாடுகளின் சார்பில் கொரியா தலைமைத்துவத்தை வகிக்கவுள்ளது.அத்துடன், அடுத்த வருடம் ஜனவரி மாதம் இலங்கையில் நடைபெறவுள்ள சர்வதேசக் கண்காட்சியில் கொரிய வர்த்தக நிறுவனங்களின் பங்கேற்பு குறித்தும் இதன்போது கவனம் செலுத்தப்பட்டது.
2026-11-16
வடக்கு மற்றும் கிழக்கு மாகாணங்களில் மோதல்கள் நிலவிய காலப்பகுதியிலும் அதன் பின்னரும் கைது செய்யப்பட்ட அல்லது சரணடைந்த 12,196 பேர் புனர்வாழ்வளிக்கப்பட்டு சமூகமயப்படுத்தப்பட்டுள்ளதாக கௌரவ பொதுமக்கள் பாதுகாப்பு மற்றும் பாராளுமன்ற அலுவல்கள் அமைச்சர் ஆனந்த விஜேபால தெரிவித்தார்.கௌரவ பாராளுமன்ற உறுப்பினர் வைத்தியர் பத்மநாதன் சத்தியலிங்கம் அவர்கள் வாய்மூல விடைக்காக எழுப்பிய கேள்விகளுக்குப் பதிலளிக்கும்போது அமைச்சர் இதனைத் தெரிவித்தார்.புனர்வாழ்வு செயற்பாட்டின் கீழ் ஆலோசனைச் சேவைகள், யோகா மற்றும் ஆன்மீக நிகழ்ச்சித்திட்டங்கள், அடிப்படைக் கல்வி மற்றும் மொழிப் பயிற்சி நிகழ்ச்சித்திட்டங்கள், கல்விப் பொதுத் தராதர சாதாரண தரம் மற்றும் உயர்தரப் பரீட்சைகளுக்குத் தோற்றுவதற்கான வழிகாட்டல் நிகழ்ச்சித்திட்டங்கள் ஆகியன முன்னெடுக்கப்பட்டுள்ளதாக அமைச்சர் தெரிவித்தார்.அத்துடன், ஓவியம், இசை, நாடகம் மற்றும் அரங்கக் கலை உள்ளிட்ட அழகியல் கலை நிகழ்ச்சித்திட்டங்கள், வாகனச் செலுத்துநர் பயிற்சி மற்றும் விளையாட்டு நிகழ்ச்சித்திட்டங்களும் நடைமுறைப்படுத்தப்பட்டுள்ளதாக அவர் குறிப்பிட்டார்.புனர்வாழ்வளிக்கப்பட்டவர்களின் வாழ்வாதாரத்தை மேம்படுத்தும் நோக்கில் தொழிற்பயிற்சிகள் வழங்கப்பட்டுள்ளதுடன், அப்பயிற்சிகளுக்குத் தேவையான உபகரணங்கள் மற்றும் ஏனைய உதவிகளும் வழங்கப்பட்டுள்ளதாக அமைச்சர் தெரிவித்தார்.மேலும், அவர்களின் வாழ்வாதாரத்தை வலுப்படுத்தும் வகையில் கடனுதவிகள், வீடுகள், தையல் இயந்திரங்கள், மீன்பிடி வலைகள், மிதிவண்டிகள், நீரிறைக்கும் இயந்திரங்கள், தச்சுத் தொழில் உபகரணங்கள், பதப்படுத்தும் உபகரணங்கள், விவசாய உபகரணங்கள், கால்நடைகள் மற்றும் முச்சக்கர வண்டிகள் உள்ளிட்ட பல்வேறு உதவிகள் அரச நிறுவனங்கள் மற்றும் அரச சார்பற்ற நிறுவனங்களினால் வழங்கப்பட்டுள்ளதாகவும் அமைச்சர் வழங்கிய பதிலளில் குறிப்பிடப்பட்டுள்ளது.
2026-11-16
நாட்டின் பல்வேறு மாகாணங்களில் அமைந்துள்ள பாடசாலைகளில் தற்போது தொண்டர் ஆசிரியர்களாகப் பணியாற்றி வரும் 4,700 பேரை ஆசிரியர் உதவியாளர்களாக ஆட்சேர்ப்பு செய்வதற்கு அமைச்சரவை அங்கீகாரம் வழங்கியுள்ளதாக கல்வி மற்றும் உயர்கல்வி பிரதி அமைச்சர் கௌரவ வைத்தியர் மதுர செனவிரத்ன தெரிவித்தார். அமைச்சரவைப் பத்திர இலக்கம் 06/2282/229/085-II இன் பிரகாரம் இந்த ஆட்சேர்ப்புக்கு அங்கீகாரம் வழங்கப்பட்டுள்ளதாகவும் அவர் குறிப்பிட்டார்.கௌரவ பாராளுமன்ற உறுப்பினர் எம்.எஸ். உதுமாலெப்பை அவர்கள் வாய்மூல விடைக்காக எழுப்பிய கேள்விக்குப் பதிலளிக்கும் போதே பிரதி அமைச்சர் இதனைத் தெரிவித்தார்.ஆசிரியர் உதவியாளர்களாக மேல், மத்திய, தென், வடக்கு, கிழக்கு, வடமேல், வடமத்திய, ஊவா மற்றும் சபரகமுவ ஆகிய மாகாணங்களில் நியமிப்பதற்கு அங்கீகாரம் வழங்கப்பட்டுள்ள 4,700 தொண்டர் ஆசிரியர்களில் 462 பேரை வடக்கு மற்றும் கிழக்கு மாகாணங்களில் நியமிப்பதற்கு அனுமதி கிடைத்துள்ளதாகவும் அமைச்சர் தெரிவித்தார்.மேலும், எதிர்காலத்தில் தன்னார்வ ஆசிரியர்களை மீண்டும் ஆசிரியர் சேவைக்கு ஆட்சேர்ப்பு செய்வதற்கான சாத்தியக்கூறுகள் இல்லை என்றும் அமைச்சர் மேலும் தெரிவித்தார்.
2026-11-14
ரயில்களில் மோதி காட்டு யானைகள் உயிரிழப்பதைத் தடுப்பதற்கான நிலைபேறான தீர்வுகளை வழங்கும் நோக்கில் முன்னெடுக்கப்பட்டுள்ள பல்வேறு நடவடிக்கைகள் பாராளுமன்றத்தில் சமர்ப்பிக்கப்பட்டுள்ளன. ரயில்வே உட்கட்டமைப்பு வசதிகளை மேம்படுத்துதல், ரயில்வே ஊழியர்களைத் தெளிவூட்டுதல், காட்டு யானைகளின் வாழ்விடங்களை முகாமைத்துவம் செய்தல் மற்றும் நவீன கண்காணிப்பு மற்றும் அடையாளம் காணும் தொழில்நுட்பங்களை அறிமுகப்படுத்துதல் ஆகியவற்றின் ஊடாக ரயில்களில் மோதி காட்டு யானைகள் உயிரிழப்பதைக் குறைப்பதே இந்நடவடிக்கைகளின் நோக்கமாகும்.கௌரவ பாராளுமன்ற உறுப்பினர் நளின் பண்டார ஜயமஹவினால் வாய்மூல விடைக்காக முன்வைக்கப்பட்ட கேள்விகளுக்குச் சுற்றாடல் அமைச்சர் கௌரவ வைத்தியர் தம்மிக்க பட்டபெந்தி சமர்ப்பித்த எழுத்துமூலப் பதிலில் மேற்கண்ட விடயங்கள் தெரியவந்தன.பாராளுமன்றத்தில் சமர்ப்பிக்கப்பட்ட பதிலுக்கு அமைய, ரயில்வே திணைக்களத்தின் கிழக்கு ரயில் பாதையின் இருபுறங்களிலும் தெளிவாகப் பார்க்கக்கூடிய வகையிலும், சிறந்த முறையில் வேகத்தைக் கட்டுப்படுத்தக்கூடிய வகையிலும் மேம்படுத்தப்பட்ட ரயில் பெட்டிகளை அறிமுகப்படுத்துவதற்கு நடவடிக்கை எடுக்கப்பட்டுள்ளது.அத்துடன், கல்ஓயா சந்தியிலிருந்து ஹிங்குராங்கொட வரையிலும், கல்ஓயா சந்தியிலிருந்து கந்தளாய் வரையிலும் காட்டு யானைகள் ரயில் பாதையைக் கடக்கும் 27 கிலோமீற்றர் நீளமான பகுதிகள் அடையாளம் காணப்பட்டுள்ளன. அப்பகுதிகளில் காட்டு யானைகள் இலகுவாகப் பயணிப்பதற்கு ஏதுவாக, ரயில் பாதையின் தண்டவாளத் தூண்களுக்கு இடையிலான இடைவெளிகளை நிரப்பும் வகையில் 800 கொங்கிறீட் கற்துண்டுகள் பதிக்கும் பணி நிறைவுசெய்யப்பட்டுள்ளது.ரயில் பாதையின் சில பகுதிகளிலும் வளைவுகளிலும் நடமாடும் காட்டு யானைகளை ரயில் சாரதிகளால் அவதானிக்க முடியாத நிலை காணப்படுவதால், அத்தகைய இடங்களில் 10 முதல் 20 மீற்றர் வரையான தூரத்திற்கு அடர்ந்த புதர்களை அகற்ற நடவடிக்கை எடுக்கப்பட்டுள்ளது. இதன் கீழ், வனப் பாதுகாப்புத் திணைக்களத்தினால் 20 கிலோமீற்றர் தூரத்திலுள்ள பகுதிகள் துப்புரவு செய்யப்பட்டுள்ளன.ரயில்வே திணைக்களத்தின் சாரதிகள், ரயில் நிலைய அதிபர்கள், ரயில் பாதைகளுக்குப் பொறுப்பான பொறியியலாளர்கள் மற்றும் ரயில் சாரதிகளின் உதவியாளர்களுக்கான விழிப்புணர்வு நிகழ்ச்சிகள் 2025.05.16 மற்றும் 17ஆம் திகதிகளில் நடத்தப்பட்டுள்ளன.ஹபரணை ரயில் நிலையத்தைக் கடந்து கந்தளாய் நோக்கிப் பயணிக்கும்போது அமைந்துள்ள வனப் பாதுகாப்பு ஒதுக்குப் பகுதிக்குள், ரயில் பாதையிலிருந்து கணிசமான தூரத்தில் நீரைப் பெற்றுக்கொள்ளக்கூடிய வகையில் இரண்டு குளங்களை அமைத்தல் மற்றும் அவற்றைப் போஷிப்பதற்கான நடவடிக்கைகளுக்காக 25.4 மில்லியன் ரூபா நிதி ஒதுக்கீடு நீர்ப்பாசனத் திணைக்களத்திற்கு வழங்கப்பட்டுள்ளது.கல்ஓயா மற்றும் மின்னேரியவுக்கு இடையிலான 141ஆம் இடத்தில், காசிக்கோட்டை ரயில் பாதையைக் கடந்து யானைகள் பயணிக்கும் பகுதியைக் கண்காணிப்பதற்காக CCTV கமராக்கள் பொருத்தப்பட்டுள்ளன. அவை அனுராதபுரம் கட்டுப்பாட்டு அறையினூடாகக் கண்காணிக்கப்படுகின்றன.மேலும், காட்டு யானைகளை அடையாளம் காண்பதற்காக ரயில்களில் வெப்ப உணர்திறன் கமராக்களை (Thermal Detector Cameras) பொருத்தும் முன்னோடித் திட்டம் ஆரம்பிக்கப்பட்டுள்ளதுடன், இலங்கை ரயில்வே திணைக்களம் மற்றும் ஆர்தர் சி. கிளார்க் நவீன தொழில்நுட்ப நிறுவனம் ஆகியவற்றினால் தொடர்ச்சியான பரிசோதனைகள் முன்னெடுக்கப்பட்டு வருகின்றன.ரயில்களில் மோதுண்டு 2020ஆம் ஆண்டு முதல் 2026.10.12ஆம் திகதி வரையான காலப்பகுதியில் 81 யானைகள் உயிரிழந்துள்ளதாகப் பாராளுமன்றத்தில் சமர்ப்பிக்கப்பட்ட பதிலில் குறிப்பிடப்பட்டுள்ளது.
பாராளுமன்றத்திற்கு வருகை தருதல்
பாராளுமன்றத்தின் கையேடு
இலங்கையில் தேர்தல் முறை
பாராளுமன்றம் எவ்வாறு செயல்படுகிறது
பாராளுமன்ற அலுவல்கள்
பதிப்புரிமை © இலங்கை பாராளுமன்றம்.
முழுப்பதிப்புரிமையுடையது.
வடிவமைத்து உருவாக்கியது TekGeeks


