E   |   සි   |  

2023-05-17

செய்தி வகைகள் : குழு செய்திகள் 

இந்நாட்டின் தொழில் பயிற்சிக் கல்வித் துறையில் மூலோபாய அணுகுமுறை

தொழில் பயிற்சிக் கல்வி நிறுவனங்கள் யாவும் கோப் குழுவுக்கு அழைப்பு

  • அனைத்து தொழிற்பயிற்சி நிறுவனங்களையும் ஒரே இடத்தில் கூட்டி, ஒருங்கிணைந்து பொதுவான வேலைத்திட்டத்தைத் தயாரிக்கவும் - கல்வி அமைச்சின் செயலாளருக்கு அறிவுறுத்தல்-  இரண்டு மாதங்களுக்குள் மீண்டும் அழைக்கத் தீர்மானம்
  • மூன்றாம் நிலை மற்றும் தொழிற்கல்வி ஆணைக்குழு தனது கடமைகளை சரியாக நிறைவேற்றவில்லையெனக் குற்றச்சாட்டு -  உடனடியாக அமுலுக்கு வரும் வகையில்  இந்த நிறுவனத்தின் செயலாற்றுகை குறித்த விசேட மதிப்பீட்டை மேற்கொள்ளுமாறு அமைச்சின் செயலாளருக்குப் பணிப்புரை
  • தொழிற்பயிற்சி துறை தொடர்பான நிறுவனக் கட்டமைப்பில் ஏற்றுக்கொள்ளக்கூடிய தரவுக் கட்டமைப்பு எதுவும் இல்லை. எனவே, தேசிய தகவல் கட்டமைப்பை விரைவில் தயாரிக்குமாறும் அறிவுறுத்தல்
  • தொழில்சந்தைக்கு ஏற்ற வகையில் விஞ்ஞான ரீதியில் பாடநெறிகளின் எண்ணிக்கையை குறைக்கவும் அறிவுறுத்தப்பட்டது
  • தொழில் கல்வி தொடர்பான வெளிநாட்டு வேலைவாய்ப்பு, சுற்றுலா, விவசாயம் உள்ளிட்ட அமைச்சுக்களுக்கிடையில் ஒருங்கிணைப்பை ஏற்படுத்த கோப் குழுவினால் உபகுழு

 

இந்நாட்டின் தொழிற்கல்வித் துறையில் உள்ள பிரச்சினைகள் மற்றும் அவற்றுக்கான தீர்வுகள் குறித்து ஆராயும் நோக்கில் இலங்கையில் தொழிற்பயிற்சி தொடர்பான அனைத்து நிறுவனங்களின் பங்குபற்றுதலுடன் அரசாங்கப் பொறுப்பு முயற்சிகள் பற்றிய குழுவின் (கோப் குழு) கூட்டமொன்று அதன் தலைவர் பாராளுமன்ற உறுப்பினர் கௌரவ பேராசிரியர் ரஞ்சித் பண்டார தலைமையில் அண்மையில் (மே 16) நடைபெற்றது.

கல்வி அமைச்சர் கௌரவ சுசில் பிரேமஜயந்தவுடன் கோப் குழுவின் தலைவர் நடத்திய கலந்துரையாடல் மற்றும் கோப் குழுவின் பரிந்துரைகளுக்கு அமைய இந்த நிறுவனங்கள் அனைத்தும் அழைக்கப்பட்டன.

இதற்கமைய, கல்வி அமைச்சு, விளையாட்டு மற்றும் இளைஞர் விவகார அமைச்சு, மூன்றாம் நிலைக்கல்வி மற்றும் தொழிற்கல்வி ஆணைக்குழு (TVEC), தொழிற்பயிற்சி அதிகாரசபை (VTA), தேசிய இளைஞர் சேவை மன்றம், இளைஞர் படை, சமுத்திரவியல் பல்கலைக்கழகம், வாழ்க்கைத்தொழில்சார் தொழில்நுட்பவியல் பல்கலைக்கழகம் (UNIVOTEC), தொழில்நுட்பக் கல்வி மற்றும் பயிற்சித் திணைக்களம், தேசிய பயிலுனர் மற்றும் கைத்தொழில் பயிற்சி அதிகாரசபை (NAITA) என்பன இக்குழு முன்னிலையில் அழைக்கப்பட்டிருந்தன.

இதில், அரசாங்கக் கணக்குகள் பற்றிய குழுவின் (கோபா குழு) தலைவரும் இராஜாங்க அமைச்சருமான கௌரவ லசந்த அழகியவண்ண, பாராளுமன்ற உறுப்பினர்களான கௌரவ தம்மிக்க பெரேரா, பேராதனை பல்கலைக்கழக பொறியியல் பீடத்தின் சிரேஷ்ட பேராசிரியர் ரஞ்சித் திசாநாயக்க, வாழ்க்கைத்தொழில்சார் தொழில்நுட்பவியல் பல்கலைக்கழககத்தின் முன்னாள் உபவேந்தர் சிரேஷ்ட பேராசிரியர் பிரேமலால்.த சில்வா ஆகியோர் குழுவின் அழைப்பின் பேரில் கலந்துகொண்டனர்.

இங்கு கீழ்வரும் விடயங்கள் குறித்து கவனம் செலுத்தப்பட்டது.

அனைத்து தொழிற்பயிற்சி நிறுவனங்களுடனும் ஒருங்கிணைந்து ஒரு பொதுவான திட்டத்தை தயாரிப்பதற்கு செயலாளருக்கு அதிகாரம் வழங்குதல்

அனைத்துத் தொழிற்பயிற்சி நிலையங்களையும் ஒருங்கிணைக்க வேண்டியதன் முக்கியத்துவத்தை சுட்டிக்காட்டிய தலைவர், இந்த அனைத்து நிறுவனங்களின் தலைவர்களையும் ஒரே இடத்திற்கு அழைத்து, நிறுவனங்களின் நோக்கத்தை உடனடியாக ஒரு திசையில் கையாண்டு பொதுவான வேலைத்திட்டத்தை தயாரிக்குமாறு கல்வி அமைச்சின் செயலாளருக்கு அறிவுறுத்தினார். இதில் ஏற்படும் முன்னேற்றங்கள் இரண்டு மாதங்களில் ஆராயப்படும் என்றும் கோப் குழுவின் தலைவர் தெரிவித்தார்.

இலங்கையில் தொழிற்கல்வி தொடர்பான 8 பிரதான நிறுவனங்கள் இருப்பதாகவும், இந்த நிறுவனங்களின் பங்கும் நோக்கங்களும் ஒரே மாதிரியானவை என்றும் கணக்காய்வாளர் நாயகம் சுட்டிக்காட்டினார். வெவ்வேறு நிறுவனங்களில் வெவ்வேறு காலகட்டங்கள் மற்றும் NVQ நிலைகளின் கீழ் ஒரே பாடத்திட்டம் கற்பிக்கப்படுவதால் ஒரு பொதுவான வேலைத்திட்டத்தின் தேவை வலியுறுத்தப்பட்டது.

மூன்றாம் நிலைக்கல்வி மற்றும் தொழிற்கல்வி ஆணைக்குழுவின் வகிபாகம் தொடர்பில் சரியான மதிப்பீட்டை மேற்கொள்வதற்கு அமைச்சின் செயலாளருக்கு அறிவுறுத்தல்

இலங்கையில் தொழிற்பயிற்சி மற்றும் அவை தொடர்பான நிறுவனங்களை ஒழுங்குபடுத்துவதற்காக ஸ்தாபிக்கப்பட்ட மூன்றாம் நிலைக்கல்வி மற்றும் தொழிற்கல்வி ஆணைக்குழு அதன் பணிகளை உரிய முறையில் மேற்கொள்ளவில்லையென குழு சுட்டிக்காட்டியது. ஆணைக்குழுவின் கண்காணிப்பு நடவடிக்கைகள் பலப்படுத்தப்பட வேண்டுமென குழுவின் தலைவர் வலியுறுத்தினார். இதற்கமைய உடனடியாக அமுலுக்கு வரும் வகையில் இந்த நிறுவனத்தின் செயற்பாடுகள் குறித்து விசேட மதிப்பீடு ஒன்றை மேற்கொள்ளுமாறு அமைச்சின் செயலாளருக்கு அவர் பணிப்புரை விடுத்தார்.

தொழிற்பயிற்சி தொடர்பான செயல்முறை மிகவும் கடுமையாகக் கண்காணிக்கப்பட வேண்டும் என்றும் அதற்குத் தேவையான சட்ட அடிப்படையை தயார் செய்ய வேண்டும் என்றும் அவர் ஆணைக்குழுவிடம் வலியுறுத்தினார்.

நிறுவனக் கட்டமைப்பில் ஏற்றுக்கொள்ளக்கூடிய தரவுக் கட்டமைப்பு எதுவும் இல்லை

நிறுவனக் கட்டமைப்பில் ஏற்றுக்கொள்ளக்கூடிய தரவுக் கட்டமைப்பு எதுவும் இல்லாமை பாரியதொரு பிரச்சினையாக இங்கு அடையாளம் காணப்பட்டது. 8 முக்கிய நிறுவனங்கள் தொடர்பாக, நாடளாவிய ரீதியில் உள்ள கிளைகளின் வலையமைப்பில் இயங்கும் பாடநெறிகள், பதிவுசெய்து வெற்றிகரமாக பயிற்சியை முடித்தவர்களின் எண்ணிக்கை, பணியமர்த்தப்பட்டவர்களின் எண்ணிக்கை போன்ற முறையான தரவுக் கட்டமைப்பின் தேவை வலியுறுத்தப்பட்டது.

தொழிற்சந்தைக்கு ஏற்ப விஞ்ஞான ரீதியில் பாடநெறிகளின் எண்ணிக்கையைக் குறைத்தல்

தொழிற்சந்தை மற்றும் வேலைவாய்ப்புத் தொடர்பில் காணப்படும் தேவைக்கு ஏற்ப தயாரிக்கப்பட வேண்டிய பாடநெறிகள் குறித்து கணக்கொடுப்பொன்றை நடத்துமாறு மூன்றாம்நிலைக் கல்வி மற்றும் தொழிற்கல்வி ஆணைக்குழுவுக்கு, கோப் குழு தெரிவித்தது.

இந்தியாவில் 256 தொழிற்பயிற்சி நெறிகள் இருந்தாலும் இலங்கையில் அதனைவிட அதிகமான எண்ணிக்கையான பாடநெறிகள் காணப்படுகின்றமை இங்கு புலப்பட்டது. அதன்படி, தேவையற்ற, காலத்துக்கு ஏற்ற வகையில் மற்றப் பாடநெறிகளை விஞ்ஞான ரீதியில் நீக்குவதற்கும் அறிவுறுத்தல் விடுக்கப்பட்டது.

நிறுவனங்களுக்கிடையில் வளப் பகிர்வுக்கான சரியான ஏற்பாடு இல்லாமை

இந்த ஒவ்வொரு நிறுவனமும் நாடளாவிய ரீதியில் கிளை வலையமைப்பைக் கொண்டிருக்கின்றபோதும், இவற்றுக்கிடையில் வளங்களைப் பகிர்வதற்கான முறையான வேலைத்திட்டம் இல்லை என்பது தொடர்பிலும் குழுவில் கலந்துரையாடப்பட்டது. இது தொடர்பில் கோப் குழுவின் தலைவர் குறிப்பிடுகையில், பொதுவாக வளங்களை எவ்வாறு பயன்படுத்தலாம் என்பதன் அடிப்படையில் ஒரு வேலைத்திட்டம் தயாரிக்கப்பட வேண்டும் என்றும், அதன் முன்னேற்றம் இரண்டு மாதங்களில் ஆராயப்படும் என்றார்.

வெளிநாடுகளில் உள்ள இதுபோன்ற நிறுவனங்களுடன் இணைந்து செயற்பட கடந்த காலங்களில் வாய்ப்புக்கள் கிடைக்கவில்லையென்றும், இது தொடர்பில் நடவடிக்கை எடுக்க வேண்டும் என்றும் குழு அறிவித்தது.

பாடநெறிகள் தொடர்பான வீடியோ உள்ளடக்கத்தை உருவாக்குதல்

பாடநெறிகளின் தரம் மற்றும் ஒருமைப்பாட்டைப் பேணுவதற்கு, தொழிற்பயிற்சி வகுப்புகள் தொடர்பான வீடியோ உள்ளடக்கத்தை தயாரித்து இணையம் மூலம் விநியோகிப்பது மிகவும் முக்கியமானது என்று இங்கு கலந்துரையாடப்பட்டது. அத்துடன், பயிற்றுவிப்பாளர் பற்றாக்குறை உள்ளிட்ட பிரச்சினைகளுக்கு இது தீர்வாக அமையும் என்றும் குழு சுட்டிக்காட்டியது. இந்தக் காணொளித் தயாரிப்பிற்குத் தேவையான உதவிகள் முற்றிலும் இலவசமாக வழங்கப்படும் எனப் பாராளுமன்ற உறுப்பினர் கௌரவ தம்மிக பெரேரா இங்கு உறுதியளித்தார். அதன்படி, அதற்கு தேவையான வசதிகளை செய்து தருமாறு அமைச்சின் செயலாளருக்கு பணிப்புரை வழங்கப்பட்டது. இந்த நடவடிக்கைகள் விரைவில் முடிக்கப்படும் என்றும் ஆணைக்குழுவின் தலைவர் உறுதியளித்தார்.

அமைச்சுக்களுக்கு இடையிலான ஒருங்கிணைப்பை மேற்கொள்ள உபகுழு

வெளிநாட்டு மொழிகள், சுற்றுலாத் தொழில், விவசாயம் போன்ற பாடங்களை தொழில்முறை பயிற்சி மற்றும் பிற ஒருங்கிணைப்பு நடவடிக்கைகளுக்கு தேவையான பாடநெறிகளாகச் சேர்ப்பதற்கு உபகுழு நியமிக்கப்பட்டது.

இலங்கையில் தொழிற்பயிற்சியை சரியான பாதையில் செலுத்தும் இச்செயற்பாடு ஒரு தேசிய பணி என்பதால் அதற்கு அனைவரின் அர்ப்பணிப்பும் எதிர்பார்க்கப்படுவதாக குழுவின் தலைவர் தெரிவித்தார்.

கோப் குழுவின் உறுப்பினர்களான, இராஜாங்க அமைச்சர் கௌரவ ஜகத் புஸ்பகுமார, கௌரவ அனுர பிரியதர்ஷன யாப்பா, கௌரவ தயாசிறி ஜயசேகர, கௌரவ இரான் விக்ரமரத்ன, கௌரவ சமிந்த விஜேசிறி, கௌரவ சஞ்சீவ எதிரிமான்ன, கௌரவ ஜகத் குமார சுமித்ரராச்சி, கௌரவ (மேஜர்) சுதர்சன தெனிபிட்டிய, கௌரவ எம்.ராமேஸ்வரன் ஆகியோர் இதில் கலந்துகொண்டனர்.

 

1 2

10 18

 



தொடர்புடைய செய்திகள்

2026-11-16

யானை – மனித மோதலைக் குறைத்தல் மற்றும் யானைகளைப் பாதுகாப்பது தொடர்பில் புதிய தொழில்நுட்ப, நடைமுறைத் தீர்வுகளைக் கண்டறிவது குறித்து துறைசார் மேற்பார்வைக் குழுவில் கலந்துரையாடல்

சுற்றாடல், கமத்தொழில் மற்றும் வளங்களின் நிலைத்தன்மை பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் ஹெக்டர் அப்புஹாமி தலைமையில் அண்மையில் பாராளுமன்றத்தில் கூடியது.இதில், யானை – மனித மோதலைக் கட்டுப்படுத்துதல், காட்டு யானைகளின் இடம்பெயர்வு முறைகளைக் கண்டறிதல் மற்றும் யானைகளைப் பாதுகாப்பதற்குப் புதிய தொழில்நுட்பங்களைப் பயன்படுத்துதல் தொடர்பில் விரிவாகக் கலந்துரையாடப்பட்டது. அத்துடன், காவந்திஸ்ஸ யானையின் மரணம் தொடர்பிலும் கவனம் செலுத்தப்பட்டது.யானைகளின் வாழ்விடங்கள் இழக்கப்படுதல், பாரம்பரிய யானை வழித்தடங்கள் தடைப்படுதல் மற்றும் குடியிருப்புகள், விவசாய நிலங்களை அண்மித்த பகுதிகளில் உணவு தேடிச் செல்லுதல் ஆகியன யானை – மனித மோதல் அதிகரிப்பதற்கான பிரதான காரணங்களாக இதன்போது கலந்துரையாடப்பட்டன. யானைகளின் இடம்பெயர்வு முறைகளைக் கண்டறிவதற்காக GPS மற்றும் செய்மதிக் கழுத்துப்பட்டித் தொழில்நுட்பத்தைப் பயன்படுத்துவதன் முக்கியத்துவமும் இதன்போது வலியுறுத்தப்பட்டது.யானை – மனித மோதலைக் குறைப்பதற்காக பிரதேச மட்டத்தில் வனவிலங்கு அதிகாரிகள், கிராம உத்தியோகத்தர்கள் மற்றும் கிராம மக்களை உள்ளடக்கிய கூட்டுக் குழுக்களை அமைத்தல், சமூகப் பங்கேற்பை வலுப்படுத்துதல் மற்றும் முன்கூட்டிய எச்சரிக்கைத் தொடர்பாடல் வலையமைப்புகளைச் செயற்படுத்துதல் தொடர்பிலும் கருத்துக்கள் பரிமாறப்பட்டன.அத்துடன், நோய்வாய்ப்பட்ட மற்றும் காயமடைந்த யானைகளுக்குச் சிகிச்சையளிக்கும்போது வனவிலங்கு கால்நடை மருத்துவர்கள் எதிர்கொள்ளும் சவால்கள் குறித்தும் கலந்துரையாடப்பட்டது. வனவிலங்கு திணைக்களத்தின் கால்நடை மருத்துவ அதிகாரிகளின் சேவை, யானைகளுக்கு மயக்க மருந்து செலுத்தும்போது காணப்படும் ஆபத்துகள் மற்றும் களத்தில் சிகிச்சையளிப்பதற்குத் தேவையான நடமாடும் மருத்துவ வசதிகள், நடமாடும் எக்ஸ்-ரே இயந்திரங்கள் போன்ற தொழில்நுட்ப உபகரணங்களின் அவசியம் குறித்தும் இதன்போது கவனம் செலுத்தப்பட்டது.இக்கூட்டத்தில் கௌரவ பாராளுமன்ற உறுப்பினர்களான கிங்ஸ் நெல்சன், உபுல் கித்சிறி, சட்டத்தரணி எம்.ஏ.சி.எஸ். சதுரி கங்கானி, சுதத் பலகல்ல, கிட்ணன் செல்வராஜ் மற்றும் சட்டத்தரணி பாக்ய ஸ்ரீ ஹேரத் ஆகியோர் கலந்துகொண்டனர்.


2026-11-14

ஸ்ரீலங்கன் விமான சேவையை இலாபமீட்டும் நிலைக்குக் கொண்டுவர ஐந்தாண்டுத் திட்டம் – விமானங்களின் எண்ணிக்கையை அதிகரித்தல் மற்றும் கடன் சுமையைக் கட்டுப்படுத்துதல் தொடர்பில் கவனம்

ஸ்ரீலங்கன் விமான சேவை எதிர்நோக்கியுள்ள நிதி நெருக்கடி, அதிகளவிலான விமானப் பயணத் தாமதங்கள், கடன் சுமை மற்றும் புதிய விமானங்களைக் கொள்வனவு செய்வதில் ஏற்பட்டுள்ள கொள்வனவு நடைமுறைத் தாமதங்கள் தொடர்பில் உட்கட்டமைப்பு வசதிகள் மற்றும் மூலோபாய அபிவிருத்தி பற்றிய துறைசார் மேற்பார்வைக் குழுவில் விரிவாகக் கலந்துரையாடப்பட்டது.குறித்த குழு, அதன் தலைவர் கௌரவ பாராளுமன்ற உறுப்பினர் எஸ்.எம். மரிக்கார் தலைமையில் அண்மையில் பாராளுமன்றத்தில் கூடியபோதே இது தொடர்பில் கவனம் செலுத்தப்பட்டது.தற்போது 23 விமானங்களைக் கொண்டுள்ள விமானச் சேவையின் விமானத் தொகுதி போதுமானதாக இல்லாமை மற்றும் அந்த விமானங்கள் சுமார் 12 வருடங்கள் பழைமையானவையாக இருப்பதால் விமானப் பயணங்களைப் பாதிக்கும் தொழில்நுட்பக் கோளாறுகள் மற்றும் தாமதங்கள் தொடர்பில் இதன்போது கலந்துரையாடப்பட்டது. ஒரு விமானத்தில் தொழில்நுட்பக் கோளாறு அல்லது வேறு காரணங்களால் தாமதம் ஏற்படும்போது, மாற்று விமானங்களைப் பயன்படுத்துவதில் காணப்படும் மட்டுப்பாடுகள் காரணமாக ஒட்டுமொத்த விமானப் போக்குவரத்து வலையமைப்பும் பாதிக்கப்படுவதாகவும் இதன்போது சுட்டிக்காட்டப்பட்டது.விமானங்களைக் கொள்வனவு செய்வதற்காக கடந்த காலங்களில் முன்னெடுக்கப்பட்ட வழமையான கொள்வனவு நடைமுறைகள் தோல்வியடைந்தமை மற்றும் அதனுடன் தொடர்புடைய நீண்டகாலத் தாமதங்கள் குறித்தும் குழுவின் கவனம் செலுத்தப்பட்டது. இந்நிலைக்குத் தீர்வாக விமானங்கள் மற்றும் அவற்றுடன் தொடர்புடைய உபகரணங்களைக் கொள்வனவு செய்வதற்கான விசேட கொள்வனவு வழிகாட்டுதல்கள் தயாரிக்கப்பட்டுள்ளதுடன், அவற்றை வர்த்தமானியில் வெளியிடுவதற்கான நடவடிக்கைகள் எடுக்கப்பட்டுள்ளதாகவும் இதன்போது தெரிவிக்கப்பட்டது. அத்துடன், கொள்வனவு நடவடிக்கைகளை நேரடியாகக் கண்காணிப்பதற்காக அமைச்சு மட்டத்தில் விசேட கொள்வனவுப் பிரிவொன்றும் நிறுவப்பட்டுள்ளதாகத் தெரிவிக்கப்பட்டது.புதிய கொள்வனவு வழிகாட்டுதல்களின் கீழ் விமானத் தொகுதியை விரிவுபடுத்தத் திட்டமிடப்பட்டுள்ளதுடன், எதிர்வரும் ஜூன் மாதமளவில் புதிய குறுகிய உடற்பகுதியைக் கொண்ட (Narrow-body) விமானமொன்றையும், அகன்ற உடற்பகுதியைக் கொண்ட (Wide-body) இரண்டு விமானங்களையும் விமானத் தொகுதியில் இணைத்துக்கொள்ள எதிர்பார்க்கப்படுவதாகவும் கலந்துரையாடப்பட்டது. 2029ஆம் ஆண்டளவில் விமானத் தொகுதியை ஆகக்குறைந்தது 29 விமானங்களாக அதிகரிப்பது ஐந்தாண்டுத் திட்டத்தின் இலக்காகும் என்றும் குறிப்பிடப்பட்டது.ஸ்ரீலங்கன் விமான சேவையின் நிதி நிலைமையை மேம்படுத்துவதற்காக, பழைய வங்கிக் கடன்கள் மற்றும் பிணைமுறிக் கடன்கள் உள்ளிட்டவற்றைப் பொறுப்பேற்பது உட்பட பல்வேறு நடவடிக்கைகளை திறைசேரி முன்னெடுத்துள்ளதாக இதன்போது விளக்கமளிக்கப்பட்டது. அத்துடன், விமானங்களுக்கான குத்தகைக் கட்டணங்களைக் குறைத்தல், எரிபொருள் செலவுகளைக் கட்டுப்படுத்துதல் மற்றும் விமான சேவையின் வருமானத்தை அதிகரிப்பதற்கான வர்த்தக உபாயங்களை நடைமுறைப்படுத்துதல் தொடர்பிலும் கவனம் செலுத்தப்பட்டது.மத்திய கிழக்கு பிராந்தியத்தில் நிலவும் நெருக்கடி நிலைமை, எரிபொருள் விலை அதிகரிப்பு மற்றும் சர்வதேச விமான சேவைகளுடனான போட்டித்தன்மை ஆகியனவும் ஸ்ரீலங்கன் விமான சேவையின் செயற்பாடுகள் மற்றும் வருமானத்தில் தாக்கம் செலுத்துவதாக இதன்போது கலந்துரையாடப்பட்டது.மேலும், ஸ்ரீலங்கன் விமான சேவையை மறுசீரமைப்பதற்காக அரசாங்கத்தினால் நியமிக்கப்பட்ட குழு, புதிய முதலீட்டாளர்களைப் பெற்றுக்கொள்ளுதல், அரச-தனியார் பங்காண்மையை ஏற்படுத்துதல் அல்லது அரசாங்கத்தின் கீழ் தொடர்ந்து நிர்வகித்து, அதன் செலவுகளை ஈடுகட்டக்கூடிய நிலைக்குக் கொண்டுவருதல் உள்ளிட்ட மாற்று வழிகள் குறித்து ஆராய்ந்து வருவதாகவும் தெரிவிக்கப்பட்டது.அதற்கமைய, அடுத்த இரண்டு அல்லது மூன்று வருடங்களுக்குள் ஸ்ரீலங்கன் விமான சேவையை அதன் செலவுகளை ஈடுகட்டக்கூடிய நிலைக்குக் கொண்டுவருவதற்காக எடுக்கப்பட வேண்டிய நடவடிக்கைகள் உள்ளடங்கிய விரிவான அறிக்கையொன்றை நவம்பர் 30ஆம் திகதிக்கு முன்னர் பாராளுமன்றத்திற்கும் அமைச்சுக்கும் சமர்ப்பிக்குமாறு உரிய அதிகாரிகளுக்கு குழு அறிவுறுத்தியது.இந்தக் குழுக் கூட்டத்தில் கௌரவ பாராளுமன்ற உறுப்பினர்களான அஜித் பி. பெரேரா, நளின் பண்டார ஜயமஹ, ரவீந்திர பண்டார, மஞ்சுள சுரவீர ஆரச்சி, சதுர கலப்பத்தி, தனுஷ்க ரங்கநாத், ஜகத் விதான, சாந்த பத்ம குமார சுபசிங்க மற்றும் சட்டத்தரணி கீதா ஹேரத் ஆகியோர் கலந்துகொண்டனர்.


2026-11-14

இலங்கையின் இறக்குமதி வரிக் கொள்கைகள் மற்றும் வர்த்தக உடன்படிக்கைகள் தொடர்பில் வழி வகைகள் பற்றிய குழுவில் கலந்துரையாடப்பட்டது

இலங்கையின் இறக்குமதி வரிக் கொள்கைகள் மற்றும் வர்த்தக உடன்படிக்கைகள் தொடர்பில் கௌரவ பாராளுமன்ற உறுப்பினர் விஜேசிறி பஸ்நாயக்க அவர்களின் தலைமையில் கூடிய வழி வகைகள் பற்றிய குழுவில் விரிவாகக் கலந்துரையாடப்பட்டது.வணிகத் திணைக்களத்தின் பணிப்பாளர் நாயகம் (பதில்) சோமசேன மகாதிவுல்வேவ அவர்கள் இது பற்றிய விரிவான விளக்கத்தைக் குழுவுக்கு வழங்கினார். இலங்கையின் இரு தரப்பு மற்றும் பல்தரப்பு வர்த்தக உடன்படிக்கைகளின் நிலைமைகள் மற்றும் அவற்றைத் தொடர்ந்து முன்கொண்டு செல்வது உள்ளிட்ட விடயங்கள் குறித்து இங்கு கலந்துரையாடப்பட்டது.கலந்துரையாடல் மட்டத்தில் இருக்கும் வர்த்தக உடன்படிக்கைகள் குறித்து சாத்தியக் கூற்று ஆய்வுகளை மேற்கொண்டு தொடர்ச்சியாக அவற்றை முன்னெடுத்துச் செல்வதற்கான நடவடிக்கைகளை எடுக்குமாறு குழு வலியுறுத்தியது.இந்தக் குழுக் கூட்டத்தில் கௌரவ பிரதியமைச்சர்களான சதுரங்க அபேசிங்க, எரங்க வீரரத்ன மற்றும் கௌரவ பாராளுமன்ற உறுப்பினர்களான அசோக சபுமல் ரண்வல, திலின சமரக்கோன், சம்பிக்க ஹெட்டிஆரச்சி, சதுர கலப்பதி உள்ளிட்டோர் கலந்துகொண்டனர். 


2026-11-13

வெளிநாட்டுப் பயங்கரவாதிப் போராளிகளைத் தடுத்தல் சட்டமூலத்திற்கு துறைசார் மேற்பார்வைக் குழுவில் அங்கீகாரம்

வெளிநாட்டுப் பயங்கரவாதிப் போராளிகளைத் தடுத்தல் சட்டமூலத்திற்கு பொருளாதார அபிவிருத்தி மற்றும் சர்வதேச உறவுகள் பற்றிய துறைசார் மேற்பார்வைக் குழுவில் அங்கீகாரம் வழங்கப்பட்டது. சர்வதேச உறவுகள் பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் சட்டத்தரணி லக்மாலி ஹேமச்சந்திர அவர்களின் தலைமையில் அண்மையில் பாராளுமன்றத்தில் கூடியபோதே இச்சட்டமூலம் ஆராயப்பட்டு அங்கீகரிக்கப்பட்டது. வெளிநாட்டு பயங்கரவாதிப் போராளிகளால் எதிர்நோக்கப்படும் அச்சுறுத்தலைத் தடுத்தல் மற்றும் ஒடுக்குதல் தொடர்பான 2014ஆம் ஆண்டு செப்தெம்பர் மாதம் 24ஆம் திகதி ஏற்றுக்கொள்ளப்பட்ட ஐக்கிய நாடுகள் பாதுகாப்புப் பேரவைத் தீர்மானம் 2178 இற்கு பயன்கொடுப்பதற்கும், அத்துடன் அவற்றுடன் தொடர்புபட்ட அல்லது அவற்றின் இடைநேர்விளைவான கருமங்களுக்காக ஏற்பாடு செய்வதற்குமான சட்டமூலமாக இது சமர்ப்பிக்கப்பட்டுள்ளது.இச்சட்டமூலத்தை வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் கடந்த ஒக்டோபர் மாதம் 20ஆம் திகதி முதலாவது மதிப்பீட்டுக்காகப் பாராளுமன்றத்தில் சமர்ப்பித்திருந்தார்.இலங்கை பிரஜையொருவர் அல்லது இலங்கை பிரஜை  அல்லாத வேறொரு நாட்டின் பிரஜை ஒருவர் இலங்கையில் சமுகமாயிருக்கையில், அல்லது இலங்கைக்கு வெளியே தவறிழைத்திருந்து அது அந்நாட்டின் சட்டத்தின் கீழ் தவறொன்றாக இருப்பின் இச்சட்டத்தின் கீழ் இலங்கையில் நடவடிக்கை எடுக்க முடியும். பயங்கரவாத செயல்களை மேற்கொள்ளல், திட்டமிடுதல், தயார்செய்தல் அல்லது அதில் பங்குபற்றுதல், பயங்கரவாத பயிற்சிகளை வழங்குதல் அல்லது பெறுதல் போன்றவை இச்சட்டத்தின் கீழ் தவறுகளாகக் குறிப்பிடப்பட்டிருப்பதாக அதிகாரிகள் குழுவில் விளக்கமளித்தனர்.புலம்பெயர்ந்து வாழும் இலங்கையர்களை இன ரீதியாக இலக்குவைத்து கொண்டுவரப்படும் சட்ட ஏற்பாடு இல்லையென்றும் அதிகாரிகள் குறிப்பிட்டனர். விரிவான கலந்துரையாடல்களைத் தொடர்ந்து குறித்த சட்டமூலத்திற்கு குழு அங்கீகாரம் வழங்கியது. குழுவின் உறுப்பினரான கௌரவ பாராளுமன்ற உறுப்பினர் சிவஞானம் சிறிதரன் இச்சட்டமூலத்திற்கு தனது எதிர்ப்பினைப் பதிவுசெய்தார்.இக்குழுக் கூட்டத்தில் கௌரவ பாராளுமன்ற உறுப்பினர்களான சுரங்க ரத்னாயக்க, திலின சமரக்கோன், விஜேசிறி பஸ்நாயக்க, சிவஞானம் சிறிதரன் உள்ளிட்டோரும், வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சு, பாதுகாப்பு அமைச்சு மற்றும் சட்டமா அதிபர் திணைக்களம், சட்டவரைஞர் திணைக்களம் ஆகியவற்றைப் பிரதிநிதித்துவப்படுத்தி அரசாங்க அதிகாரிகளும் கலந்துகொண்டனர். 






பதிப்புரிமை © இலங்கை பாராளுமன்றம்.

முழுப்பதிப்புரிமையுடையது.

வடிவமைத்து உருவாக்கியது  TekGeeks