2023-09-21
GSP பிளஸ், ஐரோப்பா மற்றும் வட அமெரிக்க பிராந்தியங்களுடனான வர்த்தகத் தொடர்புகள் பற்றி முன்வைத்த இலங்கை மத்திய வங்கியின் அதிகாரிகள் இந்த விடயங்கள் தொடர்பில் குழுவில் வெளிப்படுத்தினர்.
இலங்கை மத்திய வங்கியின் அதிகாரிகள், GSP பிளஸ், ஐரோப்பா மற்றும் வட அமெரிக்க பிராந்தியங்களுடனான வர்த்தகத் தொடர்புகளின் தற்போதைய நிலை பற்றி குழுவில் விடயங்களை முன்வைத்ததுடன், இது தொடர்பில் குழுவில் விரிவாக கலந்துரையாடப்பட்டது.
பாராளுமன்ற உறுப்பினர் கௌரவ (சட்டத்தரணி) நாமல் ராஜபக்ஷ தலைமையில் 2023.09.19 ஆம் திகதி சர்வதேச தொடர்புகள் பற்றிய துறைசார் மேற்பார்வைக் குழு கூடிய போதே இந்த விடயங்கள் கலந்துரையாடப்பட்டன.
இதில் இளைஞர் பிரதிநிதிகள் சிலருக்கும் சிக்கல்கள் மற்றும் முன்மொழிவுகளை முன்வைப்பதற்கு குழுவினால் சந்தர்ப்பம் வழங்கப்பட்டது.
அதற்கமைய, இலங்கை காரீயம் ஏனைய கனிய வளங்கள் கொண்ட நாடாக இருந்தாலும், அந்தக் கனிய வளங்களை பெறுமதி சேர்க்கப்பட்ட தயாரிப்புக்களாக ஏற்றுமதி செய்வதில் குறைந்த அளவிலான செயல்திறன் கொண்டிருப்பதாகக் குழுவில் பங்கேற்ற இளைஞர் பிரதிநிதிகள் தெரிவித்தனர்.
போகல காரீய சுரங்கம், கஹட்டகஹ சுரங்கம், ராகெதர சுரங்கம் மற்றும் ஏனைய சுரங்கங்கள் இலங்கையில் இருந்தாலும் அவற்றில் பெறுமதி சேர்க்கப்பட்ட தயாரிப்புக்கள் மேற்கொள்ளப்படுவதில்லை என இதன்போது இளைஞர் பிரதிநிதிகள் சுட்டிக்காட்டியதுடன் நேரடியான சுரங்க அகழ்வு மற்றும் ஏற்றுமதியை அடிப்படையாகக் கொண்ட சந்தையொன்று மாத்திரம் காணப்படுவதாக அவர்கள் தெரிவித்தனர்.
இதற்குப் பதிலளித்த குழுவின் தலைவர், எதிர்கால அபிவிருத்தி நடவடிக்கைகளுக்காக இலங்கை நனோ தொழில்நுட்ப நிறுவகத்துடன் (SLINTEC) நெருக்கமாக செயற்பட்டு வருவதாகவும், தென் கொரிய மற்றும் ஜப்பானிய தொழில்நுட்ப நிறுவனங்கள் இந்நாட்டில் தமது தொழிற்சாலைகளை நிறுவுவது குறித்து கலந்துரையாடியுள்ளதாகவும் தெரிவித்தார். எதிர்பார்த்த அபிவிருத்திகள் எட்டப்படாவிட்டாலும், சந்தையை உருவாக்குவதற்கு கைத்தொழில்களை இணைத்து இத்துறையை அபிவிருத்தி செய்வதற்கு உரிய அதிகாரிகள் செயற்பட்டு வருவதாகவும் குழுவின் தலைவர் மேலும் தெரிவித்தார்.
இறக்குமதி மற்றும் ஏற்றுமதி கொடுக்கல்வாங்கல்களை எளிதாக்கும் வகையில் அறிமுகப்படுத்தப்பட்ட ஒற்றை சாளர இயக்க முறைமையின் தற்போதைய நிலை மேலும் சீரமைக்கப்பட வேண்டும் என்பது குழுவின் கருத்தாக இருந்தது. இலங்கை முதலீட்டு சபை, முதலீட்டாளர் ஒருவருக்கு அனுமதி வழங்க முன்னர் அது சம்பந்தமான பல அனுமதிகள் பெற்றுக்கொள்ள வேண்டும் என குழு சுட்டிக்காட்டியதுடன், வகைப்படுத்தலின் பிரகாரம் அனுமதி வழங்கும் செயன்முறை பற்றி கருத்திற்கொள்ளுமாறு சுட்டிக்காட்டியது.
அத்துடன், ஒற்றை சாளர இயக்க முறைமை எதிர்பார்க்கப்பட்ட அளவில் வெற்றியடையாமைக்குக் காரணம் அரசாங்கத்தினதோ அதிகாரிகளினதோ திறமையின்மை அல்ல என்றும், சட்டக் கட்டமைப்பில் காணப்படும் சில இடைவெளிகளே என குழு மேலும் சுட்டிக்காட்டியது. அதற்கமைய, சில சட்டங்களை மறுஆய்வு செய்து திருத்தம் செய்ய வேண்டும் என்று துறைசார் மேற்பார்வைக் குழுவின் கருத்தாக இருந்தது.
உற்பத்தி செலவு மற்றும் பல்வேறு பொருட்களை ஏற்றுமதி செய்வது தொடர்பான தொழில்நுட்ப சிக்கல்களை தீர்க்க பொறிமுறையொன்று தயாரிக்கப்பட வேண்டும் குழு வலியுறுத்தியது. இது தொடர்பில் கருத்து தெரிவித்த குழுவின் தலைவர், உள்நாட்டு சந்தையில் கூட குறிப்பிட்ட சில பொருட்களுக்கான தேவை காணப்படுகின்ற போதிலும் விநியோகச் சங்கிலியில் தொடர்ச்சி இன்மை பாரிய சிக்கலாகும் எனத் தெரிவித்தார். தொடர்ச்சி இன்மையால் விலை அதிகரிப்பதாகவும் இதனால் கொள்வனவாளர்கள் இலக்கப்படுவதாகவும் தலைவர் குறிப்பிட்டார்.
உற்பத்திச் செலவு அதிகரிப்பது சிக்கலானது எனவும், இந்தச் சிக்கலை தீர்ப்பதற்கு பொறிமுறையொன்றை அமைப்பது தொடர்பில் கண்டறியுமாறு குழுவினால் அதிகாரிகளுக்கு சுட்டிக்காட்டப்பட்டது.
வெளிநாடுகளிலுள்ள இலங்கை தூதரகங்கள் மற்றும் உயர்ஸ்தானிகராலயங்களில் காணப்படும் பணியாட்கள் வெற்றிடத்துக்கு நிரந்தரத் தீர்வு வழக்கும் வரை தொண்டு அடிப்படையில் சேவையை வழங்க விரும்புபவர்களை இணைத்துக்கொள்ள நடவடிக்கை எடுக்குமாறு குழுவின் தலைவரினால் வெளிவிவகார அமைச்சின் அதிகாரிகளுக்கு பரிந்துரை வழங்கப்பட்டது.
ஐரோப்பா மற்றும் வட அமெரிக்க பிராந்தியங்களுடனான வர்த்தகத் தொடர்புகளை மேலும் வலுப்படுத்துவதற்கு இலங்கை தூதரகங்களில் பணியாற்றும் சம்பந்தப்பட்ட அதிகாரிகளின் விரிவான தலையீட்டின் அவசியம் தொடர்பில் விளக்கிய குழு, அதற்குத் தேவையான நடவடிக்கையை தாமதமின்றி எடுக்குமாறு வெளிவிவகார அமைச்சின் அதிகாரிகளுக்கு குழுவின் தலைவர் ஆலோசனை வழங்கினார்.
பாராளுமன்ற உறுப்பினர்களான, கௌரவ (பேராசிரியர் ஜி.எல். பீரிஸ், கௌரவ நிரோஷன் பெரேரா, கௌரவ யதாமினி குணவர்தன, கௌரவ மதுர விதானகே அகிய குழுவின் உறுப்பினர்கள் இக்கூட்டத்தில் கலந்துகொண்டதுடன், பாராளுமன்ற உறுப்பினர் கௌரவ சந்திம வீரக்கொடி குழுவின் தலைவரின் அனுமதியுடன் கூட்டத்தில் கலந்துகொண்டார்.
வெளிவிவகார அமைச்சு, இலங்கை மத்திய வங்கி, இலங்கை ஏற்றுமதி அபிவிருத்தி சபை மற்றும் குடிவரவு மற்றும் குடியகல்வுத் திணைக்களத்தைப் பிரதிநிதித்துவப்படுத்தி அதிகாரிகள் சிலரும் இந்தக் கூட்டத்தில் கலந்துகொண்டதுடன், ர்வதேச தொடர்புகள் பற்றிய துறைசார் மேற்பார்வைக்குவின் இளைஞர் பிரதிநிதிகள் சிலரும் குழுவின் தலைவரின் அழைப்பில் கலந்துகொண்டனர்.
2026-09-17
இலங்கையின் கனியவள எண்ணெய் வளங்களை ஆராய்தல் மற்றும் அபிவிருத்தி செய்வதற்கான முதலீட்டு முன்மொழிவுகளை கோருதல் மற்றும் அதனுடன் தொடர்புடைய செயன்முறையை முறைப்படுத்துதல் தொடர்பான ஒழுங்குவிதிக்கு வலுசக்தி அலுவல்கள் பற்றிய அமைச்சுசார் ஆலோசனைக் குழுவில் அங்கீகாரம் வழங்கப்பட்டது.துறைமுகங்கள் மற்றும் சிவில் விமான சேவைகள் மற்றும் வலுசக்தி கௌரவ அமைச்சர் அனுர கருணாதிலக தலைமையில் அண்மையில் (செப். 11) பாராளுமன்றத்தில் நடைபெற்ற வலுசக்தி அலுவல்கள் பற்றிய அமைச்சுசார் ஆலோசனைக் குழுக் கூட்டத்திலேயே இந்த அங்கீகாரம் வழங்கப்பட்டது.2021 ஆம் ஆண்டின் 21 ஆம் இலக்க, பெற்றோலிய வளங்கள் சட்டத்தின் 17 ஆம் பிரிவுடன் சேர்த்து வாசிக்கப்படும் 48 ஆம் பிரிவின் கீழ் வலுசக்தி அமைச்சரினால் ஆக்கப்பட்டவையும் அமைச்சரவையினால் அங்கீகரிக்கப்பட்டு, 2026 யூலை 16 ஆம் திகதிய 2497/37ஆம் இலக்க அதிவிசேட வர்த்தமானப் பத்திரிகையில் பிரசுரிக்கப்பட்ட ஒழுங்குவிதிகள் வெளியிடப்பட்டிருந்தன.குறித்த ஒழுங்குவிதியின் பிரகாரம், அடையாளம் காணப்பட்ட ஒன்று அல்லது அதற்கு மேற்பட்ட பகுதிகளில் கனியவள எண்ணெய் வளங்களை ஆராய்வதற்கு அல்லது அபிவிருத்தி செய்வதற்கு எதிர்பார்க்கும் எந்தவொரு நபரும், முதலீட்டு முன்மொழிவொன்றை சமர்ப்பிக்க வேண்டும். இதன்போது, தொடர்புடைய கேள்விப்பத்திரத்தில் குறிப்பாகக் குறிப்பிடப்பட்டுள்ள நிர்வாகக் கட்டணத்தையும் செலுத்த வேண்டும்.இந்தக் கூட்டத்தில் கௌரவ வலுசக்தி பிரதி அமைச்சர் அர்கம் இலியாஸ், பாராளுமன்ற உறுப்பினர்கள் மற்றும் எரிசக்தி அமைச்சின் அதிகாரிகள் உள்ளிட்ட பலர் கலந்துகொண்டனர்.
2026-09-17
பல்கலைக்கழகங்களில் இடம்பெறும் பகிடிவதைகள் தொடர்பான விசாரணைகளில் பாதிக்கப்பட்ட மாணவர்களுக்கு நம்பிக்கை ஏற்படுத்தும் வகையில் பல்கலைக்கழங்கள் நடவடிக்கை எடுக்க வேண்டும் என கௌரவ பிரதமரும், கல்வி, உயர் கல்வி மற்றும் தொழிற் கல்வி அமைச்சருமான கலாநிதி ஹரினி அமரசூரிய வலியுறுத்தினார்.கல்வி, உயர் கல்வி மற்றும் தொழிற் கல்வி அலுவல்கள் பற்றிய அமைச்சுசார் ஆலோசனைக் குழுவின் உயர்கல்வித் துறை தொடர்பான உபகுழுவின் கூட்டம் அவர் தலைமையில் நடைபெற்றபோதே இதனை வலியுறுத்தினார். உயர்கல்வித்துறையில் குறிப்பாக பல்கலைக்கழகங்களில் காணப்படும் வெற்றிடங்களை நிரப்புவது மற்றும் பகிடிவதைகள் குறித்த விடயங்களைக் கையாள்வது தொடர்பில் இக்குழுக் கூட்டத்தில் விரிவாகக் கலந்துரையாடப்பட்டது.பல்கலைக்கழகங்களில் இடம்பெறும் பகிடிவதைகளைக் கட்டுப்படுத்தும் விடயத்தில் பல்கலைக்கழகங்களுக்கு தார்மீக கடமை இருப்பதாகவும், பாதிக்கப்படும் மாணவர்கள் பல்கலைக்கழகங்களின் விசாரணை கட்டமைப்பில் நம்பிக்கை கொள்ள வேண்டும் என்றும் கௌரவ பிரதமர் குறிப்பிட்டார்.எனவே, பகிடிவதை தொடர்பான விசாரணை நடவடிக்கைகள் வினைத்திறன் மிக்கதாகவும், பாதிக்கப்பட்டவர்களுக்கு விரைவில் நிவாரணங்களைப் பெற்றுக் கொடுப்பதாகவும் இருக்க வேண்டும் எனவும் பிரதமர் குறிப்பிட்டார்.அதேநேரம், பல்கலைக்கழகங்களில் காணப்படும் வெற்றிடங்களை நிரப்புவதற்காக அமைச்சு அனுமதி வழங்கிய நியமனங்கள் கூட நிரப்பப்படாமல் உள்ளமை தொடர்பில் பிரதமர் பல்கலைக்கழகங்களின் உபவேந்தர்களிடம் கேள்வியெழுப்பினார். அனுமதியளிக்கப்பட்ட வெற்றிடங்களை நிரப்புவதற்கு உடனடியாக நடவடிக்கை எடுக்குமாறும் அவர் கேட்டுக்கொண்டார். இக்கூட்டத்தில் கௌரவ கல்வி மற்றும் உயர்கல்வி பிரதி அமைச்சர் மதுர செனெவிரத்ன, கௌரவ கிராமிய அபிவிருத்தி, சமூகப் பாதுகாப்பு மற்றும் சமூக வலுவூட்டல் அமைச்சர் கலாநிதி உபாலி பன்னிலகே மற்றும் கௌரவ பாராளுமன்ற உறுப்பினர் மஞ்சுல சுகத் ரத்னாயக உள்ளிட்டோரும், பல்கலைக்கழகங்களின் உபவேந்தர்கள், பல்கலைக்கழக மானியங்கள் ஆணைக்குழுவின் தலைவர் உள்ளிட்ட பிரதிநிதிகள் பலரும் கலந்துகொண்டனர்.
2026-09-15
அதிவேக நெடுஞ்சாலைகளில் பயணிக்கும் வாகனங்களின் அனைத்து ஆசனங்களிலும் பயணிக்கும் நபர்கள் ஆசனப் பட்டிகளை அணிவத எதிர்வரும் செப்டெம்பர் 20ஆம் திகதி முதல் கட்டாயமாக்கப்பட்டுள்ளது. அதற்காக வழங்கப்பட்டிருந்த சலுகைக் காலத்தை நிறைவு செய்வது தொடர்பில் 2026 ஜூன் 17ஆம் திகதிய 2493/19 ஆம் இலக்க அதிவிசேட வர்த்தமானி அறிவித்தலில் வெளியிடப்பட்ட ஒழுங்குவிதிக்குப் பாராளுமன்றம் அங்கீகாரம் வழங்கியுள்ளது.போக்குவரத்து, நெடுஞ்சாலைகள் மற்றும் நகர அபிவிருத்தி அலுவல்கள் பற்றிய அமைச்சுசார் ஆலோசனைக் குழு, போக்குவரத்து, நெஞ்சாலைகள் மற்றும் நகர அபிவிருத்தி கௌரவ அமைச்சர் பிமல் ரத்னாயக்க அவர்களின் தலைமையில் அண்மையில் பாராளுமன்றத்தில் கூடியபோது இது தொடர்பில் விரிவாகக் கலந்துரையாடப்பட்டது.நாளுக்கு நாள் அதிகரித்து வரும் வீதி விபத்துக்களால் ஏற்படும் உயிரிழப்புகளைக் குறைப்பதற்கும், காயங்கள் ஏற்படுவதனால் உருவாகும் பாரதூரமான நிலைமைகளைத் தணிப்பதற்கும், நெடுஞ்சாலைகளில் பயணிக்கும் வாகனங்களின் அனைத்து ஆசனங்களிலும் பயணிக்கும் நபர்கள் ஆசனப் பட்டிகளை அணிவதை கட்டாயமாக்குவதற்காக, மோட்டார் வாகனச் சட்டத்தின் கீ்ழ 2011.08.03ஆம் திகதிய 1717/14ஆம் இலக்க ஒழுங்குவிதியைத் திருத்தும் நோக்கில், 2025.09.25ஆம் திகதிய 2455/29 ஆம் இலக்க ஒழுங்குவிதியைக் கொண்ட வர்த்தமானி அறிவித்தல் வெளியிடப்பட்டது.அதற்கமைய, வாகன உற்பத்தியாளர்களால் ஆசனப் பட்டிகள் பொருத்தப்படாத ஆசனங்களில் பயணிக்கும் நபர்களுக்காக ஆசனப் பட்டிகளைப் பொருத்துவதற்கு, குறித்த வர்த்தமானி அறிவித்தல் வெளியிடப்பட்ட திகதியிலிருந்து 03 மாத கால சலுகைக் காலம் வழங்கப்பட்டது. இந்தச் சலுகைக் காலம் 2025.12.25ஆம் திகதியுடன் நிறைவடைந்தது.எனினும், ஆசனப் பட்டிகளைப் பொருத்திக்கொள்வதற்காக இந்தச் சலுகைக் காலத்தை மேலும் நீடிக்குமாறு கிடைக்கப்பெற்ற பல்வேறு பொதுமக்கள் கோரிக்கைகளை கருத்திற்கொண்டு, குறித்த சலுகைக் காலத்தை மீண்டும் 2026.03.20 முதல் 2026.06.19ஆம் திகதி வரை நீடிப்பதற்கு நடவடிக்கை எடுக்கப்பட்டது.அத்துடன், தேசிய போக்குவரத்து ஆணைக்குழு, மாகாண வீதிப் பயணிகள் போக்குவரத்து அதிகாரசபை அல்லது இலங்கை போக்குவரத்து சபையின் கீழ் ஒழுங்குபடுத்தப்படும் பயணிகள் போக்குவரத்துச் சேவைகள், பாடசாலை மாணவர் போக்குவரத்துச் சேவைகள், அலுவலகப் போக்குவரத்துச் சேவைகள் மற்றும் வாடகை அடிப்படையில் இயக்கப்படும் விசேட சுற்றுலாப் பயணங்களில் ஈடுபடுத்தப்படும் வாகனங்களின் தொழில்நுட்ப நிலைமை தொடர்பான குறைந்தபட்ச தரநிலைகள் மற்றும் விவரக்குறிப்புகளைப் பரிசோதித்து, அவை வீதிகளில் இயக்குவதற்கு தகுதியானவை என்பதை உறுதிப்படுத்துவது தொடர்பிலும் குழுவில் கலந்துரையாடப்பட்டது.இதற்காக முன்வைக்கப்பட்ட 2026.05.19ஆம் திகதிய 2489/22 ஆம் இலக்க விசேட வர்த்தமானி அறிவித்தலில் வெளியிடப்பட்ட ஒழுங்குவிதிகளுக்கும் பாராளுமன்றம் அங்கீகாரம் வழங்கியுள்ளது.இலங்கையில் மோட்டார் வாகனங்களின் எண்ணிக்கை அதிகரித்து வருவதுடன், வீதி பாதுகாப்பு, சுற்றாடல் பாதுகாப்பு மற்றும் வாகனங்களின் தொழில்நுட்பத் தகைமையை உறுதிப்படுத்த வேண்டிய தேவை அதிகரித்துள்ள நிலையில், இலங்கையில் இடம்பெறும் வாகன விபத்துக்கள் தொடர்பில் மேற்கொள்ளப்பட்ட ஆய்வுகளின்போது, சாரதிகளால் மேற்கொள்ளப்படும் தவறுகளுக்கு மேலதிகமாக, வாகனங்களில் காணப்படும் இயந்திரக் கோளாறுகள் மற்றும் பராமரிப்புப் பிரச்சினைகள் காரணமாகவும் பாரதூரமான வீதி விபத்துக்கள் அதிகளவில் இடம்பெறுவதாக அவதானிக்கப்பட்டுள்ளதாகவும் இங்கு கலந்துரையாடப்பட்டது.இது தொடர்பில் வாகன உரிமையாளர்களுக்கும் பொதுமக்களுக்கும் விழிப்புணர்வை ஏற்படுத்துமாறு குழுவின் தலைவர் பாராளுமன்ற உறுப்பினர்களிடம் கோரிக்கை விடுத்தார்.இக்குழுக் கூட்டத்தில் போக்குவரத்து, பெருந்தெருக்கள் கௌரவ பிரதி அமைச்சர் வைத்தியர் பிரசன்ன குணசேன, நகர அபிவிருத்தி கௌரவ பிரதி அமைச்சர் எரங்க குணசேகர உள்ளிட்ட கௌரவ பாராளுமன்ற உறுப்பினர்களும் அதிகாரிகளும் கலந்துகொண்டனர்.
2026-09-14
மறுசீரமைப்புகள் தொடர்பான அமைச்சுசார் ஆலோசனைக் குழுவின் உபகுழுக் கூட்டம் கௌரவ பிரதமரும், கல்வி, உயர் கல்வி மற்றும் தொழிற் கல்வி அமைச்சருமான கலாநிதி ஹரினி அமரசூரிய அவர்களின் தலைமையில் அண்மையில் (செப். 09) பாராளுமன்றத்தில் நடைபெற்றது.இதில், 2027 ஆம் ஆண்டு முதல் நடைமுறைப்படுத்துவதற்கு எதிர்பார்க்கப்படும் பொதுக் கல்வி மறுசீரமைப்புகள் மற்றும் முன்பள்ளிக் கல்வி மறுசீரமைப்புகளின் முன்னேற்றம் தொடர்பில் கலந்துரையாடப்பட்டது.பொதுக் கல்வி மறுசீரமைப்புகளின் ஆரம்ப கட்ட நடவடிக்கையாக, 2 மற்றும் 6 ஆம் தரங்களுக்குத் தேவையான செயற்பாட்டு நூல்கள், ஆசிரியர் வழிகாட்டி நூல்கள் மற்றும் தொகுதிகள் தயாரிக்கப்பட்டுள்ளதுடன், ஆசிரியர் பயிற்சி நிகழ்ச்சித்திட்டங்கள் நடைமுறைப்படுத்தப்பட்டு வருவதாகவும் இங்கு தெரிவிக்கப்பட்டது.க.பொ.த. சாதாரண தரப் பரீட்சைக்காக வரலாறு மற்றும் அழகியல் பாடங்கள் உள்ளிட்ட 7 பாடங்களை உள்ளடக்குவதற்கும், 10 மற்றும் 11 ஆம் தரங்களில் இருந்து தொழிற்கல்வியை அறிமுகப்படுத்துவதற்கும், 12 மற்றும் 13 ஆம் தரங்களுக்கு சமூக நல்லிணக்கம், சட்டம் மற்றும் நெறிமுறைகள் தொடர்பான தொகுதிகளை உள்ளடக்குவதற்கும் திட்டமிடப்பட்டுள்ளதாகவும் தெரிவிக்கப்பட்டது.புதிய கல்வி மறுசீரமைப்புகள் தொடர்பில் பொதுமக்களைத் தெளிவுபடுத்தும் வகையில் விழிப்புணர்வு நிகழ்ச்சித்திட்டத் தொடர் ஒன்றை எதிர்காலத்தில் நடைமுறைப்படுத்துவதற்கும் திட்டமிடப்பட்டுள்ளதாக இங்கு தெரிவிக்கப்பட்டது.முன்பள்ளிக் கல்வியை முறையாக ஒழுங்குபடுத்துவதற்காக தேசிய முன்பள்ளிக் கல்விக் கொள்கையொன்று தயாரிக்கப்பட்டுள்ளதுடன், முன்பள்ளிகளைப் பதிவு செய்தல், பாடத்திட்டங்கள் மற்றும் ஆசிரியர் வழிகாட்டி நூல்களைத் தயாரித்தல், ஆசிரியர் பயிற்சி நிகழ்ச்சித்திட்டங்களை நடைமுறைப்படுத்துதல் உள்ளிட்ட நடவடிக்கைகள் முன்னெடுக்கப்பட்டு வருவதாகவும் இங்கு தெரியவந்தது.இந்தக் கூட்டத்தில் கல்வி மற்றும் உயர் கல்வி பிரதி அமைச்சர் கௌரவ வைத்தியர் மதுர செனெவிரத்ன, கௌரவ பாராளுமன்ற உறுப்பினர்கள் உள்ளிட்ட அதிகாரிகள் பலரும் கலந்துகொண்டனர்.
பாராளுமன்றத்திற்கு வருகை தருதல்
பாராளுமன்றத்தின் கையேடு
இலங்கையில் தேர்தல் முறை
பாராளுமன்றம் எவ்வாறு செயல்படுகிறது
பாராளுமன்ற அலுவல்கள்
பதிப்புரிமை © இலங்கை பாராளுமன்றம்.
முழுப்பதிப்புரிமையுடையது.
வடிவமைத்து உருவாக்கியது TekGeeks
