பார்க்க

E   |   සි   |  

2022-12-08

செய்தி வகைகள் : குழு செய்திகள் 

வெளிநாட்டு வேலைவாய்ப்பு பணியகத்தின் செயற்பாடு தொடர்பான பல நிர்வாக சிக்கல்கள் வெளிவந்தன

  • முறையான விசாரணைகளை உடனடியாக மேற்கொள்ளுமாறு அமைச்சின் செயலாளருக்குப் பணிப்பு
  • அடுத்த ஆண்டு தொடக்கத்தில் மீண்டும் அழைப்பு

 

இலங்கை வெளிநாட்டு வேலைவாய்ப்புப் பணியகத்தின் 2019 மற்றும் 2020 ஆம் ஆண்டுகளுக்கான கணக்காய்வாளர் நாயகத்தின் அறிக்கைகள் மற்றும் தற்போதைய செயற்பாடுகள் தொடர்பில் பாராளுமன்ற உறுப்பினர் கௌரவ (பேராசிரியர்) ரஞ்சித் பண்டார தலைமையில் கடந்த டிசம்பர் 08ஆம் திகதி அரசாங்கப் பொறுப்பு முயற்சிகள் பற்றிய குழுவில் (கோப் குழு) ஆராயப்பட்டது.

இதில், கணக்காய்வாளர் நாயகத்தின் அறிக்கையில் சுட்டிக்காட்டியுள்ள 21 அடிப்படை விடயங்கள் குறித்து விரிவாக ஆராயப்பட்டது.

  1.  இலங்கை வெளிநாட்டு வேலைவாய்ப்புத் துறை தொடர்பான சட்டத்தில் காணப்படும் பிரச்சினைகளை காலத்துக்கு ஏற்ற வகையில் திருத்துவது தொடர்பில் இங்கு ஆராயப்பட்டது. வெளிநாட்டு வேலைவாய்ப்புப் பணியகம் ஒழுங்குறுத்துகை நிறுவனமாக செயற்படும்போது பணிப்பாளர் சபைக்கு வெளிநாட்டு சேவை நிறுவனங்களை பிரதிநிதித்துவப்படுத்தும் நான்கு பேரை பணிப்பாளர் சபைக்கு நியமிப்பது தொடர்பில் கவனம் செலுத்தப்பட்டது.
  2.  வெளிநாட்டு வேலைவாய்ப்பு பணியக சட்டத்திற்கமைய உப தலைவர் பதவி இருக்கக்கூடாது என கணக்காய்வாளர் நாயகம் சுட்டிக்காட்டியுள்ளார். இருந்தபோதும், அமைச்சரினால் வழங்கப்பட்ட நியமனம் சட்டப்பூர்வமானது அல்ல என்றும், அத்தகைய நியமனம் குறித்து உடனடியாக அமுலுக்கு வரும் வகையில் அமைச்சருக்கு கடிதம் மூலம் தெரிவிக்குமாறும் அமைச்சின் செயலாளருக்குப் பணிப்புரை விடுத்தார். கடந்த காலத்தில் மேற்படி பதவியை வகித்தவர்களினால் எடுக்கப்பட்ட தீர்மானங்கள் சட்ட ரீதியானவை இல்லை என்றும் செயலாளருக்கு அறிவிக்கப்பட்டது.
  3.  பணியகத்தின் சுருக்கமான திட்டத்தைப் புதுப்பித்து இரண்டு மாதங்களுக்குள் அதனைக் சமர்ப்பிக்குமாறும் கோப் குழு, பணிப்பாளர் சபைக்கு உத்தரவிட்டது. அதேசமயம், வியூகத் திட்டம், செயல் திட்டம் மற்றும் பெருநிறுவனத் திட்டம் என்பன இதில் உள்ளடங்கியிருக்க வேண்டும் என்றும் அறிவுறுத்தப்பட்டது.
  4.  பணியாளர்களின் நலன்புரி நிதியத்தை தனியான கணக்காகப் பேணுதல் மற்றும் கணக்காய்வாளர் நாயகத்தின் நிதி கணக்காய்வுக்கு உட்படுத்துவதற்கான வேலைத்திட்டத்தை இந்த நிதியாண்டிலிருந்து நடைமுறைப்படுத்துமாறும் பணிப்புரை விடுக்கப்பட்டது. இது தொடர்பில் நிதி அதிகாரியினால் எடுக்கப்பட்ட நடவடிக்கை குறித்து பணிப்பாளர் சபைக்கு எடுத்துக் கூறி, பணிப்பாளர் சபையின் தீர்மானத்தை இரண்டு மாதங்களுக்குள் கோப் குழுவுக்கு அறிவிக்குமாறும் உத்தரவிடப்பட்டது.
  5.  முன்னைய அமைச்சரவைப் பரிந்துரையின் பிரகாரம், விசாரணைகளுக்காக பொலிஸாரை பணியகம் பயன்படுத்தியிருந்தபோதிலும், அது தற்போது நடைமுறைப்படுத்தப்படாததால், விசாரணைப் பணிகளில் ஏற்படக்கூடிய குறைபாடுகளை இனங்காண வேண்டியதன் அவசியம் வலியுறுத்தப்பட்டது. குறித்த அமைச்சரவை அங்கீகாரம் தொடர்பில் பொலிஸ் திணைக்களத்தின் உதவியை நாடுமாறு கோப் குழு பரிந்துரைத்துள்ளது. அவ்வாறான தேவை இல்லை என்றால் அமைச்சரவைக்கு அறிவிக்கப்பட்டு அதற்கான ஏற்பாடுகளை செய்யுமாறும் அறிவுறுத்தப்பட்டுள்ளது.
  6.  பல்வேறு முறைகேடுகள் குறித்து கணக்காய்வாளர் நாயகம் அல்லது அமைச்சு மட்டத்திலோ அல்லது வெளிநாட்டு வேலைவாய்ப்பு பணியக மட்டத்திலோ வழங்கிய பரிந்துரைகளை நடைமுறைப்படுத்தாமல் குற்றவாளிகளை தண்டிக்காதது குறித்தும், பணிப்பாளர் சபையின் தீர்மானங்களின்படி அவர்களை விடுதலை செய்வது குறித்தும் விவாதிக்கப்பட்டது. பொது நிர்வாக அமைச்சின் ஒழுக்காற்று விசாரணைக் குழுவின் ஆதரவுடன் முறையான ஒழுக்காற்று விசாரணையை நடத்தி ஒரு மாதத்திற்குள் கோப் குழுவிடம் சமர்ப்பிக்குமாறு அமைச்சின் செயலாளருக்கு உத்தரவிடப்பட்டது.
  7.  புலம்பெயர் தொழிலாளர்களுக்கு காப்புறுதி வழங்குவதில் இடம்பெற்றதாகக் கூறப்படும் பிழைகள் மற்றும் முறைகேடுகள் தொடர்பில் கணக்காய்வாளர் நாயகத்திடம் இருந்து விசேட அறிக்கை கோரப்பட வேண்டுமென பரிந்துரைக்கப்பட்டது. வெளிநாடுகளில் வசிக்கும் இலங்கையர்களுக்கு காப்புறுதி வழங்குவது தொடர்பான சுருக்கமான அறிக்கையை ஒரு மாதத்திற்குள் சமர்ப்பிக்குமாறு அமைச்சின் செயலாளருக்கு அவர் பரிந்துரைத்துள்ளார்.
  8.  உத்தியோகபூர்வ அனுமதியின்றி பணியகம் மேற்கொண்ட செலவினங்கள் தொடர்பான விடயங்களை ஆராய்ந்து இது தொடர்பாக எடுக்கப்பட்ட நடவடிக்கை  திறைசேரியின் பிரதிநிதியை ஒருங்கிணைத்து எடுக்கக் கூடிய நடவடிக்கைகள் உள்ளடங்கிய சுருக்கமான அறிக்கையை ஒரு மாதத்திற்குள் கோப் குழுவிடம் சமர்ப்பிக்க தீர்மானிக்கப்பட்டது.
  9.  நிதி அமைச்சின் பிரதிநிதிகளாகப் பல்வேறு நிறுவனங்களின் பணிப்பாளர் சபைக்கான உறுப்பினர்களாக நியமிக்கப்படும் நபர்களைக் குறிப்பிட்ட காலப்பகுதிக்கு மாத்திரம் நியமிக்குமாறும் திறைசேரியின் செயலாளருக்குப் பணிப்புரை விடுக்கப்பட்டது.
  10.  வெளிநாட்டுத் தூதரகங்களில் தொழிலாளர் நலன்புரிச் செயற்பாடுகளை மேற்கொள்பவர்கள் தொடர்பில் உள்ளக கணக்காய்வாளரினால் விசேட விசாரணை நடத்தப்பட வேண்டுமென கோப் குழு பரிந்துரைத்துள்ளதுடன், அந்த அறிக்கையை அமைச்சின் செயலாளரினால் கோப் குழுவிற்கு அனுப்பி வைக்குமாறு பரிந்துரைக்கப்பட்டுள்ளது.
  11.  வெளிநாட்டு வேலைவாய்ப்புப் பணியகம் பல்வேறு நாடுகளில் தொழில் வாய்ப்புக்காக நடத்தும் பல்வேறு நிகழ்ச்சிகளின் மூலம் ஏராளமானோர் பயிற்சி வாய்ப்புகளைப் பெற்றாலும் வெளிநாடுகளுக்குச் செல்லும் வாய்ப்பு கிடைக்காமல் சமூக நெருக்கடி உருவாகி வருவதாக கணக்காய்வாளர் நாயகத்தின் அறிக்கையில் தெரியவந்துள்ளது. எனவே, பயிற்சிக்காக அனுப்பப்பட்டு வெளிநாடு செல்லத் தயாராகும் பணியாளர்கள் குறித்த முழுமையான அறிக்கையை வழங்குமாறு பணியகத் தலைவருக்கு உத்தரவிடப்பட்டது.

இந்த பரிந்துரைகளில் ஏற்பட்டுள்ள முன்னேற்றம் குறித்து ஆராயும் நோக்கில்  மூன்று மாதங்களில் வெளிநாட்டு வேலைவாய்ப்புப் பணியகத்தை மீண்டும் அழைப்பதற்கும் குழு முடிவுசெய்தது.
இக்கூட்டத்தில் இராஜாங்க அமைச்சர்களான கௌரவ ஜகத் புஷ்பகுமார, கௌரவ லொஹான் ரத்வத்த, கௌரவ சாந்த பண்டார, பாராளுமன்ற உறுப்பினர்களான கௌரவ மஹிந்தானந்த அளுத்கமகே, கௌரவ தயாசிறி ஜயசேகர, கௌரவ நளின் பண்டார ஜயமஹா, கௌரவ ரோஹினி குமாரி விஜேரத்ன, கௌரவ சஞ்சீவ எதிரிமான்ன, கௌரவ ஜகத் குமார, கௌரவ சட்டத்தரணி பிரேம்நாத் சி. டொலவத்த, கௌரவ உபுல் மகேந்திர ராஜபக்ஷ, கௌரவ எம்.ராமேஸ்வரன், கௌரவ ராஜிகா விக்கிரமசிங்க, கௌரவ சட்டத்தரணி மதுர விதானகே மற்றும் கௌரவ (பேராசிரியர்) சரித ஹேரத் ஆகியோர் கலந்துகொண்டனர்.

மேலும், தொழிலாளர் மற்றும் வெளிநாட்டு வேலைவாய்ப்பு அமைச்சின் செயலாளர், வெளிநாட்டு வேலைவாய்ப்பு பணியகத்தின் தலைவர், பொது முகாமையாளர் உள்ளிட்ட அதிகாரிகள் குழுவும் இந்நிகழ்வில் கலந்துகொண்டனர்.

 

3 5

 



தொடர்புடைய செய்திகள்

2026-11-18

கம்பஹா மாவட்ட “சணச” சங்கத்தின் நிதி நெருக்கடிக்குத் தீர்வுகாண வைப்பாளர்களின் பணத்தை மீளச் செலுத்துவதற்கான பொறிமுறையைத் தயாரிப்பது தொடர்பில் கோபா உபகுழுவில் அவதானம்

கம்பஹா மாவட்ட “சணச” சங்கத்தில் இடம்பெற்றுள்ள நிதி முறைகேடுகள் மற்றும் வைப்பாளர்களின் பணத்தை மீளச் செலுத்த முடியாத நிலைமை தொடர்பில் கலந்துரையாடுவதற்காக, அரசாங்கக் கணக்குகள் பற்றிய குழுவினால் நியமிக்கப்பட்ட கூட்டுறவுத் துறையில் நிலவும் நெருக்கடிகள் தொடர்பில் ஆராய்வதற்கான உபகுழு, அதன் தலைவர் கௌரவ பாராளுமன்ற உறுப்பினர் ருவன்திலக ஜயக்கொடியின் தலைமையில் அண்மையில் பாராளுமன்றத்தில் கூடியது.கம்பஹா மாவட்ட “சணச” சங்கத்தின் முகாமைத்துவத்தின் பலவீனங்கள் தொடர்பான கணக்காய்வாளர் நாயகத்தின் அறிக்கையில் குறிப்பிடப்பட்டுள்ள விடயங்கள் குறித்து இங்கு ஆராயப்பட்டதுடன், உரிய அனுமதியின்றி சங்கத்தின் நிதி தனியார் நிறுவனங்களில் முதலீடு செய்யப்பட்டமையால் ஏற்பட்டுள்ள நிதி நெருக்கடி குறித்தும் விரிவாகக் கலந்துரையாடப்பட்டது. இந்த முதலீடுகள் காரணமாக உறுப்பினர்கள் மற்றும் வெளிப்புற வைப்பாளர்களின் வைப்புப் பணத்தை மீளச் செலுத்த முடியாத நிலைமை ஏற்பட்டுள்ளதாக இதன்போது தெரியவந்தது.மேலும், கூட்டுறவுத் திணைக்களத்தின் மேற்பார்வை மற்றும் ஒழுங்குபடுத்தல் செயற்பாடுகளில் காணப்பட்ட குறைபாடுகள், சங்கத்தின் சொத்துக்களைத் தீர்ப்பதில் உள்ள சிக்கல்கள், நீதிமன்றத் தடையுத்தரவுகள் மற்றும் சம்பந்தப்பட்ட பொறுப்புவாய்ந்த தரப்பினருக்கு எதிராக சட்ட நடவடிக்கை எடுக்க வேண்டியதன் அவசியம் குறித்தும் கலந்துரையாடப்பட்டது.வைப்பாளர்களின் பணத்தை மீள வழங்குவதற்காக, சங்கத்திற்குச் சொந்தமான சொத்துக்களை மதிப்பீடு செய்து அவற்றை விற்பனை செய்வதற்கான சாத்தியக்கூறுகளை ஆராய்தல், சொத்துக்களை அகற்றுவதற்கு நீதிமன்றத்தினால் விதிக்கப்பட்டுள்ள தடையுத்தரவுகளை நீக்குவதற்குத் தேவையான நடவடிக்கைகளை மேற்கொள்ளுதல் மற்றும் தற்போது கையிருப்பில் உள்ள நிதியை வைப்பாளர்களிடையே நியாயமான அடிப்படையில் பகிர்ந்தளித்தல் தொடர்பிலும் இதன்போது கவனம் செலுத்தப்பட்டது.அத்துடன், அங்கீகரிக்கப்படாத முதலீடுகளை மேற்கொண்டமைக்குப் பொறுப்பான முன்னாள் பணிப்பாளர் சபை உறுப்பினர்களிடமிருந்து அதற்கான நட்டஈட்டுத் தொகையை அறவிடுதல், சம்பந்தப்பட்ட தனியார் நிறுவனத்திற்கு எதிராக சட்ட நடவடிக்கை எடுத்தல் மற்றும் நிறைவு செய்யப்படாத திட்டங்களைப் பூர்த்தி செய்து அவற்றின் மூலம் வருமானம் ஈட்டுவதற்கான சாத்தியக்கூறுகள் குறித்தும் கலந்துரையாடப்பட்டது.வைப்பாளர்களின் முழு வைப்புத் தொகையையும் மீளச் செலுத்துவதற்கான தெளிவானதும் நடைமுறைச் சாத்தியமானதுமான பொறிமுறையொன்றை முன்வைக்க வேண்டியதன் அவசியம் இதன்போது வலியுறுத்தப்பட்டது. அத்துடன், எதிர்கால நடவடிக்கைகள் தொடர்பில் கூட்டுறவு அபிவிருத்தித் திணைக்களத்தின் மேல் மாகாண மற்றும் கம்பஹா மாவட்ட அதிகாரிகளுடனும் கலந்துரையாடப்பட்டது.இந்தக் கூட்டத்தில் உபகுழுவின் கௌரவ பாராளுமன்ற உறுப்பினர்களான சட்டத்தரணி துஷாரி ஜயசிங்க, டீ. கே. ஜயசுந்தர மற்றும் சுசந்த குமார நவரத்ன ஆகியோரும் கலந்துகொண்டனர்.


2026-11-17

விஞ்ஞானம், தொழில்நுட்பம் மற்றும் டிஜிட்டல் பரிணாமம் பற்றிய துறைசார் மேற்பார்வைக் குழு பல முக்கிய நிறுவனங்களுக்கு கண்காணிப்பு விஜயம்

விஞ்ஞானம், தொழில்நுட்பம் மற்றும் டிஜிட்டல் பரிணாமம் பற்றிய துறைசார் மேற்பார்வைக் குழு, விஞ்ஞானம் மற்றும் தொழில்நுட்ப அமைச்சின் கீழ் இயங்கும் பல நிறுவனங்களுக்கு கண்காணிப்பு விஜயமொன்றை மேற்கொண்டது.இதற்கமைய, குழுவினர் இன்று (நவ. 17) இலங்கை நானோ தொழில்நுட்ப நிறுவனம் (SINTEC) மற்றும் இலங்கை உயிரித் தொழில்நுட்ப நிறுவனம் (SLIBTEC) ஆகிய நிறுவனங்களுக்கு விஜயம் செய்து அவற்றின் செயற்பாடுகளைப் பார்வையிட்டனர்.2025/2026 ஆம் ஆண்டுகளுக்கான குறித்த நிறுவனங்களின் முன்னேற்றங்களை மீளாய்வு செய்தல், 2027 ஆம் ஆண்டுக்கான செயற்பாட்டுத் திட்டத்தைப் பரிசீலித்தல் மற்றும் நிறுவன வளாகங்களில் முன்னெடுக்கப்படும் செயற்பாடுகளை அவதானித்தல் ஆகியன இந்த விஜயத்தின் நோக்கங்களாகும்.குழுவின் தலைவர் கௌரவ பாராளுமன்ற உறுப்பினர் வைத்தியர் ஜனக சேனாரத்ன தலைமையில் மேற்கொள்ளப்பட்ட இந்தக் கண்காணிப்பு விஜயத்தில் கௌரவ பாராளுமன்ற உறுப்பினர்களான தனுர திசாநாயக்க, லசித் பாஷண கமகே மற்றும் சதுர கலப்பத்தி ஆகியோரும் கலந்துகொண்டனர்.


2026-11-17

ஆசிரியர் சேவையிலிருந்து அதிபர் சேவைக்கு நியமிக்கப்படும்போது ஏற்படும் சம்பள முரண்பாடுகள் மற்றும் சேவைப் பிரமாணக் குறிப்புத் திருத்தங்கள் தொடர்பில் பாராளுமன்ற உபகுழுவில் தொடர்ந்தும் கலந்துரையாடல்

ஆசிரியர் சேவையிலிருந்து அதிபர் சேவைக்கு நியமிக்கப்படும்போது ஏற்படும் சம்பள முரண்பாடுகள் தொடர்பில், கல்வி, தொழிற்படை மற்றும் மனித மூலதனம் பற்றிய துறைசார் மேற்பார்வைக் குழுவினால் நியமிக்கப்பட்ட உபகுழுவில் மேலும் கலந்துரையாடப்பட்டது.குறித்த உபகுழு அதன் தலைவர் கௌரவ பாராளுமன்ற உறுப்பினர் சுனில் ராஜபக்ஷ தலைமையில் அண்மையில் கூடியபோதே இவ்விடயம் தொடர்பில் கலந்துரையாடப்பட்டது.இக்கலந்துரையாடலில் கல்வி, உயர்கல்வி மற்றும் தொழிற்கல்வி அமைச்சு, நிதி, திட்டமிடல் மற்றும் பொருளாதார அபிவிருத்தி அமைச்சு, பொது நிர்வாகம், மாகாண சபைகள் மற்றும் உள்ளூராட்சி அமைச்சு, அரச சேவை ஆணைக்குழு ஆகியவற்றைப் பிரதிநிதித்துவப்படுத்தி சிரேஷ்ட அதிகாரிகள் கலந்துகொண்டனர்.ஆசிரியர் சேவையைச் சேர்ந்த அதிகாரிகள் அதிபர் சேவைக்கு நியமிக்கப்படும்போது ஏற்படும் சம்பள அதிகரிப்பு இடைவெளிகள் மற்றும் சம்பள முரண்பாடுகள் தொடர்பில் இங்கு விரிவாகக் கலந்துரையாடப்பட்டது. ஒரு சேவைக்கு மாத்திரம் தனித்தனியாக சம்பளத் திருத்தங்களை மேற்கொள்வதன் மூலம், ஒட்டுமொத்த அரச சேவையின் ஏனைய சேவைகளுடன் ஒப்பிடுகையில் பிரச்சினைகள் ஏற்படுவதாகவும் இதன்போது சுட்டிக்காட்டப்பட்டது.சேவைப் பிரமாணக் குறிப்புகள் மற்றும் ஆட்சேர்ப்புக்கான வயதெல்லைகளைத் திருத்துதல், அதிபர்களுக்கான விசேட கொடுப்பனவுகள் மற்றும் போக்குவரத்து வசதிகள், பாடசாலை வகைப்படுத்தல் மற்றும் வெற்றிடங்களை நிரப்புதல், முறையான இடமாற்றக் கொள்கை, ஆசிரியர் மற்றும் அதிபர் உத்தியோகபூர்வ இல்லங்களைப் புனரமைத்தல் உள்ளிட்ட பல்வேறு விடயங்கள் தொடர்பில் அதிகாரிகளுடன் உபகுழு விரிவாகக் கலந்துரையாடியது.இவ்விடயம் தொடர்பில் மேலும் கலந்துரையாடிய பின்னர், முன்மொழிவுகளை உள்ளடக்கிய இறுதி அறிக்கையை துறைசார் மேற்பார்வைக் குழுவிடம் சமர்ப்பிக்கத் திட்டமிடப்பட்டுள்ளது.இக்கூட்டத்தில் கௌரவ பாராளுமன்ற உறுப்பினர்களான அபூபக்கர் அத்தம்பாவ, சுகத் வசந்த. டி சில்வா, சுஜீவ திசாநாயக்க மற்றும் சானக மாதுகொட ஆகியோரும் கலந்துகொண்டனர்.


2026-11-16

யானை – மனித மோதலைக் குறைத்தல் மற்றும் யானைகளைப் பாதுகாப்பது தொடர்பில் புதிய தொழில்நுட்ப, நடைமுறைத் தீர்வுகளைக் கண்டறிவது குறித்து துறைசார் மேற்பார்வைக் குழுவில் கலந்துரையாடல்

சுற்றாடல், கமத்தொழில் மற்றும் வளங்களின் நிலைத்தன்மை பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் ஹெக்டர் அப்புஹாமி தலைமையில் அண்மையில் பாராளுமன்றத்தில் கூடியது.இதில், யானை – மனித மோதலைக் கட்டுப்படுத்துதல், காட்டு யானைகளின் இடம்பெயர்வு முறைகளைக் கண்டறிதல் மற்றும் யானைகளைப் பாதுகாப்பதற்குப் புதிய தொழில்நுட்பங்களைப் பயன்படுத்துதல் தொடர்பில் விரிவாகக் கலந்துரையாடப்பட்டது. அத்துடன், காவந்திஸ்ஸ யானையின் மரணம் தொடர்பிலும் கவனம் செலுத்தப்பட்டது.யானைகளின் வாழ்விடங்கள் இழக்கப்படுதல், பாரம்பரிய யானை வழித்தடங்கள் தடைப்படுதல் மற்றும் குடியிருப்புகள், விவசாய நிலங்களை அண்மித்த பகுதிகளில் உணவு தேடிச் செல்லுதல் ஆகியன யானை – மனித மோதல் அதிகரிப்பதற்கான பிரதான காரணங்களாக இதன்போது கலந்துரையாடப்பட்டன. யானைகளின் இடம்பெயர்வு முறைகளைக் கண்டறிவதற்காக GPS மற்றும் செய்மதிக் கழுத்துப்பட்டித் தொழில்நுட்பத்தைப் பயன்படுத்துவதன் முக்கியத்துவமும் இதன்போது வலியுறுத்தப்பட்டது.யானை – மனித மோதலைக் குறைப்பதற்காக பிரதேச மட்டத்தில் வனவிலங்கு அதிகாரிகள், கிராம உத்தியோகத்தர்கள் மற்றும் கிராம மக்களை உள்ளடக்கிய கூட்டுக் குழுக்களை அமைத்தல், சமூகப் பங்கேற்பை வலுப்படுத்துதல் மற்றும் முன்கூட்டிய எச்சரிக்கைத் தொடர்பாடல் வலையமைப்புகளைச் செயற்படுத்துதல் தொடர்பிலும் கருத்துக்கள் பரிமாறப்பட்டன.அத்துடன், நோய்வாய்ப்பட்ட மற்றும் காயமடைந்த யானைகளுக்குச் சிகிச்சையளிக்கும்போது வனவிலங்கு கால்நடை மருத்துவர்கள் எதிர்கொள்ளும் சவால்கள் குறித்தும் கலந்துரையாடப்பட்டது. வனவிலங்கு திணைக்களத்தின் கால்நடை மருத்துவ அதிகாரிகளின் சேவை, யானைகளுக்கு மயக்க மருந்து செலுத்தும்போது காணப்படும் ஆபத்துகள் மற்றும் களத்தில் சிகிச்சையளிப்பதற்குத் தேவையான நடமாடும் மருத்துவ வசதிகள், நடமாடும் எக்ஸ்-ரே இயந்திரங்கள் போன்ற தொழில்நுட்ப உபகரணங்களின் அவசியம் குறித்தும் இதன்போது கவனம் செலுத்தப்பட்டது.இக்கூட்டத்தில் கௌரவ பாராளுமன்ற உறுப்பினர்களான கிங்ஸ் நெல்சன், உபுல் கித்சிறி, சட்டத்தரணி எம்.ஏ.சி.எஸ். சதுரி கங்கானி, சுதத் பலகல்ல, கிட்ணன் செல்வராஜ் மற்றும் சட்டத்தரணி பாக்ய ஸ்ரீ ஹேரத் ஆகியோர் கலந்துகொண்டனர்.






பதிப்புரிமை © இலங்கை பாராளுமன்றம்.

முழுப்பதிப்புரிமையுடையது.

வடிவமைத்து உருவாக்கியது  TekGeeks