E   |   සි   |  

2022-11-18

செய்தி வகைகள் : செய்திகள் 

புதிதாக இரண்டு நிலையியற் குழுக்களை அமைப்பது தொடர்பான நிலையியற் கட்டளைகள் பற்றிய குழுவின் அறிக்கை பாராளுமன்றத்தில்

ஜனாதிபதியின் பிரேரணைக்கு அமைய அமைக்கப்படவுள்ள இரு குழுக்கள் தொடர்பான நிலையியற் கட்டளைகள் பற்றிய குழுவின் அறிக்கையை சபாநாயகர் கௌரவ மஹிந்த யாப்பா அபேவர்த்தன இன்று (நவ. 18) பாராளுமன்றத்தில் சமர்ப்பித்தார்.

இதற்கமைய வங்கித் தொழில் மற்றும் நிதிச் சேவைகள் பற்றிய குழு மற்றும் பொருளதார உறுதிப்படுத்தல் பற்றிய குழுக்களின் அமைப்பு, பணிகள் மற்றும் அதிகாரங்கள் ஆகியன இந்த அறிக்கையில் உள்ளடக்கப்பட்டுள்ளன.

கடந்த நவம்பர் 16ஆம் திகதி நிலையியற் கட்டளைகள் பற்றிய குழு கூடி இந்த இரண்டு குழுக்களையும் நிறுவுவதற்கும், இது தொடர்பில் 122வது மற்றும் 123வது நிலையியற் கட்டளைகளைத் திருத்தி அவற்றை நிலையியற் கட்டளைகளில் சேர்த்துக் கொள்வதற்கும் ஒப்புதல் வழங்கியிருந்தது.
அறிக்கையின்படி, இந்த இரண்டு குழுக்களின் அமைப்பு, அதிகாரங்கள் மற்றும் செயல்பாடுகள் பின்வருமாறு.

வங்கித் தொழில் மற்றும் நிதிச் சேவைகள் பற்றிய குழு

இதற்கமைய, வங்கித்தொழில் மற்றும் நிதிச் சேவைகள் பற்றிய குழுவெனப் பெயர்குறிக்கப்பட்ட குழுவுக்கு தெரிவுக் குழுவினால் பெயர்குறித்து நியமிக்கப்படும் அமைச்சரவை அமைச்சர்கள் அல்லாத உறுப்பினர்களின் எண்ணிக்கை பதினாறாகும்.

இலங்கையின் வங்கித்தொழில், காப்புறுதி மற்றும் ஏனைய நிதியியல்துறை சேவைகளின் தொழில்வாண்மை ரீதியான நியமங்கள் மற்றும் கலாசாரம் பற்றி பரிசீலிப்பது இக்குழுவுக்கு வழங்கப்பட்டுள்ள அதிகாரமாகும்.

சட்டவாக்க மற்றும் ஏனைய ஒழுங்குமுறைப்படுத்தும் செயற்பாடுகளுக்காக நியமங்களை மேம்படுத்துவதற்கும் விதப்புரைகளை ஏற்பாடு செய்வதற்கும் இந்நிறுவனங்களின் நுகர்வோர்களுக்கு வலுவூட்டுவதற்கும் அதிகரித்த ஒழுக்கநெறியை ஏற்பாடு செய்வதற்கும் மேம்பட்ட தொழிற்பாடு மற்றும் பன்முகத்தன்மையான வங்கித்தொழில், காப்புறுதி மற்றும் ஏனைய நிதித்துறைகளை உருவாக்குவதற்குமான மறுசீரமைப்புகள் பற்றிய விதப்புரைகளையும் இந்தக் குழுவினால் முன்வைக்க முடியும்.
சர்வதேச பொருளாதார கொள்கை, வெளிநாட்டு நிதிச் சேவைகள் ஒழுங்குவிதிகள் ஆகியவற்றுடன் தொடர்புடைய விடயங்கள் மற்றும் இலங்கையின் நாணய விவகாரங்கள், கடன் மற்றும் நிதிச் சேவைகள் மற்றும் பொருளாதார வளர்ச்சி மீதான அவற்றின் விளைவுகள் பற்றி ஒரு விரிவான அடிப்படையில் கற்கையை மேற்கொள்வதற்கும் மீளாய்வு செய்வதற்கும் இக்குழுக்கு அதிகாரம் வழங்கப்பட்டுள்ளது.

இலங்கை மத்திய வங்கி ஒதுக்கு முறைமை, ஏற்றுமதி மற்றும் வெளிநாட்டு வர்த்தக ஊக்குவிப்பு, ஏற்றுமதி கட்டுப்பாடுகள், இறக்குமதிக் கட்டுப்பாடுகள், வணிக, கைத்தொழில் மற்றும் சிறிய மற்றும் நடுத்தர அளவிலான தொழில்முயற்சிகளுக்கான நிதி உதவி, நிதி நடவடிக்கைமுறைகள், நிதி நிறுவனங்களின் செயலாற்றுகை மற்றும் முகாமைத்துவம், நாணயத் தாள்கள், நாணயக் குற்றிகள் மற்றும் நாணயம் ஆகியவற்றின் பகிர்ந்தளித்தல் மற்றும் மீட்பு, கடன் கொடுத்தல் மற்றும் அறவிடல் தொடர்பான விடயங்கள் ஆகியவை உள்ளடங்கலாக நாணயக் கொள்கையுடன் தொடர்பான விடயங்களை தொடர்ச்சியான ஓர்அடிப்படையில்  மீளாய்வு செய்வதற்கும்; மற்றும் நிதியியல் துறையின் உறுதிப்பாட்டையும் தொடர்ச்சியையும் உறுதிப்படுத்துவதற்கும்  விதப்புரைகளை ஏற்பாடு செய்வதை உள்ளிட்ட நாணயக் கொள்கை தொடர்பான விடயங்களை தொடர்ச்சியான அடிப்படையில் மீளாய்வு செய்வதற்கும், இலங்கையில் வங்கிகளுக்கிடையிலான வழங்கல் வீதங்களை (Sri Lanka Inter Bank Offered Rate (SLIBOR)) நிர்ணயிக்கும் செயற்பாட்டின் போது ஒழுங்குமுறைப்படுத்தல் மற்றும் வணிகப் போட்டி தொடர்பாக விசாரனைகளை மேற்கொள்வதற்கும் பரிசீலனைகளை மேற்கொள்ளவும் முடியும்.

காப்புறுதி உள்ளடங்கலாக அரச நிதி நிறுவனங்கள் மற்றும் நிதிச் சேவைகளை ஏற்பாடு செய்தல் தொடர்பாக கூட்டிணைந்த ஆளுகை, செயலாற்றுகை மற்றும் முகாமைத்துவம், வெளிப்படைத்தன்மை மற்றும் அக்கறைகளின் முரண்பாடு ஆகியவற்றை மீளாய்வு செய்வது, காப்புறுதி உள்ளடங்கலாக நிதிக் கொள்கை மற்றும் நிதி நிறுவனங்கள் தொடர்பாக அரசாங்கம் மற்றும் எதிர்கால அரசாங்கங்கள் மற்றும் பாராளுமன்றத்தின் பொறுப்புகளைப் பற்றி கொள்கை மீளாய்வுகளை மேற்கொள்வதற்கும், பிணையங்கள் மற்றும் பரிவர்த்தனை ஆணைக்குழுவின் செயலாற்றுகை மற்றும் முகாமைத்துவம் மற்றும் மூலதனச் சந்தை முன்னேற்றங்கள் பற்றி பரிசீலிப்பதற்கும்  அறிக்கையிடுவதற்கும், கொழும்பு பங்குப் பரிவர்த்தனையின் செயலாற்றுகை மற்றும் முகாமைத்துவம் பற்றி பரிசோதனை செய்வதற்கும் அறிக்கையிடுவதற்குமான வாய்ப்பும் இதற்குக் காணப்படுகிறது.

அரசுக்குச் சொந்தமான ஏதேனும் வங்கி அல்லது காப்புறுதி உட்பட நிதிச்சேவைகளை வழங்கும் ஏதேனும் வேறு நிறுவனம் அல்லது ஏதேனும் எழுத்திலான சட்டத்தின் கீழ் அரசாங்கத்துக்கு உரித்தாக்கப்பட்டுள்ள வேறு நிறுவனங்கள் பற்றிய கண்டறிதல்களையும் அத்துடன் அதிலிருந்து எழும் ஏதேனும் விடயத்தையும் குழு மூன்று மாதங்களுக்கொரு தடவை பாராளுமன்றத்திற்கு அறிக்கையிடுதல் வேண்டும். இவ்வறிக்கை பரிகார நடவடிக்கைகள் தேவைப்படும் விடயங்கள் மற்றும் ஏதேனும் விதப்புரைகள் இருப்பின் அவை பற்றிய அவதானிப்புக்களும் உள்ளடக்கியிருத்தல் வேண்டும்.

குழுவின் அறிக்கையொன்று சபையில் சபாபீடத்தில் இடப்பட்டதும் அவ் அறிக்கை நிதி எனும் விடயத்திற்குப் பொறுப்பான அமைச்சருக்கும் உரிய நிறுவனங்களுக்குப் பொறுப்பான அமைச்சர்களுக்கும் ஆற்றுப்படுத்தப்பட வேண்டுமென்பதுடன் அவர்கள் தம் அவதானிப்புகளையும் அது தொடர்பாக எடுத்த நடவடிக்கைகளையும் எட்டு வாரக் காலப்பகுதியினுள் பாராளுமன்றத்திற்கு சமர்ப்பிக்கப்டுதல் வேணடும் என்பதுடன் குறித்த அவதானிப்புகள்  தொடர்பில் எடுக்கப்படவேண்டிய நடவடிக்கைமுறைகள் பற்றிய கூற்றொன்றை சமர்ப்பித்தல் அல்லது அச் சிபாரிசுகள்  நிறைவுசெய்யப்படலாகாது என்பது அமைச்சரின் கருத்தானால் அதற்கான காரணத்தை அமைச்சர் எழுத்தில் விளக்குதல் வேண்டும் என்பதுடன் அமைச்சர் மேற்கொள்வதற்கு உத்தேசித்துள்ள மாற்று நடவடிக்கையையும் சுட்டிக்காட்டுதல் வேண்டும்.

குழுவுக்குத் தேவைப்படின் நிலைப்பாட்டை நேரில் வந்து விளக்குமாறு சம்பந்தப்பட்ட அமைச்சரை அழைப்பதுடன் அவ்வாறான விடயம் தொடர்பாக எழுகின்ற கேள்விகளுக்கு எட்டு வாரங்களினுள் பதிலளிக்குமாறும் கோரலாம்.

குழு தேவைக்கேற்றவாறு, ஏனைய நிறுவனங்களைப் பரிசீலிப்பதற்கு அதன்    உறுப்பினர்களைக் கொண்ட உப குழுக்களை நியமித்தல் வேண்டும். ஆயின், ஏனைய உறுப்பினர்கள் விரும்பினால் இவ்வாறான ஏதாவது குழுக் கூட்டங்களில் கலந்துகொள்ளலாம். குழு அவசியமானது எனக் கருதும் அவ்வாறான விடயங்கள் தொடர்பில் அவ்வாறான உப குழுக்கள் குழுவிற்கு அறிக்கையிடுதல் வேண்டும்.
குழு அல்லது குழுவினால் நியமிக்கப்படும் உப குழு தேவைக்கேற்றவாறு குழுவினால் தீர்மானிக்கப்படும் சம்பந்தப்பட்ட ஏதாவது நிறுவனங்கள் தொடர்பில் பாராளுமன்றத்தில் அமர்வுகளை நடாத்துதல் வேண்டும் என்பதுடன், குழுவின் உறுப்பினர்களாகவிராத பாராளுமன்றத்தின் வேறு உறுப்பினர்கள் அத்தகைய குழுவின் நடவடிக்கைகளை அவதானிப்பதற்கு தவிசாளரின் அனுமதியுடன் அனுமதிக்கப்படலாம்.

வங்கித்தொழில் மற்றும் நிதிச்சேவைகள் பற்றிய குழு அல்லது அதன் உப குழு எதுவும் அதன் கடமைகளைப் புரிவதற்காக எவரேனுமாளை அதன் முன்னர் அழைத்து வினவுவதற்கும் ஏதேனும் பத்திரத்தை, புத்தகத்தை, பதிவேட்டை அல்லது வேறு ஆவணத்தைக் கோருவதற்கும், பரிசீலிப்பதற்கும் களஞ்சியங்கள், சொத்துக்கள் என்பனவற்றைப் பார்வையிடவும் அதிகாரத்தைக் கொண்டிருக்கும்.

பொருளாதார உறுதிப்படுத்தல் பற்றிய குழு

பொருளாதார உறுதிப்படுத்தல் பற்றிய குழு அமைச்சரவை அமைச்சர்கள் அல்லாத 16 உறுப்பினர்களைக் கொண்டதாக இருக்கும்.

அரசுக்குச் சொந்தமான தொழில்முயற்சிகளின் செயலாற்றுகை, முகாமைத்துவம், தொழிற்பாட்டு வினைத்திறன், கொள்கைச் சட்டகம், சட்டச் சட்டகம் மற்றும் இடர் முகாமைத்துவம் ஆகியவற்றைப் பரிசீலித்தல், அரசுக்குச் சொந்தமான தொழில்முயற்சிகளின் நிதி உறுதிப்பாடு, கடன் முகாமைத்துவம், இலாபம் மற்றும் முதலீட்டு முகாமைத்துவம் ஆகியவற்றைப் பரிசீலித்தல் என்பன இதன் பணிகளாக இருக்கும்.

சொத்துக்களின் உரிமை நீக்கத்துக்கான தேவைப்பாடுகளையும் அரச – தனியார் பங்குடைமைகளுக்கான வாய்ப்புகளையும் இழப்புகளைக் குறைத்து அரசுக்குச் சொந்தமான தொழில்முயற்சிகளின் இலாபங்களை அதிகரிப்பதற்கான உபாயமார்க்கங்களையும் பரிசீலிக்கும்.
அரசுக்குச் சொந்தமான தொழில்முயற்சிகளால் தொழிலுக்கு அமர்த்தப்பட்டுள்ளவர்கள் தொடர்பான மனித வள முகாமைத்துவம், மிகை அல்லது தேவைக்கு மேற்பட்ட பணியாளர் குறைப்பு, ஊதியங்கள் மற்றும் நியதிச்சட்டக் கொடுப்பனவு நிலுவைகளை செலுத்தாதிருத்தல் மற்றும் ஊதியங்கள் மற்றும் படிகளை மேலதிகமாகச் செலுத்துதல் ஆகியவற்றை இக்குழுவினால் பரிசீலிக்க முடியும்.

1971 ஆம் ஆண்டின் 38 ஆம் இலக்க நிதிச் சட்டத்தினாலும் 2007 ஆம் ஆண்டின் 7 ஆம் இலக்கக் கம்பனிகள் சட்டத்தினாலும் ஆளுகை செய்யப்படும் அரசுக்குச் சொந்தமான ஏதேனும் தொழில்முயற்சிகள் பற்றிய கண்டறிதல்களைக் குழு மூன்று மாதங்களுக்கு ஒரு தடவை பாராளுமன்றத்திற்கு அறிக்கையிடுதல் வேண்டும்.

இக்குழுவின் அறிக்கை சபையில் சமர்ப்பிக்கப்பட்டதும் அது நிதி எனும் விடயத்திற்குப் பொறுப்பான அமைச்சருக்கும் உரிய நிறுவனங்களுக்குப் பொறுப்பான அமைச்சர்களுக்கும் ஆற்றுப்படுத்தப்பட வேண்டுமென்பதுடன் அவர்கள் தம் அவதானிப்புகளையும் அது தொடர்பாக எடுத்த நடவடிக்கைகளையும் எட்டு வாரக் காலப்பகுதியினுள் பாராளுமன்றத்திற்கு சமர்ப்பிக்கப்டுதல் வேண்டும், என்பதுடன் குறித்த அவதானிப்புகள்  தொடர்பில் எடுக்கப்படவேண்டிய நடவடிக்கைமுறைகள் பற்றிய கூற்றொன்றை சமர்ப்பித்தல் அல்லது அச் சிபாரிசுகள்  நிறைவுசெய்யப்படலாகாது என்பது அமைச்சரின் கருத்தானால் அதற்கான காரணத்தை அமைச்சர் எழுத்தில் விளக்குதல் வேண்டும் என்பதுடன் அமைச்சர் மேற்கொள்வதற்கு உத்தேசித்துள்ள மாற்று நடவடிக்கையையும் சுட்டிக்காட்டுதல் வேண்டும் என்பதுடன் அமைச்சர் மேற்கொள்வதற்கு உத்தேசித்துள்ள மாற்று நடவடிக்கையையும் சுட்டிக்காட்டுதல் வேண்டும். குழுவுக்குத் தேவைப்படின் நிலைப்பாட்டை நேரில் வந்து விளக்குமாறு சம்பந்தப்பட்ட அமைச்சரை அழைப்பதுடன் அவ்வாறான விடயம் தொடர்பாக எழுகின்ற கேள்விகளுக்கு எட்டு வாரங்களினுள் பதிலளிக்குமாறும் கோரலாம்.
குழு தேவைக்கேற்றவாறு, ஏனைய நிறுவனங்களைப் பரிசீலிப்பதற்கு அதன்    உறுப்பினர்களைக் கொண்ட உப குழுக்களை நியமித்தல் வேண்டும். ஆயின், ஏனைய உறுப்பினர்கள் விரும்பினால் இவ்வாறான ஏதாவது குழுக் கூட்டங்களில் கலந்துகொள்ளலாம். குழு அவசியமானது எனக் கருதும் அவ்வாறான விடயங்கள் தொடர்பில் அவ்வாறான உப குழுக்கள் குழுவிற்கு அறிக்கையிடுதல் வேண்டும்.

குழு அல்லது குழுவினால் நியமிக்கப்படும் உப குழு தேவைக்கேற்றவாறு குழுவினால் தீர்மானிக்கப்படும் சம்பந்தப்பட்ட ஏதாவது நிறுவனங்கள் தொடர்பில் பாராளுமன்றத்தில் அமர்வுகளை நடாத்துதல் வேண்டும்.

குழுவின் உறுப்பினர்களாகவிராத பாராளுமன்றத்தின் வேறு உறுப்பினர்கள் அத்தகைய குழுவின் நடவடிக்கைகளை அவதானிப்பதற்கு தவிசாளரின் அனுமதியுடன் அனுமதிக்கப்படலாம்.

பொருளாதார உறுதிப்படுத்தல் பற்றிய குழு அல்லது அதன் உப குழு எதுவும் அதன் கடமைகளைப் புரிவதற்காக எவரேனுமாளை அதன் முன்னர் அழைத்து வினவுவதற்கும் ஏதேனும் பத்திரத்தை, புத்தகத்தை, பதிவேட்டை அல்லது வேறு ஆவணத்தைக் கோருவதற்கும், பரிசீலிப்பதற்கும் களஞ்சியங்கள், சொத்துக்கள் என்பனவற்றைப் பார்வையிடவும் அதிகாரமுடையதாயிருத்தல் வேண்டும்.

பொருளாதார உறுதிப்படுத்தல் பற்றிய குழுவின் கூட்ட நடப்பெண் ஐந்து உறுப்பினர்களாதல் வேண்டும். குழுவினால் ஏற்றுக்கொள்ளத்தக்க நியாயமான காரணமின்றி அக்குழுவின் தொடர்ச்சியான மூன்று கூட்டங்களிற்கு வருகைதராதுள்ள எவரேனும் உறுப்பினர், அத்தகைய குழுவின் உறுப்பாண்மையை இழந்துள்ளாரெனக் கருதப்படுதல் வேண்டும்



தொடர்புடைய செய்திகள்

2026-11-16

கொரிய பாராளுமன்றத் தூதுக்குழுவினர் பிரதி சபாநாயகரைச் சந்தித்தனர் – இரு நாடுகளுக்கும் இடையிலான ஒத்துழைப்பை வலுப்படுத்துவது குறித்து கலந்துரையாடல்

கொரியக் குடியரசின் தேசிய சட்டமன்றத்தைப் பிரதிநிதித்துவப்படுத்தும் சிறுவர், சனத்தொகை மற்றும் சுற்றுச்சூழல் தொடர்பான கொரிய பாராளுமன்ற லீக்கின் (CPE) தூதுக்குழுவினர் அண்மையில் இலங்கைப் பாராளுமன்றத்தின் கௌரவ பிரதி சபாநாயகர் வைத்தியர் ரிஸ்வி சாலி அவர்களைச் சந்தித்தனர்.சுற்றுச்சூழல் மீள்திறன், சனத்தொகைக் கொள்கைகள், கல்வி மற்றும் பொருளாதாரப் பரிமாற்றங்கள் ஆகிய துறைகளில் இரு நாடுகளுக்கும் இடையிலான இருதரப்பு ஒத்துழைப்பை மேலும் வலுப்படுத்துவது தொடர்பில் இங்கு கலந்துரையாடப்பட்டது. இச்சந்திப்பில் பாராளுமன்றத்தின் செயலாளர் நாயகம் குஷானி ரோஹணதீரவும் கலந்துகொண்டார்.கொரிய தேசிய சட்டமன்றத்தின் புலனாய்வுக் குழுவின் தலைவரும், சிறுவர், சனத்தொகை மற்றும் சுற்றுச்சூழல் தொடர்பான கொரிய பாராளுமன்ற லீக்கின் உப தலைவருமான கௌரவ லீ யாங்-சூ (Lee Yang-soo) தலைமையில் கொரியத் தூதுக்குழுவினர் வருகை தந்தனர். இத்தூதுக்குழுவில் குறித்த லீக்கின் உறுப்பினர் கௌரவ குவாக் சாங்-இயோன் (Kwak Sang-eon), கொரிய – இலங்கை பாராளுமன்ற நட்புறவுச் சங்கத்தின் உப தலைவரான கௌரவ கிம் சோ-ஹீ (Kim So-hee) மற்றும் இலங்கைக்கான கொரியக் குடியரசின் தூதுவர் கௌரவ யூன்-ஜுங் கிம் (Youn-Jung Kim) ஆகியோரும் உள்ளடங்கியிருந்தனர்.1989 ஆம் ஆண்டில் ஸ்தாபிக்கப்பட்ட சிறுவர், சனத்தொகை மற்றும் சுற்றுச்சூழல் தொடர்பான கொரிய பாராளுமன்ற லீக், காலநிலை மாற்றம், சனத்தொகை மற்றும் சிறுவர் நலன் தொடர்பான உலகளாவிய சவால்களை எதிர்கொள்வதற்காக சர்வதேச பாராளுமன்ற ஒத்துழைப்பை மேம்படுத்தும் நோக்கில் செயற்பட்டு வருகின்றது.2027 ஆம் ஆண்டில் இலங்கைக்கும் கொரியக் குடியரசுக்கும் இடையிலான இராஜதந்திர உறவுகள் ஏற்படுத்தப்பட்டு 50 ஆண்டுகள் பூர்த்தியடைவதைக் கருத்திற்கொண்டு, இரு நாடுகளுக்கும் இடையில் நிலவும் நீண்டகால நட்புறவையும் ஒத்துழைப்பையும் மேலும் வலுப்படுத்துவதற்கான எதிர்பார்ப்பை இரு தரப்பினரும் இதன்போது வலியுறுத்தினர்.இலங்கையை அண்மையில் பாதித்த சீரற்ற காலநிலை நிலைமைகள் தொடர்பில் பிரதி சபாநாயகர் இதன்போது தெரிவித்தார். குறிப்பாக, கடுமையான வெள்ளப்பெருக்கு மற்றும் மண்சரிவுகள் காரணமாக உட்கட்டமைப்பு வசதிகளுக்கும் விவசாய நிலங்களுக்கும் ஏற்பட்டுள்ள கணிசமான சேதங்கள் குறித்து அவர் எடுத்துரைத்தார்.அத்துடன், பிறப்பு வீதம் குறைவடைதல் மற்றும் வேகமாக முதியோர் எண்ணிக்கை அதிகரித்தல் உள்ளிட்ட இலங்கை எதிர்கொள்ளும் சனத்தொகை சார் சவால்கள் குறித்தும் அவர் விளக்கமளித்தார். இந்நிலைமைகள் எதிர்காலத்தில் தங்கியிருப்போர் விகிதம் மற்றும் தொழிலாளர் சக்தியில் கிடைப்பனவு ஆகியவற்றில் குறிப்பிடத்தக்க தாக்கத்தை ஏற்படுத்தக்கூடும் என்றும் அவர் சுட்டிக்காட்டினார். இலங்கையின் இலவசக் கல்வி முறைமை மற்றும் அதனை மேலும் வலுப்படுத்துவதில் காணப்படும் சவால்கள் குறித்தும் இதன்போது கலந்துரையாடப்பட்டது.கொரியக் குடியரசில் குறைவடைந்து வரும் பிறப்பு வீதத்தை எதிர்கொள்வதற்காக முன்னெடுக்கப்பட்டுள்ள நடவடிக்கைகள் தொடர்பில் கருத்துத் தெரிவித்த கொரியப் பிரதிநிதிகள், புதிதாகத் திருமணமான தம்பதியினருக்கான குறைந்த வாடகை வீடமைப்புத் திட்டங்கள், குறைந்த வட்டி வீதத்திலான கடன்கள் மற்றும் வீடமைப்புக்கான ஊக்குவிப்புகள் உள்ளிட்ட பல்வேறு கொள்கை நடவடிக்கைகள் குறித்து விளக்கமளித்தனர்.ஓய்வூதியப் பாதுகாப்பில் காணப்படும் இடைவெளிகளைக் குறைப்பதற்காக ஓய்வுபெறும் வயதெல்லையை 60 இலிருந்து 65 ஆக அதிகரிப்பது தொடர்பான முன்மொழிவுகள் குறித்தும் தூதுக்குழுவினர் கருத்துக்களைப் பகிர்ந்துகொண்டனர். இத்தகைய கொள்கைகளை நடைமுறைப்படுத்தும்போது இளைஞர் தலைமுறையினருக்குப் போதுமான வேலைவாய்ப்புகளை உறுதிப்படுத்துவதன் முக்கியத்துவத்தையும் அவர்கள் வலியுறுத்தினர்.பொருளாதார அபிவிருத்தியுடன் சுற்றுச்சூழல் பாதுகாப்பிற்கும் முன்னுரிமை வழங்கப்பட வேண்டியதன் முக்கியத்துவத்தை இரு தரப்பினரும் வலியுறுத்தினர். இயற்கை அனர்த்தங்கள் காரணமாக பல வருடங்களாக ஈட்டப்பட்ட பொருளாதார முன்னேற்றத்திற்குப் பாதிப்புகள் ஏற்படக்கூடும் என்றும் இதன்போது சுட்டிக்காட்டப்பட்டது.இலங்கையில் கொரியக் கலாசாரம், குறிப்பாக கொரிய பாப் இசை பிரபலமடைந்து வருவது மற்றும் இரு நாடுகளுக்கும் இடையிலான சுற்றுலாத்துறையை மேலும் விரிவுபடுத்துவதற்கான சாத்தியக்கூறுகள் குறித்தும் கலந்துரையாடப்பட்டது.மேலும், தென்கொரியாவில் தொழில்புரியும் இலங்கை இளைஞர், யுவதிகளுக்குக் கிடைக்கக்கூடிய தொழில்நுட்ப மற்றும் தொழிற்பயிற்சி வாய்ப்புகளின் நன்மைகள் குறித்தும் இரு தரப்பினரும் கவனம் செலுத்தினர். இப்பயிற்சி வாய்ப்புகள் ஊடாக தொழில்சார் திறன்களை மேம்படுத்துவதுடன், இலங்கைக்கும் பொருளாதார நன்மைகளைப் பெற்றுக்கொள்ள முடியும் என்றும் இதன்போது குறிப்பிடப்பட்டது.அடுத்த வருடம் தென்கொரியாவில் நடைபெறவுள்ள சுற்றுச்சூழல் மற்றும் அபிவிருத்தி தொடர்பான ஆசிய – பசுபிக் பாராளுமன்ற உறுப்பினர்களின் மாநாட்டில் (APPCED) கலந்துகொள்ளுமாறு இலங்கைப் பாராளுமன்றத்திற்குக் கொரியத் தூதுக்குழுவினர் அழைப்பு விடுத்தனர். குறித்த மாநாட்டில் பல நாடுகளின் சார்பில் கொரியா தலைமைத்துவத்தை வகிக்கவுள்ளது.அத்துடன், அடுத்த வருடம் ஜனவரி மாதம் இலங்கையில் நடைபெறவுள்ள சர்வதேசக் கண்காட்சியில் கொரிய வர்த்தக நிறுவனங்களின் பங்கேற்பு குறித்தும் இதன்போது கவனம் செலுத்தப்பட்டது.


2026-11-16

வடக்கு மற்றும் கிழக்கில் கைது செய்யப்பட்ட மற்றும் சரணடைந்த 12,196 பேர் புனர்வாழ்வளிக்கப்பட்டு சமூகமயப்படுத்தப்பட்டுள்ளனர்

வடக்கு மற்றும் கிழக்கு மாகாணங்களில் மோதல்கள் நிலவிய காலப்பகுதியிலும் அதன் பின்னரும் கைது செய்யப்பட்ட அல்லது சரணடைந்த 12,196 பேர் புனர்வாழ்வளிக்கப்பட்டு சமூகமயப்படுத்தப்பட்டுள்ளதாக கௌரவ பொதுமக்கள் பாதுகாப்பு மற்றும் பாராளுமன்ற அலுவல்கள் அமைச்சர் ஆனந்த விஜேபால தெரிவித்தார்.கௌரவ பாராளுமன்ற உறுப்பினர் வைத்தியர் பத்மநாதன் சத்தியலிங்கம் அவர்கள் வாய்மூல விடைக்காக எழுப்பிய கேள்விகளுக்குப் பதிலளிக்கும்போது அமைச்சர் இதனைத் தெரிவித்தார்.புனர்வாழ்வு செயற்பாட்டின் கீழ் ஆலோசனைச் சேவைகள், யோகா மற்றும் ஆன்மீக நிகழ்ச்சித்திட்டங்கள், அடிப்படைக் கல்வி மற்றும் மொழிப் பயிற்சி நிகழ்ச்சித்திட்டங்கள், கல்விப் பொதுத் தராதர சாதாரண தரம் மற்றும் உயர்தரப் பரீட்சைகளுக்குத் தோற்றுவதற்கான வழிகாட்டல் நிகழ்ச்சித்திட்டங்கள் ஆகியன முன்னெடுக்கப்பட்டுள்ளதாக அமைச்சர் தெரிவித்தார்.அத்துடன், ஓவியம், இசை, நாடகம் மற்றும் அரங்கக் கலை உள்ளிட்ட அழகியல் கலை நிகழ்ச்சித்திட்டங்கள், வாகனச் செலுத்துநர் பயிற்சி மற்றும் விளையாட்டு நிகழ்ச்சித்திட்டங்களும் நடைமுறைப்படுத்தப்பட்டுள்ளதாக அவர் குறிப்பிட்டார்.புனர்வாழ்வளிக்கப்பட்டவர்களின் வாழ்வாதாரத்தை மேம்படுத்தும் நோக்கில் தொழிற்பயிற்சிகள் வழங்கப்பட்டுள்ளதுடன், அப்பயிற்சிகளுக்குத் தேவையான உபகரணங்கள் மற்றும் ஏனைய உதவிகளும் வழங்கப்பட்டுள்ளதாக அமைச்சர் தெரிவித்தார்.மேலும், அவர்களின் வாழ்வாதாரத்தை வலுப்படுத்தும் வகையில் கடனுதவிகள், வீடுகள், தையல் இயந்திரங்கள், மீன்பிடி வலைகள், மிதிவண்டிகள், நீரிறைக்கும் இயந்திரங்கள், தச்சுத் தொழில் உபகரணங்கள், பதப்படுத்தும் உபகரணங்கள், விவசாய உபகரணங்கள், கால்நடைகள் மற்றும் முச்சக்கர வண்டிகள் உள்ளிட்ட பல்வேறு உதவிகள் அரச நிறுவனங்கள் மற்றும் அரச சார்பற்ற நிறுவனங்களினால் வழங்கப்பட்டுள்ளதாகவும் அமைச்சர் வழங்கிய பதிலளில் குறிப்பிடப்பட்டுள்ளது.


2026-11-16

தொண்டர் ஆசிரியர்கள் 4,700 பேரையும் ஆசிரியர் உதவியாளர்களாக இணைந்துகொள்ளப்பட்ட நிலையில், அவர்களை மீண்டும் ஆசிரியர் சேவைக்கு இணைத்துக்கொள்ள முடியாது – கல்வி மற்றும் உயர்கல்வி பிரதி அமைச்சர் தெரிவிப்பு

தொண்டர் ஆசிரியர்கள் 4,700 பேரும் ஆசிரியர் உதவியாளர்களாக நியமிக்கப்பட்டுள்ள நிலையில், மீண்டும் அவர்களை ஆசிரியர் சேவைக்கு இணைத்துக்கொள்வதற்கான சாத்தியமில்லை என கௌரவ கல்வி மற்றும் உயர்கல்வி பிரதி அமைச்சர் வைத்தியர் மதுர செனவிரத்ன தெரிவித்தார்.நாட்டின் பல்வேறு மாகாணங்களில் அமைந்துள்ள பாடசாலைகளில் தற்போது தொண்டர் ஆசிரியர்களாகப் பணியாற்றும் 4,700 ஆசிரியர்களுக்கு ஆசிரியர் உதவியாளர்களாக நியமனங்களை வழங்குவதற்கு அமைச்சரவைத் தீர்மானத்தின் பிரகாரம் ஆட்சேர்ப்பு செய்வதற்கு அனுமதி வழங்கப்பட்டுள்ளதாகவும், 2007.01.04 ஆம் திகதிய அமைச்சரவைப் பத்திர இலக்கம் 06/2282/229/085-II இன் பிரகாரம் இந்த நடவடிக்கை மேற்கொள்ளப்பட்டுள்ளதாகவும் பிரதி அமைச்சர் மேலும் தெரிவித்தார்.கௌரவ பாராளுமன்ற உறுப்பினர் எம்.எஸ். உதுமாலெப்பை அவர்கள் வாய்மூல விடைக்காக எழுப்பிய கேள்விக்குப் பதிலளிக்கும் போதே பிரதியமைச்சர் இதனைத் தெரிவித்தார்.ஆசிரியர் உதவியாளர்களாக மேல், மத்திய, தென், வடக்கு மற்றும் கிழக்கு, வடமேல், வடமத்திய, ஊவா மற்றும் சப்ரகமுவ ஆகிய மாகாணங்களில் நியமிப்பதற்கு அனுமதி வழங்கப்பட்டுள்ள மேற்படி 4,700 தொண்டர் ஆசிரியர்களில் 462 பேரை வடக்கு மற்றும் கிழக்கு மாகாணங்களில் நியமிப்பதற்கு அனுமதி வழங்கப்பட்டுள்ளதாகவும் பிரதி அமைச்சர் மேலும் குறிப்பிட்டார்.


2026-11-14

காட்டு யானைகளுக்கும் ரயில்களுக்கும் இடையிலான மோதல்களைக் குறைப்பதற்கான நிலைபேறான தீர்வுகள் அறிமுகம்

ரயில்களில் மோதி காட்டு யானைகள் உயிரிழப்பதைத் தடுப்பதற்கான நிலைபேறான தீர்வுகளை வழங்கும் நோக்கில் முன்னெடுக்கப்பட்டுள்ள பல்வேறு நடவடிக்கைகள் பாராளுமன்றத்தில் சமர்ப்பிக்கப்பட்டுள்ளன. ரயில்வே உட்கட்டமைப்பு வசதிகளை மேம்படுத்துதல், ரயில்வே ஊழியர்களைத் தெளிவூட்டுதல், காட்டு யானைகளின் வாழ்விடங்களை முகாமைத்துவம் செய்தல் மற்றும் நவீன கண்காணிப்பு மற்றும் அடையாளம் காணும் தொழில்நுட்பங்களை அறிமுகப்படுத்துதல் ஆகியவற்றின் ஊடாக ரயில்களில் மோதி காட்டு யானைகள் உயிரிழப்பதைக் குறைப்பதே இந்நடவடிக்கைகளின் நோக்கமாகும்.கௌரவ பாராளுமன்ற உறுப்பினர் நளின் பண்டார ஜயமஹவினால் வாய்மூல விடைக்காக முன்வைக்கப்பட்ட கேள்விகளுக்குச் சுற்றாடல் அமைச்சர் கௌரவ வைத்தியர் தம்மிக்க பட்டபெந்தி சமர்ப்பித்த எழுத்துமூலப் பதிலில் மேற்கண்ட விடயங்கள் தெரியவந்தன.பாராளுமன்றத்தில் சமர்ப்பிக்கப்பட்ட பதிலுக்கு அமைய, ரயில்வே திணைக்களத்தின் கிழக்கு ரயில் பாதையின் இருபுறங்களிலும் தெளிவாகப் பார்க்கக்கூடிய வகையிலும், சிறந்த முறையில் வேகத்தைக் கட்டுப்படுத்தக்கூடிய வகையிலும் மேம்படுத்தப்பட்ட ரயில் பெட்டிகளை அறிமுகப்படுத்துவதற்கு நடவடிக்கை எடுக்கப்பட்டுள்ளது.அத்துடன், கல்ஓயா சந்தியிலிருந்து ஹிங்குராங்கொட வரையிலும், கல்ஓயா சந்தியிலிருந்து கந்தளாய் வரையிலும் காட்டு யானைகள் ரயில் பாதையைக் கடக்கும் 27 கிலோமீற்றர் நீளமான பகுதிகள் அடையாளம் காணப்பட்டுள்ளன. அப்பகுதிகளில் காட்டு யானைகள் இலகுவாகப் பயணிப்பதற்கு ஏதுவாக, ரயில் பாதையின் தண்டவாளத் தூண்களுக்கு இடையிலான இடைவெளிகளை நிரப்பும் வகையில் 800 கொங்கிறீட் கற்துண்டுகள் பதிக்கும் பணி நிறைவுசெய்யப்பட்டுள்ளது.ரயில் பாதையின் சில பகுதிகளிலும் வளைவுகளிலும் நடமாடும் காட்டு யானைகளை ரயில் சாரதிகளால் அவதானிக்க முடியாத நிலை காணப்படுவதால், அத்தகைய இடங்களில் 10 முதல் 20 மீற்றர் வரையான தூரத்திற்கு அடர்ந்த புதர்களை அகற்ற நடவடிக்கை எடுக்கப்பட்டுள்ளது. இதன் கீழ், வனப் பாதுகாப்புத் திணைக்களத்தினால் 20 கிலோமீற்றர் தூரத்திலுள்ள பகுதிகள் துப்புரவு செய்யப்பட்டுள்ளன.ரயில்வே திணைக்களத்தின் சாரதிகள், ரயில் நிலைய அதிபர்கள், ரயில் பாதைகளுக்குப் பொறுப்பான பொறியியலாளர்கள் மற்றும் ரயில் சாரதிகளின் உதவியாளர்களுக்கான விழிப்புணர்வு நிகழ்ச்சிகள் 2025.05.16 மற்றும் 17ஆம் திகதிகளில் நடத்தப்பட்டுள்ளன.ஹபரணை ரயில் நிலையத்தைக் கடந்து கந்தளாய் நோக்கிப் பயணிக்கும்போது அமைந்துள்ள வனப் பாதுகாப்பு ஒதுக்குப் பகுதிக்குள், ரயில் பாதையிலிருந்து கணிசமான தூரத்தில் நீரைப் பெற்றுக்கொள்ளக்கூடிய வகையில் இரண்டு குளங்களை அமைத்தல் மற்றும் அவற்றைப் போஷிப்பதற்கான நடவடிக்கைகளுக்காக 25.4 மில்லியன் ரூபா நிதி ஒதுக்கீடு நீர்ப்பாசனத் திணைக்களத்திற்கு வழங்கப்பட்டுள்ளது.கல்ஓயா மற்றும் மின்னேரியவுக்கு இடையிலான 141ஆம் இடத்தில், காசிக்கோட்டை ரயில் பாதையைக் கடந்து யானைகள் பயணிக்கும் பகுதியைக் கண்காணிப்பதற்காக CCTV கமராக்கள் பொருத்தப்பட்டுள்ளன. அவை அனுராதபுரம் கட்டுப்பாட்டு அறையினூடாகக் கண்காணிக்கப்படுகின்றன.மேலும், காட்டு யானைகளை அடையாளம் காண்பதற்காக ரயில்களில் வெப்ப உணர்திறன் கமராக்களை (Thermal Detector Cameras) பொருத்தும் முன்னோடித் திட்டம் ஆரம்பிக்கப்பட்டுள்ளதுடன், இலங்கை ரயில்வே திணைக்களம் மற்றும் ஆர்தர் சி. கிளார்க் நவீன தொழில்நுட்ப நிறுவனம் ஆகியவற்றினால் தொடர்ச்சியான பரிசோதனைகள் முன்னெடுக்கப்பட்டு வருகின்றன.ரயில்களில் மோதுண்டு 2020ஆம் ஆண்டு முதல் 2026.10.12ஆம் திகதி வரையான காலப்பகுதியில் 81 யானைகள் உயிரிழந்துள்ளதாகப் பாராளுமன்றத்தில் சமர்ப்பிக்கப்பட்ட பதிலில் குறிப்பிடப்பட்டுள்ளது.






பதிப்புரிமை © இலங்கை பாராளுமன்றம்.

முழுப்பதிப்புரிமையுடையது.

வடிவமைத்து உருவாக்கியது  TekGeeks