E   |   සි   |  

2022-10-13

செய்தி வகைகள் : குழு செய்திகள் 

படைப்பாற்றலுடன் இணைந்த நெகிழ்திறன் வெற்றியை உருவாக்கும் - சர்வதேச பெண் குழந்தைகள் தினத்தைக் கொண்டாடுதல் - கௌரவ. சுதர்ஷினி பெர்னாண்டோபுள்ளே, பாராளுமன்ற பெண் உறுப்பினர்களின் ஒன்றியத்தின் தலைவி

இன்றைய சிறுமி நாளைய பெண் ஆவாள். எனவே நமது எதிர்காலம் இன்று எமது கைகளில் உள்ளது. 2022 ஆம் ஆண்டு ஒக்டோபர் 11 ஆம் திகதி சர்வதேச பெண் குழந்தைகள் தினத்தின் 10 ஆவது ஆண்டு நிறைவை நாம் கொண்டாடும் இவ்வேளையில், இலங்கையர்களாகிய நாம், கடுமையான பொருளாதார நெருக்கடிக்கு மத்தியில், பெண் குழந்தைகளின் உரிமைகளைப் பாதுகாப்பதற்காக அவர்களின் உண்மை நிலைகள் குறித்து அவதானமாக இருக்க வேண்டும்.

ஒட்டுமொத்த இலங்கையும் பொருளாதார ரீதியாகவும், சமூக ரீதியாகவும், மற்றும் அரசியல் ரீதியாகவும் சவாலுக்கு உள்ளாகியுள்ளது. நாட்டில் நிலவும் தாங்க முடியாத பணவீக்க விகிதங்கள் காரணமாக சராசரி இலங்கைக் குடும்பங்களின் ஊட்டச்சத்து உட்கொள்ளல் குறைக்கப்பட்டுள்ளது. எரிபொருள் பற்றாக்குறை மற்றும் மின்வெட்டு, பல இக்கட்டான சூழ்நிலைகளுக்கு மத்தியில், இந்த எதிர்மறைத் தாக்கங்களை அதிகப்படுத்தியது.

இலங்கையில் ஒட்டுமொத்தமாக குழந்தைகளின் உள, கல்வி மற்றும் மருத்துவ நலன்களில் பொருளாதார நெருக்கடியின் பாரதூரமான விளைவுகளை சமீபத்திய ஆய்வுகள் மற்றும் கணக்கெடுப்புக்கள் உறுதிப்படுத்துகின்றன. பெண் குழந்தைகளின் விரும்பத்தகாத ஆரோக்கியம் மற்றும் ஊட்டச்சத்து நிலை அவர்களது சொந்த நல்வாழ்வு மற்றும் உற்பத்தித்திறனை மட்டுமல்லாது, எதிர்கால சந்ததியினரையும் பாதிக்கின்றது. பெண் குழந்தைகளும் அதிகளவில் துன்புறுத்தல் மற்றும் பாலியல் வன்முறைக்கு ஆளாகின்றனர். பாலியல் துன்புறுத்தல் அறிக்கைகள் பல ஆண்டுகளாக அதிகரித்துள்ளன, குறிப்பாக இந்த பொருளாதார நெருக்கடியின் போது. இத்தகைய கடுமையான பொருளாதார நெருக்கடியின் விளைவான சமூக அமைதியின்மையானது வன்முறை மற்றும் பாலியல் துன்புறுத்தல் நிகழ்வுகளை மட்டுமே அதிகரிக்கும், மேலும் பெண் குழந்தை எளிதாகப் பாதிக்கப்படக்கூடிய ஒரு இலக்காக இருக்கலாம். கல்வி, சுகாதாரம் ஆகிய துறைகளில் பல ஆண்டுகளாக இலங்கை அடைந்துள்ள மனித அபிவிருத்திக் குறிகாட்டிகள் இந்தப் பொருளாதார நெருக்கடியின் போது தலைகீழாக மாறும் அபாயம் உள்ளது. குறிப்பாக, நாட்டின் நிலைமையை மேம்படுத்தாத வரை, கல்வி என்பது பெற்றோர்கள் தங்கள் பெண் மற்றும் ஆண் குழந்தைக்கு இடையே மேற்கொள்ள வேண்டிய ஒரு தேர்வாக மாறும்.

எவ்வாறாயினும், சரியான வகையான ஆதரவை வழங்கினால், இந்த சவால்கள் சிறந்த வாய்ப்புக்களாக மாறும் என்று பெண் பாராளுமன்ற உறுப்பினர்கள் நம்புகின்றனர். அதிஷ்டவசமாக, இலங்கைக்கு ஆதரவாளர்கள் மற்றும் நலன் விரும்பிகள் நிறைய உள்ளனர். எங்களிடம் வலுவான ஆதரவளிக்கும் சர்வதேச நிறுவனங்கள், வளர்ச்சிப் பங்காளர்கள் மற்றும் பெருநிறுவனத் துறையினர் எங்களுடைய வளர்ச்சி முயற்சிகளுக்குப் பின்னால் எப்போதும் இருக்கின்றார்கள். எனவே, பாராளுமன்ற பெண் உறுப்பினர்களின் ஒன்றியம் என்ற வகையில், இந்த ஆதரவாளர்கள் எங்கள் பெண்களுக்கு சரியான வாய்ப்புக்களை வழங்க முன்வர வேண்டும் என்று கேட்டுக்கொள்கின்றோம். இவ்வாறான தகுதியான முயற்சிகளுக்கு தலைமைத்துவத்தை வழங்குவதற்கு, குறிப்பாக இலங்கையிலுள்ள பெண்கள் மற்றும் சிறுமிகளின் பிரதிநிதிகள் என்ற வகையில் நாங்கள் தயாராக உள்ளோம்.

2020 தேசிய வரவு செலவுத் திட்ட விவாதத்தில் இருந்து இலங்கையில் மாதவிடாய் வறுமைக்கு எதிராக பாராளுமன்ற பெண்  உறுப்பினர்களின் ஒன்றியம் வாதிட்டது. நாங்கள் அத்துடன் நிற்கவில்லை. நாங்கள் எமது வாதத்தைத் தொடர்ந்தோம். இறுதியாக, இன்று, இறக்குமதி செய்யப்படும் சுகாதாரத் துவாய்கள் மற்றும் உள்நாட்டில் அவற்றை உற்பத்தி செய்வதற்கான மூலப்பொருட்களுக்கான வரியை நீக்குவதற்கு அரசாங்கம் முடிவு செய்துள்ளது. தற்போதைய பொருளாதார நெருக்கடிக்கு முன்பிருந்தும் பாடசாலைகளுக்குப் பெண் குழந்தைகள் சமூகமளிக்காததற்கு மாதவிடாய் வறுமை ஒரு காரணமாக இருந்ததனால், பெண்கள் மற்றும் குறிப்பாக பெண் குழந்தைகளுக்கு இது ஒரு மகத்தான சாதனையாக நாங்கள் கருதுகின்றோம். 2021 ஆம் ஆண்டில், நாங்கள் பரிந்துரைத்த மற்றுமொரு முக்கிய பரிந்துரை என்னவென்றால், அனைத்துப் பாடசாலை மாணவர்களுக்கும் சுகாதாரத் துவாய்கள் இலவசமாக விநியோகிக்கப்பட வேண்டும் என்பதாகும். இந்தப் பொருளாதார நெருக்கடியின் மத்தியில், அது சாத்தியமில்லை என்றாலும் கூட, இலங்கையில் உள்ள ஏழைப் பெண் குழந்தைகளுக்காவது இலவசமாகத் துவாய்களை வழங்குவது தொடர்பான எங்கள் வாதத்தைத் தொடர விரும்புகின்றோம்.

படைப்பாற்றலுடன் இணைந்த நெகிழ்திறன் வெற்றியை உருவாக்கும். எனவே, பாராளுமன்ற உறுப்பினர்களாகிய நாம் பார்க்கின்ற வகையில், இலங்கை எதிர்கொள்ளும் இன்னல்கள் எமது கையில் உள்ள ஒரு சந்தர்ப்பம் ஆகும். பெண் குழந்தைகளுக்கான சர்வதேச தினத்தில், பெண் குழந்தைகளைப் பாதுகாக்கவும், அவர்களுக்கு வலுவூட்டவும் ஒட்டுமொத்த சமுதாயமும் ஒன்றுபட வேண்டும் என்று நாம் வலியுறுத்துகின்றோம். இந்தப் பேரழிவிற்கு எதிராக நாட்டில் மெதுவாக வளர்ந்து வரும் நெகிழ்தன்மையை, பெண் குழந்தைகளின் எதிர்காலத்தை முன்பை விட பிரகாசமாக்கும் படிக்கல்லாகப் பயன்படுத்த, எங்களுடன் கைகோர்க்க முன்வர விருப்பமும் திறமையும் உள்ள நிறுவனங்களை நாம் அழைக்கின்றோம்.



தொடர்புடைய செய்திகள்

2026-11-18

கம்பஹா மாவட்ட “சணச” சங்கத்தின் நிதி நெருக்கடிக்குத் தீர்வுகாண வைப்பாளர்களின் பணத்தை மீளச் செலுத்துவதற்கான பொறிமுறையைத் தயாரிப்பது தொடர்பில் கோபா உபகுழுவில் அவதானம்

கம்பஹா மாவட்ட “சணச” சங்கத்தில் இடம்பெற்றுள்ள நிதி முறைகேடுகள் மற்றும் வைப்பாளர்களின் பணத்தை மீளச் செலுத்த முடியாத நிலைமை தொடர்பில் கலந்துரையாடுவதற்காக, அரசாங்கக் கணக்குகள் பற்றிய குழுவினால் நியமிக்கப்பட்ட கூட்டுறவுத் துறையில் நிலவும் நெருக்கடிகள் தொடர்பில் ஆராய்வதற்கான உபகுழு, அதன் தலைவர் கௌரவ பாராளுமன்ற உறுப்பினர் ருவன்திலக ஜயக்கொடியின் தலைமையில் அண்மையில் பாராளுமன்றத்தில் கூடியது.கம்பஹா மாவட்ட “சணச” சங்கத்தின் முகாமைத்துவத்தின் பலவீனங்கள் தொடர்பான கணக்காய்வாளர் நாயகத்தின் அறிக்கையில் குறிப்பிடப்பட்டுள்ள விடயங்கள் குறித்து இங்கு ஆராயப்பட்டதுடன், உரிய அனுமதியின்றி சங்கத்தின் நிதி தனியார் நிறுவனங்களில் முதலீடு செய்யப்பட்டமையால் ஏற்பட்டுள்ள நிதி நெருக்கடி குறித்தும் விரிவாகக் கலந்துரையாடப்பட்டது. இந்த முதலீடுகள் காரணமாக உறுப்பினர்கள் மற்றும் வெளிப்புற வைப்பாளர்களின் வைப்புப் பணத்தை மீளச் செலுத்த முடியாத நிலைமை ஏற்பட்டுள்ளதாக இதன்போது தெரியவந்தது.மேலும், கூட்டுறவுத் திணைக்களத்தின் மேற்பார்வை மற்றும் ஒழுங்குபடுத்தல் செயற்பாடுகளில் காணப்பட்ட குறைபாடுகள், சங்கத்தின் சொத்துக்களைத் தீர்ப்பதில் உள்ள சிக்கல்கள், நீதிமன்றத் தடையுத்தரவுகள் மற்றும் சம்பந்தப்பட்ட பொறுப்புவாய்ந்த தரப்பினருக்கு எதிராக சட்ட நடவடிக்கை எடுக்க வேண்டியதன் அவசியம் குறித்தும் கலந்துரையாடப்பட்டது.வைப்பாளர்களின் பணத்தை மீள வழங்குவதற்காக, சங்கத்திற்குச் சொந்தமான சொத்துக்களை மதிப்பீடு செய்து அவற்றை விற்பனை செய்வதற்கான சாத்தியக்கூறுகளை ஆராய்தல், சொத்துக்களை அகற்றுவதற்கு நீதிமன்றத்தினால் விதிக்கப்பட்டுள்ள தடையுத்தரவுகளை நீக்குவதற்குத் தேவையான நடவடிக்கைகளை மேற்கொள்ளுதல் மற்றும் தற்போது கையிருப்பில் உள்ள நிதியை வைப்பாளர்களிடையே நியாயமான அடிப்படையில் பகிர்ந்தளித்தல் தொடர்பிலும் இதன்போது கவனம் செலுத்தப்பட்டது.அத்துடன், அங்கீகரிக்கப்படாத முதலீடுகளை மேற்கொண்டமைக்குப் பொறுப்பான முன்னாள் பணிப்பாளர் சபை உறுப்பினர்களிடமிருந்து அதற்கான நட்டஈட்டுத் தொகையை அறவிடுதல், சம்பந்தப்பட்ட தனியார் நிறுவனத்திற்கு எதிராக சட்ட நடவடிக்கை எடுத்தல் மற்றும் நிறைவு செய்யப்படாத திட்டங்களைப் பூர்த்தி செய்து அவற்றின் மூலம் வருமானம் ஈட்டுவதற்கான சாத்தியக்கூறுகள் குறித்தும் கலந்துரையாடப்பட்டது.வைப்பாளர்களின் முழு வைப்புத் தொகையையும் மீளச் செலுத்துவதற்கான தெளிவானதும் நடைமுறைச் சாத்தியமானதுமான பொறிமுறையொன்றை முன்வைக்க வேண்டியதன் அவசியம் இதன்போது வலியுறுத்தப்பட்டது. அத்துடன், எதிர்கால நடவடிக்கைகள் தொடர்பில் கூட்டுறவு அபிவிருத்தித் திணைக்களத்தின் மேல் மாகாண மற்றும் கம்பஹா மாவட்ட அதிகாரிகளுடனும் கலந்துரையாடப்பட்டது.இந்தக் கூட்டத்தில் உபகுழுவின் கௌரவ பாராளுமன்ற உறுப்பினர்களான சட்டத்தரணி துஷாரி ஜயசிங்க, டீ. கே. ஜயசுந்தர மற்றும் சுசந்த குமார நவரத்ன ஆகியோரும் கலந்துகொண்டனர்.


2026-11-17

விஞ்ஞானம், தொழில்நுட்பம் மற்றும் டிஜிட்டல் பரிணாமம் பற்றிய துறைசார் மேற்பார்வைக் குழு பல முக்கிய நிறுவனங்களுக்கு கண்காணிப்பு விஜயம்

விஞ்ஞானம், தொழில்நுட்பம் மற்றும் டிஜிட்டல் பரிணாமம் பற்றிய துறைசார் மேற்பார்வைக் குழு, விஞ்ஞானம் மற்றும் தொழில்நுட்ப அமைச்சின் கீழ் இயங்கும் பல நிறுவனங்களுக்கு கண்காணிப்பு விஜயமொன்றை மேற்கொண்டது.இதற்கமைய, குழுவினர் இன்று (நவ. 17) இலங்கை நானோ தொழில்நுட்ப நிறுவனம் (SINTEC) மற்றும் இலங்கை உயிரித் தொழில்நுட்ப நிறுவனம் (SLIBTEC) ஆகிய நிறுவனங்களுக்கு விஜயம் செய்து அவற்றின் செயற்பாடுகளைப் பார்வையிட்டனர்.2025/2026 ஆம் ஆண்டுகளுக்கான குறித்த நிறுவனங்களின் முன்னேற்றங்களை மீளாய்வு செய்தல், 2027 ஆம் ஆண்டுக்கான செயற்பாட்டுத் திட்டத்தைப் பரிசீலித்தல் மற்றும் நிறுவன வளாகங்களில் முன்னெடுக்கப்படும் செயற்பாடுகளை அவதானித்தல் ஆகியன இந்த விஜயத்தின் நோக்கங்களாகும்.குழுவின் தலைவர் கௌரவ பாராளுமன்ற உறுப்பினர் வைத்தியர் ஜனக சேனாரத்ன தலைமையில் மேற்கொள்ளப்பட்ட இந்தக் கண்காணிப்பு விஜயத்தில் கௌரவ பாராளுமன்ற உறுப்பினர்களான தனுர திசாநாயக்க, லசித் பாஷண கமகே மற்றும் சதுர கலப்பத்தி ஆகியோரும் கலந்துகொண்டனர்.


2026-11-17

ஆசிரியர் சேவையிலிருந்து அதிபர் சேவைக்கு நியமிக்கப்படும்போது ஏற்படும் சம்பள முரண்பாடுகள் மற்றும் சேவைப் பிரமாணக் குறிப்புத் திருத்தங்கள் தொடர்பில் பாராளுமன்ற உபகுழுவில் தொடர்ந்தும் கலந்துரையாடல்

ஆசிரியர் சேவையிலிருந்து அதிபர் சேவைக்கு நியமிக்கப்படும்போது ஏற்படும் சம்பள முரண்பாடுகள் தொடர்பில், கல்வி, தொழிற்படை மற்றும் மனித மூலதனம் பற்றிய துறைசார் மேற்பார்வைக் குழுவினால் நியமிக்கப்பட்ட உபகுழுவில் மேலும் கலந்துரையாடப்பட்டது.குறித்த உபகுழு அதன் தலைவர் கௌரவ பாராளுமன்ற உறுப்பினர் சுனில் ராஜபக்ஷ தலைமையில் அண்மையில் கூடியபோதே இவ்விடயம் தொடர்பில் கலந்துரையாடப்பட்டது.இக்கலந்துரையாடலில் கல்வி, உயர்கல்வி மற்றும் தொழிற்கல்வி அமைச்சு, நிதி, திட்டமிடல் மற்றும் பொருளாதார அபிவிருத்தி அமைச்சு, பொது நிர்வாகம், மாகாண சபைகள் மற்றும் உள்ளூராட்சி அமைச்சு, அரச சேவை ஆணைக்குழு ஆகியவற்றைப் பிரதிநிதித்துவப்படுத்தி சிரேஷ்ட அதிகாரிகள் கலந்துகொண்டனர்.ஆசிரியர் சேவையைச் சேர்ந்த அதிகாரிகள் அதிபர் சேவைக்கு நியமிக்கப்படும்போது ஏற்படும் சம்பள அதிகரிப்பு இடைவெளிகள் மற்றும் சம்பள முரண்பாடுகள் தொடர்பில் இங்கு விரிவாகக் கலந்துரையாடப்பட்டது. ஒரு சேவைக்கு மாத்திரம் தனித்தனியாக சம்பளத் திருத்தங்களை மேற்கொள்வதன் மூலம், ஒட்டுமொத்த அரச சேவையின் ஏனைய சேவைகளுடன் ஒப்பிடுகையில் பிரச்சினைகள் ஏற்படுவதாகவும் இதன்போது சுட்டிக்காட்டப்பட்டது.சேவைப் பிரமாணக் குறிப்புகள் மற்றும் ஆட்சேர்ப்புக்கான வயதெல்லைகளைத் திருத்துதல், அதிபர்களுக்கான விசேட கொடுப்பனவுகள் மற்றும் போக்குவரத்து வசதிகள், பாடசாலை வகைப்படுத்தல் மற்றும் வெற்றிடங்களை நிரப்புதல், முறையான இடமாற்றக் கொள்கை, ஆசிரியர் மற்றும் அதிபர் உத்தியோகபூர்வ இல்லங்களைப் புனரமைத்தல் உள்ளிட்ட பல்வேறு விடயங்கள் தொடர்பில் அதிகாரிகளுடன் உபகுழு விரிவாகக் கலந்துரையாடியது.இவ்விடயம் தொடர்பில் மேலும் கலந்துரையாடிய பின்னர், முன்மொழிவுகளை உள்ளடக்கிய இறுதி அறிக்கையை துறைசார் மேற்பார்வைக் குழுவிடம் சமர்ப்பிக்கத் திட்டமிடப்பட்டுள்ளது.இக்கூட்டத்தில் கௌரவ பாராளுமன்ற உறுப்பினர்களான அபூபக்கர் அத்தம்பாவ, சுகத் வசந்த. டி சில்வா, சுஜீவ திசாநாயக்க மற்றும் சானக மாதுகொட ஆகியோரும் கலந்துகொண்டனர்.


2026-11-16

யானை – மனித மோதலைக் குறைத்தல் மற்றும் யானைகளைப் பாதுகாப்பது தொடர்பில் புதிய தொழில்நுட்ப, நடைமுறைத் தீர்வுகளைக் கண்டறிவது குறித்து துறைசார் மேற்பார்வைக் குழுவில் கலந்துரையாடல்

சுற்றாடல், கமத்தொழில் மற்றும் வளங்களின் நிலைத்தன்மை பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் ஹெக்டர் அப்புஹாமி தலைமையில் அண்மையில் பாராளுமன்றத்தில் கூடியது.இதில், யானை – மனித மோதலைக் கட்டுப்படுத்துதல், காட்டு யானைகளின் இடம்பெயர்வு முறைகளைக் கண்டறிதல் மற்றும் யானைகளைப் பாதுகாப்பதற்குப் புதிய தொழில்நுட்பங்களைப் பயன்படுத்துதல் தொடர்பில் விரிவாகக் கலந்துரையாடப்பட்டது. அத்துடன், காவந்திஸ்ஸ யானையின் மரணம் தொடர்பிலும் கவனம் செலுத்தப்பட்டது.யானைகளின் வாழ்விடங்கள் இழக்கப்படுதல், பாரம்பரிய யானை வழித்தடங்கள் தடைப்படுதல் மற்றும் குடியிருப்புகள், விவசாய நிலங்களை அண்மித்த பகுதிகளில் உணவு தேடிச் செல்லுதல் ஆகியன யானை – மனித மோதல் அதிகரிப்பதற்கான பிரதான காரணங்களாக இதன்போது கலந்துரையாடப்பட்டன. யானைகளின் இடம்பெயர்வு முறைகளைக் கண்டறிவதற்காக GPS மற்றும் செய்மதிக் கழுத்துப்பட்டித் தொழில்நுட்பத்தைப் பயன்படுத்துவதன் முக்கியத்துவமும் இதன்போது வலியுறுத்தப்பட்டது.யானை – மனித மோதலைக் குறைப்பதற்காக பிரதேச மட்டத்தில் வனவிலங்கு அதிகாரிகள், கிராம உத்தியோகத்தர்கள் மற்றும் கிராம மக்களை உள்ளடக்கிய கூட்டுக் குழுக்களை அமைத்தல், சமூகப் பங்கேற்பை வலுப்படுத்துதல் மற்றும் முன்கூட்டிய எச்சரிக்கைத் தொடர்பாடல் வலையமைப்புகளைச் செயற்படுத்துதல் தொடர்பிலும் கருத்துக்கள் பரிமாறப்பட்டன.அத்துடன், நோய்வாய்ப்பட்ட மற்றும் காயமடைந்த யானைகளுக்குச் சிகிச்சையளிக்கும்போது வனவிலங்கு கால்நடை மருத்துவர்கள் எதிர்கொள்ளும் சவால்கள் குறித்தும் கலந்துரையாடப்பட்டது. வனவிலங்கு திணைக்களத்தின் கால்நடை மருத்துவ அதிகாரிகளின் சேவை, யானைகளுக்கு மயக்க மருந்து செலுத்தும்போது காணப்படும் ஆபத்துகள் மற்றும் களத்தில் சிகிச்சையளிப்பதற்குத் தேவையான நடமாடும் மருத்துவ வசதிகள், நடமாடும் எக்ஸ்-ரே இயந்திரங்கள் போன்ற தொழில்நுட்ப உபகரணங்களின் அவசியம் குறித்தும் இதன்போது கவனம் செலுத்தப்பட்டது.இக்கூட்டத்தில் கௌரவ பாராளுமன்ற உறுப்பினர்களான கிங்ஸ் நெல்சன், உபுல் கித்சிறி, சட்டத்தரணி எம்.ஏ.சி.எஸ். சதுரி கங்கானி, சுதத் பலகல்ல, கிட்ணன் செல்வராஜ் மற்றும் சட்டத்தரணி பாக்ய ஸ்ரீ ஹேரத் ஆகியோர் கலந்துகொண்டனர்.






பதிப்புரிமை © இலங்கை பாராளுமன்றம்.

முழுப்பதிப்புரிமையுடையது.

வடிவமைத்து உருவாக்கியது  TekGeeks