2022-07-07
சியாம் கேஸ் நிறுவனத்திடம் ஒரு மெற்றிக்தொன் கேஸ் 96 அமெரிக்க டொலர் வீதம் குறிப்பிட்ட காலத்துக்கான விலைமனுக் கோரலின் அடிப்படையில் (Term Tender) கொள்வனவு செய்வதற்கு அமைச்சரவை வழங்கிய தீர்மானம் இரத்துச் செய்யப்பட்டு, ஒரு மெற்றிக் தொன் 129 அமெரிக்க டொலர் வீதம் ஓமான் நிறுவனமொன்றிடமிருந்து கேஸைக் கொள்வனவு செய்ய எடுக்கப்பட்ட தீர்மானம் தொடர்பில் கணக்காய்வாளர் திணைக்களத்தின் ஊடாக விசாரணை நடத்துமாறு அரசாங்கப் பொறுப்பு முயற்சிகள் பற்றிய குழுவின் (கோப் குழு) தலைவர் கௌரவ பேராசிரியர் சரித ஹேரத் நேற்றுமுன்தினம் (05) பணிப்புரை விடுத்தார்.
இதற்கு முன்னர் நடைபெற்ற கோப் குழுக் கூட்டத்தில் வழங்கப்பட்ட பணிப்புரைகளை நடைமுறைப்படுத்துவது மற்றும் அவற்றின் தற்போதைய நிலைமைகள் குறித்து ஆராயும் நோக்கில் லிற்றோ கேஸ் லங்கா நிறுவனம், லிற்றோ கேஸ் டேர்மினல் லங்கா (தனியார்) நிறுவனம் மற்றும் இலங்கை காப்புறுதிக் கூட்டுத்தாபனம் ஆகியன நேற்றுமுன்தினம் கோப் குழு முன்னிலையில் அழைக்கப்பட்டிருந்தபோதே இந்தப் பணிப்புரை வழங்கப்பட்டது.
கடந்த பெப்ரவரி மாதமாகும்போது கேஸ் கொள்வனவு செய்வதற்காக குறிப்பிட்ட காலத்துக்கான விலைமனுக் கோரல் முடிவுக்குக் கொண்டுவரப்பட்டதுடன், 280,000 மெற்றிக் தொன்னுக்காக கேள்விப்பத்திரம் கோரப்பட்டதாகவும் இதற்காக 3 கேஸ் விநியோகஸ்தர்கள் முன்வந்ததாகவும் இங்கு புலப்பட்டது. இதில் சியாம் கேஸ் நிறுவனம் ஒரு மெற்றிக்தொன்னுக்கு 96 அமெரிக்க டொலர் வீதம் குறைந்த விலையில் கேள்விப்பத்திரத்தை சமர்ப்பித்தமைக்கு அமைய குறித்த நிறுவனத்துக்கு இதனை வழங்க அமைச்சரவை அனுமதி கிடைத்துள்ளது.
இருந்தபோதும், நாட்டில் ஏற்பட்ட பொருளாதார நெருக்கடி காரணமாக கேள்விப்பத்திரம் கோரலின் போது வழங்கப்பட்ட நிபந்தனைக்கு அமைய லிற்றோ நிறுவனத்துக்கு கடன் உறுதிக் கடிதத்தை (Standby Letter of Credit / SBLC) வழங்க இந்நாட்டிலுள்ள வங்கிகளுக்கு முடியாமல் போனமையால் சியாம் நிறுவனத்திடமிருந்து எரிவாயுவைப் பெற்றுக் கொள்ள முடியாமல் போனதாக லிற்றோ கேஸ் நிறுவனத்தின் அதிகாரிகள் தெரிவித்தனர். இது தொடர்பில் குறித்த நிறுவனத்துடன் கலந்துரையாடல்கள் நடத்தப்பட்டபோதும் கேள்விப்பத்திரம் கோரல் முறையின் போது முன்வைக்கப்பட்ட நிபந்தனைக்கு அமைய கடன் உறுதிக் கடிதத்தை சமர்ப்பிக்கத் தவறியமையால் எரிவாயுவை வழங்க நிறுவனம் தயக்கம் காட்டியதாகவும் இங்கு சுட்டிக்காட்டப்பட்டது.
இந்தக் காலதாமதத்தினால் ஏற்பட்ட சூழ்நிலைக்குத் தீர்வாக சியாம் நிறுவனத்திடமிருந்து இரண்டு வாரங்களுக்கு அவசியமான எரிவாயுத் தொகையான 15,000 மெற்றின்தொன்னை அவசர கொள்வனவு செய்வது தொடர்பில் கலந்துரையாடப்பட்டபோதும், 6600 மெற்றிக்தொன் எரிவாயுவை மாத்திரமே விநியோகிக்க முடியும் என அவர்கள் பதில் வழங்கியதால் கலந்துரையாடல்கள் வெற்றியளிக்கவில்லையென்றும் இங்கு புலப்பட்டது. அத்துடன், குறிப்பிட்ட காலத்துக்கான விலைமனுக் கோரலின் கீழ் ஒரு மெற்றிக்தொன்னை 129 அமெரிக்க டொலருக்கு வழங்க இணக்கம் தெரிவித்த ஓமான் நிறுவனம் மாதமொன்றுக்கு 25,000 மெற்றிக்தொன் வீதம் 4 மாதங்களுக்கு ஒரு இலட்சம் மெற்றிக்தொன் கேஸ் விநியோகத்தை வழங்க இணங்கியதாக லிற்றோ நிறுவனம் தெரிவித்தது.
இதற்கமைய மேற்குறிப்பிட்ட விடயம் அமைச்சரவைக்குத் தெரியப்படுத்தப்பட்டு சியாம் கேஸ் நிறுவனத்துக்கு வழங்கிய குறிப்பிட்ட காலத்துக்கான கேள்விப்பத்திரம் இரத்துச் செய்யப்பட்டு ஓமான் நிறுவனத்திடம் ஒரு இலட்சம் மெற்றிக் தொன் எரிவாயுவைக் கொள்வனவு செய்வதற்கான கேள்விப்பதிரத்துக்கு அமைச்சரவை அனுமதி வழங்கியிருப்பதாகவும் சுட்டிக்காட்டப்பட்டது. இதற்காக உலக வங்கியின் 70 மில்லியன் அமெரிக்க டொலர் கடன் உதவி மற்றும் லிற்றோ நிறுவனத்தின் 20 மில்லியன் அமெரிக்க டொலர் ஆகியவற்றை வழங்கி 90 மில்லியன் அமெரிக்க டொலர் செலவுசெய்யப்படவிருப்பதாக லிற்றோ நிறுவனத்தின் தலைவர் முதித பீரிஸ் தெரிவித்தார்.
எரிவாயுத் தேவை அத்தியாவசியமான அவசர தேவையாக இருக்கின்றபோதும் குறைந்த கேள்விப்பத்திரத்தை வழங்கிய சியாம் நிறுவனத்துக்குப் பதிலாக அதிக விலையில் ஓமான் நிறுவனத்திடமிருந்து கொள்வனவு செய்வது எதிர்காலத்தில் தவறான முன்னுதாரனமாக அமையும் என்றும், இது தொடர்பில் உரிய விசாரணை நடத்தப்பட்டு உலக வங்கியின் 70 மில்லியன் அமெரிக்க டொலர் நிதி வினைத்திறனான முறையில் பயன்படுத்தப்படுகிறதா என்பதை ஆராய்ந்து அறிக்கையிடுமாறும் கோப் குழுவின் தலைவர், கணக்காய்வாளர் திணைக்களத்துக்குத் தெரிவித்தார்.
இந்திய கடன் வசதியின் கீழ் எரிவாயுவைக் கொள்வனவு செய்வதற்கு ஒதுக்கப்பட்ட 160 மில்லியன் அமெரிக்க டொலர் தொகையில் எரிவாயுவைக் கொள்வனவு செய்ய முடியாத நிலை குறித்தும் குழு கவனம் செலுத்தியது. இந்திய அரசாங்கத்தின் நிபந்தனைகளின்படி நாட்டில் உற்பத்தி செய்யப்படாத எரிவாயுவை கொள்வனவு செய்வதே பிரச்சினை என லிற்றோ நிறுவனத்தின் தலைவர் தெரிவித்தார். இது தொடர்பில் பல சுற்றுப் பேச்சுவார்த்தைகள் நடத்தப்பட்டதாகவும் இங்கு தெரிவிக்கப்பட்டது. இதனை உடனடியாக ஆராய்ந்து இரண்டு வாரங்களுக்குள் அறிக்கை அளிக்குமாறு கோப் குழுவின் தலைவர் நிதியமைச்சின் செயலாளருக்கு பரிந்துரை செய்தார்.
லிற்றோ நிறுவனத்தின் பணிப்பாளர் சபைக்கு தற்பொழுது 4 பேர் மாத்திரமே நியமிக்கப்பட்டிருப்பது தொடர்பிலும் இங்கு கவனம் செலுத்தப்பட்டது. சட்டரீதியாக ஐவர் இருக்க வேண்டும் என்பதும் இங்கு புலப்பட்டது. பணிப்பாளர் சபையின் உறுப்பினர்கள் நிதி அமைச்சின் ஊடாக நியமிக்கப்படுகின்றபோதும், தாய் நிறுவனத்தின் பிரதிநிதிகளையும் உள்ளடக்கியவாறு பணிப்பாளர் சபை நியமிக்கப்பட வேண்டியதன் அவசியத்தையும் கோப் குழுவின் தலைவர் வலியுறுத்தினார். இது தொடர்பில் உரிய நடவடிக்கை எடுக்குமாறும் கோப் குழுவின் தலைவர் நிதி அமைச்சின் செயலாளருக்குப் பணிப்புரை விடுத்தார்.
நிறுவனத்தின் தலைவர் மற்றும் பிரதம நிறைவேற்று அதிகாரி ஆகிய இரு பதவிகளையும் ஒரே நபர் வைத்திருப்பது குறித்தும் விவாதிக்கப்பட்டது. நிறுவனத்தின் தலைவர் பதவி மாறினாலும், நிறைவேற்று அதிகாரி பதவி நிரந்தரமாக இருப்பதுடன், நிறுவனம் சிறந்த நிலையில் இருக்க வேண்டும் என்பதால், அதற்காக விரைந்து செயல்பட வேண்டியதன் அவசியத்தையும் குழு வலியுறுத்தியது. இந்த நெருக்கடிக்குத் தீர்வு காணப்பட்டவுடன் அதற்கான நடவடிக்கை எடுப்பதற்கு பணிப்பாளர் சபை ஏற்கனவே தீர்மானம் எடுத்துள்ளதாக லிற்றோ நிறுவனத்தின் தலைவர் இங்கு தெரிவித்தார். அதற்கான நடவடிக்கைகளை மேற்கொண்டு அறிக்கை அளிக்குமாறு குழு பரிந்துரைத்தது.
லிட்ரோ கம்பனியின் தாய் நிறுவனமான இலங்கை காப்புறுதிக் கூட்டுத்தாபனத்திடம் இருந்து நிதி உதவியைப் பெற்றுக்கொள்ளக் கூடிய திறன் குறித்தும் கவனம் செலுத்தப்பட்டது. காப்புறுதி கூட்டுத்தாபனத்தின் தலைவர் விஜித ஹேரத் கூறுகையில், அரச வங்கியில் சுமார் 5 பில்லியன் ரூபா வைப்புச் செய்யப்பட்டதன் காரணமாகவே கடந்த காலங்களில் எரிவாயுவை கொள்வனவு செய்ய முடிந்தது என்றார்.
நிதி அமைச்சின் செயலாளரைப் பிரதிநிதித்துவப்படுத்தி திறைசேரியின் உதவிச் செயலாளர் சமன் பெர்னாந்து, காப்புறுதிக் கூட்டுத்தாபனத்தின் தலைவரும், லிற்றோ நிறுவனத்தின் முன்னாள் தலைவருமான விஜித ஹேரத், லிற்றோ நிறுவனத்தின் தலைவர் முதித பீரிஸ் உள்ளிட்ட அதிகாரிகள் இக்கூட்டத்தில் நேரடியாகக் கலந்துகொண்டிருந்ததுடன், லிற்றோ நிறுவனத்தின் முன்னாள் தலைவர் திசர ஜயவர்தன ஒன்லைன் தொழில்நுட்பத்தின் ஊடாக இணைந்துகொண்டார்.
இக்கூட்டத்தில் பாராளுமன்ற உறுப்பினர்களான பாட்டலி சம்பிக்க ரணவக்க, மஹிந்தானந்த அளுத்கமகே, அனுரகுமார திஸாநாயக்க, கலாநிதி ஹர்ஷ டி சில்வா, கலாநிதி சரத் வீரசேகர, ஜகத் புஷ்பகுமார, இந்திக்க அனுருத்த, எஸ்.எம்.மரிக்கார், ஜயந்த சமரவீர, கலாநிதி நாலக கொடஹேவா, பிரேம்நாத் சி.தொலவத்த, மதுர விதானகே ஆகியோர் கலந்துகொண்டனர்.
2026-10-21
2023 ஆம் ஆண்டில் கொழும்புத் துறைமுகத்தில் கப்பல்களுக்கு எரிபொருள் நிரப்பும் வசதிகளுக்காகக் காணிகளை குத்தகைக்கு வழங்கியமை மற்றும் அது தொடர்பான விடயங்கள் குறித்து முழுமையான அறிக்கையொன்றைச் சமர்ப்பிக்குமாறு உட்கட்டமைப்பு மற்றும் மூலோபாய அபிவிருத்தி பற்றிய துறைசார் மேற்பார்வைக் குழு, துறைமுகங்கள் மற்றும் சிவில் விமான சேவைகள் அமைச்சின் செயலாளருக்கும் இலங்கை துறைமுக அதிகாரசபையின் தலைவருக்கும் அறிவுறுத்தல் வழங்கியுள்ளது.கௌரவ பாராளுமன்ற உறுப்பினர் எஸ். எம். மரிக்கார் அவர்களின் தலைமையில் அண்மையில் பாராளுமன்றத்தில் நடைபெற்ற குறித்த துறைசார் மேற்பார்வைக் குழுக் கூட்டத்திலேயே இந்த அறிவுறுத்தல் வழங்கப்பட்டது.கொழும்புத் துறைமுகத்தில் பயன்படுத்தப்படாத காணிகளைக் குத்தகைக்கு வழங்குதல், கப்பல்களுக்கு எரிபொருள் நிரப்பும் நடவடிக்கைகளுக்காகக் காணிகளை ஒதுக்குதல் மற்றும் அவை தொடர்பான சட்டரீதியான சமரச நடைமுறையின் வெளிப்படைத்தன்மை மற்றும் சந்தைப் போட்டித்தன்மை ஆகிய விடயங்கள் குறித்து இத்துறைசார் மேற்பார்வைக் குழுவில் கலந்துரையாடப்பட்டது.கப்பல்களுக்கு எரிபொருள் நிரப்பும் துறையை போட்டித் தன்மைக்குத் திறந்துவிடுவது தொடர்பில் 2022 ஜூன் 27 ஆம் திகதிய அமைச்சரவைத் தீர்மானத்திற்கமையவும், 1971 ஆம் ஆண்டின் 51 ஆம் இலக்க இலங்கை துறைமுக அதிகாரசபைச் சட்டத்தின் 7 ஆம் பிரிவின்படியும் வெற்றுக் காணிகளைக் குத்தகைக்கு வழங்குவதற்கான கேள்விப்பத்திரங்கள் கோரப்பட்டிருந்தன. இக்கேள்விப்பத்திர நடைமுறையின் கீழ் தெரிவுசெய்யப்பட்ட நிறுவனமொன்றுக்கு பரந்தன் பிரதேசத்தில் வழங்கப்பட்ட காணிக்கு மத்திய சுற்றாடல் அதிகாரசபையின் அனுமதியைப் பெற்றுக்கொள்ள முடியாமையினால், துறைமுகத்தின் உட்பகுதியில் மாற்றுக் காணியொன்றை வழங்குமாறு அந்நிறுவனம் கோரியுள்ளதாகத் தெரியவந்தது.குறித்த நிறுவனத்தினால் நிர்ணயிக்கப்பட்ட ஆறு மாத காலப்பகுதிக்குள் அளவுசார் இடர் மதிப்பீட்டு அறிக்கையை சமர்ப்பிக்க முடியாமையினால், இலங்கை துறைமுக அதிகாரசபை அந்த உடன்பாட்டை இரத்துச் செய்திருந்தது. எனினும், அந்நிறுவனம் நீதிமன்றத்தை நாடியதைத் தொடர்ந்து, இரு தரப்பினரும் சமரச இணக்கப்பாட்டிற்கு வருவதற்கான சாத்தியக்கூறுகளை ஆராயுமாறு உயர் நீதிமன்றம் அறிவுறுத்தியிருந்தது.இதற்கமைய, இலங்கை துறைமுக அதிகாரசபையின் மேலதிக முகாமைத்துவப் பணிப்பாளர் (தொழில்நுட்பம்), பிரதம சட்ட அதிகாரி மற்றும் வளாக முகாமையாளர் ஆகியோர் அடங்கிய உத்தியோகத்தர்கள் குழுவொன்று குறித்த நிறுவனத்துடன் பேச்சுவார்த்தை நடத்தி சமரச இணக்கப்பாட்டிற்கு வந்துள்ளது. இதன்படி, ஆரம்பத்தில் வழங்குவதற்குத் திட்டமிடப்பட்டிருந்த சுமார் நான்கு ஏக்கர் காணிக்குப் பதிலாக, எண்ணெய் களஞ்சியத்திற்கு அருகில் அமைந்துள்ள சுமார் இரண்டு ஏக்கர் காணியை வழங்குவதற்கு இணக்கம் தெரிவிக்கப்பட்டுள்ளது. இதனையடுத்து, பணிப்பாளர் சபையின் அங்கீகாரம் மற்றும் சட்டமா அதிபர் திணைக்களத்தின் ஆலோசனையின் அடிப்படையில், உயர் நீதிமன்றத்தில் கூட்டு சமரசப் பிரேரணையொன்று சமர்ப்பிக்கப்பட்டுள்ளது.துறைமுகத்தின் உட்பகுதியில், கப்பல் துறைக்கும் எண்ணெய் களஞ்சியத்திற்கும் அண்மையில் அமைந்துள்ள காணியைத் தனியார் நிறுவனமொன்றுக்கு வழங்குவதன் மூலம் சந்தை ஏகபோக நிலைமை அல்லது நியாயமற்ற போட்டித்தன்மை உருவாகுமா எனக் குழு கேள்வி எழுப்பியது. தற்போது கப்பல்களுக்கான எரிபொருள் களஞ்சியப்படுத்தலில் ஏகபோக உரிமை ஜயபஹலு முனையத்திடம் மாத்திரமே காணப்படுவதால், புதிய முதலீட்டாளர் ஒருவர் வருகை தருவதன் மூலம் அந்த ஏகபோக நிலைமை முடிவுக்குக் கொண்டுவரப்பட்டு, திறந்த போட்டித்தன்மையை உருவாக்க முடியும் என இலங்கை துறைமுக அதிகாரசபையின் அதிகாரிகள் இதன்போது சுட்டிக்காட்டினர்.இந்தச் சமரச ஒப்பந்தத்தில் கையொப்பமிடுவதற்கு முன்னர், அது தொடர்பான அறிக்கையொன்றைச் சமர்ப்பிக்குமாறு ஜனாதிபதி செயலகம் அமைச்சுக்கும் இலங்கை துறைமுக அதிகாரசபைக்கும் அறிவித்திருந்தது. குறிப்பிட்ட காணியொன்றை வழங்குமாறு உயர் நீதிமன்றம் உத்தரவிடவில்லை என்பதுடன், சமரசத் தீர்வாகக் குறித்த காணியை வழங்குவதற்கான முன்மொழிவை இலங்கை துறைமுக அதிகாரசபையே முன்வைத்துள்ளது. எனவே, அந்த முன்மொழிவு முறையாக நியாயப்படுத்தப்பட வேண்டும் எனக் குழுவின் தலைவர் வலியுறுத்தினார்.“ஒரு தீர்மானம் சரியானதாக இருப்பது மட்டுமன்றி, அது சரியானது என்பதும் வெளிப்படைத்தன்மையுடன் தென்பட வேண்டும்” என்ற கொள்கையின் அடிப்படையில், இந்த நடவடிக்கையின் மூலம் வர்த்தக ஏகபோக நிலைமை உருவாகுமா அல்லது அது இல்லாதொழிக்கப்படுமா, நீண்டகால அடிப்படையில் நிதி ரீதியான பாதிப்புகள் ஏற்படுமா என்பன உள்ளிட்ட விடயங்களை உள்ளடக்கிய முழுமையான அறிக்கையொன்றை ஒரு வாரத்திற்குள் ஜனாதிபதி செயலகத்திற்கு அனுப்புவதற்கு முன்னர், குழுவிடம் சமர்ப்பிக்குமாறு அமைச்சின் செயலாளருக்கும் இலங்கை துறைமுக அதிகாரசபையின் தலைவருக்கும் குழுவின் தலைவர் அறிவுறுத்தினார்.கொழும்புத் துறைமுகத்தின் செயற்பாட்டு முன்னேற்றம் மற்றும் வளர்ச்சி குறித்தும் இதன்போது குழு விசாரணை நடத்தியது. செங்கடல், சுயஸ் கால்வாய் மற்றும் ஹோர்முஸ் நீரிணை ஆகிய பகுதிகளைச் சார்ந்த விநியோகச் சங்கிலியில் ஏற்பட்டுள்ள இடையூறுகளுக்கு மத்தியிலும், கொழும்புத் துறைமுகத்தின் ஐந்து முனையங்களும் இணைந்து, ஆண்டின் முதல் எட்டு மாதங்களில் சுமார் 11 சதவீத வளர்ச்சியைப் பதிவு செய்துள்ளதாகவும், இதன் மூலம் செயற்பாட்டுத் திறனையும் வருமானத்தையும் அதிகரிக்க முடிந்துள்ளதாகவும் இலங்கை துறைமுக அதிகாரசபையின் அதிகாரிகள் தெரிவித்தனர்.இக்குழுக் கூட்டத்தில் குழுவின் உறுப்பினர்களான கௌரவ பாராளுமன்ற உறுப்பினர்கள் பலரும், துறைமுகங்கள் மற்றும் சிவில் விமான சேவை அமைச்சு மற்றும் இலங்கை துறைமுக அதிகாரசபை ஆகியவற்றின் அதிகாரிகள் பலரும் கலந்துகொண்டனர்.
2026-10-21
போதைப்பொருட்களை அழிக்கும் நடவடிக்கைகளை முறைப்படுத்துதல், போதைப்பொருள் தொடர்பான குற்றங்களுக்குப் பிணை வழங்குவது தொடர்பான ஏற்பாடுகளைத் திருத்துதல் மற்றும் கனாபிஸ் செடியின் சட்டரீதியான வரைவிலக்கணத்தைத் தெளிவுபடுத்துதல் ஆகியவற்றை நோக்கமாகக் கொண்டு, நஞ்சுகள், அபின் மற்றும் அபாயகரமான அவுடதங்கள் சட்டத்தைத் திருத்துவதற்கான இரு சட்டமூலங்கள் ஆளுகை, நீதி மற்றும் சிவில் பாதுகாப்பு பற்றிய துறைசார் மேற்பார்வைக் குழுவில் அண்மையில் (ஒக். 15) ஆராயப்பட்டு, சட்டமா அதிபரின் அங்கீகாரத்திற்கு உட்பட்டு அங்கீகரிக்கப்பட்டன.கௌரவ பாராளுமன்ற உறுப்பினர் வைத்தியர் நஜித் இந்திக்க தலைமையில் பாராளுமன்றத்தில் கூடிய இக்குழுவில், கைப்பற்றப்பட்டு அரசாங்கத்தின் பொறுப்பில் வைக்கப்பட்டுள்ள போதைப்பொருட்களை அழிக்கும் நடவடிக்கைகளைத் துரிதப்படுத்துவதற்கும், அச்செயற்பாட்டில் வெளிப்படைத்தன்மையை உறுதிப்படுத்துவதற்கும் முன்வைக்கப்பட்டுள்ள சட்டத் திருத்தங்கள் தொடர்பில் சட்டவரைஞர் திணைக்களம் மற்றும் நீதி மற்றும் தேசிய ஒருமைப்பாட்டு அமைச்சின் அதிகாரிகள் விளக்கமளித்தனர்.அரசாங்க இரசாயனப் பகுப்பாய்வாளரின் அறிக்கையை 60 நாட்களுக்குள் பெற்றுக்கொள்ளுதல், அந்த அறிக்கை கிடைத்த பின்னர் 15 நாட்களுக்குள் நீதிமன்ற உத்தரவைப் பெற்றுக்கொள்ளுதல் மற்றும் நீதிமன்ற உத்தரவு பிறப்பிக்கப்பட்ட பின்னர் 14 நாட்களுக்குள் போதைப்பொருட்களை அழித்தல் ஆகியவற்றுக்கான காலக்கெடுவை நிர்ணயிப்பது தொடர்பான ஏற்பாடுகள் குறித்து அதிகாரிகள் விளக்கமளித்தனர்.அத்துடன், சந்தேகநபர் ஒருவர் இல்லாத அல்லது போதைப்பொருட்கள் கைவிடப்பட்டுச் சென்றுள்ள சந்தர்ப்பங்களில், உரிய சட்ட நடைமுறைகளைப் பின்பற்றி போதைப்பொருட்களை அழிக்கும் நடவடிக்கைகளைத் துரிதப்படுத்துவதற்காக முன்மொழியப்பட்டுள்ள ஏற்பாடுகள் குறித்தும் விளக்கமளிக்கப்பட்டது.போதைப்பொருட்களை அழிக்கும் நடவடிக்கைகளில் வெளிப்படைத்தன்மையையும் சாட்சியங்களின் பாதுகாப்பையும் உறுதிப்படுத்தும் வகையில், அச்செயற்பாட்டைப் புகைப்படம் எடுத்தல் மற்றும் காணொளியாகப் பதிவு செய்தல், தேவை ஏற்படின் இரண்டாவது ஆய்வகப் பரிசோதனையை மேற்கொள்வதற்காக மாதிரியைப் பாதுகாப்பாக வைத்திருத்தல் மற்றும் அதிகளவிலான போதைப்பொருட்களிலிருந்து பிரதிநிதித்துவ மாதிரிகளைப் பெறும்போது விஞ்ஞான ரீதியான முறையைப் பின்பற்றுதல் ஆகியவற்றுக்கான முன்மொழியப்பட்ட ஏற்பாடுகள் குறித்தும் அதிகாரிகள் விளக்கமளித்தனர்.போதைப்பொருள் தொடர்பான குற்றங்களுக்குப் பிணை வழங்குவது தொடர்பான சட்ட ஏற்பாடுகளைத் திருத்துவது குறித்தும் இதன்போது கலந்துரையாடப்பட்டது. இதற்கமைய, 100 கிராம் வரையிலான எடையைக் கொண்ட போதைப்பொருட்கள் தொடர்பான பிணை விண்ணப்பங்களை உரிய மேல் நீதிமன்றத்தில் சமர்ப்பிப்பதற்கும், அந்த எடை வரம்பை மீறும் சந்தர்ப்பங்களில் மேன்முறையீட்டு நீதிமன்றத்தில் சமர்ப்பிப்பதற்கும் முன்மொழியப்பட்டுள்ள திருத்தங்கள் குறித்து அதிகாரிகள் விளக்கமளித்தனர்.இதற்கு முன்னர் நடைமுறையில் இருந்த 10 கிராம் என்ற வரம்பைத் திருத்துவதன் நோக்கம், இரசாயனப் பகுப்பாய்வாளர் அறிக்கைகள் தாமதமடைதல் உள்ளிட்ட காரணங்களால் சந்தேகநபர்கள் நீண்டகாலம் விளக்கமறியலில் வைக்கப்படுவதைக் குறைப்பதுடன், சிறைச்சாலைகளில் நிலவும் நெரிசலைக் குறைப்பதற்கும் பங்களிப்பதாகும் எனவும் இதன்போது விளக்கமளிக்கப்பட்டது.மேலும், போதைப்பொருள் கடத்தல் தொடர்பான குற்றங்கள் விடயத்தில், கட்டளைச் சட்டத்தின் 54(1) ஆம் பிரிவுடன் தொடர்புடைய ஏற்பாடுகளைத் திருத்துவது குறித்தும் விளக்கமளிக்கப்பட்டது.இந்த இரண்டு சட்டமூலங்கள் தொடர்பில் உயர் நீதிமன்றத்தின் தீர்ப்புக்கு அமைவாக முன்வைக்கப்பட்ட திருத்தங்கள் மற்றும் மேலதிகத் திருத்தங்கள் குழுநிலையில் பரிசீலிக்கப்பட்டதன் பின்னர், சட்டமூலங்கள் இரண்டும் சட்டமா அதிபரின் அங்கீகாரத்திற்கு உட்பட்டு அங்கீகரிக்கப்பட்டன.இக்கூட்டத்தில் கௌரவ பாராளுமன்ற உறுப்பினர்களான முஜிபுர் ரஹ்மான், சந்தன சூரியஆராச்சி மற்றும் தர்மப்பிரிய விஜேசிங்க ஆகியோரும் அரசாங்க அதிகாரிகள் பலரும் கலந்துகொண்டனர்.
2026-10-15
பெருந்தோட்ட மற்றும் சமூக உட்கட்டமைப்பு வசதிகள் அலுவல்கள் பற்றிய அமைச்சுசார் ஆலோசனைக் குழுவின் கூட்டம் அதன் தலைவர் கௌரவ பெருந்தோட்ட மற்றும் சமூக உட்கட்டமைப்பு வசதிகள் அமைச்சர் சமந்த வித்யாரத்ன அவர்களின் தலைமையில் அண்மையில் நடைபெற்றது.இங்கு பெருந்தோட்டத்துறையில் காணப்படும் பல்வேறு பிரச்சினைகள் குறித்து கௌரவ பாராளுமன்ற உறுப்பினர்கள் அமைச்சரின் கவனத்திற்குக் கொண்டுவந்தனர். பெருந்தோட்டக் காணிகளில் பயன்படுத்தாத பகுதிகளைப் பயன்படுத்துவது, பெருந்தோட்டங்களில் உள்ள மக்களுக்கு காணப்படும் காணிப் பிரச்சினை, வீட்டு வசதிகளை ஏற்படுத்திக் கொடுப்பது உள்ளிட்ட பல்வேறு விடயங்கள் குறித்து இங்கு கலந்துரையாடப்பட்டது.பெருந்தோட்ட மற்றும் சமூக உட்கட்டமைப்பு வசதிகள் கௌரவ பிரதி அமைச்சர் சுந்தரலிங்கம் பிரதீப் மற்றும் கௌரவ பாராளுமன்ற உறுப்பினர்கள் பலரும் இக்குழுக் கூட்டத்தில் கலந்துகொண்டனர்.
2026-10-15
கொழும்பு துறைமுக நகரில் மூலோபாய முக்கியத்துவம் வாய்ந்த வணிகங்களுக்கு (BSI) வழங்கப்பட்டுள்ள அங்கீகாரங்கள், எதிர்கால முதலீட்டுத் திட்டங்கள் மற்றும் அடுக்குமாடிக் குடியிருப்புத் திட்டங்களின் தற்போதைய நிலைமை தொடர்பில் அரசாங்க நிதி பற்றிய குழுவில் கலந்துரையாடப்பட்டது.கௌரவ பாராளுமன்ற உறுப்பினர் கலாநிதி ஹர்ஷ.த சில்வா அவர்களின் தலைமையில் அண்மையில் (ஒக். 08) பாராளுமன்றத்தில் நடைபெற்ற இக்குழுக் கூட்டத்தில், கொழும்புத் துறைமுக நகரப் பொருளாதார ஆணைக்குழுவின் முதலீட்டு ஊக்குவிப்பு நடவடிக்கைகள், வெளிநாட்டு முதலீடுகளை ஒழுங்குபடுத்துதல் மற்றும் அதனுடன் தொடர்புடைய சட்ட மற்றும் நிர்வாக விடயங்கள் குறித்து கவனம் செலுத்தப்பட்டது.இக்குழுக் கூட்டத்தில் கௌரவ பிரதி அமைச்சர்களான சதுரங்க அபேசிங்க மற்றும் நிஷாந்த ஜயவீர ஆகியோருடன், கௌரவ பாராளுமன்ற உறுப்பினர்களான ரவி கருணாநாயக்க, ஹர்ஷண ராஜகருணா, சாணக்கியன் ராஜபுத்திரன் இராசமாணிக்கம், அஜித் அகலகட, எம்.கே.எம். அஸ்லம், நிமல் பலிஹேன, விஜேசிறி பஸ்நாயக்க, திலிண சமரகோன் மற்றும் சம்பிக ஹெட்டிஆரச்சி ஆகியோரும் கலந்துகொண்டனர்.மூலோபாய முக்கியத்துவம் வாய்ந்த வணிகங்களாக (BSI) அண்மையில் வர்த்தமானியில் அறிவிக்கப்பட்டுள்ள வணிகங்கள் மற்றும் எதிர்கால முதலீட்டுத் திட்டங்கள் தொடர்பான புதுப்பிக்கப்பட்ட தகவல்கள் இங்கு முன்வைக்கப்பட்டதுடன், துறைமுக நகரின் அடுக்குமாடிக் குடியிருப்புத் திட்டங்களின் தற்போதைய நிலைமை மற்றும் அவற்றின் விற்பனை தொடர்பிலும் கலந்துரையாடப்பட்டது.கொழும்பின் பிரதான வர்த்தக வலயத்திற்கு அண்மித்த பகுதியில் முதலீடுகளை ஊக்குவிக்கும் நோக்கில், 1.12 பில்லியன் அமெரிக்க டொலர் பெறுமதியான 9 காணித்துண்டுகள் இதுவரை குத்தகைக்கு விடப்பட்டுள்ளதாக ஆணைக்குழுவின் அதிகாரிகள் தெரிவித்தனர். மேலும், 1 பில்லியன் அமெரிக்க டொலர் பெறுமதியான 6 காணித்துண்டுகளைக் குத்தகைக்கு விடுவதற்கான திட்டமிடல் நடவடிக்கைகள் தற்போது முன்னெடுக்கப்பட்டு வருவதாகவும் அவர்கள் குறிப்பிட்டனர்.அத்துடன், அரசாங்கத்திற்குச் சொந்தமான 4 காணித்துண்டுகளை, மொத்தமாக ஒதுக்கப்பட்டுள்ள காணிகளில் ஏழில் ஒரு பங்கிற்குச் சமமான அளவில், சந்தைக்கு அறிமுகப்படுத்துவதற்கு ஆணைக்குழு நடவடிக்கை எடுத்து வருவதாக அதிகாரிகள் தெரிவித்தனர். இதுவரை CHEC Port City Colombo (Pvt) Ltd நிறுவனத்திற்குச் சொந்தமான காணித்துண்டுகள் மட்டுமே குத்தகைக்கு விடப்பட்டுள்ளதாகவும் அவர்கள் மேலும் விளக்கமளித்தனர்.இந்தக் காணிகள் 99 வருட காலப்பகுதிக்குக் குத்தகைக்கு வழங்கப்படுவதுடன், ஒரு சதுர மீற்றரின் சராசரி பெறுமதி 3,000 அமெரிக்க டொலர்களாகும் என அதிகாரிகள் தெரிவித்தனர். மேலும், மொத்தக் குத்தகைத் தொகையில் 1 சதவீதத்திற்குச் சமமான 398 மில்லியன் ரூபா இதுவரை ஆணைக்குழுவிற்குக் கிடைத்துள்ளதாகவும் அவர்கள் குறிப்பிட்டனர்.துறைமுக நகரில் முதலீடு செய்யும் நிறுவனங்களின் பயனாளி உரிமையாளர்களை அடையாளம் காணுதல், வெளிநாட்டு முதலீடுகளில் வெளிப்படைத்தன்மையை உறுதிப்படுத்துதல் மற்றும் பணமோசடி, பயங்கரவாதத்திற்கு நிதியளித்தல் ஆகியவற்றைத் தடுப்பதற்காக நடைமுறைப்படுத்தப்பட்டுள்ள ஒழுங்குமுறைச் செயன்முறைகள் தொடர்பிலும் குழு ஆராய்ந்தது.அதேவேளை, வெளிநாட்டுத் தொழிலாளர்களுக்கான விசா பரிந்துரைகளை வழங்குதல் மற்றும் அவர்களின் செயற்பாடுகளைக் கண்காணித்தல் தொடர்பிலும் கலந்துரையாடப்பட்டது. ஆணைக்குழுவின் பரிந்துரைகளின் அடிப்படையில் வெளிநாட்டவர்களுக்கு சுமார் 14,300 விசாக்கள் வழங்கப்பட்டுள்ளதாக முன்வைக்கப்பட்ட தகவல்களைக் கருத்திற்கொண்டு, அவர்களைக் கண்காணிப்பதற்கான நடைமுறைச் சாத்தியக்கூறுகள் குறித்தும் குழு கவனம் செலுத்தியது.துறைமுக நகரில் சட்டவிரோதச் செயற்பாடுகளைத் தடுப்பதற்கும் நாட்டின் சர்வதேச நற்பெயரைப் பாதுகாப்பதற்கும் உரிய ஒழுங்குமுறை நடவடிக்கைகளை வலுப்படுத்த வேண்டியதன் முக்கியத்துவமும் இதன்போது வலியுறுத்தப்பட்டது.அடுக்குமாடிக் குடியிருப்புகள் மற்றும் குடியிருப்புத் திட்டங்களில் வீடுகளை வாங்குவதற்கு எதிர்பார்க்கும் முதலீட்டாளர்களால் முன்கூட்டியே செலுத்தப்படும் பணத்தின் (Pre-Sale Deposits) பாதுகாப்பை உறுதிப்படுத்துவது தொடர்பிலும் குழு விளக்கம் கோரியது. இதன்போது, வெளிநாட்டு முதலீட்டாளர்களிடமிருந்து பெறப்படும் அத்தகைய பணம் குறித்த திட்டங்களுக்காகவே பயன்படுத்தப்படுவதை உறுதிப்படுத்துதல் மற்றும் அப்பணத்தின் பாதுகாப்பை உறுதி செய்வதற்காக நடைமுறைப்படுத்தப்படும் எஸ்க்ரோ (Escrow) கணக்கு முறைமை குறித்தும் கவனம் செலுத்தப்பட்டது.மேலும், துறைமுக நகருக்குக் கிடைத்துள்ள உண்மையான வெளிநாட்டு முதலீட்டின் அளவு, அங்கீகரிக்கப்பட்ட வணிகங்களின் தற்போதைய செயற்பாடுகள் மற்றும் அவற்றின் மூலம் எதிர்பார்க்கப்பட்ட வேலைவாய்ப்புகள் உருவாக்கப்பட்டுள்ளனவா என்பது தொடர்பான தகவல்களும் குழுவில் கலந்துரையாடப்பட்டன.
பாராளுமன்றத்திற்கு வருகை தருதல்
பாராளுமன்றத்தின் கையேடு
இலங்கையில் தேர்தல் முறை
பாராளுமன்றம் எவ்வாறு செயல்படுகிறது
பாராளுமன்ற அலுவல்கள்
பதிப்புரிமை © இலங்கை பாராளுமன்றம்.
முழுப்பதிப்புரிமையுடையது.
வடிவமைத்து உருவாக்கியது TekGeeks
