2022-02-11
எதிர்கொள்ளும் சவால்களுக்கு மத்தியில் தேயிலைக் கைத்தொழில்துறையின் அபிவிருத்திக்கு ஒருங்கிணைந்த தாவர ஊட்டச்சத்து முகாமைத்துவத் திட்டத்தை நடைமுறைப்படுத்துவதற்கு அமைச்சு தயாராக இருப்பதாகப் பெருந்தோட்டக் கைத்தொழில் அமைச்சர் கௌரவ வைத்திய கலாநிதி ரமேஷ் பத்திரன தெரிவித்தார். நேற்றையதினம் (10) நடைபெற்ற பெருந்தோட்ட அமைச்சுசார் ஆலோசனைக் குழுக் கூட்டத்திலேயே அமைச்சர் இவ்வாறு தெரிவித்தார்.
நாட்டில் இரசாயன உரத் தட்டுப்பாடு நிலவுகின்ற போதிலும், 2020 ஆம் ஆண்டை விட 2021 ஆம் ஆண்டளவில் மொத்த தேயிலை உற்பத்தி 21 மில்லியனால் அதிகரிக்கும் என எதிர்பார்க்கப்படுவதாகவும் அமைச்சர் வலியுறுத்தினார். இரசாயன உரத் தட்டுப்பாட்டினால் மாத்தறை மற்றும் ஏனைய பிரதேசங்களில் உள்ள சிறு தேயிலை விவசாயிகள் பலர் சிரமங்களை எதிர்நோக்கியிருப்பதாகப் பாராளுமன்ற உறுப்பினர் கௌரவ வீரசுமண வீரசிங்ஹ குறிப்பிட்டார். இரசாயன உரங்களின் விலை அதிகரித்துள்ள நிலையில், தேயிலைத் தோட்டங்களுக்கு இயற்கை உரங்களைப் பயன்படுத்துவதற்கான நடைமுறையை அரசாங்கம் ஒழுங்குமுறைப்படுத்துவது பொருத்தமானது எனச் சுட்டிக்காட்டிய வீரசுமண வீரசிங்க, தேயிலை பயிர்ச்செய்கைக்காக அரசாங்கத்தினால் ஒதுக்கப்பட்ட இரசாயன உரங்களில் சில ஏனைய பிரதேசங்களில் அதிக விலைக்கு விற்பனை செய்யப்படுவதாக் கூறினார். சிறு தேயிலை தோட்ட அபிவிருத்தி அதிகார சபையுடன் இணைந்து கூட்டுறவு முகாமைத்துவ திட்டத்தின் ஊடாக தேயிலை தோட்டங்களுக்கு நீர் விநியோகம் செய்வதற்கான செலவில் 50 வீதத்தை அரசாங்கம் வழங்கும் எனவும் அமைச்சர் சுட்டிக்காட்டினார்.
மேலும், தோட்டத் தொழிலாளர்களின் அடிப்படைச் சம்பளத்தை 1000 ரூபாவாக உயர்த்தும் நடவடிக்கையில் ஏற்பட்டுள்ள தாமதம் குறித்தும் பாராளுமன்ற உறுப்பினர் பழனி திகாம்பரன் கேட்டறிந்தார். இது தற்போது நீதிமன்றத்தின் முன்னிலையில் உள்ள பிரச்சினை என்பதால் கருத்து வெளியிடுவதைத் தவிர்த்துள்ள போதிலும், தம்மைப் பொறுத்தவரை, இந்த நிலைமையைத் தீர்ப்பதற்கு கூட்டொப்பந்தம் வேண்டும் என்று அமைச்சர் கூறினார்.
கெளரவ பாராளுமன்ற உறுப்பினர் ஜகத் புஷ்பகுமாரவின் கேள்விக்கு பதிலளித்த அமைச்சர், பெருந்தோட்டக் கைத்தொழில்துறையின் அபிவிருத்திக்காக எந்தவொரு முறைகேடுகளையும் தடுப்பதற்கு தமது அமைச்சு முடிந்தளவு முயற்சியை எடுக்கும் என்றும், அத்துமீறி நடந்துகொள்ளும் எவரையும் பாதுகாக்க வேண்டிய தேவை இல்லையென்றும் அமைச்சர் சுட்டிக்காட்டினார்.
இங்கு இராஜாங்க அமைச்சர் தயாசிறி ஜயசேகர அவர்கள் முன்வைத்த கோரிக்கைக்கு அமைய, குருநாகல் மாவட்டத்தில் தென்னங்கன்று நாற்றுக்களை உருவாக்கும் திட்டம், கௌரவ பாராளுமன்ற உறுப்பினர் அமரகீர்த்தி அத்துகோரல அவர்கள் முன்வைத்த முன்மொழிவின் பேரில் தேங்காய் எண்ணெய் அரைக்கும் இயந்திரங்கள் மற்றும் தேங்காய் துருவல் இயந்திரங்களை விநியோகிக்கும் திட்டம், கௌரவ பாராளுமன்ற உறுப்பினர் வீரசுமண வீரசிங்க அவர்களின் வேண்டுகோளுக்கிணங்க, மாத்தறை நில்வலா பிரதேசத்தில் 30 வருடங்களுக்கும் மேலாக அபிவிருத்தி செய்யப்படாமல் இருக்கும் நெல் வயல்களில் தென்னை உற்பத்தியை துரிதப்படுத்தும் திட்டம் போன்ற யோசனைகளுக்கும் அமைச்சுசார் ஆலோசனைக் குழு அங்கீகாரம் வழங்கியது.
இக்கூட்டத்தில் இராஜாங்க அமைச்சர் தயாசிறி ஜயசேகர, பாராளுமன்ற உறுப்பினர்களான ஜகத் புஸ்பகுமார, சிவஞானம் சிறிதரன், பழனி திகம்பரன், எம். ராமேஸ்வரன், சம்பத் அத்துகோரல, வீரசுமண வீரசிங்க, அமரகீர்த்தி அத்துகோரள ஆகியோர் கலந்துகொண்டனர்.
2026-10-29
இலங்கையில் பெண்களிடையே அதிகளவில் பதிவாகும் மார்பகப் புற்றுநோயை ஆரம்பத்திலேயே கண்டறிவதையும், அது தொடர்பில் பொதுமக்களுக்கு விழிப்புணர்வூட்டுவதையும் நோக்கமாகக் கொண்டு, பெண் பாராளுமன்ற உறுப்பினர்கள் ஒன்றியம் சுகாதார அமைச்சுடன் இணைந்து விசேட தேசிய வேலைத்திட்டத்தை நவம்பர் 02ஆம் திகதி முன்னெடுப்பதற்கு தீர்மானிக்கப்பட்டது.பெண் பாராளுமன்ற உறுப்பினர்கள் ஒன்றியத்தின் தலைவியும் கௌரவ அமைச்சருமான சரோஜா சாவித்திரி போல்ராஜ் அவர்களின் தலைமையில், அண்மையில் (22) கூடிய ஒன்றியத்தின் கூட்டத்திலேயே இது பற்றிய தீர்மானம் எடுக்கப்பட்டது.மார்பகப் புற்றுநோயின் தற்போதைய நிலைமை மற்றும் அந்நோயை ஆரம்பத்திலேயே கண்டறிவதன் முக்கியத்துவம் தொடர்பில் சுகாதார அமைச்சின் அதிகாரிகள் இங்கு விளக்கிக் கூறினர். வருடாந்தம் இலங்கையில் ஏறத்தாழ 6,000 புதிய மார்பகப் புற்றுநோயாளர்கள் பதிவாகுவதுடன், சுமார் 1,000 பெண்கள் இந்நோயினால் உயிரிழக்கின்றனர். மார்பகப் புற்றுநோயை ஆரம்பக் கட்டத்திலேயே கண்டறிந்தால் முழுமையாகக் குணப்படுத்த முடியும் என்ற போதிலும், அச்சம், வெட்கம் மற்றும் போதிய விழிப்புணர்வின்மை காரணமாகச் சிகிச்சை பெறுவதைத் தாமதிப்பது முக்கிய பிரச்சினையாக இருப்பதும் இங்கு சுட்டிக்காட்டப்பட்டது.இதற்கமைய, நவம்பர் 02ஆம் திகதி திங்கட்கிழமை, பெண் பாராளுமன்ற உறுப்பினர்கள் தமது தேர்தல் தொகுதிகள் மற்றும் மாவட்ட மட்டங்களில் சுகாதார மருத்துவ முகாம்கள் மற்றும் விழிப்புணர்வு நிகழ்ச்சிகளை ஏற்பாடு செய்வதுடன், அவற்றில் நேரடியாகவும் பங்கேற்கவுள்ளனர். இதன்போது, பெண் பாராளுமன்ற உறுப்பினர்கள் மட்டுமன்றி, பாடசாலை மற்றும் பல்கலைக்கழக மாணவர்களும் இளஞ்சிவப்பு நிறச் சின்னங்கள் (Pink Ribbons / Pink Wristbands) மற்றும் ஆடைகளைப் பயன்படுத்தி, மார்பகப் புற்றுநோய் விழிப்புணர்வு மாதமான இளஞ்சிவப்பு மாதத்திற்கான தமது ஆதரவை வெளிப்படுத்துவதற்கும் திட்டமிடப்பட்டுள்ளது.கிராமப்புறங்கள், பெருந்தோட்டப் பகுதிகள், நகர்ப்புற அடுக்குமாடிக் குடியிருப்புகள் மற்றும் குறைந்தளவில் பங்கேற்பு காணப்படும் பகுதிகளைச் சேர்ந்த பெண்களை சுவநாரி மருத்துவப் பரிசோதனை நிலையங்களுக்கு அழைத்துச் செல்வதில் விசேட கவனம் செலுத்தப்படவுள்ளது. தற்போது 35–45 வயதுக்குட்பட்ட பெண்களில் சுமார் 50 சதவீதமானவர்களே சுவனாரி மருத்துவப் பரிசோதனை நிலையங்களுக்குச் செல்வதால், ஏனைய பெண்களையும் புற்றுநோயை ஆரம்பத்திலேயே கண்டறிவதற்கான பிரதான மையங்களில் கிடைக்கும் வசதிகளைப் பயன்படுத்த ஊக்குவிக்கத் தீர்மானிக்கப்பட்டுள்ளது.கிராம உத்தியோகத்தர் பிரிவுகள் மட்டத்தில் செயற்படும் மகளிர் சங்கங்கள் உள்ளிட்ட தொடர்புடைய தரப்பினரை ஒருங்கிணைத்து, 35–45 வயதுக்குட்பட்ட அனைத்துப் பெண்களையும் பரிசோதனைகளுக்கு (Screening Tests) உட்படுத்தும் விரிவான வேலைத்திட்டமொன்றை அடுத்த ஆண்டில் நடைமுறைப்படுத்தவும் திட்டமிடப்பட்டுள்ளது. இதற்கு மேலதிகமாக, ஜனவரி மாதத்தில் பெண் பாராளுமன்ற உறுப்பினர்களின் முன்னெடுப்பில் கர்ப்பப்பை வாய்ப் புற்றுநோய் தொடர்பான விழிப்புணர்வு நிகழ்ச்சிகளை நடத்துவது குறித்தும் கவனம் செலுத்தப்பட்டது.மேலும், பாலின அடிப்படையிலான வரவு செலவுத் திட்டமிடல் (GRP) மற்றும் பராமரிப்புப் பொருளாதாரம் (Care Economy) தொடர்பிலும் கவனம் செலுத்தப்பட்டது. தேசிய பராமரிப்புக் கொள்கையை நடைமுறைப்படுத்துதல் மற்றும் வரவு செலவுத் திட்டச் செயன்முறையில் பாலின உணர்திறன் கொண்ட கொள்கைகளை உள்ளடக்குதல் ஆகியவற்றுக்கான தொழில்நுட்ப ஆலோசனை உதவியைப் பெற்றுக்கொள்வது தொடர்பிலும் இதன்போது கலந்துரையாடப்பட்டது.அத்துடன், குடும்ப வன்முறையைத் தடுப்பதற்கான சட்டம், பராமரிப்புக் கொடுப்பனவுகள் தொடர்பான சட்டம் மற்றும் சிறுவர்களுக்கு உடல் ரீதியான தண்டனைகளை வழங்குவதைத் தடுக்கும் சட்டங்களில் காணப்படும் குறைபாடுகளை நிவர்த்தி செய்வதற்காக, நீதி அமைச்சுடன் இணைந்து அவற்றுக்கான திருத்த நடவடிக்கைகளைத் துரிதப்படுத்த வேண்டியதன் அவசியமும் வலியுறுத்தப்பட்டது.இந்தக் கலந்துரையாடல்களில் கௌரவ பாராளுமன்ற பிரதிக் குழுக்களின் தவிசாளர் ஹேமாலி வீரசேகர, பெண் பாராளுமன்ற உறுப்பினர்களின் ஒன்றியத்தின் பிரதித் இணைத் தலைவியும் கௌரவ பாராளுமன்ற உறுப்பினருமான சட்டத்தரணி சமிந்திரானி கிரிஎல்லே உள்ளிட்ட குழுவின் உறுப்பினர்கள், சுகாதார அமைச்சின் அதிகாரிகள் மற்றும் ஜனநாயகத்திற்கான வெஸ்ட்மின்ஸ்டர் மன்றத்தின் (WFD) இலங்கைக்கான பிரதிநிதிகள் ஆகியோரும் கலந்துகொண்டனர்.
2026-10-28
வெளிநாட்டலுவல்கள், வெளிநாட்டு வேலைவாய்ப்பு மற்றும் சுற்றுலா அலுவல்கள் பற்றிய குழு அதன் தலைவர் கௌரவ அமைச்சர் விஜித ஹேரத் அவர்களின் தலைமையில் கடந்த ஒக். 23ஆம் திகதி பாராளுமன்றத்தில் கூடியது.மத்திய கிழக்கில் நிலவும் போர்ச் சூழ்நிலைக்கு மத்தியில், இஸ்ரேலில் பணியாற்றும் இலங்கைத் தொழிலாளர்களின் பாதுகாப்பையும் நலனையும் உறுதிப்படுத்துவதற்காக எடுக்கப்பட்டுள்ள நடவடிக்கைகள் குறித்து இதன்போது கலந்துரையாடப்பட்டது. விமானப் பயணங்கள் இரத்துச் செய்யப்பட்டதன் காரணமாகப் பயணங்கள் தாமதமடைந்த தொழிலாளர்களின் பயண வசதிகளை ஏற்படுத்துவதற்காக விசேட விமான சேவைகளைப் பயன்படுத்துதல், தேவையான சந்தர்ப்பங்களில் தற்காலிக தங்குமிட மற்றும் உணவு வசதிகளை வழங்குதல் உள்ளிட்ட நடவடிக்கைகள் தொடர்பில் அதிகாரிகள் விளக்கமளித்தனர்.அத்துடன், இலங்கையர்களை வெளிநாட்டு வேலைவாய்ப்புகளுக்கு அனுப்பும்போது அவர்களின் பாதுகாப்பும் நலனும் உறுதிப்படுத்தப்படும் வகையில் வெளிநாட்டு நாடுகளுடன் ஒப்பந்தங்களை ஏற்படுத்திக்கொள்வதன் முக்கியத்துவம் குறித்தும் கலந்துரையாடப்பட்டது.மேலும், ரஷ்யாவுடனான வர்த்தகக் கொடுக்கல் வாங்கல்களின்போது ரஷ்ய ரூபிளைப் பயன்படுத்துவதில் நிலவும் தடைகள் மற்றும் மாற்றுக் கொடுப்பனவு முறைகள் தொடர்பிலும் கலந்துரையாடப்பட்டது. இதனுடன், வெளிநாடுகளில் உள்ள இலங்கையர்களின் பாதுகாப்பு மற்றும் நலன், வெளிநாட்டு வேலைவாய்ப்பு ஒப்பந்தங்கள் மற்றும் சுற்றுலாத்துறைத் திட்டங்களை நடைமுறைப்படுத்துதல் தொடர்பான விடயங்களும் ஆராயப்பட்டன.இந்தக் கூட்டத்தில் பாராளுமன்ற உறுப்பினர்கள் உள்ளிட்ட வெளிநாட்டலுவல்கள், வெளிநாட்டு வேலைவாய்ப்பு மற்றும் சுற்றுலா அலுவல்கள் அமைச்சின் அதிகாரிகள் பலரும் கலந்துகொண்டனர்.
2026-10-28
2027ஆம் ஆண்டுக்கான நிதி ஒதுக்கீட்டுச் சட்டமூலத்தில் குறிப்பிடப்பட்டுள்ள வரவுசெலவுத்திட்ட மதிப்பீடுகள், அரச வருமானம் மற்றும் செலவினங்களை முகாமைத்துவம் செய்தல், முன்னுரிமை அபிவிருத்தித் திட்டங்கள் குறித்து அரசாங்க நிதி பற்றிய குழுவில் கலந்துரையாடப்பட்டன.கௌரவ பாராளுமன்ற உறுப்பினர் கலாநிதி ஹர்ஷ.த சில்வா அவர்களின் தலைமையில் அண்மையில் (ஒக். 22) பாராளுமன்றத்தில் கூடிய அரசாங்க நிதி பற்றிய குழுவில் கலந்துகொண்ட நிதி, திட்டமிடல் மற்றும் பொருளாதார அபிவிருத்தி அமைச்சின் அதிகாரிகளுடன் இவ்விடயங்கள் தொடர்பில் கலந்துரையாடப்பட்டன.இக்குழுக் கூட்டத்தில் கௌரவ பிரதி அமைச்சர் நிஷாந்த ஜயவீர, கலாநிதி கௌஷல்யா ஆரியரத்ன மற்றும் கௌரவ பாராளுமன்ற உறுப்பினர்களான ரவி கருணாநாயக்க, ஹர்ஷன ராஜகருணா, அஜித் அகலகட, நிமல் பலிஹேன, சட்டத்தரணி சித்ரால் பெர்னாண்டோ, விஜேசிறி பஸ்நாயக்க, திலிண சமரகோன் மற்றும் சட்டத்தரணி லக்மாலி ஹேமச்சந்திர உள்ளிட்ட பலர் கலந்துகொண்டனர்.2027ஆம் ஆண்டிற்காக மதிப்பிடப்பட்டுள்ள அரச செலவினங்கள், மூலதனச் செலவினங்களுக்காக ஒதுக்கப்பட்டுள்ள நிதி, அரச வருமான இலக்குகள் மற்றும் கடன் சேவைக்கான செலவுகள் தொடர்பில் இங்கு விளக்கமளிக்கப்பட்டது. அத்துடன், வரவு செலவுத் திட்ட மதிப்பீடுகளைத் தயாரிப்பதில் பயன்படுத்தப்படும் பேரினப் பொருளாதார முன்னறிவிப்புகள் மற்றும் அரச நிதி முகாமைத்துவம் தொடர்பான சட்டக் கட்டமைப்பு குறித்தும் கவனம் செலுத்தப்பட்டது.2027ஆம் ஆண்டிற்காக மதிப்பிடப்பட்டுள்ள மொத்த மூலதனச் செலவினங்களில், வீதி அபிவிருத்தி, சுகாதார மற்றும் கல்வி வசதிகளை மேம்படுத்துதல், மின்சாரக் கட்டமைப்பை விரிவுபடுத்துதல் மற்றும் நகர அபிவிருத்தி உள்ளிட்ட உட்கட்டமைப்புத் திட்டங்களும் உள்ளடங்குகின்றன. இத்திட்டங்களுக்காக ஒதுக்கப்பட்டுள்ள நிதி தொடர்பிலும் இதன்போது ஆராயப்பட்டது.சிறிய மற்றும் நடுத்தர அளவிலான தொழில்முயற்சிகளுக்கு நிதி வசதிகளை வழங்குதல், கடன் உத்தரவாதத் திட்டங்கள் மற்றும் வணிகத் துறைக்கு ஆதரவளித்தல் தொடர்பிலும் விளக்கமளிக்கப்பட்டது. அரச சேவையின் சம்பளம் மற்றும் ஓய்வூதியங்களுக்காக ஒதுக்கப்பட்டுள்ள நிதி மற்றும் அரச சேவைகளின் தேவைகளுக்காக மேற்கொள்ளப்படும் செலவினங்கள் குறித்தும் குழுவின் கவனம் செலுத்தப்பட்டது.மேலும், 2027ஆம் ஆண்டில் வெளிநாட்டுக் கடன்களைச் செலுத்துவதற்கான தேவைகள், எதிர்பார்க்கப்படும் வெளிநாட்டு நிதி வசதிகள் மற்றும் அரச கடன் முகாமைத்துவம் தொடர்பிலும் அமைச்சின் அதிகாரிகள் விளக்கமளித்தனர். அரச வருமான இலக்குகளை அடைதல், வரி நிர்வாகத்தின் வினைத்திறனை மேம்படுத்துதல் மற்றும் வரவு செலவுத் திட்ட ஒதுக்கீடுகளை முறையாகப் பயன்படுத்துதல் தொடர்பான விடயங்களும் கலந்துரையாடப்பட்டன.
2026-10-28
மத்திய மாகாண சபையின் 2021–2023 ஆம் ஆண்டுகளுக்கான கணக்காய்வாளர் நாயகத்தின் மூன்றாண்டு அறிக்கை, 2024 மற்றும் 2025 ஆம் ஆண்டுகளுக்கான கணக்காய்வாளர் நாயகத்தின் அறிக்கைகள் மற்றும் தற்போதைய செயலாற்றுகை தொடர்பில் அரசாங்கக் கணக்குகள் பற்றிய குழுவின் கவனம் செலுத்தப்பட்டது.அரசாங்கக் கணக்குகள் பற்றிய குழு அதன் தலைவர் கௌரவ பாராளுமன்ற உறுப்பினர் கபீர் ஹஷீம் அவர்களின் தலைமையில் அண்மையில் (ஒக். 22) பாராளுமன்றத்தில் கூடியபோதே இவ்விடயங்கள் தொடர்பில் ஆராயப்பட்டன. 2026.05.21 ஆம் திகதி நடைபெற்ற கோபா குழுக் கூட்டத்தில் கலந்துரையாடப்பட்ட விடயங்கள் தொடர்பான மீளாய்வும் இங்கு மேற்கொள்ளப்பட்டது.மத்திய மாகாணத்தில் நடைமுறைப்படுத்தப்படும் வீதி அபிவிருத்தி மற்றும் பயணிகள் போக்குவரத்துத் திட்டங்களின் முன்னேற்றம், வீதி மதிப்பீடுகளைத் தயாரிப்பதில் இடம்பெற்ற குறைபாடுகள், தரநிலைகளுக்கு இணங்காத நிர்மாணப் பணிகளுக்கான கொடுப்பனவுகள் மற்றும் உரிய அனுமதியின்றி மேற்கொள்ளப்பட்ட மேலதிக வேலைகளுக்காகப் பணம் செலுத்தப்பட்டமை தொடர்பில் இங்கு விரிவாகக் கலந்துரையாடப்பட்டது.அத்துடன், பயணிகள் போக்குவரத்துச் சேவையை வினைத்திறனாக்கும் நோக்கில் அறிமுகப்படுத்தப்பட்ட மின்னணு பயணச்சீட்டு இயந்திரங்கள் மற்றும் GPS/SIM தொழில்நுட்பக் கட்டமைப்புகள் முறையாகப் பயன்படுத்தப்படாமை குறித்தும் குழுவின் கவனம் செலுத்தப்பட்டது. குறித்த தொழில்நுட்பக் கோளாறுகளைச் சீர்செய்து, இக்கட்டமைப்புகளை வினைத்திறனுடன் செயற்படுத்துவதற்கு எடுக்கப்பட்டுள்ள நடவடிக்கைகள் தொடர்பிலும் இதன்போது விசாரிக்கப்பட்டது.மேலும், வீதி அபிவிருத்தி அதிகாரசபைக்குச் சொந்தமான காணிகள் மற்றும் கட்டடங்கள் சட்டபூர்வமான அனுமதியின்றி உள்வாடகைக்கு விடப்பட்டமை, நிலுவையிலுள்ள வாடகைத் தொகைகள் அறவிடப்படாமை மற்றும் அரச சொத்துக்களின் உரிமை தொடர்பில் நிலவும் பிரச்சினைகள் குறித்தும் கலந்துரையாடப்பட்டது. குறிப்பாக, மலபார் ஹவுஸ் கட்டடம் கிராம சக்தி வேலைத்திட்டத்தின் கருத்திட்ட அலுவலகமொன்றுக்கு வழங்கப்பட்டதையடுத்து, அதற்கான வாடகையை அறவிட முடியாமை தொடர்பில் எழுந்துள்ள சட்டப் பிரச்சினைகளுக்குத் தீர்வு காண்பதற்காக சட்டமா அதிபர் திணைக்களத்தின் ஆலோசனையைப் பெற்றுக்கொள்ள எடுக்கப்பட்டுள்ள நடவடிக்கைகள் குறித்தும் கவனம் செலுத்தப்பட்டது.இதற்கு மேலதிகமாக, KMTT திட்டங்களின் நோக்கங்கள் நிறைவேற்றப்படாத சந்தர்ப்பங்களில் அவற்றுடன் தொடர்புடைய அதிகாரிகளுக்கு வழங்கப்பட்ட ஊக்குவிப்புக் கொடுப்பனவுகளை மீள அறவிடுதல், அரச சொத்துக்களைப் பயன்படுத்துவதன் மூலம் கிடைக்கும் வருமானத்தைப் பகிர்ந்தளிக்கும்போது உரிய விதிமுறைகளைப் பின்பற்றுதல் மற்றும் பயன்பாடின்றிக் கைவிடப்பட்டுள்ள கட்டடங்கள் மற்றும் சொத்துக்களைப் பயனுள்ள வகையில் பயன்படுத்த வேண்டியதன் அவசியம் குறித்தும் கலந்துரையாடப்பட்டது.உரிய நடைமுறைகளைப் பின்பற்றாமல் அலுவலகக் கோப்புகளை அழித்தமை தொடர்பான ஒழுக்காற்று விசாரணைகள் மற்றும் அதனுடன் தொடர்புடைய நீதிமன்ற நடவடிக்கைகள் குறித்தும் குழு விசாரணைகளை மேற்கொண்டது.இந்தக் கூட்டத்தில் கௌரவ பிரதி அமைச்சர் நளின் ஹேவகே, கௌரவ பாராளுமன்ற உறுப்பினர்களான அஜித் பி. பெரேரா, சட்டத்தரணி துஷாரி ஜயசிங்ஹ, டீ. கே. ஜயசுந்தர, சுசந்த குமார நவரத்ன, மஞ்சுள சுரவீர ஆரச்சி, சந்தன சூரியஆரச்சி, ஓஷானி உமங்கா மற்றும் சானக மாதுகொட ஆகியோரும் கலந்துகொண்டனர்.
பாராளுமன்றத்திற்கு வருகை தருதல்
பாராளுமன்றத்தின் கையேடு
இலங்கையில் தேர்தல் முறை
பாராளுமன்றம் எவ்வாறு செயல்படுகிறது
பாராளுமன்ற அலுவல்கள்
பதிப்புரிமை © இலங்கை பாராளுமன்றம்.
முழுப்பதிப்புரிமையுடையது.
வடிவமைத்து உருவாக்கியது TekGeeks
