2024-04-17
பாராளுமன்ற பெண் உறுப்பினர்களின் ஒன்றியம் (WPC) மற்றும் பாராளுமன்றத்தின் மாற்றுத்திறனாளிகள் உள்ளடக்கம் பற்றிய ஒன்றியம் (PCIPD) என்ற வகையில், 2024 ஏப்ரல் 5 ஆம் திகதி செத்சிறிபாயவில் மாற்றுத்திறனாளிப் பெண்ணொருவர் உரையாற்றச் சென்று பின்னர் செத்சிறிபாய வளாகத்திலிருந்து வெளியேறுவதற்கான போக்குவரத்துக்கு இடையூறு விளைவித்ததோடு குறித்த வளாகத்தை விட்டு வெளியேறுவதற்கான சேவைகள் மற்றும் வாகன அணுகலானது பிரத்தியேகமாக அதி முக்கிய நபர்களுக்கு (VIP Customers) மட்டுமே உரித்தானது எனவும் பாதுகாப்பு உத்தியோகத்தர்களால் தெரிவிக்கப்பட்டமை தொடர்பான சம்பவத்தை வன்மையாக கண்டிக்கிறோம். இந்தச் சம்பவத்துடன் சம்பந்தப்பட்ட பாதுகாப்பு உத்தியோகத்தர்கள் பயன்படுத்திய மொழிப் பிரயோகமானது மிகவும் கூருணர்வற்றது, அவமரியாதை ஏற்படுத்தும் மற்றும் புண்படுத்தும் வகையில் அமைந்திருந்தது என்ற விடயமானது எங்களது கவனத்துக்கு கொண்டு வரப்பட்டது. குறித்த மாற்றுத்திறனாளிப் பெண் புத்தசாசன, சமய மற்றும் கலாசார அலுவல்கள் அமைச்சினால் ஏற்பாடு செய்யப்பட்ட மாற்றுத்திறனாளிகளை உள்வாங்குவது தொடர்பான விழிப்புணர்வை ஏற்படுத்துவதற்கான செயலமர்வில் உரையாற்றுவதற்கு அழைக்கப்பட்ட பேச்சாளராக இருந்த போதே மேற்படி சம்பவம் இடம்பெற்றுள்ளது.
இலங்கையின் சனத்தொகையில் 9% வீதமானவர்கள் மாற்றுத்திறனாளிகளாகக் காணப்படுவதோடு, அத்தகைய மாற்றுத்திறனாளிகள் தங்களுக்கான பல்வேறு சேவைகளைப் பெற்றுக்கொள்வதற்கு அணுகும்போதும், தமது அன்றாட நடவடிக்கைகளை மேற்கொள்ளும்போதும், தங்களது சமூக செயற்பாடுகளில் பங்கேற்கும் போதும் பல்வேறு துறைகளில் பாகுபாடு மற்றும் துன்புறுத்தலுக்கு உள்ளாகின்றனர். தேவையான உள்கட்டமைப்பு மற்றும் சைகை மொழி விளக்கம், மாற்றுத்திறனாளிகளுக்கான நட்புறவுடன் கூடிய கல்விமுறை, வேலைவாய்ப்பு வசதிகள் மற்றும் அணுகக்கூடிய போக்குவரத்து போன்ற அவசியமான ஏற்பாடுகள் காணப்படாததால் மாற்றுத்திறன்களை கொண்டுள்ளவர்கள் அடிக்கடி சிரமங்களை அனுபவிக்கின்றனர்.
2016 ஆம் ஆண்டில் ஐக்கிய நாடுகள் மூலம் அறிமுகப்படுத்தப்பட்ட மாற்றுத்திறனாளிகளின் உரிமைகள் தொடர்பான சாசனத்தை (UNCRPD) இலங்கை அங்கீகரித்துள்ளது, அதாவது “அனைத்துவிதமான மனித உரிமைகள் மற்றும் அடிப்படைச் சுதந்திரங்களை முழுமையாகவும் சமமாகவும் மாற்றுத்திறனாளிகள் (மாற்றுத்திறன்களோடு வாழ்கின்ற மனிதர்கள்) அனுபவிப்பதை ஊக்குவித்தல், பாதுகாத்தல் மற்றும் உறுதி செய்வதற்கான பொறுப்பு மற்றும் அத்தகைய மாற்றுத்திறனாளிகளின் உள்ளார்ந்த கண்ணியத்திற்கான மரியாதையை மேம்படுத்துவதற்கான பொறுப்பை ஏற்றுக்கொண்டது. கடைகள், பொது உணவகங்கள் அல்லது ஓய்வகங்கள், பொதுப் பொழுதுபோக்கு இடங்கள் மற்றும் பொது மத வழிபாட்டுத் தலங்கள் போன்றவற்றுக்கான சமமான அணுகலை தனது சாதி, மதம், மொழி, இனம், பால் அல்லது மாற்றுத்திறன் போன்ற எந்த வகையான பாகுபாடுகளும் இன்றி அணுகுவதற்கான உரிமையை இலங்கையின் அரசியலமைப்பின் உறுப்புரை 12(3) உத்தரவாதமளிக்கின்றது. ஆகவே, இலங்கை அரசாங்கமானது மாற்றுத்திறனாளிகள் பொதுக் கட்டடங்களை வசதியாக அணுகுவதனை உறுதிசெய்வதற்கு கடமைப்பட்டுள்ளது.
மேலும், பெண்கள், பிள்ளைகள் அல்லது மாற்றுத்திறனாளிகளின் முன்னேற்றத்திற்காக சட்டம், துணைச் சட்டம் அல்லது நிர்வாக நடவடிக்கை மூலம் சிறப்பு ஏற்பாடுகள் மேற்கொள்ளப்படலாம் என அரசியலமைப்பின் உறுப்புரை 12(4) ஆனது மேலும் குறிப்பிடுகின்றது. அந்தவகையில், மாற்றுத்திறனாளிகளின் நலன்களை மேம்படுத்துவதற்கான தனது வாக்குறுதிகளை இலங்கை நாடானது நிலைநிறுத்தி, அவர்களின் உரிமைகள் பாதுகாக்கப்படுவதை உறுதிசெய்யப் பாடுபட வேண்டும். இந்தச் சம்பவமானது பல அடையாளங்கள் காரணமாக நபர்கள் எதிர்கொள்ளும் பாகுபாடு மற்றும் தடைகளின் ஒன்றோடொன்று தொடர்புடைய தன்மையை எடுத்துக்காட்டுகிறது. இங்கு குறித்த சம்பவத்துடன் சம்பந்தப்பட்ட தனி நபர் ஒரு மாற்றுத்திறனாளிப் பெண்ணாக காணப்படுவதோடு குறித்த பெண் அன்றாடம் பல சவால்களுக்கு ஆளாக நேரிடும் தன்மையும் காணப்படுகின்றது. எனவே, இவ்வாறான சூழ்நிலைகள் அனைத்தையும் கருத்திற்கொண்டு குறித்த மாற்றுத்திறனாளிகளுக்கு காணப்படுகின்ற சுமைகளைக் குறைக்கப் பாடுபடுவது அரசாங்கத்தின் கடமையாகும்.
மாற்றுத்திறனாளிகளுக்கான தேசிய செயலகம், கடவுச்சீட்டுகளை பெற்றுக்கொள்வதற்கான அலுவலகம் மற்றும் பல அரச சேவைகளை மாற்றுத்திறனாளிகள் தொடர்ந்தும் அணுகுகின்றனர். பத்தரமுல்லையில் அமைந்துள்ள அரச அலுவலகங்களுக்கான பாதுகாப்புச் சேவைகளானது நகர அபிவிருத்தி அதிகாரசபையின் (UDA) முதன்மைப் பொறுப்பாக இருப்பதால், அத்தகைய அலுவலகங்களில் பணிபுரிகின்ற பாதுகாப்பு உத்தியோகத்தர்களுக்கு எல்லோரையும் உள்ளடக்கி செயற்படுவதற்கான பயிற்சி மற்றும் பயன்பாடு குறித்து விழிப்புணர்வை ஏற்படுத்தவும், குறித்த பாதுகாப்பு உத்தியோகத்தர்கள் பெண்கள் மற்றும் மாற்றுத்திறனாளிகள் சேவைகளை அணுகும் போது அத்தகையவர்களை சிறந்த முறையில் வழிநடத்துவதற்கான கூருணர்வுடன் கூடிய மொழிப்பிரயோகம் தொடர்பாக குறித்த பாதுகாப்பு உத்தியோகத்தர்களுக்கு அறிவுறுத்துவதற்குத் தேவையான நடவடிக்கைகளை எடுக்குமாறும் நகர அபிவிருத்தி அதிகாரசபைக்கு (UDA) வலியுறுத்துகிறோம்.
எதிர்காலத்தில் இவ்வாறான சம்பவங்கள் இடம்பெறாமல் பார்த்துக்கொள்வது இலங்கைப் பிரஜைகளாகிய எமது பொறுப்பாகும். பாராளுமன்ற பெண் உறுப்பினர்களின் ஒன்றியம் (WPC) மற்றும் பாராளுமன்றத்தின் மாற்றுத்திறனாளிகள் உள்ளடக்கம் பற்றிய ஒன்றியம் (PCIPD) என்ற வகையில், செத்சிறிபாய (மற்றும் பிற பொது இடங்கள்) உத்தியோகத்தர்கள், மாற்றுத்திறனாளிகளின் உரிமைகள் குறித்து உரிய முறையில் விழிப்புணர்வோடு காணப்பட வேண்டும் என்பதை நாங்கள் வன்மையாக வலியுறுத்துகிறோம். மேலும், மாற்றுத்திறனாளிகளின் தேவைகள் குறித்து அரச உத்தியோகத்தர்கள் விழிப்புடன் இருக்குமாறும், எதிர்காலத்தில் ஏதேனும் நிகழ்ச்சிகளை நடத்தும்போது தேவையான ஏற்பாடுகளை முன்னறிவித்துச் செயற்படுமாறும் நாங்கள் குறிப்பாக கேட்டுக்கொள்கிறோம்.
2026-11-14
ஸ்ரீலங்கன் விமான சேவை எதிர்நோக்கியுள்ள நிதி நெருக்கடி, அதிகளவிலான விமானப் பயணத் தாமதங்கள், கடன் சுமை மற்றும் புதிய விமானங்களைக் கொள்வனவு செய்வதில் ஏற்பட்டுள்ள கொள்வனவு நடைமுறைத் தாமதங்கள் தொடர்பில் உட்கட்டமைப்பு வசதிகள் மற்றும் மூலோபாய அபிவிருத்தி பற்றிய துறைசார் மேற்பார்வைக் குழுவில் விரிவாகக் கலந்துரையாடப்பட்டது.குறித்த குழு, அதன் தலைவர் கௌரவ பாராளுமன்ற உறுப்பினர் எஸ்.எம். மரிக்கார் தலைமையில் அண்மையில் பாராளுமன்றத்தில் கூடியபோதே இது தொடர்பில் கவனம் செலுத்தப்பட்டது.தற்போது 23 விமானங்களைக் கொண்டுள்ள விமானச் சேவையின் விமானத் தொகுதி போதுமானதாக இல்லாமை மற்றும் அந்த விமானங்கள் சுமார் 12 வருடங்கள் பழைமையானவையாக இருப்பதால் விமானப் பயணங்களைப் பாதிக்கும் தொழில்நுட்பக் கோளாறுகள் மற்றும் தாமதங்கள் தொடர்பில் இதன்போது கலந்துரையாடப்பட்டது. ஒரு விமானத்தில் தொழில்நுட்பக் கோளாறு அல்லது வேறு காரணங்களால் தாமதம் ஏற்படும்போது, மாற்று விமானங்களைப் பயன்படுத்துவதில் காணப்படும் மட்டுப்பாடுகள் காரணமாக ஒட்டுமொத்த விமானப் போக்குவரத்து வலையமைப்பும் பாதிக்கப்படுவதாகவும் இதன்போது சுட்டிக்காட்டப்பட்டது.விமானங்களைக் கொள்வனவு செய்வதற்காக கடந்த காலங்களில் முன்னெடுக்கப்பட்ட வழமையான கொள்வனவு நடைமுறைகள் தோல்வியடைந்தமை மற்றும் அதனுடன் தொடர்புடைய நீண்டகாலத் தாமதங்கள் குறித்தும் குழுவின் கவனம் செலுத்தப்பட்டது. இந்நிலைக்குத் தீர்வாக விமானங்கள் மற்றும் அவற்றுடன் தொடர்புடைய உபகரணங்களைக் கொள்வனவு செய்வதற்கான விசேட கொள்வனவு வழிகாட்டுதல்கள் தயாரிக்கப்பட்டுள்ளதுடன், அவற்றை வர்த்தமானியில் வெளியிடுவதற்கான நடவடிக்கைகள் எடுக்கப்பட்டுள்ளதாகவும் இதன்போது தெரிவிக்கப்பட்டது. அத்துடன், கொள்வனவு நடவடிக்கைகளை நேரடியாகக் கண்காணிப்பதற்காக அமைச்சு மட்டத்தில் விசேட கொள்வனவுப் பிரிவொன்றும் நிறுவப்பட்டுள்ளதாகத் தெரிவிக்கப்பட்டது.புதிய கொள்வனவு வழிகாட்டுதல்களின் கீழ் விமானத் தொகுதியை விரிவுபடுத்தத் திட்டமிடப்பட்டுள்ளதுடன், எதிர்வரும் ஜூன் மாதமளவில் புதிய குறுகிய உடற்பகுதியைக் கொண்ட (Narrow-body) விமானமொன்றையும், அகன்ற உடற்பகுதியைக் கொண்ட (Wide-body) இரண்டு விமானங்களையும் விமானத் தொகுதியில் இணைத்துக்கொள்ள எதிர்பார்க்கப்படுவதாகவும் கலந்துரையாடப்பட்டது. 2029ஆம் ஆண்டளவில் விமானத் தொகுதியை ஆகக்குறைந்தது 29 விமானங்களாக அதிகரிப்பது ஐந்தாண்டுத் திட்டத்தின் இலக்காகும் என்றும் குறிப்பிடப்பட்டது.ஸ்ரீலங்கன் விமான சேவையின் நிதி நிலைமையை மேம்படுத்துவதற்காக, பழைய வங்கிக் கடன்கள் மற்றும் பிணைமுறிக் கடன்கள் உள்ளிட்டவற்றைப் பொறுப்பேற்பது உட்பட பல்வேறு நடவடிக்கைகளை திறைசேரி முன்னெடுத்துள்ளதாக இதன்போது விளக்கமளிக்கப்பட்டது. அத்துடன், விமானங்களுக்கான குத்தகைக் கட்டணங்களைக் குறைத்தல், எரிபொருள் செலவுகளைக் கட்டுப்படுத்துதல் மற்றும் விமான சேவையின் வருமானத்தை அதிகரிப்பதற்கான வர்த்தக உபாயங்களை நடைமுறைப்படுத்துதல் தொடர்பிலும் கவனம் செலுத்தப்பட்டது.மத்திய கிழக்கு பிராந்தியத்தில் நிலவும் நெருக்கடி நிலைமை, எரிபொருள் விலை அதிகரிப்பு மற்றும் சர்வதேச விமான சேவைகளுடனான போட்டித்தன்மை ஆகியனவும் ஸ்ரீலங்கன் விமான சேவையின் செயற்பாடுகள் மற்றும் வருமானத்தில் தாக்கம் செலுத்துவதாக இதன்போது கலந்துரையாடப்பட்டது.மேலும், ஸ்ரீலங்கன் விமான சேவையை மறுசீரமைப்பதற்காக அரசாங்கத்தினால் நியமிக்கப்பட்ட குழு, புதிய முதலீட்டாளர்களைப் பெற்றுக்கொள்ளுதல், அரச-தனியார் பங்காண்மையை ஏற்படுத்துதல் அல்லது அரசாங்கத்தின் கீழ் தொடர்ந்து நிர்வகித்து, அதன் செலவுகளை ஈடுகட்டக்கூடிய நிலைக்குக் கொண்டுவருதல் உள்ளிட்ட மாற்று வழிகள் குறித்து ஆராய்ந்து வருவதாகவும் தெரிவிக்கப்பட்டது.அதற்கமைய, அடுத்த இரண்டு அல்லது மூன்று வருடங்களுக்குள் ஸ்ரீலங்கன் விமான சேவையை அதன் செலவுகளை ஈடுகட்டக்கூடிய நிலைக்குக் கொண்டுவருவதற்காக எடுக்கப்பட வேண்டிய நடவடிக்கைகள் உள்ளடங்கிய விரிவான அறிக்கையொன்றை நவம்பர் 30ஆம் திகதிக்கு முன்னர் பாராளுமன்றத்திற்கும் அமைச்சுக்கும் சமர்ப்பிக்குமாறு உரிய அதிகாரிகளுக்கு குழு அறிவுறுத்தியது.இந்தக் குழுக் கூட்டத்தில் கௌரவ பாராளுமன்ற உறுப்பினர்களான அஜித் பி. பெரேரா, நளின் பண்டார ஜயமஹ, ரவீந்திர பண்டார, மஞ்சுள சுரவீர ஆரச்சி, சதுர கலப்பத்தி, தனுஷ்க ரங்கநாத், ஜகத் விதான, சாந்த பத்ம குமார சுபசிங்க மற்றும் சட்டத்தரணி கீதா ஹேரத் ஆகியோர் கலந்துகொண்டனர்.
2026-11-14
இலங்கையின் இறக்குமதி வரிக் கொள்கைகள் மற்றும் வர்த்தக உடன்படிக்கைகள் தொடர்பில் கௌரவ பாராளுமன்ற உறுப்பினர் விஜேசிறி பஸ்நாயக்க அவர்களின் தலைமையில் கூடிய வழி வகைகள் பற்றிய குழுவில் விரிவாகக் கலந்துரையாடப்பட்டது.வணிகத் திணைக்களத்தின் பணிப்பாளர் நாயகம் (பதில்) சோமசேன மகாதிவுல்வேவ அவர்கள் இது பற்றிய விரிவான விளக்கத்தைக் குழுவுக்கு வழங்கினார். இலங்கையின் இரு தரப்பு மற்றும் பல்தரப்பு வர்த்தக உடன்படிக்கைகளின் நிலைமைகள் மற்றும் அவற்றைத் தொடர்ந்து முன்கொண்டு செல்வது உள்ளிட்ட விடயங்கள் குறித்து இங்கு கலந்துரையாடப்பட்டது.கலந்துரையாடல் மட்டத்தில் இருக்கும் வர்த்தக உடன்படிக்கைகள் குறித்து சாத்தியக் கூற்று ஆய்வுகளை மேற்கொண்டு தொடர்ச்சியாக அவற்றை முன்னெடுத்துச் செல்வதற்கான நடவடிக்கைகளை எடுக்குமாறு குழு வலியுறுத்தியது.இந்தக் குழுக் கூட்டத்தில் கௌரவ பிரதியமைச்சர்களான சதுரங்க அபேசிங்க, எரங்க வீரரத்ன மற்றும் கௌரவ பாராளுமன்ற உறுப்பினர்களான அசோக சபுமல் ரண்வல, திலின சமரக்கோன், சம்பிக்க ஹெட்டிஆரச்சி, சதுர கலப்பதி உள்ளிட்டோர் கலந்துகொண்டனர்.
2026-11-13
வெளிநாட்டுப் பயங்கரவாதிப் போராளிகளைத் தடுத்தல் சட்டமூலத்திற்கு பொருளாதார அபிவிருத்தி மற்றும் சர்வதேச உறவுகள் பற்றிய துறைசார் மேற்பார்வைக் குழுவில் அங்கீகாரம் வழங்கப்பட்டது. சர்வதேச உறவுகள் பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் சட்டத்தரணி லக்மாலி ஹேமச்சந்திர அவர்களின் தலைமையில் அண்மையில் பாராளுமன்றத்தில் கூடியபோதே இச்சட்டமூலம் ஆராயப்பட்டு அங்கீகரிக்கப்பட்டது. வெளிநாட்டு பயங்கரவாதிப் போராளிகளால் எதிர்நோக்கப்படும் அச்சுறுத்தலைத் தடுத்தல் மற்றும் ஒடுக்குதல் தொடர்பான 2014ஆம் ஆண்டு செப்தெம்பர் மாதம் 24ஆம் திகதி ஏற்றுக்கொள்ளப்பட்ட ஐக்கிய நாடுகள் பாதுகாப்புப் பேரவைத் தீர்மானம் 2178 இற்கு பயன்கொடுப்பதற்கும், அத்துடன் அவற்றுடன் தொடர்புபட்ட அல்லது அவற்றின் இடைநேர்விளைவான கருமங்களுக்காக ஏற்பாடு செய்வதற்குமான சட்டமூலமாக இது சமர்ப்பிக்கப்பட்டுள்ளது.இச்சட்டமூலத்தை வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் கடந்த ஒக்டோபர் மாதம் 20ஆம் திகதி முதலாவது மதிப்பீட்டுக்காகப் பாராளுமன்றத்தில் சமர்ப்பித்திருந்தார்.இலங்கை பிரஜையொருவர் அல்லது இலங்கை பிரஜை அல்லாத வேறொரு நாட்டின் பிரஜை ஒருவர் இலங்கையில் சமுகமாயிருக்கையில், அல்லது இலங்கைக்கு வெளியே தவறிழைத்திருந்து அது அந்நாட்டின் சட்டத்தின் கீழ் தவறொன்றாக இருப்பின் இச்சட்டத்தின் கீழ் இலங்கையில் நடவடிக்கை எடுக்க முடியும். பயங்கரவாத செயல்களை மேற்கொள்ளல், திட்டமிடுதல், தயார்செய்தல் அல்லது அதில் பங்குபற்றுதல், பயங்கரவாத பயிற்சிகளை வழங்குதல் அல்லது பெறுதல் போன்றவை இச்சட்டத்தின் கீழ் தவறுகளாகக் குறிப்பிடப்பட்டிருப்பதாக அதிகாரிகள் குழுவில் விளக்கமளித்தனர்.புலம்பெயர்ந்து வாழும் இலங்கையர்களை இன ரீதியாக இலக்குவைத்து கொண்டுவரப்படும் சட்ட ஏற்பாடு இல்லையென்றும் அதிகாரிகள் குறிப்பிட்டனர். விரிவான கலந்துரையாடல்களைத் தொடர்ந்து குறித்த சட்டமூலத்திற்கு குழு அங்கீகாரம் வழங்கியது. குழுவின் உறுப்பினரான கௌரவ பாராளுமன்ற உறுப்பினர் சிவஞானம் சிறிதரன் இச்சட்டமூலத்திற்கு தனது எதிர்ப்பினைப் பதிவுசெய்தார்.இக்குழுக் கூட்டத்தில் கௌரவ பாராளுமன்ற உறுப்பினர்களான சுரங்க ரத்னாயக்க, திலின சமரக்கோன், விஜேசிறி பஸ்நாயக்க, சிவஞானம் சிறிதரன் உள்ளிட்டோரும், வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சு, பாதுகாப்பு அமைச்சு மற்றும் சட்டமா அதிபர் திணைக்களம், சட்டவரைஞர் திணைக்களம் ஆகியவற்றைப் பிரதிநிதித்துவப்படுத்தி அரசாங்க அதிகாரிகளும் கலந்துகொண்டனர்.
2026-11-13
ஆசிரியர் சேவையிலிருந்து அதிபர் சேவைக்கு நியமிக்கப்படும்போது ஏற்படும் சம்பள முரண்பாடுகள் தொடர்பில் கல்வி, தொழிற்படை மற்றும் மனித மூலதனம் பற்றிய துறைசார் மேற்பார்வைக் குழுவினால் நியமிக்கப்பட்ட உபகுழுவில் விரிவாக ஆராயப்பட்டது.குறித்த உபகுழு அதன் தலைவர் கௌரவ பாராளுமன்ற உறுப்பினர் சுனில் ராஜபக்ஷ அவர்களின் தலைமையில் அண்மையில் கூடியபோதே இது பற்றி ஆராயப்பட்டது.அதிபர் சேவையில் உள்ள தொழிற்சங்கங்களின் பிரதிநிதிகள், கல்வி உயர்கல்வி மற்றும் தொழிற்கல்வி அமைச்சு, நிதி, திட்டமிடல் மற்றும் பொருளாதார அமைச்சு ஆகியவற்றின் அதிகாரிகள், முகாமைத்துவ சேவைத் திணைக்களத்தின் அதிகாரிகள் உள்ளிட்ட பலரும் இதில் கலந்துகொண்டனர்.ஆசிரியர் சேவையில் 2014 ஒக்டோபர் 22ஆம் திகதி வெளியிடப்பட்ட இலங்கை அதிபர் சேவைப் பிரமாணக் குறிப்பின் பிரகாரம், ஆசிரியர் சேவையிலிருந்து அதிபர் சேவைக்கு இணைவது பதவி உயர்வாகக் கருதப்படாமல் “புதிய நியமனம்” எனக் கருதப்படுவதன் காரணமாக சம்பள முரண்பாடு ஏற்பட்டிருப்பதாக அதிபர் சேவையில் உள்ள தொழிற்சங்கங்களின் பிரதிநிதிகள் குழுவில் சுட்டிக்காட்டினர்.ஆசிரியர் சேவையின் முதலாம் தரத்திலிருந்து அதிபர் சேவையின் IIIஆம் தரத்திற்கு நியமிக்கப்படும்போது, சம்பள அதிகரிப்புகளுக்கு இடையிலான பாரிய வேறுபாடு காரணமாக இந்த நிலைமை மேலும் தீவிரமடைவதாக அவர்கள் குறிப்பிட்டார். அத்துடன், 03/2014 சுற்றறிக்கையின் மூலம் அதிபர் சேவைக்கு நியமிக்கப்படும்போது ஏற்படும் சம்பள வேறுபாட்டை ஈடுசெய்வதற்காக சரிசெய்தல் கொடுப்பனவு வழங்கப்பட்ட போதிலும், சேவைக்காலம் அதிகரிக்கும்போது ஆசிரியர் சேவையில் தொடர்ந்திருந்தால் கிடைக்கக்கூடிய உயர்ந்த சம்பள அதிகரிப்புகள் கிடைக்காத காரணத்தால் மீண்டும் சம்பள இடைவெளி ஏற்படுவதாகவும் தெரிவித்தனர்.இதன் காரணமாக ஆசிரியர் சேவையின் முதலாம் மற்றும் 2-Iஆம் தரங்களில் உள்ள சிரேஷ்ட மற்றும் அனுபவமிக்க ஆசிரியர்கள் அதிபர் பரீட்சைக்குத் தோற்றுவதற்கும் அதிபர் சேவையில் இணைவதற்கும் தயக்கம் காட்டும் நிலை ஏற்பட்டுள்ளதாகவும் இங்கு சுட்டிக்காட்டப்பட்டது.இது விடயம் தொடர்பில் குழுவிற்கு சமர்ப்பிக்கப்பட்ட விடயங்களை ஆராய்ந்து சம்பள ஆணைக்குழுவுக்கு உரிய பரிந்துரைகளை அனுப்பிவைக்க நடவடிக்கை எடுக்கப்படும் என உபகுழுவின் தலைவர் வலியுறுத்தினார்.அது மாத்திரமன்றி, அதிபர் சேவையில் உள்ளவர்கள் எதிர்கொள்ளும் ஏனைய பிரச்சினைகள் குறித்து கல்வி அமைச்சு மற்றும் முகாமைத்துவ சேவைத் திணைக்களத்துடன் கலந்துரையாடல்களை நடத்துவதற்கும் உபகுழு இங்கு தீர்மானித்தது. இந்தக் குழுக் கூட்டத்தில் கௌரவ பாராளுமன்ற உறுப்பினர்களான அபூபக்கர் ஆதம்பாவா, சுகத் வசந்த.த சில்வா மற்றும் சானக மாதுகொட ஆகியோரும் கலந்துகொண்டனர்.
பாராளுமன்றத்திற்கு வருகை தருதல்
பாராளுமன்றத்தின் கையேடு
இலங்கையில் தேர்தல் முறை
பாராளுமன்றம் எவ்வாறு செயல்படுகிறது
பாராளுமன்ற அலுவல்கள்
பதிப்புரிமை © இலங்கை பாராளுமன்றம்.
முழுப்பதிப்புரிமையுடையது.
வடிவமைத்து உருவாக்கியது TekGeeks
