2023-10-31
கணக்காய்வாளர் நாயகத்தின் கணக்காய்வில் புலப்பட்ட விடயத்துக்கு அமைய ஊழல் மோசடியில் ஈடுபட்ட சுகாதாரப் பணியாளர்களுக்கு எதிராக உடனடியாக நடவடிக்கை எடுக்கப்படாமை தொடர்பில் பாராளுமன்ற உறுப்பினர் மேஜர் கௌரவ பிரதீப் உந்துகொட தலைமையில் அண்மையில் (ஒக். 25) கூடிய அரசாங்கக் கணக்குகள் பற்றிய குழுவினால் (கோபா) நியமிக்கப்பட்ட உப குழுவில் கடும் விசனம் வெளியிடப்பட்டது.
இத்துறையில் ஊழல் முறைகேடுகள் மேலும் இடம்பெற்று வருவதால் இது சிலரை ஊக்குவிக்கும் வகையில் அமைந்துள்ளது என்றும், ஒரு சிலரின் செயற்பாடுகளால் ஒட்டுமொத்த தொழில் கௌரவம் பாதிக்கப்படுவதால், எதிர்காலத்தில் இதுபோன்ற செயல்கள் நடைபெறாமல் இருக்க கடுமையான தண்டனைகள் வழங்கப்பட வேண்டும் என்றும் உப குழு வலியுறுத்தியது.
2022 ஆம் ஆண்டு நடத்தப்பட்ட கணக்காய்வொன்றில் கொழும்பு தேசிய வைத்தியசாலையின் சத்திரசிகிச்சைக் கூடத்தின் மேற்கூரையில் சத்திரசிகிச்சைப் பொருட்களை மறைத்து வைத்திருந்த சம்பவத்துடன் தொடர்புபட்ட பணியாளர் ஒருவருக்கு எதிரான ஒழுக்காற்று நடவடிக்கை பற்றி குழு கவனத்தில் எடுத்தபோது இந்த விடயங்கள் கலந்துரையாடப்பட்டன.
இந்தச் சம்பவம் தொடர்பில் தேசிய வைத்தியசாலையினால் நியமிக்கப்பட்ட குழுவினால் விசாரணை நடத்தப்பட்டு வருவதாகவும், இதற்கு அமைய குற்றஞ்சாட்டப்பட்ட பணியாளுக்கு பணி இடைநிறுது்தம் வழங்கப்பட்டிருப்பதாகவும் அதிகாரிகள் தெரிவித்தனர். எனினும், இதனுடன் சம்பந்தப்பட்ட ஏனைய பணியாளர் ஒருவரை பணியிடைநிறுத்தம் செய்வது காலதாமதம் அடைவது, இச்சம்பவம் இடம்பெற்ற உடன் இருப்புக்களுக்கான புத்தகத்தை கட்டுப்பாட்டுக்குள் கொண்டுவர உரிய நடவடிக்கை எடுக்கப்படாமை என்பன பிரச்சினைக்குரிய விடயங்கள் என கணக்காய்வாளர் திணைக்களத்தின் அதிகாரிகள் சுட்டிக்காட்டினர். இந்த நிலைமையின் காரணமாக விசாரணையின் போது அல்லது நீதிமன்றத்தின் போது அவர்கள் குற்றமற்றவர்களாக மாறுவதற்கான வாய்ப்புக்கள் அதிகமாக இருப்பதாகவும், ஊழல் மற்றும் முறைகேடுகளை தடுக்க இது தடையாக இருப்பதாகவும் கணக்காய்வாளர் திணைக்கள அதிகாரிகள் மேலும் தெரிவித்தனர்.
இந்தப் பணியாளர் 10 ஆண்டுகளாக இதுபோன்ற மோசடிகளை செய்துள்ளார் என்பதும் தெரியவந்ததுடன், நிர்வாகத்தில் காணப்படும் பலவீனமே இதுபோன்ற மோசடிகள் தொடர்ந்தும் இடம்பெறுவதற்கு காரணமாக அமைந்தன என்றும் சுட்டிக்காட்டப்பட்டது. வைத்தியசாலைகளில் உபகரணங்கள் மற்றும் பொருட்களை வழங்குவதற்கு முறையான கண்காணிப்பு அமைப்பு (Cross check) செயற்படாததன் காரணமாகவே இவ்வாறான நீண்டகால மோசடிகள் இடம்பெற்றுள்ளதாக சுட்டிக்காட்டிய உப குழு, முறையான முகாமைத்துவ முறைமையை உடனடியாக நடைமுறைப்படுத்த வேண்டும் எனவும் அறிவுறுத்தியது. எதிர்காலத்தில் இதுபோன்ற மோசடிகள் மற்ற மருத்துவமனைகளில் நடக்காமல் தடுக்க வேண்டும் என்றும் குழு அறிவுறுத்தியது.
இது தொடர்பில் குற்றஞ்சாட்டப்பட்டுள்ள உயர் மட்ட தாதியர்கள் குறித்தும் ஒழுக்காற்ற நடவடிக்கைகளை ஆரம்பிப்பதற்கு அரசாங்க சேவைகள் ஆணைக்குழுவுக்கு அனுப்பிவைக்கப்பட்டிருப்பதாகவும் அதிகாரிகள் தெரிவித்தனர். இதனை விரைவில் முன்னெடுப்பது குறித்தும் குழு வலியுறுத்தியது.
இதற்கு அமைய சுகாதார அமைச்சின் செயலாளர் தலைமையில் குழுவொன்றை அமைத்து இந்த மோசடி தொடர்பில் முழுமையான அறிக்கையொன்றை இரண்டு மாதங்களுக்குள் சமர்ப்பிக்குமாறும் உபகுழு பணிப்புரை வழங்கியது.
இந்த கோபா உபகுழு சுகாதார அமைச்சின் செயலாளர், சுகாதாரப் பணிப்பாளர் நாயகம் உள்ளிட்ட உயர்மட்ட அதிகாரிகளை குழு முன்னிலையில் அழைத்திருந்ததுடன், 2019/2020/2021 ஆம் ஆண்டுகளுக்கான வைத்தியசாலை முகாமைத்துவம் குறித்த கணக்காய்வு விசாரணை குறித்து ஆராய்ந்திருந்தது.
சுகாதார அமைச்சின் கணக்குகள் தொடர்பான கணினி அமைப்பில் பெருமளவிலான காணாமற்போன சொத்துக்கள் இருப்பது குறித்தும் கலந்துரையாடப்பட்டது. இதற்கு முன்னரும் இது தொடர்பான கணக்காய்வு விசாரணையில் பரிந்துரைகள் இருந்ததால், கணக்கியல் அமைப்பில் நிதி அல்லாத சொத்துக்களை துல்லியமாக புதுப்பிக்க வேண்டியதன் அவசியம் வலியுறுத்தப்பட்டது. அதன்படி, டிசம்பர் 25ஆம் திகதிக்கு முன்னர் இது தொடர்பான முன்னேற்றம் குறித்து குழுவிடம் தெரிவிக்க உத்தரவிடப்பட்டது.
குருநாகல், அனுராதபுரம் போன்ற வைத்தியசாலைகளில் சிற்றுண்டிச்சாலைகளை குத்தகைக்கு விடுவது, மாத்தறை பொது வைத்தியசாலையின் துப்புரவு சேவையைப் பெற்றுக் கொள்வது, வைத்தியசாலை மருத்துவக் கழிவுகளை அகற்றுவது போன்றவற்றில் காணப்படும் பிரச்சினைகள் மற்றும் முறைகேடுகள் குறித்தும் இங்கு கலந்துரையாடப்பட்டது.
இந்தக் குழுக் கூட்டத்தில் இராஜாங்க அமைச்சர் கௌரவ பிரசன்ன ரணவீர மற்றும் பாராளுமன்ற உறுப்பினர் கௌரவ மஞ்சுளா திஸாநாயக்க ஆகியோர் கலந்துகொண்டனர்.
2026-11-06
இளைஞர் சமூகத்தையும் பாராளுமன்றத்தையும் இணைத்து எதிர்காலத்தில் எவ்வாறு செயற்படுவது என்பது தொடர்பில் இளைஞர்களுக்கான பாராளுமன்ற ஒன்றியத்தில் கலந்துரையாடப்பட்டது.இளைஞர்களுக்கான பாராளுமன்ற ஒன்றியம் அதன் தலைவர், கௌரவ பிரதி அமைச்சர் எரங்க குணசேகர அவர்களின் தலைமையில் அண்மையில் பாராளுமன்றத்தில் கூடியபோதே இது தொடர்பில் கருத்துப் பரிமாற்றங்கள் இடம்பெற்றன.கௌரவ பாராளுமன்ற உறுப்பினர் ஒஷானி உமங்கா அவர்களால் தயாரிக்கப்பட்ட இளைஞர் தொழில்முயற்சியாண்மை மற்றும் கைத்தொழில் அபிவிருத்தி தொடர்பான முன்மொழிவு, கௌரவ பாராளுமன்ற உறுப்பினர் சட்டத்தரணி ஹிருணி விஜேசிங்க அவர்களால் தயாரிக்கப்பட்ட உள்ளூராட்சி நிறுவனங்களில் இளைஞர்களை வலுவூட்டுவது தொடர்பான முன்மொழிவு மற்றும் கௌரவ பாராளுமன்ற உறுப்பினர் அம்பிகா சாமிவேல் அவர்களால் தயாரிக்கப்பட்ட பெருந்தோட்ட மற்றும் பயிர்ச்செய்கைத் துறையில் ஈடுபட்டுள்ள இளைஞர்களுக்கான கொள்கைக் கட்டமைப்பு தொடர்பான முன்மொழிவு குறித்தும் இதன்போது கருத்துக்கள் முன்வைக்கப்பட்டன.அத்துடன், வெளிப்புற இளைஞர் பங்கேற்புத் திட்டம் மற்றும் முன்னோடி செயலமரம்வு தொடர்பில் ஒன்றியத்தின் பிரதி இணைத்தலைவர்களான கௌரவ பாராளுமன்ற உறுப்பினர்கள் லசித் பாஷண கமகே, தனுர திஸாநாயக்க மற்றும் சட்டத்தரணி பாக்ய ஸ்ரீ ஹேரத் ஆகியோரால் தயாரிக்கப்பட்ட முன்மொழிவுகள் குறித்தும் விரிவாகக் கருத்துப் பரிமாற்றம் இடம்பெற்றது.இளைஞர் சமூகத்திற்காக நடைமுறைப்படுத்தக்கூடிய இந்த முன்மொழிவுகள் தொடர்பில் மேலும் ஆய்வு செய்து, அவற்றை இறுதி வடிவத்தில் தயாரிப்பதற்கும் இதன்போது தீர்மானிக்கப்பட்டது.இந்நிகழ்வில் ஒன்றியத்தின் உறுப்பினர்களான கௌரவ பாராளுமன்ற உறுப்பினர்கள் உள்ளிட்ட பலர் கலந்துகொண்டனர்.
2026-11-05
பாராளுமன்றத்தில் இன்றையதினம் (நவ. 05) இரண்டாவது மதிப்பீடுக்கு உள்ளாக்கப்படும் நம்பிக்கைப் பொறுப்புகள் (திருத்தச்) சட்டமூலத்திற்கு ஆளுகை, நீதி மற்றும் சிவில் பாதுகாப்பு பற்றிய துறைசார் மேற்பார்வைக் குழுவில் அங்கீகாரம் வழங்கப்பட்டது.ஆளுகை, நீதி மற்றும் சிவில் பாதுகாப்பு பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் வைத்தியர் நஜித் இந்திக்க அவர்களின் தலைமையில் நேற்று (04) கூடியபோதே இச்சட்டமூலம் குறித்து கலந்துரையாடப்பட்டு அங்கீகாரம் வழங்கப்பட்டது.(87வது அத்தியாயமான) நம்பிக்கைப் பொறுப்புக்கள் கட்டளைச் சட்டத்தைத் திருத்துவதற்கான இச்சட்டமூலத்தை நீதி மற்றும் தேசிய ஒருமைப்பாட்டு கௌரவ அமைச்சர் சட்டத்தரணி ஹர்ஷண நாணயக்கார அவர்கள் 2026 ஒக்டோபர் 21ஆம் திகதி முதலாவது மதிப்பீடுக்காக பாராளுமன்றத்தில் சமர்ப்பித்திருந்தார்.குறித்த சட்டமூலத்தினால் ஏற்படும் மாற்றங்கள் குறித்து சட்டவரைஞர் திணைக்களம் மற்றும் நீதி அமைச்சின் அதிகாரிகள் குழுவுக்கு எடுத்துக் கூறினர்.இக்குழுக் கூட்டத்தில் கௌரவ பாராளுமன்ற உறுப்பினர்களான அஜித்.பி பெரேரா, ஜனாதிபதி பைஸர் முஸ்தபா, மேஜர் ஜெனரல் (ஓய்வு) ஜீ.டி.சூரியபண்டார மற்றும் தர்மப்பிரிய விஜேசிங்ஹ உள்ளிட்டோர் கலந்துகொண்டனர்.
2026-11-04
இலங்கையில் பெண்களிடையே அதிகளவில் பதிவாகும் மார்பகப் புற்றுநோயை ஆரம்பத்திலேயே கண்டறிதல் மற்றும் அது தொடர்பில் பொதுமக்களைத் தெளிவுபடுத்தும் நோக்கில், பெண் பாராளுமன்ற உறுப்பினர்களின் ஒன்றியம் மற்றும் சுகாதார அமைச்சு ஆகியன இணைந்து நவம்பர் மாதம் 02ஆம் திகதி நாடளாவிய ரீதியில் முன்னெடுக்கப்பட்ட விசேட தேசிய வேலைத்திட்டம் வெற்றிகரமாக நிறைவு பெற்றது.பெண் பாராளுமன்ற உறுப்பினர்களின் ஒன்றியத்தைப் பிரதிநிதித்துவப்படுத்தும் உறுப்பினர்களின் மாவட்டங்களை உள்ளடக்கும் வகையில், நாடளாவிய ரீதியில் உள்ள பல சுகாதார மருத்துவ அதிகாரி அலுவலகங்களில் ஏற்பாடு செய்யப்பட்டிருந்த விழிப்புணர்வு மற்றும் மருத்துவப் பரிசோதனை நிகழ்நிகழ்ச்சிகளில், பெண் பாராளுமன்ற உறுப்பினர்களின் ஒன்றியயத்தின் தலைவர், கௌரவ அமைச்சர் சரோஜா சாவித்திரி போல்ராஜ் உள்ளிட்ட பாராளுமன்ற உறுப்பினர்கள் பலரும் கலந்துகொண்டனர்.இலங்கையில் நாளொன்றுக்கு 17 பெண்களுக்கு மார்பகப் புற்றுநோய் இருப்பது கண்டறியப்படுவதுடன், ஆண்டுதோறும் சுமார் 6,000 புதிய மார்பகப் புற்றுநோயாளர்கள் பதிவாகின்றனர். மேலும், வருடாந்தம் 1,000 இற்கும் அதிகமானோர் இந்நோயினால் உயிரிழப்பதுடன், இது நாளொன்றுக்கு சுமார் மூன்று உயிரிழப்புகளுக்குச் சமமாகும். மார்பகப் புற்றுநோயை ஆரம்பக் கட்டத்திலேயே கண்டறிந்தால் அதனை முழுமையாகக் குணப்படுத்த முடியும். அச்சம், வெட்கம் மற்றும் போதிய விழிப்புணர்வின்மை காரணமாக சிகிச்சைகளைப் பெற்றுக்கொள்வதில் ஏற்படும் தாமதம் இங்கு முக்கிய பிரச்சினையாக அடையாளம் காணப்பட்டுள்ளது.ஒவ்வொரு பெண்ணும் தமது மார்பகங்களின் இயல்பான தன்மையைப் பற்றி அறிந்திருப்பதுடன், வழக்கமாக சுய பரிசோதனைகளையும் மேற்கொள்வது அவசியமாகும். ஏதேனும் அசாதாரண மாற்றங்களைக் கண்டறிந்தால், தாமதமின்றி மருத்துவ ஆலோசனையைப் பெற்றுக்கொள்வது மிகவும் முக்கியமாகும். நோயை ஆரம்பத்திலேயே கண்டறிவதன் மூலம் வெற்றிகரமான சிகிச்சையைப் பெற்றுக்கொள்வதற்கான வாய்ப்புகள் அதிகரிக்கின்றன. அரசாங்க சுகாதார நிறுவனங்களின் ஊடாக இலவச மருத்துவப் பரிசோதனைகள் மற்றும் ஏனைய அத்தியாவசிய சுகாதார சேவைகளும் வழங்கப்படுகின்றன.அத்துடன், ஒவ்வொரு பெண்ணும் சுவனாரீ (Well Woman) சிகிச்சை நிலையங்களில் கலந்துகொண்டு, கருப்பை வாய்ப் புற்றுநோயைத் தடுப்பதற்காக, புற்றுநோய்க்கு முந்தைய மாற்றங்களை ஆரம்பத்திலேயே கண்டறிய உதவும் பரிந்துரைக்கப்பட்ட பாப் பரிசோதனையை, தனது 35 மற்றும் 45 வயதுகளில் மேற்கொள்வதும் அவசியமாகும்.
2026-11-03
திருத்தியமைக்கப்பட்ட தேசிய பாடத்திட்டக் கட்டமைப்பு மற்றும் புதிய கல்வி மறுசீரமைப்புச் செயன்முறை தொடர்பில் பாராளுமன்ற உறுப்பினர்களைத் தெளிவூட்டும் வகையில் ஏற்பாடு செய்யப்பட்ட கல்வி, உயர் கல்வி மற்றும் தொழிற் கல்வி அலுவல்கள் பற்றிய அமைச்சுசார் ஆலோசனைக் குழுவின் கூட்டம் கௌரவ பிரதமரும் கல்வி, உயர் கல்வி மற்றும் தொழிற் கல்வி அமைச்சருமான கலாநிதி ஹரிணி அமரசூரிய தலைமையில் அண்மையில் பாராளுமன்றத்தில் நடைபெற்றது.இதில் அமைச்சர்கள், பிரதி அமைச்சர்கள், பாராளுமன்ற உறுப்பினர்கள், கல்வி அமைச்சின் செயலாளர் உள்ளிட்ட அதிகாரிகள் மற்றும் தேசிய கல்வி நிறுவகம் (NIE) உள்ளிட்ட கல்வித்துறையைச் சேர்ந்த பல நிபுணர்கள் கலந்துகொண்டனர்.அமைச்சரவைத் தீர்மானத்திற்கு அமைய, 2026 ஏப்ரல் மாதமளவில் கல்வி மறுசீரமைப்புத் தொடர்பில் பாடத்துறை நிபுணர்களைக் கொண்ட தேசியக் குழுவொன்று நியமிக்கப்பட்டதாகவும், அதன் கீழ் அமைக்கப்பட்டுள்ள ஐந்து பிரதான உபகுழுக்கள் ஊடாக இதற்கான ஆலோசனைகளும் வழிகாட்டல்களும் வழங்கப்படுவதாகவும் கல்வி, உயர்கல்வி மற்றும் தொழிற்கல்வி அமைச்சின் செயலாளர் நாலக களுவெவ தெரிவித்தார்.அமைச்சரவைத் தீர்மானத்திற்கு அமைய, 2026 ஆம் ஆண்டில் தரம் 1 இற்கும், 2027 ஆம் ஆண்டில் தரம் 6 மற்றும் தரம் 2 இற்கும் புதிய கல்விச் சீர்திருத்தங்களை நடைமுறைப்படுத்தத் திட்டமிடப்பட்டுள்ளதாகவும் அவர் குறிப்பிட்டார். இதற்குத் தேவையான ஆசிரியர் பயிற்சித் திட்டங்கள், கற்றல் தொகுதிகள் மற்றும் ஆசிரியர் வழிகாட்டி நூல்களை அச்சிடுதல், பாடசாலைகளில் டிஜிட்டல் உட்கட்டமைப்பு வசதிகளை மேம்படுத்துதல் உள்ளிட்ட திட்டங்களும் தற்போது நடைமுறைப்படுத்தப்பட்டு வருகின்றன.இதன்போது, தேசிய கல்வி நிறுவகத்தின் பணிப்பாளர் நாயகம் பேராசிரியர் ஓ.ஜி. தயாரத்ன மற்றும் கல்வித்துறை அதிகாரிகளினால் புதிய கல்வி மறுசீரமைப்புக்களின் அடிப்படை, தேசிய பாடத்திட்டக் கட்டமைப்பு, மதிப்பீட்டு முறைமைகள் மற்றும் எதிர்காலச் செயற்திட்டம் தொடர்பில் விரிவான விளக்கமளிக்கப்பட்டது.2019 ஆம் ஆண்டில் இந்தச் செயன்முறை ஆரம்பிக்கப்பட்டதாகவும், தேசிய கல்வி ஆணைக்குழுவினால் 2023 ஆம் ஆண்டில் அங்கீகரிக்கப்பட்ட புதிய கொள்கைக்கு அமைய தேசிய கல்வி நிறுவகத்தினால் தேசிய பாடத்திட்டக் கட்டமைப்பு தயாரிக்கப்பட்டதாகவும், இது பல நிறுவனங்களின் கூட்டான முயற்சியாகும் என்றும் அவர் குறிப்பிட்டார். உலகின் மிகவும் முன்னேறிய நாடுகளில் நடைமுறைப்படுத்தப்படும் கல்விச் சீர்திருத்தங்களுக்கு இணையான சீர்திருத்தங்கள் இதன் மூலம் எமது நாட்டில் அறிமுகப்படுத்தப்படுவதாகவும் பணிப்பாளர் நாயகம் தெரிவித்தார்.பொதுக் கல்வியின் அடிப்படை நோக்கம் சந்தைக்குத் தேவையான எதிர்காலத் தொழிலாளர்களை உருவாக்குவது மாத்திரமல்ல என்றும், ஒழுக்கம், நற்பண்புகள் மற்றும் விழுமியங்கள் நிறைந்த முழுமையான ஆளுமையைக் கொண்ட பிரஜைகளையும், நாட்டைக் கட்டியெழுப்பும் எதிர்காலச் சந்ததியினரையும் உருவாக்குவதே அதன் நோக்கம் என்றும் தேசிய கல்வி நிறுவகத்தின் பணிப்பாளர் நாயகம் வலியுறுத்தினார்.தற்போது நடைமுறையிலுள்ள பாட உள்ளடக்கத்தை அடிப்படையாகக் கொண்ட (Content-based) கல்வி முறைக்குப் பதிலாக, கற்றல் பெறுபேறுகளை அடிப்படையாகக் கொண்ட (Outcome-based) மற்றும் மாணவர் மையக் கல்வி முறைமை அறிமுகப்படுத்தப்படவுள்ளது. மனப்பாடம் செய்து பரீட்சைகளுக்குத் தோற்றும் அழுத்தத்தையும், பரீட்சையை மையமாகக் கொண்ட கல்விச் சுமையையும் குறைக்கும் வகையில், கற்றல் அலகுகளுக்கான புள்ளி (Credit) அடிப்படையிலான முறைமையும், ஆண்டு முழுவதும் முன்னெடுக்கப்படும் தொடர்ச்சியான மதிப்பீடுகள் (Continuous Assessments) மூலம் மாணவர்களின் முன்னேற்றத்தை மதிப்பிடுவதற்கான புதிய மதிப்பீட்டுக் கட்டமைப்பும் தயாரிக்கப்பட்டுள்ளதாகவும் அவர் தெரிவித்தார்.தரம் 6 முதல் தொழில் துறைகள் தொடர்பான புரிதலை மாணவர்களுக்கு வழங்குவதற்கும், தரம் 12 மற்றும் 13 இல் NVQ Level 4 வரையிலான தொழில் தகைமைகளைப் பெற்றுக்கொள்வதற்கும் அல்லது உயர்கல்விக்குச் செல்வதற்கும் வாய்ப்பளிக்கும் வகையில் நெகிழ்வான மாற்றுக் கல்விப் பாதைகள் தயாரிக்கப்பட்டுள்ளன.கல்வி மறுசீரமைப்புத் தொடர்பில் பொதுமக்கள், ஆசிரியர்கள் மற்றும் பெற்றோர்களுக்கு அறிவூட்டும் நோக்கில் 'RIES' இணையத்தளம் ஆரம்பிக்கப்பட்டுள்ளதுடன், பல கட்டங்களாக நாடளாவிய ரீதியில் விழிப்புணர்வுத் திட்டமும் நடைமுறைப்படுத்தப்பட்டு வருகின்றது.கல்வியின் அடிப்படை நோக்கம் பிள்ளைகளை எதிர்காலத் தொழிலாளர்களாக உருவாக்குவது மாத்திரமல்ல என்றும், அவர்களை முழுமையான மனிதர்களாகவும் பொறுப்புமிக்க நாட்டைக் கட்டியெழுப்புபவர்களாகவும் உருவாக்குவதாக இருக்க வேண்டும் என்றும் இதன்போது கருத்துத் தெரிவித்த கௌரவ பிரதமர் வலியுறுத்தினார்.சீர்திருத்தங்களை நடைமுறைப்படுத்தும்போது எழுகின்ற பிரச்சினைகள் தொடர்பில் தனிப்பட்ட மனப்பாங்குகள் அல்லது கருத்துக்களின் அடிப்படையில் மாத்திரம் தீர்மானங்களை எடுக்காமல், விஞ்ஞானபூர்வமான ஆய்வு ஆதாரங்களை (Evidence) ஆராய்ந்து தீர்மானங்களை எடுக்க வேண்டும் என்றும் அவர் சுட்டிக்காட்டினார்.கலந்துரையாடலில் பங்கேற்ற கௌரவ பாராளுமன்ற உறுப்பினர்கள், கல்வி மறுசீரமைப்புத் தொடர்பில் பல்வேறு கேள்விகளை எழுப்பியதுடன், தமது கருத்துக்களையும் முன்மொழிவுகளையும் முன்வைத்தனர்.இந்தத் தேசியப் பணியை வெற்றிகரமாக முன்னெடுப்பதற்கு எவ்வித வேறுபாடுகளுமின்றி அனைவரினதும் ஒத்துழைப்பை எதிர்பார்ப்பதாகவும் இதன்போது வலியுறுத்தப்பட்டது.கௌரவ கல்வி மற்றும் உயர்கல்விப் பிரதி அமைச்சர் வைத்தியர் மதுர செனவிரத்ன, தொழிற்கல்விப் பிரதி அமைச்சர் கௌரவ நளின் ஹேவகே, பாராளுமன்றத்தின் செயலாளர் நாயகம் குஷானி ரோஹணதீர, சட்டவாக்க சேவைகள் பணிப்பாளர் ஜயலத் பெரேரா உள்ளிட்ட பலரும் இக்குழுக் கூட்டத்தில் கலந்துகொண்டனர்.
பாராளுமன்றத்திற்கு வருகை தருதல்
பாராளுமன்றத்தின் கையேடு
இலங்கையில் தேர்தல் முறை
பாராளுமன்றம் எவ்வாறு செயல்படுகிறது
பாராளுமன்ற அலுவல்கள்
பதிப்புரிமை © இலங்கை பாராளுமன்றம்.
முழுப்பதிப்புரிமையுடையது.
வடிவமைத்து உருவாக்கியது TekGeeks
