பார்க்க

01

E   |   සි   |  

2023-09-21

செய்தி வகைகள் : குழு செய்திகள் 

நாட்டில் குறிப்பிட்ட வரிக் கொள்கை நடைமுறைப்படுத்தப் படாமையால் முதலீட்டாளர்களும், கைத்தொழிலாளர்கள் மனச்சோர்வடைந்துள்ளனர் – அரசாங்க நிதி பற்றிய குழு

  • மூன்று வர்த்தமானி அறிவித்தல்கள் குறித்து அரசாங்க நிதி பற்றிய குழுவில் கலந்துரையாடல்
  • பரிந்துரைகளை நடைமுறைப்படுத்தாத நிறுவனங்கள் மற்றும் தரப்புக்களைக் குழுவின் முன் மீண்டும் அழைப்பதற்கு முடிவு


இலங்கையில் குறிப்பிட்ட நிரந்தர வரிக் கொள்கை இல்லாமை முதலீட்டாளர்கள் மற்றும் கைத்தொழிலாளர்களுக்கு மனச்சோர்வை ஏற்படுத்துவதாக அரசாங்க நிதி பற்றிய குழுவின் தலைவர் (கலாநிதி) கௌரவ ஹர்ஷத  சில்வா தெரிவித்தார்.

19.09.2023 அன்று நடைபெற்ற அரசாங்க நிதி பற்றிய குழுவில் வர்த்தமானி அறிவித்தல்களில் பிரசுரிக்கப்பட்ட மூன்று கட்டளைகள் ஆராயப்பட்டபோதே குழுவின் தலைவர் இதனைத் தெரிவித்தார்.

1962 ஆம் ஆண்டின் 19 ஆம் இலக்க அரசிறைப் பாதுகாப்புச் சட்டத்தின் கீழ் வெளியிடப்பட்ட  2336/72 ஆம் இலக்க வர்த்தமானியில் பிரசுரிக்கப்பட்ட கட்டளை குறித்து இங்கு கவனம் செலுத்தப்பட்டது. சவர்க்கார உற்பத்திக்காக இந்நாட்டுக்கு ‘சோப் நூடில்ஸ்’ இறக்குமதி செய்யப்படுவதாகவும், மேலும் ஒரு சில நிறுவனங்களே பாம் எண்ணெயின் கொழும்பு அமிலங்கள் இறக்குமதி செய்யப்பட்டு சோப் நூடில்ஸ் உற்பத்தி செய்து வருவதும் இங்கு தெரியவந்தது.

இருந்தபோதும் இந்நாட்டுக்கு பாம் ஒயில் அமில இறக்குமதியின்போது 24% புதிய சுங்க வரி அறவிடப்படுவதால் ஒரு சில சவர்க்கார உற்பத்தி நிறுவனங்கள் மாத்திரம் பாம் எண்ணெய் அமிலத்துக்குப் பதிலாக தற்பொழுது குறைந்த வரிப் பெறுமானத்தைக் கொண்ட பாமிடிக் அல்லது லொரிக் ஆகிய அமிலங்களை மாற்றாக இறக்குமதி செய்து சோப் நூடில்ஸ் உற்பத்தி செய்வதாக அதிகாரிகள் தெரிவித்தனர். இவ்வாறான நிலையில் கைத்தொழில் அமைச்சின் பரிந்துரைக்கு அமைய சந்தையில் விலை சமநிலையைப் பேணுவதற்கு, அரசாங்கத்தின் வரி வருமானம் இழக்கப்படுவதைத் தடுப்பதற்கும் இந்த மாற்று அமிலங்களுக்கு 29% புதிய வரி இந்தக் கட்டளையின் மூலம் முன்னெடுக்கப்படவுள்ளது. இந்த அமில வகைகள் இரப்பர் தொழில்துறைக்குப் பயன்படுத்தப்படுவதாகவும், சவர்க்கார உற்பத்திக்குப் பயன்படுத்தப்படும் அமிலங்களுக்கு தனியான HS குறியீடுகள் உருவாக்கப்பட்டிருப்பதாகவும் சுட்டிக்காட்டப்பட்டது.

ஒரிரு நிறுவனங்களை இலக்கு வைத்து அவர்கள் தொழில்நுட்பத்தின் மீது முதலீடு செய்திருக்கும் சூழ்நிலையில் இவ்வாறு வரி அறிவீடு செய்வது எந்தளவுக்கு நியாயமானது என்றும் குழு சுட்டிக்காட்டியது. இந்தத் தொழில்துறையின் தொழில்நுட்ப வினைத்திறனுக்கு வரி அறவிடுவது தொடர்பில் இங்கு நீண்டநேரம் கலந்துரையாடப்பட்டது. இந்நாட்டில் குறிப்பிட்ட நிரந்தர வரிக் கொள்கையை நடைமுறைப்படுத்த வேண்டியதன் அவசியம் இங்கு வலியுறுத்தப்பட்டது. எனவே, இந்தப் புதிய வரி விதிப்பின் அடிப்படை மற்றும் குறிப்பிட்ட நோக்கங்கள், அவற்றினால் ஏற்படக்கூடிய தாக்கங்கள் குறித்து எதிர்வரும் 22ம் திகதிக்குள் அறிக்கை அளிக்குமாறும் அரசாங்க நிதி பற்றிய குழு, நிதி மற்றும் கைத்தொழில் அமைச்சின் அதிகாரிகளுக்குப் பணிப்புரை விடுத்தது.

1962 ஆம் ஆண்டின் 19 ஆம் இலக்க அரசிறைப் பாதுகாப்புச் சட்டத்தின் கீழ் வெளியிடப்பட்ட  2341/64 ஆம் இலக்க வர்த்தமானியில் பிரசுரிக்கப்பட்ட கட்டளை குறித்து இங்கு கலந்துரையாடப்பட்டது. 2021ஆம் ஆண்டு இலங்கையில் அச்சுத் தொழிலுக்கான மை உற்பத்திக்கு பயன்படுத்தப்படும் மூலப்பொருட்களுக்கு 15% சுங்க வரி விதிக்கப்பட்டதன் காரணமாக, இலங்கையில் மை இறக்குமதி செய்யும் செலவை விட உற்பத்திச் செலவு அதிகரித்துள்ளதாக அதிகாரிகள் தெரிவித்தனர். அந்த நிலையில் போட்டிக்கு ஏற்ற விலையை தக்கவைக்க முடியாது என்ற உண்மையை அதிகாரிகள் சுட்டிக்காட்டினர். அதன்படி, உள்ளூரில் அச்சுக்கான மை தயாரிப்பாளர்களைப் பாதுகாக்கும் வகையில் இந்த வரியை 5% ஆக குறைத்து இக்கட்டளை பிறப்பிக்கப்பட்டிருப்பதாகக் குறிப்பிடப்பட்டது. இதனால் அரசு இழக்கும் வரி எவ்வளவு எனக் குழு கேள்வியெழுப்பியது. அதன்படி, 1.5% வருமானம் அதாவது ரூ. 4.5 லட்சம் வருவாய் இழப்பு ஏற்படும் என அதிகாரிகள் தெரிவித்தனர். வரித் தொகையில் இவ்வளவு சிறிய மாற்றத்திற்காக வரிக் கொள்கையின் ஸ்திரத்தன்மையை மாற்றுவது எவ்வளவு நியாயம் என்று குழு கேள்வி எழுப்பியுள்ளது. எனினும் அதற்கான அனுமதி வழங்கப்பட்டது.

உற்பத்தி மூலப்பொருட்களுக்கு சுங்க வரியில் இருந்து விலக்கு அளிக்கக் கடந்த வரவுசெலவுத்திட்ட தீர்மானத்தின் அடிப்படையில் செயற்படுவதாக நிதி அமைச்சின் அதிகாரிகள் தெரிவித்தனர். கைத்தொழில் அமைச்சின் பரிந்துரைகளுக்கு அமைவாக உள்ளுர் கைத்தொழில்துறையினரை நல்லெண்ண அடிப்படையில் பாதுகாக்கும் வகையில் இவ்வாறான நடவடிக்கைகள் மேற்கொள்ளப்பட்டாலும் சில சமயங்களில் ஒரு சில வர்த்தகர்களே பெரும் இலாபம் ஈட்டுவதால் நுகர்வோருக்கு நன்மைகள் கிடைப்பதில்லை எனவும் குழு சுட்டிக்காட்டியுள்ளது.

சுங்க கட்டளைச் சட்டத்தின் 107(அ) பிரிவின் கீழ் வெளியிடப்பட்ட 2329/46 ஆம் இலக்க வர்த்தமானி அறிவித்தலில் பிரசுரிக்கப்பட்டுள்ள ஒழுங்குவிதிகள் குறித்தும் கவனம் செலுத்தப்பட்டன. வெளிநாட்டிலுள்ள தொழிலாளர்கள் சட்டரீதியான வழிகளின் மூலம் பணம் அனுப்புவதை ஊக்குவிப்பதற்காக, அவர்கள் நாடு திரும்பியவுடன் விமான நிலையத்தில் உள்ள வரியில்லா வணிக வளாகத்தில் வாங்கப்பட்ட பொருட்களுக்கு அவர்கள் அனுப்பிய அந்நியச் செலாவணியின் தொகையின் அடிப்படையில் மேலதிக தீர்வையற்ற கொடுப்பனவு வழங்கப்படவுள்ளது. தொழில் மற்றும் வெளிநாட்டு வேலைவாய்ப்பு அமைச்சின் பரிந்துரையின் பெயரில் இந்தத் தீர்மானம் எடுக்கப்பட்டுள்ளதுடன், கைத்தொலைபேசி செயலியும் பயன்படுத்தப்படும் என அமைச்சின் அதிகாரிகள் தெரிவித்தனர்.

இங்கு, இதன் நோக்கம் நல்லதாக இருந்தாலும், குறைந்த வருமானம் உள்ள நபருடன் ஒப்பிடும்போது, அதிக வருமானம் உள்ள ஒருவருக்கு வரிச் சலுகையில் பெரிய வித்தியாசம் இருப்பதாக குழுவின் தலைவர் சுட்டிக்காட்டினார். எனவே, இவ்விடயத்தை மீள்பரிசீலனை செய்யுமாறு குழு அறிவுறுத்தியது.
அரசாங்க நிதி பற்றிய  குழுவினால் வழங்கப்பட்ட பரிந்துரைகளை நடைமுறைப்படுத்துவதற்கான முன்னேற்றம் குறித்து பின்தொடர்வதன் அவசியம் குறித்தும் இங்கு கலந்துரையாடப்பட்டது. அதன்படி, உரிய காலக்கெடுவில் வழங்கப்பட்ட பரிந்துரைகளை நடைமுறைப்படுத்தாத நிறுவனங்கள் மற்றும் தரப்பினரைக் குழுவின் முன் அழைக்கவும் முடிவு செய்யப்பட்டது.

இக்கூட்டத்தில் பாராளுமன்ற உறுப்பினர்களான கௌரவ பாட்டலி சம்பிக்க ரணவக்க, கௌரவ சந்திம வீரக்கொடி, கௌரவ நாலக கொடஹேவா, கௌரவ நிமல் லான்சா, கௌரவ (மேஜர்) பிரதீப் உந்துகொட, கௌரவ மதுர விதானகே மற்றும் கௌரவ பேராசிரியர் ரஞ்சித் பண்டார ஆகியோர் கலந்துகொண்டனர். மேலும், நிதி அமைச்சு, கைத்தொழில் அமைச்சு மற்றும் தொழில் மற்றும் வெளிநாட்டு வேலைவாய்ப்பு அமைச்சு ஆகியவற்றின் பிரதிநிதிகளும் இதில் பங்கேற்றனர்.

 

12

34



தொடர்புடைய செய்திகள்

2026-11-14

ஸ்ரீலங்கன் விமான சேவையை இலாபமீட்டும் நிலைக்குக் கொண்டுவர ஐந்தாண்டுத் திட்டம் – விமானங்களின் எண்ணிக்கையை அதிகரித்தல் மற்றும் கடன் சுமையைக் கட்டுப்படுத்துதல் தொடர்பில் கவனம்

ஸ்ரீலங்கன் விமான சேவை எதிர்நோக்கியுள்ள நிதி நெருக்கடி, அதிகளவிலான விமானப் பயணத் தாமதங்கள், கடன் சுமை மற்றும் புதிய விமானங்களைக் கொள்வனவு செய்வதில் ஏற்பட்டுள்ள கொள்வனவு நடைமுறைத் தாமதங்கள் தொடர்பில் உட்கட்டமைப்பு வசதிகள் மற்றும் மூலோபாய அபிவிருத்தி பற்றிய துறைசார் மேற்பார்வைக் குழுவில் விரிவாகக் கலந்துரையாடப்பட்டது.குறித்த குழு, அதன் தலைவர் கௌரவ பாராளுமன்ற உறுப்பினர் எஸ்.எம். மரிக்கார் தலைமையில் அண்மையில் பாராளுமன்றத்தில் கூடியபோதே இது தொடர்பில் கவனம் செலுத்தப்பட்டது.தற்போது 23 விமானங்களைக் கொண்டுள்ள விமானச் சேவையின் விமானத் தொகுதி போதுமானதாக இல்லாமை மற்றும் அந்த விமானங்கள் சுமார் 12 வருடங்கள் பழைமையானவையாக இருப்பதால் விமானப் பயணங்களைப் பாதிக்கும் தொழில்நுட்பக் கோளாறுகள் மற்றும் தாமதங்கள் தொடர்பில் இதன்போது கலந்துரையாடப்பட்டது. ஒரு விமானத்தில் தொழில்நுட்பக் கோளாறு அல்லது வேறு காரணங்களால் தாமதம் ஏற்படும்போது, மாற்று விமானங்களைப் பயன்படுத்துவதில் காணப்படும் மட்டுப்பாடுகள் காரணமாக ஒட்டுமொத்த விமானப் போக்குவரத்து வலையமைப்பும் பாதிக்கப்படுவதாகவும் இதன்போது சுட்டிக்காட்டப்பட்டது.விமானங்களைக் கொள்வனவு செய்வதற்காக கடந்த காலங்களில் முன்னெடுக்கப்பட்ட வழமையான கொள்வனவு நடைமுறைகள் தோல்வியடைந்தமை மற்றும் அதனுடன் தொடர்புடைய நீண்டகாலத் தாமதங்கள் குறித்தும் குழுவின் கவனம் செலுத்தப்பட்டது. இந்நிலைக்குத் தீர்வாக விமானங்கள் மற்றும் அவற்றுடன் தொடர்புடைய உபகரணங்களைக் கொள்வனவு செய்வதற்கான விசேட கொள்வனவு வழிகாட்டுதல்கள் தயாரிக்கப்பட்டுள்ளதுடன், அவற்றை வர்த்தமானியில் வெளியிடுவதற்கான நடவடிக்கைகள் எடுக்கப்பட்டுள்ளதாகவும் இதன்போது தெரிவிக்கப்பட்டது. அத்துடன், கொள்வனவு நடவடிக்கைகளை நேரடியாகக் கண்காணிப்பதற்காக அமைச்சு மட்டத்தில் விசேட கொள்வனவுப் பிரிவொன்றும் நிறுவப்பட்டுள்ளதாகத் தெரிவிக்கப்பட்டது.புதிய கொள்வனவு வழிகாட்டுதல்களின் கீழ் விமானத் தொகுதியை விரிவுபடுத்தத் திட்டமிடப்பட்டுள்ளதுடன், எதிர்வரும் ஜூன் மாதமளவில் புதிய குறுகிய உடற்பகுதியைக் கொண்ட (Narrow-body) விமானமொன்றையும், அகன்ற உடற்பகுதியைக் கொண்ட (Wide-body) இரண்டு விமானங்களையும் விமானத் தொகுதியில் இணைத்துக்கொள்ள எதிர்பார்க்கப்படுவதாகவும் கலந்துரையாடப்பட்டது. 2029ஆம் ஆண்டளவில் விமானத் தொகுதியை ஆகக்குறைந்தது 29 விமானங்களாக அதிகரிப்பது ஐந்தாண்டுத் திட்டத்தின் இலக்காகும் என்றும் குறிப்பிடப்பட்டது.ஸ்ரீலங்கன் விமான சேவையின் நிதி நிலைமையை மேம்படுத்துவதற்காக, பழைய வங்கிக் கடன்கள் மற்றும் பிணைமுறிக் கடன்கள் உள்ளிட்டவற்றைப் பொறுப்பேற்பது உட்பட பல்வேறு நடவடிக்கைகளை திறைசேரி முன்னெடுத்துள்ளதாக இதன்போது விளக்கமளிக்கப்பட்டது. அத்துடன், விமானங்களுக்கான குத்தகைக் கட்டணங்களைக் குறைத்தல், எரிபொருள் செலவுகளைக் கட்டுப்படுத்துதல் மற்றும் விமான சேவையின் வருமானத்தை அதிகரிப்பதற்கான வர்த்தக உபாயங்களை நடைமுறைப்படுத்துதல் தொடர்பிலும் கவனம் செலுத்தப்பட்டது.மத்திய கிழக்கு பிராந்தியத்தில் நிலவும் நெருக்கடி நிலைமை, எரிபொருள் விலை அதிகரிப்பு மற்றும் சர்வதேச விமான சேவைகளுடனான போட்டித்தன்மை ஆகியனவும் ஸ்ரீலங்கன் விமான சேவையின் செயற்பாடுகள் மற்றும் வருமானத்தில் தாக்கம் செலுத்துவதாக இதன்போது கலந்துரையாடப்பட்டது.மேலும், ஸ்ரீலங்கன் விமான சேவையை மறுசீரமைப்பதற்காக அரசாங்கத்தினால் நியமிக்கப்பட்ட குழு, புதிய முதலீட்டாளர்களைப் பெற்றுக்கொள்ளுதல், அரச-தனியார் பங்காண்மையை ஏற்படுத்துதல் அல்லது அரசாங்கத்தின் கீழ் தொடர்ந்து நிர்வகித்து, அதன் செலவுகளை ஈடுகட்டக்கூடிய நிலைக்குக் கொண்டுவருதல் உள்ளிட்ட மாற்று வழிகள் குறித்து ஆராய்ந்து வருவதாகவும் தெரிவிக்கப்பட்டது.அதற்கமைய, அடுத்த இரண்டு அல்லது மூன்று வருடங்களுக்குள் ஸ்ரீலங்கன் விமான சேவையை அதன் செலவுகளை ஈடுகட்டக்கூடிய நிலைக்குக் கொண்டுவருவதற்காக எடுக்கப்பட வேண்டிய நடவடிக்கைகள் உள்ளடங்கிய விரிவான அறிக்கையொன்றை நவம்பர் 30ஆம் திகதிக்கு முன்னர் பாராளுமன்றத்திற்கும் அமைச்சுக்கும் சமர்ப்பிக்குமாறு உரிய அதிகாரிகளுக்கு குழு அறிவுறுத்தியது.இந்தக் குழுக் கூட்டத்தில் கௌரவ பாராளுமன்ற உறுப்பினர்களான அஜித் பி. பெரேரா, நளின் பண்டார ஜயமஹ, ரவீந்திர பண்டார, மஞ்சுள சுரவீர ஆரச்சி, சதுர கலப்பத்தி, தனுஷ்க ரங்கநாத், ஜகத் விதான, சாந்த பத்ம குமார சுபசிங்க மற்றும் சட்டத்தரணி கீதா ஹேரத் ஆகியோர் கலந்துகொண்டனர்.


2026-11-14

இலங்கையின் இறக்குமதி வரிக் கொள்கைகள் மற்றும் வர்த்தக உடன்படிக்கைகள் தொடர்பில் வழி வகைகள் பற்றிய குழுவில் கலந்துரையாடப்பட்டது

இலங்கையின் இறக்குமதி வரிக் கொள்கைகள் மற்றும் வர்த்தக உடன்படிக்கைகள் தொடர்பில் கௌரவ பாராளுமன்ற உறுப்பினர் விஜேசிறி பஸ்நாயக்க அவர்களின் தலைமையில் கூடிய வழி வகைகள் பற்றிய குழுவில் விரிவாகக் கலந்துரையாடப்பட்டது.வணிகத் திணைக்களத்தின் பணிப்பாளர் நாயகம் (பதில்) சோமசேன மகாதிவுல்வேவ அவர்கள் இது பற்றிய விரிவான விளக்கத்தைக் குழுவுக்கு வழங்கினார். இலங்கையின் இரு தரப்பு மற்றும் பல்தரப்பு வர்த்தக உடன்படிக்கைகளின் நிலைமைகள் மற்றும் அவற்றைத் தொடர்ந்து முன்கொண்டு செல்வது உள்ளிட்ட விடயங்கள் குறித்து இங்கு கலந்துரையாடப்பட்டது.கலந்துரையாடல் மட்டத்தில் இருக்கும் வர்த்தக உடன்படிக்கைகள் குறித்து சாத்தியக் கூற்று ஆய்வுகளை மேற்கொண்டு தொடர்ச்சியாக அவற்றை முன்னெடுத்துச் செல்வதற்கான நடவடிக்கைகளை எடுக்குமாறு குழு வலியுறுத்தியது.இந்தக் குழுக் கூட்டத்தில் கௌரவ பிரதியமைச்சர்களான சதுரங்க அபேசிங்க, எரங்க வீரரத்ன மற்றும் கௌரவ பாராளுமன்ற உறுப்பினர்களான அசோக சபுமல் ரண்வல, திலின சமரக்கோன், சம்பிக்க ஹெட்டிஆரச்சி, சதுர கலப்பதி உள்ளிட்டோர் கலந்துகொண்டனர். 


2026-11-13

வெளிநாட்டுப் பயங்கரவாதிப் போராளிகளைத் தடுத்தல் சட்டமூலத்திற்கு துறைசார் மேற்பார்வைக் குழுவில் அங்கீகாரம்

வெளிநாட்டுப் பயங்கரவாதிப் போராளிகளைத் தடுத்தல் சட்டமூலத்திற்கு பொருளாதார அபிவிருத்தி மற்றும் சர்வதேச உறவுகள் பற்றிய துறைசார் மேற்பார்வைக் குழுவில் அங்கீகாரம் வழங்கப்பட்டது. சர்வதேச உறவுகள் பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் சட்டத்தரணி லக்மாலி ஹேமச்சந்திர அவர்களின் தலைமையில் அண்மையில் பாராளுமன்றத்தில் கூடியபோதே இச்சட்டமூலம் ஆராயப்பட்டு அங்கீகரிக்கப்பட்டது. வெளிநாட்டு பயங்கரவாதிப் போராளிகளால் எதிர்நோக்கப்படும் அச்சுறுத்தலைத் தடுத்தல் மற்றும் ஒடுக்குதல் தொடர்பான 2014ஆம் ஆண்டு செப்தெம்பர் மாதம் 24ஆம் திகதி ஏற்றுக்கொள்ளப்பட்ட ஐக்கிய நாடுகள் பாதுகாப்புப் பேரவைத் தீர்மானம் 2178 இற்கு பயன்கொடுப்பதற்கும், அத்துடன் அவற்றுடன் தொடர்புபட்ட அல்லது அவற்றின் இடைநேர்விளைவான கருமங்களுக்காக ஏற்பாடு செய்வதற்குமான சட்டமூலமாக இது சமர்ப்பிக்கப்பட்டுள்ளது.இச்சட்டமூலத்தை வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் கடந்த ஒக்டோபர் மாதம் 20ஆம் திகதி முதலாவது மதிப்பீட்டுக்காகப் பாராளுமன்றத்தில் சமர்ப்பித்திருந்தார்.இலங்கை பிரஜையொருவர் அல்லது இலங்கை பிரஜை  அல்லாத வேறொரு நாட்டின் பிரஜை ஒருவர் இலங்கையில் சமுகமாயிருக்கையில், அல்லது இலங்கைக்கு வெளியே தவறிழைத்திருந்து அது அந்நாட்டின் சட்டத்தின் கீழ் தவறொன்றாக இருப்பின் இச்சட்டத்தின் கீழ் இலங்கையில் நடவடிக்கை எடுக்க முடியும். பயங்கரவாத செயல்களை மேற்கொள்ளல், திட்டமிடுதல், தயார்செய்தல் அல்லது அதில் பங்குபற்றுதல், பயங்கரவாத பயிற்சிகளை வழங்குதல் அல்லது பெறுதல் போன்றவை இச்சட்டத்தின் கீழ் தவறுகளாகக் குறிப்பிடப்பட்டிருப்பதாக அதிகாரிகள் குழுவில் விளக்கமளித்தனர்.புலம்பெயர்ந்து வாழும் இலங்கையர்களை இன ரீதியாக இலக்குவைத்து கொண்டுவரப்படும் சட்ட ஏற்பாடு இல்லையென்றும் அதிகாரிகள் குறிப்பிட்டனர். விரிவான கலந்துரையாடல்களைத் தொடர்ந்து குறித்த சட்டமூலத்திற்கு குழு அங்கீகாரம் வழங்கியது. குழுவின் உறுப்பினரான கௌரவ பாராளுமன்ற உறுப்பினர் சிவஞானம் சிறிதரன் இச்சட்டமூலத்திற்கு தனது எதிர்ப்பினைப் பதிவுசெய்தார்.இக்குழுக் கூட்டத்தில் கௌரவ பாராளுமன்ற உறுப்பினர்களான சுரங்க ரத்னாயக்க, திலின சமரக்கோன், விஜேசிறி பஸ்நாயக்க, சிவஞானம் சிறிதரன் உள்ளிட்டோரும், வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சு, பாதுகாப்பு அமைச்சு மற்றும் சட்டமா அதிபர் திணைக்களம், சட்டவரைஞர் திணைக்களம் ஆகியவற்றைப் பிரதிநிதித்துவப்படுத்தி அரசாங்க அதிகாரிகளும் கலந்துகொண்டனர். 


2026-11-13

அதிபர் சேவையில் காணப்படும் சம்பள முரண்பாடு குறித்து துறைசார் மேற்பார்வைக் குழுவின் உபகுழுவில் ஆராய்வு

ஆசிரியர் சேவையிலிருந்து அதிபர் சேவைக்கு நியமிக்கப்படும்போது ஏற்படும் சம்பள முரண்பாடுகள் தொடர்பில் கல்வி, தொழிற்படை மற்றும் மனித மூலதனம் பற்றிய துறைசார் மேற்பார்வைக் குழுவினால் நியமிக்கப்பட்ட உபகுழுவில் விரிவாக ஆராயப்பட்டது.குறித்த உபகுழு அதன் தலைவர் கௌரவ பாராளுமன்ற உறுப்பினர் சுனில் ராஜபக்ஷ அவர்களின் தலைமையில் அண்மையில் கூடியபோதே இது பற்றி ஆராயப்பட்டது.அதிபர் சேவையில் உள்ள தொழிற்சங்கங்களின் பிரதிநிதிகள், கல்வி உயர்கல்வி மற்றும் தொழிற்கல்வி அமைச்சு, நிதி, திட்டமிடல் மற்றும் பொருளாதார அமைச்சு ஆகியவற்றின் அதிகாரிகள், முகாமைத்துவ சேவைத் திணைக்களத்தின் அதிகாரிகள் உள்ளிட்ட பலரும் இதில் கலந்துகொண்டனர்.ஆசிரியர் சேவையில் 2014 ஒக்டோபர் 22ஆம் திகதி வெளியிடப்பட்ட இலங்கை அதிபர் சேவைப் பிரமாணக் குறிப்பின் பிரகாரம், ஆசிரியர் சேவையிலிருந்து அதிபர் சேவைக்கு இணைவது பதவி உயர்வாகக் கருதப்படாமல் “புதிய நியமனம்” எனக் கருதப்படுவதன் காரணமாக சம்பள முரண்பாடு ஏற்பட்டிருப்பதாக அதிபர் சேவையில் உள்ள தொழிற்சங்கங்களின் பிரதிநிதிகள் குழுவில் சுட்டிக்காட்டினர்.ஆசிரியர் சேவையின் முதலாம் தரத்திலிருந்து அதிபர் சேவையின் IIIஆம் தரத்திற்கு நியமிக்கப்படும்போது, சம்பள அதிகரிப்புகளுக்கு இடையிலான பாரிய வேறுபாடு காரணமாக இந்த நிலைமை மேலும் தீவிரமடைவதாக அவர்கள் குறிப்பிட்டார்.  அத்துடன், 03/2014 சுற்றறிக்கையின் மூலம் அதிபர் சேவைக்கு நியமிக்கப்படும்போது ஏற்படும் சம்பள வேறுபாட்டை ஈடுசெய்வதற்காக சரிசெய்தல் கொடுப்பனவு வழங்கப்பட்ட போதிலும், சேவைக்காலம் அதிகரிக்கும்போது ஆசிரியர் சேவையில் தொடர்ந்திருந்தால் கிடைக்கக்கூடிய உயர்ந்த சம்பள அதிகரிப்புகள் கிடைக்காத காரணத்தால் மீண்டும் சம்பள இடைவெளி ஏற்படுவதாகவும் தெரிவித்தனர்.இதன் காரணமாக ஆசிரியர் சேவையின் முதலாம் மற்றும் 2-Iஆம் தரங்களில் உள்ள சிரேஷ்ட மற்றும் அனுபவமிக்க ஆசிரியர்கள் அதிபர் பரீட்சைக்குத் தோற்றுவதற்கும் அதிபர் சேவையில் இணைவதற்கும் தயக்கம் காட்டும் நிலை ஏற்பட்டுள்ளதாகவும் இங்கு சுட்டிக்காட்டப்பட்டது.இது விடயம் தொடர்பில் குழுவிற்கு சமர்ப்பிக்கப்பட்ட விடயங்களை ஆராய்ந்து சம்பள ஆணைக்குழுவுக்கு உரிய பரிந்துரைகளை அனுப்பிவைக்க நடவடிக்கை எடுக்கப்படும் என உபகுழுவின் தலைவர் வலியுறுத்தினார்.அது மாத்திரமன்றி, அதிபர் சேவையில் உள்ளவர்கள் எதிர்கொள்ளும் ஏனைய பிரச்சினைகள் குறித்து கல்வி அமைச்சு மற்றும் முகாமைத்துவ சேவைத் திணைக்களத்துடன் கலந்துரையாடல்களை நடத்துவதற்கும் உபகுழு இங்கு தீர்மானித்தது. இந்தக் குழுக் கூட்டத்தில் கௌரவ பாராளுமன்ற உறுப்பினர்களான அபூபக்கர் ஆதம்பாவா, சுகத் வசந்த.த சில்வா மற்றும் சானக மாதுகொட ஆகியோரும் கலந்துகொண்டனர். 






பதிப்புரிமை © இலங்கை பாராளுமன்றம்.

முழுப்பதிப்புரிமையுடையது.

வடிவமைத்து உருவாக்கியது  TekGeeks