பாராளுமன்றத்தின் கையேடு
இலங்கையில் தேர்தல் முறை
பாராளுமன்றம் எவ்வாறு செயல்படுகிறது
பாராளுமன்ற அலுவல்கள்
உள் நுழைந்து உங்கள் பாராளுமன்றத்துடன் இணைந்து கொள்க
2022-06-10
நகர அபிவிருத்தி அதிகாரசபையின் கீழ் ஆரம்பிக்கப்பட்ட, அபிவிருத்தி செய்யப்பட்டு, நிதியுதவி பெற்று தற்போது முடங்கியுள்ள செயற்றிட்டங்களை வெற்றிகரமாக நிறைவுசெய்து நாட்டை மீண்டும் வருமானம் ஈட்டும் வகையில் மாற்றியமைக்க வேண்டுமென அரசாங்கப் பொறுப்பு முயற்சிகள் பற்றிய குழுவின் தலைவர் (கோப் குழு) பாராளுமன்ற உறுப்பினர் பேராசிரியர் சரித ஹேரத் நகர அதிகார சபையின் அதிகாரிகளுக்கு ஆலோசனை வழங்கினார்.
நகர அபிவிருத்தி அதிகார சபையின் 2017 மற்றும் 2018ஆம் ஆண்டுக்கான கணக்காய்வறிக்கை மற்றும் தற்போதைய செயற்பாடுகள் தொடர்பில் கலந்துரையாடுவதற்காக நகர அதிகாரசபையின் அதிகாரிகள் அண்மையில் கூப் குழு முன்னிலையில் அழைக்கப்பட்டபோதே இந்த ஆலோசனை வழங்கப்பட்டது.
இதன்போது நகர அபிவிருத்தி அதிகார சபையின் கீழுள்ள மற்றும் மேற்பார்வையிலுள்ள பல திட்டங்கள் வெற்றிகரமான இலாபம் ஈட்டும் நிலையில் இல்லை என்பது இதன்போது தெரியவந்தது. இதன்படி, ஹம்பாந்தோட்டை அபிவிருத்தித் திட்டம், மீதொட்டமுல்ல புத்துயிர் திட்டம், மில்லேவ நிலப்பரப்பிலிருந்து 812 ஏக்கரை பயன்படுத்தி கைத்தொழில் பூங்கா அமைக்கும் திட்டம் உள்ளிட்ட பல திட்டங்களை கோப் குழுவின் தலைவர் சுட்டிக்காட்டினார்.
குறிப்பாக, ஹம்பாந்தோட்டை அபிவிருத்தித் செயற்திட்டத்தின்கீழ் ருஹுணுபுர சர்வதேச மாநாட்டு மண்டபம் நிர்மாணிக்க செலவிடப்பட்ட நிதி தொடர்பில் மற்றும் இதை மேலதிக நிதி பராமரிப்புக்கென 2017 முதல் 2019 வரை செலவிடப்பட்ட நிதி தொடர்பிலும் இதன்போது விவாதிக்கப்பட்டது. குறிப்பாக, 2017ஆம் ஆண்டு முதல் முதல் 2019ஆம் ஆண்டு வரையிலான செலவினமாக 75,889,769 ரூபா செலவிடப்பட்டுள்ளதுடன், 2017 முதல் 2019 வரை இதன் மூலம் பெறப்பட்ட வருமானம் ரூ.15,896,360 ஆகும். இது ஹம்பாந்தோட்டை நகர அபிவிருத்தி திட்டத்தின் ஒரு அங்கம் என நகர அபிவிருத்தி அதிகார சபையை பிரதிநிதித்துவப்படுத்தி கலந்துகொண்ட அதிகாரிகள் தெரிவித்தனர். எவ்வாறாயினும், பிரதான அபிவிருத்தித் திட்டம் நடைமுறைப்படுத்தப்படாமையினால் இத்திட்டம் வெற்றியளிக்கவில்லை எனவும் இதன்போது தெரிவித்தனர். இவ்வாறு தொடர்ந்து நட்டமடைவதால் இரண்டு நிறுவனங்களினதும் நிர்வாக ஒதுக்கீட்டின் மூலம் இலாபம் ஈட்ட நடவடிக்கை எடுக்கப்படும் என்றும் அவர் கூறினார். ருஹுணுபுர சர்வதேச மாநாட்டு மண்டபத்தை வெளிநாட்டு நிதியுதவியின் கீழேயே நிர்மாணிக்கவுள்ளதாகவும் இத்திட்டத்திற்கு நகர அபிவிருத்தி அதிகாரசபை ஆலோசனைகயை மாத்திரமே வழங்குவதாகவும் இத்திட்டத்திற்கு நகர அபிவிருத்தி அதிகார சபைக்கு சொந்தமான நிதி செலவிடப்படவில்லை எனவும் அவ் அதிகாரிகள் இதன்போது தெரிவித்தனர்.
இதன்போது கோப் குழுவின் தலைவர் இது தொடர்பில் ஆராய்ந்து வருமானம் ஈட்டும் மட்டத்திற்கு கொண்டுவர நடவடிக்கை எடுக்கப்பட வேண்டுமென தெரிவித்தார்.
மேலும், 2017 ஆம் ஆண்டு மீதொட்டமுல்ல மண்சரிவின் பின்னர் மீதொட்டுமுல்ல புத்துயிர் திட்டம் மூலமாக குப்பை மேட்டை பராமரிப்பதற்காக 30 முதல் 12 மீட்டர் வரை போர்வை அடுக்கு முறைமையை அமைப்பதற்கும், முறையான வாயு வெளியேற்றல் அலகுகளை அமைப்பதற்கும், அதன் செயற்திறன் குறித்தும் 2020 ஆம் ஆண்டளவில் ரூ.269.5 மில்லியனை தனியார் நிறுவனத்திற்கு ஒதுக்கீடு செய்தமை தொடர்பிலும் இதன்போது விவாதிக்கப்பட்டது. ஆனால், தற்போது குறித்த குப்பைகள் கொட்டுவதற்கென அமைக்கப்பட்ட இடம் முறையான பராமரிப்பு மற்றும் கண்காணிப்பின்றி காணப்படுகின்றமை தெரியவந்துள்ளது. அதன்படி, இரண்டு மாதங்களுக்குள் இது தொடர்பாக விசாரணை நடத்தி அறிக்கை சமர்ப்பிக்குமாறு கோப் குழுவின் தலைவர் பரிந்துரை செய்தார்.
அத்துடன், நகர அபிவிருத்தி அதிகாரசபையின் கீழ் உள்ள விடுமுறை விடுதிகள் தொடர்பிலும் கவனம் செலுத்தப்பட்டதுடன், நகர அபிவிருத்தி அதிகார சபையின்கீழ் அனைத்து மாவட்டங்களிலும் உள்ள விடுதிகள் அந்த மாவட்டத்தில் மிகவும் இரம்மியமான இடத்தில் அமைந்துள்ளதாக அக்குழுவிற்கு கலந்துகொண்ட பாராளுமன்ற உறுப்பினர்கள் தெரிவித்தனர். எனவே, விலைமனுகோரல் கோரப்படும்போது அரசு வருமானத்தை அதிகரிக்க நடவடிக்கை எடுக்கப்பட வேண்டுமென சுட்டிக்காட்டினர். இந்த உல்லாச விடுதிகளை வாடகைக்கு எடுப்பவர்கள் சில வேளைகளில் அரசியல் காரணங்களுக்காக பெற்றுக்கொள்வதாகவும் இக்குழுவில் கலந்துகொண்ட பாராளுமன்ற உறுப்பினர்கள் சுட்டிக்காட்டினர். இந்த ஓய்வு விடுதிகள் முறையற்ற பராமரிப்பின் காரணமாக பராமரிப்பின்றி பாழடைந்த நிலையில் இருப்பதாகவும் தெரிவிக்கப்பட்டது. 2011ஆம் ஆண்டு நிறுவப்பட்ட ரெஸ்ட் ஹவுஸ் நிறுவனத்துக்குச் சொந்தமான இந்த ஓய்வு விடுதிகளின் செயற்பாடு குறித்தும் இதன்போது ஆலோசிக்கப்பட்டது.
அதன்படி, குறித்த உல்லாச விடுதிகளை புனரமைப்பதற்கான திட்டத்தை உள்ளடக்கி ஒரு மாதத்திற்குள் அறிக்கை சமர்ப்பிக்குமாறு கோப் குழுவின் தலைவர் தெரிவித்தார்.
மேலும், கொழும்பில் நாளாந்தம் பிரவேசிக்கும் வாகனங்களை நிறுத்துவதற்கான பிரத்தியேக தரிப்பு பிரதேசங்களின் எண்ணிக்கையை அதிகரிப்பது மற்றும் கொழும்பு நகருக்கு தினமும் வருகைதரும் மக்களின் சுகாதார தேவைகளை பூர்த்தி செய்வதற்கு தேவையான வசதிகளை மேம்படுத்தல் தொடர்பிலும் கலந்துரையாடப்பட்டது. கொழும்பில் விஜேவர்தன மாவத்தையை அண்மித்துள்ள 2 ஏக்கர் ரூட் 2 அளவிளான 21.4 பேர்ச் காணியை அபிவிருத்தி நடவடிக்கைகளுக்காக நீண்டகால குத்தகை அடிப்படையில் தனியார் நிறுவனமொன்றுக்கு குத்தகைக்கு வழங்குவது தொடர்பிலும் கலந்துரையாடப்பட்டது. நகர்ப்புற நிலப் பயன்பாட்டுக் கொள்கைத்திட்டமொன்றை உருவாக்கி நடைமுறைப்படுத்துவதில் அதிகாரசபை தவறியதையும் கோப் குழு இதன்போது அவதானத்தில் கொண்டது.
இக்குழுவில் அமைச்சர் கௌரவ மஹிந்த அமரவீர பாராளுமன்ற உறுப்பினர்களான கௌரவ மஹிந்தானந்த அலுத்கமகே, கௌரவ பாட்டளி சம்பிக ரணவக்க, கௌரவ ஜயந்த சமரவீர, கௌரவ (கலாநிதி) சரத் வீரசேக்கர, கௌரவ இந்திக்க அனுருத்த, கௌரவ சாகர காரியவசம், கௌரவ ரோஹித அபேகுணவர்தன, கௌரவ பிரேம்நாத் சி. தொலவத்த, கௌரவ சாணக்கியன் ராஜபுத்திரன் இராசமாணிக்கம், கௌரவ மதுர விதானகே மற்றும் கௌரவ எஸ்.எம். மரிக்கார் ஆகியோர் கலந்துக்கொண்டனர்.
2026-11-18
கம்பஹா மாவட்ட “சணச” சங்கத்தில் இடம்பெற்றுள்ள நிதி முறைகேடுகள் மற்றும் வைப்பாளர்களின் பணத்தை மீளச் செலுத்த முடியாத நிலைமை தொடர்பில் கலந்துரையாடுவதற்காக, அரசாங்கக் கணக்குகள் பற்றிய குழுவினால் நியமிக்கப்பட்ட கூட்டுறவுத் துறையில் நிலவும் நெருக்கடிகள் தொடர்பில் ஆராய்வதற்கான உபகுழு, அதன் தலைவர் கௌரவ பாராளுமன்ற உறுப்பினர் ருவன்திலக ஜயக்கொடியின் தலைமையில் அண்மையில் பாராளுமன்றத்தில் கூடியது.கம்பஹா மாவட்ட “சணச” சங்கத்தின் முகாமைத்துவத்தின் பலவீனங்கள் தொடர்பான கணக்காய்வாளர் நாயகத்தின் அறிக்கையில் குறிப்பிடப்பட்டுள்ள விடயங்கள் குறித்து இங்கு ஆராயப்பட்டதுடன், உரிய அனுமதியின்றி சங்கத்தின் நிதி தனியார் நிறுவனங்களில் முதலீடு செய்யப்பட்டமையால் ஏற்பட்டுள்ள நிதி நெருக்கடி குறித்தும் விரிவாகக் கலந்துரையாடப்பட்டது. இந்த முதலீடுகள் காரணமாக உறுப்பினர்கள் மற்றும் வெளிப்புற வைப்பாளர்களின் வைப்புப் பணத்தை மீளச் செலுத்த முடியாத நிலைமை ஏற்பட்டுள்ளதாக இதன்போது தெரியவந்தது.மேலும், கூட்டுறவுத் திணைக்களத்தின் மேற்பார்வை மற்றும் ஒழுங்குபடுத்தல் செயற்பாடுகளில் காணப்பட்ட குறைபாடுகள், சங்கத்தின் சொத்துக்களைத் தீர்ப்பதில் உள்ள சிக்கல்கள், நீதிமன்றத் தடையுத்தரவுகள் மற்றும் சம்பந்தப்பட்ட பொறுப்புவாய்ந்த தரப்பினருக்கு எதிராக சட்ட நடவடிக்கை எடுக்க வேண்டியதன் அவசியம் குறித்தும் கலந்துரையாடப்பட்டது.வைப்பாளர்களின் பணத்தை மீள வழங்குவதற்காக, சங்கத்திற்குச் சொந்தமான சொத்துக்களை மதிப்பீடு செய்து அவற்றை விற்பனை செய்வதற்கான சாத்தியக்கூறுகளை ஆராய்தல், சொத்துக்களை அகற்றுவதற்கு நீதிமன்றத்தினால் விதிக்கப்பட்டுள்ள தடையுத்தரவுகளை நீக்குவதற்குத் தேவையான நடவடிக்கைகளை மேற்கொள்ளுதல் மற்றும் தற்போது கையிருப்பில் உள்ள நிதியை வைப்பாளர்களிடையே நியாயமான அடிப்படையில் பகிர்ந்தளித்தல் தொடர்பிலும் இதன்போது கவனம் செலுத்தப்பட்டது.அத்துடன், அங்கீகரிக்கப்படாத முதலீடுகளை மேற்கொண்டமைக்குப் பொறுப்பான முன்னாள் பணிப்பாளர் சபை உறுப்பினர்களிடமிருந்து அதற்கான நட்டஈட்டுத் தொகையை அறவிடுதல், சம்பந்தப்பட்ட தனியார் நிறுவனத்திற்கு எதிராக சட்ட நடவடிக்கை எடுத்தல் மற்றும் நிறைவு செய்யப்படாத திட்டங்களைப் பூர்த்தி செய்து அவற்றின் மூலம் வருமானம் ஈட்டுவதற்கான சாத்தியக்கூறுகள் குறித்தும் கலந்துரையாடப்பட்டது.வைப்பாளர்களின் முழு வைப்புத் தொகையையும் மீளச் செலுத்துவதற்கான தெளிவானதும் நடைமுறைச் சாத்தியமானதுமான பொறிமுறையொன்றை முன்வைக்க வேண்டியதன் அவசியம் இதன்போது வலியுறுத்தப்பட்டது. அத்துடன், எதிர்கால நடவடிக்கைகள் தொடர்பில் கூட்டுறவு அபிவிருத்தித் திணைக்களத்தின் மேல் மாகாண மற்றும் கம்பஹா மாவட்ட அதிகாரிகளுடனும் கலந்துரையாடப்பட்டது.இந்தக் கூட்டத்தில் உபகுழுவின் கௌரவ பாராளுமன்ற உறுப்பினர்களான சட்டத்தரணி துஷாரி ஜயசிங்க, டீ. கே. ஜயசுந்தர மற்றும் சுசந்த குமார நவரத்ன ஆகியோரும் கலந்துகொண்டனர்.
2026-11-17
விஞ்ஞானம், தொழில்நுட்பம் மற்றும் டிஜிட்டல் பரிணாமம் பற்றிய துறைசார் மேற்பார்வைக் குழு, விஞ்ஞானம் மற்றும் தொழில்நுட்ப அமைச்சின் கீழ் இயங்கும் பல நிறுவனங்களுக்கு கண்காணிப்பு விஜயமொன்றை மேற்கொண்டது.இதற்கமைய, குழுவினர் இன்று (நவ. 17) இலங்கை நானோ தொழில்நுட்ப நிறுவனம் (SINTEC) மற்றும் இலங்கை உயிரித் தொழில்நுட்ப நிறுவனம் (SLIBTEC) ஆகிய நிறுவனங்களுக்கு விஜயம் செய்து அவற்றின் செயற்பாடுகளைப் பார்வையிட்டனர்.2025/2026 ஆம் ஆண்டுகளுக்கான குறித்த நிறுவனங்களின் முன்னேற்றங்களை மீளாய்வு செய்தல், 2027 ஆம் ஆண்டுக்கான செயற்பாட்டுத் திட்டத்தைப் பரிசீலித்தல் மற்றும் நிறுவன வளாகங்களில் முன்னெடுக்கப்படும் செயற்பாடுகளை அவதானித்தல் ஆகியன இந்த விஜயத்தின் நோக்கங்களாகும்.குழுவின் தலைவர் கௌரவ பாராளுமன்ற உறுப்பினர் வைத்தியர் ஜனக சேனாரத்ன தலைமையில் மேற்கொள்ளப்பட்ட இந்தக் கண்காணிப்பு விஜயத்தில் கௌரவ பாராளுமன்ற உறுப்பினர்களான தனுர திசாநாயக்க, லசித் பாஷண கமகே மற்றும் சதுர கலப்பத்தி ஆகியோரும் கலந்துகொண்டனர்.
2026-11-17
ஆசிரியர் சேவையிலிருந்து அதிபர் சேவைக்கு நியமிக்கப்படும்போது ஏற்படும் சம்பள முரண்பாடுகள் தொடர்பில், கல்வி, தொழிற்படை மற்றும் மனித மூலதனம் பற்றிய துறைசார் மேற்பார்வைக் குழுவினால் நியமிக்கப்பட்ட உபகுழுவில் மேலும் கலந்துரையாடப்பட்டது.குறித்த உபகுழு அதன் தலைவர் கௌரவ பாராளுமன்ற உறுப்பினர் சுனில் ராஜபக்ஷ தலைமையில் அண்மையில் கூடியபோதே இவ்விடயம் தொடர்பில் கலந்துரையாடப்பட்டது.இக்கலந்துரையாடலில் கல்வி, உயர்கல்வி மற்றும் தொழிற்கல்வி அமைச்சு, நிதி, திட்டமிடல் மற்றும் பொருளாதார அபிவிருத்தி அமைச்சு, பொது நிர்வாகம், மாகாண சபைகள் மற்றும் உள்ளூராட்சி அமைச்சு, அரச சேவை ஆணைக்குழு ஆகியவற்றைப் பிரதிநிதித்துவப்படுத்தி சிரேஷ்ட அதிகாரிகள் கலந்துகொண்டனர்.ஆசிரியர் சேவையைச் சேர்ந்த அதிகாரிகள் அதிபர் சேவைக்கு நியமிக்கப்படும்போது ஏற்படும் சம்பள அதிகரிப்பு இடைவெளிகள் மற்றும் சம்பள முரண்பாடுகள் தொடர்பில் இங்கு விரிவாகக் கலந்துரையாடப்பட்டது. ஒரு சேவைக்கு மாத்திரம் தனித்தனியாக சம்பளத் திருத்தங்களை மேற்கொள்வதன் மூலம், ஒட்டுமொத்த அரச சேவையின் ஏனைய சேவைகளுடன் ஒப்பிடுகையில் பிரச்சினைகள் ஏற்படுவதாகவும் இதன்போது சுட்டிக்காட்டப்பட்டது.சேவைப் பிரமாணக் குறிப்புகள் மற்றும் ஆட்சேர்ப்புக்கான வயதெல்லைகளைத் திருத்துதல், அதிபர்களுக்கான விசேட கொடுப்பனவுகள் மற்றும் போக்குவரத்து வசதிகள், பாடசாலை வகைப்படுத்தல் மற்றும் வெற்றிடங்களை நிரப்புதல், முறையான இடமாற்றக் கொள்கை, ஆசிரியர் மற்றும் அதிபர் உத்தியோகபூர்வ இல்லங்களைப் புனரமைத்தல் உள்ளிட்ட பல்வேறு விடயங்கள் தொடர்பில் அதிகாரிகளுடன் உபகுழு விரிவாகக் கலந்துரையாடியது.இவ்விடயம் தொடர்பில் மேலும் கலந்துரையாடிய பின்னர், முன்மொழிவுகளை உள்ளடக்கிய இறுதி அறிக்கையை துறைசார் மேற்பார்வைக் குழுவிடம் சமர்ப்பிக்கத் திட்டமிடப்பட்டுள்ளது.இக்கூட்டத்தில் கௌரவ பாராளுமன்ற உறுப்பினர்களான அபூபக்கர் அத்தம்பாவ, சுகத் வசந்த. டி சில்வா, சுஜீவ திசாநாயக்க மற்றும் சானக மாதுகொட ஆகியோரும் கலந்துகொண்டனர்.
2026-11-16
சுற்றாடல், கமத்தொழில் மற்றும் வளங்களின் நிலைத்தன்மை பற்றிய துறைசார் மேற்பார்வைக் குழு அதன் தலைவர் கௌரவ பாராளுமன்ற உறுப்பினர் ஹெக்டர் அப்புஹாமி தலைமையில் அண்மையில் பாராளுமன்றத்தில் கூடியது.இதில், யானை – மனித மோதலைக் கட்டுப்படுத்துதல், காட்டு யானைகளின் இடம்பெயர்வு முறைகளைக் கண்டறிதல் மற்றும் யானைகளைப் பாதுகாப்பதற்குப் புதிய தொழில்நுட்பங்களைப் பயன்படுத்துதல் தொடர்பில் விரிவாகக் கலந்துரையாடப்பட்டது. அத்துடன், காவந்திஸ்ஸ யானையின் மரணம் தொடர்பிலும் கவனம் செலுத்தப்பட்டது.யானைகளின் வாழ்விடங்கள் இழக்கப்படுதல், பாரம்பரிய யானை வழித்தடங்கள் தடைப்படுதல் மற்றும் குடியிருப்புகள், விவசாய நிலங்களை அண்மித்த பகுதிகளில் உணவு தேடிச் செல்லுதல் ஆகியன யானை – மனித மோதல் அதிகரிப்பதற்கான பிரதான காரணங்களாக இதன்போது கலந்துரையாடப்பட்டன. யானைகளின் இடம்பெயர்வு முறைகளைக் கண்டறிவதற்காக GPS மற்றும் செய்மதிக் கழுத்துப்பட்டித் தொழில்நுட்பத்தைப் பயன்படுத்துவதன் முக்கியத்துவமும் இதன்போது வலியுறுத்தப்பட்டது.யானை – மனித மோதலைக் குறைப்பதற்காக பிரதேச மட்டத்தில் வனவிலங்கு அதிகாரிகள், கிராம உத்தியோகத்தர்கள் மற்றும் கிராம மக்களை உள்ளடக்கிய கூட்டுக் குழுக்களை அமைத்தல், சமூகப் பங்கேற்பை வலுப்படுத்துதல் மற்றும் முன்கூட்டிய எச்சரிக்கைத் தொடர்பாடல் வலையமைப்புகளைச் செயற்படுத்துதல் தொடர்பிலும் கருத்துக்கள் பரிமாறப்பட்டன.அத்துடன், நோய்வாய்ப்பட்ட மற்றும் காயமடைந்த யானைகளுக்குச் சிகிச்சையளிக்கும்போது வனவிலங்கு கால்நடை மருத்துவர்கள் எதிர்கொள்ளும் சவால்கள் குறித்தும் கலந்துரையாடப்பட்டது. வனவிலங்கு திணைக்களத்தின் கால்நடை மருத்துவ அதிகாரிகளின் சேவை, யானைகளுக்கு மயக்க மருந்து செலுத்தும்போது காணப்படும் ஆபத்துகள் மற்றும் களத்தில் சிகிச்சையளிப்பதற்குத் தேவையான நடமாடும் மருத்துவ வசதிகள், நடமாடும் எக்ஸ்-ரே இயந்திரங்கள் போன்ற தொழில்நுட்ப உபகரணங்களின் அவசியம் குறித்தும் இதன்போது கவனம் செலுத்தப்பட்டது.இக்கூட்டத்தில் கௌரவ பாராளுமன்ற உறுப்பினர்களான கிங்ஸ் நெல்சன், உபுல் கித்சிறி, சட்டத்தரணி எம்.ஏ.சி.எஸ். சதுரி கங்கானி, சுதத் பலகல்ல, கிட்ணன் செல்வராஜ் மற்றும் சட்டத்தரணி பாக்ய ஸ்ரீ ஹேரத் ஆகியோர் கலந்துகொண்டனர்.
பாராளுமன்றத்திற்கு வருகை தருதல்
பாராளுமன்றத்தின் கையேடு
இலங்கையில் தேர்தல் முறை
பாராளுமன்றம் எவ்வாறு செயல்படுகிறது
பாராளுமன்ற அலுவல்கள்
பதிப்புரிமை © இலங்கை பாராளுமன்றம்.
முழுப்பதிப்புரிமையுடையது.
வடிவமைத்து உருவாக்கியது TekGeeks

